米米魯's Profile

2/8/2023黎飲早茶，佢地前線員工既態度真係好差，詳情如下：1）全程冇人加過水、執點心籠，個個掂行掂過。2）十一點零鐘入左第二輪兩個點心，將近十二點都未有。3）想搵人取消，冇人理你，搞左一輪先搵到個人終於肯停低幫你簽名取消。4）擰張點心咭去到櫃枱俾錢，張單出到黎又係冇取消，仲要計埋我地午市茶錢，同收銀阿姐講，佢：唔知喎，機入左咁就係咁！5）到收銀阿姐終於識搵人求救，黎左個西裝氣燄阿姐，佢仲要怪責我地：「11:16你仲加單？！（其實呢個係你地入機而唔係我地落單時間）你見到咁忙你都仲加？！而家又要取消！」一路取消一路蛾。同佢講個茶錢計左午市價錢，佢晦氣呼喝：茶錢電腦set左，冇（得改）呀！」呢度無論食物既味道、環境、衞生，扺食度都仲保持到既，但服務比起之前真係急跌，如果有負分㨂我會俾負分，因根本完全冇服務之餘，點心你冇黎到我要取消係好合理啫？仲要俾你地鬧返轉頭，員工仲惡過客，真心受氣的一餐。…Read More

是日經過入內食下午茶，約17:10到店，無為意下午茶周六日至17:30，因餐牌同之前食開唔同左，所以要花少少時間細閱，然後有位男員工就上前，好不耐煩催我地要盡快落單，唔係就變晚餐，我望一望錶，其實只17:18，就講左句：「而家都係17:18啫」為免被再催，我都盡快求其㨂兩個算，但自助落單時由於電話訊號接收不良，就要求該男員工協助人手下單，該員工又是極不耐煩，話：「你自己擰張紙寫，你就咁講我驚聽錯！」唔緊要，你咁講咪照做，擰左張落單紙寫左餐號、份量、飲品，交俾佢，佢接左就話：「咁你唔飲野？」我：「咪寫左要熱拉茶」可能呢句又再觸動到佢個神經啦～我心諗：寫埋俾你睇你咪又係唔睇😑呢一刻已經覺得：係咪輸左馬？黎食野好似要食埋你d情緒咁，貼錢買難受。下次唔會再黎！然後，見有人到櫃枱埋單，應該用緊電子支付（因聽到使用緊終端機既聲）到我埋單時，我擰個手機出黎話用支付寶，該男員工就話：冇！部機壞左！我都廢事再深究，佢要玩野既話，話部機啱啱壞左都得，佢主場佢話事，我地做客既邊度有say。選擇以後唔會再幫襯就是。…Read More

呢間川菜食店真係百食不厭,最正係早午晚都有SET食, 好抵~午餐$37有四至五款餸選一另跟白飯同餐飲下午茶就又兩款SET選擇, 一款係平價D, $27選一款餸(丸類、豬肚、雞翼等普通野)。另一款$36,餸係多款特式四川菜式如口水雞、麻辣雞、夫妻肺片、蒜泥白肉等選一。兩款SET都可揀跟上海面/薯粉(薯粉仲唔洗另加錢, 超值!)同餐飲。個人認為跟四川菜式的那個SET較抵食, 因佢個餸係另外一碟上, 超大碟, 好抵食, 推介口水雞、麻辣雞、蒜泥白肉, 本身自己唔食得辣, 所以揀BB辣,都好惹味~晚餐就$46, 一餸一飯一菜加餐飲, 都係好抵食~除左SET另有多款散叫四川小食同主菜，值得推介~…Read More

地理位置問題,之前都是經住元朗朋友介紹先認識這間打冷食肆,食過一試難忘!今次再黎幫襯~店舖不算大, 但食物質素高,應屬家族經營,店員一家尤其是老闆老闆娘親切有禮, 價錢大眾化。鵝腸拼豬大腸($55)卥水單拼$50, 雙拼只需額外加$5, 超值!鵝腸必食,堅係正宗鵝腸, 唔會溝/甚至用雞腸代替, 好爽口, 豬大腸亦很入味蠔仔粥- 細($33)蠔仔粥, 其實唔應該叫蠔仔粥, 因蠔超大隻,分量又多,差唔多多過d粥咁滯,好足料, 讚!九菜蜆肉 ($25)另外叫左個九菜蜆肉, 因為未試過諗住試下,呢個就冇乜特別,但又係分量超多,蜆肉仲多過九菜由於得兩丁人, 試唔到其他野, 但單從卥水及蠔仔粥的質素、服務已覺得這間潮州打冷很讚, 值得推介~…Read More

我知道黑夜半價時段要求不可太高，但這裡的所謂半價優惠根本就唔係半價，何謂半價，係同樣質素既食物（最多你份量少些我都可接受）係臨收舖前以半價出售，但而家根本係用正價買劣質食物！優惠時段每人最低消費要＄75(包括正價計算的加一服務費），所以叫左以下食物：1.）正價＄68的咩極上豚肉拉面，好難食，未食過咁難食的拉面，面難食，舊豚肉如是（差D唔記得我連食拉面時必飲既湯底都冇飲到一啖，因食完第一啖已唔想再食落去）2.）正價＄88的所謂極上魚生飯個樣好靚吧？但只限餐牌張相，落單後先話唔係俾隻牡丹蝦你，黎到係隻開邊唔知咩蝦，咁都算，但相入面既帶子變左係得雪藏味既元貝粒一堆，張相入面係冇旦既，但黎到有碎旦粒同沙律菜一大堆，如以以上所講既質素，根佢唔係以半價買佢相中所謂既"極上"魚生飯，而係大拿拿用＄5X蚊買一碗劣質魚生飯！呢些主菜都差到咁，其他小食不願多提，總結一句，想食拉面，都係去返樓下既"築地拉面"，星期一至四同樣有黑夜半價時段，但人地老老實實唔會將貨就價！想食壽司咩，人地板長壽司都有優惠，質素又保持到。咁樣以黑夜半價為旗號坤人入去食咁劣質食物，只會自毁口碑⋯⋯…Read More

係度食過日本野之後, 我唔會再去o個d連鎖式既日本食肆度食野, 事關單睇三文魚壽司,d元乜元物簡直冇得揮, 可以話山葵一件做得佢地三件咁滯, 而唔比份量, 我亦唔覺得d元乜精巧得黎係好食law第一次係山葵食野, 都唔記得點左d咩,但最記得係三文魚壽司,真係大到你唔信,拖尾架,可以足足圍住成舊飯,而最重要係大之餘仲要係新鮮同好味嘛,之後我帶我媽媽去,我媽媽食野一向都好醃尖下,但佢都大讚!其他推介: 雜菜天婦羅(好多款料, 好新鮮)肥牛旦飯,勁大碗,又滑又多料壽司定食(有6件,分別係3件三文魚,1件鰻魚,1件魷魚,1件唔記得係乜既白色魚)好似係$36倒,係一個定食黎既,跟1個面豉湯或加$2轉罐裝汽水(星期日及公眾假期暫停)燒雞扒拉面: 之前有位留言者都有提過,佢d雞扒係即燒, 所以要等耐d, 但好脆,值得等!(都係定食有湯跟)服務方面簡直係一留,老闆娘笑容可掬,仲全日免加一仲有獨立男女廁所,雖然只得一個,但好乾淨雖然唔係鄰近市中心,但咁抵食特登搭車入去食都抵位置: 可搭輕鐵到美樂站下車,美樂花園7-11o個條街行到差唔多街尾,近單車舖, 或在屯門碼頭總下車,向啟豐商場方向直行約10分鐘…Read More

呢間快餐店真係開左好耐喇, 眼見左鄰右里既食店開完又執, 但佢依然屹立不倒,相信有人情味一定係其中一個原因‧細個家境差, 出街食飯最多咪去下發發, 貪佢平, 有時阿媽打牌屋企冇飯食, 就同阿哥係發發食快餐, 最記得有一次我阿哥唔小心擰餐時倒翻左(畢竟太細個唔係太有力擰成個餐), 我地都呆左, 因倒瀉就冇錢再買, 個老闆(帶黑框眼鏡o個個)竟然冇話我地整污糟佢地方之餘, 仲叫廚房整個碟飯俾我地(唔洗再俾錢), 真係感動! (打打下都想喊)呢d咁有人情味既快餐店仲邊度有得搵?雖然一碟快餐飯對間舖黎講係小兒科,但而家呢個咁現實既社會試問邊間食肆仲做得到? 俾少d tips都黑面啦!唔鬧你整污糟佢個地都偷笑!而呢一飯之恩對於我黎講仲係永世難忘添!P.S. 佢地d洋蔥汁真係幾好味架~…Read More