allwhatyoueat's Profile

朋友喺葵涌附近做野，就約返附近食晚飯。仲以為附近工廠區冇啖好食，點知俾我地搵到呢間魔芋麻辣雞。本身諗住入到去食雞煲，原來小菜都好吸引！呢度飲杯酒仲要超抵，$25一皮枝大啤，叫黎送小菜，傾下計，十足十大牌檔咁有風味。不過呢度好過大牌檔，因為喺室內又有冷氣電視。兩個人，叫3個餸。豉油皇鵝腸($98)出面冇乜邊間夠膽整呢味，心機野，淨係洗乾淨啲腸都好花時間。一上到黎，大大碟，加分！第一時間仔細望下，夠乾淨，食得！味道方面都唔錯，好爽脆，而且唔會太咸。避風塘茄子($88)呢個係靚姐推介嘅新菜式，見佢咁有誠意就叫嚟試下，價錢方面係少少貴，不過3味我地最鍾意食呢碟，茄子外面加左一層炸粉，外面鬆脆，裡面茄子捻捻地，仲保持到紫紫地色。四季豆炒臘肉($98)本身我鍾意四季豆，加上呢餐都冇肉，就叫左呢味。雖然味道辣咗少少，但係加碗白飯都好開胃，靚姐話已經有就香港人口味減左少少辣，如果正宗四川菜，呢個辣度係唔合格架！如果想食正宗四川野都可以挑戰一下叫佢唔好少辣。總括黎講，呢間小菜ok，臨走前見到隔離檯叫左好近期好hit嘅烤魚，都足足有成個長既鍋咁大條，下次真係要返黎試下。…Read More

行完大館，見到天色已漸昏暗，於是決定在中環附近覓食，行徑擺花街，見到這間「博多拉麵別天神」，第一感覺係「好日本喔」，於是決定入去食下啦。麵店裝修格局與日本拉麵店無異，都係圍住個廚房坐，可以睇住廚師煮野食，而牆身有掛鈎可以畀顧客掛衫，都算貼心。店舖有一部點餐機，先選購所點的食物、付款，然後將收據交畀店員，坐低等食就可以了。今次兩人點了兩碗拉麵及兩個小食：蝦味噌豚骨湯麵加半熟蛋豚骨湯麵加半熟蛋兩款拉麵主要分別於有沒有加蝦味噌，我個人主張有得加當然要試一試啦，因為拉麵一上枱，蝦味噌的香味已經撲埋鼻到，混和到豚骨湯中就變得更為鮮甜！麵方面，所選用的麵較為實身，食落會有咬口，不會太過軟棉，幾爽口又不失彈牙。每碗都有兩塊叉燒，在上碟前師傅會再用火槍燒一燒，咁就再香濃一點，不過如果再厚身點就會更好啦！值得一提的是配菜，每位顧客座位前都有一瓶瓶的配菜，例如有蒜蓉、芝麻、辣芽菜、七味粉、拉麵汁等等，最推介辣芽菜，配拉麵吃一流呀！小龍蝦蟹子沙律小龍蝦蝦肉鮮甜，入面都有好幾舊幾大粒嘅蝦肉，混埋沙律醬同蟹子感覺幾清新好吃，不錯的餐前小吃。餃子餃子皮薄，煎得幾香口，餡料唔會好厚實，令你食完一隻覺得好飽滯的感覺。總結而言，麵店日本感十足，冇得成日返港人最愛既鄉下(日本)都可以去食下頂住。…Read More

舊同事好耐冇一聚，所以去舊公司側魚涌附近懷緬一下呢間台灣菜。其實以前側魚涌晚飯冇乜好食，有時都會叫呢間外賣，不過去店面食又真係少啲。間鋪唔算好顯眼，亦因我哋去到時間尚早，都未有咩人。（後來就愈坐愈多人）裝潢就都係好似台灣小店行簡約風格。餐牌封面有金沙炒苦瓜($78)，一定要叫黎試下啦。佢會連埋啲菜圃一齊炒，所以除左苦瓜同埋鹹蛋黃之外，仲會食到鹹鹹地嘅菜圃，炒嘅時候瓜都會痴返少少鹹蛋黃，而唔會完全分開哂，同埋苦瓜份量比想像中多。呢味係朋友指定菜式，三杯羊肉($115)。台灣任何三杯既小菜都好好食，不過夾羊來炒又真係少Ｄ見。羊肉落左好多洋蔥同埋九層塔，多香料調味，所以唉某程度上都掩蓋左羊肉嘅騷味，食落肉質都唔錯，有痴到九層塔嘅香味，幾好送飯。不過如果羊既份量多少少會更好。因為兩個人都幾餓，淨食送都係唔得，叫咗個台式蝦仁炒飯($75)。炒飯豉油有甜甜地，同平時港式都幾唔同，蝦嘅份量都好充足，所以成碗飯真係啖啖蝦肉，好滿足。冇叫野飲，所以叫左個紫菜蚵仔湯($78)。蚵仔就點都唔夠台灣食咁好食喇，但係值得一讚嘅係份量都幾多下嘅，加上可能而家蚵仔當造，所以幾鮮甜，肥美飽滿。另外，佢個豆腐唔係滑豆腐，係凍豆腐/蜂巢豆腐咁樣，唔會一夾就散，加埋湯入面有啲麻油香，都幾似台灣啲湯！今次食完又唔知下次幾時先約到呢位舊同事食飯喇！好令人懷念既味道啊！…Read More

最近返工壓力大，放工約會都想食好啲。諗起前排有個日本朋友影過一張相係有粗口字句既啤酒，所以今次就試一試呢間！進入餐廳之前，要經過一條巷，比較隱秘，拉門入去，見到座位唔算多，加上由於當日落大雨，所以無得坐出邊露天既位，好彩有book檯。野食種類都算幾多, 餐牌分開幾大類,有肉類,海鮮,蔬菜,丸類,卷物燒及甜品等。肉類鹽燒厚切牛舌($68)呢個係全晚咁多野食中最好食的! 不會太硬, 又有少少爽口, 其實唔使太多調味已經好正!自家製惹味炸雞($38)炸雞都ok,只係平時食慣左韓式既厚肉, 呢個太薄就一般般。川式爽彈火雞腎 ($34)如其名, 真係好爽彈!!! 佢切到好細粒,比較易咬,而且每人有一串,都ok! 當晚我地冇食太多肉, 因為蔬菜佢都好齊好吸引!蔬菜日式汁燒雞脾菇($22)圖在上面, 燒汁唔重味, 唔會燒到好乾。日式汁燒娃娃菜($22)呢間小店既菜類係算平既, 而且份量都好足, 大部份蔬菜都係落少少燒汁及鹽, 岩我呢D唔食重口味既人。鹽燒日本甜薯($25)呢個不過不失。燒芝士丸($22)未到可以拉絲咁多芝士, 不過芝士味都好夠。川式燒韮菜($28)名有"川式"但係唔辣的, 未見過燒韮菜, 覺得幾新奇, 同埋原來呢個處理手法係幾好食的, 幾推薦一試!蒜蓉燒原條茄子($49)蒜同木魚係好足料, 鋪滿晒成條茄, 仲附埋刀俾我地切,幾細心。味道比起上面幾個菜都重口味, 加蒜好惹味, 最後食到連蒜都食晒。醬燒牛油新鮮粟米($29)食落就知點解咁強調"新鮮",因為好甜, 我見都幾多人推介。其他黑松露沙律醬薯條($49)打卡之選, 用一個有福字既高身碗裝,薯條份量好足!!汁燒豆腐串($25)竟然係似台灣炸臭豆腐既口感, 有驚喜!日式燒魷魚串($79)成張單最貴既一樣野食, 魷魚應該好難燒, 因為燒太耐會變左食橡膠咁, 呢個火侯剛剛好, 如果份量再多返少少就好。燒玉子($32)接近我喜歡既甜度, 咬落都好有層次, 其實呢個係想encore, 不過要試其他所以最後冇, 下次一定會再食。 小店位不多, 其實我地張二人檯好細,但係侍應收碟速度非常快,基本上一食完就會收走,值得一讚,所以張檯嘅空間都算足夠。食串燒，啤酒係必備的！見到其他人都有叫特色手工啤，不過我地今次就想飲返日本受歡迎既Asahi($68),搵返D去日本居酒屋既感覺。事源係幾年前去日本旅行，食過一間好細既居酒屋，小店內有濃厚既人情味，之後幾乎每一次去日本都要搵間居酒屋試一試，日本既小店總係唔會令人失望，但香港居酒屋通常比較商業化，欠缺日本個種人情味。今晚呢間都可以列入encore list 喇 ，食完將工作辛酸一掃而空，痛快！…Read More

提起馬拉菜，大家一定會諗起肉骨茶，見呢間食店叫得「肉骨皇」，一定對自己的肉骨茶好有信心，周六行完附近連鎖傢私店，順道入一入大坑試一試！位置係喺大坑最多野食嘅一條街嘅街尾，尚算方便。星期六嘅brunch 時間，唔算多人，唔使等位，不過坐到走時已經full 晒。柚子蝦沙律($88)夏天熱騰騰，食飯一定要有一味開胃菜醒醒神，唔係嘢食幾好味都會好似冇咩胃口咁，加上我地今餐做左食肉獸，叫呢款柚子蝦沙律就啱晒，鮮甜嘅柚子加上甜酸醬，配埋蘿蔔絲同生菜，十分醒胃，而且蝦肉新鮮，都有4，5隻。細肉骨茶($98)食完醒胃菜，就到餐廳主打的肉骨茶。成煲上再在餐枱上煲滾，務求將最新鮮滾熱辣的肉骨茶帶畀食客。用料方面相當充足，大大煲又啖啖肉，肉骨煲到相當軟腍，仲有豆卜、金菇、冬菇等配料，不過最重要係個肉骨茶湯，口味不會很重中藥味，飲落十份舒服，應該有就返香港人口味。難怪見到不少人再叫個湯嚟送飯食！ 咖啡骨($98)睇餐牌見到呢味覺得新奇，於是在好奇心驅使下就點了。食第一啖就覺驚喜，原來咖啡加肉骨都相當夾！外皮脆香，再沾上咖啡味嘅醬，成道菜都幾香口，感覺新奇有趣。青檸蘇打($31)青檸蘇打嚟講其實冇咩特別，不過餐廳用不鏽鋼飲筒，起碼保護了不少海龜的鼻孔，呢度值得一讚！總結嚟講，食物方面，兩條友叫左三樣菜式加一杯飲品，埋單計算300幾蚊（餐廳設加一服務費），呢個價位在大坑嚟講都算係咁。…Read More

星期五Lunch 繁忙時間要喺KCC搵食，周圍都要等位，唯獨呢間於超市門外嘅cafe有少位，就決定試一下。餐牌中最吸引我嘅係日式醬汁炒麵($58)，我再追加左個熱朱古力(跟餐加$5)，送甜品一件。CAFE賣相，高炒影個文青相。個麵雖然份量少左啲，但味道不錯，唔油膩，好有驚喜。甜品亦都算幾清新，用黎送埋杯朱古力剛好，繁忙中鬆一鬆！…Read More

重新開張初期，門口仲係有好長嘅人龍，不過食車仔麵就係快來快去，所以都唔使等好耐就有位。去到轉入門，姐姐已經會叫你指俾佢睇要咩麵底，呢度千其唔可以慢，因為會阻住後面。之後就係揀餸，同附近另一間車仔麵差不多，都係選擇算多，有自己特色野。最後一碗揀左菜，炸豬皮及柚皮，之後加左少少菜圃。雖然冇另外加辣，點知一食已經覺得好辣，可能係菜圃或炸豬皮嘅辣。至於另一碗都係同樣情況，好辣！！！其實Ｄ野食係有心機整，不過辣味蓋過了一切。價錢方面，$36 三餸一麵，凍檸賓都唔使加錢，今時今日係算實惠。…Read More

想試喺地鐵站附近嘅呢間韓國菜好耐，今次去南豐紗廠打卡前就一於去填飽個肚先！入到去雖然地方細細，但都幾多位，星期六中午都唔使等位。店內播住歌，氣氛幾好。餐牌多圖，野食選擇都幾多，有飯麵，小食，湯類都有。一直以來對韓菜嘅印象唔係辣辣部隊鍋就係炸雞，想食清淡Ｄ都難，呢間反而幾多清清地嘅心機小菜，所以呢餐我地都係行清淡路線。落完單之後，先送上三碟前菜小食開開胃，等緊都唔怕太餓。牛骨蘿蔔湯($98)呢餐最貴嘅一個餸，但係都係心機野，牛骨好捻兼入味，份量都好足，值得一試，個湯唔算好濃，但係材料嘅味都有滲晒入去。真露煮海蜆($62)有幾種蜆類，包括青口，花甲等(其實唔係好識分)，口感豐富，個湯不是罐頭湯，都有少少鮮味。炸雞球拼魷魚圈($62)清淡一餐中嘅一點邪惡，配個柚子醬中和返。唔係超級脆同香口，減低少少罪疚感。黑松露珍寶帆立貝海鮮飯($72)開頭冇太留意個名，只係見到餐牌寫住期間限定就試一試。嚟到先知原來個珍寶唔係講緊碗飯，係個帆立貝！有粒蛋王咁大！！！其他配料一樣一啲，口感都豐富，同埋鍾意佢蔬菜類夠多。兩個食係幾飽的，每人都裝左兩碗仔。最後跟餐叫左兩杯野飲，青檸柚子蜜岩夏天消暑飲。總括嚟講，呢間價錢大眾化，份量適中，菜色種類都算多。今次食完清淡，諗住下次嚟食返Ｄ邪惡重口味！…Read More

4個女生飯聚，揸唔定主意，最後唯有揀間就近餐廳。以前覺得葵芳葵興都係大集團嘅餐廳居多，約食飯都會避開呢區。冇諗到今次呢間星馬菜有驚喜。由於當中有素食人士，我地一黎就照顧左呢位朋友嘅口味先！蔥油手拍酥餅($48)，酥餅最緊要冇油益味，呢個就香口得黎唔油，所以食過翻尋味又叫左另外一個酥餅。奶油肉鬆夾酥餅($56)，完全唔同口感，可能因為加左肉鬆既關係，個人認為蔥油好食一點。其實仲叫左個炒菜，炒得好香，可惜唔記得影相。滷水拼盤($108)，整體都幾入味，配搭唔錯，份量都算多。新台幣椰香海觧喇沙($98)，麵條粗實，個辣就返港人口味，唔會太辣，不過椰香唔夠重。馬來西亞肉骨茶($128)係黎到你面前先開火，滾滾下燒晒就會自己熄火。都係有就返少少香港人口味調節，冇好重藥味，鍾意星馬菜既人可能會嫌唔夠正中。總括黎講間餐廳既野食都唔錯，水準中上，服務態度都ok，加水都加得幾密，同埋環境係舒服適合傾計。…Read More

唔覺意去了尖沙咀某百貨公司感謝節掃貨，行完買完發現，要等一個鐘頭先可以拎貨品，唯有喺附近食下嘢，見到國際廣場呢間「忠孝東路」，改得個名咁台灣，顯示對自己嘅食物很有信心，於是一試睇下喺咪咁勁先。光顧當日周六晚上6點幾，食店有相當多的吉位，坐下看看菜單，見到有個二人套餐，即刻諗「啱晒！頭先買嘢已經睇到頭暈，叫個套餐唔使再煩食咩嘢！」二人套餐（$328，另收加一服務費）方面，有台式魷魚羹及酸辣湯（碗上，所以可以叫晒兩款）；冷拼盤四小碟，即花雕醉鮑魚、涼拌貓耳朵、香辣小黃瓜及芝麻雞絲粉皮；主食有香煎虱目魚腩、海蝦配翡翠苗及台式醬油炒飯；最後有甜品。先講四小碟，份量相當充足，花雕醉鮑魚有兩隻，切片上，花雕酒味重；貓耳朵及小黃瓜冇咩特別，唯一小黃瓜係幾辣；雞絲粉皮算令人失望，雞絲份量足，但肉質唔嫰滑，粉皮唔夠爽口。再講台式魷魚羹及酸辣湯，這亦是餐廳失誤位之一，因為湯品竟然要到主菜上埋時才到，感到莫名奇妙。味道方面，又係相當足料，魷魚羹內多魷魚，味道清淡易入口，筍味濃（但有人會不喜歡），酸辣湯就味道一般，多料。主食就有3款，亦有讚有彈， 「香煎虱目魚腩」魚腩煎得好香口，肉質亦嫰滑，呢款讚！ 至於「海蝦配翡翠苗」就一般般，海蝦冇咩肉，個醬汁又唔係好好食；「 台式醬油炒飯」味道相當濃，食完都幾口渴，而且有個敗北位喺用竹筒盛載，令添飯過程相當困難。最後甜品方面，是日甜品是「啡啡芝士蛋糕」，味道相當普通。值得一提的是食店服務員，食品聘請了數位年輕服務員，態度可以，但服務質素有待提升，例如當我們吃完主食，他們連所有碗碟都收起後，也不會上甜品；也不會主動添水，令用餐體驗有所扣分。整體而言，食店的份量足，女生的話二人餐三人吃也應足夠，而且擺盤、食物方面都做得相當精緻，但就欠缺了台灣菜令人最回味的沉實感覺。…Read More

春水堂進駐香港後，2月時已經去高鐵站試過佢嘅珍珠奶茶（詳情可以睇返之前嘅食評），等到最近堂食餐廳都開埋，一直都想試一試。可惜每次經過都俾條人龍嚇到卻步。因為今次朋友都想試，而有個伴傾住計排點都快啲，就決定一試。星期六中午時份，人龍比我想像中已少好多，店員不會派籌，只能耐心等。據說春水堂是珍珠奶茶的始祖，而創辦人當初的理念是提倡生活四藝（即插花、掛畫、音樂、文化），難怪裝潢都有一種文人氣息。原來店內面積都幾大，所以半個鐘左右就已經有位了。由於上次已試過珍奶，今次就叫左杯熱珍珠紅豆鮮奶茶($36)。店員問我使唔使少甜，好快就答左少甜，後來一試才知太淡了，建議春水堂的野飲都係不要少甜。友人就叫左杯招牌珍奶。紅燒牛肉麵 ($78)好有台灣牛肉麵的風味，牛肉都好入味。滷香拼盤($78)雖然入味，不過沒有令味覺留下太深刻印象。珍珠鐵觀音雪糕吐司($58)有自家製茶味雪糕，都值得一試。整體黎講，味道還可以，只係食慣左台灣既，一比較之下還是台灣好食！…Read More

每次入粉嶺聯和墟都只有一個目的，就是去「群記牛肉圓豬手」食佢個辣同牛丸，簡直變成每半年一會嘅指定動作。食店位於粉嶺聯和墟舊區，絕對稱得上「隱世小店」，無他的，每次都見到一堆人在食店外等外賣，店內又企滿等位的人。無錯，小店有性格，位是要自己搵，店員不會安排座位，而且店內裝修就維持80年代風格，亦無冷氣，但幫襯嘅人仍不絕。由於每個人都係食碗麵或者米粉，所以都算快入快出，企一陣就會搵到位。小店食物選擇不多，牛丸、豬手配麵或粉，另外炸卷都多人選擇。由於光顧前已打底，唔想太飽下，只輕輕叫了細牛丸米（$28）及細牛丸麵（$28）。一落單，店員就會送上一小碟辣，唔夠的亦可以自行添加。米粉及麵嚟講其實冇咩特別，最正係個辣醬， 同時下時興的四川麻辣不同，群記的辣很香，直接撈落粉麵或用牛丸點都好好吃；牛丸彈牙是基本，亦有濃厚的牛肉味（所以可以判斷這裡的牛丸一定有牛肉！）…Read More

閒時無聊經常會逛鑽石山荷里活廣場，見住這間「南國小喫」裝修，打住港式加d台式小食嘅旗號，睇落都幾鬼吸引，等等下終於見開張，於是決定買返樣嚟試試。食物種類都叫多，有魚蛋燒賣、串串呢d大路嘢外，仲有各式撈丁、三文治、車輪餅，實行總有樣嘢食啱你胃口，光顧當日飽飽哋，於是買個車輪餅試試就好。車輪餅($12)有不同口味：紅豆、豆士、香芋、紫薯等，價格上唔算平，不過size就比其他類近食店所賣的大些少。我們叫了個吉士味車輪餅，由於食店每次會做起一輪，所以唔算即叫即做，不過拎起手時都仲熱辣辣，皮無咩特別，唔算太鬆化，亦唔叫厚，吉士餡就叫幾香滑，但咬一大啖後會流出，係街食就唔係咁方便。總括而言，12蚊一個車輪餅嚟講，算是不過不失咁！值得一提的是，可能光顧當日是剛開張不久，食店工作流程未算好流暢，例如點餐指引唔算清楚，取餐顯示板又無keep住updated叫到幾多號，這些方面都有待改善。…Read More

台式夜市小吃一直是心頭好，貪其份量不大，做到「小吃多滋味」的效果，但香港一直較難吃到似樣的鹽水雞，不過位於荔枝角D2 Place的「阿土伯鹽水雞」都算做到。光顧當日雨落不停，只好不斷咁行商場，行到攰自然想坐下食下嘢，正考慮好不好去吃程班長時，見到這間專賣鹽水雞的食店，單看門面，以為只做外賣，但原來店內有座位，個肚仔打鼓了，於是決定一試。由於過往在香港吃鹽水雞都中過不少伏，所以2個人都只是叫了一人餐試試看，一人餐包括：胸腿各一半或3隻雞全翼、任選3個配菜（$45）。配菜我們選擇了杏鮑菇、高麗菜及甜不辣。調味也有得選擇，有台式原味、店家自創的阿土醬，以及韓國泡菜味，亦有不同辣度選擇，而穩陣的我們當然選擇原味及微辣。食物方便，雞肉算滑，份量都叫適中，配菜的菇、菜及甜不辣亦穩穩陣陣（其實鹽水雞的食材新鮮已經很足夠），而重點的調味醬很有台灣夜市的味道，蒜香而帶點咸辣，相當惹味。值得一提的是，加錢可配麵或肉燥飯，不過我們便沒有加了，大食的朋友可以試試！台灣不少賣鹽水雞的攤檔，快速剪雞肉及配料的表演，算是一大特色，若果食店都可以增加此元素就更好了！…Read More

一間食店通常以食物質素或服務作招徠，當然兩者都有就最好，但這間位置黃大仙中心的「賞茶」食店可以兩樣都沒有。周末下午茶時間經過，看見店舖沒有很多人光顧，店內仍有座位，於是決定吃個下午茶餐歇歇腳。茶餐選擇不多，來來去去都是炸物配薯條，再加一杯台式飲品，花心的我想來個crossover，將A餐的鹽酥雞及薯條，配上B餐的翡翠檸檬飲品，兩套餐價錢一樣，禮物地問店員可不可以這樣配搭，沒料到問題未問完，已被店員粗魯地回覆「不可以，寫咗喺咁就喺咁」，相當不錯的服務態度（笑）。我們也只好跟從餐單的配搭，叫了個台中套餐:鹽酥花枝丸配薯條、翡翠檸檬（套餐價$44）。花枝丸頗為細粒，有落椒鹽加重口味，但都唔算好吃；薯條細條，略嫌炸得太乾身；飲品翡翠檸檬，似普通檸檬茶，但紙包維他檸檬茶更好飲。…Read More