Ashley Chen's Profile

用餐限時90分鐘，我哋一行7人準時到達，2星期前預訂咗嘅三黃雞喺入座後 65 分鐘先上枱，只剩 25 分鐘俾客人消耗一整隻雞連伴碟蔬菜。隻雞上枱後10分鐘，店員就走嚟 “提醒” 仲有15分鐘要離開。碟雞仲有少少未食完，店員就嘗試收走。由於碟雞太遲上枱，我哋無時間叫甜品。為咗符合佢每個人頭要叫一個 item (飲品唔計) 嘅要求，唯有打包一個沙律。落單時已同店員講分汁，店員亦同廚房確認咗可以。結果嚟到係無分汁 (因為唔會即晚食，沙律唔適合浸住啲汁過夜)，問返店員A，回應係「係喎無分到汁」，再問返企喺附近，落單嘅店員B，回應係「其實本身呢個沙律係唔適合做外賣」。我哋即時回覆餐廳出錯點解係怪客人叫錯菜式，店員保持緘默，唔出聲唔回應淨係同客人對望。第一，你落單時唔講？第二，而家係你落單時話可以分汁，出到嚟無分到，同個沙律適唔適合做外賣無關係，店員只係搵藉口模糊焦點。第三，落錯單/廚房出錯菜，各個店員一句道歉都無，亦無 offer 重做，要客人硬食。餐廳定價已經唔係平，食物質素再 ok，餐廳種種不合理嘅規定 (即使餐廳遲上菜，客人亦必須喺90分鐘用餐時間完結前離開。不論年齡，每人要叫一個 item，小朋友都計，但飲品唔算)，加上呢個服務態度，不可一，不可再。…Read More

下午茶時段嚟食嘢，客唔多，得10枱唔夠，但所有嘢都要等好耐。首先等帶位 - 去到門口示意2位，侍應妹妹乜都無講，指一指門口旁邊叫我哋企係道等，明明有好多吉枱唔知等乜。有幾個無嘢做嘅侍應妹妹係道行行企企，但無人有意欲要帶我哋入去。等咗7-8分鐘，終於有個疑似經理嘅人帶我哋坐低。落單正正常，我哋叫咗1碗生牛河、1碗火車頭、1個海鮮沙律、2杯飲品。等上菜 - 等咗15分鐘，先出現1杯飲品，第二杯要隔多5分鐘先出現。其時已經係落單後20分鐘，叫侍應妹妹去睇下啲食物去咗邊？睇住侍應妹妹入廚房行咗個圈，又出返嚟行行企企，完全無打算過嚟同我哋交待一聲。終於係落單後25分鐘，第一碗生牛河出現了。整咁耐以為好好食？非常普通，無特別。再等呀等，又再催佢哋一次，終於係落單後35分鐘，火車頭出現了，但作為頭盤嘅海鮮沙律仍然無影。叫個經理過嚟問下為乜煮碗粉要煮35分鐘？經理只係答3個字「做唔切。」你全場滿座都話吖，得個1/3嘅枱有客，都做唔切？講完一論，海鮮沙律都係未出現，叫個經理去跟一跟，終於，千呼萬喚嘅海鮮沙律係落單後45分鐘出現了。以為好難整？其實只係一堆青木瓜絲混少少西柚，再係旁邊擺幾舊無調味嘅急凍海鮮，所有嘢求其擺埋一堆，零賣相。對於係無客嘅情況下20分鐘整2杯飲品、30分鐘整碗湯河，45分鐘整個沙律，經理除咗「做唔切」3個字就無其他解釋。對於點解隔離枱遲過我哋落單，但早過我哋有嘢食，都解釋唔到。咁嘅服務、咁嘅質素、咁嘅味道，絕對唔會再嚟。…Read More

見到門口大大個牌推介佢嘅龍蝦飽魚喇沙 ($98) 即管入去試下。因為係午巿時段，加幾蚊有嘢飲，我加咗$8要凍薏米水。薏米水先到，唔太甜，薏米淋得嚟有咬口，好解渴好好飲！無幾耐之後喇沙都送到。大大隻龍蝦，飽魚都唔孤寒，大大隻肥嘟嘟。最驚喜係翻轉龍蝦見到好多膏，龍蝦膏甜肉彈牙，鮑魚新鮮肉爽，兩者同個湯底都好夾。喇沙湯底好夠味好足料，除咗龍蝦同鮑魚，仲有半隻蛋、好多魚片同豆卜，豆卜吸哂啲湯好好味。食到最底仲搵到一粒獅蚶，香港已經好少有舖頭整喇沙會加獅蚶，忠於原著，抵讚！$98一碗粉絕對唔係平，但以呢個食物質素嚟講好抵！餐廳環境，服務態度都好好，呢餐食得好開心！…Read More

今日行開附近做嘢，俾食評中提及嘅麻辣墨魚頭吸引咗，就嚟試下。到埗時已經過咗食晏最高峰嘅時段，所以唔駛等位就有得入。店員叫我係2張枱之間攝入埋面嘅空位，枱之間嘅距離只有2隻手掌咁闊，肥少少都逼唔到入去。叫咗豬皮魚皮餃米線，另加麻辣墨魚頭。米線湯底其實好一般，得個麻字，辣度唔夠 (我已經係叫大辣)，墨魚頭確係好食，但略嫌紅油太多，個辣味無乜深度。魚皮餃都係啲交來嘅貨，同街巿買到嘅無分別，叫不過不失。本來都覺得整體都 OK，正正常常咁，但食到最後一塊豬皮，一咬開，每一個毛孔都有最少一條黑色嘅毛 !!!!! 好噁心!!!! 即係你想像下塊皮係處理咗表面嘅毛 ，但係係用剃嘅方式，所以毛嘅根部仍然留係毛孔，一咬開塊豬皮就會見到全部都係毛!!!我唔知係咪其實其他豬皮都係咁，只係我掛住睇電話無為意，但見到呢塊充滿黑色毛頭嘅豬皮後，我再食唔到落去，餘下果半碗米線都放棄咗。麻辣墨魚頭再好食都無用，果塊充滿黑色毛頭嘅豬皮實在太噁心，令我好懷疑呢間舖頭處理食材嘅衞生程度，以後都唔會再嚟。再者，麻辣墨魚頭只可以話係比米線好食，味道並無驚喜可言。…Read More