Nathantop's Profile

突然之間想食卜卜蜆，就上網搵到呢間評價好似唔錯，卜卜蜆都有三款款式就一於book枱試吓，見到佢2045後仲有折，就梗係一試啦！我係星期六嚟食嘅咁去到舖頭門口，見到舖頭入邊得幾枱客，心諗咁高評價正常應該會好多人，不過咁少人有少少意外，不過仲好啦，可以靜靜地食餐飯！因為我一心係你食卜卜蜆，所以我就專注睇吓卜卜蜆有邊種湯底，咁我最後就決定揀咗黑蒜油卜卜蜆，嗌咗份和牛，手工滑三拼(櫻花蝦，黑松露，蟹籽),魚皮響鈴雙拼同埋點油麥菜，兩個人嘅份量絕對夠食！咁點完冇耐，湯底好快就嚟咗，視覺效果都好衝擊！加咗啲應該係乾冰喺面，視覺效果就好多煙適合打卡，但係講明先淨係適合打卡另外點嘅食物都好快就嚟咗，上菜速度係唔錯嘅，魚皮響鈴，因為係新鮮炸嘅關係所以waiter都會提醒你建議新鮮食。咁輪到最緊要嘅食物質素環節，真係令我不敢恭維，首先卜卜蜆嘅質素大部份嘅顯都有浸唔新鮮嘅味道，殼大肉細，感覺有少少梅食到一啲味都好已經係當贏咗，真係非常之失望，湯底都淨係死咸，已經令我對成間餐廳嘅評價十分之downgrade！:(咁響鈴魚皮唔錯嘅，啱啱新鮮炸起可以話係非常之酥脆，一咬即化，不過略嫌油份重啲，建議如果唔鍾意食咁油膩嘅可以擺一陣反而會好食啲！咁和牛部份係可以既，肉質不錯！價錢大約三百令蚊，如果大家嚟咗食嘅話係可以點。。。。。都手工滑既部分，其實喺香港想搵到食手工滑好既餐廳真係唔多，所以我都冇乜期望，一筆落去火鍋，其實大約已經會知道個滑嘅質素夠唔夠彈牙夠唔夠結實，咁佢呢度嘅滑係偏濕嘅，唔夠結實，不過櫻花蝦滑都尚算可以，蝦味好出，而蟹籽口感都不錯，我認為如果係以手工自己舖頭整嘅話已經係今餐最好，但係最敗筆嘅係黑松露，筆落去火鍋已經發覺個質感好出事，好似橡膠咁，然後再試吓發覺有酸味，應該係已經變壞咗，我朋友試完都感覺到，即時向waiter反映，佢哋都好好叫我哋筆走即刻幫我取消，冇任何為難既。最後我哋嗱嗱聲食完就離開，因為真係唔想嘥時間喺呢間舖頭，係絕對嘅失望，最後有折埋單大約1200幾，本來以為價錢係可以反映質素，但係只係反映到根本係未夠班，食材係完全唔值得，真係唔會有下次，唔明白點解可以個個都大讚，希望可以憑良心寫食評，唔想大家中伏。…Read More

因為從來未食過串串鍋 咁啱見咁多好評 就決定book黎試下 我哋經OpenRice book咗2030，不過我哋早到咗半個鐘好彩都有個位俾我哋入去，本身諗住如果未有位就去行吓先！好好彩！一入到去嘅環境比我想像中既係超級廉價放題既樣式，坐低咗之後職員會俾個QR code，因為係經QR code落單嘅，個menu要自己摸索，職員唔會同你講解，因為個Menu都有啲tricky,我見隔籬左右都要問吓啲職員，咁我哋最後就嗌咗個B餐，(新鮮農場靚牛串串套餐，因為公眾假期所以貴啲要328未加1),湯底方面就叫咗個鴛鴦鍋+30蚊(麻辣+養生菌王雞湯),首先湯底嚟到，麻辣係正常嘅但無麻香，佢哋自己首創嘅茶底係茶包咁樣，話可以解油膩，個養生菌湯就好清淡無味😂想食食材既味道就啱叫呢個，另外怕食麻辣熱氣見到佢個menu有得嗌野飲，續支計錢，仲有啤酒，就決定叫。但係隔咗好耐都冇人比嘢飲，之後就偷聽到隔離枱同一個問題，問侍應之下先知道原來嘢飲係出去拎，都係任飲，但qr code menu入面就續支計，啤酒就算你落咗單，都要自己同侍應講既，佢地話佢地唔會睇你qr code嗌左咩野，我簡直O晒嘴！ 去到自助吧款式唔多，好雜亂，都係一般有羊肉串，牛肉串之類，丸，雞翼，一般既菜，係完全唔吸引既！ 但都拎啲試下，可能賣相唔得但係食材OK呢！ 但都係後悔到。。。。肉質唔新鮮，好鞋口，反而豆卜響鈴係ok,但係本身自助吧已經少，無哂侍應無refill,問2問佢就咁望2望就話無哂，但當時只係2045分，一直都有2 3枱客入黎，款式太少！見有食評話鴨血OK，但結果係好散都係唔新鮮咁！咁我哋個餐係包含農場牛，我地揀左牛頸脊同埋SRF和牛肉眼邊，以為會好啲啦！點知都係我多想！都係好唔新鮮鞋口，有少少牛味但無嗰種靚牛應有既水準！反而海鮮都新鮮！不過鮑魚冇清理乾淨，硯有好多沙！功夫做得唔夠！飲品難得嘅係全部都係支裝，的而且確好少舖頭仲係用支裝，加返少少分！總括嚟講真係食到一吐氣，好難食！呢個價錢埋單每人377蚊，絕對係超低性價比，1半價錢都唔值得！另外大家一定要對清楚張單，價錢錯哂！！！我唔知點解有咁多食評話好食？寫食評都應該有良心啲，以免有人中伏！…Read More

突然想食韓國菜，又咁啱喺佐敦就見到呢一間，決定去試吓先！佢哋嘅餐廳侍應都係韓國人，自自然然都希望會食到正宗嘅韓國菜！ 韓國嘢梗係唔少得嗌炸雞！決定叫個韓國酸辣炸雞，1份有5-6件 88蚊！再叫個伴牛肉紫菜包飯都只係78蚊！ 另外怕唔夠食就叫多個冷伴麵88蚊！首先食得韓國菜一定會有前菜，韓國泡菜，芽菜，薯仔同埋翠玉瓜。泡菜正常略嫌唔夠辣，其他都正常發揮唔錯！首先嚟嘅係炸雞，每一舊都好大隻，酸辣都幾足夠，偏濃味，但粉好厚，肉比例就少啲！但都幾脆口，爭返唔少分數！而再黎就黎紫菜包飯，幾香既牛肉味，但少左啲麻油味，但一份有成10件都只係88蚊，無野可以挑剔！都幾豐富，夾雜左啲醃製青瓜，蛋，紅蘿蔔，火腿絲，蟹柳，性價比好高！而最後一樣就係冷伴麵，呢個麵犀利！我會稱之佢為"方辣你唔死爆菊冷麵",唔食得辣千祈唔好嗌！因為後勁都幾犀利，啲汁超濃超掛汁，我唔係食得好辣所以越食越辛苦！鍾意食辣嘅就可以挑戰下，但係普遍就覺得麻麻地！…Read More

一直都覺得蒸氣海鮮火鍋先係食到海鮮嘅原汁原味，而呢一間一直都聽過但係就未試過，趁假期就梗係要去食一食試一試啦！一入到去望吓本Menu，好多個唔同嘅套餐，四人餐同埋每位計嘅餐，想食多啲唔同款嘅海鮮，就決定叫個刁鑽海鮮套餐！每位699未加一。佢可以揀好多唔同嘅靚海鮮，唔同款式嘅配搭，下面就會慢慢逐一介紹！首先小食揀咗蟹黃青瓜，蟹黃唔會好漏有淡淡的蟹黃味，再配搭埋青瓜既新鮮解膩，成件事好fresh!再之後就嚟咗個超級誇張嘅擺盤，喺上面放咗八頭南非鮑魚，韓國釜山珍珠蠔同埋日本大元貝！適合打卡！ 侍應都會好細心咁樣幫你蒸同埋解釋每一樣海鮮係咩嚟，鮑魚好軟淋彈口，珍珠蠔好有鮮味，蒸完出嚟都唔會話縮晒水，仲係脹卜卜！而日本大元貝就非常滋味！個黃非常軟滑有香味！好少可食到咁新鮮嘅元貝！非常值得推介！而下一個黎既就係刺身類別，冰鎮原隻龍蝦同埋北海道野生牡丹海老！ 龍蝦刺身好爽甜！超級好食！ 牡丹海老就正常係應有既水準！龍蝦刺身係全晚其中一個亮點！而當我哋食食吓嘅時候，有位姐姐好熱情咁樣請我哋食啱啱新鮮炸出嚟嘅炸魚皮！大家應該好少會食到熱辣辣又脆卜卜好香口嘅炸魚皮！又係好好食！再之後就係大賴尿蝦，龍蝦同埋日本喜知次，豈知次嘅肉質比龍蝦更加甜同埋軟滑，而龍蝦肉就好結實，侍應話近排返嘅賴尿蝦質素好好都係有膏叫我哋一定要品嚐清楚！果然好食！到最後嘅重點就係越南頂角膏蟹，鍾意膏嘅朋友一定唔可以放過，啲膏多到好恐怖！ 本身未飽一食就即刻飽到上心口！ 質素非常之好！ 如果鍾意食蟹嘅鮮甜味就揀奄仔蟹！ 之後姐姐見我哋咁滿意就每人請我哋識咗雪燕糖水，補補佢，不過略嫌有啲甜！總括嚟講呢一餐非常滿意，重點要值得讚嘅係侍應嘅態度，因為每個都好有心機好有服務水準！嘢食都非常新鮮，必定會再來幫襯！…Read More

嚟到屯門梗係要幫襯下小店啦，因為本身住港島所以好難會入到嚟，呢間鋪一直都想試吓所以咁啱入到嚟就一定要幫襯！舖頭方面佢係屬於小店類，麻雀雖小，五臟俱全。佢分別有bar枱同餐枱，因為唔想吊腳所以就揀咗坐餐枱。一埋位侍應會主動遞上熱茶俾你，服務態度幾好。我就揀咗壱の重丼，分別有豐洲鮮魚2種（4切），吞拿魚腩(2切），海膽，葱吞拿魚腩蓉，牡丹蝦仲有三文魚籽，佢哋嘅飯係加咗醋落去，一嚟到個畫面好誇張，豐富！佢地既Wasabi都好新鮮係新鮮磨出嚟，無嗰種攻鼻嘅感覺，反而食到山葵嘅味道！豐洲鮮魚幾肥味口感不錯，無腥既味道！好食！吞拿魚腩無筋，但係我覺得未去到魚腩嘅部份，但係都好食！ 海膽有鮮味但係太少唔夠喉，牡丹蝦都好新鮮有甜味，三文魚子都一樣好食爽口！另外就叫咗個北海三味丼，帶子好鮮甜好大粒，蟹膏蟹肉就有少少失色，比較喊，三文魚籽一樣好食！ 但係呢個性價比就低咗少少，未係好對得住個價錢！方面我就叫咗個螢光魷魚沖漬！真係好好食！唔會死鹹！出邊有好多都淨係得個鹹字！呢個味道就啱啱好，螢光魷魚好肥！有爆漿嘅感覺！推介！牛舌方面就真係今晚嘅敗筆，因為燒物最影響就係食材本身有冇過火，今次呢個牛舌就燒得比較差，過左火，有啲硬同柴！希望可以改善一下！整體都會再嚟幫襯，食材好新鮮，態度都幾好。唔錯…Read More

放工同同事聚會，同事話要帶我哋去呢一間試吓！話性價比一流，我哋個個又鍾意食西餐梗係要試吓啦！ 一埋枱我哋就見到Menu有四人餐，幾多選擇幾豐富! 四人餐係包括是日餐湯同埋沙律，main 就有成16款選擇咁多，款款都好吸引，另外仲有甜品，飲品方面就buy 1 get 1 free! 4人餐價錢就758加1，咁當然喺16款菜式裏邊有某啲菜式係要加錢，但價錢都reasonable!咁我哋16款主菜裏面揀咗黑松露蘑菇扁意粉，紅酒繪羊膝配薯蓉燒蔬菜(+48)，佢哋嘅手工薄餅係出名當然要揀番個！就揀咗海鮮香草茄醬薄餅(+48)，仲有就係嗌咗個海鮮龍蝦汁意大利飯(+48)，甜品方面今日係藍莓芝士蛋糕同埋Tiramisu，而我就叫多杯Bellin Di Mano!是日餐湯係蕃茄湯，幾香濃好多料，仲有一啲香草嘅味道好好飲，作為一個開胃菜不錯！首先第一款嚟嘅主菜係紅酒繪羊膝， 好軟滑好香，基本已經骨肉分離，唔需要點樣切，忌廉薯蓉好香薯仔味，燒蔬菜係西蘭花椰菜同埋紅蘿蔔，好香又唔會過火，仲有蔬菜嘅味道！另一款嚟嘅就係手工薄餅，入面含鮮蝦，魷魚，煙三文魚，蒜，意大利番茜，忌廉，聖馬諾蕃茄同埋馬蘇里拉芝士，因為我係好憎厚底嘅Pizza，好似淨係食緊麵粉咁，又硬又實，而呢個就唔會，做到個餅底好鬆軟，有焦香味！醬料唔會太濃郁，所以冇蓋過海鮮嘅味道，食材都新鮮！果然出名係手工薄餅！就係新鮮黑松露蘑菇扁意粉！醬汁濃厚令到扁意粉好掛汁，用料都唔孤寒，大堆蘑菇同埋黑松露！值得推介！另外一款都係海鮮意大利飯，海鮮都係一樣咁新鮮好食，帶子有甜味，青口都算大隻，意大利飯嘅質感都煮得啱啱好！唔會太硬又或者過熟！整體我都會比幾高嘅評價主菜方面，份量都幾大，絕對適合四人摸吓酒杯底傾吓偈！雖然餐廳係有限時，但係我哋過咗鐘C型都冇人趕我哋走！非常好好，當然大前提要冇人等位先可以咁樣啦！甜品係藍莓芝士蛋糕同埋Tiramisu，幾香滑又唔會話太甜太膩！飲品方面就嗌左個Bellin Di Mano, 係由peach purée ,splash of lemon同埋tonic water去溝成，成個感覺幾fresh,好好飲！…Read More

話說同女朋友去行山，咁啱泊咗低架車喺信和停車場，行山就梗係要補充體力啦！一落樓就見到呢間酒樓，天氣又嚴熱！ 一於入去食個lunch先！一於就叫個棉花雞因為本身好鍾意食，出面好少棉花雞仲用魚肚，但係嚟到就非常之失望！ 完全勁乾，魚肚硬，正常會索哂啲湯汁同軟滑，雞都係非常之鞋，因為冇湯汁嘅關係芋頭都非常之硬同乾，菇不過不失！另外就叫咗個蝦餃，正常茶樓水準，不錯，唯一係個皮偏厚，不過呢個都好個人，有人鍾意食厚皮有人鍾意食薄皮！豉汁鳳爪就醬汁偏鹹，鳳爪都未去到骨肉分離，有少少未夠淋，但香味係有既！反而最好食係米網蘿蔔絲腸，入面有好多蘿蔔絲，另外加埋米網脆卜卜，有芹菜既香味！值得大家去試下！總結係一間非常之普通嘅茶樓，但係有總好過無，適合老人家攤唞下一盅兩件！…Read More

一直都聽過呢間嘢，主打係平價壽司飯，又多款式！一於就去試吓！可能我係晏晝平日去嘅關係，所以店舖都冇乜人，可以直入！我哋首先係被安排坐喺卡位嘅位置，咁啱對住風口位冷氣都比較大，大家要留意下！一坐低就梗係向着目標嘅自選壽司飯落單啦！見到佢自選四款嘅話就64蚊，五款就74蚊，而我同我朋友最後就揀咗六款，所以另外要加多15蚊。咁我第一款揀嘅丼飯係藍旗吞拿魚,蟹膏，汁燒帆立貝，蟹肉，左口魚，同埋3文魚，咁黎到嗰1刻實際比相嘅份量細，不過都尚可接受，最緊要係啲刺身新唔新鮮！但好可惜有少少失望，蟹膏偏鹹，汁燒帆立貝好細粒唔好食，左口魚不過不失，吞拿魚都正常無筋，反而三文魚係最好食！而第二碗就揀咗黑椒三文魚，三文魚，蟹籽，帶子同埋汁燒帆立貝，都係同頭先嗰一碗一樣，三文魚不錯，蟹籽就麻麻哋新鮮，唔夠爽，無漲卜卜爆珠嗰種感覺，汁燒帆立貝依然失望，帶子就正正常常！另外再叫多左個芝麻雞翼，反而呢個幾好食！啱啱炸起！好香口！炸得啱啱好，唔會太乾！呢個都值得推介！呢個價位來講其實都冇得挑剔，冇得同其他既去比，但都可以滿足到突然想食壽司飯嘅癮！但係唔會特別想去再食多次…Read More

一直食開鰂魚涌嘅坐忘，今日同朋友去開天后，佢又未食過，梗係一於帶佢嚟呢間食下啦！之前一直已經介紹過佢，鍾意重口味既大食既人一定要去！ 一入到去唔使講嘢，梗係要叫返個豬軟骨7小時定食，因為朋友鍾意食烏冬，而又對牛肋條吸引，但係餐牌名冇呢個配搭，所以就嘗試問店員可唔可以將黑芝麻牛肋野菜飯轉為烏冬，店員回覆需要加$11，當然冇問題，照去馬！首先嚟嘅係豬軟骨7小時定食，因為定食嘅關係所以會包含湯同埋沙律另外就梗係個重點啦！ 豬軟骨依然軟滑好好食！配埋飯簡直一流！係會令到食多啲飯！因為個醬汁本身比較重口味，但當然難我唔到！太鹹嘅時候就食返啲沙律菜中和返鹹嘅味道！湯就普普通通，不過不失。另外再嚟嘅就梗係黑芝麻牛肋野菜烏冬，本身個人比較鍾意烏冬煙靭一啲，而佢嘅烏冬就正正啱晒我口味，都係比較煙靭滑！ 黑芝麻都好香，包覆晒喺肋同菜入面！都有好多唔同款式嘅菜，好似翠玉瓜，南瓜，西蘭花，椰菜等等！可以扮晒健康咁樣食多啲菜！有益！牛肋條都幾軟冧！不錯！總括依然都係好好食！值得回頭！價錢都公道！推介俾大家！…Read More

咁啱去一去朋友屋企，又見肚餓喎！即刻去食返個下午茶先！見到附近有間日常茶室！見到幾乾淨餐牌又幾吸引！就一於去試吓！下午茶茶餐都選擇好多！見到有款寫住"懶矜貴黑松露炒蛋多士"就比個名吸引咗，因為本身我係黑松露控！ 有黑松露嘅嘢就好好食！所以就叫咗呢個，試一試先！首先個多士幾厚！夠晒鬆軟！炒蛋夠晒滑！好香！雖然黑松露好似好多！但係味道唔算突出！唔夠融入喺個炒蛋入面！雖然有啲扣咗分，但係整體都不錯！係會再食嘅！始終39蚊實在太平喇！仲要包野飲！外賣自取仲有折添！ 唔記得讚一讚佢哋嘅服務員工相當有禮貌！唔係一般茶餐廳嘅粗聲粗氣！下次一定會再來幫襯！試埋其他款！…Read More

趁今日朝早起咗身，梗係落去食返個靚早餐！喺太古城經過super sandwiches， 見到價錢都幾抵食，就一於試吓先！畢竟住咗呢度附近咁耐一次都未幫襯過！ 一於就嗌個signature breakfast! 成個餐都幾豐富， 有車打芝士腸，炒蛋，茄汁焗豆，烤蕃茄同埋牛角包！ 埋位自動有人送係你面前！幾方便唔使自己拎！ 烤蕃茄幾juicy，一啲酸味都冇！ 炒蛋正常都滑既，茄汁焗豆都係例牌罐頭！車打芝士腸就有啲失色，腸衣好韌，無嗰種爽皮感覺，芝士味都唔太突出！麻麻地！反而牛角包做得幾好！上到嚟係暖笠笠！好食又唔油！不錯！43蚊呢個價錢算係不錯！夠飽肚！…Read More

突然興起想食餃子，於是喺網上面搵到哩間餃子小店。平日七點幾黎到門口已經有一大班人等緊堂食同外賣，似乎好出名下。等左幾個字就已經可以入座～🥢秘汁雞腎（$22)其實就係滷水雞腎，個汁偏甜。🥢涼拌海蜇（$22)味道偏甜，但加左佢個辣椒油又幾好食。🥢上湯時菜 ($16)本身想試佢個淨湯（$15)但店員話俾多一蚊有菜食下最多幫我地多湯所以試下，菜心好甜好好食，湯本身好重椰子味，加左菜嘅甜味幾好飲。🥢韭菜鮮肉煎餃拼麻辣白菜鮮肉煎餃 ($43)煎餃好油下，韭菜同肉嘅比例大約係一半一半，食到好香嘅韭菜味唔錯，反而麻辣餃就好咸，少少麻辣味。🥢紫甘藍粟米鮮肉金沙餃（$52)金沙餃啫係喺煎餃外面包一層咸蛋黃，十級邪惡，煎餃本身油再加上咸蛋黃，係超級膩。餃子味道就食到淡淡嘅粟米味。叫哂煎餃有啲失策，因為太油，又遮左餃子本身嘅味道，推薦佢地個辣椒油，唔辣但好香。—————————————————————————————🏠豐信餃子店📍 太子汝州街17號地下A號舖—————————————————————————————…Read More

呢間舖頭其實幫襯過好多次 但都冇認真寫過食評 今日經過決定又再幫襯下小店 因為佢哋嘅海南雞飯真係性價比一流。$45 想食好少少既話今時今日你預期有啲咩？佢就包含一大盒黃油飯，滑嘟嘟既雞，醬汁同埋湯。今次係食過最好食嘅一次！雞夠滑！分量多！飯既味道都啱啱好！而佢嘅醬汁唔係一般喺出面食海南雞飯杰身既鼓油汁，係比較浠，而另一個醬汁就係酸辣汁幾醒胃！ 而湯方面就一般，比較鹹！但個飯絕對夠一個打工仔食！又好味！最緊要性價比一流！…Read More

今日夜收工 成八點幾先返到屋企附近 一直都未試過呢一間餐廳 但見佢仲有開門就膽粗粗入去叫咗兩個外賣 咁啱又好掛住泰國嘅味道 一於梗係要試吓泰式嘅炒物！見到有個泰式蝦膏炒飯同埋泰式炒河！ 即刻毫不猶豫就叫黎試下！ 因為我係嗌外賣 咁返到屋企都需要5分鐘時間 好彩返到屋企一拎出嚟仲係熱辣辣！ 首先梗係打開個炒飯！好香嘅蝦膏味道，都只係$58！大大盒！ 係泰國嘅味道呀！ 食落粒粒分明，面頭有蛋絲，成個炒飯嘅味都籠罩住飯廳！ 連屋企人都大讚！ 咁另一碟就係泰式炒河，亦都係$58，有得俾你揀豬或者雞，而我就揀咗後者！呢個泰式炒可一樣係咁香，食落都有泰式嘅味道，但係有一絲絲嘅甜味，甜味應該就係出自喺椰菜，芥蘭身上！ 香氣逼人！鍾意食泰菜嘅千祈唔可以錯過！又估唔到呢個位置有間咁出色嘅泰國餐廳！一定唔會再去食過幫襯！…Read More

特別日子想食返啲特別嘢，咁啱大佬話佢未食過鐵板燒，就上網做下資料搜集。見哩間餐廳有Anson Lo加持，環境幾靚，Lunch去仲有折就黎試下。入到餐廳第一個感覺係好高檔，入面分左好多個Area，仲有好多個鐵板Bar枱包廂。睇完Menu揀左個兩位用嘅午市商務鐵板燒套餐配薄燒美國牛肉（$1380）。餐入面睇落唔算好多嘢食，師傅會拎哂你嗌嘅海鮮出黎俾你睇同影相先，然後就開始準備食材。🥢前菜係一小碟蜆，食落有少少咸，冇乜特別。🥢沙律有少少驚喜，係菠菜蘋果汁沙律，蘆薈粒上面仲有小魚乾增加口感，整體食落酸酸甜甜，好開胃！🥢刺身三款分別係吞拿魚赤身，牡丹蝦同金槍魚。赤身食落冇筋。牡丹蝦好鮮甜。金槍魚帶住淡淡嘅魚味，估唔到又幾好食。🥢然後就開始入戲肉，首先係南非鮑魚，師傅只係用左好簡單嘅鹽同黑椒調味，仲燒到表面有少少金黃色好吸引，食落好嫩口一啲都唔會熟過頭，調味簡單但可以帶到鮑魚嘅鮮味出黎，好好食呀！🥢食完鮑魚有燒野菜清一清個口嘅味道，有菇、露荀、紅椒同珍珠荀每樣都燒到金黃色，食落係野菜嘅清甜。🥢到本日海鮮係銀鱈魚，都係用牛油、鹽同黑椒就已經夠，好香口，又有魚嘅鮮味。🥢然後到送嘅活龍蝦，特別在師傅用龍蝦膏整左個汁連埋龍蝦一齊食真係好好食，好香嘅蝦膏唔會蓋過左龍蝦嘅味道，兩樣嘅輔相成，覺得成個餐最好食就係哩個。🥢第二個戲肉係薄燒美國牛肉，師傅加左一堆炸蒜同蔥用和牛包住，燒完仲放左喺塊印有板神嘅多士上面，用黎影相打咭一流，仲可以幫佢宣傳下間舖！牛肉放左喺多士上面吸左多餘嘅油，食落口冇咁油，而且炸蒜增加左口感同蔥一齊令到個牛冇咁膩。而牛嘅油脂分佈適中，唔會話成啖油或成啖肉，師傅燒到5成熟，肉質一啲都唔韌，唔錯唔錯。🥢食完一堆重口味嘢，飲返個麵豉湯先。湯加左頭先隻龍蝦嘅頭頭尾尾落去煮，飲落唔係好覺有龍蝦味。🥢漬物就係青瓜同牛蒡，冇乜特別。最後就係傳說中嘅Anson Lo炒飯，炒飯嘅材料冇乜特別，但就炒得幾乾身，調味都比較啖。🥢最後嘅甜品係焦糖多士出奇地好食，本身冇乜期待，但食落好香焦糖味，多士外層金黃香脆，入面又好鬆軟，食唔哂個炒飯都要食哩個多士。🥢除左個餐仲嗌左一杯橙汁（$48）同蘋果汁（$48），飲落係好似新鮮榨嘅味，有啲意外！最後埋單兩個人一共$1462，鐵板黎講唔算貴，食材都新鮮，可以再戰！…Read More