hmmyum's Profile

之前同屋企人幫襯過早餐同午餐，覺得食物同環境都唔錯，所以就介紹朋友黎試試。朋友同我都鍾意甜食，所以叫咗個開心果馬蘇里拉芝士薄餅配蜜糖（$88），綠茶窩夫（$58）同埋焦糖單骨雞翼（$54），窩夫後上。正當我地期待野食來臨之際，竟然發現枱面兩隻碟都有「硬化」既食物殘渣... 雖然知道lunch hour時段好忙，落單都落唔切，但實在抹唔甩，所以都要換過...首先黎既係薄餅，直徑大約8”，分成4件，上面鋪有開心果碎，份量都算合理，配埋蜜糖食味道簡單清新，芝士都有小小拉絲效果，只不過芝士只係集中喺薄餅既中心點，所以基本上食一兩啖就無。薄餅包一杯飲品，叫咗酸酸甜甜既檸蜜。跟住係雞翼，食落有黑椒同蜜糖既香味，辣辣地又甜甜地，好食。就喺我地差不多食曬碟雞翼既時候，個綠茶窩夫就忽然空降咗落我地張枱。明白既，係時候要速戰速決。所以我地就快快手試埋個窩夫，其實外形似迷你冬甩多啲，同一般認知既窩夫好唔同，不過加埋雪糕、紅豆蓉或cream等食又幾好味。差不多食完既時候，帳單亦都自動送上，知道出面仲有一條長長既人龍，所以都立即埋單走人。因為成餐飯最緊要快，所以為咗爭取時間，相都無特別影。結論係，食物同服務都係以前比較好，同朋友不約而同覺得，要排成半個鐘既話，應該無下次，畢竟相類似既餐廳有唔少選擇。…Read More

夏日炎炎，加上戴住個口罩焗住，都無咩胃口。午飯時間，見到呢間越南餐廳幾多人，午市套餐包小食同飲品，都好多選擇，決定試試。心大心細，最後揀咗香茅牛肉湯河（$79），小食就揀咗牛油果素米紙卷，飲品就揀咗凍士多啤梨綠茶（跟餐唔洗加錢）。等咗一陣，米紙卷就黎喇，賣相好靚，食落感覺好清新，紅蘿蔔、粉絲、菜酸酸甜甜，幾醒胃，不過牛油果就細舊咗少少...個醬汁似稀稀地既甜醬，加花生碎。跟住到湯河，份量比想像中大，牛肉都好多，而且肥瘦適中，一咬落去有陣淡淡既香茅味，不過質感略嫌「鞋口」，牛味亦欠奉。唔知生牛肉會唔會無咁鞋呢... 河粉就好滑，湯底偏淡，要加少少魚露提鮮。至於飲品，凍士多啤梨綠茶就好似一般台式飲料，味道偏甜，有幾粒迷你士多啤梨粒粒漂浮，望住都覺得熱氣全消。埋單$79再加一，喺旺角黎講算合理。…Read More

疫情關係，本來計畫好既台灣之旅都要無限期押後...之前喺台北誤打誤撞食過一間好好食既古早味蛋糕，一直念念不忘，望住佢新鮮出爐，傳出陣陣濃香蛋味，食落非常鬆軟，而且又唔會好甜。今日行開旺角，人流唔算好多，見到呢間小店外面有人排隊，原來賣台灣古早味蛋糕，除咗原味，仲有芝士、朱古力、肉鬆、抹茶等等，價錢就$55起至$70-80。本來想試原味，可惜要等差唔多半個鐘先出爐，趕時間唯有放棄。正當猶豫緊試唔試其他味，忽然見到佢原來有隻新口味叫「咖啡合桃」，雖然索價$80，但作為咖啡迷真係忍唔住要買黎試試。買既時候佢已經用盒裝好，仲有個透明背心袋，方便拎，幾貼心。雖然唔係超級新鮮出爐，但拎上手仲暖暖地，而且幾有份量，聞落仲有淡淡雞蛋糕香味。到最期待既開箱環節，一打開，見到蛋糕面上面啲合桃唔算多，有少少失望，蛋糕尺寸就大約長18.5cm，闊11cm，高13cm，重量大約580g。食落咖啡味突出，有少少似焦糖咖啡味，甜度適中，核桃新鮮且微甜（不過就只係得蛋糕面嗰幾粒）。質地綿密鬆軟唔鬆散，比一般連鎖店既蛋糕實在。當下午茶的話，食四分一左右已有飽（滿）足感。總括而言，蛋糕算中上水平，只係價錢進取到令人卻步。如果有下次，應該會買個價錢算最「親民」既原味，始終食古早味蛋糕，都係鍾意佢嗰陣濃香純樸既蛋香味...…Read More

作為土瓜灣既老街坊，見證住一間間連鎖食肆同小店開張同結業，完全體會到「搵食」艱難...前排行過長城大廈，忽然見到呢間小店非常搶眼既招牌，上網搵搵，呢間餃子店好似由香港仔「遠道而來」，評價唔錯，所以決定試試。店內座位都唔少，咁岩星期六既下午人流唔算多，不過坐廚房旁邊既二人檯就有少少逼。菜式主要以水餃麵食為主，水餃餡料選擇都幾豐富，其中一個賣點係全手工擀皮水餃～雖然隔離檯食緊既餃子拉麵都幾吸引，但因為真係好想食水餃，所以最後揀咗兩款淨水餃試試，分別係韭菜鮮肉同粟米鮮肉餃。落完單之後，人客都漸漸增多。等咗既10-15分鐘左右，熱辣辣既餃子就到啦～上面嗰碟係韭菜鮮肉餃$36；下面嗰碟係粟米鮮肉餃$39，右邊係點餃子既蒜蓉醋首先講講韭菜鮮肉餃，食得出餃子皮同一般機製既唔同，不過就應該唔係新鮮包既。一咬開餃子，內餡以綠色為主，韭菜既份量同肉既比例大概係7:3，所以唔點醋食都唔會覺得好膩。因為之前喺台灣都有食過韭菜餃，覺得味道好清新，所以本身對呢款餃子都有一定期望。可惜呢間既韭菜餡唔係咁好食，可能係來貨問題，又或者選用咗較粗身既韭菜，個香味同口感差少少。反而粟米鮮肉餃就有驚喜，如果本身鍾意鹹甜夾雜既應該會覺得好好食。雖然佢個名就咁叫餃粟米鮮肉，但除咗粟米同豬肉，食得出有落埋紅蘿蔔絲，而且菜同肉既比例大概都係7:3，感覺健康啲，味道亦唔會太鹹或太濃至於個蒜蓉醋呢，個人覺得味道還好，酸味較重，醋香味反而差少少，加埋蒜蓉就精彩啲。鍾意重口味既仲可以加埋辣油添！到差不多食完既時候，已經係晚飯時間，鋪頭已經差不多坐滿人。總括而言，呢間既餃子都頗有水準，或者下次應該喺餃子癮起之前，去試埋拉麵同小食先 …Read More

聽聞The Market自助餐水平甚高，終於有機會一試。食物都算很多選擇，首先講講海鮮類，長腳蟹的鹹水味甚強，蓋過本身應有的鮮味。開邊龍蝦肉質鮮甜，可惜尾部出奇地有沙，而蜆就食幾隻都有沙。至於魚生就質素還好，帶子和蝦不錯，但吞拿魚就不太新鮮。壽司都有好幾種，味道不過不失。冷盤方面，巴馬火腿值得一讚，配蜜瓜一流，另外魚子醬蟹肉麵包也不錯。水果沙律似是用了罐頭水果，只有糖水的甜，沒有新鮮水果的果香，有點失望。沙律菜選擇不算多，竟然沒有羅馬生菜。熱食方面，椰子雞燉湯較鹹，飲完有點口渴，未知是否加了味精。順德專區食物水平非常一般，水蛇粥只配給一小塊水蛇（不過幸好只有一小塊，因為實在非常韌）；魚餅完全不彈牙；拆魚羹柴魚太多，吃下去感覺很「鞋」口；大良鮮奶很重麻油味（難道這才是正宗的味道？）；薑汁撞奶更令人失望，「撞」得不太成功之餘，薑味強得變苦。燒味方面就只得叉燒，肉質還好，可惜有豬味。甜品方面，除了榴蓮專區，其他甜品都頗有特色，例如鐵觀音大菜糕的茶味濃郁至近乎苦，朱古力蛋糕、綠茶蛋糕、檸檬撻、馬卡龍等等就同一般自助餐差不多，沒有什麼特別令人難忘。總括而言，食物性價比不高，服務也普通，試一次就夠。…Read More

是日三人行慶生，諗住食好啲，所以揀咗帝京軒。大家睇嚟睇去都係覺得食午市套餐抵過嗌點心，雖然最少要叫四位。首先到既係荔芋元貝天鵝酥（左上角）、玫瑰桶子豉油雞（左二）、XO醬海蜇蟲草花（右上角）同金牌黑豚叉燒（左下角）。天鵝酥賣相好可愛，芋頭餡好味唔會太鹹，天鵝頸食落甜甜地，質感似餅乾。XO海蜇蟲草花辣辣地，好開胃。叉燒最有驚喜，半肥瘦，肉質正，非常入味。相比之下，豉油雞就普普通通。跟住就到老火湯（是日老火湯係牛大力粉葛紅蘿蔔扁豆湯），飲得出無味精珍寶蝦餃有如其名，大大隻，皮厚薄適中，裡面既蝦爽口又有鮮味呢個琥珀牛肝鮮菌蝦球桂花蚌都好好食，琥珀合桃好新鮮，蝦同蚌都各有四件而呢個燒賣有別於一般酒樓既燒賣，上面既黑魚子好鹹香，裡面既肉餡一啲都唔油膩，讚！其實都已經食到幾飽，不過都覺得龍躉柳好食，平時怕腥唔食魚既都可以一試。加埋陳皮同薑蔥一齊食就仲香，比較有驚喜既係墊底既本菇，吸收咗龍躉、薑蔥、陳皮同豉油既精華，好好食。到荷葉飯已經食唔落，因為要留肚食兩款甜品，所以成個打包。夜晚整返熱黎食都好香好食，裡面有蝦、燒鵝同冬菇等配料。最正既係甜品都有兩款。首先到既係蛋白杏仁茶。甜度適中，杏仁磨得好幼滑，嗰陣杏仁味唔算太過濃，好似我麻麻地杏仁茶都食到一碗。嘆完碗熱辣辣既蛋白杏仁茶，以凍凍地又清香既蘭香子芒果糕作結就最完美不過。最後計埋茶錢加一埋單大約$1,030，如果四個人食每人都係$260幾蚊。…Read More

之前試過lunch同晚飯，覺得唔錯，今日黎開尖沙咀就過黎試埋個下午茶。兩個人唔算好餓，一人叫咗一碗粉，結果食完都唔多飽。生熟牛肉金邊粉既湯底幾好味，牛肉都幾有牛香。金邊粉都好食，不過份量就少咗啲，可能係下午茶既關係啦。個豬耳扎肉手撕雞湯河就有啲失望喇，上次黎食都覺得幾好，今次啲雞絲好「鞋」而且淡而無味，個河粉亦都有陣「粉」味，好彩河粉既份量唔多。唯一得豬耳扎肉就保持到水準。最後計埋加一埋單$143，咁既價錢咁既食物同服務質素，就認真麻麻。下午茶應該無下次，就算食都可能揀返午/晚飯時間黎，估唔到唔同時段既水準會有咁明顯既分別...…Read More

朋友同我都係HP迷，講咗好耐終於有機會黎試試。一入到去，已經見到衝咗一半入 9 3/4月台既行李車、Hedwig、魔杖、飛天掃把等等。是晚有幾枱人，坐得好舒服，慢慢傾計都得。一坐低店員就好貼心咁擺低杯水，個杯底好似陀螺咁，一放上枱就搖搖吓，有啲驚喜。黎到又點可以唔叫Butter Beer呢？面頭係好似奶蓋既cream，飲落味道同綠色罐裝既忌廉好相似...另外點了威爾斯綠龍（菠菜雞肉意粉 $82）同跳跳菌（巴黎牛油汁雞肉意大利飯 $88）。賣相同一般cafe相似，所以無特別影相喇。份量適中，味道唔錯，不過朋友同我都不約而同地覺得巴黎牛油汁有啲似唔辣既咖哩……Read More

是晚菜式非常豐富，三個人食到非常滿足。首先到既係菜，賣相好靚，份量都唔少。味道清淡，菜都幾新鮮，菇味道唔錯，草菇唔會有陣“UP”味。跟住到東坡肉，一上枱就有陣陣「仙氣」飄出，視覺效果贏曬。三至四個人食就每人兩舊左右，個肉加咗醋落去整，同以往食既東坡肉唔同，食多幾舊都唔會「漏」。菜肉餃同花素餃差唔多時間到，菜肉餃水準一般，肉餡尚算鮮甜。而花素餃就有啲失望，本身期望蔬菜餡會有少少爽口，不過呢個就好「淋」，清淡得黎都有菜香既。不過收呢個價錢，就唔推薦喇。呢個鍋塔豆腐好滑同有豆香，個汁都唔會太鹹。仲叫咗個宋嫂魚羹（分到大約五碗），不過唔記得影相。同以前食既唔一樣，呢個魚羹無落芫茜，魚肉就唔算好多，不過有筍絲等材料搭夠，都算唔錯。甜品方面就叫咗兩個焗蓮蓉西米布甸，非常失望！焗到乾曬，面頭直情又硬又韌，裡面既蓮蓉過甜，不過算啦細細個幾啖食完。…Read More

是晚同幾個老友聚聚，大家都不約而同想食中菜，飲杯茶，傾吓計。雖然係平日夜晚，但人都唔少，好彩坐得唔算逼，都傾到計。人少少，所以只係叫咗蝦多士、家鄉小炒皇和竹笙海皇羹。首先嚟既係蝦多士，好香口，食落唔覺得油膩，不過就最好等齊人先嗌，趁熱食正！跟住到家鄉小炒皇，顏色好豐富，味道唔錯，份量都算OK，腰果好新鮮，蝦都幾爽口最後叫嗰個竹笙海皇羹就有啲失色，大家食落都唔係好察覺（視覺同味覺上）到「海皇」既存在...反而豆腐就好多...個賣相同普通湯羹差不多，加上不似預期，所以無特別影到相喇。本身大家揀鳳城就係為咗試蓮蓉西米焗布甸，可惜無做足功課訂枱嗰陣訂埋，唯有等下次再試啦！…Read More