Tony哥哥's Profile

前年搬入大埔，食市林立，果然臥虎藏龍，競爭激烈。位於大埔安富道店嘅大方能站穩不受疫情/北上嘅影響，依然有佢嘅賣點。黃酒煮雞撈飯正，老婆就鍾意佢個苟𣏌豬閏，好難響出面食到，仲要係好味。筆就鍾意佢個雲吞，雲吞皮夠淋，肉地新鮮，加埋佢個絕世辣椒油，冇得輸！可惜！可惜！佢同一般雲吞麵鋪一樣都犯咗一個很嚴重嘅錯。辣椒油用鐵缶及鐵spoon裝。要知道辣椒油是帶弱酸性，對金屬有腐蝕性，重金屬溶於辣椒油，再被人體吸收，好難排出體外，只會積聚人體內。吾信嘅話，你去大方睇下裝辣椒油嘅spoon是否每缶都溶咗一半！(我只係講店內放置給食客即用嘅辣油，零售嗰款冇問題）…Read More

放工同老婆路過，見有間食店門外排哂長龍，行埋去八卦下，原來排緊台灣食店。見隔離嗰間店鋪相對人少，又有D肚餓，又吾想排隊，即管入店一試，店名叫黔知味，完全吾知係食咩菜。叫蹄米線（問過老闆娘，原來係豬腳)、宣尉府豆幹。豬腳非常淋。豆幹一定要點辣粉食。最後叫咗碗酒釀丸子加蛋，好好味，忍吾住再叫多一碗，正！吾明此店味道吾算差，為何食客相對少？所以要為佢寫這篇食評！希望為食嘅香港人都可以比機會小鋪，嚐嚐不同嘅味道！…Read More

東記平時想倉都要在門口排一段時間，某日放工一落車，見沒有人在門口等，於是二話不說就入東記叫咗個淨炸豬扒加雲吞。再睇睇手錶，原來已是晚上八時半，鋪頭差不多要落閘收工。豬扒先到，都算香口，但嫌稍醎，可能臨近收鋪，那煲油嘅關係。雲吞跟住到，雲吞函味道一般，但雲吞皮好重柬水味，而且硬如橡膠，應該在雪櫃內儲存咗一段頗長時間。估吾東記都做到咁嘅質素，實在失望。難怪市民寧願北上或外遊消費！筆者此文本意是想籍批評，希望相關鋪會作改善從而再進一步，請「開飯」不要像以往一樣剪走！…Read More

話說經過大埔大明里，老婆想食油雞，見大少燒味門口人多，心諗應該吾會差得去邊，決定幫襯一下，外賣買咗半隻油雞，等等下忘記話要多葱油，即刻同收銀講，收銀吩咐外賣姐加䓤油比我。可惜收貨後冇為意，行咗一段路先發覺原來冇加到䓤油，心諗：「唉！算啦！依家D服務質素差哂！費事返去追」不過此時有把聲音「先生！先生！剛才同事忘記加䓤油比你，我哋加返」突然個心態180度逆轉，估吾到此小鋪對客態度咁認真，雖然小事一樁，意義卻非小，北上潮下都有不少好鋪。今則記事雖然與味道沒有多大關係，為咗香港嘅食鋪，希望能被通過而表揚一下！…Read More

中午要見客，路過太古坊，趁11點幾冇乜人，先食個lunch。見新成業有大把位，諗住應該ok掛！點知中伏。叫咗個show me your love 飯，賣相吾差，中式茨調得吾錯，可惜肉粒雪味重，雖然吾係粒粒都有雪味，但都係只食咗兩三啖就放棄，浪費咗個茨！本來小事一宗，都吾打算寫食評，只係見時下咁多食市執笠，心有所發，可能有無數咁多原因，但好多都係自己攞嚟衰，你比乜嘢人食，食客係知架，如果冇心機做不如早啲執啦！…Read More

今日五六點一早起來工作，至九點見肚餓，又咁啱路過豪華，又咁啱冇乜客，吾洗等位，咁多「咁啱」，整定要入去幫襯啦😅叫隻熱狗醫肚先，加杯熱奶茶。Hot Dog味道 一般，出色嘅係杯奶茶，滑滑滑！老細正忙着向隔離枱食客推介餐廳嘅介young多士，我都好奇望一望個餐牌，見有滾水蛋，估吾到嚟到有咁特色懷舊飲品，記得細哥時候成日都飲。不過今次叫咗佢個兄弟-奶水蛋😏大滿足！(小插曲：想改凍奶茶，點知熱奶茶已整咗，老細好好人，叫沖過另一杯👍，不過我叫不必，既然煮咗就算。此餐廳除咗有港式懷舊味，仲有港式人情味，這才是待客之道）…Read More

連日大雨，胃口麻麻，雖然撞正係星期日，吾北上，只想留港消費。1條友咁啱路經北角，想起好耐無幫襯和平，又想回味佢個波瀾壯闊肥叉飯，二話不說上斜坡去到店門，12點半居然人不多（心諗果然北上對和平都有啲影響）。見有幾個卡位，二話不說，坐低就睇餐牌，鵝肶/肥叉，難以取捨，結果都決定肥叉，以表初心！點知店員話1個人吾可以坐卡位。心情頓然麻麻，我回一句：「咁多空卡位都吾比坐？」店員嘅回應係：「公司規定1個人吾可以坐卡位」。嬲嬲地，剛才嘅食欲吾知去咗邊，二話不說，走人！出去同入來嘅速度一様，只係心情吾同！…Read More

星期日中午1條友，冇北上，想留港消費。陰天未晴，雨水斷斷續續，心情同天氣一樣，路過堡疊街，見三悅冰室，頓時懷念結業已久嘅三悅大飯店，以貴妃雞馳名。見食客幾乎滿座，應該吾會差卦？！入店見有卡位，但1個人吾好意思坐，點知店員話：「見位就隨便坐啦！」見佢咁忙，又咁講，就坐下卡位，點咗個海南雞(因懷念三悅大飯店)。雞算滑，吾駭，黃油飯吾差，有湯有凍飲$65，算非常合理。值得推薦！筆者有啲意見：如果海南雞去埋骨就very good!…Read More

疫情下食店執粒潮，執下一間又一間。剛剝咗隻牙，幾日冇啖好食，突然想食燒鵝，因為之前試過金牌，今日就試榕哥。叫咗個鵝脾飯，味道吾錯，燒得幾香，皮脆肉嫩，而且夠哂肥，不過價錢係貴，一餐半餐，算啦！睇過其他食評，話店員服務態度差，我又吾覺，點知閒話間原來個店員係新來的，剛上班第二日，態度差嘅店員吾知係咪炒咗呢？！原來燒味飯加$8有例湯跟，凍茶就加$4，見其他食客寧願飲例湯，吾通佢啲湯好味啲，下次會再試！好啦！夠字數啦！下次再評！…Read More

環境好，衛生好，招呼態度好，火鍋爐/石燒爐都吾平，可借牛肉肉質差。一般冷藏食材可放1年，食物品質不會有大變。但食店嘅放題牛肉質素認真差，冇牛味冇肉汁(牛小排只係冇咁差)。不過筆者見定食嘢牛肉同放題嘅牛肉吾同，而且當日顧客大都點定食(可能中午時段)。其他火鍋石燒食材冇問題，包括豬肉(不過筆者建議火鍋豬好啲)，響鈴好味，板燒魚蛋好味，希望店主改善放題牛肉質素，差唔多每位$250，性價比嚟講低過牛角，低過牛大人。…Read More

搬出大角咀多年，偶然同老婆慶祝周年經過老店，正想回味晶輝一絕 - 雞煲，叫單時店員聲稱老鋪已易手，舊老闆已退休。一聽之下，心知不妙。果然雞煲一出，成地眼鏡，同幅相係兩回事。雖然已有一半失望，不過既然煮咗，唯有以「煮到埋嚟就食」嘅心態一試新雞煲，果然一試難忘！雞汁太稀，雞肉係蒸過嘅雞，好「鞋」，配料中筍片帶酸未入味，我唯有只食我所好嘅洋葱，老婆只食云耳！一半都未食完，就埋單$158走人，兩公婆周年紀念，有過難忘經歷！希望只係雞煲出事，其他炒小菜冇出問題啦！😫…Read More

今日同老婆到文興食晏，終於食到肥叉燒啦！以前每次都有點燒味：肥叉、燒肉、燒鴨下庄等，但叉燒都係瘦叉😖，懷疑係師傅睇錯單。一般叫肥叉、燒肉，單上表示「叉燒、燒肉，肥D」，師傅就以為燒肉要肥D，所以叉燒就吾肥。今次只點咗肥叉，所以終於食到啦😄。不過有點遺憾，就係筆者一向鍾情嘅甜品-心太軟(中式)已沒有供應了😭！…Read More

新派日本廚師拍板。筆者冇叫廚師拍板，只試咗幾道串燒已飽飽。1. 燒茄子肉，幫我起埋肉，加咗少少醃製胡蔴，味道還可以。2. 枝豆，一般徒手剝皮只食豆，但不知為何要加醬油同堅魚片向上面！吾通有人連皮食？！😨3. 雞皮串燒，兩塊雞皮夾薄芝士，吾講吾知係雞皮，以為係薯片之類，幾特別。4. 雞頸肉串燒，味道一般，比較單調5. 帆立貝配咖哩辣汁，個汁調得吾錯。6. 雞肉免治串，以cream代替傳統生雞蛋。肉串味道還可以，個cream就各人口味不同。7. 燒鰻(即燒鱔)，皮脆肉厚，好食，只嫌沒有配醬汁。8. 燒和牛配wasabi，入口即溶。只嫌太油膩，食完已滯咗。筆者本來想叫支sake，可惜冇得存酒，怕飲吾哂，唯有同朋友嚟先叫😔只叫咗杯汽酒。仲想試海膽多士，可惜已飽。…Read More

每朝8點前上班路過太子，例必到金華嘆個人氣飽同人氣奶茶。最近新出品的叉燒包亦不錯，値得一試再試！至於人氣嘅菠蘿包更加無須多講，新鮮出爐，熱烘烘，抵佢攞獎；奶茶香滑濃郁，冇得彈！怎知某日，點了餐，順便要多杯水，但侍應亞姐去咗相反方向，心怕亞姐忘記，叫多次「吾該要杯水」，亞姐答覆「亞生，我都要時間去攞㗎」！一向脾氣暴躁嘅筆者，晨早流流要受人氣，無名火起三千丈，掃走枱上食物，放低$即走！筆者為一時之氣，傷及其他侍應及食客致歉。但亦希相關員工改善工作態度。筆者在此聲明，從來沒因對方是待應而睢不起對方。…Read More