4V's Profile

尋日專程去幫襯, 一入門口, 見無人帶, 就行入少少, 點知就比咖啡師一句 "你地幾位架? 無位就企定0係度等啦" 嘩, 無嘢呀?! 依D乜野態度. 我地連一張檯一張凳掂都未掂倒就要比你西口西面一句趷埋0黎.星期日0黎得依0的咁隔涉0既工廠區都係專誠0黎幫襯啦, 未食已經一肚氣.再加上食物無特別, 價錢又貴, 仲要咁0既態度, 一食完即刻決定永不幫襯, 仲即時unfollow 佢0既ig題外話, 專登0係佢地ig 留言, 希望佢地留意下服務態度, 轉頭就比人delete 左個msg.依0的食店, 自己有問題唔係先去反思改過, 而係選擇性delete 批評, 怪唔之得永無進步!!!…Read More

先唔好提啲包好唔好食，因為買左未食，但果比店員激親果種受氣程度簡直難以形容。一入到去，淨係聽倒勁嘈音樂聲，同短白髮女店員講要裸麥麵包同普通麥包，佢聽唔倒我講嘢，唔緊要，我指比佢睇。好喇，跟住我同佢講要求切，佢竟然問我切乜，咁梗係切包啦，仲有乜可以切呀，大姐！？之後都比錢，我聽倒113, 佢果種停喺倒透大氣再望我一我唔講嘢，之後先再講83 呀，我果刻真係嬲，乜事呀依家，佢知唔知啲音樂根本大聲到無人聽倒佢講乜，但依家就好似我有問題，依啲服務真心勁呀！無論最終好唔好食，我都唔會再幫襯，無謂揾氣受！…Read More

之前收到佢地0的自助餐通知, 見價錢幾抵, 又近屋企就打算初一去幫襯啦.好喇, 剛才打去, 新年流泡一聽倒佢把聲就真係唔多老0黎, 接電話果位男服務員把聲好似未訓醒.唔好話恭喜發財, 連午安都無一句, 晦晦氣氣咁講完 LIS 就算好喇, 問佢今晚buffet 有冇位, 佢話有, 我答佢5位, 跟住佢就話要去bar 檯坐, 跟住就只係問book 定唔book. 因為同行有老人家, 我當然要問清楚bar 檯係點. 果位哥哥淨係話總之就係0係餐廳隔離, 近甜品櫃. 我再問佢咁0的椅係唔係高d, 佢淨係答"唔係"跟住問佢即係點, 佢淨係識講總之唔係高椅, 又要我再問佢咁即係點呢(其實佢係問一句答一句, 解答唔倒客人0既問題)佢就繼續晦氣話"唔係坐sofa, 唔係坐高椅, 只係0的枱矮d"真係越講就越令我忍唔住省佢話"先生呀, 初一留留, 唔該你唔好咁0既態度. 你仲要係0係酒店做服務員, 你依家咁0既態度即係點"佢不但從來無say 過一句sorry, 仲要話"我已經好好態度, 亦都已經同小姐你講得好清楚bar 檯係點"真係唔明作為客人我想book 位嗟, 問多兩句 (最主要係佢從來無主動講解), 點解會比服務員省返轉頭...!我都費事再同佢糾纏落去, 跟住堅持叫佢搵另一個同事同我傾. 最後佢只係拋下一句, "咁好囉" (個"囉"字仲要係高音果隻).最後我梗係唔幫襯啦, 費事去到比人點相不過依0的咁0既態度, 真係難為左間酒店咁落力宣傳, 都只會趕客走!!…Read More

依間餐廳初開時都有幫襯過, 果時見佢有d 比較特別0既西式早餐, 所以就算價錢略貴都照幫襯 事隔好幾個月無去, 今日再0黎, 已經轉哂港式早餐. 睇均都真係揀唔落, 因為都係果幾樣港式早餐 (仲要收加一喎), 但係價錢比一般茶餐廳貴, 真係無乜原因要幫襯. 不過既然入到0黎, 就是但叫樣啦. 點知就發生件令我 0既事 我問侍應姐姐依個餐0既沙嗲牛肉公仔麵可唔可轉米粉, 佢即刻斬釘截鐵話 "唔得":( 唔得都算, 估唔倒佢竟然同我講 "你轉出前一丁囉" 吓...乜出前一丁唔係公仔麵0黎0既???!!! 我唯有答佢我唔食公仔麵／出前一丁, 亦認為既然無野0岩, 就真係唔想幫襯, 決定走人:( 好唔好彩同日中午有FD 搵食飯, 好衰唔衰佢已經自行入左依間餐廳坐定等, 硬住頭皮都要入去啦 擺明侍應姐姐將今朝0既事通告天下, 因為成程我見0的廚房佬0係咁從出菜位"裝" 出0黎, "裝" 完就係咁講. 咁0岩我坐0既位置就哂佢地望. 我唔知係唔係侍應姐姐0既傑作, 但係已經令我成程飯非常唔自在.:( 我唔明我究竟有乜做錯, 個餐唔0岩食, 唔通仲要迫自己繼續留0係度幫襯?! 我接受唔倒囉 同埋餐廳侍應服務真係好值得改善, 永遠口黑面黑, 無論你自己一個幾時入0黎, 佢係唔係都會問 "一個呀?!" 唔通你見倒我隔離仲有一個係其他人睇唔倒0既?! 綜合而言, 我唔會再幫襯.…Read More

先祝自己生日快樂!今晚嚟依度慶生, 之前老公訂位時指明坐窗口位, 另外問埋生日當天有乜優惠得出嚟嘅答案係"無" 嘅, 只係話可以訂蛋糕, 半磅$180; 或者自擕, 可免切餅費最後決定與其留肚食蛋糕, 不如叫多樣嘢仲好是晚叫咗海鮮拼盤, 黑松露蘑菇湯, 澳洲牛排, 另由於睇網友留言話水要錢所以叫咗杯jasmine lady + orange juice (事後先知除左有氣或蒸餾水要錢,一般水係唔洗收錢!!)另每檯均有麵包籃, 熟人有得refill , 我地當然無優：- 麵包籃中以酥皮包至好味,勁濃牛油, 隔離檯都聞倒. 好鬆化, 一咬就散開至於果0的醬料, 以蕃茄醬最好味, 烤蒜頭亦不俗,反而牛油就無用過 - 海鮮拼盤好多選擇(詳見相片), 大堆頭, 賣相吸引, 除左蝦無乜蝦味, 龍蝦嚡咗少少之外其他都好好食,特別係鮑魚仔, 青口以及牛油果沙律- 黑松露蘑菇湯係我至喜愛嘅口味,因為好重蘑菇味+忌廉, 勁濃, 正!- 牛排尚算嫩滑, 伴碟迷你千層麵亦不俗- 景觀當然一絕, 是晚被安排坐在270度求婚位隔離果張, 已經夠開心- 服務周到, 每次行開行埋都有waiter 拉椅, 而且亦多謝前多謝後, 非常有禮缺：- 老公麻麻地咁重忌廉嘅蘑菇湯, 所以只order 一個當時waiter姐姐話叫一個都可以幫我地分開兩碗等我地可以share, 最初知佢咁細心就梗係開心事後真係比足兩碗, 找數先知亦都要比足兩碗正價價錢當期時追究都無用, 因為事實上真係飲咗但係就絕對比waiter 誤導, 早知點都係要叫兩碗, 就唔會order 埋同一款啦..搵笨!- 牛排無被問要幾成熟, 比扣少少分整體而言, 雖然比watier老點,但係都算係一餐滿意嘅生日飯, 加上用citibank card 有折令我過咗一個有美景有美食有美男 (係咁意都讚吓我老公啦:) 相伴嘅慶生飯…Read More

是日同老公食早餐分別叫咗火腿通+煎蛋+腸仔+油多+凍檸水走甜我就叫咗雞蛋芝士三文治烘底+熱檸水一嚟阿姐放低兩杯凍檸水我同佢講要熱個喎佢即刻黑起塊面話 "你明明係叫凍檸水"咁我都黑番塊面答 "我叫熱嘅, 我從來唔飲凍檸水"跟住佢繼續講 "你根本就係叫凍嘅"我都廢事理佢, 最後佢見我唔接, 唯有死死地氣改番張單拎杯嘢走由於佢事前無講邊杯走甜最後老公就要硬飲果杯甜到爆嘅凍檸水 :(食到中途, 我個位樓上果部冷氣機竟然滴水仲要滴正我份三文治果一刻真係好慶, 但見食剩少少, 算數, 唔同佢計總結今朝咁差勁嘅經驗決定唔會再有下次!!…Read More

知道此酒店新張期內buffet 做緊7折優惠加上又好近屋企, 決定今晚同老公一試優：- 座位相隔唔會太近, 有空間感; 加上燈光調較得暗, 適合撐枱腳- 魚生種類多, 除基本三文魚, 鯖魚, 北寄貝, 墨魚之外仲有希靈魚, 甜蝦, 大帶子, 新鮮又好味- 咖哩款式好多, 最重要仲有好多配料, 如蕃茄, 菠蘿, 提子乾, 青瓜粒等比你加- 甜品櫃形式, 比較企理; 以乳酪(有原味及香蕉味) 代替雪糕, 比較健康蛋糕一般唔算好甜, 不俗; 仲有近期好hit 以小玻璃牛奶樽裝嘅牛奶布甸, 好味道- 多款贈食, 先嚟麵包籃, 之後係清蒸海斑及煮蟹腳, 味道不俗- 食物refill 算快缺：- 侍應生手, 路過唔會收碟, 又或者成日落錯單, 加上其中一名侍應成日都匆匆忙忙咁跑嚟跑去, 令人感覺緊張- 食物種類唔多, 特別係熱葷- 贈食之一蒸魚蓖都無粒, 成場睇勻都無, 感覺爭啲- 是日梳乎厘只有綠茶口味, 唔甜之餘仲有啲苦澀味, 無乜口感, 比較差- BBQ同魚生位太多人輪候, 其實是晚只係坐咗7成人,都已經等至少15分鐘, 多人時真係唔敢想像總括而言, 此buffet 最大嘅優點只係就我腳如其他食評所言, 如無折, 真係唔會幫襯囉…Read More

知道會行過依頭, 於是專登上openrice 睇下有乜出名食肆餐廳可以幫襯選擇入May's Cookies 睇睇, 最後買左盛惠$48 細包裝嘅花生曲奇優：- 雖然幫襯咁少嘢, 但係店員態度一流, 隨便試食, 又作簡單介紹, 兼主動同客人傾計, 非常好- 店舖裝修簡約, 感覺清新舒服- 曲奇味道唔太甜, 亦唔太油缺：- 其實每款曲奇味道差唔多, 好突出好好味就絕對稱唔上- 檸檬曲奇味道怪怪- 價錢比其他homemade cookies 稍貴總括而言, 如果真係再食, 我會選擇食盡啲揀 jenny's cookies縱然勁高卡路里, 但係真係食得好滿足…Read More

今日去kapok買嘢, 順道經過yogurtime, 聞名以久, 決定幫襯入到去, 得兩個客, 店員唔知去咗邊, 講咗句"唔該"都無人應後來佢終於行返出嚟, 先知道佢係外籍人士, 唔係好聽得明中文見佢除咗原味, 仲有朱古力同荔枝, 食開原味嘅我梗係要試試其他味最後叫咗大杯裝荔枝味yogurt + dry banana + xx (個牌上無名, 只係知白色, 一絲絲嘅,問店員, 佢話唔知係乜乜混埋honey, 我唔係好聽得明, 上網check 完都唔知我揀嘅究竟係乜..)盛惠$38 優：- toppings 除左基本料之外, 仲有幾款較特別, 例如我揀果兩樣dry banana 好有咬口, xx 就帶微微蜜糖味, 幾特別又好味- yogurt 有淡淡嘅荔枝味, 味道剛好, 唔會好甜, 反而好fresh - yogurt 份量好足, 無一般froyo中空嘅情況, topping 亦多 所以相對價錢抵缺：nil之前喺灣仔都試過其他froyo, 以yogurtime 表現最出色但係下次我都係食返細杯, 因為食完飯再食杯大真係會勁full..…Read More

今日返工前想出去食早餐, 決定再次幫襯依間眼見入座率比之前好, 戥餐廳老細高興是日叫咗早餐C, 幾款三文治料中我揀咗芝士加咸牛肉另要西柚汁一杯今次要調一調次序, 講左缺點先缺：- 雖然人少, 但等候時間耐, 我諗我等咗大約5分鐘杯西柚汁先上(另一檯新嚟嘅男性顧客杯凍奶茶竟然比我仲早到!!??)再另外等多7分鐘份早餐先上(同一時間與我叫埋同一份早餐C果位男仕亦都有得食)變相我其實等耐咗, 因為廚房同時做兩份, 唔會先嚟先做食一個早餐要等十幾分鐘, 對匆忙嘅香港人嚟講真係接受唔倒囉- 麥麵與咸牛肉均處於室溫, 所以塊芝士係唔會熔, 分開哂, 唔係咁好 優：- 唯一優點係賣相, 仲有沙律菜放喺三文治旁, presentation 似足supxx sxxdwich埋單時, 點解會收$28 嘅呢, 明明係$25 個喎睇返張單, 先知竟然收加一, 仲要 4 捨 5 入, $27.5 變左$28 廿幾蚊嘅早餐要收加一服務費(仲要其實無乜服務可言)自我感覺欠佳下次要係再幫襯, 都一定唔會食早餐!!…Read More

是晚首次嚟到The One, 好多舖頭都未開但係某啲食肆已現人龍, 將來多人程度真係唔敢想像同老公都唔想等, 但係又唔敢行入啲小貓三四隻嘅食肆幫襯依間似乎最合中庸之道 - 幾乎爆滿, 等一陣就有位坐睇均成個menu, 似乎唔及九龍城果間多嘢食最後揀咗菠蘿炒飯 + 鮮蝦米卷 + 牙車快優：- 雖然人多, 但係上菜時間幾快, 值得一讚- 菠蘿炒飯面有3隻蝦, 齋睇都覺新鮮, 因走過油, 食落脆脆地, 不俗- 牙車快勝在落得唔多魚露, 清清地, 健康之選缺：- 放左勁多枱, 所以無乜空間感可言, 好在部份2人位中間稍為以玻璃／木板牆相隔 - 要求要杯暖水, 但就幾乎熱到用手掂一掂個杯都頂唔順, 要溝多杯凍水先飲得, 侍應明顯唔夠細心- 鮮蝦米卷入邊放咗超多香葉, 自問食唔慣, 拎上手已經聞倒一陣怪味, 我覺得直情可以用"臭"去形容, 勉強吞落肚其實整體表現幾好, 只係本人唔慣食香葉, 下次如有機會幫襯, 會叫佢全走香葉…Read More

是日經過尖沙咀, 知道Roll 有froyo 買, 我哋依啲 froyo 怪就梗係幫襯order 咗細杯裝(26蚊), 另加多3蚊要多一款topping分別要咗花生糖及homemade 綠茶mochi優：- 乳酪酸度夠, 奶味濃度低, 夠滑, 合我口味, 如果調轉就會變成雪糕- topping 用玻璃樽裝住, 用時先開蓋, 夠衢生- 綠茶mochi 好食, 茶味濃- 價錢合理,如要大杯都只係30蚊, 但就咁睇真係好大杯, 食完唔洗食飯- 店員服務態度良好, 非常有禮缺：- topping 除左自家mochi 特別啲之外, 其他款都係基本配料, 無乜特別以尖沙咀而言, 未試過The One 入邊果間froyo, 無從比較但係如要喺 Misocxxl 與Roll 揀我一定會揀Roll, 至少換來一張親切笑臉, 而非口黑面黑…Read More

是日感冒, 胃口欠奉, 適逢老公行過此店知我一直期待品嘗此店名品 - 檸蜜脆脆特別買來給我之前睇openrice 知道網友話如果唔係即場食帶返屋企時最好用焗爐而非微波爐翻熱口感會好好多於是就叫老公照做第一口感覺係好脆之後感覺複雜, 有啲甜(蜜糖), 有啲咸(牛油), 又有啲酸味道帶層次亦複雜你話好好食咩, 又未至於, 但係值得一試!…Read More

是晚黑雨高掛, 為左避免由頭濕到落腳, 決定搭地鐵落金鐘最後選擇咗幫襯依間聽就聽過幾次, 但係未食過嘅星馬菜餐廳先講裝修, 是日大雨, 為免舖面入水(其實都應該無乜可能),餐廳喺門前橫放一條疑似大沙包嘅隔水設施, 高度約有我嘅小腿一半好在尋晚著平底鞋, 因為舖面對出無瓦遮頭, 門頂係咁滴水加上門口整條咁嘅嘢, 度玻璃門又鬼死咁重喺無人提點"小心"嘅情況, 一吓唔覺意kick 親或者跣低都唔知乜事入正題, 是晚同老公二人叫咗海南雞喇沙, 星馬炒波菜麵(exactly 叫乜名記得喇)南瓜焦糖咖央多士, 另配凍／熱檸水各一優：- menu 整得好有心機, 相片print 落牛油紙, 直頭成本相簿, 咁有心思, 值得一讚- 女經理第一次比水我時,我要求熱水, 之後加水, 佢都記得幫我添返暖水, 夠細心- 海南雞為雞脾位, 嫩滑- 熱檸水唔知原來已加糖, 所以一開始無叫走甜, 好在甜味適中, 唔似一般白糖味有少少蜜糖香彈：- 正正因為menu 圖文並茂, 所以更見得物不所值份量偏少, 所以價錢就相對地貴- 配海南雞的黑豉油, 咸又唔咸, 甜又唔甜, 唔夠杰身, 我覺得唔掂- 最唔掂係南瓜焦糖咖央多士, 一上檯, 黑媽媽成舊炭咁最經典嘅係咖央凍嘅, 多士涼嘅, 唔知食緊啲乜係唔係加落焗爐熨一熨佢都懶？！總括而言, 地點唔算就腳, 食物質素一般, 價錢相對較貴就算再行過, 都唔會再幫襯…Read More

由於每日搭車都會經過灣仔道所以對附近舖頭都幾留意依間前身為熱狗店, 舖位面積對於速食店嚟講算大加上身處內街, 無幾耐就執左前排搭車經過見開乳酪店, 正合我口味話哂成個灣仔都無一間從openrice 知道佢已經開張, 當然要一試今次叫咗100g yogurt ($15) (yogurt 得一個size, 無其他) 原味 (另有士多啤梨味揀)topping 揀咗士多啤梨, 奇異果, 藍莓, homemade 麻糬, 餅碎, 紅莓乾, 果仁(其餘topping 無乜特別, 同其他yogurt 店差唔多)計完重量, 合共$33優：- yogurt 味道幾濃, 口感順滑, 幾好味缺：- topping由店員負責, 係我去過咁多間同類型yogurt 店每次份量最少當然亦可以理解少啲輕啲自然可以揀多幾款topping但係睇見佢丁啲丁啲咁, 就係覺得唔過癮相信價錢要去到35蚊或以上, 杯yogurt 先可以叫"足料" (即係每口都有topping)- 食食吓先發覺做緊promotion (見圖), 新張期間直至8月13日只要幫襯買yogurt 出示此promotion leaflet 就會多送一款topping第一時間諗, 無錯, 我買果刻無show 倒張leaflet 但係其實佢哋都係就咁放出嚟任人拎, 甚至係咁派比途人我入去幫襯, 點解店員反而唔出聲話可以送多款topping 比我呢?係唔係真係要去拎一張剪埋隻角出嚟show比店員知先會多一款呢?唔係話貪佢果款topping (事實上都係得丁屎咁多, 例子：藍莓得3粒)但係就令我覺得店員甚或駐場嘅老闆都唔夠細心, 服務唔夠周到- 裝修欠奉, 門口玻璃門好似無抹過咁始終係新開, 仲有待改善 此外, 每逢幫襯夠$20 就可以儲印仔, 儲夠一定數目就會送一款topping再儲多啲直頭送一杯不過下次再幫襯, 好大機會就咁齋yogurt 算雖然儲唔倒印, 但係topping 得果啲啲, 真係加唔加都無乜分別…Read More