Yuki Woo's Profile

無意之中發現咗呢間新開嘅拉麵店，見到個樣都幾靚就同朋友去咗食，店舖只有鹽味拉麵同埋醬油拉麵兩款，追加嘅產品都只係有溏心蛋、肉、紫菜同埋飯，我同朋友都叫咗醬油拉麵，醬油真係幾香，唔太咸但又夠味， 溏心蛋夠曬滑，塊肉好薄，另外仲有一個麻雀大小嘅雞肉， 不過肉方面兩款都好似冇乜味咁， 雞肉應該再燒香啲會好啲， 重中之重就係個面喇， 我見佢好用心煮，但係我就覺得淋咗啲， 因為呢間店舖冇軟硬度可以揀嘅，即係其實大家都係食一個比較林嘅麵，對於拉麵嚟講呢度就扣咗唔少分數，不過佢有問我哋意見話改進緊，希望下次去嘅時候會好啲， 暫時係可以一試嘅評級。…Read More

放工肚餓搵嘢食，隨意去咗呢間，因為只係晚上六點，所以唔使等位，可以直接入去坐，我叫咗蝦汁醬油沾麵$82，表面有鮮橙色既蝦油，好香又有蝦味，仲有幾大隻既蝦仔乾，都OK香脆，加埋個醬油湯底夠晒咸香，但又唔會過咸，好正，而且啲麵又彈牙又煙韌，仲有啲脆脆粒及紫菜另上， 佢話加落湯食或者包住啲麵食都可以，食果陣仲脆卜卜，食完麵之後，係沾麵湯再加入清湯，個湯都比其他店好味，真心幾好味，又唔使加一，會再黎。唔好既係，店超細，好鬼迫，仲要係前面火炙豬肉片，有啲油煙。…Read More

呢間日本餐廳既丼飯真係幾正，叫咗一個究極炎之燒， 因為我唔食熟嘅魚怕腥， 但係呢個火炙嘅丼丼飯一啲都唔腥，嗰塊魚仲好鮮味好好味添，真係有啲喜出望外， 火炙嘅味道有淡淡嘅燒焦味， 再帶出海鮮嘅鮮味，襯托出嚟鮮味特別突出。另外再叫咗個蟹王丼，係出面少有嘅日式蟹王丼飯，真係好美味，整個口感都好豐富，仲有一粒粒嘅蟹子，香甜濃鮮又超濃厚，美味又鮮味仲好彈牙，雖然我哋兩個好細食，但係因為太美味，所以都食曬兩個丼飯，真係好一流嘅丼飯～…Read More

同朋友慶祝生日飯，揀間優質食品而又坐得舒服嘅餐廳 ，山林道the frequency係最佳嘅選擇 ，所有食品都非常精緻優美，味道亦都一流，真正係打卡一流又有實力嘅食物。我哋食巴馬火腿沙律， 墨魚汁意粉，仲有炸蠔， 炸蠔味道比較好味又多汁，皮薄香脆味道鮮美， 蟹蓋飯造型突出，飯粒乾身，食落都幾美味， 仲食咗我最愛嘅黑松露薯條， 其實就冇得輸嘅， 仲有一個海膽紫菜撻， 成個一口食，層次豐富，味道又多元化，整個口腔都充滿幸福感。呢間餐廳最特別就係特色嘅茶特飲， 粉紅色嘅櫻花特飲及綠色嘅青瓜特飲都非常之清新，造型又甜美， 味道可口，外面少飲到嘅飲品。…Read More

慶祝生日晚飯，3個人想食燒肉又坐得舒服D，就去左牛角。見到滙豐信用卡1人套餐只要叫2位就有折，所以就叫了2個1人套餐，另外再散叫小帶子，生蠔，泡菜鍋及飲品。套餐有前菜，沙律，溫泉蛋牛角飯， 帶子，蟹膏蟹蓋， 雞肉，豬肉，牛舌，牛肉，和牛， 真係相當豐富。 肉類都相當新鮮及有質素， 當然牛舌比較爽脆，和牛就比較好味， 入口溶化但比較多油， 所以幾塊就夠啦。 另外個飯加咗燒汁真係好好味，配泡菜鍋都一流。 其他嘢食都ok， 而山蠔就比較肥美好味， 呢個生日飯多元化又好味又舒服。…Read More

知道元朗嘅爆辣冷麵好出名， 想食左好耐，今日特登收工搭車去買返屋企食。 店員好細心叮囑我會好辣，仲問我食開三哥食幾辣，雖然我食得辣，但係都只係叫咗中辣試下先，可以試真D味道。打開見到真係好多蟹籽， 顏色好吸引 ，跟住我撈混就開始食， 第一啖覺得唔係好辣， 再食多幾啖就發覺越食越辣， 但係重點我覺得淨係得個辣字唔夠香， 仲有好多辣椒籽影響食麵口感，同埋蟹籽太細粒唔多覺， 其餘就只有幾條紫菜同兩粒粟米，這個冷麵不似預期。…Read More

諗住喺台灣好好味，喺屯門開左一陣就去試一下，叫咗最出名嘅幾樣菜，紅燒牛肉麵個賣相ok， 但係一食就發覺唔夠熱，味道麻麻地， 同印像中好香濃嘅感覺有差別，啲肉韌韌哋，其實唔夠熱已經差。叫咗個香干馬蘭頭味道清新又ok，但就直情好似喺雪櫃攞出嚟咁，凍到一個點。咁寄望喺最出名嘅小籠包上面， 食嘅時候仲驚會熱得滯“辣”嘴， 點知都係熱熱地唔夠熱， 好次蒸完擺咗一陣咁， 味道又唔係特別好味，食完餐飯嘅感覺係好差， 呢個價錢有呢個食物水準唔合理，以後都唔會再黎， 包括全港佢嘅所有分店， 都唔明點解仲有咁多人去食。…Read More