親戚帶路試新嘢。餐廳環境乾淨企理，座位寬闊，第一印象唔錯👍。三個人每人叫咗一款招牌麵🍜。另外，趁主菜嚟之前試下包點，於是叫咗兩客小籠包同一客生煎包。平平無奇嘅小籠包，夾起一啖噬落去，爆出鮮味肉汁🤪，射程之遠直飛對面枱 ，幸好對面冇食客😅，否則釀成衝突，打擾我食呢客皮薄肉鮮嫩爆汁小籠包嘅雅興😊。接下來嘅龍蝦小籠包 ，橙紅色嘅外皮已經挑起食欲。汲取上回爆汁經驗，我已懂得小心品嘗。原來肉汁混和龍蝦湯汁，互相提升鮮味，令人一試難忘。呢款色香味俱全嘅包點，係期間限定，要食趁早。對我嚟講，食生煎包無非都係為咗個脆脆包底，呢度嘅生煎包肉餡質素已無庸置疑，暖暖酥脆嘅包底更令我欲罷不能。水準之作👍。主角出場：潮人招牌麵。 見到實物已經覺得好靚😍，打卡都玩左十幾分鐘。紅紅嘅湯底不是地獄湯或濃稠的西式番茄湯，而是清鮮嘅龍蝦高湯。結實嘅龍蝦肉、日本帶子、肥美青口、彈牙墨魚丸……用上新鮮嘅海鮮食材🦞，冇得輸。跟住係佛跳牆面。好少湯拉麵會配上呢啲貴價食材，第一次見，非常有創意，以為自己去咗名人飯堂，人高貴咗，連氣質都提升咗。至於味道……自己試下啦，😋😋😋總之性價比超超高。最後係紅燒牛肉麵 。燘煮牛肉火喉剛好，肉質軟硬適中，紅蘿蔔清甜可口，配上微辣香濃牛肉湯底，想起台灣旅行嘅日子。結論：物有所值。總結：😌我無私地向大家推薦呢間將創意融入傳統美食嘅食肆；但我又自私地😈唔想你哋去霸曬啲位搞到我要排一粒鐘頭隊。 係咪好矛盾呢 🤣？ 食湯麵記得飲埋啲湯，真材實料淆製，不含味精，一滴都唔好嘥☺️。 …Read More
