winnie0411's Profile

今晚同朋友食生日飯，openrice預訂咗枱，寫咗「如有機會食甜品，請餐廳寫慶生句子」，電話又提前講過，聽電話嘅女侍應有提醒我只有心太軟同埋芝士餅可以寫字，但嗰時我未揀到要邊款甜品，想自然啲現場傾咗先落order...到食飯時，我哋一開始成功鋪排咗正餐後想食甜品呢件事，但正餐剛食完無耐，未等我提出不如叫甜品，一個女侍應竟然行埋嚟我哋張枱（嗰刻已心知不妙）點知佢真係開口問：「請問你哋決定咗甜品係心太軟定係咩未？」我哋明明無舉過手話要甜品，當下真係好odd...全世界deadair 兩秒你眼望我眼，被逼扮自然揀甜品回應，但睇到朋友嘅眼神，好明顯佢已經睇穿咗，好sad幫人慶生咁多次，第一次遇到踢爆驚喜嘅豬隊友竟然係間餐廳，內心真係好崩潰！！平心而論，呢度環境幾好，食物質素同份量都唔錯，今晚一切都幾乎完美，唯獨個結局...食完真係留下深深嘅遺憾，唉......…Read More

平時好少打comment，但今日試左個餐，烏冬都未食完真係忍唔住要俾下意見，避免其他青衣人中伏(因為外送apps都叫到呢間餐廳)海鮮烏冬額外有提供碗湯，湯係幾好飲，好足料。但無諗過海鮮烏冬嘅「海鮮」竟然大部份只係蟹柳或日本卡通式配菜，蝦都細粒到差啲睇唔到，當下好後悔無叫到其他餐廳嘅海鮮烏冬......😵而家選擇愈來愈多，建議一係轉過食物名，一係就換返大粒啲嘅蝦，係咁兒都加少少魷魚，出個良心餐😂…Read More

食嘢嘅時候啲職員服務態度唔錯，食物都幾好嫁，所以我已經係第二次幫襯。但近來再去，join咗會員制後有啲失望。由3點半食到4點半左右，賣單時張單已經出錯，原來同隔離枱調轉咗。跟住拎返自己張單，8折又變咗85折，同經理講返後，佢話check一check，跟住隨即出返張啱嘅單。但係，到我話想儲會員積分，經理就話出咗單就無得加分，仲話頭先已經逐枱問「last order有無嘢加，而家要出單」，話我知要儲分嗰時就應該講。下，我鬼知你咁多規矩，只聽到last oder呢樣嘢咋喎，其實你頭先出錯單都可以即刻再出一張俾我，好多餐廳都係俾錢嗰刻先嘟會員分，而家處理返個會員記錄係咪真係咁難？要整會員制但儲分又咁麻煩你哋就唔好搞啦！連續兩日咁支持你哋，食完荃灣又食青衣，無諗過青衣呢間咁令人失望，唉。…Read More

同老公慶祝結婚周年經過銅鑼灣好靜嘅街道揀咗呢間因事前無查到openrice入到去無論服務定食物水準都大有驚喜最後先發現原來係有咁多正評嘅隱世居酒屋壽司拼盤非常新鮮串燒每一串都好好味我哋想叫酒waiter見我想飲葡萄味但個menu無主動話可以幫我調校老公揀左3合一清酒系列相當滿意最有驚喜係A4和牛壽喜燒鍋兩個人第一啖將和牛放入口都忍唔到「嘩」出聲雖然價錢嚟講的確唔平但質素絕對有交代今次最遺憾係日本海膽未返到貨下次有機會一定再encore !…Read More

好後悔睇完評論後抱住期望專燈走嚟呢間食......我好少講嘢咁過份，但我今晚真心覺得自己食咗垃圾。今日一個人食晚餐，叫咗個泡菜五花腩湯外加一碗飯。坐低15分鐘一直無人俾水我，以為無得提供，迫於無奈叫咗罐嘢飲。(直到臨走前見到另一張枱坐住兩個人，枱上有水樽，先知原來有水提供，一個人食可能係cheap啲)明明見到隔離枱都係叫湯類加飯，但人地有一小碟前菜，我呢邊同樣係咩都無。anyway唔緊要，但個「泡菜五花腩湯」嚟咗之後，我一度以為自己叫錯餐，因為用筷子撩嚟撩去，我都見唔到五花腩，只有滿滿嘅菜菜菜......後來終於搵到了....係片片都幾乎細到隱形嘅「五花碎片」......百幾蚊一碗但交咁嘅貨，我真心無辦法接受！最後，為咗唔好浪費錢同埋努力活下去，勉強食左一碗「菜飯」。估唔到賣單200幾蚊，但一啲都食唔飽...最後過咗隔離鋪頭用40蚊買咗一條飯卷填肚，味道仲好味過佢。唉，正宗貼錢買難受。而家生意難做，好心你哋就俾啲heart！…Read More