yufung's Profile

今晚同女友家一行十人去左東記食雞煲魚煲，一去到已經聞到其他客人個雞煲勁香，我地緊係諗都唔諗，點左雞魚各一先再慢慢諗配料啦先到的係雞煲，今晚因為uncle喉嚨唔舒服，所以點左唔麻唔辣，本身都驚會無乜味，點知食落有驚喜！個醬食落甜甜地，好正！跟手上呢個魚煲先正呀～～ 個湯底勁似西餐的蕃茄湯底，唔係就咁清湯加蕃茄就算數，條魚煎得剛剛好，呢個真係一食就上癮配料無逐樣影啦，因為有好多（其實係掛住食），特別推介三樣個人覺得必點的：本地牛：肉本身夠鮮，滾過左火都唔會覺得肉質太老，味道好鯇魚腩脆片：其實我本身唔係街食呢樣野，因為多數唔夠新鮮。不過既然女友家人點左，就試一試，哈，一食上癮，新鮮爽脆，必食烏東：個烏東其實唔係重點，重點係你用個蕃茄魚湯滾熟左個烏東，好味到呢...總結係上水終於有間美味雞煲魚煲，以後又可以繼續增肥…Read More

今日跟阿頭黎左呢度食飯，佢有兩個價錢的set lunch-40同70。今日阿頭點左40蚊的烤雞肉午餐，我點左70蚊的韓式石鍋什錦飯。三碟配菜同碗(湯?)上左先，湯其實是一碗胡椒水，至於三碟配菜味道都很淡，泡茶食落連少許辣味都沒有。阿頭個飯到先，我無影相，但40蚊得幾片雞肉、煎蛋同白飯，真係好弱，阿頭話以前士氣低落會點呢個飯，因為食落都覺得自己慘。我個石鍋飯黎到，阿珠媽拎埋辣醬來加，我唔中意食辣，不過都加左d，始終石鍋飯都係要有小小辣。味道其實唔錯，不過真係得好小好小肉，我唔知係以前食的唔正宗，定呢度太孤寒呢？下次除非我打算食40蚊飯，如果唔係都唔會過來了～…Read More

本來打算過海去天后一帶覓食，不過最後都係改左目的地，去新開的Page One朝聖。一來自己係pageone常客，二來知道有自家品牌餐廳Forestry同埋法國Rose Bakery加盟，實在非去不可。Rose Bakery位於Page One的二樓，入到Page One上電梯右手邊就係Rose Bakery，設計採用簡單金屬風格。全店大約40個座位，枱櫈都係用金屬材料，女友覺得張櫈唔好坐（我覺得還好）今次我地食左兩樣野，第一樣係bacon quiche，餡料有芝士、煙肉、蕃茄、紅黃椒，味道配搭得很好，外皮雖然做得略硬，但因為餡料做得比較濕，兩樣夾埋食，味道口感都一流另一樣係lemon cheese cake，檸檬味與芝士味平衡得很好，蛋糕質地很好，餅底略嫌太硬。有一樣非讚不可，就是份量超大，兩個人下午茶share一件應該很足夠。可能因為剛開幕兩天的關係，侍應明顯不熟識餐廳提供的食物，有待改進。另外，埋單果陣，我用信用卡付錢，後來侍應發現暫時不接受信用卡，回來時竟把卡放回桌上。我想提醒，這是非常不禮貌的，我把卡交到你手，你也應還到我手，不是就這樣放回枱上的。以後有機會，還是會來，希望到時服務可更好。…Read More

選擇餐廳時，俾朋友點破左我次次都係拉麵優先，事實上我都係，要百元左右享用一頓美食，拉麵似乎是一個最好選擇。今日選擇左朋友工作地點附近的拉麵Jo，因為我請左假去參加活動，所以提早到左拉麵店。入去果陣，店員客氣地告訴我，若我朋友於店鋪坐滿後還未到，就要讓回座位。我個人覺得呢個要求好合理，都欣然接受左。（好彩到我朋友來時，鋪內只有七名顧客）點麵紙上共有六個選擇，比較特別的材料是木魚粉和京蔥。我個人比較喜歡吃粗麵，所以今次點了用上粗麵的味噌拉麵，加多隻半熟蛋。拉麵送到，當然第一時間嘗嘗半熟蛋，咬開，失望，因為隻蛋絕對係一隻全熟蛋:(。跟手試試個湯頭，不錯，屬於重口味的湯頭，但不會覺得油膩，肉味非常濃郁。叉燒比較特別，用上了肥瘦分明的腩肉，可惜口感做得不好，因為瘦肉部分明顯過老身。至於其他配料和麵條只屬一般，不花文筆多介紹了。…Read More

今日係銅鑼灣散完步，打算由銅鑼灣一直兜落炮台山，睇睇有無新食店可以幫襯下。第一站就發現左ice pop! 成個門面一睇就知係賣份子雪糕，因為同大坑某雪糕店的設計幾乎一樣。店內座位不少，全部都係high chair，枱邊有插頭，顧客可以用黎叉下電。店面除了雪糕，尚有其他甜品，賣相都唔錯。今次我試左杯伯爵珍珠奶茶雪糕，首先買的時候，兩位店員愛理不理，一直討論銅鑼灣的佔領運動可能令佢地無車回家。另外，店內正進行推廣，用Instagram影相再upload 就會送張贈卷，可免費換一杯雪糕，縱使收銀機旁放置左一大壘傳單，但店員卻無意給我一張。買完雪糕後，可能人少關係，不用30秒我就有雪糕，但因為預先整好的關係，我拿到雪糕後，在店內影左張相，杯底已溶了一灘，以份子雪糕來說，應算溶得太快。至於味道，實在無可挑剔，我自己本身很愛伯爵茶，這杯雪糕的味道是最基本的伯爵茶味，說基本，不代表不好，事實上我嘗過很多伯爵茶雪糕，根本不能稱為有伯爵茶味的。配上珍珠增加口感，實在很好味。總括來講，味道及店鋪裝修都很好，唯獨員工的服務態度真的有待改進。我的贈卷已轉送朋友，因為對我來說，食物質素與員工態度，實在缺一不可。…Read More

最近無聊㩒openrice，睇下自己住的粉嶺區有乜新食店，發現左糖明皇呢間新甜品鋪。雖然係聯和墟有d遠，不過食飽當散步行過去嘆個甜品，其實都唔錯，感覺燒返d卡路里。去到門口，感覺係估唔到間鋪咁細，坐得七個人，不過可能新開張，人流唔算旺，唔洗等就有位。坐低後，甜品師父就開始介紹佢地d特色甜品，今次我地點左Floating Island 同芥辣心太軟。首先上場的是Floating Island，中間有個用蛋白打成的浮島，師父提議我地先淋上大量呍喱嗱汁，再配以另上的朱古力粒，可能我們灑上的朱古力太少，第一啖感覺好味，但不特別。師父話重點係第二啖，叫我們配以碟邊炒過的榛子食用。果然，經炒的榛子帶少許咸味，配上甜甜的呍喱嗱蛋白，的確變得層次豐富，但係又食得出每種味道。由於甜品的味道較輕身，實在很適合女仔。呢個芥辣心太軟實在喜出望外！首先入口係濃濃的朱古力味；中段由芥辣混和朱古力接力，既不辣亦不甜，有香辛料的味道；最後朱古力味伴隨芥辣的刺激一齊攻返上個鼻。下個星期又要搵日行過來試其他~~…Read More

發覺自己有時真係幾懶, 明明次次食飯都有影低相, 預備食食評, 結果到宜家都只係得幾篇= =. 同埋幾乎寫親都係好食果d(除左一間, 果間真係超差, 想知邊間可以睇番我之前寫果d).上個星期日入左白泥釣魚, 不斷落雨, 結果零漁獲:(. 好彩大榮華都無令我失望~ 七點半左右去到大榮華, 是夜竟然不需等位就直接入座, 一個好開始的晚餐.總共6個人, 叫左1羮8餸+馬拉糕. 飽到差小小反肚. 未講野食, 就要先讚一讚果度d侍應, 服務非常之好, 真係我加左唔小分.講番食物,栗米魚肚羮 - 唔計阿媽整的, 呢個係我試過最正的. 如果你平時都喜歡, 必試!! 乳香酥炸鱔球 - 我怕鱔多骨,所以無試, 不過呢碟餸都俾我d朋友清晒, 應該唔差.香茜燒米鴨 - 阿姐強烈推薦, 我自己覺得, "ok la".圍頭五味雞 - 好咪, 隻雞d肉好嫩, 不過我自己就只係食到豉油味, 究竟其實有邊五味呢? 拖地叉燒 - 肥瘦適中, 不過食落好似老左小小鳳凰蟹肉炒長遠 - 又係阿姐強烈推薦, 不過食落普普通通, 唔算特別好食炸軟殼蟹 - 呢個整得好油, 唔好食, 勁唔好食 :(:(鹵水拚盤(豆腐&蛋) - 真係好入味, 所以覺得咸左少少豬油撈飯 - 第一次撈, 所以整得太咸, 我自己就唔太中意豬油味啦 奶皇馬拉糕 - 好好好好好味呀, 必食!!!!下次有機會要再係茶市時間黎一次, 食下佢d點心!…Read More

細個果陣住元朗已經成日食, 早兩日襯住有假就去左元朗重溫味道. 頭先預備打食評的時候, 先看了一下其他食家的睇法, 發現近來的評分不斷下滑, 我自己的看法實在有些不同.先從態度講起, 我自己覺得是正正常常的, 同其他麵店沒有太大出入. 唔會出現催人走的情況, 不過阿姐們對遲遲不落單的朋友是欠缺了一點耐性. 不過, 應該都不可以怪她們吧, 選擇這麼少都決定不了, 難免令人感到不耐煩.味度方面, 牛丸非常爽滑, 牛的味道剛剛好, 唔會出現酥味. 牛腩亦夠淋, 如果牛根可以爽一點會更好! 提醒其他會去嘗試的朋友, 如果你特別喜好牛腩或牛根, 可於落單的時候講明多腩或多根的.最後, 19蚊一碗麵, 其實偏貴的, 不過我自己覺得值. 你如果要去元朗做野, 或者去影相, 又或者去濕地公園後, 絕對應順道來這裡嘗一嘗這碗麵.P.S. openrice提供的鋪頭相片, 應該是另一分店的…Read More

近日買左一本蔡姓食家的新書, 有frd話佢的介紹唔錯, 有d就話唔得, 所以都係打算自己親口試一試~ 今日選左麵棧, 原因係佢主打我鄉下"山東"的麵食.裝修來說, 算是正正常常, 不會有太窄的感覺, 以一間麵店來說, 屬正常佈置, 亦算整潔.員工方面, 態度算好, 唯落錯單的情況頗常見, 亦會有漏單的情況發生, 執枱的速度亦略為慢.好, 到最重要的食物方面, 是晚叫左4樣食物+2杯豆漿肥佬炸醬麵($26) - 據說係獨家, 食落同細個食的味道唔同, d肉醬唔算好好味, 不過d麵條就真係整得幾好味~秘制羊肉面($30) - 羊肉整得幾好, 唔會酥, 亦夠淋, 份量適中, 喜愛食羊肉的人, 應該一試綠茶白肉($20) - 餐牌上沒有的, 茶味清淡, 肉質爽口, 值得一食蘿蔔煎餃($19) - 淡而無味, 無甚特別總括來說, 我自己頗喜歡此店的, 因為佢碗羊肉麵好食p.s. 蔡姓食家書中話, 芹菜餃好味, 大家有緣可以試一試~…Read More

是日同幾個朋友去左元朗影相兼食野, 係濕地公園影完相就落番元朗, 打算食番個炒冰解下溫~ 點知一點半到左先發現原來兩點半先開門~所以去左食個面先番黎~講番正題~ 甜品鋪本身裝修無乜特別, 正正常常, 可能佢一開門, 我地就到, 所以座位都好闊落. 可能因為剛開鋪, 所以果日等候甜品的時間都有d耐, 不過都係好事, 證明係即炒~我果一行4人叫左4樣野,芒果士多啤利炒冰 - 好有芒果味~好正:), 感覺其實有d似雪芭, 夏天食, 真係正到震. 因為我地去的時候無乜人, 老細仲俾我地自己落手炒兩下玩下~榴槤炒冰 - 榴槤味唔夠重, 不過都係勝在夏天食冰, 一定覺得好涼, 所以都覺得好食~~芒果腸粉 - 100分的甜品~ 芒果夠甜, 腸粉夠味, 夠薄. 配合得天衣無縫~ 正腐竹白果雞蛋糖水 - 無食, 亦唔係呢個店的賣點, 朋友食落都應該正常, 無特別總括來說, 呢間甜品店係值得一去再去的, 一來香港好似無同類型的甜品店, 二來炒冰睇落好辛苦, 但係老闆少完都仲好有笑容咁同我地傾計, 令我覺得佢對間鋪好有心!!…Read More

其實我公間就係九記附近, 成日經過都無食過, 今日同同事諗唔到食乜好, 終於試左先講下個環境, 我覺得都尚算整潔, 座位都唔算迫得太埋~ 侍應的態度算正正常常, 無可無不可~至於食物方面, 我叫左個爽腩面, 我同事叫左個片頭腩面. 佢的爽腩絕對有資格用個爽字, 就咁睇好似肥肥地, 但係入口唔會覺得好油, 肥膏的位置, 一咬即斷開. 個湯頭都唔錯, 總括來說, 係一碗好食的爽腩面! btw, 佢舊的蘿蔔都幾好食~~睇其他人的食評寫佢個海南雞飯, 都好似寫得唔錯, 既然離得公司咁近, 下次都無理由唔試一試~~:)…Read More

本身係果附近番工, 成日經過都見有幾個人好落力咁promote, 咁今日講個frd講野, 就打算去試下啦, 結果真係失望到爆!!平心而論, 環境係幾好的, 但係由食物到侍應態度, 都差得無話可說. 首先, 落單果陣, 個Waiter, 已經好似審犯咁問我地要乜, 跟乜, 飲乜, 但係我地坐左陣, 我發覺我地受到的待遇算好, 旁邊有一台客, 問扒餐有無得跟飯, waiter好兇咁, 講左一個字 "無", 再另有一台客, 中年女士, 佢問個waiter 48加一即是幾多錢, waiter答 "唔識", 即刻就行開左.. 我聽到, 啞晒!!好, 落完單, 等野食來之前, 佢就埋黎放餐具啦, 餐具唔太乾淨都算啦, 隻叉直頭有食物殘渣囉, 我叫個waiter換, 本身佢肯換, 我都無乜野, 之後佢俾番我的方法真係o咀, 佢企係我左後面, 將支叉由我的臉外10cm, 遞俾我, 我真係想知, 佢有無學過應該點樣將餐具俾客人到講食物, 首先, 75蚊一餐, 真係唔平, 個湯細碗之餘, 仲要無得選, 人人都係紅湯, 大佬呀, 你知唔知有人唔飲紅湯架! 我叫左個豬手食, 佢隻豬手應該好新鮮斬落黎, 勁多手囉, 最後到杯檸水, 我好彩今晚無叫小甜, 佢果杯比起我平時叫小飲, 更加淡.我對呢間餐廳的結論係, 唔好行入去, 去過好多地方食野, 通常都總有d可取之處, 我敢講, 呢間, 一樣都無!!!!…Read More

夜晚成日經過呢度都好多人, 今日難得7點左右經過, 所以就趁機試下~總共叫左4樣野-蘆薈山手線 - 黃色的果凍條食得出有芒果味唔錯, 綠色就食唔出任何味道咖啡仔 - 好濃的咖啡味,一層奶凍一層果凍咁疊埋一齊,口感唔錯海底椰目黑 - 我自己對涼粉無乜興趣, 食落普通木糠豆腐布丁 - 唔似傳統的木糠布丁. 呢個唔係硬身的, 質地好似豆腐花, 好有豆腐味,good!!下次有機會再試下佢其他甜品.btw, 好想知點解呢間店的老闆會用咁多日本名, 係貪得意, 定係佢好中意日本ge野呢~…Read More