ArShanNg's Profile

今晚係葵青劇院度睇劇，睇劇之前當然要開返餐好㗎啦，本身諗住去葵廣或者新都會廣場食個晚飯就算，男朋友提議不如去葵青劇院入邊嘅牧羊少年館度試吓啦，於是就行過去試吓啦！本身係食晚市，佢六點鐘就開始，佢有分戶外及室內，我哋揀咗室內，不過要等位，大概等左5分鐘到就有位啦，室內環境好寧靜，擺設好靚，我知道本身呢個餐廳嘅老闆係以旅行做主題，餐廳入邊都擺咗好多唔同地方嘅特色裝置，亦都有一個書架，相信係歡迎客人可以飲住杯咖啡睇住本書，好悠閑咁過一個下午。我哋叫咗個二人餐，分別包小食一款，主食兩款，是日芝士餅，同埋飲品兩杯。小食我哋叫咗墨魚丸配波波腸，賣相唔錯，每人都可以食到三至四粒，波波腸同墨魚丸鋪左蜜糖，食落更加嘢味！主食就叫左一個黑松露雜菌意粉,同埋一個芝士魚子意粉,個人覺得雜菌意粉比較乾身同埋味道較啖,反而非常鍾意芝士魚子意粉,好香芝士味,同埋魚子係粒粒都咁大粒,男朋友都鍾意食呢個魚子意粉d,大家可以考慮吓揀魚子意粉!兩碟意粉份量適中,都係可以食得飽!食到咁上下，就叫侍應上埋是日芝士餅，相信餐入邊包埋嘅芝士餅比單點細件，不過我就覺得啱啱好，芝士餅普通，不過包埋餐嘅就唔好咁多要求啦！另外我再叫左個蘋果玉桂花茶，男朋友就叫咗個朱古力沙冰，個人覺得花茶味道比較淡，唔知係唔係因為本身隻茶係咁嘅味，反而男朋友就好鍾意佢個朱古力沙冰！總括而言，因為餐廳唔係喺商場入邊，係葵青劇院入邊，人流相對比較少，相信坐戶外地方都唔會太嘈，個人覺得呢間餐廳可以提供一個舒適嘅地方比客人用膳，或者睇書都係一個不錯的選擇！…Read More

喺附近工作接近六年都冇嚟過呢間餐廳食飯，今日同事就提議不如去食咖喱，我本身個人好少食，因為每次食咖喱之後都會痾，但係難得同事誠意拳拳的邀請，就即管一試。我哋差唔多兩點先入餐廳，所以一入去即刻有位，餐廳佈置好靚，牆上掛咗好多印度特色嘅嘢，入到去就好似去咗外國咁，非常特別！雖然遲入咗，但仍然有午餐餐牌，我哋一行五個人叫咗五個餐一齊食，叫咗咖喱牛腩，牛脷，雞，仲有兩個雞串，另外三個要餡餅，兩個要白飯，大家同事一齊開心share !每人先黎一個湯，個湯本身有少少黑椒，好開胃，好快嘢食就上到嚟啦，睇落份量適中，餡餅係超級好食，熱辣辣，佢係最常食，亦都係最難整，嗰個同事都爭住食餡餅，又大塊有香！個人再推薦咖喱牛脷，啖啖肉之餘，個咖喱汁有香有林，但又唔會太辣，不好辣的朋友可以叫呢個，另外見到好多人都推介雞串，都整得唔錯，雞身夠林，再次上檸檬汁更能帶出香味，咖喱牛腩同雞都唔錯，好值得推介！我哋一行五個人因為已經遲食飯，再加上真係好好食，大約半個鐘已經清枱，非常正！深井難得有一間真係好食嘅餐廳，如果鍾意食咖喱嘅朋友切勿錯過！…Read More

深井附近去來去去都係幾間餐廳，今日食咗間日本野，似係家庭式嘅經營，聽街坊講呢間餐廳已經好多年，雖然附近一直都有不同嘅競爭對手，但係佢仍然係深井留得最來的一間餐廳。晚市同午市都係同一個餐牌，款式都算多，有飯餐，烏冬，拉麵，蕎麥面，仲有刺身同埋唔同款嘅小食，選擇都算多，今日就叫咗個流心豬餅白汁撈烏冬，再用半價價錢叫咗杯紫薯奶，其實佢嘅烏冬幾彈牙，白汁亦都教得唔錯，唔會太鹹，可惜份量太少，個豬餅其實真係可以做到流心，不過太細件，烏冬份量亦都太少，對於我咁大食嘅人，真係唔多夠飽，紫薯奶都係好好飲，夠濃夠香，埋單最後60幾蚊，雖然而家普遍餐廳嘅價錢都係咁上下，但係如果份量太少嘅話，性價比相對比較低。再望過下小食，薯餅一件都要＄14 ,薯波＄12兩件，價錢有點偏貴，雖然係咁，可能係區內唯一一間日本野，所以萬事客人都唔少，但係如果再嚟食的話，我都要再考慮下！…Read More

咁岩喺附近做嘢，食埋飯先至返公司，咁啱見到個門面有一個好得意嘅BB公仔 ,再望埋個鋪頭名係Pizza baby,見到都係40幾蚊一個lunch ,都幾抵食，就行咗入去啦！餐廳成個佈置都係用咗粉紅色再加上好多唔同嘅BB裝飾，譬如奶嘴，粉紅色嘅旗仔等等，玩味十足！我叫咗個白汁焗吞拿魚粟米火腿意粉，雖然我知道呢間係做Pizza ,但係想食意粉，所以就叫左呢個，佢連餐具都係好特別，亦都係粉紅色，嘢食賣相唔錯，可惜份量少得滯，對於我呢啲咁大食嘅人呢，得個碟大但係份量太少呢，就真係差啲啦，我寧願俾貴少少，份量多少少，上埋杯熱檸水，個茶杯都係用粉紅色心心杯載住嘅，感覺好少女feel呀！而每一個餐都會送湯，今日係羅宋湯，酸味十足，我鍾意！夠開胃！總括而言，我估呢間餐廳係做街坊生意嘅，見到都有唔少街坊落嚟幫襯，既然佢出嚟係做Pizza ,我都要搵日入嚟食飯一次Pizza先！…Read More

早前聽同事講，話呢間餐廳出咗個好抵食嘅午餐，咁啱今日出嚟食飯，於是就同同事黎試啦，場地唔算大，最多可以容納到大約20人，我同同事喺午市嘅時間都要等大概10至15分鐘至有位，坐低左之後就睇睇個午餐牌，原來佢每一日都有指定嘅餐牌，大家嚟食嘅時候就留意吓啦！我叫左個雙併燒味飯，同事叫咗個排骨炒麵，因為佢係同隔離酒樓連住嘅，所以相信炒麵炒飯，都係隔離煮好之後送過嚟，燒味飯嘅叉燒同埋雞都好好食亦都好大份，我一個人都就嚟食唔晒，同事嘅排骨炒麵，賣相唔錯之餘仲好好食，如果鍾意食炒野嘅嘢食的話，呢間真係可以試一試！可能因為新開，所以佢推出左好多優惠，除咗午市大約＄50就有一個午餐之外，佢仲送咗每人一個灌湯餃，餐牌寫住價值＄30一個，但係當然唔好預係超好食，但送得比你嘅都算係好抵，另外嘢飲方便，奶茶咖啡不論是否凍飲都不用加錢，以深井區為例， 50幾蚊一個午餐，有飯，有灌湯餃，仲有凍野飲，都真係難搵，算係一個性價比高嘅午市地方…Read More

見到網上有人話呢間野好食，於是就同屋企人去試吓，呢度最推介嘅係食韓國嘢，個場都幾大，可能因為閑逸所以唔係好多人，我哋好快坐低左就睇下餐牌有咩嘢食嗌啦！睇咗一陣，都係叫返幾個網上都有推介嘅嘢食：蟹膏紫菜麻油拌飯，海軍八爪魚鮮貝鍋，泡菜腩肉飯卷同埋有個煎餅（唔記得咗名😂）先來麻油拌飯，上面有蟹肉，不過份量唔多，但配有蟹子、紫菜及麻油，撈完之後食落去都算幾香口嘅，但你唔好期望啖啖蟹肉。我哋一行四人，每人都分到一碗，個人覺得呢個試唔試都得。再嚟就係八爪魚扇貝鍋，海鮮種類算多，有扇貝、蜆、鮑魚、當然唔少得主角八爪魚啦！湯底好淡，好似係用啲鹽水溝開佢咁，海鮮一般，湯底亦帶唔出海鮮嘅鮮味！覺得有點晒，如果個湯底做得好少少，成個鍋應該好食好多！之後再上嘅係泡菜腩肉飯卷，呢個係好食嘅，泡菜唔算好辣，一般人都食得到，腩肉份量夠，亦都唔太油膩，值得一讚！ 再嚟個煎餅，入邊有少少蠔仔，但又唔似食潮州嘢嘅蠔餅咁油膩，呢個熱熱地食都算唔錯，可試！最後我哋仲見到隔離枱嘅炸雞咁靚，都整返份，叫咗個蜜糖炸雞，呢個都係好食嘅，蜜糖溝落去個炸雞度，熱辣辣又啖啖肉非常好味！…Read More

星期日喺附近做完嘢，就搵地方食晏啦，星期日預咗好多人，估唔到真係荃新天地都咁！鬼！多！人！，望來望去都係好想食日本野，於是就喺大戶屋同鳴門之間作決定，最後因為鳴門比較平，就決定食佢啦！星期日預咗等位，因為自己一個人食飯，所以都係等左大約10分鐘到就已經可以坐啦，一入到去就已經係同另外四個人一家大細搭枱，不過我都唔係好介意，諗住有個地方坐下食下，跟住就走啦。難得星期日餐廳都有午市套餐，有魚生飯有刺身有定食有烏冬有拉麵等等嘅套餐，選擇都算係多，價錢亦都有＄120至到60幾蚊都有，我就揀咗個番茄牛柳粒烏冬，個套餐包茶，三件壽司，仲有個糯米糍做甜品。落左單大概5分鐘之內就先上三件壽司，唔好期望壽司係好大舊同埋刺身會係好靚，你食得出佢真係斬頭斬尾咁整三件壽司俾你，不過唔緊要，食套餐就預咗係會咁，隔咗一陣已經上咗碗烏冬啦，個湯算係幾濃，牛柳粒都算多至少都有10粒左右，烏冬係好非常之彈牙。我相信係用稻庭烏冬做嘅。食到咁上下隔離嗰四個人就離開咗啦，點知突然之間嚟咗一家大細五個人，變相我真係三張枱裏邊唯一凸咗出嚟嗰個，明白午市時間人多要搭枱，但餐廳嘅做法令到更加好似想趕客，坐都坐唔舒服。除此之外，我碗面食唔夠一半，個侍應已經上埋糯米糍，需知道糯米糍係雪糕，會溶的，我即刻問左句：咁快就上？，不過個侍應最後都醒目咁講咗句：咁一陣間再上啦，令我覺得佢真係好趕客走喎！總括而言，嘢食唔係太差，不過服務真係可以改善下！…Read More

今日難得出到嚟青衣食下午茶，見到青衣城開咗第二期，就過去行吓睇吓有冇新餐廳啦，我同男友都想食傳統茶餐廳下午茶，竟然見到咁新嘅商場都有一間茶餐廳，咁就當然去試吓啦！裝修好新淨，位都好多，又唔會坐得好迫，舒舒服服坐咗係卡位度就睇吓餐牌有咩食，下午茶選擇都算多，大部份都係傳統嘅嘢食，我就毫不猶豫咁揀咗個花生醬西多士，因為出邊一般茶餐廳，西多士都真係只係西多士，但係佢入邊有講明係會有花生醬，就更加吸引我啦，男朋友就揀咗一個鹹牛肉煎蛋熱狗，我叫左杯熱飲，男友叫咗杯凍飲。好快就嘢食到啦，先來花生醬西多士，比我想像中大份， 一塊西多士都可以切到成12細舊，份量唔錯，可惜佢整得太燶，有啲黑黑地，未食就感到好乾同埋好油，雖然有牛油及蜜糖搭救，你都證明佢係熱辣辣咁上，但太燶，未免有啲失禮！至於男朋友嘅熱狗，佢個鹹牛肉煎蛋亦都係整得太燶啦，搞到個包好油好乾，所以男朋友都好勉強咁食晒佢😓最後唔知係唔係租金真係太貴，睇張單先至發現原來凍飲都要加＄5 ,比喺出邊茶餐廳都只係加＄3 ,感覺真係貴咗啲，仲要杯野唔係真係好大杯添，所以如果真係再嚟食呢間，都係要再諗諗😓…Read More

因為返工係深井附近，所以間唔中都會喺附近食飯，今日返夜晚更，所以夜晚就去咗附近嘅迦南鍋食魚湯米線，以往不嬲都覺得好怪，所以冇特登入去食。但經過同事嘅介紹，就不妨一試啦！夜晚沒有套餐，我同同事每人叫咗一碗米線，我叫左鮮魚湯海鮮米線，同事叫嘅係清酒海鮮米線，一上來，已經有好大陣鮮魚湯味，非常香，再望一望個碗，一邊有成十幾隻元貝，仲要係隻隻都有肉，唔會只係得個壳，開始食之前，先飲一啖清湯，一啖就真係食得出用鮮魚製成，非常香，淡淡鮮味，令人一開頭就即刻飲多幾啖，先至肯開始食，可見海鮮料好足，唔止有元貝，仲有蝦幾隻，米線煮得唔錯，唔會太林亦唔會太硬，味道啱啱好！可惜冇套餐，所以唔包野飲，但一碗60幾蚊嘅米線，有咁多海鮮了，都算係咁！…Read More

今日收工諗住去食泰國嘢，於是就行去小曼谷睇下有冇位，估唔到連平日都咁多人，要等位，但因為實在太肚餓啦，所以轉場去到附近嘅泰味軒。一入到泰味軒，竟然唔使等位，再望吓左右兩邊，啲人叫乜嘢食，見到不外乎泰國嘢嘅幾樣招牌菜：生菜包，菠蘿炒飯，蝦餅，馬拉盞炒通菜，於是我同阿媽兩個人就叫左呢四樣嘢啦！先來生菜包，係OpenRice見到好多人都推介呢個，份量都算多，特別係生菜都至少有八至九片，可惜肉碎太鹹，食咗一兩啖，已經要飲水，但辣味係夠既，個人覺得如果淡啲的話會更加開胃。再黎馬拉盞炒通菜，一上枱，我同阿媽兩個望一望，就知道個份量真係好少，普普通通，冇乜特別。之後就上蝦餅，分量亦都係太少，竟然係三個完整蝦餅切開一半， 40幾蚊食三件蝦餅，實在有啲過分，同樣都係普通冇乜特別。最後最唔好食嘅就係菠蘿炒飯，菠蘿還菠蘿，海鮮還海鮮，個飯完全冇味，我同阿媽一人畢左一次，已經唔想再畢第二次，我見到隔離啲枱，幾個人都食唔晒個飯。總括而言，小曼谷同佢地理位置咁相近，泰味軒嘅價錢仲要貴少少，但實在做唔到一分錢一分貨，難怪咁多人排小曼谷，真係有原因架，下次寧願都係食又平又抵嘅小曼谷仲好！…Read More

之前經過花墟買花，行過見到呢間鋪頭，裝修幾有文青氣氛，行咗入去望一望，發現主力賣糖水，之後諗住搵日你試試。今日又來花墟買花，終於有機會試吓啦！😍😍鋪頭買嘅貨品種類都幾多，成個鋪頭主題係以養生角度，配合食材，當中貨品包括羅漢果，梅子，柑桔嘅乾貨，仲有一個大雪櫃係賣不同種類嘅糖水（支裝）。👍🏻👍🏻再行入少少就有四張枱，原來一邊係有主餐、糖水、湯水出售，可以堂食，男友叫咗一個麵餐， ＄73包括有一個面，一碗糖水，仲有杯野飲（詳見圖片），我就叫咗一碗合桃露，成個餐牌，所有食物，都寫明佢哋嘅性質，同埋適合乜嘢體質嘅人食，當中亦包括每種食物嘅功效，資料詳細，等人哋揀嘅時候，可以考慮清楚，揀選適合自己嘅食物，感覺非常貼心！😘😘嘢食嚟啦：份量都幾多，個面主要都係用雜菌來做餸，感覺都幾清新， 而糖水都冇令人失望，感覺好足料，特別要提嘅係，合桃露入邊有一樣食物叫做桃膠，我估佢係將合桃提煉成膠狀嘅物體，男朋友個麵餐，糖水就揀咗芝麻糊，感覺唔會好稀，材料好足。☺️☺️最後男朋友個麵餐包嘢飲，佢揀咗羅漢果水，飲落去都好Flash ,飲完感覺好清新！😚😚一到食野一到聽住店入面嘅音樂，感覺就好似去咗台灣咁，可以慢慢食，慢慢享受入邊嘅環境，係下午嘅好地點！😝😝…Read More

與好朋友每月聚會，梗係要食好西啦！今日就去試咗汀蘭居樓下的自助餐餐廳，早前都試過，覺得唔錯，所以今次再encore !😋😋原本在OpenRice訂了晚上七點半，但因為早收工，所以早上打去改成六點半，原來OpenRice訂位可享有七折，但如果改時間就最多只可享有七五折😰， （原來OpenRice做七折只限於七點半之後） ，不過見唔係差好多，所以最後都決定改成六點半！🤨準時入場，可能因為閒日所以人數唔多，侍應安排我們坐喺近海🌊🌊的位置，觀景不錯！入到位，侍應已經準備好水，一放低野，當然即刻去巡視一下有咩好食啦，生蠔、魚生、刺身🥢🍣等等當然係唔少得，仲有唔少熱盤：包括黑松露薯蓉，比目魚，濃湯，菜等等等等，最近餐廳做緊三文魚主題，所以會另外有好多用三文魚做的菜色，例如焗三文魚、三文魚蓉撻、三文魚刺身等等，不論冷盤定係葉盤，選擇都算多，而且菜式都算靚，睇見都好想食！先來刺身，今日有八吞拿魚、三文魚、仲有一隻粉紅色的魚（唔記得左叫咩名😅），刺身幾靚三文魚好肥美，入口即溶，感覺不錯！ ！ ！再嚟就當然要來個生蠔啦，生蠔只有一款，因為本身唔食得多，食兩隻試少少，算肥美，但同行朋友有啲唔係太靚！可能係一隻隻，好睇過師傅俾咗邊隻你～再嚟食返熱盤暖下個胃先，個人非常推介比目魚，煮得好靚肉好滑，一啲都唔鞋，再嚟就係黑松露薯蓉，好夠黑松露味，最鍾意食黑松露的朋友必吃！😛 是一濃湯用咗三文魚來做，冇驚喜，是小小都好久！另外我每次食自助餐必食cold cut,但餐廳只有兩隻芝士，小小pama ham，冇乜驚喜！一件起，兩件止！最後整返個沙律🥗，食返啲菜先！提供羅馬生菜給其他不同菜款，配料選擇多，有瓜子蓉、麵包糠、三色椒、洋蔥、蕃茄、青瓜、仲有唔少得嘅芝士碎！同時亦提供不少類別的橄欖油、醋及沙律醬！客人可以按照自己份量，放入一個盤中，自己撈勻，再放上碟，完成！😝😝話說食甜品係另一個位，當然唔少得啦！餐廳主要提供多款唔同嘅小食糕點、我就試咗布尼蛋糕，蘋果批🍎， 甜品冇乜驚喜，同場加映有即整熱辣辣的pancake🥞 ,完成後可以加上唔同嘅topping和不同的醬，雪糕係movenpick,竟然有市面難買的乳酪味道🤤！仲有一個唔記得睇嘅，就係餐廳會每位客人送上一杯飲品，包括蘋果汁🥤、橙汁、啤酒🍻及汽水，因為餐廳只提供最基本的嘢飲係任攞，咖啡、☕️奶茶、檸檬茶及檸檬水！最後埋單，做了七五折，每人大約370幾蚊，呢個價可以食到生蠔、刺身，每期都有不同的主題，又有唔錯的熱盤，算唔錯！可惜餐廳地理位置一般，最近要喺荃灣地鐵站再轉車入黎，間唔中食一次都可以，大家有機會可以試吓！…Read More

又係一個食埋飯至返工的日子~ 今日去左我第二最愛既屯門咖哩屋!!! 我中學時期係置樂花園附近讀書,間唔中出去食LUNCH,到而家大個左出黎做野佢都仲係到!!! (記得有段時間有另一間咖哩屋,,,但做左無耐就執左),所以呢間真係由細食到大呀~ !!! 一如以往,我最鍾意係性價比高的餐廳(繼續發揮要要抵食既精神!!) 所以呢間都係我經常去既餐廳~ 今日又係平日,知佢開11:30,差唔多時間就入去(想避左PEAK LUNCH TIME,因為真係好抵食,好多中學生都黎食),以為我係第一個客,點知原來有位先生仲快過我~ 哈! 坐低左,個侍應已經問係咪食牛俐~ 證明我真係熟客了!hahaa! btw,呢到個個侍應都識講廣東話,落單唔洗驚聽唔明~ GOOD! 過左幾分鐘,先送上忌廉粟米雞湯,湯水較稀,唔似西餐個隻既CREAMY,我頭一兩次飲,諗緊其實係唔係中湯,但由唔完全係~ 不過佢有垃粒粒粟米同雞粒,唔算太油,我有聽聞有人覺得好咸,但我個人覺得可接受。MAIN黎了! 一大個銀盤分左好幾格,左邊係雜菜豆,中間係牛俐,右邊薯條,下面最大格係煎餅,其實一般個SET係煎餅+飯,但我食過個量係好多好多~ 所以我ORDER個時講明我唔要飯.咁佢地就會走飯,但加多幾件煎餅俾你~ YUMMY!!! 左邊雜豆一般，唔算熱，個汁有啲「傑」，薯條食得出係新鮮炸，好味！中間的牛脷有三舊，薯仔兩舊，雖然係橙橙地色，但唔係好辣，我本身唔食辣，都食得到，牛脷好軟啖啖肉，薯仔都好軟身，熱辣辣食落去非常野味！溫馨提示：當時上了菜後，記住千祈唔好掛住玩電話，而錯過咗食好味㗎你的時候，因為熱辣辣食落口先至最好味，凍哂煎餅就會變林！趁着食咖喱的黃金30分鐘，我已經完成清盤！最後來一杯熱檸水，非常舒服！再看看午餐餐牌，咁大碟咖喱都只係＄43 ,着校服的仲有優惠，實在非常抵食！值得推薦！ ！ ！…Read More

因為多數返工都係返下午至夜晚,所以通常都食埋LUNCH至返工,首推OUTBACK,因為個人喜愛食西餐,但行勻成個屯市,睇晒咁多間西餐LUNCH MENU都係覺得OUTBACK最抵食!! 今日閒日~ 加上好少中學生會黎OUTBACK LUNCH,所以完全唔洗等位就即入座~ GD!!!!  個人喜好坐卡位,貪佢夠闊落,不過入去個時已經無晒卡位,所以被安排到2人細枱位,但都OK既~ 因為其中一邊係梳化軟座~ 舒服! 一坐低,侍應細心地送上溫水及LUNCH MEUN,平時食開芝士雞肉夾餅,今日轉下食蕃茄肉醬意粉!!  一落完單,轉頭第二個侍應已馬上送上個SET包埋既湯(是日餐湯係忌廉西蘭花湯),沙律同黑糖包...雖然個人喜好粟米忌廉湯,但佢今日個餐湯都好好飲,夠CREAMY,仲有個黑糖包係一定要DIP個奶油食!! 黑糖包係一定要DIP個奶油食.!!! 黑糖包係一定要DIP個奶油食.!!!! (重要的妻要講3次!!) 如果唔夠食係仲可以ENCORE 嫁!!!(岩晒D食極唔飽既人..hahaa)意粉黎啦! 份量好多!(查實我食晒個包同SALAD,再加埋個湯都飽飽地,哈!) 上面的芝士好香咸咸地好好味!! 一邊撈埋D醬,D熱一邊噴晒上黎,熱辣辣!! 好正! 一咬落意粉,夠爽口!唔會煮到好LUM爛!! 整體成個意粉都唔錯,唯一我覺得唔夠酸(個人喜好~ 哈! 酸酸地好食D)..但下次再黎OUTBACK食LUNCH,呢個我都會考慮再叫!同場新發現:可以免費DL APP做會員,申請過程簡單,但要留意要申請之後一日至用到,所以PLAN左要食最好係先登記!入面有好多唔同既優惠嫁!!! 同場再新發現:印象中OUTBAKCK原本好似係無TEA SET ,但今日發現左有,,,唔知係咪新~但見TEA MENU同LUNCH MENU都有相同既野食,份量可能少D,有興趣可以試下!!總括而言,OUTBACK俾我印象都係行中高價路線,但佢LUNCH選擇多,個SET又有包,湯,SALAD,MAIN同野飲,都只係$90以內(以價錢最平的SET以計),又多款又抵食! LUNCH一定會再幫襯!!! …Read More