作為新哥嘅常客，見佢啱啱裝修完，就即刻book枱過嚟三刷食個飯，順便睇吓個新look。新裝修後光猛闊落咗好多，感覺舒服晒，冇以前咁迫夾。今次例牌點咗幾味心水，證明咗一件事：新哥嘅嘢食，真係每一次都煥然一「新」，質素穩穩定定，唔會失手。《🥇 金牌咕嚕肉 》叫得「金牌」真係一啲都唔誇張。新哥嘅咕嚕肉最獨特之處，係佢做到外脆內軟，好似食緊冰糖葫蘆咁，外層有層脆嘅糖衣包住，但咬開就係新鮮彈牙嘅豬肉，唔係得個粉團。而且每粒都大大粒，好有滿足感！酸甜醬汁嘅比例調得啱啱好，亦都有荔枝同菠蘿，夠晒開胃。《🦆 新哥炆大鵝》今次發現一個現象：好多枱客都叫「鵝」食，唔係碌鵝就係炆鵝，所以鵝地都決定點返個try try。上枱係一個熱辣辣嘅瓦煲仔，好似啫啫雞咁「啫」住上，份量非常大方！一試就知點解咁多人叫——啲鵝炆得超腍，極度入味，完全唔會韌口。配埋入晒味嘅豆卜同薑蔥，用嚟撈飯一流。《🦑 椒鹽鮮魷》女朋友嘅心水小食，每一次去大排檔都一定叫，我地未試過喺新哥呢度食，所以點嚟試吓。魷魚食得出好新鮮，唔係雪藏貨，肉質彈牙。配上香口嘅椒鹽炸蒜，鹹香夠晒，呢一款餸啤酒一流！《🍚 生炒糯米飯》我哋冇叫白飯，所以叫咗個糯米飯嚟做主食。以我所知，炒糯米飯係超級考大廚嘅真功夫，比起炒飯更難。新哥呢個做到粒粒分明、夠晒乾身，完全冇濕粒粒黐埋一舊嘅問題。入面嘅臘味粒、蛋絲夠香，有傳統嘅油潤鹹香，但食落唔會太滯。《🥬 芥蘭炒牛肉》最後叫個炒芥蘭收尾芥蘭炒得脆卜卜，清爽得嚟好入味，完全冇渣。牛肉份量充足，炒得夠滑，冇令我失望！…Read More
