食唔庭's Profile

今日想食西班牙菜，就醒起之前喺上環食過一間氣氛幾好，而且味道亦都唔錯嘅西班牙菜😌我哋首先食嘅係和牛tartare，個和牛嘅牛味重而且油脂好香，生熟程度控制得剛剛好，擺上啲餅度再加少少唔太鹹嘅牛油，我覺得真係好夾，而且個餅非常脆口，令個口感格外豐富。另外個和牛嘅份量亦都非常多，我哋每塊餅搽滿和牛，最尾都仲有剩，可以一羹一羹咁食😋之後食嘅係Iberico pork skewer, 用嘅伊比利亞豬味道同口感獨具特色，細嫩而帶有果仁香味，脂肪入口即化，建議大家食嘅時候加少少檸檬汁，令成件事冇咁肥膩，另外佢啲洋蔥亦有微微抄過，令到成味菜好香👍🏻之後就係我上一次食過之後念念不忘嘅Seafood Paella，今次水準亦都keep到，大蝦同青口算新鮮，啲蝦油滲落啲飯度，加上魷魚，令啲飯香得嚟非常有咬口😬最後就係甜品，Flan with ice cream, 個焦糖布甸都好香蕉糖味，但又唔會話太甜，而且同上邊嘅木糠碎及雪糕好夾，絕對睇得出落咗唔少嘅心機去整🥰…Read More

今日朋友嚟到啟德拎渣馬選手包，順便搵吓附近有咩好食，就發現原來呢到開左The Pantry嘅餐廳。餐廳嘅裝修時尚，燈光柔和，有好多sofa同卡位，店員安排我地坐半圓sofa卡位，夠晒闊落，坐得好舒服。上open rice睇原來日頭嚟既話仲可以望到大球場，環境都真係唔錯。Black Truffle Parmesan Chips薯條炸到金黃色，外脆內軟，食得出係即叫即炸嘅。配埋黑松露醬同Parmesan cheese一齊食，非常香口。Mussels Pot藍青口都好新穌，鮮忌廉用咗白酒、蒜蓉同小茴香一齊去煮，味道好香濃creamy，食到我停唔到口。😳 旁邊嘅酸種麵包都烘得好酥脆。我地叫500G份量都好多，感覺上都夠三至四個人一齊share食。Iron Grilled Flank Steak牛扒我地叫左五成熟，一上枱已經切好埋一片片，牛扒煎得剛剛好，肉質嫩滑，牛味都算濃郁，點埋燒汁同香蒜青醬一齊食更加帶出牛嘅肉味。配菜方面有焗蔬菜同埋炸薯條，一啲都唔馬虎。Tiramisu Pancake梳乎厘好鬆軟fluffy，口感綿密得嚟亦好夠空氣感。佢嘅咖啡糖漿同埋Tiramisu醬係可以自己調較落幾多，即係話甜度完全自己掌控，唔會怕太甜，食完都唔會太漏。Super Oreo Milkshake每次去到The Pantry嘅餐廳都總會叫返杯milkshake，呢杯super oreo可以話係我嘅最愛，脆脆嘅Oreo chips加上creamy又rich嘅奶昔同綿滑嘅cream，雖然邪惡但真係大滿足。感覺上The Pantry CIub嘅食物，環境同服務都一如既往有水準，下次再去啟德一定會再嚟encore。…Read More

今日突然興起想去葵廣掃街，但去到葵芳又忽然想搵個地方坐低慢慢食，就決定都係去新都會嘅The Pantry Cafe。White Wine Mussels每隻藍青口都新鮮肥美，同埋用白酒、蒜茸、小茴香熬製嘅忌廉汁一齊煮後，入口更加creamy充滿香氣，會令人食到停唔到口。旁邊嘅多士都烘得好香牛油味，加埋少許忌廉汁一齊食更惹味。Sea Urchin & Scallop Linguine呢個意粉有新鮮海膽，香煎帶子，同埋蟹肉。海膽肥美新鮮，香煎帶子嘅size都幾大隻，而且表面煎得好香。每條意粉都掛滿海膽忌廉汁，成個意粉嘅海膽味道都好濃郁。呢個意粉我下次再嚟一定會再叫！Grilled Beef Sirloin呢個燒安格斯澳洲穀飼牛扒，我哋叫咗五成熟。醬汁方面可以自選兩款，我哋揀左Red Wine同Black Pepper，兩款醬汁都同牛扒好夾。牛扒嘅肉質軟嫩，煎得剛好，面頭煎得微微焦香，但內裡咬落去仍然juicy有肉汁。旁邊仲有新鮮炸起嘅薯條同埋焗蔬菜作為配菜。Super Oreo Milkshake呢杯Milkshake基本上係必點，香甜creamy，當埋甜品都仲得。整體嚟講餐廳嘅環境幾闊落舒適，服務員嘅態度都唔錯，野食又好食，性價比幾高，值得再嚟！…Read More

上次食過pizzeria italia一直對佢既pizza同risotto念念不忘，上open rice發現佢都幾多分店，今日就黎到堅尼地城呢間分店，又再試吓佢既水準keep唔keep到。呢間分店比起摩羅街嘅分店更為闊落，坐得更加舒服。😆Mix Antipasti用五格拼盤碟放五款小食，單係視覺效果已經非常豐富。分別有自製雞肉炸丸子、炸新鮮魷魚、烤麵包配自製番茄莎莎醬、朝鮮薊、橄欖和意大利咸魚配多士、煙三文魚配酸豆、檸檬和特級橄欖油。今次我好欣賞佢嘅烤麵包配自製番茄莎莎醬，味道酸甜有層次，作為開胃菜一流。Parma Gorgonzola e Cipolle（巴馬臣火腿、哥根蘇拿芝士、洋葱）呢個pizza真係非常鹹香惹味，餅底口感軟腍得嚟帶略煙韌，批邊位置就焗得香脆。重點係佢Parma Ham嘅份量一啲都唔吝嗇，推薦！Risotto ai Funghi 白松露香油牛肝菌意大利燴飯濃郁惹味又creamy嘅白松露香油白汁包住每一粒米飯，加埋牛肝菌，每一啖都口感豐富有層次。TiramisuMascarpone cheese，咖啡同酒嘅味道平衡得好好，口感綿密，甜得嚟唔會太膩。不論係正餐定係甜品都一樣係咁有水準。😆…Read More

今日老公話想食Pizza，就帶佢嚟到呢間充滿歐陸風情嘅意大利餐廳。一坐低見到餐廳係用緊懷舊嘅紅白格仔枱布，覺得好有格調。Mix Antipasti意大利特色嘅小食拼盤，有煙三文魚、香炸雞肉餅、新鮮炸魷魚、多士、新鮮青瓜同車厘茄，淨係賣相已經好豐富。我最鐘意就係炸魷魚圈，將熱辣辣嘅魷魚圈點埋黑松露沙律醬一齊食，會更香。😝Risotto ai Funghi 白松露香油牛肝菌意大利燴飯呢個Risotto係我今餐飯嘅最愛！🙌🏼 白松露油嘅獨特香氣融入每一粒米飯，搭配上牛肝菌，口感豐富得嚟有層次，每一啖飯都好rich好creamy！另外米飯嘅熟度都燴得剛好，有咬口得嚟唔會過硬或太軟。Parma Gorgonzola e Cipolle（巴馬臣火腿、哥根蘇拿芝士、洋葱）呢個係傳統手工pizza，餅底嘅厚薄適中，口感相對柔軟濕潤，微微煙韌，pizza邊焗得好香脆。Parma Ham同Gorgonzola芝士既鹹香非常夾，成個pizza口感豐富。Tiramisu有creamy嘅Mascarpone cheese，再融合微苦嘅咖啡微苦同可可粉嘅香甜，口感細膩而柔滑。至於份量方面都幾大件，夠兩個人食。…Read More

今日喺MOKO睇完戲就諗住喺附近食埋個dinner先走，見到依間餐廳望落好似都唔錯，於是就揀咗坐餐廳出邊嘅枱，因為私隱度好似高啲咁，同埋啲位又好闊落👍🏻一坐低我哋就有啲糾結，因為實在太多嘢想食啦👉🏻👈🏻淨係薯條都有好多款😳我哋就揀咗黑松露芝士汁薯條😋通常食黑松露薯條，啲黑松露醬都淨係喺面頭落少少，但依到嘅份量就好充足，亦都好夠黑松露味，而且薯條明顯係啱啱炸起，仲要係粗身嗰隻薯條👍🏻主菜方面，我就行穩陣路線，叫咗個Carbonara, 味道唔錯，煙肉蘑菇份量都唔少，用咗Parmesan cheese，煮出嚟好香，值得一讚嘅係佢嗰個意粉嘅軟硬度適中😇而朋友就叫咗個海膽帶子蟹肉海膽忌廉意粉，望到佢個意粉我都真係有少少妒忌，因為個擺盤真係好靚，而且海膽同帶子都好大粒，朋友食完都話好正，佢話個精粹其實係個海膽忌廉汁嗰度，多得嚟食落又唔會好漏，而且好有海膽味，每條意粉都包住啲海膽汁😇另外都好推薦大家嚟Pantry一定要試佢啲奶昔，我自己叫咗Oreo，而朋友就叫做杯 Caramel, 佢嘅奶昔唔會係一種死甜，而且好重奶香，雖然係有啲爆quota，但值得嘅😋…Read More

今日同男朋友去荃灣上堂，上堂前拿拿臨去食個快lunch，行過見到呢間主打食麵嘅餐廳就諗住入去試吓。間餐廳望落啲裝修好新淨，睇嚟應該開業無耐，我哋嗰日大概12點幾入去，個場大概坐滿一半人，點知我哋一叫完嘢食無耐，我哋坐嘅四人枱都要搭枱，全場爆滿😂餐廳主要就係有麵食同埋唔同嘅小食，麵就有一啲酸辣湯、蕃茄湯同埋沙茶麵等等。見佢招牌主打沙茶麵，我同男朋友就分別叫咗個醬滷大腸沙茶麵同埋肥牛沙茶麵試試，而麵底我哋就喺幾款面入邊揀咗台灣麵😋兩個麵嚟都算幾大碗，而且賣相都唔錯。先試個湯底，雖然唔係好杰，但就好香濃沙茶味，啲餸嘅分量亦算多，大腸好咬口幾爽，有啲脂肪但又唔會好肥膩，男朋友嘅肥牛我試咗一舊都唔錯，唔會煮得太老，而個台灣麵底都算唔錯，煙靭有咬口同索湯👍🏻我哋除咗叫麵之外，都另外叫多咗兩個小食，鹽酥雞同埋崩沙腩，而崩沙腩作為Menu入邊最貴嘅小食，果然冇令我哋失望，橫膈膜位置，軟腍味香，肥瘦啱啱好，而且牛味夠濃又香😋至於個鹽酥雞就好有驚喜，份量多之餘炸得亦好金黃，睇得岀係啱啱炸起，仲鎖住到啲汁，同時又唔會油淋淋👍🏻 整體嚟講依間麵館嘅性價比都好高，可以再戰😉…Read More

今日放工忽然好想食上海嘢，就諗起好耐冇食既樂天皇朝，之前已經覺得佢哋既嘢食幾有水準。黎到利舞臺發現原來佢哋搬左新鋪，由於餐廳新裝修，一行入去就感覺好乾淨舒適典雅，燈光柔和，坐位夠多唔會怕好屈質。我地得兩個人，但被店員安排坐係梳化位置，夠晒闊落。😳 一坐低，店員仲有主動同我地介紹佢地有咩招牌菜好食，好有耐性，值得一讚。〈醋醬海蜇頭〉前菜方面我地叫左海蜇頭，咬落好爽口，下面仲有好多清甜既青瓜，撈埋醋醬一齊食味道酸酸甜甜，好開胃。〈原味小籠包〉樂天皇朝其中一樣名物就係佢既五顏六點既八色小籠包，因為之前黎已經試過，所以今次反而想試返最正宗既原味睇下味道如何。果然都同樣有水準，層皮做得夠薄身，夾起又唔會話好易穿，入面包滿熱辣辣嘅湯汁，肉餡亦好鮮味。〈無錫鮮肉鍋貼〉鍋貼外皮煎到金黃色，咬落表皮夠焦香，入面同小籠包一樣咁juicy充滿湯汁，肉餡亦都夠大舊。〈肉碎欖菜乾煸四季豆〉個四季豆炒得好夠鑊氣，四季豆爽口，同豬肉碎一齊得好香，我最鐘意鐘意食佢啲欖菜，好惹味。〈砂鍋雲吞雞〉呢個砂鍋雲吞雞一上枱我同朋友都嚇一嚇，估唔到咁大煲。入面好足料，有半隻雞，大大粒既雲吞，仲有小棠菜。雞肉嫩滑，雞湯味道鮮甜，雞味十足，另外啲雲吞都煲到索哂啲雞湯，好入味。〈桃膠糖水〉甜品方面我地叫左桃膠糖水，佢地既糖水都好足料，一啲都唔馬虎，有雪耳，杞子，紅棗同埋龍眼，絕對係養顏之選。…Read More

今日放工約咗朋友去焱丸水產食即燒海鮮，想講佢嘅地理位置真係好方便，位於尖東站行2分鐘就到，呢間高級日本居酒屋一向主新鮮海鮮，我哋揀咗漁師2人前盛，大大盤刺身拼盤十分吸引，刺身鮮甜到好似返咗日本食咁，幾種魚都唔怕會有魚腥味。接住有蟹味噌甲羅燒，中間有新鮮鵪鶉蛋，擺盤精美，然後侍應好好等我哋影完相先再攪勻甲羅燒，再放上網燒，燒咗一陣就聞到燶烈蟹香，味道濃又唔會太咸，推薦🌟🌟🌟呢間餐廳雖然都受歡迎，而且當晚客人都多，但上菜好快，未食完第一碟就已經好快上齊晒。三文魚壽司拼盤中規中矩，五款唔同配料都唔會悶。醬油木魚帆立殼燒好好食，咬落去肉質好結實，燒得好香，覺得一件唔夠，下次一定要再encore 帆立殼燒。至於蟹肉玉子燒就蛋香夠晒濃郁。温泉蛋天婦羅份量都好多，外面炸得好香脆熱辣辣，但係入邊溫泉蛋依然keep到蛋黃流心，幾特別。飲品方面我地㨂咗兩杯冰菠蘿燒酎，朋友大讚超好飲，菠蘿雪凍咗做冰，成杯飲到最尾仲係凍，又唔會俾冰溝淡咗 好飲賞呢個做法，下次再帶朋友黎食，試埋其他嘢食同酒。😚🤩…Read More

今日嚟到黃埔去返之前喺呢度食過嘅一間由韓國人主理嘅韓式燒烤，餐廳位置就係黃埔站A出口隔離，行一方鐘倒就到，好方便。今次我哋韓燒叫咗set C，主要有牛肋骨、牛五花、五花腩同埋豬頸肉，肉嘅份量都好多，仲有其他配菜，例如雪耳、泡菜、芝士。每次見到店員端上一大盤咁豐富嘅食物比我地韓燒都覺得好打卡able，咁多樣嘢入面我自己最鍾意就係牛肋骨，牛味濃郁，口感軟熟。另外都好推介將五花腩同埋芝士一齊燒，五花腩燒到表面焦脆，同時芝士燒到拉絲狀，入口就可以同時試到豬肉嘅油脂香同芝士嘅鹹香。上次覺得佢嘅醬油蟹唔錯，所以今次我哋都encore。今次仲多左醬油蝦，蝦肉一樣醃到好入味，蝦肉結實彈牙有咬口又鮮甜。醬油蟹肥美爆膏，蟹膏鮮甜口感綿滑，將蟹膏同醃到入晒味嘅蟹肉撈埋紫菜飯，再配上豉油同生蛋黃撈勻一齊食，非常開胃。最尾我哋仲叫咗個小食芝士紫菜蛋卷，蛋味香濃，將蛋卷點埋茄汁一齊食，味道酸酸甜甜幾開胃。最估唔到就係，老闆娘居然認得我同我朋友，好熱情咁招待我哋，非常好客，每次黎呢到都感受到佢滿滿嘅誠意。…Read More

上次黎到緣聚已經覺得呢到食物種類好多，而且質素都好唔錯，今次再帶母親大人嚟呢度encore。刺身方面佢哋嘅選擇好多，我哋叫咗三文魚，油甘魚，希靈魚，吞拿魚，甜蝦等等每一樣都厚切而且肥美鮮甜。壽司一樣係細細舊，可以試到好多唔同款式。呢度仲有即開時令生蠔可以叫，生蠔都幾肥美新鮮，都算係幾有水準。我自己就好鍾意佢嘅海膽手卷同埋火炙左口魚邊手卷，海膽味道好鮮甜，火炙左口魚邊就燒到好香嘅油脂味，而且手卷嘅Size細細舊，食落去就啱啱好，唔怕會太飽。清酒煮蜆都煮得幾入味，而且入邊完全唔會話有沙。冰火鵝肝多士嘅鵝肝係煎到表面好香脆熱辣辣，一入口就食到滿滿嘅鵝肝油脂香，配埋多士一齊食就啱啱好唔會感覺太油膩。炸物方面，我哋叫咗榴槤炸彈，紫芯香芋丸，同埋芝麻炸雞翼。全部都係新鮮炸起，表皮夠晒香脆。除咗雪櫃嘅自助飲品，仲可以喺佢嘅手機嗰度揀唔同嘅飲品，酒精類嘅選擇都好多，叫咗呢杯麒麟生啤，襯埋佢啲刺身壽司炸物就大滿足。木糠布甸size都好迷你，可以啱啱好滿足到自己嘅甜品胃，又唔驚會太飽。母親大人叫咗呢杯綠茶紅豆忌廉窩夫，佢話綠茶味非常濃郁，呢杯嘢十分邪惡，但係值得一試。同上次一樣今次嘅放題完全冇漏單，體驗非常唔錯，今餐真係大滿足。…Read More

〈牛油果蟹籽沙律〉牛油果同埋蟹籽嘅份量都好多，餐前食非常開胃。〈特上錦繡刺身（8款，各2切）〉有海膽，油甘魚，帶子，鮑魚，鯛魚，虎蝦等等，每一樣刺身都係厚切，份量一啲都唔吝嗇，味道鮮甜。我自己就最鍾意佢既海膽。〈螢光魷魚茶碗蒸〉唔好睇佢上面嘅螢光魷魚細細隻，份量都幾多架，鋪晒喺成個茶碗蒸上面。茶碗蒸蒸得好香滑，蛋味濃郁。〈味噌煮牛舌〉最後食埋呢個味噌煮牛舌就啱啱好，牛舌厚實，煮得好入味，肉質入口夠軟腍，而且蘿蔔索晒味噌湯汁，非常唔錯。…Read More

星期五晚收工就同朋友去中環食晚飯，行經伊利近街抬頭一望見到依間叫做Sole Mio嘅意大利餐廳就走咗上去試下！餐廳嘅環境非常唔錯，枱與枱之間亦有一定嘅距離，都幾適合一班朋友收工坐低開開心心傾下計食個飯，而且裝修富有特色，老闆好快就過咗嚟熱情咁樣打招呼，佢講開先知原來佢話成條街嘅餐廳嚟講佢最耐歷史🫣打開Menu你會發現依一間意大利餐廳係一間應該性價比幾高嘅餐廳，絕對唔會似中環嘅價錢。Starter drinks我哋分別叫咗一杯叫做Old Fashioned 嘅bourbon whiskey同埋prosecco，杯whiskey味道都唔錯👍🏻值得一提嘅係餐廳嘅happy hour係由晏晝嘅12點去到夜晚9點，而且嘢飲嘅種類都好多，非常抵飲！嘢食方面，老闆見到我哋望住個Menu有啲苦惱，好快又recommend咗三個Starter，parma ham & parmigiano cheese platter，芝士燒茄子，同埋有個意大利包，其中佢個包有兩款，一款係蒜蓉包，而另一款就係有一啲酸酸甜甜嘅蕃茄喺上邊，非常開胃。個茄子亦都好唔錯，足味得嚟又唔話做得太油膩。而個parma ham同芝士拼盤我個人嚟講都幾推介，個ham切成紙一樣嘅薄片生食得，又可以同意大利包一齊食，夾埋個procecco一齊飲真心夾👍🏻由於我哋兩個人食完三個Starter已經有六成飽，所以主食方面我哋淨係嗌咗一個gamberi pasta同牛扒，先講個意粉，蝦嘅份量好充足，亦有應有嘅鮮味，而且個扁意粉好掛汁，而牛扒亦都非常唔錯，牛味充足，脂肪比例適中，又唔會太多根，絕對對得住依個價錢。最後老闆亦都有推介佢哋嘅Tiramisu ，意大利餐廳做嘅果然非常正宗，食得出好香嘅冧酒同埋咖啡味，特別在就係佢非常fluffy，而且都好大份👍🏻總括嚟講，Sole Mio係一間好傳統而且好有人情味嘅意大利餐廳，入邊嘅員工亦都好Nice，嘢食嘅性價比亦都好高，值得再戰👍🏻…Read More

今日天氣凍凍地，男朋友又嘈想打邊爐，決定試吓呢間喺銅鑼灣嘅火鍋店打邊爐，放左工近近地去食。一出𨋢就覺得餐廳嘅裝修好古典雅緻，而且見到座位都比較闊落。由於餐廳位於27/F，店員仲要安排我哋坐正喺窗邊，所以就可以望住好靚嘅維港景色打邊爐。醉火入鍋 $388睇完Menu發覺佢哋嘅湯底選擇都比較多，店員推薦咗醉火入鍋依個湯底俾我哋，可以一次過試晒餐廳嘅五款特色湯底。五格鍋入面分別有火焰醉蝦木瓜鍋、蕃茄龍蝦鍋、清湯牛腩鍋、四川麻辣鍋及肉骨茶鍋，每一款鍋底入面都有豐富配料，真材實料。我最鍾意就係中間嘅火焰醉蝦木瓜鍋，一上枱見到有酒浸住幾隻大蝦，然後店員會喺我哋面前點火灼一灼啲大蝦儀式感十足。另外蕃茄龍蝦鍋仲有成半隻龍蝦喺入面，夠晒足料。頂級安格斯牛小排（小）$208手打芝士蝦丸 $68黑松露蝦蟹餃 $78即炸手工響鈴卷$68三色鮮制生麵 $68什菌拼盤 $78蔬菜拼盤 $78首先講下佢既手打芝士蝦丸同黑松露蝦蟹餃，每粒蝦丸都有原隻鮮蝦，入面包住芝士，咬落去就會爆漿。男朋友作為一位黑松露控，佢最欣賞嘅就係呢一個黑松露蝦蟹餃，大大粒，咬落而且松露味濃郁，蝦肉又夠結實彈牙。頂級安格斯牛小排（小），細份既份量對兩個人share黎講啱啱好，牛味重而且油脂分布均勻，入口肉質軟嫩。每次打邊爐都必叫響鈴，呢到仲要標榜係即炸手工響鈴，size都算大舊，響鈴本身好多層，咬落非常鬆化，浸落啲湯底到索晒湯就可以試到唔同湯底既鮮味啦。最後叫咗個三色鮮制生麵，三隻色嘅面味道略有少少不同，屬於比較黏身少少嘅麵，咬落去嘅口感都幾煙靭，同時亦都好掛湯，我個人比較鐘意放入蕃茄龍蝦湯底煮，將啲麵條索晒蕃茄湯嘅鮮味。我哋亦叫咗個蔬菜同埋雜菌拼盤，種類多之餘份量亦都預得啱啱好，咁就可以每樣都食到少少而又唔會太飽。有生菜、油麥菜、西蘭花同埋秋葵等等，都幾新鮮。竹蔗茅根 $28紫貝天葵 $28飲品方面，我地叫咗竹蔗茅根同紫貝天葵黎清一清熱氣，味道清甜唔錯。…Read More

之前食過Butlery對佢舒適既餐廳環境同海膽意粉念念不忘，但門口長期都排滿人，今日係新城市行街晚飯時間經過見到唔使等位，仲唔入去等幾時?餐廳用咗橙色同墨綠色為主，好有格調，樓底亦都算高，枱之間嘅間距都令到人坐得好自在同舒服，唔會話同隔籬枱好近，好方便傾偈。Sofa位好多，包坐得舒服。一坐低我哋就已經好糾結，因為實在太多嘢想食，淨係講緊薯條都有成七至八款。我地揀咗黑松露芝士汁薯條，通常食黑松露薯條，啲黑松露醬都唔係好夠，但呢到嘅份量就好充足，而且薯條明顯係啱啱炸起，熱辣辣夠晒脆，仲要係我最鍾意嗰隻粗身薯條。主菜方面，我地叫左返上次食過既帶子蟹肉海膽忌廉意粉，再加一個黑松露蘑菇溫泉蛋意粉兩份share。先講黑松露蘑菇溫泉蛋意粉，值得一讚嘅係佢意粉嘅軟硬度適中，溫泉蛋拮穿左之後啲蛋黃汁同個黑松露意粉配合得天衣無縫。另外帶子蟹肉海膽忌廉意粉擺盤賣相好靚，海膽份量多，味道鮮甜，上面有兩大粒巨型帶子，大粒而且有咬口，忌廉汁質地夠creamy，多得嚟夠撈晒成碟意粉，食落又唔會怕好漏。黎到呢到次次都會想食埋佢地既甜品，佢既pancake款式都幾多，最後我哋喺Earl Grey pancake同埋Tiramisu pancake之間揀咗後者。個pancake一如以往非常fluffy鬆軟，tiramisu味好岀，落埋糖醬個甜度將咖啡既苦澀味中和得恰到好處，食完意粉同甜品之後真係覺得好滿足。另外仲叫左杯honeycomb caramel milkshake，奶味香濃入口質感夠晒rich同creamy，上面仲有啲我好鍾意既焦糖脆脆，平時飲開少甜既我本身order有啲驚會太甜，點知飲落整體味道ok，呢杯可以encore!…Read More