White Crystal's Profile

寫返3月份榴槤buffet嘅食評，基本上榴槤嘅食物都ok,不過其他完全唔ok.蟹腳浸太多鹽水，食一啖覺得再食落去可能會腎炎，唔知係咪貴野唔想客食太多。橙色類似蕃茄湯睇落好靚，放入口一陣焦味，同職員講,佢就扮聽唔到。再試吓中湯，好一般。 肉類一係鞋，一係無味。 比呢個價錢絕對唔值，比多少少去Grand Hyatt好過，起碼人地真係比返對得住價錢嘅質素比你。 聽講呢間酒店係Poly U 訓練酒店系學生嘅，就算係咁都無理由咁難食，今次實在令我太失望。…Read More

滴水坊係一間佛教素食餐廳, 位於宏光道既億京中心地上轉角位。如果由地鐵站行過黎都幾遠下。呢間餐廳都算光猛, 位與位之間有合理空間, 樓底高, 幾好座。我黎果陣已經過左食飯時間, 所以無乜人。叫左一碟葡汁素菜飯, 小食連湯既套餐。葡汁做得好好味, 就算得個汁都已經可以送晒成碟飯。可惜餐具好有大學食堂FEEL, 同呢度唔係咁夾。可惜。…Read More

長沙灣一區好多野食, 香港餐室既位置距離餐廳林立既街道有段距離, 街道人比較少, 裝修地道。貫設支持小店既宗旨, 今次去試試香港餐室。呢度既店員好親切, 有家既味道~  叫左葡國雞飯同牛扒餐, 預計係一般茶餐廳貨色。保唔到黎到都整得幾靚。沙律好新鮮, 牛扒厚度唔太厚,好正常。反而要注意佢既味道, 以牛味取勝。又一間估佢唔到性價比高睇佢唔出既小店~ 支持! …Read More

見到咁多好評所以黎試下。大廈外面完全無指示有餐廳, 只係2樓掛左幾個紅燈籠, 連店名都無。上到樓見到重門深鎖, 門外有個BANNER, 心諗似似地中伏。既然黎到就試下啦, 最多無下次。 入到去,比好多唔同設計既茶杯仔吸引, 我地入去既時侯無乜人, 不過坐低無幾耐就爆場。果然無黎錯, 湯底, 最重要既湯底好鮮味, 呢種味道唔係咁多地方食到。…Read More

食過好多次Pepper Lunch, 係時侯寫下對佢既感覺。Pepper Lunch就好似一般連鎖快餐店咁, 當唔知食乜好,又唔想冒險既時侯,一個中規中矩既選擇。其實佢係比一般連鎖快餐店好食D既。由於佢既牛肉飯係用鐵板, 可以自製飯焦。冬天黎食, 食到最後都仲係熱。不過味道有點太重,每次食完都要狂飲水。今次掛住食唔記得影相~  …Read More

今朝又去九龍灣國際展貿中心試新野。上到二樓, 人流明顯比地下麥記少, 顯得異常冷清。  走到轉角位, 見到環境西式舒服既CASA LUCA, 有軟林林既梳化, 精緻既雲石餐枱, 木製既餐盆… 好新好靚!!!早餐主要係Bagel連飲品。叫左一份煙肉蛋Bagel同埋即磨咖啡都係$25。呢度既早餐唔係一早整定, 而係即叫即做, 由落單至有野食, 大約用咗十分鐘左右。Bagel好香而且軟棉棉, 裏面搽滿牛油。咖啡都係高質素既。早餐黎講, 呢個份量都好足夠。對比其他環境惡劣、食物質素一般既餐廳, 廿五蚊呢個價錢的確係好吸引回頭客既。 可惜呢度位置比較難搵,客人好容易就會比樓下吸引咗。就算上到二樓, 亦未必會走入呢個位。希望CASA LUCA可以繼續努力, 亦希望有更多人知道呢間小店。我會再黎, 食呢個又軟又香既Bagel~…Read More

放左工想食韓式燒烤, 就諗起呢間。由於屋企人一早已經食飽, 所以今次晚餐佢只係陪我食, 今餐九成食物都係由我一個人食既。 黎到新都城呢個最角落唔起眼既舖位, 由於係平日夜晚既關係, 成間店只有兩三枱客。當我地喺外面睇緊餐牌既時候, 店員已經好熱情咁招呼我地。一坐底, 未開始叫野食, 店員就好快咁放底六七碟配菜(免費), 仲立即開爐同埋加粟米芝士同泡菜雞蛋入爐。除左大沙律之外, 所有配菜同芝士都係無限再加既。我叫左碟 $148既特選五花肉。 肉好靚, 燒好之後甘香, 見到層油令立立幾靚!!!   配埋大豆醬同生菜或者芝麻葉食, 會覺得清新唔油膩。呢度比較特別既係,配菜入面有兩塊芝麻葉, 之前聽呢度員工講, 話係由韓國運黎香港既。芝麻葉香味獨特,我初試時都唔係咁鐘意, 之後食食吓又覺得OK喎。 我呢個芝士控食咗兩三次芝士, 成碟五花肉, 同埋無限既菜之後, 好滿足咁離開咗。…Read More

比門要吸引黎左呢間食星加玻美食既茶室。 呢度好迫，冷氣亦唔夠，我被店員安排坐既面壁位,檯底下仲有雜物，好辛苦，好可憐。叫左肉骨茶米線，好快就有得食。 呢碗米線非常巨型， 兩隻肥厚入味既冬菇，三分一條油條，香軟既排骨，仲有食極食唔完既米線.....湯底藥材味洽到好處，可惜太飽飲唔到湯。 呢度好適合食量大既人。…Read More

好耐之前食過呢間 Antoshimo Cake & Bakery 既donut, 味道唔錯。 見佢餐牌咁得意, 可以燒賣, 餃子等拼拉麵, 估計唔會太難食, 就試下佢既午餐: 餃子拼拉麵, 加熱沖繩黑糖檸檬茶。我茖單果時已經係1點27分, 當時無乜客。由落單至姐姐送餐, 用咗10分鐘左右送到。姐姐好熟手咁幫手打開個蓋。  蒸餃子味道一般, 如果呢種餃子用煎方式烹調, 就算只係加返相同的橙色汁,  應該會更好味。  至於拉麵, 可以用非常難食黎形容, 肉好薄, 又無味, 個湯仲晒泡好核突咁。至於杯熱沖繩黑糖檸檬茶, 無乜特別, 一般茶餐廳味道。坐喺 food court 食呢個水準既疇, 仲要收$62。講真, 去茶餐廳無咁嬲。呎度唯一可取就係設計，可以好吸引人黎試，不過試完唔會再黎，變相浪費左成個設計。…Read More

有時侯突然好想食素, 今日就係咁,  就試下Royal Pantry既 橄欖油雜菌意粉。 叫完野食, 對住落地破璃, 望住外面人來人往街景，真係幾舒服。羅宋湯望落色水正常, 好夠濃郁, 好多料, 不過實在太甜, 好似茖左兩份糖咁。主菜好有驚喜。意大利粉上面舖滿香濃忌簾既蔬菜, 粟米同草菇。蔬菜同忌簾一向都好夾, 由於廚師調味得宜, 引出各種蔬菜各自有獨特既味道。 食到最後已經好夠飽, 太好味都不由自主咁繼續食。 下次會再黎, 不過唔會再叫羅宋湯。…Read More

Uncle Ray 坐落喺企業廣場2期二樓, 正正位於電梯大堂角落。 企業廣場外面無任何宣傳品, 如果喺外面經過, 係唔會知道呢個位置竟然有一間幾好味既西餐廳。呢度環境清靜又乾淨, 每個座位之間都有合理空間, 店員又快又有禮貌。幫襯過呢度既早餐同午餐好多次, 每次都非常有水準。以早餐為例, 呢度即叫即做, 不過由落ORDER至上菜唔洗5分鐘, 而放入口每一件都係熱既, 而且煎得好好味, 餐飲除左一般既奶茶, 咖啡之外, 仲可以叫橙汁。至於午餐, 無論扒餐、意粉、焗飯、意大利飯等等都係份量足夠, 亦都好好味。曾經試過珍珠帶子意大利飯, 裏面有二三十粒珍珠帶子!! 雖然唔係用正宗意大利米, 不過亦都做到好香好CREAMY既感覺。 最難得既係, 全部午餐都係5X 至6X不等, 如果1:30前埋單, 仲有85折, 即係每個餐只係$49左右!!!!一月份開始, 佢地除左繼續賣拿手西餐之外, 每日會加入一款中式例如京都汁豬扒飯、香菇茄子肉躁飯等等。不過我對中西就一般, 始終附近都有太多餐廳賣中式, 如果想食中式未必會黎呢度。講左咁耐, 其實我最欣賞呢度既唔係單單服務、環境同食物, 而係員工係由心入面笑住咁工作, 見到佢地好開心, 好明顥佢地老問待佢地應該幾好, 令到我呢個做客既都感覺得到。 呢樣野喺今時今日既香港實在非常難得。希望Uncle Ray可以繼續保持水準。…Read More

同朋友去坑口東港城行街 ，見到九湯屋拉麵。 呢度係坐月bar檯既，得幾個位，平時經常滿座，今次見有位就試一試。我地叫左東京拉麵同博多拉麵, 另外再加沙律同汽水。兩款拉麵既分別就係湯底，東京拉麵比較咸。义燒幾好味，不過得兩塊好薄既唔夠喉，如果可以加錢加义燒就好喇! 麵既份量都足夠，糖心蛋一般，筍就唔錯幾爽口。 坐bar檯食都幾好feel。…Read More

魚心位於旺角最多餐廳既街道，同行競爭非常激烈。 見佢外表裝修殘殘舊舊但仍然經常滿座，便入去一試。 晚市四十幾五十蚊有一個足料湯烏冬，惠顧滿$50仲可以用特惠價，例如$10兩串炸雞軟骨等小食，唔怪得咁多學生熱襯。呢度既炸物係即炸，唔會炸定。食物無乜味精呢樣好重要。 不過呢度始終係旺角，租金應該有返咁上下貴，因此檯非常細，檯與檯之間太窄感覺唔太舒服，而且裝修實在太殘舊，唔介意既可以一試。好好彩我地入座時二樓未滿座，店員安排四人位比我地兩個人，令我地座得鬆動d。…Read More

今次朋友生日, 就約左佢一齊位於觀塘APM 的燒肉放題。 呢度D肉內質唔錯, 可惜無乜牛肉香味, 唔好抱太大期望。不過放題唔只食牛, 原來呢度既泰式冬陰功湯係我試過既數一數二好飲, 真係估佢唔到。海鮮好新鮮, 尤其是蝦都幾爽甜。外面放題店既蝦通常放得耐會梅梅地, 而呢度一隻梅既都搵唔到。 仲有就係呢度用IPAD點菜, 唔洗等侍應姐姐黎先叫, 慳左唔少時間, 而且上菜快又齊, 值得一讚。泰啤任飲係我想試呢度既其中一個原因。放題中途，ipad突然關機，我地叫侍應姐姐幫手，佢好也就幫我地攪返掂。我同朋友過左一個美味開心既晚上。…Read More

在人來人往的九龍灣, 食店林立, 可以吃到中西日各式美食。不過裝修得雅致而平民價格的的日式餐廳比較少見。 今日經過環球工商大廈, 被地面的廣告吸引, 於是上去一試。位於環球工商大廈8字樓, 一出電梯即見到長長人龍。由於我一位, 所以可以立即安排入座。  門口以大量色彩柔和的乾花作裝飾, 並以木製作主調, 風格天然清新。餐廳很大很整潔, 座位舒適。看看同桌其他人點的菜都很豐富, 而且都讚不絕口。看看餐牌選擇不多，午餐約十款左右，全都包括前菜，湯和餐飲。 點了鯖魚套餐，鯖魚燒得皮脆，飯是正宗的日本米，難得熱檸檬茶一點也不苦澀。埋單不用加一$55。在這個吃茶記也要$45以上的日子，可以以這個價錢在這種環境吃美味日本餐，非常難得。 難怪位於8樓都有咁多人排隊。…Read More