花姐's Profile

本來是打算訂"大美督嘉年華"來慶祝生日，可是嘉年華因工程維修，兒童戶外充氣設施暫停開於。於是他們便推介同集團的"燒烤皇"。網上有關燒烤皇的資料很少，所以都有些少擔心。但接電話的姐姐非常友善解答查詢，於是決定一試。試過後決定要分享！收費：大人$130; 小童(90cm 以上) 或長者 (持長者咭) $90 (包任食及飲品一罐)，開爐費$50（包一包碳）。免費泊車其他收費：加$5 有雪糕一杯; 加$8 可換其他膠樽飲品；冰提子$10；大鐡網 $30 (收銀姐姐幫你屈好工字型，方便放於爐上）；借食物夾只需放下$20按金食物：先憑入場單到食物處取一盤基本食物（有齊扒類、香腸、雜丸、雞翼等)，之後可繼續任食。所有醃製食品非常有味，特別喜歡牛扒、豬扒、雞腎、咖喱魷魚及土匪雞翼；仲冇蒸燒賣及糯米卷；及紅豆沙。$130價錢非常超值環境：全部有瓦遮頭，一組大吹氣彈床就就係中間，一路食就可以一路望住啲小朋友；後方有一片空地玩吹番梘泡或打波或搖控車一流；放食物既台係玻璃墊面，非常容易清潔，特別係有小朋友的我們，唔使用消毒液逐條隙抹；仲提供膠枱布；空間感充足；我們十八人共安排了四張六人枱，開了兩個爐，兩張枱食嘢，一張枱放嘢，一張用嚟切蛋糕，坐得非常舒服。洗手間亦乾淨。四週有洗水位可洗手及清潔自來食物。其他抵贊位： 員工好幫忙及友善。可自携食物醬料，所以我們買了大蝦、蜆、蔬菜、羊扒等，下次會帶埋鍚紙盤可煮公仔麵配燒牛扒但不可帶飲品噢。不設限時，我們由下午二時一直燒到晚上七時三十分。還可帶狗狗（收銀姐姐更細心安排厚紙皮給狗狗）。唔駕車，搭巴士落車行過對面就到，好方便！昨天大大細細老老嫩嫩及狗狗也輕輕鬆鬆過了一個愉快週末！！…Read More

大喜屋、極尚大喜屋、樂天大喜屋、 殿大喜屋!!   登入網站   “他們的理念 – 以人為本  降心以樂、行之正道  互利互榮、眾志成城  同心同德、厚德載物  百川匯海!”   我從來未登入過大喜屋網站，但以上四間全部幫襯過，仲不止一次，所以有信心地邀請一家大少前來團年。登入openrice 打算網上訂座，但人數較多 (7大人、1小童、1兩歲半BB共9個人) 所以便被指示登入網站訂座，對方很快便回電確定人數及BB年歲，並細心提出安排BB椅俾BB。我book晚市自選兩小時 7:30 – 9:30pm.  訂座過程非常愉快，仲收到whatsapp 確認，感覺非常安心，亦即時存入$500訂金。三日後收到殿大喜屋來電告知必須要 9:00pm 交枱，就算自選時間都係9:00pm 還枱，多番討價還價終於皇恩浩蕩地延至 9:15pm.  挨年近晚揾錢要緊，明白既。 用餐一日前再收到 Whatsapp 確定人數及時間，感覺仍然窩心。當日第一位家人 7:05pm 到達，被安排一張 8 人枱枱頭尾一邊貼牆一邊只容得下一個人側身過，枱面有 8 份餐具。但BB椅沒有安排，講真個位置實在放唔落BB椅，所以當場也沒有再跟進BB椅，反正BB坐在媽媽懷中也非常高興。食物質素仍然不錯，很多食品都Encore 再Encore，唯獨第二輪刺身竟然變成細件簿切，匠人匠心的廚師 (網站宣傳其廚是匠人有匠心，好勁架) 果然擁有細心，刀功了得。反正是任點任食，叫多兩輪便可。幫我們執枱的EE非常勤快，不停清走垃圾，最重要係笑容滿面。另外一位傳菜的叔叔也非常友善。到此刻，團年用餐仍然非常愉快。接近尾聲時，一位黑色上衣長頭髮帶口罩的女士向另外一位黑色上衣男子講左句”度高”，男子便望向BB然係行開。我心想唔通計高度收費，訂枱時只問過我BB 年歲至喎? 但由於該男子未有任何行動，所以我哋繼續開心聚餐。不知在何時，埋單Folder靜靜地在枱面出現了，打開一睇收左2個小童價錢，便揮手打算召人查詢，那一刻腦裏面浮起一句”這麼近那麼遠” ，全場黑衣人不論企係度、行緊路、就係睇你唔到。咁唯有行去Cashier 查詢，Cashier 女士望都冇望我只講一句”度高” ，咁咪回應佢一句做booking 唔講，夾硬收錢好肉酸。不過可能呢個並非單一事件，唔係點會咁爽快叫人度高。跟住又見到另外一個黑衣女子大叫，現場人多聲雜可能真係需要大叫，當時8:55pm，叫咩呢，就係對住我哋用餐張枱大叫：九點必須要離開”。我答：唔係 九點三咩?  佢指下partition 邊張紙仔，係喎，有張同日曆咭Size 一樣既咭，”大大隻字”寫住 9:00喎。其實冇咩所謂反正食飽飽。作為飲食業界同事，黑衣服務員們的態度及對答，絶對係本人心目中的Hero，問心嗰句我每日都想做，每日都想講，我一定要密切留意貴公司請人通告，希望能加入一員。要成為一份子，當然要細閱網站，於"訂枱前需知"，真係睇唔到小童同BB既界定。不過正所謂魔鬼在細節，係嗰張解象度超高既海報底，寫上”小童收費：佔座位，身高90-140cm 為小童收費”  。但留意呀，冇話過90cm 以下唔收費架。提提大家，公司已經將所有收費列明，你自己唔睇，做Booking 時又唔問，見到張單先諗住嘈，咁即係難為人家唧。咪諗住人哋Set 8 個位，就唔可以收你9位呀，搵錢要緊，有咩餐廳可以得8個餐位餐具都要收你9位!! 度埋高都可以坳架，做咩啲頭髮仔唔聽話企高架。Cashier 係後勤人員嚟架，你問佢嘢佢唔識答架，邊得前線把口咁叻豬呀!!  再講下個洗手間，真係要勤加清潔，7:30pm 已經四格裏面，兩隔都係 … …，係人客腸胃敏感，定還是有其他原因?網站話 “DAIKIYA 用心做好`  良心出品為您的歡樂而感動，為您的滿足而努力，為您的到來而感激” 其實成個網站啲內容唔係同客講係同內部員工講既!! Marketing 同事好嘢。朋友已經再Book 了大喜屋，農曆年見!! 祝大喜屋生意興隆、財源廣進!!…Read More

以為安排入房用餐係執到,點知冇空調,七個人有兩個要坐枱角,全間餐廳只得兩個servers,  每次order要不停行出行入,但都唔代表搵到人,最好笑一坐低order 碟牛肉,等左超過45mins, 我以為你咁新鮮即刻劏緊隻牛, 追左超過三次,每次答案都係就到,直到第四次個餐廳經理話個print 單機壞左,咁即係點呢? 你會跟進番個order定點,冇反應, 明白, 即時埋單走人. 個經理非常有笑容仲送到你出門口,叫大家下次可以試下登龍街間酒鍋.  今次真係明白喇,原來個經理係卧底嚟既!講真食物質素唔錯,個經理仲好攪笑添!…Read More

這裏是父親大人平時與書友仔茶聚的地方，經介紹下知道此處有大盆魚，便決定在此慶祝生日及父親節。大盆魚須要預訂，雖然父親曾形容此菜式，但未能想像到究竟賣相如何。因此，最初只以為其大小應該是打邊爐的鋼鍋吧。到當日，一行十一人點菜時，經理不停提醒不要點太多食物，因為大盆魚絶對足夠一圍十二位，因此我們只多點了燒味拼盆、沙薑雞及枝竹魚湯浸菜。燒味和雞先後上枱，接著樓面同事端出大盆魚，嘩真的很大盆，其他食客也紛紛探頭觀看。大盆魚內除了有原條開邊大魚(忘記了是什麼魚，是那款頭很大咀很大的河魚)，還有蝦、蜆、排骨、粉腸、肉丸、酸菜 ... ... 等，盆內有上湯浸著所有食材。大盆魚放在手提石油氣爐上，明火熱著。經理提醒要待盆內上湯略滾，便可從魚邊腩位開始品嚐。魚肉非常鮮味，其他食物在上湯的提鮮下也非常味美。我們額外點了一個生麵加入大盆內作長壽麵，麵再吸收魚湯精華，一下子全被掃清，一盆魚果然足夠一桌人享用。甜品是一碟上的懷舊西米蓮蓉焗布甸，還有由樓面姐姐邊唱生日歌邊送上的蟠桃壽包，非常滿足的一餐。…Read More

在某大飲食雜誌看到其廣告，又指是萬豪集團、又有精美圖片、又有特別介紹美食。再在訂位時排在無盡的等候名單、職員也提醒等到的機會很微，叫我們放棄不要再排。結果怱然收到電話告知有位，心想真是好運，便一行七人"蝗虫之友會" 決定搶攻新 buffet.駕車至石門附近，但因指示不清晰，結果比預定時間遲了約二十分鐘。但停車場 (應是落貨區) 尚算乾淨寛敞，停車場職員也很有禮貌。泊好車後上二樓到達餐廳，餐廳內非常光猛，感覺比較像 food court. 我們被安排坐於近甜品櫃位前的四張大木枱的其中一張。每張大木枱都是開三邊給人客坐，兩張三人sofa 加兩張木椅，四張木枱的的中間位置側沒有安排座位。朋友們覺得好像四枱不認識的人亙相對望食飯，感覺有些不自在，所以最後要求調位。我個人就覺得這此木枱空間感不錯，sofa 和椅子也很舒服 (約少些cusion 較好，因為cusion 似乎沒有清潔，發現食物殘渣), 若將燈光稍為調暗，應該氣氛不錯。現場所見還有很多吉位，沒有他所說的全院滿座!食物方面，在廣告標榜的靚蝦靚蟹，換來的是仍是結冰的冰蟹冰蝦再加冰墨魚仔! 有很大很大隻的翡翠螺，但發出異味! 壽司只有少量選擇，也非正貨，三文魚翅身竟然有碎骨未清！沒有加洲卷但有較為便宜的蘿蔔反卷!冷盤的巴馬火腿是即切，尚算甘香，但煙三文魚比之在本地超市買到的更差!熱盤中的燒肉不錯，可惜只出一轉，七時三十分已經沒有! 燒牛柳也不錯，但同樣只出一轉，稍為錯過回頭便沒有了!雪梨燉瘦肉湯已算不錯了! 但居然沒有蒸大魚!麵檔和Pizza 檔的食品夠熱，但食材品質一般!甜品的凍湯，糖水只有死甜。要那籌的疏乎厘，心太軟完全是街坊之作。蛋糕需然全放於showcase, 但廚師表示, 放在枱面的未食完，不可添新。結果朋友們坐了很久也等不到 refill. 因為枱面上的蛋糕也是無人問津!!生果有大路的西瓜，哈蜜瓜，但其切功比之我等家庭主婦更差!!最後飲完杯餐茶 (真的是很差的餐茶), 大家都是食不飽便離開 (因沒有東西可以食了，同行朋友還要即場幫襯洗手間才可離開!!)以 HK$388+10% 價錢 該酒店餐廳應該很快回本! 差不多的價錢，早知聽從天命幫襯 大學站那間!!…Read More

連飲品只需$22,所以決定試吓!!點了泡菜湯底配韓式年糕及午餐肉再加香腸!! 泡菜湯底好夠味道,如果有埋小碟泡菜就更好!! 年糕雖是超市貨式,但也煮得剛剛好!! 湯底超多菜!! 又一讚!! 腸仔和餐肉都是預先煎過,味道也不錯!! 下次也會試迷你石頭飯和韓式紫菜卷!! 不過有樣嘢好得意!! 配料選擇有$22, $24, $25 另加配料每款$1, 若點$22 套餐加一樣 在$25套餐內的配料, 總數只要$28!! （例如：午餐肉年糕加牛肉只需$28),　但調轉在$25 套餐加一樣在$22套餐配料，便要$31 (例如：牛肉年糕加午餐肉便要$31), 貴了 $3 呀!! …Read More

今晚大家收工本來諗住去旺角通菜街食宵夜,但由於小妹駕駛技術未能附合旺角要求(泊街邊位),因此,強叔提議去九龍城廣場新開的甜品店食宵夜,泊好車後大家發覺連麥記都已打烊,大家都暗驚甜品屋會唔會都關門休息,好彩去到二樓時樓面靚仔笑住話Last Order 12mn,即刻全部笑哂,今晚一行八人,由沙田飛去九龍城究竟食啲咩:1) 先嚟三個榴蓮腸粉,個粉皮大家都覺得好好味,啲榴蓮一埋位就香到大家要即刻落手食 2) 跟住叫左木糠豆腐布甸,味道即係豆漿布甸配木糠碎,但都唔錯 :)3) 兩個Soffle,包括原味同芝士,一送到嚟大家都覺得超香,但Comments 就各有各鍾意 :)4) 雜果黑珍珠及楊枝金露芒果布甸,味道也不錯:)5) 芒果河粉啲河粉配半個芒果蓮汁 6) 三個心太軟配雪糕,大家都覺得啲朱古力漿非常美味7) 再食埋藍梅芝士餅及紐約芝士餅,啲芝味多到大家搶食一輪就清哂碟 每位$60,今晚好滿足,有覺好瞓…Read More

約左好耐終於可以同前老細一齊食飯，今次決定去秘書小姐個飯堂 ~ 利苑．利苑於沙田區嚟講，價錢算是中上，但食物一直都有質素，今晚三位女仕點了一些高脂肪高膽固醇的餸菜，但一年一次生日，所以決定食左先算，今晚的自我了斷菜單如下：　鴨舌：好夠味　黃金蝦：不是太大隻，小小的使鹹蛋更容易沾上蛋汁，非常脆口及沒有多餘油份　燉五花腩(嗰菜名唔記得左,可能係火方之類),好鬆化，好入味但好飽　麵醬唐生菜：老闆最愛菜式，好新鮮!!　特別推介甜品～龍皇松子凍（萬壽果配檸檬忌廉黑珍珠伴芒果汁)好清新，好適合夏天食!!…Read More

延續生日月活動去澳門，除左有得去橫琴食蠔外，因為有姐夫照，仲去食個好味鮑翅，作為一位澳門常客，新陶陶座的士就經過好多次，但今日終於有機會試吓：　高湯雞鮑翅：我唔識分啲翅靚唔靚，八佰多銀，應該靚，但個湯真係雞味濃到不得了，連平時要三崔四請既小朋友都係咁添食，以細路仔唔講大話既理論，就知呢煲翅靠得住再嚟個大班兩味　西芹炒班球：傳統做法，最緊要材料新鮮　枝竹火腩炆大班頭腩：嘩！上枱嗰啲香味，家吓諗起都仲聞得到，啲枝竹就肯定吸收哂日月精華，但連啲火腩都keep咁甘香，最好味係啲大班魚皮，滑到好似食花膠咁　咕嚕肉：好夠甜酸味，本來大家以為紅色既紅椒，所以停哂手，經資深樓面推介，原來紅色既係叫蘇薑，大家一試即刻喜歡，因為佢有子薑既偏酸，帶天然清甜味，所以大家一定要食呀　姐夫推介炒通菜莖，天熱先有得，奇怪地甜美！今日先識咁食!!家庭聚餐食得開心又滿足…Read More

又係一年一度的生日月開始，三個中女最鐘意食日本菜，今次嚟到盛八，一路都覺得盛八價錢會比較貴，但埋單時又覺得物有所值，所以誠意推介俾大家：每位都有一個調色碟模樣既醬汁碟，配燒海鮮，個人比較喜歡檸檬汁及海．當日我哋點左下列食品：　燒元貝：真係好大隻元貝，好鮮甜，個服務員好細心教大家點燒先好食　燒虎蝦：真係要好好心機睇住啲蝦，冇燒元貝咁易，都好容易燒燶，但好有蝦味，同埋好多蝦頭膏　燒醬牛肋骨：好耐未食過咁好味既牛肉，一定要食　柚子醬燒豬頸肉：碟肉送埋嚟既時候真係好香柚子味，但燒熟後就有啲似韓國燒烤既燒肉，但都好好味　温泉蛋沙律：近日迷上温泉蛋，所以一見到呢個用温泉蛋代替普通蛋黃既沙律，即刻要試，唔錯喎　清酒煮大蜆：清酒好香呀，如果再多啲蜆就好喇！:)　盛八豆腐：好香好滑喎　燒手羽：即係燒雞翼啦，個個鍾意食，仲好細心一開二，一條骨一支，好易食:)　黑豕肉帆立貝：煙肉一直喜愛，再加埋帆立貝，仲好平，所以一定要order…Read More

澳門一日遊，決定以美味葡國餐結束，本來諗住去酒吧街逛吓，但去到後居然發覺冇咩嘢啱食，沿路見到呢間餐廳，雖然一個人都冇，但服務員哥哥實在太欣勤，所以決定幫襯，並由經理介紹以下菜式:自製麵包：夠熱但未必啱所有人口味，但個蕃咖牛油就做得唔錯．葡式烤乳豬炒飯：今日我哋講過，去完賭場，羸就食乳豬，輸就食豬扒包，皇天不負有心人，我哋一定要食乳豬．乳豬皮估唔到咁脆，啲肉都好夠味，但最估唔到係個炒飯，好乾身，配埋啲葡國香腸一齊炒，好惹味．紐西蘭烤羊扒：好夠羊味配埋有味粉既薯條，個個都話正　忌廉馬介休薯蓉：一路都覺得啲葡國鹹魚好鹹，但呢個薯蓉超好味，啲馬介休居然有鮮味，啲薯蓉又香又滑，一定要試　　我哋仲叫左客蒜蓉包嚟點薯蓉添非洲雞：又一個值得推介既美食，少少辣，但皮脆肉嫩，仲可以加辣添可能落雨關係，冇咩人，好夠情調，我哋可以晚晚傾計，渡過一個開心晚上!!…Read More

好耐冇嚟澳門，今日終於可以同班好朋友嚟個澳門一天遊，一上的士就決定要去試吓好多雜誌介紹既添發，但實在估唔到十二點未夠已經有十幾廿人排隊，為左唔好影響心情，決定沿路行落去，去到”百勝”，個店名好”老黎”就決定幫襯，坐底後至發現一啲都冇選錯 我哋一行四人，服務既姐姐就推介我哋食個伍佰零既套餐，其實唔貴，但午餐又食雞又食翅好似有啲過份，但隊友話橫掂响永利執左啲，就食豪少少啦!!由於大家都想食蟹，所以就叫左$528套餐：濃湯雞煲鮑翅：本來嗰餐係雪蛤蟹皇翅，但大家都唔食雪蛤，就改左濃湯翅，個湯真係好濃好甜，仲有好多翅添，隻雞都好嫩滑! 薑葱焗奄蟹：夠蟹味但隻蟹好似冇咩肉秘製砂窩雞：即係好似啫啫雞，啲雞又係好有味，個汁仲好適合送飯添北姑扒時蔬：都夠份量原煲臘味飯：天時暑熱食臘味飯真係有啲過份，但啲飯真係好好味，不過啲臘腸，潤腸及臘肉就少啲，不過好彩有砂窩雞啲汁送飯．每位百零蚊食到飽飽再繼續行程!!…Read More

對於各位葵芳街坊嚟講，金潮係一間你食過一次後，耐唔中又想幫襯既菜館！！但相信所有幫襯過朋友都知道，佢個等位制度 - 不論你有訂位冇訂位，有輪籌冇輪籌，前枱姐妹花都係用先到先得或先近先得等位法，有時真係想以後都唔再嚟!! 為此，我哋兩公婆好耐冇選堂食，通常都係買外買返屋企，尤其係星期日，一路睇電視一路食外賣！！今日食左　招牌黃金蝦　（除左份量好似少左外，味道依然保持到)　沙拉骨　（唔再係以前大條既一字骨，感覺上老左啲）　桶蠔煲　（成個禮拜都好想食蠔，所以即刻就order蠔煲，冇失望，啲蠔好大隻好漲卜卜）　再喺隔離街潮洲餐廳叫左個潮洲粥送，Very good (下次同大家講吓嗰間响葵芳邨既潮洲餐廳，都唔錯架)個標題話又中招，點解呢？因為諗住叫外賣會冇事啦，但結果居然要等四十五分鐘，但唔關廚房事，純粹企Reception 對姐妹花，話說响第二十分鐘時已經開始問啲外賣有未，佢話就得，到三十分鐘及四十分鐘都係就得，結果我哋再問另外一位做Services 姐姐，佢話啲外賣一早就得，放左係對姐妹花附近既Cashier，同場仲有數位等外賣人仕，真係!! 呢個係佢哋既特式嚟既！！人客都係羗太公釣魚，願者上釣啦!!…Read More

由於老公聽朝要Out Town，所以決定提早一日慶祝生日！老公鍾意食海鮮,舊年去過西貢食過好一般的海鮮，今年本來想去布袋澳，但因為落雨所以決定近近地向屋企樓下．平時經過,都好想幫襯，今日終於有機會，門口位伙記好細心咁介紹新鮮又抵食既海鮮，老公未聽哂已經決定幫襯，咁究竟我哋兩位叫啲咩呢： 　店名叫奇香雞，就試吓例牌雞啦，唔肥好有味　蒜茸粉絲蒸扇貝，好新鮮，好大隻　（四只$48)　豉椒炒蟶子仔，大碟到呢，夠味但油左少少 (一碟$48)　椒鹽瀨尿蝦，好多隻呀(都係$48例牌)　最貴薑葱炒蟹（一只十八兩），都係$8兩，隻蟹新鮮唔水，仲有啲蟹公羔添!!埋單$320,舊年西貢冇得自己選海鮮要差唔多五舊！！今日有得自己選海鮮添，所以絶對超值~~食完飯仲有張coupon 送，下次幫襯$100可免費加個$42小菜，遲啲同爸爸媽媽老爺奶奶再嚟過!!多謝咁位伙計的良好服務，今時今日啲舊式餐館，真係好少見!!…Read More

唔係第一次幫襯美食坊，由於地方唔大，覺得食物水準一直都保持到．今晚因為要睇巾幗梟雄大結局，所以又近近哋幫襯美食坊．　燒鳥頭魚 - Keep 住水準，真係好夠油，又唔腥，每次都要幫襯:)　咖喱炒蜆 - 鐘意食甜咖喱既就好鐘意，份量好大　辣椒羔炒蝦 - 蝦既份量略少，但個辣椒汁好好味:)　鹹魚炒通菜 - 上次試過蝦醬炒通菜，啲通菜好新鮮，鹹魚都好味喎　串燒 - 個沙爹汁不嬲都掂擋，但今日啲牛肉”梅梅”地:)　$8大大杯龍眼冰，超值啦!!街坊菜隔局，兩三知忌，飲啤酒食小食都唔錯架~~上次用蝦餅，魚餅，魷魚配啤酒都OK架!!…Read More