難食無下次's Profile

絕對唔係其他食評所講嘅什麼新派、精工素食，反而我覺得係返翻以前年代，仿呢樣仿嗰樣再亂攪一通嘅素食店。所謂素湯就係切幾塊雞髀菇片加水同菇粉。海南雞飯零香料，只有黃羗粉較色、雞皮用唔知糯米定澄面之類嘅物質攪到煙韌，起哂根出現大量麩質再加黃羗較色、點雞嘅三款醬，除咗kecap manis同羗油正常啲，另外一款似係用泰雞醬加叉燒醬同面豉撈出嚟嘅就比較奇怪！話梅涼瓜只有甜味，其甜度係甜品嗰隻級數，零酸零苦味，更加唔好話有話梅味！話晒都加咗廿蚊，你攞個磨揸粒話梅喺面度磨幾下都好呀！另外個吉豬飯，就用大量豆渣包糠之類加小小omni，炸皮厚到你攞個叉拮落去，就已經壓散晒入邊個餡嘅程度，仲要唔熱！麥記個新餐肉包都好你萬倍！飲嘢就算了，成餐飯除咗有幾塊沙律菜之外，就係另一個飯面嗰幾條甜椒，除咗膚淺、誠意欠奉同唔健康，我唔識點形容呢間素食店亦絕不推介！…Read More

未夠鐘入場就買杯嘢飲住等，原本諗住嗌珍珠奶茶，但老婆話想飲烏龍，咁就嗌杯烏龍latte加珍珠，等一陣就做好，啜一啖已經有回甘，一路行一路飲多幾啖，係㗳得出佢啲茶嘅烘焙味道，我只可以講佢用嘅茶底應該唔差，以開到成行成市嘅台式飲品店嚟講，算係幾有誠意嘅一間。Order期間店員主動介紹，態度友善，嘢飲價錢算平，但見佢有賣其他自家品牌嘢就比較貴，畢竟可能佢主打做年輕人生意，啲嘢係幾得意嘅。如果有機會再幫襯可能會試下佢其他冇奶嘅飲品…Read More

幾十年來由細到大，坐親101經過都會望多兩眼，終於早幾日幫襯咗佢一次，亦係呢半世人見過最癲嘅一碟楊州炒飯！嗰日差唔多兩點入到去，嗌咗一個楊州炒飯一個豬扒腸仔煎蛋飯，同兩杯嘢飲，其他嘢唔使講，成碟炒飯充滿鑊屎(請自行放大附圖查看)一陣𤓓味，我拎返去counter同個阿姐講嘅時候個阿姐話係咁個喎，我話燶個喎聞都聞到喎，跟住廚房入邊個師傅聽到行出嚟望一望碟飯，佢話冇嘢啊唔係燶啊，你食兩啖試吓先啦，我話我唔會食呢碟飯㗎你食啦，佢話咁你想點啊，我話我唔要喇，問佢有冇燴餸即有嗰啲，佢話冇喇，都係即整㗎，咁我話轉個叉燒煎蛋飯啦，唔該。其實自問真係真心支持啲小店老店，你碟楊州炒飯蝦都無粒真係唔係問題，明白有成本考慮，但係燶到𤓓喎！你自己炒嘅都聞到啦，仲要自己攞埋出嚟落埋枱俾個客，你真係冇資格做廚囉！希望你唔好諗住淨係做附近街坊或者返工人士就變咗焗人哋食咁啦。…Read More

有嘢過咗灣仔做，遇啱放飯時間丹X冰室排晒長龍，唯有行遠些少幫襯你呢間老牌茶記，嗌咗個叉燒鮮茄滑蛋飯，完全係垃圾級，茄汁推到有色冇茄味大甜！係極甜嗰隻！零酸味！叉燒冇味，求其當有幾嚿肉係咗，連蛋都唔捨得俾！見隔離條友碟芝士雞扒撈丁，更加係嚇人一驚！估計個鋪位係你伯爺剩落，如果唔係你絕對冇可能喺呢行立足，你隔離是但一間兩餸飯係你一半價錢，賣相係好過你百倍以上，唔怪之得一點行入嚟啲位任坐！係咪俾班廚房佬揸住條頸呀，咁嘅出品都收貨點做老細啊！難怪茶記呢行俾啲新派隊冧咗啦，因為你哋退步哂，連基本都做唔到！…Read More

上環買完嘢行去中環，經過此店見有少少餓就貢咗入去。坐低有個後生仔問食乜，我話墨丸河，加杯熱奶茶啦。兩樣嘢正常速度送到枱面。首先望一望碗嘢有5粒，加埋杯熱飲4草嘢，直係超街坊價，再望望粉麵必備嗰羹青，一漾落碗河粉度攻上嚟就聞到好香芹菜、冬菜、蔥粒味，細節做得足。河粉夠滑，有米香，唔知攞邊間，幾好。墨丸就真係好得，夠實淨彈牙，絕對唔係食粉丸，有鮮味粒頭大，連軟骨絞有咬口，唔知係自己打定攞貨，如果攞貨的話算捨得落本。下次經過再試下其他嘢，當日我4點幾坐落都見有唔少外賣客。…Read More

唔食鵝肉無嗌併盤，嗌咗一掌一翼一件豆腐（有芽菜墊底）加一份紅腸墨魚例牌（有花生墊底），分兩盒裝，收$206。佢話豆腐收$30一件，我話好啦無所謂。1. 紅腸墨魚質地最正常，不過唔係滷水味，但亞叔手套都唔帶就咁喺一盤全部已切片嘅紅腸墨魚度乸一手放落煲汁度漾兩下係咗起得，唉！明檔都係咁！2. 豆腐無味無道，白曬曬切開幾片連淥都唔淥下就擺喺個盒底係咗。3. 掌翼，唔知翻煮咗幾多次，個顏色又係黑到一個點，味道咸到成家人一人夾咗嚿就收手。絕對唔係鹵料味，完全係五香腩雜汁加大手味精雞粉糖。（剩低嗰啲我第二日夾兩嚿用白水大滾甩啲咸味再煮麵烚菜都仲夠咸）建議你都係齋做粉麵檔算啦，你滷味唔掂，好彩俾你涯到個租期，唔好彩兩年內可以告別大角嘴。…Read More