馬交餅's Profile

葡京/新葡京既餐廳品質全部都有返咁上下, 價錢同樣有返咁上下, 嫌貴但又想食既可以揀Executive Lunch.大廚就係其中一間.唔好以為weekday冇乜人, 其實好多人一早已訂晒位, 只不過點半先陸續坐滿, 所以都係訂定位穩陣.雖然係主打食扒, 但亦提供壽司魚生.不過黎到冇理由唔食扒架.呢個大火爐, 好好火, 所有扒同麵包都會放入去烤.每枱都會奉上兩條大麵包, 一條係硬包, 有點似農夫包, 個面勁硬, 另一條係薄荷朱古力軟包, 好好味, 但唔可以食太多, 因為跟住仲有大把野食.食唔晒可以打包, 唔洗怕唔好意思, 現場所見好多人都會打包, 唔好浪費嘛.揀左Salad Bar, 沙律款式十分多, 好吸引. 睇啱想食既就好夾落碟, 因為每人只可以攞一次, 錯過左就冇.美國特級西冷order左五成熟, 但上枱切開時已變左做七成熟. 好重既炭烤味, 好香.鱸魚其實冇諗過係原條咁上, 燒得好靚, 同樣有好香既炭烤味.甜品可以選黑森林蛋糕或生果杯, 蛋糕太甜, 後悔冇揀生果杯跟啡既糖漿係caramel味, 好香好特別, 習慣唔落糖既我都忍唔住加左少少.…Read More

假期冇訂位, 只好一開門就去. 未有客, 好寧靜, 個環境同樓下自助餐差好遠 (樓下爆多人).兩個人, 食唔多, 所以揀左幾樣多人推介既.青檸梳打nothing special, 不過俾足兩個青檸, 好足料.頭盤小吃 - 蒸粉包、豬頸肉、春卷及炸蝦餅四樣都好好味! 尤其個蒸粉包, 平日食開既平價越南菜個粉包都只係常溫, 而呢個係熱既, 而且勁多料, 好好味~~個炸蝦餅亦好厚身, 夠蝦味.脆皮咖喱牛腩 呢個一定要食.牛腩夠晒淋, 外層炸得夠脆, 唔怕油, 個咖喱汁一流, 好味到要點麵包食晒佢. 牛肉湯河另一推介.有牛肉, 牛腩, 牛丸, 牛筋, 牛柏葉, 個湯好重牛味, 又係好味到想飲晒佢.coconut layer cake以為只係普通野冇乜特別, 但件千層糕並唔似得平時食既咁膠, 點埋個咸咸地既椰漿味道當堂唔同晒, 變得更好味.不過好飽肚就真既.好欣賞呢度既服務, 而且碗碟甚至湯匙都係暖既, 減低對食物溫度既影響.以越南菜黎講係貴左少少, 但品質同服務絕對值.…Read More

整體黎講呢度既野其實冇咩特別, 飲品食物都係一般野.但佢既叉燒蛋治真係好正, 舊叉燒蛋超級厚, 蛋又唔會煎到全熟, 食時仲有蛋汁流出黎, 正!一面食早餐一面望住佢o的自家製既麵包一盤接一盤新鮮出爐, 雖然外貌普普通通, 但真係好吸引, 見o的街坊食客幾乎枱枱都叫一個, 攪到我都忍唔住買返幾個返屋企 (因為個叉燒蛋治確實好足料好飽).俾錢時先發現......嘩! 雞尾包+菠蘿包+叉燒包只需$5.5!!咁既價錢響出面既麵包鋪只可以買到一個呢! 真係好抵食. 難怪勁多街坊黎買包啦.…Read More

無意中經過蘭杜街, 正諗緊食咩之際, 俾呢間鋪門口既介紹吸引住, 飲食雜誌越南牛肉河大比併No.1, 真係咁勁? 但又確實成條街佢最多人, 即管去試試.幾乎枱枱都叫牛肉河, 我就叫左個牛坑腩扎肉河. 一上枱就已經聞到個湯既香味, 飲一啖, 好香好濃, 我本身都幾怕果o的香葉味, 但呢度既我完全接受到, 加埋青檸同辣椒仲香. 牛坑腩好淋好夠味, 河粉好爽好滑.至於朋友既牛肉河, o的牛肉上枱時已經幾乎熟晒, 不過佢地話ok, 都幾淋.…Read More

已經係第二次去食呢度既Sunday brunch, Mop320+10%, 相信仲會有下次.先講講環境, 好大好寬敞, 一入去就見到個open kitchen, 好企理, 食物枱亦分開唔會堆埋一齊, 整體好舒服.每位包一杯西班牙甜酒或香檳, 兩樣都好易入口, 另加一杯咖啡或茶, 以及無限果汁, 果汁全部真材實料, 起碼三份一杯係果肉(我飲西柚汁).海鮮吧, 絕對係重點所在, 大蜆, 龍蝦仔(成仔手掌咁大), 青口, 聖子(真係未見過咁大隻!! 個殼有成20cm咁長), 長蟹腳, 全部都好新鮮. 仲有魚生, 款式都幾多, 帶子, 三文魚, 油甘魚, 甜蝦, 吞拿魚, 非常鮮甜! 淨係呢區食多幾轉都已回本.湯只得一款, 今次係什菌湯, 好足料好濃菇味, 不過未必個個o岩, 上次飲過佢既蜆湯都好正, 超多蜆肉.熱盤, 有八款左右, 望落去同平時食開既野差不多, 所以冇試, 不過朋友食過少少都話味道幾好. 仲有切肉, 食得落不防一試, 最怕係個胃裝唔落. 點心, 冇食到, 唔知味道如何. 仲有即煎三文魚同牛扒, 牛扒好淋好有牛味, 三文魚就油左少少. 另外有原條煙三文魚, 推介. 唔夠飽仲可以要碗即煮既意粉.頭盤&沙津吧, 款式多到數唔晒, 好多靚料, 最鍾意就係佢既凱撒沙律係即場撈既. 個黑醋汁好正, o的菜又新鮮, 多種靚火腿即叫即切, 芝士都有四五款.甜品麵包區, 甜品種類唔算好多, 但全部都好有水準, 麵包可能會有人覺得頂住個肚浪費"空間", 但佢o的麵包全部睇住佢新鮮出爐, 好正! 雪糕區, 係haagen-dazs既, 雖然每次只有約四款供選擇, 但其實refill時會換過第二隻口味, 所以實質有成六七款, 配埋個熱辣辣既waffle就一流啦! 想食少o的配pancake都唔錯.以呢個價錢食到咁高質數既料絕對係超值, 而且仲可以食成四個鐘, 唔怕唔夠時間食, 最怕係個胃唔夠大食唔到咁多野.…Read More

由於位置關係, 一直都覺得呢間餐廳有點似黑店, 但原來俾佢既外表欺騙左, 入去食過會充滿驚喜.一坐底就有籃炸蝦片上枱, 好大籃, 有十幾廿塊, 幾辣幾脆, 正!打開個餐牌, 價錢中等, 一般都係幾十蚊一個菜, 富貴魚呢o的海鮮就貴o的, $120.我地三個共叫左五個餸, 結果上菜時, 嘩!! 碟碟都好大碟, 真係叫多兩個人黎食都夠.炒雜菜, 冇咩特別, 不過量幾多同埋真係幾多唔同款式既菜 (唔似得有o的店實質椰菜為主)粉絲煲, 差不多有個半公仔麵咁多, 而且個底唔會放太多肥豬肉, 好夠味.燒尤魚, 一個人食都未必食得晒, 幾香幾"淋", 好易咬開, 有少少似o的街邊韓式燒尤魚咁"淋".炸蝦餅, 超大件, 好似M仔塊魚柳咁, 差不多厚, 只不過係細少少, 好足料, 食到第二件時已經覺得好頂.甜酸倉魚, 諗住$60都唔會太大條, 最多兩隻掌心咁大, 點知係再大多一半, 好厚肉, 而且個味調得唔錯.三個人飽到上心口但都仲有好多野未食晒, 而且兩層既店晚上約七點半已經坐滿人.真係估佢唔到咁好食咁抵食.…Read More

第一次去, 完來都幾細, 不過枱同枱之間距離都幾開, 所以坐得好舒服, 同埋唔太多人.中午飯只係叫o的大路野. 小菜 -- 一坐低就有碟花生同豆干, 兩碟都好好味, 尤其係豆干, 好快食晒.小籠飽 -- 層皮幾好, 唔怕厚亦唔易穿, 味道不錯.蒽爆牛肉 -- 本身唔係太好蒽, 但都夾左好多黎食, 牛肉幾lum, 亦唔怕太咸.上海粗炒 -- 幾彈牙, 唔怕好咸, 但勁少料, 好難得先見到幾條肉絲.雜錦鍋巴 -- 鍋巴唔掂, 硬既. 但o的料都ok.芽菜炒鱔糊 -- 勁咸, 超唔掂.價錢屬中上, 不過咁環境算係合理, 整體味道都唔錯. 想安安靜靜同朋友一邊傾計一邊食飯呢度算係一個唔錯既選擇.…Read More

澳門少有既日式西餐, 樣靚味道好, 價格中上. 環境舒適, 而且食品款式夠多.食過日式飯類, 西式意粉, 日式小食, 甜品, 全部水準都唔錯, 特別喜歡佢既蜜糖麵包磚, 差不多等於四五塊厚多士咁大件, 入面切成一粒粒, 加埋蜜糖烤到金黃色, 好香脆. 咖啡種類亦十分多, 而且水準唔錯, 就連最普通果杯跟餐咖啡都幾好.服務態度幾好, 不過野食上得較慢.…Read More

一直以來只知佢既粉麵出名, 但經朋友介紹先知原來呢度有用過萬元既咖啡機沖出黎既即磨咖啡飲, 而且只賣$7, 真係超級抵!飯麵方面以東南亞款式為主, 味道幾正宗 (都幾人東南亞裔人士幫襯), 而且款式夠多. 下午茶時間仲有多款十幾蚊既套餐, 有包有麵, 幾抵食. …Read More

佢既葡撻好食就係人都知, 但其實三文治都好好食.由於澳門較少地方可以自己選料夾三文治, 所以每逢中午食飯時間都會有好多上班一族黎排隊買飽.包可以選擇白方包, 麥方包, 白中東包, 麥中東包, 洋蔥包, 鮮奶餐包, 牛角包同豬仔包, 其中中東包算係比較特別, 因為唔係到到可以食到, 口感唔錯, 而且可以包到好多好多料!! 料則有成超過二十款任你選.另外推介佢既西梅蛋糕同薯仔布甸, 好夠味, 唔好睇薯仔布甸細細件, 由於幾足料, 所以食完會超飽. 飲品方面除左一般既咖啡奶茶外, 木瓜牛奶同原味乳酪都值得一試, 但原味乳酪由於完全冇糖冇味, 所以唔係個個人o岩飲.講到服務就真係不願致評, 每次去買野都好似前世欠左o的阿姐咁既, 硬係要受佢地冷言冷語+呼呼喝喝......唔係睇住o的食物既份上真係唔想去.…Read More

由於自己同朋友仔都鍾意食朱古力, 所以去左試朗廷個Valrhona朱古力自助餐.朱古力食品包括: 蛋糕, 慕絲, 撻仔, 噴泉同曲奇. 全部放晒響兩張圓枱上, 個人覺得款式算幾多, 因為太多的話都根本冇可能試得晒. 除左甜點外, 每人仲有一份tea set, 咸點為主. 雖然用架上, 但食完可以叫waiter添. 最低層既三文治仔全部都好好味, 尤其係個ham sandwich, 中層既三文魚批蛋批好香, 但個烤鴨批就唔多掂, 超厚皮, 上層既朱古力鬆餅好正, 好鬆脆又唔怕甜, 但個小果撻就好似放左成日咁, 淋鬼晒.慕絲......甜左o的, 不過其中有一款辣既幾特別幾好味. 撻仔......一般, 但面頭o的生果好食. 曲奇......白朱古力果隻幾甜, 不過夏威夷果仁好正, 黑朱古力果隻就唔怕甜, 但味道唔夠濃.蛋糕方面, 由於都幾大件, 所以要share黎食. 三層慕絲餅, 超甜, 唔多o岩口味, 朱古力芝士蛋糕勁濃芝士味, 好香. 香橙朱古力蛋糕, 勁似積及橙餅, 好味! 最正就係個用100%可可做既特濃朱古力蛋糕, 好香濃, 又軟熟又唔怕甜, must try! 不過一個人食晒成件的話都幾係野.中途waiter仲俾左我地每人幾粒Valrhona朱古力同一小杯熱朱古力. 佢好細心咁逐粒同我地介紹係咩味道, 而且食完可以再問佢攞過. 服務態度抵讚! 杯熱朱古力好香, 好滑, 好rich, 飲一小啖已經覺得好似成口野咁, 同埋有少少漿住既感覺, 不過一定要襯熱飲, 唔係會慢慢凝固, 但真係好好味.埋單每人$230有找, 如果喜歡朱古力的話可以一試, 因為Valrhona既朱古力本來就唔平, 而且個buffet整體黎講都ok. …Read More

叫得做coffee shop咖啡應該唔失禮至係, 但佢既咖啡......真係只可以叫做係一杯普通飲品.前前後後都去過幫襯幾次, 每次都會點不同口味既咖啡, 但次次都只感覺一般.不過講環境都ok既, 空間夠大, 裝修又算係咁, 係週未時嘈左o的囉, 平日中午就會靜好多.食物反而唔錯, 飯, 意粉同小食都幾好味, 蛋糕就一半半, 有o的幾好味, 例如香橙朱古力蛋糕, 但有o的就普通到暈, 好似人地初學整蛋糕既作品咁.如果響噴水池一帶行到累想搵個地方坐下休息下, 呢度絕對係一個好地方, 但真係想嘆返本靚咖啡的話, 相信會好失望.…Read More

牛角包係首選!! 午餐包抵食 (午餐肉超大塊! 一罐午餐肉只夠做四個包.)咸牛肉包, 奶皇包, 雞批都好正! 就連一o的冇涵既洋蔥包都好好食,最愛係提子包, 勁多提子, 大大個足夠我食三餐.…Read More

我通常去天神巷或美麗街果間,o的豆腐真係幾香, 十零蚊個豆腐麵好多豆腐,豆腐花都好味. 唯一唔好就係中午時段超多人勁難有位.不過難搵位即係證明多人欣賞.…Read More

款式真係好多, 品質亦真係唔錯, 但有兩樣野最衰: 1. 限時兩小時, 2. 要同人搶.每次都食到攬住個肚走, 無論麵包, 湯, 熱盤, 天婦羅, 點心, 燒味, 魚生, 甜品, 沙律都好好味, 款式多到唔知食邊樣好.但每當發現排隊攞野食條龍無時無刻都長到咩咁, 同埋排到去唔係要等好耐就係一早俾人攞晒就會覺得好激氣.以今時今日澳門有咁多優質既自助餐, 如果呢間已食過一次, 建議下次可以去試第二間.…Read More