RinoaChan's Profile

朋友在機場返工，提及東涌藍天海岸一帶有很多餐廳，尤其到了星期五晚上很多人happy hour氣氛很好，就約了今晚去試一試。地鐵站出來穿過citygate mall就可以到藍天海岸，其實都幾方便。這一帶真的有一列餐廳，有茶餐廳有印度菜，也有幾間西餐廳，我們最後選了A Tavola Bar & Grill, 因為入面有個很大的bar, 有超大的螢幕播著足球賽，最重要是—它最多人！比起旁邊的它熱鬧得多，所以我們二話不說就進入了Tavola.因為我們肚子太餓，眼見很多人都只喝酒不吃飯，但我們當然要叫點東西吃！見這是間意大利餐廳，當然要點pizza和pasta la! 最後點了12”BBQ chicken pizza和lasagna.還有兩杯pina colada.Pina colada先到，椰子味剛剛好地與菠蘿汁blend在一起，rum酒味不太濃很易入口。Pizza先到，融化了的芝士超吸引！它是用照燒醬汁焗成，咬下去用料充足，芝士與醬汁味道很夾，雖然本身麻麻地厚批，但濃濃醬汁配厚批又幾好食！再來就是焗千層麵，千層麵的香料很濃郁，肉醬經典的味道完美融入了闊條麵中。兩個人吃兩道菜吃到捧著肚子走，而且晚了反而越來越多人越來越有氣氛，非常推介Friday night happy hour！…Read More

之前上網睇介紹話呢間係食片皮鴨的抵食之選，星期五放工就嚟食晚飯。平時經過親都好多人排隊，今日6:30pm 到等10分鐘就入得。入面有海景位，但full曬坐唔到，唔知係樓底低定咩原因，入面好似飲茶樓咁嘈，。叫咗片皮鴨、小籠包、火鴨羹。其實見隔離檯叫煎餅都好似幾好食，但兩個人唔食得咗多，下次再試喇。湯羹先到，一貫嘅味道。幾好味。跟住上小籠包，皮薄但餡同湯未算好鮮甜。都係水準平均之作。到最期待嘅片皮鴨！鴨皮同肉都係切好上檯，再加醬料、大蔥、青瓜，鴨皮有d油，點醬食可減油膩感，鴨肉少少「鞋」，食到一半食曬大蔥想叫侍應添d,但侍應話要加$20。好奇怪點解咁都要收錢。整體來說不過不失，呢個價錢食到片皮鴨算好抵。但環境太嘈（可能坐近窗海景位會靜d),如果約朋友嚟傾計就唔推介了。…Read More

呢間船麵近排好多人推介，一搵沙田美食差不多俾佢洗版，攪到今晚我地麵要嚟湊熱鬧。入到去店面好得意，有好多店員手寫嘅攪鬼提示，嚟之前朋友已經話入面嘅嘢飲好特別，好值得試，見到牆上貼咗特飲介紹，決定試豆漿蘭香籽。點菜！當然食最出名嘅船麵，配菜有好多選擇，我揀咗豬頸肉加扎肉，朋友揀雞翼同扎肉。反轉張點菜紙，後面話加錢可加串燒，當然要加啦。麵嚟喇！一望個湯式咁深色已經同出面唔同，同埋超級香。食落個湯真係好正，比出面的越南粉湯式更湯更惹味。而佢配菜之一嘅炸豬皮粒，唔好講笑好辣，我唔食得辣，所以個湯底浸得耐都變咗有辣，下次我會走炸豬皮粒。豬頸肉同雞翼都好好食，而扎肉同出面啲麵粉較多嘅扎肉唔同，呢一個較為軟身，我覺得好好味。串燒非常推介，尤其係個沙嗲醬，一流！唯一美中不足係個嘢飲，個豆漿有少少鹹，所謂嘅香籽其實就好似西米，所以豆漿加入面啲西米其實唔係好match。…Read More

每個weekend D2都有市集，今個星期就係俾佢嘅市集吸引而來！而呢個商場都好多俾手作人寄賣嘅店舖，第一次來簡直驚為天人！行完市集肚餓，就嚟咗Holly Brown醫肚。佢樓底好高，裝潢好工業風好靚，決定一試。望住menu心大心細，因為樣樣都好似好好食，見到隔離檯嘅pizza薄pie好似好好食咁，佢更標榜手打，於是決定叫個三文魚pizza.本來想叫多個燒雞，但眼見pizza實在大個，就改咗煙肉焗薯角。另外嘢飲叫sparkling peach 同 sparkling lemon.飲品先來，好好飲！有果香又一d都唔藥水味。再嚟pizza, 最鍾意簿pie, 咬落去又脆三文魚又香，個醬同三文魚更係一絕！最後煙肉焗薯角，簡簡單單已經好好食，個人認為唔點sour cream仲好食。…Read More

朋友住石門推介呢間西餐廳俾我，所以就揀咗呢晚去試！呢間餐廳細細間唔多位，但夜晚石門冇lunch咁多人，比較易搵位。朋友推介我食risotto, 但我見到menu咁多款，心多想試第二d, 就叫咗西班牙黑豚漢堡同埋鈕西蘭羊扒西西里(跟餐再要餐湯同薯條）先上來的是餐湯同薯條，餐湯非常有水準，每晚都不同，我當晚的是南瓜湯，濃稠的口感喝起來很有新鮮現做的感覺，薯條上面灑了黑松露，一樣好吃。再來是黑豚肉漢堡，一看就知不可能一口吃下，要分開逐層逐層吃了😅分開來吃先吃包，就咁食個包都好好食！脆脆的又有芝麻香，很有驚喜！到主角黑豚肉也不負眾望，但本人不愛吃酸瓜，下次要叫他們走酸瓜了😅。然後是羊扒闊條麵，看起來小小的但吃下就頗大portion, 意粉汁香，羊扒也很好吃！看到隔離的意大利飯好像真的很有水準，看來短期內會再來試其他set了！…Read More

朋友喺附近返工，一向都知呢頭多嘢食，就揀咗呢間成日見有人排隊嘅日式餐廳！利舞台搭𨋢上去就係，我好似都係嚟過兩、三次only。上到去7:00pm好早未見多人，好嘢～門口見到有員工整緊佢招牌嘅釜飯，心諗一定要叫一個！坐低睇餐牌，好多選擇！想叫個沙律但唔知點揀，問店員推介佢推介個蕃茄沙律俾我，因為蕃茄係日本入口嘅好新鮮，另外叫多個煙肉扒陶燒、芝士玉子燒、豆腐燒同蠔釜飯就食住先啦～沙律先到！果然名不虛傳，未食過咁好食咁新鮮嘅蕃茄！我本身鍾意食蕃茄，食開嘅都會有少少腥/澀味，但呢個完全冇！好甜！終於明點解日本人冰完嘅蕃茄可以就咁生食，因為日本蕃茄真係就咁冰完就好好食！另外沙律嘅醬汁都好好食。跟住係煙肉扒陶燒，店員會點著下面個爐由佢烤一陣，烤到d油水出曬嚟差不多就可以食，話時話呢個真係驚喜之選，因為d煙肉烤到燶邊時食，d油又薰到d配菜南瓜薯仔超好食！再嚟一個芝士玉子燒，個蛋切落去嘅時候已經覺得好軟熟（唔係其他地方嘅過熟咁un)，最緊要係佢拉！絲！個人鍾意食芝士。覺得芝士味可以再濃d, 不過唔係芝士狂熱者應該覺得啱啱好吧。中場嚟嘅薑蜜，薑味好重我鍾意。到豆腐燒喇！老實講呢個係我當晚最鍾意食的！豆腐外脆內軟，外面嗰種脆仲要係鬆化、唔係好厚粉漿嘅脆。而豆漿本身都好好食，一大推介跟住終於到主角釜飯，其實應該影多幾張相，因為佢一上檯時蓋住鍋俾個沙漏你倒數夠鐘就開蓋食得！ 一開蓋就聞到飯香，佢有個汁跟埋但本身飯入面都有少少汁已經夠味，飯入面有好多蛋絲同魚仔同栗子（但個人覺得栗子太多搶咗飯嘅口感），而個蠔一d都唔腥，好juicy!食到一半會recommend你倒茶入去整茶泡飯食，呢個係我至愛嘅食法～…Read More

東涌飲茶食小菜，東滬庭係一個好好嘅選擇！因為佢機場員工同東涌住戶都有折！今日嚟食lunch,望住個餐牌真係有d眼花撩亂，因為佢除咗本身嘅點心紙，上面已經有上海菜必食之小籠包、蘿蔔絲酥餅、生煎包，更有個好抵食嘅4人商務午餐，一碟樟茶鴨（或轉蔥油雞）加3個小菜加4個白飯（或轉擔擔麵）加甜品送湯（或轉豆漿）都只係四百幾蚊！最後叫咗我好鍾意食嘅黑醋排骨、奶油津白、蔥爆牛肉，加4個擔擔麵及樟茶鴨。3個小菜全部都好好食，呢個店d嘢食好有水準！最估唔到係擔擔麵，諗住佢飯轉成的就會變迷你版，點知嚟4碗4碗都係standard夠幾個人share嗰種，都咪話唔嚇親。樟茶鴨跟饅頭上，同事話係要饅頭連鴨一齊食的，但我實在太飽，決定留胃口唔食饅頭，樟茶鴨本身有d乾，唔特別好食。小籠包一貫咁好味，生煎包入面係有汁「必」出嚟嗰種，好好味。甜品揀豆沙窩餅，餅皮太厚就沒太大驚喜。…Read More

住喺屯門無理由唔識粉仔檔！佢絕對係屯門友嘅集體回憶，皆因100%食地道嘢好好食！唔好睇佢格局好似得街邊位，只係梗有人鍾意坐街位，其實行入去佢裡面有兩個冷氣舖位，而且有店員幫你落單兼捧埋俾你。而且呢度有個大mon,俾你睇住有冇人抄牌！如果有人抄牌，店員仲會好好咁衝入嚟大叫提醒客人，呢個服務真係窩心至極。嚟到唔係唔食粉仔呀化？呢度嘅粉仔真係入味又足料（蝦米），而且炸菜任添，粉仔軟硬度剛剛好！啖啖都是幸福！燒賣都係我必點，唔知點解佢肥豬肉度適中，係我嘅大愛。另外又係必點嘅生菜魚肉，又係唔知點解，簡簡單單一個清湯，已經同魚肉味好夾，魚肉又彈牙，麻油味香濃，一直好奇點解望落咁簡單嘅嘢可以令我食得咁滋味。其實腸粉都係又滑又好食之選，只係今日下午茶時間嚟唔想食咁飽，下次再嚟掃過！…Read More

上次喺附近食少爺泰，對面見到呢間店有all day breakfast食，就mark咗下次嚟食早餐。今朝約10點嚟到，店入面唔多人，就坐低睇餐牌。蘇花係一間小店，但坐得舒服。餐牌早餐走茶餐廳路線，但選擇不多，點了all day breakfast 及漢堡薯餅多士餐。茄通先到，普普通通湯底味道蕃茄味不算濃，而且螺絲粉偏硬。跟住漢堡餐到（太肚餓了薯餅吃了一口才記得要拍照）其實所有食物都是即食的味道也很standard,但我會想蕃茄都應該加些調味或烤底，但都沒有。另外all day breakfast 餐到，也有同一情況，蘑菇沒有調味（通常都會下些黑椒炒吧？），也像沒有炒過，有點失望了。另外店內冷氣很弱，見有客人坐下後因爲冷氣太弱而立即離開，幾方面加起來應該不會再幫襯。…Read More

上網見人介紹呢間炊豕店，有讚冇彈，仲個個都影相影個豬扒飯好吸引！就決定今晚收工過去試！由於朋友喺附近返工，約佢7:30pm。我7點百德新街站落車慢慢行過去，行行吓朋友打俾我，話快d嚟因爲未人齊唔入得，隔5分鐘佢又打嚟問行到邊開始有人龍。頂明明冇遲到但真係去到已經出現長長人龍。排第一店員叫我地諗定食咩，睇張點菜紙樣樣都好吸引，但最後都係叫經典豬排肉燥飯同豬排咖哩飯。好快店員話入得問想坐bar檯定普通檯，我揀咗bar檯，可以睇到師父整嘢食。但係一坐就心諗大鑊，因為店裡面本來已經唔係好大冷氣，bar檯更加唔夠涼，好彩都勉強唔會出汗。但坐bar檯嘅好處就係更距離見到煮嘢食過程，見到店員將一塊塊豬排放入炸鍋，炸到脆卜卜，然後再切開，切時每一塊炸得香脆都聽到清脆嘅切聲，聽到已經好肚餓。等咗一陣，餸到了！咖哩飯先到，咖哩汁另外裝開，塊豬排有我塊面咁大，而且炸粉好薄，炸完都完美咁保留返豬排嘅原汁原味！豬排肉質鮮嫩，連埋炸粉食都唔覺油，超好食！咖哩汁微辣帶甜，越食越開胃。跟住到肉燥汁了，一開始塊豬排大塊到睇唔到肉燥，要攞開先睇到，肉燥用嘅係肥豬肉，啱曬我心水，肉燥汁甜甜地，又係好味到唔停到口之系列。絕對會再幫襯，不過真係要7:30前到，如果唔係要等一段時間。…Read More

約咗個大埔朋友食飯，大明里好多嘢食，逛吓逛吓就見到呢間，出面睇個餐牌好吸引! Cafe格局但係又有韓式炸雞又有熔岩芝士法包，就一於入去試。入到去睇個餐牌又係不得了！我嘅朋友因為宗教問題唔可以食豬，但呢度都好多選擇，完全唔駛擔心。最後我地叫咗熔岩麵包芝士炸雞同埋龍蝦汁炸蝦龍利柳意粉。隨餐跟湯同牛角包，好抵。先嚟個炸雞，類似嘅熔岩芝士我喺韓國食過，呢度嘅味道都不輸韓國！芝士可以用嚟點佢個包（係蒜蓉包）同埋配埋嘅薯條，炸雞係分開用酸酸甜甜嘅汁炸起，有少少乾不過味道都ok。但係個芝士熔岩真係好有驚喜。跟住嚟個龍蝦汁炸蝦龍脷柳意粉。上檯已經好吸引，炸蝦薄薄的一層炸粉香脆可口，入面龍脷柳加咗厚芝士焗埋，龍蝦汁唔算好重龍蝦味，反而似一般嘅芝士焗飯嘅味，但佢係配意粉，所以感覺上如果有得配飯就仲正！我地兩個女仔，叫兩個餐都食唔曬，因為淨係個熔岩芝士已經又芝士又炸雞又薯角又沙律，又好味又抵食。…Read More

有朋友住河畔，推介鍾意食泰國嘢嘅我去呢間泰菜館食嘢，就趁weekend嚟食lunch。河畔呢頭不嬲都多嘢食，位置偏了一些嘅少爺泰，好容易走漏眼。但入面都坐得舒服，裝潢簡潔。嚟到睇menu, 入面好多正宗泰菜食例如豬脾飯、青咖哩雞，都係我嘅至愛，佢menu特別在有餸菜嘅background介紹，如點樣煮先正宗，本來想叫豬脾飯因爲唔係度度有，但見佢介紹海南雞飯好吸引就叫咗海南雞，朋友就叫咗菠蘿脆骨飯。上菜了！海南雞飯大大碟，雞肉多而且滑（咁強調佢多料係因為我做嘢嗰度嘅海南雞見住佢隨年月而縮小，所以見到出面價錢差不多但料多咁多形成對比），飯的確如餐牌介紹，唔似出面一咪只有雞油味，食得出佢落咗斑蘭葉同黃薑粉，所以淨係個飯已經好好食味道好有層次。另外點雞嘅醬，落咗少少紫蘇葉，所以味道清香，好味到清咗個醬朋友點嘅菠蘿脆骨，同咕嚕肉好似，一樣咁好味。價錢唔貴，服務又好。以後沙田食泰國嘢又多咗個好選擇！…Read More

有朋友喺太子返工，推介我地食呢間西餐廳，今晚決定嚟呢度試！18:30左右去到，都未full，但坐低過一陣就開始多人嚟，之後有人想入嚟仲因爲full咗冇得食，所以冇我地咁早嘅朋友仔記得book定位。睇到dinner menu set，好多選擇，侍應好好同我地講解一番，最後見出面唔係度度有豬手食，就叫咗豬手同羊架。精美嘅drinks menu:等菜中途欣賞餐廳入面擺設，好多狗狗公仔先嚟個湯，黑松露味好香，又多料，食得出粒粒雜菌，不過湯身偏稀，個人比較鍾意creamy d。重頭戲豬手登場！好巨形，比出面一些連鎖德國餐廳食開得還巨形，而且個皮好脆，肉質好嫩，肥瘦適中，雖然大件但不經不覺成隻食得曬。再嚟係羊架，又香又好食，但叫咗7成熟好似太熟，攪到少少un，下次嚟會叫返5成。再嚟甜品cookies n cream 雪糕，因為太飽了，我地二人share一個食～…Read More

去東涌食lunch，呢間係首選！皆因好好食又多款揀，仲要係好特別嘅fusion菜！好似今次同事叫咗嘅kimchi漢堡，一上檯真係大份到O嘴，絕對係冇可能一啖食得曬咁多層嘅size!我點了個all day breakfast，牛角包好脆但係如果可以焗返熱上更好，炒蛋好滑，腸仔同蘑菇都好味但都係典型嘅味道。另外同事叫咗淨牛肉漢堡，都好好食好大份。今次冇食燒雞，但係入店會見到轉住嚟燒嘅燒雞其實都係我另一至愛！外脆內juicy!其實之前成日叫，近來食厭咗今次先冇叫。佢裝潢都好有性格，以單車做主題，有用單車pad做嘅椅背，同埋好似單車道嘅牆上線條裝飾。另外d cake都好靚，但條碟嘢實在太飽，下次先再叫喇～（次次都話下次，但次次都飽到上心口試唔到）…Read More

同同事去銅鑼灣食lunch,揀咗mr steak 開嘅sky bar. 環境唔錯，場內有美式桌球檯、飛錶機，如果夜晚嚟食應該可以好好享用設施同relax一番。Buffet嗰part有海鮮但只有青口和蝦，海鮮選擇不多，還有沙律和cake, cake都有5、6款，但覺得味道普通。還有湯的選擇只有蘑菇湯一款，我沒有喝但同事話好咸。另外推介個日式凍豆腐，好好食。Main course有羊扒、steak、risotto等等選擇，如果叫risotto 百幾蚊已經有semi buffet食，其實好抵。叫咗羊扒$150，羊扒火候控制好好，我叫7成熟，佢燒得啱啱好，好好食。同事叫咗steak話都好好味。晏晝都幾難搵位，所以我地今次有打電話預約。…Read More