無聊人's Profile

已經好耐冇去馬鞍山shopping, 每次去親都係食沾麵, 今次都唔例外, 雖然行返去熟悉的角落, 但門面已經不再熟悉..............眼前係一間好光猛的食肆, 同以前好唔同, 但入面格局基本一樣, 只係換過d枱櫈, 開頭仲以為轉咗另一間, 但見佢個名都係叫麵屋武藏, 只係响後面加埋"二天", 相信都係同一間集團, 只係改過個名咁解啫~ 唔理佢係咪同一間, 總之有沾麵食就得啦~ 除咗是日推介果張menu係舊之外, main menu係全新的, 除咗基本的湯拉麵及沾麵, 仲多咗定食, 可能要照顧唔同人有唔同需要, 但我地好專一, 都係叫返沾麵~睇完個menu之後, 先知道"二天"係豬扒(豚天)同雞件(雞天), 咁既然二天係主打, 而我地又想食沾麵, 叫兩個唔同沾汁的二天拉麵就啱哂~ 佢有3款沾汁的, 但其中一款係辣, 所以諗都唔駛諗, 就選擇唔辣果兩款啦~等上菜都等咗好一陣子, 證明樣樣都係即叫即整~ 二天沾麵配濃厚豚骨湯呢款係由豬骨+小魚乾+蔬菜煮成, 味道想像唔到佢竟然可以咁濃味, 對我呢d食開淡味的人, 覺得佢係濃到有少少"kwok"喉, 不過鍾意濃味果d人就啱哂~ 好彩佢唔係淨係用豬骨同小魚乾去煮, 仲有加埋d蔬菜, 咁樣感覺上好似冇咁罪惡感, 話哂有蔬菜~ 佢味道雖然係超濃, 但我覺得絕對係真材實料, 因為食完之後唔會口渴, 雖然食果陣係咁飲水, 不過係我地唔食慣濃味啫~沾麵依然係用我地最愛的坑紋麵, 咁樣先係可以真真正正做到沾麵掛汁的功效, 麵質冇變, 依然咁彈牙, 超正~ 二天各有兩件, 炸粉唔算好厚, 新鮮熱辣炸好, 外層脆卜卜, 內層仍然好juicy, 豚天雖然係厚切, 但唔會好un, 肥瘦適中, 而雞天好厚件, 唔會炸唔熟, 又唔會炸得過乾~溫泉蛋竟然有一隻, 平時一般出面食都係得半邊, 佢竟然係有兩個半邊, 雖然我唔係好好溫泉蛋, 但將佢個蛋黃拌勻落個沾汁度一齊食, 仲食都好香蛋味, 佢隻蛋黃真係好橙紅色, 好靚, 我相信佢一定係日本蛋~仲要記得落佢推介果個天婦羅碎, 好好食, 浸咗汁都仲卜卜脆~  二天沾麵配魚介醬油湯至於呢款係由鰹魚+秘製醬油煮成, 冇豬骨咁"kwok"喉, 但味道依然係好濃, 飲得到好濃的魚湯, 好似好清好淡, 但實際好濃~麵同二天都係一樣, 所以唔再重複  芝士海老魷魚卷我覺得佢似蝦肉春卷多d囉~ 因為外層係春卷皮, 內層就蝦肉多過魷魚, 所以好爽口, 而芝士對我地呢d芝士控係多多都唔夠, 但講真芝士份量都算可接受, 而且仲係拉絲芝士, 面層仲有輕輕焗過, 令芝士更加香口~總括嚟講都唔錯, 下次嚟馬鞍山shopping可以keep住繼續食沾麵~…Read More

呢間之前聽同事話好食, 同埋好多人等位, 而未有機會去試, 終於趁今日冇乜人返工去食, 咁就唔駛等位, 一去到就有位, 不過就坐得迫少少, 夾係兩枱人中間...............裝修都光猛企理, 點餐就要寫完紙仔先去比錢, 然後坐定定等人送上.............正常menu係湯粉麵同埋飯類, 而炒粉麵飯就每日不同, 要睇佢lunch果part, 咁我梗係食佢d炒嘢, 咁先試到佢火喉好唔好~ 青咖哩炒米可以豬/牛/雞任選一款, 我就選擇咗雞肉, 即係青咖哩雞肉炒米~一上枱已經覺得佢唔夠乾身, 咁佢用青咖哩, 可能係用青咖哩汁去濕炒, 咁我又覺得當係濕炒可以接受, 或者泰國興呢~雖然我唔食得辣, 不過青咖哩係唔辣, 只係中間有d辣椒圈要夾開, 米粉當然吸收哂青咖哩的香味, 但可惜佢d雞肉係完全冇味, 似白烚, 而且雞肉又溶合唔到入d米粉到, 係零零碎碎有d雞肉係米粉周圍, 而D米粉就一堆一堆咁, 開頭食都當佢係濕炒, 仲要炒到一PAT PAT咁, 食到落底發現唔只用青咖哩汁濕炒咁簡單, 係仲有超多油去炒, 而d油係多到成個底都係, 雖然佢已經墊咗塊生菜, 但塊生菜都幫佢唔到吸油, 我真係接受唔到d油多到咁, 好清楚睇到佢係油, 而唔係汁！我絕對接受唔到一碟咁油的炒米, 非常失望.............. 洛神花茶我响出面飲過咁多間有洛神花的舖頭, 全部都係洛神花蜜, 係呢間真係洛神花茶, 要自己落砂糖, 洛神花唔落糖會又酸又澀, 唔係個個接受到囉~ 就算落砂糖, 都係唔及落蜜糖咁好味~雖然食物質素未如預期, 我見同事食的炒飯都係好油, 立立令的, 但見佢的服務態度唔差, 執枱又快, 先不至於比差評...............…Read More

呢間嘢食評唔多, 呢個已經係我對佢的第3篇食評, 由第一次喜出望外, 到第二次失望(冇影相, 所以冇寫食評), 跟住比多次機會又有返希望, 到今次最後一次, 因為已經對佢切底失望.....................好彩今次有帶手機, 影低返事實.............佢款式唔算多, 而啱我地胃口的更加少之又少, 所以嚟得都係例牌果兩樣, 一來冇其他特別心水, 二來咁先可以比較到之前同之後的分別~ 香草煎烤雞扒意粉配燒汁+熱老薑紅棗首先塊雞扒已經比之前細, 而且雞皮部份冇以前煎得咁靚咁香, 佢搭多一舊仔雞扒, 咁樣算係咩? 一係就大方d, 比夠兩塊雞扒, 反正咁細塊都收咁貴的價錢, 一係就咪鬼搭多一塊仔, 好鬼祟, 好小家, 咁即係佢地自己都覺得塊雞扒細? 賣相已經差咗, 連味道都係冇味的, 雖然話唔加味精, 但都可以用其他醃料架, 唔係冇味囉~ 雖然配咗個澆汁, 但個汁係非常油, 面頭已經見到一層厚厚的油, 落汁又怕肥, 唔落汁又冇味, 真係好難選擇~除咗雞扒細塊咗之外, 連d意粉都少咗, 起碼少咗1/3~1/2, 之前真係大碟d多d架, 唔信可以睇返我之前的食評~仲有杯老薑紅棗, 有色無味, 冇薑味冇棗味................... 煎焗豬扒意粉配燒汁+熱羅漢果同雞扒一樣, 都係細塊咗超多, 跟無無搭多一舊仔, 真係不知所謂, 我唔覺得咁樣搭多一舊, 我會多謝你, 睇返之前, 係有2大塊豬扒架, 而且塊豬扒係梅頭扒, 有肉有筋, 好好口感, 但而家呢塊係凍肉舖最平果d好瘦的豬扒, 又硬又鞋, 好在冇雪味, 個汁都係油淋淋~杯羅漢果比老薑紅棗好少少, 起碼有少少味, 但都冇以前咁濃味, 以為真係知道飲緊咩, 而家係知道自己叫咗乜而飲乜........後來見到從廚房走出來的是什麼人, 就知道點解質素會差咗咁多, 今次真心唔會再比機會佢, 去茶記食仲覺得抵食夾大件, 講真, 今餐我真係食完都唔飽, 我地已經唔係大食的人, 所以我見隔離枱個大人男人好快食完, 我真心驚佢唔夠飽囉~ 雖然佢塊扒比我地塊大少少...............…Read More

又一間無限時任食, 最啱咁耐冇見, 成班人一齊吹水, 仲要佢個名堂夠勁, 同埋比佢個所謂"御善火鍋十二宮"吸引, 真係要去見識見識~又係我第一個打頭陣, 咁早去到又未齊人, 梗係周圍八下, 視察下環境先................呢度成層都係佢, 所以地方都算好大, 裝修又真係幾宮廷式, 靠窗係全卡位, 靠門口係半卡位, 中間係普通方枱, 但都有d八人大卡位, 估唔到唔係假期前夕都咁多人, 見到d八人卡位要搭枱, 雖然中間有塊板隔一隔, 但我都係鍾意自己一張枱, 吹水都暢快d~拎飲品同醬料係分開兩邊, 裝飲品個雪櫃夠開揚, 一入門口就會見到, 而放醬料地方就要入少少, 同埋好似暗d, 不過佢裝醬料果d器皿又好鬼死古式, 就算响中式酒樓都未必見得到, 非常有特式~姐姐見到我得一個人, 同埋果陣又未有乜客, 就問駛唔駛介紹一下, 定係等齊人先介紹? 咁反正我同佢都得閒, 咪由佢介紹下先, 廢事等陣人多開始忙就冇咁好招呼~原來係要按佢指定次序去食, 佢會等你食完一個程序, 佢先會繼續下一個程序, 每張枱上面都有張指示圖, 因為佢有12個程序, 所以叫做"御善火鍋十二宮", 咁話哂係中式, 梗係由子時開始, 即係11點方向, 一步一步去食..................1)自助健康飲品 (差不多廿款)兩個大雪櫃裝得滿滿, 一個雪櫃係一般的汽水及茶類罐裝/紙包飲品外, 另一個雪櫃先最吸引, 因為佢係一杯杯啤好哂的飲品, 有低糖豆漿、竹蔗茅根、羅漢果五花茶.................打邊爐咁熱氣, 梗係飲竹蔗茅根潤一潤同埋羅漢果五花茶下一下火啦~ 兩種都唔係太甜, 味道亦唔會太濃, 你會見到佢每杯都有1/3杯係材料, 證明比你睇真材實料, 唔係沖出嚟架~1.5) 特別版姐姐問我食唔食住前菜等, 咁梗係食啦~ 咁佢幫我每樣執d, 到我拎定飲品返嚟啱啱好有得食...........- 有炸到脆卜卜的鹽酥雞, 細細粒, 但炸漿又唔係話好厚, 不過就唔係好夠味~- 有熱辣辣的地瓜條, 即係炸蕃薯, 好甜, 有黃色同紫色~- 有好入味的鮑汁雞腳, 一睇佢個色水就知夠哂入味, 雖然係咁, 但d雞腳唔會煮到爛哂, 仍然好完整, 唔會甩腳趾, d皮都冇爛, 好完美~** 其實呢d小食, 係應該係响上火鍋湯底果陣先叫的, 但姐姐可能見我咁陰公豬, 所以中途加插**2) 錦繡前菜 (有4款)枝豆 - 唔知點解個色咁黃, 好似d菜煮完焗到黃哂咁樣, 我見佢個樣唔係我平時認識的, 所以唔敢試~涼瓜 - 又係好似枝豆黃哂, 不過朋友話爽爽地, 幾好食, 咁我先敢試, 估佢唔到個樣好似炆完排骨咁林, 但食落又唔係~秋葵 - 呢個d色終於正常返, 係翠綠, 不過得4條, 連呢d都限一人一條, 有點兒那過~木耳 - 正常爽口3) 季節旬魚之刺身盛合 冇得選擇, 睇下果日入咗咩貨, 即係佢地聲稱季節合時令的刺身............是日有帶子、蝦、魚, 其實我唔係好食刺身, 所以唔知佢係乜蝦同乜魚, 不過見佢個樣又真係好新鮮, 顏色又靚, 帶子同魚都好鮮味, 唯獨事我其中一個朋友話d蝦差少少, 唔係好爽, 令佢感覺唔良好, 所以放棄咗, 但其餘3個人又覺得冇乜嘢, 好彩食完都冇特別排毒, 證明冇事啦~4) 重慶麻辣雞煲/老壇酸菜魚鍋二選一, 雖然兩樣都係辣, 但火鍋已經好多肉, 所以一致決定係要食酸菜魚.............嘩.............見到個酸菜魚鍋, 比佢上面d辣椒嚇親, 駛唔駛咁多辣椒呀? 我見到咁勁, 已經投降, 但佢個湯汁又唔係紅當當, 我d朋友係咁叫我夾旁邊冇辣椒掂到果d, 幾對眼望住我食, 佢地自己又唔食, 原來等我試咗辣唔辣先? 呢d咪夠朋友囉, 全枱人係我最唔食得辣, 反而叫我食先, 當我話其實都唔係好辣, 可以接受, 佢地先開始動筷~ 佢d魚片真係煮到剛剛熟, 好嫩滑又唔腥, 我地問姐姐係咩魚, 佢話係黑魚, 我地話咩黑魚, 佢淨係話咪黑魚囉~ 好明顯佢都唔知, 咁我地都無謂迫佢~ 個酸菜都幾好食, 我朋友話可唔可以比碗白飯佢~5) 御善養生湯底 (我地4個人只有6款選擇)响果張黃色指示圖, 中間位置有6種湯底選擇, 除非你係6人或10人以上, 咁先有額外款式選擇, 咁剔除果d好普通同埋辣的湯底, 最吸引梗係"花膠美人鍋", 最後都係一致決定叫呢個湯底~連個鍋都宮殿式過人, 有少少似細細個去飲宴果陣, 上翅用果個金鼎, 好夠派頭, 不過好阻定.............估唔到湯個湯底的花膠都係限一人一塊, 不過唔緊要, 因為冇希望過會一人有一塊花膠, 所以已經好滿足, 但湯都好夠味, 同埋都膠膠地, 應該都係宜材實料, 起碼有基本效果, 當然之後加果d湯, 無論你係咩湯底都係果壼湯, 所以趁仲係真正花膠湯時, 飲多幾啖先好烚嘢食呀~6) 海鮮大拼盤總共有6種海鮮, 都係睇下果日入咗咩貨, 可能有驚喜, 但又可能好普通, 我地果日有鮑魚、蠔、蝦、蚌、蜆、墨魚, 數量又係依據每枱人數, 每款每人一件, 除非同枱有人唔食, 如果唔係冇人可以食多, 夠哂公平, 最多爭食大舊d..............除咗蠔之外, 就算飽魚, 姐姐都話可以連殼掉落去一齊烚, 聲稱已經洗過d殼, 雖然我地想全部去殼, 但始終唔係自己屋企,唔齊架生, 唯有飲多啖湯先掉哂佢地落去烚, 唔想污染咗個靚湯~每種海鮮都好新鮮, 好有鮮味, 唔似係死咗好耐果d, 最衰每人限食1件( 其實可以加錢), 搞到到喉唔到肺咁............7) 美國雪花牛小排成隻牛上, 就算唔食得都睇得, 正所謂輸人唔輸陣, 不過唔知佢呢只牛全場有幾多隻? 如果個個好似我地咁唔係一嘢食哂, 係有排擺的話, 唔知佢會唔會問"可唔可以將d牛肉轉過隻碟?"我已經冇食牛好一段時間, 但根據以前食牛的經驗, 佢d牛肉應該幾有牛味, 唔係差, 只可惜而家唔食牛, 所以留返比食牛的朋友食哂佢~8) 金牌手工丸有3種, 全部都似係手打, 唔記得係咪蝦丸、墨魚丸、豬肉丸? 但總之全部都好爽滑彈牙, 一粒一粒放响匙羮度, 賣相好靚, 確認好睇又好食~9) 四十幾款火鍋配料有6大種類, 包括小食、火鍋配料、麵類、餃子類、特色丸類、蔬菜類, 總共都有四十幾款, 都算係幾多款式, 最鍾意佢夠環保, 每樣食物都係寫要幾多件, 而唔係一般的要幾多碟, 我地真係有數過, 有9成都啱數, 大家真係要諗清諗楚要食幾多, 自己要負責任的, 咁樣做真係幾好, 起碼有d款式只係想一人一件試下, 咁就唔怕叫左成碟, 但最後又浪費咗, 真係值得一讚~ 雖然話可以樣樣試一件, 但當然冇咁樣做, 因為實在太多款式, 而且唔係樣樣都啱胃口, 都係選擇自己喜歡的去叫, 基本上都唔差, 大部份都好新鮮, 唔似隔好多夜~10) 八方田園蔬菜籃原來要自己去雪櫃拎, 等我仲以為佢會拎埋嚟, 因為呢個菜籃响十二宮格入面係自己一格, 唔怪之得等極都未見上枱, 後來覺得唔對路問問, 先知要自己去拎, 果時已經所剩無己~ 佢唔係一大籃比你夾, 而係一兜兜裝好, 然後用保鮮紙包好放响雪櫃, 感覺會衛生d~11) 一品御飯太飽冇食到, 其實有叫佢比一碗我地成枱人試, 不過最終姐姐可能以為我地講笑, 所以冇比到, 又或者比唔到一碗份量............唯有下次有機會先叫佢上咗比我地先~12) 宮廷美點好靚的紫色, 呢個仲要專人表演一下先上到枱, 因為要倒液態氮, 營造仙境效果~ 有d似台式甜品, 有d芋頭、丸子、菊花, 最勁係個椰奶味, 都少少偏甜, 不過都係一人一碗仔, 都可以接受, 始終食埋甜品食叫完滿架嘛~唔知係咪我地坐到最盡, 雖然仲有幾枱人, 但都差不多十一點, 我估計大約十點左右, 埋單後已經開始執嘢清潔, 所以响十點後左右已經好難搵到人招呼, 而且我地仲要坐到好入, 真係呼天不應叫地不聞, 直頭要走去吧枱搵人上甜品, 所以坐得入有好有唔好~原價每位$338, 電話訂位同like佢fb有92折, 如果比cash再多98折, 搞咁多嘢, 其實最尾條數即係冇加一, 為咗每人慳三十幾蚊, 唯有跟佢額外搞咁多嘢啦~  雖然三百幾打邊爐好似貴咗少少, 但折下折下, 又坐成4個幾鐘, 又任飲任食, 其實計返條數都係抵, 所以下次有機會都會再嚟食~…Read More

還記得第一次嚟幫襯, 正值炎夏, 而且坐髮型屋bar枱, 冇冷氣吹到, 仲要食個熱屎辣辣的烏冬鍋, 真係食到一額汗, 剛好天氣開始涼, 就諗起可以再嚟呢度食返個熱辣辣的烏冬鍋~今次唔係坐髮型屋bar枱, 係坐返正常枱, 所以有番d冷氣吹到, 而本身個天氣都涼涼地, 所以梗係懷念一下, 照舊食返個蕃茄湯吉列豬扒烏冬鍋啦~ 仲要配埋熱麥精, 秋冬一流, 記得對上一次嚟都未有熱麥精/維他奶, 可能真係期間限定, 响便利店要成$10/支, 呢度唔駛加錢, 唔叫就笨啦~ 唔知點解d伙記淨係睇到有人走咗要執枱, 但睇唔到有人坐低要叫嘢食, 等咗好一陣子先有人留意到同埋有時間理我地, 真係等到頸都長~好彩落單之後, 好快上咗支麥精比我頂住先, 大家即刻回想起讀書果陣, 冬天响小食部的至愛...............不過好快已經比大個咗的另一至愛佔據, 估唔到我呢個吉列豬比起我同事個泡菜仲快上, 大家都係鍋, 我果個仲要炸, 佢果個淨係裝都耐過我~ 不過唔理佢咁多, 一定要趁熱食, 蕃茄湯依然好濃蕃茄味, 但唔會覺得淨係飲到蕃茄膏的味道, 烏冬係扁烏冬, 雖然我鍾意食粗烏冬, 不過彈牙最緊要, 同埋最鍾意佢有好多什菜, 感覺好健康, 完全冇偏食, 只係今次塊豬扒比我第一次食好似細塊咗? 有d唔係好夠喉, 因為佢炸得好脆, 又熱辣辣, 真係食極都仲想食~呢度另一我鍾意就係本身價錢唔算貴, 仲要冇加一服務費, 但仍然有人服務, 同埋可以用八達通, 帶唔夠錢都唔驚啦~ …Read More

呢度d人流真係一時時, 其實我每次都係差不多未夠1點的時間, 有時可以等廿幾三十張枱, 有時可以等幾張枱, 不過當然最多人都係happy friday, 今次避咗個fri, 所以都係等大約十分鐘左右都可以入, 而佢呢度明明有個飲食app合作, 但係永遠都唔可以搖距攞飛, 又冇得book枱, 次次都要walk in, 不過佢好處係唔駛等人齊都可以入, 呢個都可以係壞處, 變相流動慢咗, 但通常都係齊人, 好少見入去等人, 證明呢度d食客都好規矩~差不多每次嚟都係食蕃茄湯烏冬, 今次都唔例外, 但上次食果個吉列豬扒唔知點解咁肥, 嚇怕咗我, 所以今天叫芝士蘑菇雞翼, 呢個可能真係即叫即炸, 等到其他同事果d到齊, 我果個都未到, 起碼等咗十分鐘以上, 不過都係值得的, 好鬼死熱辣辣同脆卜卜, 但非洲咗少少, 而芝士都幾濃, 仲有3只咁多~飲品亦都係例牌, 柚子生薑蜜, 都係果d韓國即沖例牌貨啦~ 不過就好夠味, 唔會淡戊戊~而家做埋會員, 可以順便儲分換下嘢, 最鍾意佢冇加一, 但又有服務~ …Read More

我相信如果唔係朋友搵到呢間嘢兼車我嚟, 我呢世都唔會知道原來呢度有個海灣會, 仲要有酒吧、泰菜、BBQ添~ 果晚大家都係第一次, 好不容易搵到去海灣會, 但佢門口個指示牌又唔清唔楚, 都唔知架車應該泊响邊? 又唔知海灣會係咪好似人地果d遊艇會咁, 要會員先可以去? 咁啱見到有個着住製服的男人, 想問問佢應該泊响邊, 但佢叫我地等等, 等到佢招呼完個客攞車, 然後返返入去都冇理我地, 咁我地又以為佢係海灣會d人, 唔理我地呢d街人外人, 於是打電話去問返究竟點泊, 泊邊? 又係講到唔清唔楚, 搞咗差不多十分鐘, 最終見到再入d有大空地, 有理冇理泊咗先講, 起碼唔會阻住村民個門口先...............明明睇OR個地址係呢度, 但就淨係見到海灣會個酒吧, 諗住厚住面片入去問路, 但一入到去見到不遠處係似泰式餐廳, 再行入d, 就見到"泰道", 仲要見到頭先唔理我地果條友, 原來佢就係呢度員工, 枉呢間要叫"泰道", 但d員工對人d"態度"咁冷淡...................原來唔只頭先果個男員工差, 負責室內果個女員工都唔好得去邊, 我地坐低都好幾分鐘, 都唔比水唔比餐牌, 問佢又話等陣, 一等又等咗起碼5分鐘, 再追先比餐牌, 到我地睇咗餐牌都未由頭睇到尾, 又追問係咪可以落單? 乜佢好趕時間咩? 推咗一次話仲要睇睇, 轉頭冇耐又追, 咁咪一路睇一路叫, 滿足佢係都要落單的願望................等咗差不多十分鐘, 最先嚟的係飲品, 叫咗芒果沙冰同火龍果沙冰試試, 都唔太差, 似係真係用果肉去打成, 又冇特別溝糖水, 因為都唔係太甜, 似係生果本身的味道~ 不過見隔離枱杯沙冰好似大杯d, 有個山形, 我地果d係平地, 倒塌咗咁樣................根無住過多幾分鐘, 開始陸續上d輕便菜式, 好似薄餅、炸軟殼蟹、串燒............. 薄餅 -> 仲以為好大塊, 原來一客得果4塊仔, 仲要係細細塊, 我估原整有7-8"左右, 再切開4塊, 係熱辣辣, 但我要等埋個咖哩, 所以等到凍哂, 不過好彩凍咗都唔會變硬, 只係冇咁鬆脆啫~ 炸軟殼蟹 -> 估計應該都係得一只, 但算幾大只, 分開咗十舊八舊, 新鮮炸起, 好香好脆, 就算攤凍哂, 竟然都仲脆, 唔會變硬, 而且佢d粉唔係好厚~ 串燒 -> 好在佢呢度一客係2串, 所以可以豬、牛、雞各一客share食, 不過佢個沙爹將就少咗d, 6串嘢都係得一碟仔, 唯有慳住用, 廢事叫佢比多碟, 因為分分鐘食哂佢都未拎嚟~ 串燒燒得唔會太乾, 不過牛同豬都un咗少少, 要咬耐d先吞到, 冇牙就難咬, 只可以食雞串~食到七七八八, 開始有其他比較需時的蝦餅、什菜粉絲煲、燒魷魚、咖哩雞上埋............. 蝦餅 -> 唔知係蝦太多定粉唔夠, 唔係好實淨, 又唔夠彈牙, 唔太吸引~ 什菜粉絲煲 -> 竟然係用韓式石頭飯果d煲去裝, 好處係夠熱同保溫, 但壞處係d粉絲比佢黏實哂~ 味道開初食係唔差, 幾入夠味, 但開始冇咁熱時, 會覺得超重口味, 機乎可以食一啖送一碗飯~ 燒魷魚 -> 燒到好香, 但又唔會乾身, 如果用嚟送酒真係一流~ 咖哩雞 -> 其實應該係最快可以上的, 基本上d餸都係煮好哂, d汁又係整定, 只不過收到order整返熱啫, 都唔知點解咁耐? 通常d咖哩雞都係雞脾砍件, 但呢度竟然係全雞胸肉, 而且汁多過龍, 雞肉的份量仲少過洋蔥, 真係唔抵食, 雖然味道唔差, 而且唔辣啱我, 如何調整下個比例會好d~已經食到飽哂, 我地果碟干炒肉片河仲以為佢漏咗單, 因為聽到隔離枱都有嘢漏單, 諗住唔追佢, 由佢漏單就算, 反正都食飽, 再嚟反而食唔落, 點知講完唔夠5分鐘就嚟, 不過嚟錯咗牛肉, 其實想乘機叫佢取消, 但又好似好衰, 驚人地以為我地唔想食先話佢嚟錯牛肉, 最終佢炒過碟啱的豬肉, 但真係實在太飽, 打包咗~其實呢度如果你為咗吹水, 而又唔想有人打擾, 係幾好的選擇, 因為佢淨係上菜會嚟一嚟之外, 其餘時間係唔會有人出現, 就算出面執哂枱, 都唔會入嚟做d動作趕你走, 呢個係唯一好處~ 明明出面有枱, 但book枱時話full哂, 得返室內, 其實秋涼天坐出面都唔差, 旁邊又係沙灘, 咁當然唔好有蚊啦~ 因為室內我覺得有陣煙味, 但周圍附近又唔見有人食煙, 都唔知d煙味响邊度抽入嚟? 後來發覺樓上可以包房, 我就覺得有人偷雞食煙, 咁又冇人阻住, d煙咪响樓上傳落嚟...............…Read More

我以為淨係星期五先多人, 原來月頭都係咁多人, 已經未夠1點嚟到搵位, 但照睇號碼都要等20張, 不過好彩中間好多都走咗冇等, 所以都係等咗10分鐘左右, 算係好快架喇~是日唔係好餓, 所以唔係太想食飯, 估唔到佢竟然有淮山麵? 我以為佢淨係會有韓國粉絲, 咁既然佢有d唔係韓國食物, 咁當然要試下啦~ 黑松露炒淮山麵其實基本上佢呢樣都唔係韓式食品, 首先淮山麵我淨係响素食店食過, 而且佢煮法係西式, 用黑松露去炒, 雖然話係炒, 但唔係中式果種炒, 而係似白汁意粉果種做法~味道都唔差, 唔講你真係以為去咗西餐廳度食, 始終黑松露都只係d碎濕濕物體, 係有加d菇同瓜去炒先夠體頭~ 不過佢個淮山麵質感唔似我食開果d, 佢少少似天使麵, 但又冇咁爛咁林, 幾特別~ 熱蜂蜜柚子茶算係幾濃味, 呢d就似返韓國嘢喇~ 不過唔知點解次次飲完, 條脷都會鞋, 唔知係咪佢d柚子皮搞到咁, 下次都係唔好食埋d柚子皮~…Read More

好耐之前由於佢地的服務質素未能達我要求, 所以自行black list佢地, 但最近見到電視節目有介紹吉列豬扒飯, 所以抽起我想食吉豬果條筋, 於是搵日平晚六點就嚟食, 人少d, 果然服務都好d, 錯漏少d, 而且又坐得舒服d~ 真係實在太耐冇食, 佢個menu轉哂, 我記得以前係可以選擇飯/烏冬, 但而家全部set咗係飯+湯, 如果轉烏冬, 除咗要加$3外, 仲要連碗湯都冇埋, 原來一碗烏冬貴過一碗飯+一碗湯架~ 吉列豬扒烏冬吉列豬扒個外層吉列皮依然係好脆, 而塊豬扒亦都keep住咁厚切, 所以咬落去係好好質感, 外脆內有咬口, 但又唔會話係un~不過個烏冬d湯就少得可憐, 已經要加錢, 但都唔比多少少湯, 我要嚟浸熱d椰菜絲架嘛~ 而家只係剛剛好夠浸.............唔知點解佢個湯明明唔係好鹹, 但佢d海帶就好鬼鹹, 唔通係海水味太濃? 烏冬唔係好un, 少少彈果種, 又未至於最cheap果種大陸烏冬, 叫做不過不失咁啦~ 吉列雞扒烏冬大致上評語同吉豬烏冬係一致, 只係厚切有咬口的豬扒變成冇咁咬口的雞扒, 外表係分唔出, size差不多, 厚度又差不多, 都係唔差啦~其實佢本身食物係唔差, 所以我先比多次機會佢咋~ 下次如果真係要再encore, 一定要搵日人少少同埋早少少, 一人多佢地就亂~…Read More

平時呢間嘢都多人, 尤其是食晏時間, 好多時人多到我都唔想排, 因為完全唔知排到幾時? 所以暫時未有機會幫襯, 而且平時夜晚行過, 見佢dinner個menu價錢都唔算貴, 於是今次搵晚嚟試試, 睇下佢有乜原因咁多人幫襯? 呢度係工廠大廈, 而且佢唔係地舖, 不過都唔難搵, 由果座大廈地下已經有餐牌企咗响門口, 一路上樓梯都見到好多懷舊鐵牌, 一路引領你到1樓轉入佢個門口為止.............而入面裝修係以木為主, 木枱木櫈, 好原始感覺, 而且燈光昏暗, 真係夠哂情調, 最啱吹水................之前响apps訂咗枱, 不過就遲咗少少, 個負責人話如果由book枱果個時間起計, 15分鐘內都唔齊人, 就唔可以享有用apps訂枱的7折優惠, 雖然我地最終都响15分鐘內齊人, 但其實我地叫set dinner, 基本上都唔會享用到佢個7折, 因為7折只限部份單點食品/飲品................前菜唔知點解兩款前菜都係包? 一款係成大個香草包配牛油, 而另一款係沙樂美腸芝士多士...............個香草包都幾軟熟, 又暖暖地咁, 唔知佢係咪有分大細? 人多就大舊d, 人少就細舊d? 不過果度實在太暗, 望唔到其他枱個包咩size, 所以證實唔到................至於個多士, 唔算好脆, 不過好彩塊沙樂美腸唔算太鹹, 連埋芝士同多士夾住一齊食, 味道剛剛好...................餐湯是日餐湯係忌廉湯, 冇得選擇, 通常如果有菜湯選擇, 我會選擇菜湯, 因為怕忌廉湯會太濟, 飲完食唔落其他嘢, 不過佢個忌廉湯唔算太濟同太杰, 適中剛好, 而且有d碎, 但實在太碎, 咬唔出佢係咩?主菜龍蝦汁燴蟹肉長通粉個龍蝦汁偏濃同鹹, 蟹肉又唔夠多, 濕濕碎咁, 完全唔抵食~香燒德國鹹豬手燒得太乾, 無論個皮同d肉都過哂火, 但個皮一d都唔脆, 反而係un un地, 冇皮包住果層肉好乾好硬, 好似柴皮咁, 係有皮包住果d肉叫做好少少, 唔會乾, 味道亦唔會太鹹, 3個人都食唔哂佢隻豬手...................就連伴碟d薯仔都食唔哂, 淨係食得哂佢d瓜粒同茄子啦~香煎新西蘭鮮羊仔扒寶雲酥啱啱好有3塊, 可以1人1塊, 不過如果4個人的話, 都可以加錢加多1塊, 但係加幾錢我就冇問............响3款主菜入面, 大家都覺得呢個係最好食, 羊扒要求7成, 不過由於環境太暗, 估計都係差不多, 只要佢唔滴血我就OK~ 個羊扒唔係好肥, 所以冇乜羊羶味, 亦都唔會好un, 係邊位un咗少少, 面頭果層"寶雲酥"先好味, 又香口又少少脆皮咁~餐飲完全冇味的熱檸茶, 又冇茶味又冇檸檬味甜品細細兜的焗焦糖燉蛋, 面頭看似唔夠焦糖脆皮, 其實係只佢燒得唔夠火喉, 佢係有一整塊糖面, 只係唔夠色水, 所以視覺上差咗少少, 但味道係唔差的, 又唔會太甜或者太奶其實以西式晚餐嚟講, 佢都算唔貴, 而且又唔多人, 地方唔算迫, 但唔會坐得夜, 大約10點左右叫你埋單, 咁埋完單, 都唔好意思仲坐咁耐, 但如果六點零七點去食, 都叫做坐到3個幾鐘, 仲要唔駛加一, 都係一個唔錯的選擇, 下次都可以再encore~ …Read More

之前路過見到佢新出咗"未來漢堡", 今次專登嚟試試...............佢有兩款漢堡的, 我選擇左咗平d果款, 畢竟佢價錢唔算平.......上枱果刻都O咗嘴, 因為我冇配薯條, 成隻碟咁大, 但個漢堡咁細, 真係好唔合比例, 真心覺得唔係太抵食, 呢個絕對係佢地唔識配合心理, 我相信同一隻碟+同一個包, 但加埋薯條, 整個感覺會好得多, 唔會咁單調, 望落都大堆頭d, 所以點解出面的餐廳全部都要大量伴碟, 就係因為心理上令食客覺得抵d, 不過佢都不失為一個優點, 冇多餘花巧, 絕對靠實力, 如果將隻碟換細d, 配合返個包, 咁會冇咁空蕩蕩~講返個包, 似係麥包, 因為有好多細細粒似麥粒的物體, 但唔"銀"牙, 而且有烘返熱, 外脆內軟.............而配料就有酸青瓜、蕃茄、生菜、未來漢堡、千島醬, 蔬菜類都好新鮮, 咬落好爽口, 至於個主角"未來漢堡", 個肉質都好似真肉一樣, 絕對有咬口同有纖維, 唔講真係唔知佢係素肉, 煎到面層脆脆地, 但入面又唔會太乾, 雖然都幾厚身, 等於麥記3塊漢堡加埋咁厚....................但衰在個醬稀咗少少, 漏到我成手都係, 味道的確唔差~其實以呢個價錢, 一眼望落去真心偏貴, 但食過之後, 又覺得物有所值, 但如果想飽肚的話, 記得加配薯條, 如果唔係好快會再搵食.............…Read More

呢間應該係人多, 同埋夜晚嚟係比較合適, 因為佢主要係睇波、飛標、群體活動, 但我地偏偏選擇lunch嚟, 所以係份外清靜, 唔係話冇客, 只係比其他餐廳少客, 所以望上去好似侍應多過客咁~無論餐紙同水杯, 都係好配合呢度d運動主題~佢果張all day menu成塊大硬膠版, 好阻定, 其實正常lunch都係食lunch set比較划算, 但其實價錢都係偏貴少少架~响呢d西式餐廳, 見佢lunch set都有fish & chip, 咁梗係要試試啦~ 我仲驚唔夠飽, 但反而食唔哂, 唔係因為佢大碟, 而係好濟................佢包住魚果層粉漿, 開頭食係覺得OK, 可以接受, 但越食越覺得濟同溜, 食到最尾果舊, 係直情要去咗果層粉漿, 淨係食魚咋~ 同埋佢d魚好實肉, 好鞋, 我唔知係咪應該係咁樣質感? 因為我冇乜點食過fish & chip, 如果正宗係咁樣質感, 咁我估以後都唔會再食~d薯條亦好失望, 看似好大兜好多, 但全部都係小朋友手指咁短, 碎濕濕, 又唔夠熱辣辣, 所以我係清唔哂d薯條.............杯熱檸茶都唔知點解唔斟滿, 個杯好似好大, 但飲兩啖已經飲完, 唯入自己再倒d水入去, 仲要佢個茶本身都唔係濃, 得果3片薄片檸檬, 又冇茶味又冇檸味~如果你話嚟傾下計, 吹吹水, 志在hea下, 响呢度lunch都不失為一個好選擇, 因為人少又靜, 侍應都唔會主動打擾客人, 但如果話要食個平靚正lunch, 我覺得唔係太適合囉~ …Read More

已經超過十年冇食過味千, 因為之前响唔同地區食過兩次, 每一次都係fd叫食呢間, 但每一次我都覺得好難食, 好勁鹼水味, d麵又淋, 價錢又唔係特別平, 所以已經十多年black list左佢, 但見佢到今時今日都仲未執, 而且咁啱知道佢呢期有韓式炸雞拉麵, 心思思想試, 於是膽粗粗試第三次, 希望唔係狼來了.................呢間分店不嬲都冇乜人幫襯, 所以都唔心急去, 不過慣咗放假早食飯, 所以都係六點左右去到, 到食完都係得小貓三幾只, 所以兩個人都比你坐4人卡位.............佢食物選擇唔多, 拉麵同飯得幾款, 仲有十款八款小食同飲品, 所以其實都叫做冇乜選擇, 咁都好, 起碼冇咁傷腦筋諗食乜, 都係叫去到邊度新舖都要試的豬軟骨同埋為咗佢先嚟的炸雞拉麵, 另外再加多一款小食~唔知係咪又講環保, 唔叫都唔會比水, 真係得水囉~ 呢間好似係日本餐廳, 但竟然冇茶, 只係得水, 連港式茶記都有茶啦~ 鹽燒冰魚老公比冰魚呢個名吸引咗, 話唔知咩叫冰魚, 所以就要叫嚟見試一下, 其實真係唔平, 廿幾蚊先得兩條, 仲要睇相都睇到條魚可以用串燒果支竹籤串住, 即係大極有限, 不過冇所謂啦~ 我都想試一下咩係冰魚?首先, 冰唔冰魚我就唔識分, 都係魚, 肉質都唔會話好散或好實, 適中咁啦~ 只不過我係識分咩叫鹽燒咩叫炸囉~ 好明顯佢係將條魚掉落油鑊炸, 而唔係鹽燒, 唔知商品說明條例可唔可以告佢? 唔似人地d日本餐廳同你慢慢燒, 咁如果你做唔到, 就直接叫炸冰魚咪算囉~ 始終炸同鹽燒係兩種風味, 最多鹽燒你用機燒唔係炭燒都講得通, 但變咗炸, 始終感覺不一, 非常失望........... 豬軟骨拉麵豬軟骨數量唔多, 一大嚿再加d濕濕碎, 雖然d軟骨係蚊到軟哂, 但d肉非常鞋, 食到攝哂牙縫~拉麵比印象中好咗, 冇煮到一pet嘢, 亦都冇鹼水味, 係有進步~湯底對我嚟講實在太鹹同太油, 根本飲唔出佢係用咩煲出嚟? 炸雞籃拉麵呢款拉麵同湯底完全一樣, 只係呢個仲少咗半只溫泉蛋同木耳絲仲有椰菜, 加上我走蔥, 成碗麵真係dry到不得了, 完全冇吸引力~不過好彩個炸雞籃夠吸引, 因為有十幾條薯條、2隻雞翼、2舊雞球、2隻雞鎚, 除咗面頭灑咗芝士粉, 另外仲有一碟芝士醬, 啱哂我地呢d鍾意食芝士的人~由於我地坐正廚房出面, 所以望到廚房入面的情況, 睇住佢响雪櫃拎出嚟再撈粉漿炸, 新鮮熱辣辣又夠脆卜卜, 覺得仲好食過炸雞伯伯果d~唔知之前d人係咪食七味粉同用牙簽太勁, 成張枱係冇擺呢d嘢~ 但我見佢放咗响櫃入面, 而且仲有紙巾, 但全部都唔會主動提供, 就算叫佢比牙簽, 都係拎兩支比你, 駛唔駛做到咁呀?其實如果唔係見到佢呢期推出炸雞籃, 而又令我有興趣, 我真係未必會再比機會佢, 其他明眼人都睇得出, 佢由以前好多分店到而家得返零丁幾間, 仲要响一城商場入面都冇乜人, 可想而知咩事啦~ 經過今次, 雖然好似有少少進步, 但絕對吸引唔到我慣常咁幫襯, 除非好似今次咁有特別推介, 如果唔係都冇緣再見..................…Read More

唔係揸車一定唔會入去食, 因為揸車靠GPS都會行錯路, 佢個地點實在太過山旮旯, 都唔知點解可以响度開餐廳, 雖然係遠離人煙, 但始終太遠, 一路入去都杳無人煙, 都有D驚驚地~咪以為咁山旮旯會冇乜人去食, 室內都基本上坐滿, 但我一定唔會坐室外囉~ 鬼死咁多蚊, 你未開始, D蚊都已經食飽~出面好似有吹氣床比小朋友玩, 門口仲有夾公仔機, 好似冇咁單調, 不過就唔多人玩囉~泰式生蝦咪搞我, 而家已經少食生嘢, 而且我從來接受唔到泰國生嘢~黃金磚多士呢個未嚟之前見到相都已經吸引我, 果然不負所望, 好香口, 個心好軟, 如果再多d蒜茸會再正d, 雖然佢有兩個汁跟, 但個個都係點咖哩蟹果個汁, 因為果個濃味d~串燒(牛/豬)淨係食咗豬, 燒得幾香口, 個沙爹汁都好看椰汁味~木瓜沙律又係我唔食, 因為辣, 所以no comments~泰式小食拼盤好似有5種小食, 有雞翼、串燒、春卷、蝦餅、魚餅, 由於人太多, 根本唔夠分, 我好似淨係食咗春卷同蝦餅, 味道麻麻地~生菜肉碎包冇食過, 因為太多唔知係蔥定係香茅, 唔係太吸引我~椰汁海鮮飯個樣好勁, 面頭插滿海鮮, 但真係淨係得面見到果d海鮮, 有蝦、青口、魷魚, 好似係咁上下, 唔係太多海鮮, 椰青入面全部都係飯, 飯就夠哂多, 唯有夾其他餸撈下飯, 好在佢d椰汁又幾香, 就算就咁椰汁撈飯都夠味~飛天通菜又係鹹咗d, 而且好鬼細碟, 都唔知有冇半斤菜?咖哩蟹只有一只蟹, 不過size算唔太細只, d汁亦都唔係好辣, 個個都用黃金磚嚟點佢d汁炸豬手太鹹太乾, 搞到食淨好多, 唯有打包返去, 留返第晚燴返佢, 冇咁乾應該好食d掛?芒果沙冰呢個叫做好少少, 因為有幾粒芒果, 雖然都知佢係用色素溝成, 邊有咁多芒果去打沙冰丫~青蘋果沙冰完全唔抵飲, 係食素溝成, 又唔夠濃味~食完叫佢執枱食蛋糕, 但佢d人手係嚴重不足, 剛叫到個姐姐執枱, 佢執到一半又比人叫咗去擺位, 之後冇返過嚟, 唯有自己動手, 將所有嘢掃埋一邊, 清空邊夠食蛋糕同影相就OK喇~ 我諗都冇機會再嚟, 完全係冇嘢吸引到我會再幫襯, 又符合唔到我基本要求, 所以對我嚟講試一次就夠.............…Read More

等咗十年, 碩門邨終於有第一間茶餐廳出現, 仲要係咁出名茶記, 當然要幫襯下啦~睇佢裝修都係幾沙田feel, 望入去都整哂沙田d屋邨名, 冇一般茶記咁簡單, 叫做有少少特式, 而坐位都以卡位為主, 應該會坐得幾舒服~無論乜嘢新餐廳開, 總會新屎坑, 所以我都靜候咗成個月, 先決定幫襯, 但每逢假期前夕的晚飯時間, 總會坐滿, 而且我又唔鍾意搭枱, 咁唯有叫外賣返歸食, 佢仲要外賣自取有9折, 咁就更加唔駛諗, 一定外賣自取, 夠哂抵食呀~不過睇勻佢張外賣紙, 款式選擇其實唔多, 晚飯小菜都只係得十款八款選擇, 不過第一次食, 總會諗到食乜嘢~電話落單後, 阿姐話15分鐘左右, 但其實我10分鐘左右去到, 都已經有得拎, 絕對符合香港人乜都要快~  是日例湯老黃瓜湯, 對於我地嚟講係好正, 因為飲到淡淡老黃瓜味之餘又唔會太濃, 因為太濃會覺得落咗"師傅", 尤其是响茶記~ 瑞士汁豬軟骨煲外賣當然唔會有煲比你啦~ 不過都同個圖差不多, 都係有菜墊底, 如果堂食真係用煲的話, 我估佢個煲應該都幾細, 因為佢份量唔算多, 要用煲仔去裝, 先會覺得唔會太少囉~豬軟骨好入味, 炆得好淋, 淋到d軟骨係化咁濟, 一pet gel咁樣, 唔講仲以為係肥膏, 不過瘦肉部份就鞋咗少少, 如果連d瘦肉都淋都化就正~墊底d娃娃菜吸哂d精華, 正到冇得頂, 不過就略嫌油咗少少~ 沙薑雞係例牌份量, 被分配到有1只雞翼連尖, 幾舊胸肉同後背骨肉, 如果話1人份量係算OK, 但佢個外賣盒能夠配合到佢咁薄身, 就真係冇得一頂~雖然d雞全部都係瘦肉, 但都唔算好鞋, 但味道濃咗d, 我覺得係偏鹹少少~ 濃湯浸菜呢個係送的, 冇得選擇, 明明落單果陣佢話計送杞子娃娃菜, 但廚房改咗送蒜子菜心, 呢個反而仲合心水, 不過份量就少咗d, 味道就好入味, 如果頭先唔係飲咗湯, 都會飲埋佢呢個聲稱係濃湯的湯~ 白飯預咗冇飯味, 只要唔係一pet爛飯就已經接受了~ 熱菜蜜兩杯似係兩個人沖, 打開一睇, 好明顯見到一杯深色d, 一杯淺色d, 我選擇咗淺色d果杯, 但都已經好濃, 其實深色d果杯絕對可以沖多一杯嚟飲~如果佢keep住外賣自取有9折, 我諗都會keep住幫襯, 其實都係間中一至兩星期食一次, 就算款式唔多, 次次都係例牌, 應該都唔會咁快厭掛?…Read More