trooper428's Profile

101大廈係台北著名地標 ， 餐廳名一睇就知後食台灣菜。呢一間101養生麵有得打邊爐， 一人一小鍋，似足台灣夜市。肉燥飯，肉燥飯味道濃郁，肉嘅份量都唔少，幾乎係全瘦肉嘅比例，感覺份外健康。美國穀飼肥牛，穀飼肥牛薄薄一片，落水拖一拖就食得，牛味令人滿意。炸響鈴，後加響鈴一客四件都只係加12蚊，十分抵食。台灣藥膳醉雞小火鍋，火鍋滾起之後先試一啖藥膳湯底，入口清甜而帶有淡淡嘅藥膳味道；醉雞肥大肉厚，一共有成五六件，大部份都係髀位，啖啖肉令人非常滿足。麻辣三杯雞小火鍋，食完清甜嘅藥膳湯鍋之後再嚟個火辣辣嘅刺激，麻辣三杯雞鍋辣得非常過癮，湯底裏面嘅配菜索盡麻辣嘅精華，為今晚畫上一個圓滿嘅句號。…Read More

今日去咗老友介紹嘅一間位於饒宗頤文化館嘅餐廳，餐廳門外係好有風味嘅紅磚屋，內在環境以藍白色為主調， 隻藍色個用色非常大膽，令人有耳目一新嘅感覺。蕃茄麵包，呢個麵包雖然係一個前菜，但係廚師都花盡心思，番茄同埋香草嘅味道悉數融入麵包入面，牛油亦都唔係嘢少，係唔係咁容易食到嘅黑水欖牛油，配合埋麵包上枱時嘅微熱溫度，為今晚嘅晚餐揭開一個好好嘅序幕。美國牛腹肉他他配蒜蓉包，牛腹肉他他賣相精美，最啜核嘅係圍繞住佢身邊嘅調味料，有鵪鶉蛋、芥末籽醬、法國蔥、鹽、黑椒、他他醬、酸青瓜、水瓜鈕同檸檬汁，侍應小姐示意我哋將佢哋撈勻一齊食，味道果然不同凡響， 整個食味充滿層次，加上 juicy 嫩口嘅美國牛腹肉，至執筆時仍然叫人相當難忘。香煎鵝肝配鵝肝批無花果芒果莎莎，鵝肝表面煎得金黃香脆，廚師用上左近期大熱嘅 superfood 無花果加上芒果，調配成酸酸甜甜、極之開胃嘅芒果莎莎。由於鵝肝始終比較膩，配以酸甜嘅醬汁嚟一解油膩感就最適合不過。而粉紅色嗰個係鵝肝批，個感覺有啲似鵝肝醬，用佢嚟搽麵包味道一流，回甘十足，香味喺味蕾之間徘徊，久久不散。蘋果木煙燻美國野雞，主菜伴隨著 side dish 同步送上， side dish 係栗子同燒過嘅椰菜仔，主菜美國野雞就放喺呢個藍色嘅器皿入面，器皿嘅底部係點著咗嘅蘋果木，雞就放喺個燒烤網上面，雞肉嫩滑，盡索蘋果木嘅香味， 面頭有紅色嘅墨西哥汁，佢個味道好複雜，但係複雜得嚟又好好味，以番茄汁做嘅base，裏面除咗香草之外仲有荳蔻同花椒等等，花椒同蕃茄呢個組合都係第一次試，係估佢唔到咁夾。期待下次試吓隔離枱香到爆炸嘅牛扒系列。…Read More

今日收工突然好掛住啊老表嗰陣羶味，仲記得之前嚟食嗰陣一行入門口都已經聞到嗰陣撲鼻嘅羶香，實屬愛羊人仕嘅心靈慰藉。凍檸茶，有水吧嘅餐廳永遠都係加分嘅，唔洗吓吓都飲罐裝嘢，啊老表無論檸茶奶茶汽水跟餐都一律平五蚊，凍飲仲同熱飲同價添，少有少有。口水雞率先送上，係我最鐘意嘅雞胸部位，口水雞汁嘅味道甜甜地，唔會話好辣，非常惹味。水餃，呢度嘅水餃最正嘅地方係可以兩隻兩隻咁嗌，我地嗌咗白菜餃同韮菜餃，餡料脹爆，韮味濃郁，加埋跟住水餃一齊嚟嘅黑醋同枱枱都有嘅菜脯一齊食，好味到暈。避風塘辣雞翼，4隻雞翼都係賣22蚊，真係抵到忍唔住追加，嚟到見到仲要係大大隻嘅雞翼即刻心心眼，味道香辣，外皮仲有少少脆身，屬水準之作。羊肉酸辣大碗米線，咁耐無嚟梗係要嗌番個"大洋"嚟頂吓癮，先呷一啖湯底，濃濃嘅羊味即刻充斥住口腔，感覺羶好，部份連皮嘅羊肉羶味更加 double up，分上嘅酸辣味道亦豐有層次，令人大感滿足。除咗靚羊之外，啊老表仲有牛腩、牛肋、雞肉、豬大腸、豬手同豬頸肉等等嘅非羶味菜式，唔鐘意食羊嘅伴侶都可以陪我一同品嚐，二人同行，一人食羊。…Read More

之前幫襯過西菁街嗰間校長，猶記得質素都唔錯，搬咗過嚟新舖呢邊之後咁耐都未試過，今日就過嚟試下。新舖呢邊比舊舖大好多，估計都可以坐多兩倍嘅人客，間舖頭大咗，食物嘅區域又大咗，連款式都多過以前。 坐低之後首先就梗係猛攻一輪刺身壽司先啦，刺身有三文魚、吞拿魚、帶子、螺肉、蟹棒同埋甜蝦， 每次每款限取三片，走多幾轉，保持新鮮。 壽司同卷物方面都有成十個八個選擇，特別鍾意火炙三文魚腩同埋鰻魚壽司，前者夠肥美，後者有我至愛嘅鰻魚汁，無得輸。燒肉方面都有十幾廿個選擇，每款試一塊都飽到食唔哂，其中個美國特級牛扒真係令人喜出望外， 雪花均勻，口感豐腴，絕對唔似放題會食得到嘅貨色。 雞翼都醃得相當出色，蒜香咖哩孜然麻辣，總有一款啱你口味。 滿足完一輪"肉"望之後，甜品除咗放題唔少得嘅西餅泡芙啫喱燉蛋之外，仲有比較少見嘅冰菠蘿同冰西瓜，為今晚畫上一個圓滿嘅句號。新舖比起舊舖有過之而無不及，可以番兜。…Read More

今日入咗大坑閒 hea，想食啲刺激啲嘅，見呢間印度餐廳乾淨企理又抵食，就入咗嚟試吓。前菜薄脆，嗌完嘢食前菜就即刻送上，薄脆帶有少少嘅胡椒同埋薄荷味，隨附嘅四款醬汁都各有特式，輪住嚟點，相當過癮。香辣薯仔沙律，呢個薯仔沙律真係超級開胃，個醬汁酸得嚟有少少辣，而且帶有黑椒同淡淡嘅薄荷嘅香味，材料除咗薯仔之外仲有鷹咀豆、蕃茄、洋葱、青瓜、生菜同芫荽，非常豐富。咖喱小鍋(雞) 及蒜蓉烤餅，呢個咖喱雞嘅味道十分特別，有少少似咕嚕肉，不過又有啲印度香料味，係一個印度版嘅咕嚕肉；咖喱雞嘅肉質非常嫩滑，淨食都唔會話太濃味，若然攞嚟點埋個烤餅簡直相得益彰，烤餅熱辣辣，加上香濃嘅蒜蓉味，不得之了。…Read More

天鳥嘅裝潢以淺木色為主調，餐廳中央掛滿日式旗幟，感覺開揚，空間感好大，餐廳週邊都用上咗好多酒樽嚟做擺設，秉承一貫嘅日式風格。絹豆腐櫻花蝦溫泉玉子沙律，沙律上枱後，將非常動 L 嘅溫泉蛋搗開，睇住濃濃嘅蛋漿有如瀑布傾瀉而下，本身已經係一種享受。嚟自日本嘅絹豆腐豆味好香，配上新鮮嘅沙律菜，點睛嘅櫻花蝦同埋無得輸嘅麻醬，特別得嚟又夠好味。串燒免治雞肉，呢個串燒免治雞肉係我去千葉鳥每一次都會嗌嘅 must have item，我最鍾意佢個免治雞肉裏面混入為數不少嘅軟骨，爽脆嘅口感加上日本燒汁已經相當好味，今次仲有個印像中上次好似無嘅 半熟玉子喺側邊，攞嚟點啲雞肉，味道更有層次。竹炭炸雞肩配山賊沙律醬，喺餐牌見到呢個竹炭炸雞肩覺得好特別就嗌嚟試吓，雞肩嘅外層炸得香脆，散發住淡淡嘅竹炭味道，雞肉係估佢唔到咁嫩滑，個山賊沙律醬好特別，係喺出面未食過嘅味道，唔知係咪廚師自家製嘅呢?火炙左口魚背壽司(汁燒)，壽司一嚟到已經聞到火炙過後嘅香味，左口魚背被火炙過後油脂四溢，入口滿滿嘅左口魚油嘅香味，縈繞久久不散。天鳥嘅出品高質得嚟又夠抵食，唔嚟開 T Town 都值得特登嚟食。…Read More

國難當前，戰火連天，要開飯除咗味道要對之外，頻道對唔對亦都相當重要，梗係要揀啲支持手足嘅餐廳嚟食，呢間炻板燒一入到場內即刻見到一片黃到金嘅旗海，就知道頻道對上。凍檸茶首先送上，估唔到連簡簡單單嘅一杯凍檸茶都有驚喜，作為一間日式餐廳，杯檸茶仲好飲過好多茶仔，犀利。溏心蛋，個燒肉餐加八蚊可以追加一隻糖心蛋，半熟嘅蛋黃滑溜而充滿蛋香，加上鰹魚汁嘅洗禮，相當出色。蟹子沙律，蟹子沙律口感爽脆，用料新鮮就係一個沙律成功嘅要素，加上我最愛嘅bb沙律醬嘅加持， 好味。唐揚炸雞，唐揚炸雞做得外脆內軟，咬開脆卜卜嘅雞皮之後，裏面係嫩滑嘅雞肉，味道醃得剛剛好。 板燒牛小排，牛小排上枱嘅時候見到一塊塊佈滿雪花嘅鮮紅經已叫人食指大動，侍應小姐先喺石板上面 用兩嚿牛脂嚟起動，將溶出嘅牛油搽勻石板，就可以開始燒牛小排，牛小排被放上灼熱嘅石板上面發出滋滋嘅響聲，伴隨住嘅係撲鼻嘅牛香，牛小排脂肪均勻，牛味香濃，本身已經係不可多得嘅美味，再加上板燒牛嘅生熟程度係可以根據自己嘅喜好調控，我鍾意食五成，朋友鍾意食全熟，完全無違和感， 白飯上面加咗飯素，更見小店嘅用心。…Read More

今晚嚟到朋友介紹嘅呢一間位於天水圍嘅日式餐廳，朋友話喺度只係付出天水圍嘅價錢，但係就食出尖沙咀嘅味道，咁真係要嚟試下。餐廳嘅裝潢充滿日式嘅風味，深淺木色配搭嘅枱櫈，就連餐枱同餐枱之間嘅 partition 上面都放滿各色日本酒樽，形成好一幅美麗嘅風情畫。火炙左口魚背壽司，有汁燒同岩鹽燒兩種口味，我揀咗岩鹽口味，正好帶出左口嘅鮮甜味道，再加上火炙過後爆發嘅魚油，口感豐腴，係一個好好嘅開始。 大甜蝦壽司，大甜蝦肉身飽滿，入口鮮甜而彈牙，脹卜卜的兩枚，令人有夠滿足。火炙三文魚壽司(美奶滋)，火炙三文魚壽司一共有三款口味，分別係汁燒、岩鹽燒同美奶滋，繼汁燒之後，個人覺得三文魚同美奶滋最夾，係一個肥美加肥美嘅組合。 牛油果軟殼蟹反卷，呢一個卷物係餐廳嘅招牌菜，牛油果嘅軟滑同軟殼蟹嘅香脆口感果然一絶，加上頂頭點點嘅蟹子提鮮，值得一試。 串燒免治雞肉，千葉鳥嘅免治雞肉串特別之處在於佢喺免治雞肉入面夾雜咗雞軟骨，令到口感更加爽脆，佢嘅醬汁亦係功不可沒，濃郁嘅燒汁令味道更上一層樓。 鹽燒厚切牛舌心，厚切牛舌心散發住強烈嘅牛嘅酥香，只係簡單以鹽同埋黑椒調味，已經相當好食。 鱆魚小丸子，特別鍾意千葉鳥嘅小丸子比起出面嗰啲無咁大粒，啱啱好可以一啖一粒，雖然佢細粒咗， 但係入面嘅章魚有成四五粒，比起出面嗰啲大粒粉仲更加多，讚。呢間千葉鳥將會成為我嘅飯堂。…Read More

紅燒乳鴿，揀呢個紅燒乳鴿嚟做前菜真係最好不過，乳鴿燒到皮脆肉滑，一人得一舊真係有啲唔多夠喉，下次要嗌多隻先得。漁村小炒王，我不嬲都好憎小炒王呢一類嘅菜式，因為我覺得係一咋下欄嘢炒埋一碟，不過今日表姐嗌嘅呢碟小炒王令我對呢類菜式刮目相看，廚師將味道拿捏得好準確，平時喺其它餐廳趙到起哂渣嘅韭菜花喺呢度出奇咁鮮嫩，啲蝦乾仲好似鮮蝦咁大隻，腰果夠脆，難得嘅係連魷魚都係新鮮嘅，用料一啲都唔下欄，讚。金蒜蒸北海道元貝皇，元貝隻隻都好大隻，粉絲索盡元貝嘅鮮甜味，加上蔥蒜豉熟油，好味到不之得了。上湯加拿大龍蝦，兩舊水有成兩隻大龍蝦，上湯個味道都夠濃，令我懷疑係咪嗌咗芝士焗，龍蝦肉爽口彈牙，無得輸。…Read More

同事介紹諾士佛臺有一間西印fushion嘅餐廳，有啲菜式以係帶點印度風嘅西餐，有啲係帶點西餐風嘅印度菜，餐廳位於諾士佛臺1號，上完斜路頂，第一棟大廈就係。一入門口已經見到餐廳新束束嘅裝修，天花嘅吊燈，牆身嘅裝飾，都充滿住印度嘅風情，特別鍾意佢嗰個u型嘅卡位，靚得嚟又有私隱度。凱撒沙律，新鮮嘅羅馬生菜心，再配襯炸麵包粒，巴馬臣芝士碎同埋經典嘅凱撒沙律醬本身經已無敵，廚師特意選用咗羅馬生菜心，份外鮮嫩清甜。水牛城雞翼，水牛城雞翼個醬汁無兜亂到分開上，個人嚟講覺得要扣少少分，不過亦都因為個雞翼分開咗上，無俾啲醬汁沾濕，外皮份外香脆，又挽回分數不少。鐵板烤牛肉，烤牛肉底下嘅係炒香咗嘅洋蔥同埋甜椒，廚師仲細心將牛肉切開一塊塊，啱哂我哋share，牛肉上枱依然見到令人垂涎嘅格格燒烤網紋，另外仲跟咗一個玉米餅，有齊我最鍾意嘅三款經典nachos醬 - guacamole，sour cream同埋tomato salsa，一次過滿足哂三個願望。牛肉千層麵，由細到大都鍾意食肉醬意粉，呢個牛肉千層麵簡直就係肉醬意嘅豪華版，每一層千層麵都沐浴喺香噴噴嘅肉醬當中，加上面頭半溶化嘅芝士，yummy。紐約芝士蛋糕，經典嘅紐約芝士蛋糕配以雪糕，香濃嘅芝士味同雪糕好夾，為今餐畫上一個完美嘅句號。…Read More

猶記得前年去銅鑼灣金朝陽嗰間101，對於食物嘅高質素同埋嗰個美景露台嘅驚歎，有聞佢喺天水圍開咗間新分店，近近地就即刻過嚟試下。天水圍分店嘅風格明顯走唔同路線，六十幾蚊一個一人份嘅火鍋，仲抵打過大家樂同吉野家， 價格親民之餘環境又好好多。餐飲揀咗盆栽朱古力珍珠，大大杯啱哂打邊爐長期抗戰，朱古力味道嘅濃厚程度，直逼城中出名嘅上樓cafe，喺打邊爐嘅地方有啲咁高質嘅飲品，實屬難得。番茄濃湯牛肉小火鍋，由於席中有朋友唔食辣嘅關係，今次我放棄咗麻辣邊爐，估唔到蕃茄火鍋都無令到我失望，香濃嘅蕃茄味同牛肉係最佳嘅配搭，另外仲有魚腐，玉子豆腐，包心菜，粟米，金菇同埋我最鐘意嘅紫洋葱，Yummy。經典鐵板餐，呢間分店除咗火鍋之外，估唔到仲有經典嘅港式鐵板餐，塊雞扒煎得香脆唔在講，最重要係佢塊鐵板夠熱，啲黑椒汁倒落去嘅時候吱吱喳喳，香氣四溢。天水圍101分店價錢平民，但質素依然偏高，絕對值得一試。…Read More

餐廳位置就腳，喺教育路嘉城附近，十分易搵。油甘魚刺身，油甘魚刺身相當新鮮，肉質厚實滑嫩，魚肉細緻甘甜，入口即融。馬刀貝壽司，馬刀貝外表酷似一截竹子，肉質豐厚，入口爽甜飽滿，越嚼越能品味海洋嘅滋味。冷蕎麥麵，蕎麥麵嘅旁邊係得意可愛嘅鵪鶉蛋，將鵪鶉蛋連埋啲蔥花同蘿蔔蓉一齊倒落個豉油度，簡單嘅美味就咁完成。汁燒茄子，呢度嘅汁燒茄子做得相當之出色，醬汁味道豐富，又燒得夠腍身，上枱夠熱得嚟唔會話太油，激讚。汁燒豬頸肉，特別鍾意佢啲豬頸肉旁邊有即炒嘅日式炒雜菜，咁食油脂豐富嘅豬頸肉嘅同時亦都減低咗個罪惡感。滑蛋雞扒鍋飯，雞扒鍋飯好大堆頭，除咗塊雞扒鋪滿哂個飯面之外，仲有埋麵豉湯同中華沙律，如果滑蛋個比例再多少少相信會更加好。綜觀呢間餐廳嘅出品都有不俗嘅性價比，唔怪之得咁有人氣啦。…Read More

今日喺附近行完outlet，鬼咁肚餓，見呢間板上個價錢都相當抵食，就入嚟試下，由於我地好早到無乜人，食完已經坐無虛席。唐揚炸雞，炸雞個脆漿唔會好厚，雞肉保持住應有嘅嫩滑juicy，咬落脆卜卜，入口都仲係熱辣辣㗎。板上雪花一口牛配珍珠飯，一口牛一啖一粒好方便，唔洗我哋嘥時間再切嚟切去，牛味令人滿意，咬開中間仲係粉嫩嘅粉紅色，特別鍾意佢有啲bb菠菜做配菜，另外追加嘅兩隻餃子都十分好味。黑豚漢堡脆薯皇，抱歉呢個黑豚漢堡實在太好味，所以差唔多食完先至記得影相，被切成薄片嘅黑豚喺漢堡入面層層堆叠，配埋新鮮嘅蕃茄，生菜同埋醬汁， 真係有想encore嘅感覺。臨走發現呢間餐廳有好多閨蜜喺度傾計，可能因為呢度抵食得嚟又任坐唔嬲，唔會趕人嘅關係啦。…Read More

今日行開嚟白布街，正正係晚飯時間，諗起好耐之前食過嘅新安東奶奶雞，都有少少掛住，就過嚟重溫一下，見餐牌比起我上次嚟多咗好多新菜式，令人躍躍欲試。韓式泡菜小籠包，睇餐牌一見到呢個咁fushion嘅菜式，即刻忍唔住要嗌番一籠，餡料除咗泡菜仲有新鮮嘅豬肉，一啖咬開裏面未見有太多湯汁，正好讓泡菜嘅味道更加濃郁。陸軍牛肉拌飯， 牛肉用咗燒牛肉，個邊度有少少黑椒，非常香口，中間有隻溫泉蛋，中爛佢用啲蛋汁嚟撈飯就最好不過，飯面嘅配料另外仲有生菜絲，紫菜，泡菜，香蔥同埋沙律醬，撈勻佢個味道超級夾。辛安東元祖奶奶雞，終於嚟到餐廳嘅招牌菜，奶奶雞個辣度揀咗中辣，對於鍾意食辣嘅我嚟講有微微嘅辣度同帶少少甜，雞肉口感嫩滑，配菜另外仲有炆得好腍嘅薯仔，青瓜，洋蔥同埋紅蘿蔔，加埋上面嘅香蔥同埋底部嗰個索盡湯汁嘅薯粉，難怪成為餐廳嘅鎮店之寶。元祖奶奶雞辣中帶甜嘅口味確實係會令人懷念嘅，下次過開嚟可以再encore試吓個大辣。…Read More

蟹籽沙律，蟹籽沙律有好多醬汁，口感鮮嫩爽脆，啱哂重口味嘅朋友。牛油果軟殼蟹反卷，軟殼蟹上到枱都仲係熱辣辣脆卜卜，加埋牛油果豐腴嘅口感，真係一啲都唔會覺得油膩。九件壽司盛合(配手打烏冬)，呢個壽司盛盒有九件壽司，另外仲有一碗手打烏冬，手打烏冬湯底清甜，壽司用料上乘，比較出色嘅有三文魚腩壽司，火炙帆立貝同埋八爪魚軍艦，十分抵食。串燒多春魚，多春魚賣相完整，魚肚裏面飽滿嘅魚春，係唔食生嘢嘅daddy喺蟹籽以外一個唔錯嘅選擇。鹽燒開邊雞中翼，雞中翼嘅外皮燒到脆卜卜，連減緊肥嘅妹豬都忍唔住食埋雞皮。串燒免治雞肉，免治雞肉個味道好好，好想知道用乜嘢配料醃製。三色丼(火炙醬油漬三文魚腩左口魚背脆脆飯)，驟耳聽以為係一個魚生飯，細看之下原來係火炙過嘅三文魚腩同埋左口魚蓋飯，三文魚腩選料肥美，被火炙過後魚油四溢，魚油再滲番落個飯入面，滋味就係咁簡單。…Read More