Sipui226's Profile

老實講，因為係附近返工緣故，由佢啱啱係海港城開舖嘅時候已經開始食佢，一開頭的確係唔差，以海港城嘅餐廳黎講佢真心係平民價而且份量多足夠飽肚，當其時亦覺得佢個杯「黑糖珍珠岩鹽厚鮮奶」以呢個價錢算係幾出色，佢嘅「台式粗薯條」亦係我會好想encore嘅小食。直至近呢兩個月外賣自取，開始發覺佢嘅價錢不變但份量明顯少咗，以前佢個滷肉飯係足夠一個女仔飽肚嘅，但依家感覺份量起碼少咗三分一，不論係飯定還是係滷肉，而且味道亦有啲飄忽不定，以今日叫咗個滷肉烏冬，麵條煮得腍冇咗之前個重彈牙嘅感覺⋯⋯最令我震驚係盒薯條個份量竟然比之前少四分三，感覺都幾誇張，而且食落味道亦都同之前唔同咗，之前係會帶有啲甜味同芝士粉葛，依家真心係齋薯條炸完就算，感覺都只係比M記薯條好少少，佢會比較脆口。之前會覺得係性價比之選，但依家就真係覺得少少偏貴喇，不過以海港城價錢黎講依然算係平嘅～值唔值就等大家親自去品嘗喇～ …Read More

係社交平台睇到啲food blogger嘅post好似幾吸引，於是下午茶時間走黎試。入內有幾枱客，但有一大枱人應該係識老細黎支持新開嘅，就咁walk-in入黎真係得個兩枱。入到去個staff就俾咗張QR code我哋咩都冇講就走咗，送食物黎亦都冇講任何野。完全冇service可言，所以幾surprise 埋單佢竟然收加一服務費。感覺佢連基本會收加一嘅餐廳service都冇，叫得自己做大牌檔想問咩有大排檔會收加一嘅咩？講返食物，一份餐嘅食物份糧少真心唔飽肚，啲前菜亦都非常之細兜。如果話要係大角咀食韓國菜嘅話，佢應該係包尾之選。個泡菜同喺超市買到嘅泡菜味道一模一樣。另外佢嘅價錢亦都比較貴，貴唔緊要，重點係食物份量小之餘亦都唔係話好食，真心食物質素非常普通，我諗唯一好嘅係佢真係得個裝修係可以俾人打吓卡。總結試過一次可一不可再，除非係單純想嚟打卡，如果真係想食好食嘅韓國菜同區真係有其他唔錯嘅選擇。…Read More