lovejoey526's Profile

其實本身無諗住寫食評，味道一般，招呼一般，個肉骨茶成20幾分鐘先泥。所以相都無影低到。但決定過左2日要泥補個食評係因爲食完佢個肉骨茶之後肚瀉左9次，點解覺得係佢呢，因爲前一日全日既2餐都係屋企自己煮野食，跟住12:20午餐食左佢，未食晚餐19:15個肚已經嘰哩咕嚕，要爆啦..跟住就同厠所玩遊戲。有懷疑係佢肉骨茶入面既豬肚或者個舊完整既蒜唔乾淨定唔知會唔會因為我催佢單加料啦🤔當自己唔好彩，清腸胃啦…..…Read More

見佢下午茶送熱飲，又咁岩想食碗粉，就入黎試試，一試就發現中伏！叫左個片頭米粉加腩汁，碗粉黎到唔知點解油淋淋，唔通加腩汁就會咁油？片頭一啲都唔似片頭，入口又硬又實仲要無味，唔講都唔知食緊片頭。個樣仲要白白地，乜魚片頭唔係金黃色架咩？湯頭無味得個油字，檸水未飲但得一半，真搞笑。我食哂啲米粉就算，片頭真係哽唔落。最搞笑係開頭黎錯一碗有牛肚既麵，呀姐啲態度都幾晦氣下，同佢講錯，佢係度「嘖」我，真係又受氣又難食既一餐。…Read More

叫咗個下午茶餐，自選兩餸配粉麵，咁我就揀咗炒蛋餐肉公仔麵。嚟到發現錯咗，炒蛋變咗流心蛋，奈何本人係唔食生蛋，咁咪同職員反映個蛋錯咗。職員好笑啦，佢話：「睇唔到」，得！咁我開返電話落單紀錄俾佢睇：「下！呢度寫住炒蛋喎。」跟住佢拎走咗碗麵，再返返過嚟話冇晒炒蛋（好好笑，你到底係冇蛋？定係你唔想炒？咁你夜晚晚餐有個蝦仁炒蛋又係咩一回事？）。我同佢講你冇炒蛋可以同我講，我可以轉做熟蛋，因為我唔食生蛋，但佢竟然唔理我，我再同佢好大聲講，我唔食生蛋架呀姐，即係流心蛋，佢先有反應，又拎咗我碗麵去，我聽到佢同廚房講拎返去煮返熟，咁我碗麵都腍晒啦，俾你咁舞黎舞去。跟住我就話唔洗換，當我黑仔，呢個時候有其他職員介入，跟住就話幫我換過碗。（其實都唔想換，但佢已經好快手拎走咗）跟住又有炒蛋啦喎，我咪問職員咁得意嘅唔係冇炒蛋咩，佢話本身茶餐冇得轉喎。我話係你哋QR code度有得揀架喎，冇得轉就唔好俾人揀啦。佢又再兜話係更新咗佢哋都唔知。全程一句唔好意思都冇，好似我唔食生蛋係我問題，麻煩到佢哋咁款。有冇搞清楚其實係你嚟錯嘢？…Read More

叫左個$108咩200g黑安格斯牛肉套餐，勁離譜，底個盒啲肉係正常軟身既，但上面個盒啲肉擺明冰格岩岩拎出泥，硬到直頭放唔哂落盒，係「晾」喺個盒上面。正常人都知，肉要解凍溶雪先可以燒啦，你咁樣硬梆梆一塊肉，叫我點擺落爐度燒？？同姓楊男職員反映，佢話燒左就一樣，無問題。我續問：咁點解2盒唔同樣，點解會未解凍？佢話：因為係冰格岩岩拎出泥….我夠知啦大佬🙄，我係問點解咁樣都仲出俾客？我火都泥叫佢搵店長/經理過泥，佢話無經理無店長，佢走去叫左個廚房職員出泥，我再問：點解會咁樣都拎出泥俾客？佢話：無問題架，燒完一樣食得….因為咁岩無貨，唯有係新貨度拆出泥俾你。我真係O哂咀，我廢事再同佢地講落去，哂我時間，我直接拎袋起身行出門口！！全程對話一句唔好意思都無，一句幫你換都無。剩係識企定定眼光光望住你，再唔係就話燒完就一樣，無問題。其實係咪應該講聲唔好意思，之後同我講有咁既情況，問我介唔介意，係想繼續要呢個餐定轉個第二樣呢？根本你未解凍都唔應該俾客食啦？係咪咁好笑？！佢硬到係晾喺盒，放唔入個盒…Read More

叫左個吉列豬扒咖哩飯，上菜勁慢。啲咖哩汁又小得可憐，一食，飯同汁唔熱既喂，得塊豬扒係熱，但硬過我條命呢大哥，仲要又乾又柴，哨左2舊牙骹都軟，哽唔落，搞唔掂，無下次。🤦🏻‍♀️…Read More

今日諗住一個人黎食個快早餐，一入去同收銀講「一位」，無反應，我當佢聽唔到，咁咪再大聲啲「一位呀唔該」收銀呀姐呼喝我「直行入去啦…」我行到入去，第一；無位。第二；侍應睇到扮睇唔到，完全無人理！我行返出去，問收銀呀姐「無位喎，你意思叫我坐邊？」呀姐大聲兼夾呼喝態度：「見到有位你就坐啦」…..我聽完真係火都泥，問返佢咩態度，佢仲一副不耐煩嘴臉🤷🏻‍♀️🤷🏻‍♀️我真心覺得食完都驚背脊骨落，直接走人！其實平時都覺得呢間餐廳啲侍應同收銀態度好差，今日直頭嘆為觀止👍🏻呢世都唔會再幫襯，野又唔係特別好食，仲要咁態度👎🏾blacklist …Read More

第一次去唔熟menu。叫左碗扎肉雞絲檬，呀姐問飲咩，我就問加幾錢，呀姐話熱飲送既，咁咪跟住問有無龍眼茶個啲，呀姐即刻好晦氣話：要加9蚊，你自己睇menu啦，諗好先叫人落單啦…之後就頭也不回走左。我再搵第二個落單，我又講一次要咩，佢又好惡咁話：講number啦，我又要開返menu睇幾號，佢又催我：俾個number 我呀。個刻已經覺得幾無奈🤷🏻‍♀️🤷🏻‍♀️到碗粉黎，我問有冇青檸，呀姐話：轉頭啦。又無左下文，嗌另一個幫我，佢又答：我禁緊機呀，轉頭啦。我再搵另一個，終於R到一粒仔青檸，但乾既。無汁，又要再嗌。呀姐又例牌表情-黑面。講返野食就一般般；唔算好食但入到口，份量適中。但招呼趕客🙂‍↔️…Read More

人地嗌微辣，一黎到辣到好似小辣中辣咁，唔緊要，同職員講，佢仲話呢隻湯係咁辣架喎！咁你分辣既程度黎把鬼？呀姐，我叫既係微辣，到底知唔知咩叫微辣？仲要勁多油，睇到都唔開胃，要我主動叫佢俾碗清湯加落去筆走啲辣油先勉強食到🤷🏻‍♀️🤷🏻‍♀️🤷🏻‍♀️…Read More

見呢間野平時都好多人食，就諗住試下啦。叫左一個下午茶，揀生牛肉粉轉金邊粉，賴野，碗粉泥到，一咬，喂啲粉又鞋又硬…一食就知好曳既粉，完全係無誠意好似亂煮既感覺。叫個職員俾舊青檸，啲面口衰到好似叫佢托米咁。講下杯野飲，杯熱玫瑰龍眼茶有玫瑰有龍眼，但出奇地完全無味，再沖過杯，一樣無味…我問職員，本身係唔甜定點？佢反問我係咪揀錯走甜，我話無喎，佢話幫你加啲糖囉咁…早知飲杯熱檸茶好過🤷🏻‍♀️咁既質素54蚊，真心唔多抵，份量又細，職員又晦氣..無下次。…Read More

幾個月前食過2次，覺得幾好味兼過足蜆癮，啲蜆又幾大隻，而且仲要堅多，所以諗住今日翻兜....點知，keep唔到水準，失望！啲蜆起碼小左3份1，仲要全部細粒到爆，又無味，嗌左個竽絲，得7粒咁多...飲品方面揀左2杯沙冰，菠蘿同柚子各一，但2杯都淡茂茂...仲有個年紀較大既男人態度又晦氣...講真，價錢唔算經濟抵食，環境又逼又焗，態度又唔算好，唯一綽頭係卜卜蜆煲，夠多蜆過足蜆癮，但呢樣野都keep唔住，我真係覺得呢個價錢可以有其他更好既選擇！P.S:我每次泥都係食正價時段$168，所以唔會有價錢落差既分別！…Read More

時間大約下午4點半，我同友人經過見新開張，，諗住入去試下，我見門口冇人，就直接行入去自己搵位啦，我眼見當時人客唔多，左手邊全卡位，咁梗係想搵張卡位坐，食得舒舒服服啦😏，行到最後個張，冇人，👍🏻我地就坐低，一坐，就有個黑衫既女人走過泥問我地幾位，我話2個，佢就話啦：2個坐個邊！（佢示意我地坐右手邊，個邊唔係卡位）呢邊4個人坐架，你地唔坐得!我聽完O咀，第一佢啲態度認真麻麻，第二，我入泥沿路啲卡位都係2個人坐緊。咁我就反問佢，點解前面張張都2人，係我地2人就唔坐得？佢就話前面個啲要搭枱！佢地要坐埋一邊！我再問佢咁係咩意思，我話前面個2個唔識架？佢話識，佢地一齊既，跟住我話：咁點解前面2個人係識既，又可以打對面坐，坐卡位呢？😤，呀姐再答：佢地唔係我帶位，所以唔係我安排！我話：我點知呀，門口又冇人，冇人帶位，我咪自己行入泥囉！講到呢度，其實我已經唔想理佢，佢啲態度好唔友善，我選擇照坐無誤，我同佢講：得啦，要搭枱呀嗎，我知啦好啦。講完一倫，終於可以食野，我地叫左一碗半肉半筋麵，一碗全筋麵，一杯朱古力雪香。老老實實，麵就可以既，啲牛腩同牛筋都幾林，而且湯底都唔錯！但杯野飲就好難飲，😰，朱古力味好淡。食到尾，我地叫左經理出泥反映岩岩個位呀姐既態度好差，點知個經理啲態度都係有得揮！佢話係我唔聽個位同事解釋，經理話呀姐聲稱自己態度好好，話我地應該係門口等人帶位，唔應該自己行入泥！我話你地啲服務態度好差，佢話：我都好不滿小姐你既態度！唉，講到咁。我選擇埋單走人😞點知一出門口，個經理好大聲嗌住我地話：先生小姐，你地未埋單俾錢喎！我朋友即刻拎張visa單俾佢睇，問佢呢張咩泥？之後個經理梗係唔會道歉，佢話：搞錯左，冇野啦！得架啦，總之呢間野以後blacklist!P.S:呢間店其他著藍色衫既職員其實好客氣。只係職位較高個2個好差囉！問經理拎電話投訴，佢話冇，叫我自己上網搵！…Read More