食上癮's Profile

越來越多日本迴轉壽司店落戶香港，先有壽司郎，後有はま壽司和鮮選壽司，前者巳搶佔平價壽司半壁江山了，而後兩者無以爲繼，はま壽司到現在開分店都衹聞樓梯響，而鮮選在一輪擴充後亦陸續結業剩下海之戀一間，現今香港經濟低迷，兩餸飯門庭若市，難得仲有日本公司還有雄心壯志進軍香港，實在勇氣可嘉。 正所謂新屎坑三日香，開張之日已經大排長龍，不過太古出名多日本人，喺呢度開店實冇輸嘅，係唔知夠唔夠比舖租啫，到步之日才發現，樓上嘅板長已執笠了，一鷄死一鷄嗚，且看呢度有乜特別先。 先講環境，遠看門面光鮮亮麗，比起日本店或台灣店的日本風格，多了一絲香港味道，少了一些日本味道，而食物方面，今日點了： 間八，味道清爽，帶點魚香，作爲第一碟印象Ok 赤貝：爽脆鮮甜，很難想像呢碟嘢55蚊，扺食得黎新鮮 昆布漬平目魚：好少有迴轉壽司店做呢啲功夫嘢，大概係將平目魚放企昆布上，將昆布的旨昧滲入魚中，通常係高級鮨店才會做，呢樣嘢值得加分，平目的清爽加上昆布的味道，隱約食出魚的旨味。 旨味平目魚：在比目魚上加上木魚花，比起剛才的昆布漬更濃魚味。 金目鯛：又係一款高級食材，到底我係咪食緊迴轉壽司架！味道平均，係一件可以食多幾件嘅壽司，用了湯霜皮造り的造法，將金目鯛的甜味引出來。 生北寄貝：味道鮮甜，比起赤貝冇咁爽，但佢嘅甜味比赤貝有過之而無不及。 醬油漬甜蝦：呢個叫我唔使點豉油，雖然賣成30蚊，但蝦身算大隻，豉油咸甜適中，又係一道旨味之選。 紋甲烏賊柚子：在紋甲魷魚上加了點鹽和柚子，將味蕾清新一番。 醋漬鯖魚箱押：在鯖魚上加上白板昆布，是一道很傳統的江戶前壽司，鯖魚醃漬得宜，沒有過度醃漬，加上昆布調和，食出東京灣魚販前的感覺。 特大熟蝦壽司：呢個純粹見佢寫特大想睇佢有幾大，味道唔錯，冇乜特別調理，和之前那幾道比了下去。 醬漬吞拿魚：又係一道江戶前壽司，醬油的醃漬將吞拿魚的魚味引發出來而又不會太咸是很難的，這裡處理得唔錯而呢道壽司更是本人的喜愛。 海膽：用的是日本馬糞海膽，但唔算特別出色，考慮到佢價錢45蚊就一定收貨啦，呢個雖然唔算最好，但冇臭味所以都欣賞佢嘅(本人很一討厭食臭或苦的海膽)，算係合格。仲有其他食物如：小肌，中吞拿魚腩，魚湯，炸竹輪烏冬，但呢度剩係可以出12張相所以出唔到。 小肌：呢個不過不失啦，喜歡食小肌嘅一試無妨。 中とろ：如果説吞拿魚最喜愛部位，我的答案一定係中とろ，就好似叉燒嘅半肥瘦咁，又有魚味又有魚嘅脂肪。 魚湯：魚味好濃，好似乜魚都喺曬裡面咁。總括黎講呢間係唔錯，從食物的制作可以看出師傅們的心機，聽講日本嗰邊會表演即場劏魚，唔知呢間會唔會呢？…Read More

正所謂新屎坑三日香，呢間前手叫素一，估唔到轉手都係做素食自助餐，一於試下先。唔知點解食素食會有壽司，但我又buy喎，因為我本身就鍾意食壽司，過下癮都唔錯。個素鮑當然同真鮑冇得比啦，個湯其實唔錯，係冇肉味咁解其實啲野同之前分別唔大，我覺得Ok嘅，可能用同一班底厨房掛，不同之處係晚市選素鮑同個唔知咩燉湯，都扺嘅，由於係禁堂食前食嘅，唔知而家仲有冇呢？新開冇幾耐價錢好似仲平左添，整體黎講算唔錯。順帶一提，佢個洗手間喺出面商場，行幾步就到都算方便，老人家唔怕揾廁所。…Read More

呢排晚上不能堂食，唯有買外賣，可能太夜的關係，樓下吉之島啲壽司差不多賣哂，本身好耐冇食板長，至於點解好耐冇食呢，就有少少故事嘅。由佢剛投到條日本一之前已幫襯佢同板前，嗰時佢啲種類比其他壽司店比較日式啲，佢亦都係當時香港少有賣藍鰭吞拿又唔貴嘅店，尤其佢初初出一系列油甘魚壽司特別喜歡(因本人喜歡食油甘)，但自從幾年前佢啲股東事件後，感覺佢開始冇乜心做，只係食老本，近呢幾年我久唔久都會食呢間，由佢剛裝修完叫鮨樂，到後來叫返做板長都好，都係越食越差，至於點差，先看圖片吧圖片係右上赤貝，三文腩，左口，第二行吞拿魚，甜蝦，深海池魚，軍艦有珍珠蠔同芥末墨魚。先講赤貝先，應該唔係包裝貨，但放左多日嘅貝腥味出曬黎，難食過包裝貨然後三文魚腩，我想喺度講其實三文魚腩由於油脂比一般位多而又近內臟，所以好容變臭，相信食開三文魚腩嘅人會明，而呢嚿好明顯臭咗，無奈因為返到屋企先知。左口魚一般，但唔知師傅係咪心情好切得較厚，比較難嚼。深海池魚唔新鮮，感覺擺左好耐，存放環境又唔理想，令到啲霉味出曬黎。甜蝦冇乜特別，好難整得唔好食。吞拿魚今晚最失望，佢都係厚切，可能面積細所以厚切感覺抵啲，但佢個部位根多仲要厚切變相成件事變得好難咬，同埋件野開始橡膠化。至於兩款軍艦其實我幾佩服佢嘅諗頭，佢諗住隔住啲軍艦冇咁容易跌低或者側埋一邊，出發點係好，但到我想攞起來時就出問題了，你會發覺用筷子係攞唔起嘅，而且件壽司會攞到變曬形，唔知用手攞係點啦，至於味道就冇乜特別都係嗰啲味啦。至於我頭先話我好鍾意食嘅油甘魚點解今次冇叫呢，因為上次黎食時覺得佢已經唔係原條油甘魚，可能係半條魚柳，咁有乜分別呢?原條油甘魚比半條魚柳一定好食啲啦，不過係貴啲囉，所以知佢唔係原條油甘之後都冇食。總括黎講呢度有佢可取之處(好似啲想過壽司癮嘅又唔想食咁貴嘅，雖然呢度都唔平)，但從佢多年前投日本一時嘅質素，嗰時覺得全港最大連鎖式日本餐一定諗起板長同千兩，到今日老實講元氣都好過佢，雖然真係唔想咁講，(但本人亦都唔會再食元氣千両的)。其實以前板長好耐之前就有飛機貨，好似深海池魚呀，金目鯛(而家冇左)，活北寄貝，梅真鯛甚至係左口魚(好多地方得左口魚邊咋)，嗰時覺得佢好有心機做架，唔似嗰時出面好多加啲沙津醬就話係新款，記得嗰時有活北寄貝食出面都要百幾蚊隻，而佢只賣幾十蚊，仲要質素唔差，到而家款式越來越少，鮮度越來越差，見到咁嘅情境都幾唏噓。…Read More

是日來到北角行街，看到小巷入面別有洞天，有中，西，日，星馬菜，嚴如一條小食街，見到呢間叫酒盜的，心血來潮想飲清酒，於是便跟友人進去。 一入去是亦西亦日的裝修，佈置樸素簡約，出品部是半開放式的，相信對衛生有一定保證。不過場地實在細小，我與友人進去之後已是高朋滿坐，外面已有人排隊了。坐下先點個什錦漬物，有醃蘿蔔，紫蘇唔知乜，牛蒡醬油漬，酒盜芝士，款式都算多，佐酒一流。 點完食物就點清酒，今晚支酒來自京都，用的自然是地水，米種來自當地比較少見的米種，酒質溫和，香氣適中，是一個好的開始。這裡的酒多達卅多款，很多都是出面少有的牌子，仲可以一杯杯的落單，如果想試多幾款的話，呢度係唔錯嘅選擇 食完漬物就食燒物，呢個銀鱈魚西京燒冇乜特別，不過見佢98蚊份量唔少都算係咁，中間條姜芽好食過主菜，姜味鮮嫩而不辛辣，唔知呢啲係唔係妹仔大過主人婆呢。 呢個店家推介的日本鷄翼，索價25蚊一隻覺得偏貴，但友人想試唯有應酬一番，本來冇乜期望之下竟然有驚喜，咬落去皮脆肉嫩，鷄味十足，非一般雪藏貨可比，可以算得上物有所值。 牡丹蝦刺身就食得多喇，天婦羅就未試過，就叫兩隻食下，咬落肉彈鮮甜，但都係唔及花竹蝦好食，不過計返價錢算不過不失，隨蝦仲附送茄子兩塊，又係送酒佳品。 酒過三巡，發覺意猶未盡，奈何酒已乾盡，於是詢問店家有何推介，原來每星期都有不同的清酒優惠，今日的是久保田三壽:萬壽，碧壽，千壽。雖則是大路牌子，但數十元可以飲到萬壽夫復何求，隨酒附送小食一碟，真係驚我有酒無食還是有食無酒呢，酒盜之名果然名不虛傳，食下飲下話咁快就盜晒啲酒喇，自問不勝酒力，唯有期待下次有緣再醉。…Read More

剛從池記行出黎之後，總覺得若有所失，可能頭先碗麵太少吧，唔夠飽肚，正當躊躇揾串魚蛋醫肚時，想起附近好似有間黃枝記未食過，不如去試下，但轉念又想，剛剛才食過雲吞麵，而家又去食，前世未食過雲吞麵咩，記得之前有本雜誌都有介紹過呢間，好似好出名下，又記得呢間野喺中環都係街知巷聞，咁既然佢難得座落銅記，頭先碗麵又唔係好夠喉（一來唔飽，二來唔好食），咁就再去食返碗溝下貨啦。 去到門口，原來呢間係樓上鋪，記得個位置好耐前係一間韓國餐廳，之前食過味道都算道地，估唔到咁都要執，又想香港租金真係非人想像，遲啲銅鑼灣仲會唔會有呢啲麵店呢？ 行過樓梯進入門口，旁邊一副對聯藏著懷舊風格，內裡是簡約裝修而搭配中餐館的圓桌排陣，不知是中是西的感覺。角落有間房仔，展示了打麵做的麵棍，又多了博物館的格調，像在訴說這間店的歴史和態度。坐下來不吃其它，叫了碗細蓉，原來正好下午茶，有埋野飲，見佢有即磨咖啡便點，咖啡配雲吞麵，一個中西合壁的組合。 麵一到，心裡一陣伏意味濃，如圖所見，雲吞浮面，麵似餅糰，韭黃欠奉，心諗：唔係掛! 先試麵，冇硯水味，但彈牙欠奉，唔知係咪煮耐左，麵餅亦冇攪鬆，吃起來仲差過二三流麵店，再飲湯，好似麵啲硯水走晒去湯裡，硯味重，飲唔出蝦籽味，味精亦出眾，比池記食的更重，再食雲吞，跟剛才情況一樣，內餡結實，魚尾收緊，味精更重，都算，成碗野最大敗筆係---冇韭黃，你比幾條蔥我當韭黃？啲韭黃用晒所以得蔥嗎？枉你間舖咁有心整個歴史博物館出黎，而你竟然衰喺條韭黃度，食開雲吞麵就知條韭黃有幾咁緊要。到辣椒醬，要問侍應攞，枱面嘅係辣椒渣，非那回事。醬屬普通街邊貨，冇乜特別，由此亦可感受到店家的心態。 食到這裡，自覺與它緣盡於此，留下一麵二湯便毅然放棄。 總括黎講呢個麵係唔合格，亦好多瑕疵，唔知係因為下午茶所以師傅hea做定其他原因，而雲吞浮面可能各家做法不同，但個湯底同個韭黃真係致命死因，呢碗野亦令在下今日寫呢三篇食評。記得之前有一娛樂投資者說小成本電影怎可能好過大卡士制作攞最佳電影，然後攞雲吞麵攞唔到米芝蓮來比喻，其嘴臉令人作嘔，在此不表論述。可能今時今日有心做一碗雲吞麵嘅人越來越少，諗住發達嘅人越來越多，一碗好嘅雲吞麵變得隱世，令到老一輩人看不起它，年輕一輩人不認識它…Read More

離開謝斐道後， 可能今日連伏兩次嘅關係， 唔知點解心裡有股莫名的衝動，今日點都要食返一碗似雲吞麵嘅雲吞麵。本來想去中環會這兩間的總店（好似佢地總店都在中環吧），奈何天色已晚，望錶已是5到6點了，肚子又不知能否再吃兩碗，亦不知味蕾會否遲鈍，誤將魚翅當粉絲，在心有不甘情況下來到今日第三站：麥奀記。 可能有人會諗：儍架，一日食三碗雲吞麵，而家就算真係有碗好食嘅放喺你面前，你都厭啦！係架，我都係咁諗，就算真係有碗一流嘅雲吞面喺我面前，我可能會食之無味，但唔知係咪偏執症發作，係都要試多碗（其實心裏十五十六），中伏嘅野一不離二，最多二不離三啫，於是大踏步便進了去。 其實呢間野之前來過幾次，每次都有水準，但唔知今次會否例外呢？店係一般茶記格局，但感覺整齊乾淨，呢樣野係好多茶記做唔到的。坐下卡位，先來茶、筷子、味碟，茶是暖的（剛才的是凍的），味碟好像知道客人一定會點醬似的。照舊雲吞麵，不一會麵已送到，因為全場得我一客。 一看樣子感覺對辦，先喝湯，是蝦籽的鹹和魚干的甘甜，店家枱上介紹是大地魚熬制，喝起來濃而清；再來食麵，一夾，終於領略銀絲細麵的真髓，若要分別的話，之前兩間的麵係一餅一餅斷唔開嘅，好似一食就要成嚿麵吞晒；而呢度啲麵係一蔬一蔬嘅，食起黎聲，咬口彈牙，真正竹昇麵就是如此，三爬兩撥已經清，唯恨量少。再到雲吞，看見魚尾蠢蠢欲動，爬匙送口，魚尾滑溜，餡中全蝦，不帶豬肉，三隻雲吞很快便掃清，留下一隻用來點辣椒醬，隻醬辣中帶酸，應該是自家辣椒醬，最後剩下幾條韭黃和湯，緊係一飲而盡啦。 本來諗住食唔晒嘅，但鬼叫佢好食，又細碗，所以先可以一滴不漏咋，呢次佢細碗嘅缺點變成優點。 食完之後感觸良多，既嘲笑自己攞苦黎辛，走去一日食三次雲吞麵，亦可慰終於食到真正香港雲吞麵，呢碗麵絕對值得摘星，而唔係某人所講上唔到大枱，當然冇星都冇壞，大家都知星星魔咒是食店的死亡筆記，在下不想香港碩果僅存的食店就此湮沒，反正香港人都唔希罕粒星星，我地希罕嘅係屬於香港人嘅雲吞麵咋…Read More

本喜愛吃日本餐的本人，今天日上三竿才起床，本想吃壽司奈何很多好吃之日餐皆已落場，正愁吃什麼好時突然心血來潮想吃雲吞麵，平時食開麥字頭的，今日想試下新地方，之前聽講好多乜記物記都係由池記演化出黎，咁就去試下啦。 位於波斯富街呢間唔知係咪總店，見佢矻立銅鑼灣都有若干年，心諗可能會有一番驚喜（見佢號稱正宗，應該味道會更好吧），一入去有別於一般粉麵鋪簡橫的裝修，進入眼簾的像酒家的豪華，但座位的不倫不類顯得與裝修格格不入，左右兩邊是兩排座椅，中間有一條直行的二人座位，本人被安排到中間的二人位坐下，感覺上像動物園被參觀的獅子一樣。點菜時服務員態度尚算良可，平時點開細蓉的，但見佢得兩粒雲吞太少，便改叫雲吞麵，再加杯薏米水。 等待不算漫長，麵同薏米水均已奉上。當麵來到時，聞到一股強烈的羶味。我心諗，唔係掛!食雲吞麵都會有羶味，先喝湯，有蝦子味，有魚乾味，但更重的是味精；再食麵，麵質普通，唔特別彈牙，冇硯水味，尚可以；再食雲吞，感覺好實，似工場貨，金魚尾冇柔軟的口感，而家先知咩叫金魚尾雲吞（因之前食過一間啲雲吞條金魚尾好柔軟），之所以叫金魚尾雲吞，是因為雲吞那層鄧麵的邊好像金魚的尾巴游下游下，故有此稱號。平時雲吞好食的話，食完四粒雲吞都唔使落辣椒醬，通常都係放在旁邊點綴，食完雲吞再試辣椒醬的味道，這動作很奇怪吧，因本人覺得一間麵家的辣椒醬反映了店家的心機，這裏的辣椒醬寫明出自《余均益》，尚算有心機，但本人食到第二粒已開始點醬，反映店家的辣椒醬比雲吞搶鏡。 食到最後有三條韮王，精粹在此，本想將湯一飲而盡，奈何羶味圍繞鼻子，最終只好作罷。本人問店員羶味從何而來，店員都答不出所以，本人推測應該來自肉類處理不當（當然無從考究）。 其實唔計羶味，此店唔算中伏，不過佢嘅名氣可能太過，可能此店並非總店吧!本想比喊臉的，但綜合其它因素又不至於喊臉，所以就比中間啦，希望下次能有所改善啦。…Read More

好耐冇喺港島東用膳，呢日啱啱經過鰂魚涌食開呢到有兩間幾出名嘅日本菜喺附近，諗住試下，點之路過見到呢間新開張，既然嗰兩間都試過，就試下呢間啦！在門口看店子一眼望曬，叫做整整齊齊啦，老板兼大廚是香港人，同其他以日本人做主打嘅頗有不同，想必有一番驚人藝業。一坐低問攞餐牌，原來在牆身木牌就是，可能未印得切掛（大家都知香港啲租有幾貴啦，早一日開就多一曰生意），經理話遲啲有正式餐牌，不過呢啲小節唔理佢啦第一道頭盤沙律不過不失，跟住就係刺身，有深海池魚薄切，吞拿魚赤身和大toro，仲有粒貝，每樣鮮度都幾好，尤其是吞拿魚，鮮度像剛剛落機就上碟，而老闆都話：真係啱啱落機就比你食左啦，lucky!不得不提係老闆介紹吞拿魚的新奇食法，佢話條吞拿魚因爲新鮮，所以最好食原味，之後佢磨左嚿石頭咁嘅物體（原來係岩鹽）曬落啲魚生就咁食，冇得頂，赤身竟然有中toro嘅味道（相比大toro，我比較喜歡中toro），之後粒貝都唔錯，加埋啲岩鹽冇得輸啦。刺身差唔多就到壽司啦，見佢啲壽司唔貴就隨便點啲，好多時價格同質素成正比架嘛，所以冇乜期望，但求飽肚，but佢啲壽司出乎意料的質素，正所謂一分價錢三分貨，元氣價錢料理店質素，活煮蝦真係成隻蝦拿去活煮，同平時食嘅熟蝦有好大分別，有誠意，加分!牡丹蝦更加驚喜，真係有種釣上黎即食嘅感覺，又甘又甜，原來上面有劈野來自於蝦頭，師傅對佢啲貨嘅鮮度好有信心，因為蝦頭唔夠鮮就會臭，到時甘甜味就會變苦味。海膽又係另一個驚喜，我問師傅呢隻海膽同平時食嘅唔同喎，佢答我呢隻係北海道海膽，咁重皮!你收我三十幾元件比咁高質素比我，令我不禁頓起疑心，佢見我眼色有異，就同我講因為開業初期當做宣傳，仲話遲啲應該會加返啲啦，你而家黎食好好彩!當我收起我嘅疑問後細嘗呢件黎自北海道嘅壽司，沒有一般海膽的苦味（通常苦味來自防腐劑），有股濃濃的甜味，唔錯，呢個價錢超值。之後到熟食，全部即叫即做，時間較耐，but我有的是時間，等你。熟食有炸雞軟骨，燒牛舌啦，南瓜天婦羅啦，冇乜特別，勝在即做，普通菜式都特別好食，特別要提係個南瓜，原來係用日本南瓜，特別甜，真係來自日本乜都好食啲。…Read More

是日經過筲箕灣，見到暗角位有個大招牌，以為叫峰記，點知原來叫皇越，無所謂啦，兩間都試，先試呢間先，入都去地方唔算豪華，甚至乎有些簡陋，既然一場黎到，中伏就中伏啦，先叫啲穩陣既牛油雞亦，O馬拉盞通才，炸軟殼蟹、炒反和紅反，上菜速度一般，跟住手機食先，全部野都ok哦，開始有信心，叫埋個燒大頭蝦先，食飽飽後想叫杯越式滴漏咖啡，可惜冇，此乃美中不足之處，不過整體都幾好，估唔到筲箕灣除東大街外還有值得試的地方，下次來試埋其他野先…Read More

知道尖沙嘴厚福街好多新飯堂,便和朋友來試試,這間店新開張,還在試業階段,所以我們便戰戰兢兢的點餐了,點的菜主要有以下幾樣: 吞拿魚壽司 --- 新鮮,有鱼味,用上藍鰭吞拿鱼,合理價錢 鰻鱼壽司 --- 不過不失,因不是穴子吧油甘鱼腩壽司 --- 呢個好食,鱼油佈滿口中而不油膩,一點再點 三文魚壽司 --- 我冇食,朋友話唔錯可惜冇秋刀同大池鱼 到主食了: 泡菜 ---- 呢個有水準,喺好多韓式店都食唔到呢隻水準,聽講係師父親自醃製,所以底下有不知名的菜 付皮餃子 ---- 呢個又係師父自家製,出面食唔到,皮脆餡靚 燒鯖魚 ---- 同出面嗰d好唔同,好滑,有啲油份,唔會鞋口,貴啲都值银雪魚西京燒---- 雖然燒唔出皮香,但肉質尚嫩,ok 喬麥麵 ---- 爽口彈身,煮麵功夫到家,麵汁清口而不咸,夏天必食,亦係今晚最印象深刻的一道菜 蕃薯天婦羅 ----我同朋友都覺得可以再切薄啲最後甜品是三層糕加芒果汁作為是餐之完結,呢個又係師父自家製總括來講,整間店的食物都充滿廚師的個人風格,由醬油到菜式都是自家制,難得的誠意下次會來食點貴價食材.…Read More