蘇的個人專頁

朋友突然間有一日話圓方嘅印度餐廳好好食，其實我一早聽過，不過又冇機會嚟，今晚就特登嚟試吓。記住餐廳喺平台位置，平時放工時間都好旺場，仲要啲happy hour嘅offer好抵，啤酒講緊最平係20幾蚊就有。不過今日嚟除咗飲嘢都要食飯，叫咗啲餐廳本身都幾signature嘅嘢，例如係串燒chicken tikka，呢種印度式燒烤係會偏燶少少，咁先至夠惹味，仲有嗌咗個炸雞翼，個汁係酸酸甜甜，送酒一流！兩個人唔係嗌到好多嘢食，main course當然都係要揀返個咖喱，就揀咗個咖喱羊髀， $238其實都好抵食，因為佢個羊髀好大隻，勁多肉，同埋個汁都平衡到印度嘅辣味同埋香港人嘅口味，襯埋個蒜蓉 naan非常之滿足。未完㗎，最尾食埋個拖肥sticky pudding，最開心係見到啲拖肥汁喺個雪糕面度慢慢流落個布甸度，賣相好靚，味道偏甜，但係其他地方好少有機會食到呢種口感,所以值得一試。整體嚟講我好鍾意呢度嘅氣氛，有啲人氣但又未至於嘈，食物質素不錯，最緊要飲嘢又平，坐得舒服，中價餐廳嚟講呢間好到位！…查看更多

留港消費支持小店，今晚去咗呢間日式居酒屋，細細間但氣氛幾好，見到侍應同其他客人有講有笑，相信呢度都有好多熟客。 食物方面呢度嘅選擇都好豐富，我哋特登揀啲平時少食嘅嘢，譬如有一個日式小炒王，見到幾得意，將海鮮同埋啲雞內臟炒埋一齊，有啲青豆同翠玉瓜，少少辣味幾啱送酒。去居酒屋一定要試佢哋嘅燒飯團，因為最考功夫，我哋揀明太子口味，燒得幾香脆，加埋明太子個鹹味剛剛好。刺身方面嗌咗帶子同埋油甘魚，帶子爽滑唔立口，都幾大粒！我自己好鍾意金鯛立鱗燒，個皮炸得剛剛好，啲魚keep到夠嫩滑，另外我朋友就覺得牛舌好正，超厚切同埋完全冇腥味，難得！a4和牛他他就最啱鍾意食牛嘅人，夠新鮮仲要用蘭王蛋，收$188幾抵食。最黐線嘅係呢度嘅Orion生啤收$19一杯，真係飲多啲都唔緊要。晚市仲要有九折喎，兩個人食咁多嘢埋單每人三百幾蚊，喺香港食日本嘢其實都唔一定要好破費！…查看更多

喺香港長大，多數去火鍋店都係港式，就算以前食小肥羊，都係立立雜雜乜都有得食，今日嚟呢度食北京火鍋，唔好期望會有水餃同埋芝心丸，嚟到呢度就梗係食鮮肉同鮮菜。呢度係一人一鍋嘅，啲鍋具餐具都十分精緻，有中國宮殿特色，用酒精爐燒住食，非常有風味。我叫嘅麻辣湯底唔係重慶嗰種辣到黐線嘅口味，中辣口味更加容易品嚐到食材嘅鮮味。signature 180天草飼羔羊肉食落去好有鮮味，但我更鍾意寧夏灘羊梅花肉，羊味更加突出，厚切少少口感更好，而且係羊好矜貴嘅部份，唔係度度都有得食。另外試咗經典大片脆毛肚，灰灰地色證明冇漂白喎，佢教滾8秒就夠，果然係好爽脆。雖然呢度主打牛羊肉，但係我想講佢啲菜都非常新鮮，而且食到啲出面少見到嘅品種，唔使點任何醬料已經好好食。講起醬料，鍾意多醬嘅朋友呢度就非常好玩，因為十幾種醬同埋配菜任撈唔嬲，不過我自己其實比較鍾意食原味，因為個麻辣湯已經好夠味。冇點飯面，就叫咗個老北京糖油餅，幻想大概係我哋廣東粥店嗰啲牛脷酥咁，不過冇咁油膩同埋冇咁甜，大大份，趁熱食係幾過癮嘅。中環地段，食材新鮮，價錢都非常公道，坐得好舒服，服務員都殷勤，中環區少有嘅火鍋之選。…查看更多

不嬲都唔係特別鍾意食韓國菜，因為覺得味道好單一同埋多數都唔抵食，不過今日嚟到呢間韓式小店，都幾打破咗我以前對尖沙咀韓國街餐廳嘅想像，首先佢個環境好寬敞，裝潢光猛舒適，食物強調係家庭口味，好多食物都係自己親手做，味道唔會好似出面嗰啲咁鹹同埋咁辣。套餐選擇多樣化，當然係食套餐啦，最驚喜嘅係你會見到佢會將12個前菜同埋其他主菜放喺一張大木板上面，然後一次過將塊大木板套入你張枱度，眼前由乜嘢都冇變成有勁多豐富嘢食，嗰一下真係覺得好震撼。講吓啲嘢食，自家製泡菜同超級市場買嗰啲真係差好遠，唔會死鹹同埋個質地仲好實淨，另外自家製紫菜配白飯真係一流，燉牛肋骨個甜味又好好送飯，如果鍾意食魚嘅就要嗌烤黃花魚，有脆皮啲肉都仲係嫩嘅，我哋加錢要海鮮豆腐火鍋，大大隻八爪魚喺裏面，仲有啲貝殼類海鮮，最欣賞係佢個湯底好多小蝦小蜆，成個湯底海鮮味好濃。成餐都好滿意，價錢亦都非常之合理，二人餐最平$480已經可以，$600嘅二人餐其實都夠三個女仔食，咁嘅價錢食到自家製嘅美食，成個進餐體驗都好舒服，真係好抵食！…查看更多

依家出街食飯都真係唔平，冇理由日日都食貴嘢，所以其實大部份時間都要食啲cheap嘢，價錢都係一個好重要嘅因素，百物騰貴，最好可以用五六十蚊有肉有菜醫飽個肚。呢幾年旺角啲嘢都貴咗好多，點知俾我搵到呢間食雞湯粉麵嘅舖頭，講緊用$58可以有一大鍋黃酒雞湯再加一大碗米粉，真係好平。而且佢最特色嘅地方係會用火幫你慶住個雞湯，冬天食就最啱，食到一半都仲係好熱嘅，雞件都唔少，配料都大大份，有極多紹菜同埋杞子，黃酒雞湯煮得剛好，唔會太鹹，仲有就係個米粉都煮得唔錯，面頭有啲薑粒，如果唔食得辣，記住同職員講返走薑粒。另外叫咗豬三鮮胡椒湯薯粉，又係大大煲，有四大嚿蘿蔔，同埋都有啲菇同木耳，鍾意食豬內臟嘅人就梗係要點呢個啦，我自己都幾鍾意個胡椒湯嘅，夠辣又唔會太搶個豬味，仲有個小食喺香芹墨魚餅，炸得都幾好，淡淡香芹味，如果想試真啲個香芹就記得唔好點甜辣醬。目測平日夜晚都好旺場，梗係啦咁嘅價錢，仲要係旺區咁近地鐵站，仲可以喺邊度搵？…查看更多

今次去呢間居酒屋好特別，食物係居酒屋類型，但係整體感覺似Cafe，有小梳化同埋啲比較cozy嘅裝飾，一種好輕鬆嘅感覺，係走年輕啲嘅路線。睇埋Menu更加覺得價錢親民，2人餐有成11款嘢食，可以樣樣試少少。嘢食嚟講我覺得佢都係新派創作小食，例如會有壽喜燒牛肉卷，同埋牛油果芝士卷，兩款個味道都好創新，個人最鍾意係甜辣炸雞，新鮮炸個皮夠脆，非常好下酒。串燒嚟講我就比較鍾意明太子山藥，原來味道係好夾個喎。另外佢有個豚肉糖心蛋都幾得意嘅，隻糖心蛋又真係幾好食。甜品我加咗錢食鯛魚燒，個鯛魚燒好qq喎，同埋賣相都好靚，有綠茶雪糕同埋其他配料，算抵食！必定要講吓呢度嘅浮誇Cocktail，雖然每杯都要過$100 ，但係我想講真係好大杯，我個杯唐草presentation好華麗，味道好Refreshing，有少少薑味，啱女仔口味！另外叫咗比較強烈嘅old fashion，上面放咗片乾冬菇，每飲一啖都會聞到冬菇香味，幾過癮。整體嚟講呢度好適合放工幾個朋友嚟消磨下，環境清靜，嘢食唔貴，嘢飲好飲，二人餐份量都好多，唔想食到咁飽建議可以散叫，應該都會有驚喜。…查看更多

呢間中式餐廳開咗兩個月左右，美麗華旗下嘅，喺間細細嘅精品酒店裏面。今日係平日嚟嘅，估唔到夜晚都幾多食客，席間仲聽到其他客人講話前排有某長輩名人都有幫襯，雖然新開似乎都有一定名氣。呢度都有唔少招牌菜，例如佛跳牆，呢度嘅佛跳牆真係用料豐富，個海參厚身到嚇親我，仲有花膠又係大大片，裏面有鮑魚同埋魚翅，富貴氣派十足。另外拔絲咕嚕肉都好出色，當然同大排檔嘅有好大分別，食得出係用靚豬肉，用薄粉漿炸，另外配炸咗嘅油炸鬼，代替返個脆脆口感，咁樣食又幾得意喎。蟹黃煎帶子我都非常欣賞，帶子係刺身級，輕輕煎咗已經好好食，個蟹黃都好鮮味，另外個大蝦蒸蛋超滑溜，一夜麒麟魚都係招牌菜，個魚鱗啱啱好唔會太硬但剛剛脆口，魚肉依然鮮嫩，加埋必須要嘅蒸魚豉油同蔥，呢啲喺屋企一定整唔到！值得一提係佢嘅上菜碟全部都係暖笠笠，酒店水平嘅服務，人參烏龍茶都係靚茶葉，冇乜嘢挑剔。呢度仲坐得又舒服，口味好適合長輩，餸菜又夠高級，入咗落我個孝敬阿媽系列餐廳list！…查看更多

知道呢間餐廳都好多年，今日就係第一次嚟食，本身以為係一間普通西餐廳，但原來呢度嘅菜式都幾創新㗎喎，即是平時唔會喺啲酒店老派餐廳有機會試到嘅嘢。例如前菜有個海膽蛋白，店員話呢個係signature，試完之後都真係好驚喜，每一個材料嘅配搭到好特別，但又覺得幾夾喎，口感層次豐富，每一啖都覺得好矜貴。另外個蠔湯超級濃郁，真係未試過飲蠔煮嘅湯，預咗係偏鹹味重嘅，但係作為頭盤都恰當。頭盤真係驚喜連連，另外一個dry aged雞肉加鵝肝又係好驚喜，估唔到個鵝肝唔腥而且仲好鮮味，配埋啲醬汁處理得非常好！主菜真係要重點講A4和牛，想講佢煮得非常之好， A4本身舊肉夠靚當然唔使講，但係個生熟度都係非常適中，嚿肉咬入口唔會太溶，仲有保留返牛肉應該有嘅口感。唔食牛嘅可以試吓個意大利粗麵釀海鮮，幾有心機嘅，最欣賞都係嗰兩粒龍蝦，好鮮味！其實佢個開心果忌廉同埋朱古力mousse都好好食，小小鹽味撞返個甜味非常適合成為一餐嘅總結。我最欣賞佢呢度唔會局限你一定要食甜品，可以揀兩個前菜，有陣時都真係食唔到咁多甜嘢，同埋啲前菜都真係幾有特色。Overall性價比都算幾好，唔好唔記得有個180度維港景，同埋啲服務都好到位嘅，都好適合拍拖撐枱腳！…查看更多

今次同朋友去咗旺角，呢間餐廳主打豆製品，裝橫簡約，小店算有空間感，平價餐廳嚟講算坐得幾舒服。我哋點咗幾款招牌菜，其中最驚喜嘅係吞拿魚芝士蛋餅同老乾媽炒米粉。吞拿魚芝士蛋餅煎得外脆內軟，芝士溶咗配埋吞拿魚醬，大大啖好滿足。而老乾媽炒米粉炒得乾身唔油膩，辣度足夠但唔會太刺激，加埋少量花椒麻香，非常惹味好想再食。另外，滷水豆腐豆卜係素食開胃又夠飽肚；麻辣鐵板蛋煎腸粉亦係一個亮點，香口滑溜又帶少許乾身香辣。仲有麻婆腐皮蛋餅，內餡麻婆醬濃郁但唔會太辣，仲有好多花生碎，好有層次感。甜品方面，我哋試咗兩款特色豆腐花：紫薯紅棗雪耳豆腐花同開心果豆腐花。紫薯紅棗嗰款甜度適中，加上雪耳嘅清爽口感，非常滋潤；開心果嗰款鋪滿果仁碎，開心果味夠濃同嫩滑嘅豆腐花好鬼夾。另外仲叫咗兩杯特色豆漿，薑汁豆漿超薑，啱晒好似我咁需要䁔胃嘅人！最驚喜嘅係，佢竟然有$20早餐， 11:30前都有得食，有一個炒米粉加一杯豆漿， $20真係唔知喺邊度搵，今時今日仲有呢啲價錢，仲要係非常方便嘅旺角，真係非常難得！…查看更多

食鐵板燒嚟講，本人比較着重成個用餐體驗，因為講緊平均消費都算高，所以我唔只着重食物質素，環境、服務、同埋成個流程我都會睇重。一直我都以為海賀只係得壽司刺身食，原來佢哋係有鐵板燒，近排仲做緊特價， $880就已經可以食到平時賣成千蚊嘅套餐，所以就去體驗一下。呢度嘅好處係可以揀鐵板燒高枱，或者海景窗邊位置，仲有VIP房，可以揀唔同嘅氣氛。由頭盤刺身到中間嘅熱食，去到燒牛肉同埋炒飯，我覺得佢哋嘅用料都好高質，而且師傅都好用心機，能夠恰當運用鐵板嘅精髓，有微焦香，但又唔會過燶。特別欣賞係個燒大蝦，蝦頭煎得夠香口，淡淡蝦膏味仲可以配埋個多士食，另外就係燒帶子松茸清湯，個湯好清甜，配帶子好夾，仲有就係我每次食鐵板燒套餐都一定會特別留意嘅炒飯，今次見到佢打蛋就知佢用蘭王，橙紅色嘅蛋黃炒到成個飯個顏色都好靚，仲有加埋風乾火腿，幾創新，小小脆卜卜嘅口感增添咗個炒飯嘅層次。點解我覺得個體驗好好呢？係因為我覺得佢個套餐食物配搭係令人食得舒服，佢哋主要用海鮮做主調，牛肉放喺差不多最尾，然後個炒飯個調味唔會太鹹做結尾，成件事係好舒服嘅。最重要係佢上菜嘅速度非常適中，感覺到佢成間餐廳係好有系統，時間控制得好好，我哋食晒成個餐嘅時間大概用咗一個半鐘，我覺得係一個好舒服嘅時間，每人加多杯嘢飲講緊人頭$1000落樓左右，係值得比嘅。…查看更多

呢間喺尖東嘅餐廳表面係有啲似酒巴嘅格局，實質上係食東南亞菜，感覺係有啲越南加有啲泰國口味，價錢都好大眾化，而且有露天位置，對住尖沙咀海旁嘅海景非常舒服，感覺開陽。呢度嘅午餐餐牌價錢非常吸引，講緊大部份都係$80有前菜加主菜，仲有一杯嘢飲添，尖沙咀地區要坐得舒舒服服，呢個價錢真係非常抵食。前菜我哋各自嗌咗春卷同埋田園沙律，田園沙律當然就係我期待嘅有泰式感覺口味嘅醬汁，香辣清新，春卷就好香脆，最鍾意佢配咗兩大塊生菜夾住食冇咁熱氣。主菜我哋食咗紅咖喱雞肉，個雞肉係用炭燒出嚟㗎，配埋自家製紅咖喱非常開胃，椰漿味好突出，但有少少微辣，出色！另外我哋就加咗錢叫越南牛肉湯粉，牛肉湯嘅香料味非常濃郁，我自己係好鍾意呢一種好重香料嘅感覺，欣賞佢唔係用肥牛，老實講呢種牛肉湯啲牛肉如果係用肥牛嘅話一啲都唔襯，反而依家用瘦瘦地嘅牛，口感煙靭啲更好。加$18可以有甜品，我哋分別叫咗榴槤雪糕同埋炸香蕉，我覺得炸香蕉好抵食呀，佢個脆皮配咗啲花生碎同煉奶，感覺唔會太漏，但係口感豐富。尖沙咀有呢個價錢配咁樣質素嘅午餐，環境休閒，性價比幾高，店員服務都好親切，離開附近絕對可以嚟試吓！…查看更多

成日都覺得而家好多Cafe主力放咗喺飲品度，食物搞得唔係咁好，但今次呢間我覺得啲嘢食質素非常好喎，而且仲要係親民價，舉例今日叫咗個全日早餐，最鍾意就係佢冇腸仔煙肉呢啲junk food，材料都係健康選擇，例如有一大堆藜麥沙律同埋牛油果，燒比目魚都非常之香滑，同埋仲有兩片酸種麵包係有烘過嘅，最欣賞就係明太子蛋捲，比一般蛋卷口感豐富更多，成件事健康又滿足。朋友食Combo，份量比想像中大，而且價錢非常合理，選擇都好多，我就好欣賞佢個免治雞肉餅，調味非常好，紫薯係凍食嘅，好香甜，茄子味道都好好，加咗$20配三隻蒜香牛油雞翼，佢開咗單骨，賣相非常討好，炸完雞肉都仲好嫩， $20真係好抵。如果覺得唔夠食，可以加個甜品啦，佢呢個指明唔係雞蛋仔，外型雖然好似，又真係唔係雞蛋仔嚟㗎喎，反而係一個撳扁咗嘅牛角包，我揀咗柚子味，配柚子雪糕同埋柚子醬汁再加埋一啲焦糖脆脆，全碟嘢嘅口感好豐富，配搭有軟又硬又酸又甜，$88真係算好抵食。呢度靜靜地，最啱同girl friends一齊過嚟傾偈同埋食嘢，啲嘢食又夠Light，唔怕食肥，坐得又舒服，仲可以打卡，最緊要價錢唔貴，每人$200左右就搞掂，讚！…查看更多

記得大島與龍威曾經介紹過呢間餐廳，我當時都好有興趣，始終喺香港食日本嘢，如果有日本人推介嘅話都會有多啲信心。知道近排佢哋新增咗廚師發辦嘅晚餐Set, 而且價錢都相對實惠，只係$750 ，就上嚟試吓。廚師發辦最好嘅地方就真係完全唔使諗食乜，同埋出菜嘅次序都有設計過，一開始有個關東煮前菜暖下個肚仔先，簡單而充實嘅味道就係準備要食嚟緊嘅刺身五品，今日嘅幾款刺身都非常新鮮，中拖羅超級厚切，滿口油香，另外非常欣賞燒過嘅銀鱈魚BB，仲有就係之後嘅巨型日本生蠔，香甜得緊要。五件壽司都非常之出色，特別欣賞師傅手握飯嘅功力，唔會過鬆過緊，而且調味亦都唔會Over，食到魚嘅鮮甜，海老配燒過嘅蝦膏極高品質，另外帶子配黑松露配搭新鮮，都好講師傅嘅創意同埋對食材嘅認識。當日我哋嘅燒物係燒白鱔，好食到飛起，又Juicy又甘香，手卷都唔係簡單貨色，吞拿魚係火炙過，連紫菜都足夠香脆，配埋之後個鮮魚湯同埋一球雪糕，成個海鮮餐非常圓滿。依家喺香港夜晚要食廚師拍板，動輒都要過千，呢度收$750 有咁嘅質素，性價比高。同埋如果唔鍾意坐吧枱，係可以揀坐房或者卡位，啱晒鍾意多啲私人空間嘅人或家庭。…查看更多

平時喺香港成日都會食船麵，但係其實未試過真係喺泰國食地道嘅船麵，不過聽人講泰國嘅船麵其實唔係好大碗，幾啖就食完。泰絕新開冇耐，知道佢有細細碗嘅粉仔，可以試多幾款，就特登過嚟試吓。船麵主要有三款，兩款湯麵同一款撈麵，叫晒三碗就最開心。個牛湯非常好味，濃郁少辣，但唔會過鹹，最欣賞佢有好多配菜，例如通菜粒同埋泰國芽菜，有配菜同香葉先講得上正宗。而且佢用嘅泰國河粉同平時食潮州河粉口感好唔同，冇金邊粉咁爽，但多咗個軟糯口感，每人食三碗都唔過分！牛腩同埋牛船河我覺得都係平分秋色，牛船就會有埋牛丸同牛柏葉，可以食多幾種嘢，豬肉我揀咗撈蛋麵，完全唔同嘅口味，醬汁偏甜，但係又有微辣，都係好食嘅。呢度嘅蟹肉奄列好似都幾出名，裏面勁多真蟹肉，而且個蛋煎得好香，超大份，想講食完真係好飽，真材實料！另外佢個柚子大蝦沙律調味非常好，又係勁多配菜，最緊要有少少椰子脆片，酸辣鹹甜平衡得好好。名物牛奶豬肉真係用牛奶醃製，唔肥，但係好香腍，自己喺屋企真係整唔到。我覺得嚟到一定要食佢個芒果糯米飯，最緊要佢係有黑白糯米Mix，同埋熱辣軟綿綿，芒果大大份仲要超甜， $58真係超所值。嘢飲方面，大家應該都好好奇乜嘢係斑斕神仙水，我試咗啦，係幾清甜嘅，而且我覺得有解辣作用，飲到底有少少咬口，得意嘅。呢間小店係有誠意嘅，值得支持！…查看更多

米線真係香港人嘅Comfort food，講真食連鎖店都有啲食到悶，所以鍾意發掘吓啲小店米線。秋拾米線都有好多YouTuber介紹過，今次食完就真係覺得非常物超所值，講緊一碗豆花撈米線都只係$40 ，花生肉碎同埋芫荽嘅份量都唔少，暖暖哋嘅豆腐花配米線係好夾，我揀咗小辣覺得啱啱好，食到個豆腐花香味。知道呢度有一啲招牌菜，例如魚腐，口感都非常順滑，有魚味，食完好滿足。如果食湯米線我覺得可以試吓轉通心米線，因為唔係度度都有得食，又夠掛湯。配料我會推介雞球同埋墨魚頭，真材實料，你去譚仔食唔到啊。另外非常欣賞佢嘅椒麻爽魚皮，個麻辣好夠，而且配埋青瓜，又爽又脆夠過癮。自家製蝦多士非常適合鍾意香口嘢嘅人，隻蝦大大隻， $24兩大塊都真係非常難得。呢度啲嘢食份量都非常之大，我哋叫咗個上湯娃娃菜， $20好大碗！呢度係民生區，平日夜晚嚟都預咗要排隊，不過見到流轉都好快，唔驚等太耐，另外都可以考慮外賣。見到佢生意做得非常好，咁嘅價錢，再加咁嘅質素，絕對係有原因！…查看更多