amitolism's Profile

之前經過過好多次, 但平時都幾多人, 頭先等食晚飯前行過, 19:00左右, 見無咩人就去買咗$10/4粒墨魚丸。阿姐問我要唔要秘醬, 我見佢講到秘製醬汁咁堅, 梗係話要啦; 可以揀喺度食或拎走, 喺度食即係佢會用隻碟, 上面鋪張紙放腸粉咁, 你企喺鋪頭前食。老老實實, 平時返工出開銅鑼灣灣仔, 有時經過尖沙咀呢類小食店都會買下魚蛋燒賣, 但通常市區d小食店都唔係咁好味, 樣樣嘢都好似麵粉搓出嚟, 得個樣, 無乜味。呢檔"坤記腸粉"串墨魚丸, 由粒丸到個汁都好有味, 我覺得幾有心。下次搵日唔係食飯前, 過嚟試下個腸粉先。…Read More

是夜, 本身喺錦麗食, 點知排咗15分鐘坐低埋先發現, 主食真係得牛肉粉; 事緣我同男友都唔食牛肉, 就無奈咁轉場。見到隔離有間新開嘅馬來餐廳, 就入去試下, 總共叫咗3樣嘢:1) 玻璃魷魚通菜 ($28) - 呢個價錢, 諗住應該會好細碟, 點知比想像中大碟。魷魚係好似街邊賣魚蛋嗰隻質地嘅魷魚, 爽爽地咁, 有少少辣椒醬喺面, 個汁甜甜地又唔會太濃味, 有驚喜。2) 海鮮炒粿條 ($78) - 粿條感覺新鮮, 好似每日新鮮整, 唔識講。炒得夠鑊氣得嚟唔會油膩, 海鮮有d海水味, 蛋炒得好香, overall係好食。3) 椰漿飯配炸雞腿 ($64) - 雞脾腌得幾入味, 食得出用馬來調味粉, 炸得乾身唔油膩, d肉都幾多。飯同配菜就正正常常, 飯無乜椰漿味, 似係有少少咸味嘅晚多d。總對而言, 每樣餸都整得唔錯, 而且份量較足, 兩個中食都幾飽。下次嚟再試下其它, 同埋佢d飲品我都想試, 尤其是紅豆冰(沙冰)。…Read More

之前喺巴倫紐商場嘅餃子縣執咗, 隔咗一陣就開咗呢間喺隔離街, 今日去食, 應該係轉咗另一個老闆。之前間d員工比較hea, 同埋除咗可以加米線, 其它麵係要散叫, 好貴, 同埋d位好逼。而家呢間闊落咗, 落單位男同事好有禮貌, 而且最重要係....終於有套餐啦!!我地兩個人叫咗兩份煎餃麵食餐, 有14款餃子揀, 4揀1麵, 5款跟餐飲品。最後日式紫菜豬肉餃+香菇粟米雞肉餃+擔擔麵+重慶酸辣粉(中辣)+凍黑芝麻豆漿+熱無糖豆漿。<<評價>>豆漿: 有驚喜, 應該係新鮮整嘅日式紫菜豬肉餃: 睇之前d人留言話好味, 所以叫咗, 食落有少少紫菜香, 不過味道唔突出香菇粟米雞肉餃: 呢度嘅雪花煎餃個皮好脆好味, 但普遍唔夠多肉汁, 可以話係無肉汁擔擔麵: 我無食到, 唔知; 不過我朋友落咗d辣菜甫, 佢平時唔係好食得辣, 而呢度嘅菜甫都幾辣下, 見佢落咗幾次, 好好味。(我記得之前喺置樂間分店都有食過d菜甫, 係辣得幾過癮同好味)重慶酸辣粉(中辣): 唔算太辣, 雖然唔係正宗味道, 但係夠酸, 略帶點甜味, 不過不失。有時又唔洗下下都咁濃味同刺激嘅, 有時食下呢種過下口癮都ok。埋單兩位夾埋$114, 性價比正常, 會再返嚟食。…Read More

米線迷如我, 基本上食過哂香港近8成嘅米線店, top 10嗰d一定去過。以前喺呢區住過1年左右, 無意中發現呢間隱世米線小店。喺呢度食嘢, 就要捱到冬天凍冰冰夏天熱辣辣, 因為佢真係就咁幾張枱凳, 但佢d米線同飯都好好味。老闆娘一腳踢, 落單煮嘢收錢洗碗自己搞掂, 仲有唔少外賣call, 佢好有禮貌, 會拎碗麵俾你; 有時會見到佢個仔坐喺度做功課, 總之就係街坊生意。今次order咗我最鍾意食嘅 無湯炸醬熱拌米線 (中辣), 加鹵水蛋+韮菜+豆卜。成年無嚟食, 依然係keep到咁好味, 份量都唔少, 會有差少少食唔哂嘅感覺 (同譚仔差唔多)。佢嘅米線有湯無湯都好味, 有次夜晚嚟食飯, 每一味餸都好正, 自己嚟試下就知。…Read More