diudiu_cat's Profile

今晚晚餐齊齊去咗間冰室，快靚正，亦平靚正。環境光猛，地方企理，座位唔少，有卡座或長排座位，坐得舒適。晚巿有很多選擇，有幾款招牌厚豬扒菜式、小菜、炒粉麵飯、套餐、常餐、小食都有得供應。禾味燒BB鴿 ($53)雖然細細隻，但相當多肉，皮燒得亮澤香口，肉嫩多汁，味道鹹香，唔駛點淮鹽都夠晒味。Double 厚豬扒飯追加辣肉醬（$69+$5）份量十足，兩大塊厚豬扒黃金香口，啖啖肉，充滿肉汁，果然係招牌菜，推介！辣肉醬都好值得追加，香辣惹味，用嚟撈飲一流，食多幾啖，正！胡椒豬肚雞 （$88）先呷啖湯，充滿胡椒香，辛辣暖胃，得！雞雖不算很嫩，但好有雞香；豬肚爽嫩入味，好味！仲有支竹、芹菜、白果、蒜頭等，豐富入味。二人小菜套餐 （$172）揀兩款小菜外，仲送油菜、白飯和熱飲，抵！有多款小菜選擇，點咗黑椒茄子牛仔骨煲，熱辣辣上枱，牛仔骨好惹味，辣辣地！仲有爆香咗嘅洋蔥、蒜子、紅椒、茄子等，鹹香惹味。梅菜蒸皖魚（+$15）即點即蒸，蒸得岩岩好，好嫩滑，伴着梅菜一齊食，最佳拍擋！灼菜心（$0/跟餐送）翠綠鮮嫩，份量都唔少，讚！抵食好食!…Read More

趁假期最後一日，就今晚同班朋友餐聚，有朋友帶咗我地去港島食好嘢，係一間特色嘅中菜店。店子整齊企理，環境光猛，座位唔少。適合三五知已或大夥兒聚餐。有很多選擇，分了牛、豬、雞、魚、海鮮類、素類、菜類、豆腐、粉麵飯、小食、鍋物、生滾湯等。我哋就揀咗四款店小二特別推介。薑蔥爆鯇魚泡（$198）熱辣辣上枱，喳喳聲，好香！全煲都係鯇魚泡，份量好足，難得！當中有爽的，也有滑的，很鮮香，用大量薑蔥炮製，整得入味，鹹香惹味，食到我津津有味。萬字醬油雞 （$208/半隻）註明用三種醬油炮製，有日本萬字醬油、台灣醬油膏和李錦記甜豉油，即叫即浸，下功夫之作！半隻雞嘅份量唔少，仲好有肉，皮爽肉嫩，配搭三種醬油，味道果然獨特，還配了一些爽口的菇菌，同樣整得入味。糟鹵蒸咸鮮馬友（$338）註明係來自台灣，有保証！魚起飛狀，賣相很吸引，並以糟鹵蒸製，鮮嫩嘅魚肉啖啖酒香，當相特別，再加了些金華火腿絲，添鹹香之餘又可除魚腥，仲更矜貴，好好味，推介！連墊魚底嘅蔥都有酒香，喜歡！避風塘茄子（$128）件件金黃，外脆內嫩，香口惹味，配啤酒一流！茄子雖係吸油之物，但食落完全無油淋淋，做得好！…Read More

今日係拍拖週年紀念，我地一早計劃咗離島半日遊，可惜….下雨，但也無咗我們出發嘅決心，就向長洲去。老公一落船就話要醫肚，本打算掃街，食大魚丸、糯米糍、平安包….但被多間海鮮店極力推介$188/2款、$278/3款…仲送湯和油菜，抵！飯店整齊企理，座位唔少，坐外面仲可望住海，幾舒適寫意。超多選擇，有多種海鮮外，仲有肉類、蔬菜可選，而粉麵飯就雖單點。馬上送來魚肚粟米羹 ($0)，十分足料，魚肚鮮美，粟米爽口多汁，順滑可口，不錯！白灼生菜 ($0) 新鮮爽嫩，淋上熟油，賣相亮麗。老公愛肉，點了蒜蓉牛仔骨 ($$278/3餸)，好夠鑊氣，舖上炸蒜碎，蒜味濃郁，香氣撲鼻，肉嫩入味，大大碟，好食又抵食！我一揀就揀果皮蒸班頭腩  ($$278/3餸)，每件都份量十足，好厚肉。肉質雪白，嫩滑鮮美，魚皮黏滑富膠質，搭配甘香的果皮，最佳拍擋。再點推介的黃金蝦  ($$278/3餸)，外層沾上香濃的鹹蛋黃，鹹香可口，蝦仁啖啖肉，連殼都可食，口感味道層次豐富。…Read More

一入門就看到一塊「食飯最緊要開心」的螢光字牌。對！每次食飯都好開心。靠牆有是舒適的卡座，中間還有長枱和圓枱，座位不少，整齊企理，坐得舒適。多份餐牌，選擇不少，有二人套餐、晚餐、常餐、焗飯、咖哩飯、炒粉麵飯、小菜、蒸類、小食、飲品等。二人套餐（$138）有魚或雞揀，另選一樣小菜，配有油菜、白飯/例湯/飲品。揀咗古法蒸馬友，古法是用肉絲、冬菇絲和紅棗蒸，很特別！魚很新鮮，蒸得剛好，又滑又嫩，肉質鮮美。 另一小菜是三杯雞，啖啖肉，皮脆口，鹹香惹味。油菜（$0/跟餐）係灼生菜，很清爽鮮嫩，少油少鹽，清新健康！例湯（$0/跟餐）係蓮藕蘿蔔豬骨湯煲得夠火喉，蓮藕粉糯微爽，沒有味精，家的味道。乾鍋椰菜花腩片 （$78）熱烘烘上枱，鍋氣十足！用料十足，五花腩煎至焦香煸出油脂，吃落一點也不油膩；椰菜花及各配菜都煮很剛好，很爽口！味道香辣惹味，很有風味，推介！型男餐（$65）包一大碗豬扒鮑魚日本出前一丁、火腿奄列及大大個菠蘿油，份量十足，一定夠型男飽肚。豬扒煎得香口，肉腍嫩有肉汁；原隻鮑魚爽口；出前一丁有咬口，滿有麻油香，此組合一流！火腿奄列也不錯，香嫩的蛋皮包着不少火腿絲，豐富！暖烘烘的菠蘿油夾冰凍的牛油，很軟熟，滿口牛油香。凍檸檬蜜（+$3/跟餐）、熱檸檬蜜（+$0/跟餐)都足足有三至四大片檸檬，酸咪咪的檸檬加了甜美的菜蜜，既滋潤又解膩。…Read More

逢假期都會跟這位朋友食飯一聚，今個假期都唔例外，朋友仲陪我整蛋糕兼晚餐，精彩的相聚日。我地今晚揀了一間拉麵店，日式的設計，橙紅嘅色調，感覺好warm。座位完是面牆的單人座，大家排排坐。有四款拉麵選擇，每款分普通版和特盛版，亦可追加配料，另有幾款小食。睇下menu 嘅簡介，好清晰的！我要赤蝦拉麵（$128）加糖心蛋（+$18）加菠菜（+$12），湯身橙紅濃厚，黏在直細麵，味道濃郁，濃而不鹹。直細麵烹調時間剛好，口感佳，啖啖鮮香蝦味，正！叉燒半肥瘦，腍嫩入味；三大隻赤蝦很厚身，經輕燒，半刺身狀，爽彈鮮味，優質!糖心蛋 流心狀佳，黏滑兼滿滿蛋香，加上烹調入味，稍稍鹹香，味道和口感都咁吸引。菠菜 翠綠，清爽腍嫩，唔油唔鹹，有益！朋友揀淡麗醬油拉麵 （$116/特盛），湯身透徹亮澤，喜歡它唔太鹹，亦唔黏稠，食落唔膩。揀咗粗身嘅手搓麵，人手搓出，多份用心，口味煙韌，有嚼勁。特盛配料腩肉叉燒、紫菜和糖心蛋，本身還配有京蔥、味荀和菠菜，好豐富。腩肉叉燒份量足，嫩肉伴着層脂肪，甘香油潤，肥美腍嫩，好得！另叫咗了一客煎餃子（$28），共有三隻，外皮煎至帶些金黃，肉饀拌入蔬菜，口感佳，味道美味。…Read More

今晚要去鰂魚涌上堂，喺聽書之前先醫飽嗰肚。獨個兒的我當然找間cafe 靜一靜，抖一抖。咖啡店歐陸式設計，優雅時尚，燈光柔和，舒適寧靜，正是叉電的好地方。座位都幾多，有大枱、二人枱，仲有望住街景嘅吧枱，適合各人需要。QR code 下單，分別有Happy hour menu、Coffee、Feature Drinks、Chocolate、Tea、Salad、Sandwich 、Toast、Special、Burger、Pasta、Panini和Dessert。牛油果多士配沙律 （$80）睇落好fresh，岩晒我！軟熟嘅多士塗了鹹香醬料，放上牛油果件和車厘茄片，相間擺放，好靚！配搭清新，健康美味。旁邊有大量新鮮爽脆的雜沙律菜，加了些車厘茄、合桃和芝士片，再自己淋些檸檬橄欖油醬，酸咪咪，好開胃。咖啡胡桃蛋糕（$34）幾厚身，鬆軟乾身，並不油膩。入口微暖，淡淡咖啡味，亦有啲果仁香，甜度適中。Baileys Chocolate ($76)  拉花圖案清楚優美，陣陣朱古力香和酒香，令我陶醉。入口順滑，濃濃嘅朱古力中嚐到Baileys酒嘅香甜，例比好岩，太喜歡！如果大杯啲就更好。…Read More

今日大家本來約去大澳遊，但呢個勞動節實在太多訪港旅客，真係驚難入難出，都係留喺屋企hea ，夜晚先一齊出去食返餐。有人帶路，今晚去食印度菜。店子裝潢有特色，內有一些民族掛畫、吊燈，仲有一個巨大印度熊仔，好有趣！MENU分得好清楚，共有五款咖喱口味，包括香料咖哩、奶油咖喱、黑扁豆咖哩、腰果咖哩和菠菜咖喱，各有特色。另外仲有特色烤餅、特色小食、印度香料飯和飲品。每款咖喱套餐均配白飯和罐裝或紙包飲品，加$15就可以轉烤餅或蒜蓉包，我哋揀了三款唔同口味和一款特色烤餅。先上胡椒脆餅 ($28) 很薄身，整得極之脆身，咬下去時卜卜聲，帶點香辣的胡椒味，入口無油膩感，單單食它的原味已很美味!香料咖哩牛舌配蒜蓉烤餅 ($83+$15)有唔少牛舌，仲大大塊同厚切，讚！蒜蓉烤餅表面都沾上蒜粒，邊位烤至帶少少焦燶，很香！嚐到淡淡的蒜香味，口感柔韌，好吃！牛舌燒得好靚，味道鹹香，口感爽嫩，伴上獨特的香料咖哩更美味，當然要同埋烤餅一齊食，最佳拍擋。腰果咖哩魚柳配奶油烤餅($83+$15)腰果咖喱滿載果仁香和奶香，質地濃厚，有磨至幼細的腰果粒，味道香辣中有果仁香，非常好味，推介俾鍾意果仁嘅人。魚件好有質素，一大件，好厚肉。外金黃內潔白，肉質好嫩滑，以咖喱烹調，香辣吸引。奶油烤餅好薄身，柔韌有麥香，淋上咖喱醬汁，夾件魚柳，正！黑豆燴羊肉咖哩配蒜蓉烤餅($78+$15) 羊肉份量多，啖啖肉，整得好嫩，用料優質！不錯。揀了配黑豆咖喱，以大量原粒嘅黑豆製作，相當特別！黑豆粉綿，辣度就中等，伴在烤餅上，再加埋羊肉，真係好飽肚，滿足！無糖茶、甘蔗椰汁馬蹄爽、可樂（$0/跟餐）冰涼透心，邊飲邊食香辣咖哩，爽呀！小店真係令我喜出望外，數咗幾點：1）上枱擺得有心思；2）用料優質；3）各款咖哩各有特色；4）好足料：每籃烤餅和主菜都有好多件；5）抵食好食，定價親民。今晚大滿足！…Read More

老公最喜歡火鍋，特別係食牛嘅火鍋，佢搵到間新開嘅手切牛火鍋店，一於陪佢去！店舖整齊企理，環境光鮮，有多張卡位座、長枱和大圓枱，大夥兒、三五知己或倆口子都合適。餐牌好清晰，主要有三款潮汕手切牛肉火鍋套餐選擇，150分鐘任食放題，不同時段不同收費。另有各式配料、手工小食、特色飲品和雪糕等，好豐富！我地揀咗精選海鮮拼盤+潮汕手切牛肉放題（$338/正價時段）。先上湯底，六款中揀了潮汕牛骨湯，牛骨好香，湯頭鮮甜，用來配鮮牛肉，更能嚐到牛的鮮味！先上一個迷你轉盤，放了各款的手切牛，附有部位名和所需時間，很精美，有心思！全是人手即時切，共五款，包括五花趾、吊龍、匙柄、雪花和牛胸油，每款都好紅潤亮澤，夾雜着油花，真係好新鮮！我地都最喜歡雪花，牛味極濃，又鮮嫩，優質！精選海鮮拼盤有龍躉、鮑魚、桶蠔、海蝦和沙白，五款都極新鮮，龍躉嫩滑；鮑魚鮮爽；桶蠔肥美；海蝦爽牙和沙白鮮甜，全部都喜歡！另外仲有很好火鍋配料 可下單點選，點了鮮味彈牙的手工蟹籽蝦滑、鮮甜的脆魚腩、爽脆的脆肉鯇魚片，三款海鮮都得！還試了美國特級牛板腱，薄身紅潤，牛味濃，肉質嫩。自助區 都有很多火鍋配料任選任食，揀了雜丸、魚腐、花雕醉雞和黃喉，各款丸都彈牙，特別是牛丸，很多汁，推介！還有很少見的黃喉，竟然這裏都有，口感非常爽脆。另取了一盆蔬菜，有南瓜、蓮藕、粟米、准山、海帶、支竹、菜等，選擇很多，不錯！亦下單點了幾款小食，潮汕南乳炸雞翼即點即炸，非常香口，肉嫩兼啖啖肉汁，鹹香美味。避風塘粟米粒粒飽滿，香辣惹味。手工咸蛋黃炸魚皮脆卜卜，沾滿咸蛋黃醬，鹹香惹味。自助區除了有火鍋配料，仲有幾款熟食、飲品和甜品，豐富得很！有大座飲品雪櫃，包括有多款汽水、茶、台灣、罐裝果汁、紙包飲品、自家製奶茶、自家製茶飲等，另一邊還有兩款熱飲任君選擇。拎咗一支自家製白桃烏龍茶和熱洛神花茶，可有助消滯解膩。甜品有雪糕、冰條、雪糕批等，冰凍甜美，作為火鍋後甜品就最適合。…Read More

身邊大部分朋友都去過啟德體育園，但我還未喎……就趁今日同老公一齊放假，要到此一遊，仲要去晒三個零售館食玩買，yeah! 真係好靚的建築物，讚！三個零售館都有很多食肆選擇，老公就俾這間疏乎里班戟吸引了。餐廳環境舒適優雅，闊落嘅卡座，柔和的燈光，好舒服寫意。平日有午餐，另有一些單點菜式，如全日食、漢堡、沙律、薄餅、薯條、甜品、飲品等。老公想食漢堡，單點了一份安格斯牛肉芝士漢堡配波士頓龍蝦及檸檬牛油汁（$228），賣相很吸引！巨型的漢堡夾着一塊厚厚嘅安格斯牛肉、半溶嘅芝士、清新嘅蕃茄片和生菜，配上千島醬和秘製醬料，配搭美味！安格斯肉鮮嫩多汁，煎得香口，帶點焦香，亦有濃郁嘅肉香，優質！波士頓龍蝦彈牙鮮嫩，還有不少甘香嘅龍蝦膏，蘸些檸檬牛油汁，不錯！我就點了一份午餐，包餐湯/是日沙律、主菜、甜品和餐飲，滿足！是日沙律（$0/跟餐）很新鮮清新，有沙律菜、羽衣甘藍、青瓜和車厘茄，仲配了甜美多汁嘅哈蜜瓜。奇尊蝦肉香草蕃茄汁手工闊麵（$138）面排了六大隻蝦仁，賣相好吸睛。手工製作的闊麵口感彈牙，沾滿蕃茄汁，還有鮮活嘅番茄肉，啖啖都滿有濃郁的番茄香。蝦肉鮮嫩彈牙，搭配上香草和辣粉，香辣惹味。甜品係窩夫配雪糕（$0/跟餐），窩夫外香脆內鬆軟，配上一球冰凍香甜嘅雲尼拿雪糕，簡單而美味嘅配搭，作為飯後甜品好滿足！Mocha (+$10 /跟餐）拉花圖案好清晰，無粗泡，靚！陣陣咖啡香，入口溫暖細滑，咖啡和可可互相融合，滿意！百香果烏龍茶（$42）足足有兩杯。清新可口，甘香嘅烏龍茶配上酸甜百香果的酸甜。茶香濃郁，百香果味淡淡，可解渴去膩！Matcha Cream Pancake （$122）的確重量級，兩大塊厚班戟震動着，好輕盈呀！頂頭塗滿抹茶忌廉醬，加了些脆米，旁邊還伴着Q彈嘅抹茶蕨餅、甜美嘅紅豆和新鮮嘅雜莓，賣相一流！班戟好鬆軟，仲好有蛋香，老公超讚。最驚喜係中間還流出抹茶醬，加埋面頭嘅厚厚嘅抹茶忌廉，全件都充滿抹茶嘅甘香，仲有回甘，抹茶迷必滿意，大讚！食飽飽之後，我哋仲去咗碌保齡，你哋睇下嗰賽果，我….唉….雖然落後很多，但今日食得開心，玩得開心，滿足的一天。…Read More

今日去鰂魚涌上堂，上堂前當然要醫肚。行到太古坊，見到間素食cafe，環境清靜，地方光鮮，坐得舒適，感覺輕鬆自在，自助形式，簡單方便。菜式很有特色，有沙律碗、酸麵團麵包卷、漢堡、小食、甜品、飲品等等….點了Sourdough Flatbread：Banyan（$68），以柔韌的酸種薄面餅捲著香口嘅烤天貝、腍嫩嘅茄子、清新嘅番茄片、清爽嘅紫椰菜絲、烤大蒜、幼滑嘅鷹嘴豆泥，口感豐富，再配酸香嘅安巴醬，配搭有益美味。特別一提，餐紙上印了吃餅卷嘅方法，真貼心！升級套餐（+$50）有湯和飲品。今日係Pumpkin Soup，熱度十足，質感濃稠綿滑，加了些香草和蔥花，味道濃郁甜美，還加了些脆餅，浸至半腍，口感吸引。Turmeric Latte又稱「黃金牛奶」，據說有止痛、消炎、益肝、消脂、護膚等功效。味道香，口感滑，加了少許黑胡椒，這組合具有強效抗炎作用，完美嘅配搭，好好喝！…Read More

今日去完灣仔素食展就在灣仔搵食。要悠閒就當然要去cafe。行下行下，見到間白色嘅咖啡店，感覺好舒服呀！環境光鮮企理，原來係間新店。燈光柔和，薄荷綠和白色嘅配搭，感覺自然明亮，有數張二人枱，坐得舒適。自選滋味套餐（$288）可有前菜、薄餅/意麵和甜品各一。前菜：和風凱撒沙律 賣相一流！沙律菜非常新鮮清爽，配上香脆嘅多士粒、鹹香嘅芝士碎、清新嘅苜宿芽，再灑了櫻花蝦，添上日式風味，加埋適量嘅凱撒沙律醬，味道美味！熟火腿薄餅 同樣賣相吸引，餅底脆卜卜，正！配了香草番茄醬、爽口嘅雜菌、鹹香嘅芝士、柔軟香嫩嘅熟火腿，一口咬落去….滿足！甜品：蘋果批 批底濕潤，蘋果片腍嫩，味道香甜。…Read More

今晚同老公食新加坡菜，好耐無食過啦! 餐店環境舒適，燈光柔和，有多張四人枱，亦有卡座，簡約企理。餐牌清晰，有午/晚餐、二/四人餐、湯、菜類、小食、飲品、甜品等等，選擇唔少。二人餐（$218）最岩我地，有兩款主食、兩款小食和兩杯飲品。我揀海鮮喇沙，熱辣辣，香噴噴，滿滿一大碗，好吸引呀！泥黃色嘅喇沙湯底夠濃厚，有些椰香，亦香辣，味道香濃。麵底有米粉和瀨粉，又滑又彈，掛湯力強，入晒味好滋味! 海鮮有鮮蝦，彈牙鮮美；手打魚片好彈，有魚鮮；豆卜索晒湯汁，一咬就爆出湯汁，好入味；大大隻嘅帆立貝鮮嫩美味；仲有半隻好靚嘅熟蛋。老公揀隨心海南雞飯(無骨淨脾+$10)，推介！雞皮爽，肉鮮嫩，食落鮮香油潤，仲要啖啖肉，完全無骨，正！三款醬料有薑蓉、辣醬和黑醬油，各有不同風味。雞飯粒粒分明，好有油香；雞湯香濃！烏達($0/跟餐4件) 係魚肉泥與各種香料混合，用亞答葉包裹着烘烤，食落腍嫩，滿有香料味，辣辣地，好有風味。雞絲木瓜沙律($0/跟餐) 入口涼涼地，用料有青木瓜絲、紅蘿蔔絲、沙律菜和車厘茄，相當清爽，加埋嫩滑嘅雞絲，拌入泰式酸辣汁，又豐富又香辣醒胃！熱檸檬薏米水($0/跟餐) 有檸檬嘅清新，甜度剛好，薏米煲至軟身，出晒味，當然要飲晒食晒啦! 杞子雞湯 ($0/跟餐) 好有雞香，香甜美味，唔鹹唔油，好好飲！…Read More

今日睇完中醫已經好夜，有藉口做「無飯」主婦，叫老公一齊係附近食。老公見商場有新店，就話要試。餐店新淨企理，環境光猛，開放式門口，好闊落。裏面有唔少座位，整齊舒適。選擇類別多，有炒粉麵、焗飯、意大利麵/飯西式燴飯、印度咖喱、鐵板、薄餅、輕盈小食、沙律等。我地都好耐無食過鐵板，兒時回憶….鐵板餐配餐湯、多士和熱飲。我地都揀羅宋湯（$0/跟餐），暖笠笠上枱，味道香濃，酸酸地有啲辣，好惹味！仲有好多蔬菜，用料好足，多飲又好食，喜歡！餐湯配牛油厚多士（$0/跟餐），香口軟熟，塗滿牛油，啖啖鹹香。餐飲揀咗熱柚子蜜和檸蜜（$0/跟餐），兩杯都落足料，酸酸甜甜，好滋潤。老公大食，要工房經典鐵板美式雜扒配意粉（$108），有齊豬扒、 牛扒、雞扒、 香草豬肉腸和煙肉，全部肉肉肉，疊到高高高，大滿足！豐富飽肚之選。先淋上燒汁，「喳喳」聲係鐵板餐嘅標記….. 意粉唔會太乾身，配上燒汁，鹹香美味。各款扒類都啖啖肉，肉嫩鹹香，仲有啲焦香，特別鍾意牛扒和雞扒。我要咗鐵板香煎蘇格蘭三文魚拼意式扒雜菜配薯菜和蒜蓉汁（$93 ），全個焗薯好粉綿，有薯香。三文魚煎至皮脆肉嫩，有魚油香，幾肥美，質素不錯。雜菜都幾多款，有翠肉瓜、茄子、番茄、西蘭花等，新鮮爽嫩。另要碟大蝦凱撒雜菜沙律拌脆炸巴馬火腿（$68），色彩吸引。大蝦沾粉香煎，微脆彈牙；雜菜沙律新鮮爽嫩，配上凱撒醬更好味，唯一是脆炸巴馬火腿乾硬了一點……Read More

今晚同同事食聖誕飯，佢知我鍾意食魚，所以帶咗我去觀塘工廈食鱔，仲要係特色製作，正！店子簡約舒適，座位整齊，環境企理。有數款飯類，另加錢可追加小食和飲品。鱔有蒸、灼和炸選擇，配搭不同口味，如蜜餞、韓式、日本芥末醬、豉汁等。朋友點蜜餞炸鮮鱔球飯配糖心蛋半隻轉蕎麥麵（$86+$10），冷蕎麥麵口感佳，蘸些泠麵汁，再拌勻隻香滑溏心蛋就更得！炸鮮鱔球炸得黃金靚仔，香脆不油膩，外層甜甜地，內爽嫩鮮美，非常味美！我要大盛花椒醬油汁鮮白鱔片飯轉麻醬花椒皮蛋伴烏冬（$68+$30+$23），份量十足，大滿足！鱔片薄身爽嫩，蒸得剛好。味道鮮味，配了花椒醬油汁，辣辣地，好惹味！麻醬花椒皮蛋伴烏冬相當大碗，皮蛋黏滑甘香；烏冬彈牙，每條都沾滿花椒麻醬，有些芝麻香，亦麻麻辣辣，仲越食越火辣，好過癮！小食係白灼秋葵秘製蔥油汁($24)翠緣爽嫩，配上蔥油汁，鹹香美味。…Read More

仲有唔夠一個月就聖誕，是時候約朋友開始食聖誕飯，今日大家約咗去食放題，因為大家都有一段時間沒有放肆地食。餐店環境光猛，地方非常闊落，有多行卡位和長梳化座，所有卡位都好寬敞，坐得好舒適。自助區和飲品區都集中在中間，夠方便。我地揀咗晚巿放題特價時段，係由5:30pm-7:30pm，成人($268+10%/位)可任飲任食2小時，時間充足。飲品雪櫃超大，有不同牌子的茶、泡茶、汽水、果汁、紙包飲品、自家製食品、清酒和梅酒等，還有熱飲、熱茶、熱咖啡、朱古力等，超多選擇。百香果茶：酸酸甜甜，好開胃；美祿咖啡：少甜甘苦，提神一流。自助區食品冷盤小食有生果、味付螺肉、麻辣雞腎、沙律菜、熟青口、凍熟蝦、中華沙律等；熱食有酸菜魚、豉汁蒸鱔、炸丸子、紫米椰汁糖水、草蟲花雞湯等等。中華沙律、柚子白蘿蔔：爽口入味，好味!豉汁蒸鱔：又滑又肥美，仲好入味；酸菜魚：好味，魚肉滑溜，酸酸辣辣，兩款都要再encore次；點心：蝦餃好足料，大大隻鮮爽蝦仁；燒賣好有鮮肉香，得!QRcode 落單啦! 按類別點了以下食品：刺身赤蝦：大大隻，好鮮甜，微爽黏滑；帶子：柔軟鮮甜；油甘魚：爽口，滿有魚油香；希靈魚：啖啖爽脆，鮮甜美味。火炙壽司芝士鰻魚玉子燒：配搭好吸引，口感味道都好豐富；火炙三文魚腩、醬燒火炙左口裙邊：經燒後，油香滿舖，肉質油潤柔軟；燒鹽醬和牛肩胛：甘香油潤，半生熟狀，好嫩滑，又有牛香。壽司、手卷海膽手卷和海膽吞拿魚蓉油甘魚腩壽司：必食! 海膽色澤鮮橙亮麗，入口稍稍甘甜，油潤豐膄。燒物川燒珍寶鮮蠔燒： 大大隻，味道鹹香惹味，必食再點推介。西京燒比目魚：魚油香十足，油潤嫩滑，必食! 北海道黃金醬燒扇貝：熱辣辣，香噴噴，芝士焗至金黃，配咗黃金醬味道鹹香，同肥美扇貝同吃，正!法式香草燒羊架：燒得焦香，啖啖肉汁，羊肉味香濃，肉嫩油潤，推介!蒲燒鰻魚：腍嫩肥厚，沾滿鰻魚汁，甜甜地，不錯!燒新鮮菠蘿：微暖，超香甜多汁，相當新鮮。一品料理生拆蟹肉竹笙蝦滑扒豆苗：熱辣辣，豆苗翠綠爽嫩，仲有蟹香；竹笙釀了鮮味彈牙的蝦滑，好好食，要再來多碟。甜品選擇唔少，有雪糕杯、甜筒、冰條、小蛋糕、馬卡龍、布丁、啫喱、豆腐花等。軟雪糕：蜜瓜味突出，甜美香滑；雪糕批：韓國品牌，甜美雪糕加咗脆薄朱古力，喜歡!…Read More