antony194862's Profile

銅鑼灣發現新開的日式西餐廳，明明位置方便，但就好少人知，食物好味性價比高，趁着未係好多人發現，一於去食多幾轉！是日餐湯係椰菜花湯，拉花令賣相更美觀，甜甜椰菜花味非常濃郁，帶有微細夥粒，口感層次分明。猩猩迷宮外表好有特色，九宮格形狀而且每隻碟同菜式都唔同，而有幾款尤其出眾！紅菜頭蕃薯沙律，2種口感的薯蓉和薯粒的組合，微微紅菜頭味亦唔帶草青，又帶有甜味比較似甜點。牛油果沙律，用檸檬調味，清新而帶微微酸味，非常開胃。大啡菇煎過後很柔軟，口感很好，而且菇汁超多，個人非常喜愛。黑松露炒滑蛋，味道好有質感，牛油香味配上黑松露香味，滿滿濃厚味覺享受。煙三文魚配蟹籽，煙三文魚味濃之餘又唔太鹹，平衡得很好，再配上蟹籽增加鮮味和微脆口感，層次又更分明。白酒牛油汁煮大蜆一上碟就聞到濃烈嘅牛油蒜香，而每粒蜆都係脹卜卜，一口咬落去啲肉汁爆哂出嚟，口感非常爽口嫩滑，充滿蒜油香之餘，仲有啲海鹹味，鮮味十足！香煎三文魚配三文魚籽甜蕃薯沙律西式三文魚親子料理，齋睇賣相都知煎得靚，魚肉魚皮煎到金金黃黃，三文魚子放係魚皮上作點綴，就好似寶石一樣。切開三文魚，魚皮極酥脆香口，感覺似食緊炸三文魚皮，而肉質嫩滑多汁，魚油味亦好香好重；另外三文魚籽粒粒飽滿分明，鮮甜嘅魚籽汁喺口腔內爆發，齒頰留香。至於配菜方面，其實相當有心思，因為三文魚同三文魚籽都屬於比較濃味嘅食材，食得耐難免有少少膩，而甜蕃薯同蜜糖芥末醬混合正好可以中和一下，令風味更佳！白桃四季春花果茶西餐廳嚟講，好驚喜有花茶呢個選項，仲要係好飲。一嚟就嗅到清香白桃味，真係非常之香，茶味濃，飲落去會有少少甘，我覺得用嚟配搭甜品或者解油膩都係一個好選擇。甜品係烤蘋果脆頂奶酥配曲奇雪糕，牛油餅底非常之脆，上面有蘋果，烤過後果糖味更濃又唔膩，加上甜度適中的曲奇雪糕造成冷熱口感，美味！…Read More

中環一向多fusion菜式餐廳，今晚來到Fang Fang更加有加入中式元素cocktail，非常特別！而眾多菜式中，有幾款真係特別美味要分享下！四川胡椒cocktail雖然非常清新易入口，但其實都係用比較烈的Vodka做底調製的，配上鮮羅勒，荔枝，檸檬汁甜中帶上微微酸味，表面灑上四川胡椒略帶辣味，非常好飲！粉絲蒸帶子皇鮮味十足，表面蒜蓉香味佈滿新鮮帶子，滲透到粉絲入面，正呀！暴風松葉軟殼蟹香味十足，岩哂中意食酥脆野既我！外脆內嫩的蟹肉再加上花生蒜蓉辣椒做配菜，一齊炒香，調味合適唔會太鹹遮蓋鮮味！至於蝦餃還是比較傳統的，皮薄軟滑，而且蝦肉非常爽口！主廚乞衣雞係要一日前預訂的，係餐廳名菜，由曲奇皮包裹住原隻雞烤焗而成，而且食之前有個儀式，就係要用錘仔扑碎表面曲奇皮，過程有趣！曲奇皮好香牛油味，少少甜而且脆身，比想像中更好食，而雞裡面釀入冬菇絲，醃菜，雲耳等等，令雞肉非常入味！同樣係出色的還有片皮鴨，肉質嫩滑多汁，外皮烤得微脆，餅皮造型比較特別，煙韌得來帶微甜，唔錯！而且醬料有多種選擇，口味隨個人喜好可以有多種變化！黃金蝦蛋黃味香濃，而且外皮酥脆，同彈牙蝦肉成強烈對比，非常美味！鮑汁扣花膠露荀，花膠非常入味！而且柔軟細滑，用筷子都可以輕易入開，滿滿鮑汁充滿口腔！露荀更加要用鮮甜爽脆形容，而且濃郁鮑汁下露荀清新味道更加明顯！推薦！…Read More

身為一個拉麵控，吃過這麼多家拉麵店，不免愈來愈嘴刁。而白湯拉麵始終都是我杯茶，細滑濃郁的湯頭，一入口膠原便充斥整個口腔，每一寸味蕾均得到滋潤。但若果你認為只有豚骨能做出上乘的白湯頭，那麼這間拉麵店便能顛覆你對白湯底的想像。位於土瓜灣九龍城道的金鶴拉麵就是雞白湯拉麵的佼佼者。甫進門，環境舒適高雅，走高檔華麗路線，日式擺設亦非常自然。點上他們號稱「史上極濃」的雞白湯拉麵。炸牛蒡為整碗拉麵帶來視覺上的反差，入口焦香帶甜。湯底濃郁芳香，入口充滿雞骨的鮮甜，令人欲罷不能。麵質煙韌，爽口彈牙，麵身掛湯力不俗，每條都散發出湯頭的精華。溏心蛋時間掌控得很好，稠稠的，既柔軟又晶瑩剔透。雞肉嫩滑多汁，叉燒煮得軟糯容易入口，而且形狀依然完整，入口不肥膩，讓人每一口都有種滿足的感覺。友人的雞白湯沾麵，麵身帶光澤。我小試數條，麵質果然順滑彈牙，麵條夠粗，雞湯汁完全黏附在麵條上。其他配料也跟拉麵相若。小食中的黑豚肉串屬於即叫即燒，肉汁鎖得很好，肉質依然嫩滑。醬汁不鹹不澀，非常貼合我的口味。最後一提，侍應態度專業有禮貌，整頓飯吃得很舒服。上沾麵亦有刻意提醒我們，湯放涼了可以找他們加熱。這頓拉麵我很滿意，不單吃了美食，還吃了服務。…Read More

太耐無打過邊爐，又係時候要去下，天氣熱都無阻食慾！今日到呀牛火鍋海鮮大排檔，實在有好多出色地方要分享！餐牌選擇太多，好多吸引的但胃袋有限實在可惜。餐廳以炸青豆替代花生做餐前小食，個人好中意，比花生好太多！馬來沙嗲鍋，沙嗲香味撲鼻，湯底内有瑤柱蝦米增加鮮味，香而不辣，非常適合我！自家製竹蓆茅根，店員十分推介的，餐廳自家製的，比較欣賞係甜度合適，好多時其他餐廳都係糖水比例更多，今次我好喜歡！打邊爐主角當然係極品手切本地肥牛啦，入口一下已被超濃牛肉味佔據，滿口牛香真係非常美味，而且脂肪比例平均唔會太肥無肉，肉質較嫩，推薦！羊肉片性價比非常高，雖然片數唔多，但每片都好大塊同厚切，羊味十足而且唔羶，都只係48蚊！這杯好似刨冰的係墨魚滑，夠嫩滑當然是基本，上面有蟹籽鮮味同賣相都同時增加，內裡有馬蒂來增加口感層次！餐廳內有魚缸放置海鮮，確保一定新鮮，桂花蚌的確可以證明，入口濃厚鮮味，加上吸收左沙爹湯的味道，再者口感非常爽口，一大碟2個人食哂都唔覺得夠！另外值得一提係店員服務態度好好，除左自覺加湯基本事情外，笑容亦非常親切。總括而言，餐廳已被我收藏，準備下次再來！…Read More

之前從未來過墨西哥餐廳，今日終於有機會啦！店內有好多得意特色擺設，相比1樓的酒吧區，2樓感覺更令我喜歡！餐牌太多菜式選擇，花一段時間後終於決定好，最後揀左香燒蒜頭湯、粟米薄脆同墨西哥鐵板燒牛扒！首先到既係香燒蒜頭湯，整個湯都充斥住滿滿蒜同芝士味，而且口味非常濃郁細滑，而炸面包吸收濃湯後當然更美味！一開就被招牌粟米薄脆的大細嚇到了，份量超級多，香脆粟米片上加了多種配料，其中更有牛油果醬、雞肉同辣肉腸，令整體飽滿度加倍，另外以碎番茄粒及酸忌廉作中和，多重口感非常美味，但份量太大實在以今次2人陣容難以食完，如果4人以上分享會更加好！先講感想，墨西哥鐵板燒牛扒我認為係今晚最出色既一道菜，牛肉味道濃厚加上超多洋蔥同雜椒在鐵板上煎香，惹味十足！用熱騰騰麵粉薄餅包裹一齊食，煙韌口感造成強烈對比！再配上三種不同味道醬汁，牛油果醬、酸忌廉、紅番茄醬，作出不同風味！飲品方面叫左2杯Mocktail, Fruit Punch鮮果味香，感覺清新！Gunner感覺帶少少薄荷味，解油膩一流！…Read More

第一次到位於旺角兆萬中心9樓的極上帝王水產。這家放題以日式、泰式、西式crossover為賣點，網上有許多網友推介，而今天難得有試食的機會，當然要好好品嚐！全部食材中，就要數刺身拼盤最合我心意，雖然本人怕食生冷食物，但淺嚐了一口刺身它的嫩滑鮮甜溶化了我的味蕾。本人喜歡芝士類的食物，所以必點了芝士壽司和芝士焗蠔，這兩種食物都沒有讓我失望。日式後又點了少有的泰式料理，豬頸肉是必點之一，因為它是我泰式小吃中的最愛。不過味道沒有想像中鬆軟有口感，可能煮長了時間有點咬口。後來又叫了一碗冬陰公湯嚐鮮，這個就不評論了，味道太淡完全沒有真正冬陰公的酸甜。其餘小食沒有去嘗試，畢究今天只有兩個胃，而且主打是日式料理！西式料理有意粉可以選擇，聞到旁邊意粉的香味，我想味道不會太差。最終回當然是雪糕甜品登場，我見雪櫃有不同種類亦有我喜愛的韓國牌子，走的時候後悔一開始沒有留胃吃，好想全都試一遍！然後甜品我點了紙上的心太軟，味道挺濃郁而且小小一件，另一個甜品胃可以來裝了，不過今天我見放在凍櫃的選擇不多，有點兒遺憾。最終我和友人吃了比平日多一倍的量，滿足而回。在7點的繁忙時間，價錢人均240，又多達十多張餐紙有不同款式的食物選擇。有機會我再約上三五知己再嚐一嚐鮮吧！…Read More

一入到黎店員就同我地講有2個火鍋送，仲可以無限添加，即刻就叫左壽喜燒先，除左食日本放題仲可以打下邊爐，再睇下有咩食物，發現有多種菜式，英文字母排到去R，連西式意粉都有。魚生品質都非常好，三文魚，帶子，螺肉都非常新鮮，可惜既係叫左啲單上面有既野，但係黎到先知冇哂。係到上菜速度非常快，點菜後幾分鐘已經有食物到，炸物我最鐘意食芝麻雞翼同香辣雞軟骨，好脆口同唔會好油，忍唔住落多次單。壽司方面，黑松露類壽司係必食，黑松露味道好濃烈，一食就上癮，一定要叫多幾碟。火鍋入面牛肉都幾好食，可以加溫泉蛋。除外仲有其他燒烤類小菜都好好食，牛脷好入味，鰻魚肥美，菇類夠鮮唔太鹹，都好推薦。飲品甜品方面選擇都好多，例如有仙草既野飲好特別，不過最後只係揀左燒菠蘿同心太軟做甜品，食完先知仲可以出去拎雪條食，Happy～…Read More

聽說在大圍區內這間金龍冰室是新開張的，它位於大圍道六號的地舖，於東鐵大圍站A出口行約三至五分鐘便到達。這次與友人約在晚上七時前入座，由於附近是住宅區，人流很多，還未正式到晚市時間已經全餐廳近乎滿座，似乎該餐廳很吸引食客。這間餐廳門面十分光鮮，招牌燈光十足，室內裝修及衛生亦乾淨企理。這次叫了鐵板西冷牛扒，鐵板羊架及黑松露雜菌玉子燒各一客。最先來的是玉子燒，配菜選擇了炸帶子，其玉子燒的滑蛋頗滑，內裏的茹量算十足。其次接住來的是鐵板餐，各配一個餐湯，令我與友人最感意外的是該鐵板餐的份量以八十元至九十元的價錢來說是多得像座山，除了一般配的飯或薯菜比其他餐廳的多，每客還配了兩條大肉腸。以正常男人的食量可能只可以勉強食得下。另外，鐵板餐配的飯應該是珍珠米，比一般米能更加吸收汁來撈飯吃，口感不錯。 美中不足的是該鐵板羊架雖然燒得好食但瘦肉比肥肉少，若果需要啖啖肉，多蛋白質，個人建議那個西冷牛扒，雖然不是一整塊厚切的牛扒，但份量實屬十足，性價比不錯。一家大細吃晚飯來這間餐廳亦實屬合格有餘的選擇。…Read More

一入到去神户屋，環境好唔錯，有啲似cafe既格局，唔似平時放題個啲咁老土，樓面啲佈置令到成個環境好新穎同特別，令我收左工都有啲放鬆嘅感覺！一坐低，店員都好積極講解有咩食，首先叫我地揀個鍋先，我地揀左部隊鍋，入面超級足料，有齊一般部隊鍋有既食材喺入面，而且佢嘅味道都唔係特別辣，啱哂唔係話好食得辣嘅我！揀左個鍋之後，我地仲有得揀海膽同埋生蠔食，海膽食落好鮮甜，一啲雪味都無，生蠔唔算好大隻，但味道幾好，仲有d海水味，咸咸地，鮮味都好夠！食完呢兩樣，我地就開始落筆瘋狂畫野食喇！ 首先係刺身，哎左三文魚，甜蝦，生蝦，玉子，帶子，象拔蚌，鮑片同北寄貝！值得留意嘅係刺身個到，餐廳有好多唔同既蝦刺身可以哎，如果你係一個好鍾意食蝦嘅人千祈唔可以錯過呀！佢有甜蝦，泰式生蝦，天使蝦，有頭甜蝦同埋激巨赤蝦刺身！炸物方面，我自己最中意就係炸鮮奶，芝士年糕，香芋丸同榴蓮炸彈！最緊要最緊要！係要點佢個個一口芝士呀！因為佢個芝士味好濃！一咬啲芝士就漏哂出嚟！諗番起都有啲流口水！其餘餐牌上嘅炸物同一般你食放題想點嘅炸物都會有喺到！其餘食物都好有水準！！如果大家想食放題都可以諗下呢間，唔錯！！…Read More

一入門就被聖誕兵馬俑吸引住！造型趣怪！餐廳亦設計得非常中式。醬料種類當然亦都好多，比較特別係有腐乳醬選擇！而我就揀左蒜汁同特製醬油，2者混合香而帶微甜，十分美味！湯底喺火鍋當中非常重要，而火鍋撚就喺呢方面做得好出色，認真能夠用足料來形容！祖傳秘製麻辣鍋夠麻夠辣，大蔥花椒辣椒等等非常足料！而鍋中鴨血更吸收超多湯汁，十分入味，正呀！至於蜂巢豆腐白湯鍋，飲落超清甜，而且係藥膳湯，就咁飲已經好好味，除左鴨血外，還有更入味更吸湯的蜂巢豆腐！火鍋撚御用手切肥牛，火山般排列再配合乾冰，霸氣十足！而肉質口感較厚實，牛肉味非常濃郁！個人比較中意濃牛味的肉片，好合我心意！羊肉片依舊用乾冰作點綴，但肉質與牛肉片大不同，質地很嫩滑，羊騷味即炸三秒響鈴卷響鈴非常薄而脆，又一個吸湯之選！但真係唔好煮超過3秒，會失去微脆口感。黑松露墨魚滑就非常嫩滑，再帶少少彈牙口感，而且松露味好香，唔錯！至於香菇貝鮑鮮滑的菇味特別濃郁，嫩滑彈牙之餘，加上貝類特有口感，正！水蜜桃冰沙，比凍飲更冰涼的沙冰，桃味清新！而且冰沙質感細緻唔硬！甜品芋圓糖水，集口了紅豆、綠豆、珍珠、小丸子、芋圓、地瓜圓、圓仙草，甜度合適，質素拍得住台灣本土的！…Read More

燒味雖然在香港極為普遍，可惜質素參差，好燒味難求。「食神」絕對是我吃過最好吃的燒味餐廳之一。它的燒味特別有光澤，看上去便知道十分新鮮。油雞的皮帶少許蜜甜，即使沒轉雞脾肉，肉質依舊鮮嫩。雞味也很濃，點上薑蔥油令味道變得更香更美味。再吃燒腩仔更是非同凡響，皮香脆，脆得像薯片般，且沒有油膩的感覺；而肉極鮮嫩，其嫩度甚至很多燒味餐廳也無法媲美。咸度極為適中，再點些黃芥末，把燒腩仔的咸度進一步中和再混和。黃芥末在口腔內刺激著鼻腔與舌頭，配搭上燒腩仔的咸香，脆皮與嫩肉在咀嚼中口感不斷交替，絕品！黯然燒魂飯作為主角，帶出了比預期更好的美味！用乾蔥、蒜、豉油等等煮成的燒魂醬是靈魂所在，香味十足而且甜度合適，配上蛋汁撈飯一流！叉燒用五花腩部位，煮到肉質有彈口感覺，外皮卻保留叉燒的微微脆身，非常美味！餐湯是小白菜湯，亦非常足料，減低了食肉的罪惡感！飲品竟然有懷舊感十足的樽裝維他奶，也是一個小驚喜，童年回懷慢慢湧現！…Read More

呢間餐廳以台式羊腩煲作秋冬新品，同其他嘅羊腩煲好唔同，普通嘅羊腩煲係用南乳燜煮羊腩，但係呢到就係用藥膳煮嘅，極具風味。嗰湯頭係用紅棗，杞子，大葱，薑等等嘅材料煮出嚟嘅，冬天食呢個煲又養身。食完個身真係暖粒粒呀！呢到嘅裝潢超有台灣感，牆壁上嘅霓虹燈係嚟呢間餐廳食嘢之外另外嘅焦點，打卡位一流！呢到嘅碗碟都非常靚，睇到都少女心爆發啊！餐廳空間都好大，燈光同環境都好適合用餐。當我同朋友叫咗個咗兩人餐嘅羊腩煲之後，店員就超貼心咁幫我地拎咗配羊腩嘅腐乳醬。個兩人餐嘅飲品包埋兩杯嘅冷茶，綠茶味道清新，非常解膩。紅茶茶底香濃。正！今次仲叫埋呢杯紫薯奶茶，超多紫薯，口感香滑，必試之選。兩人餐可以簡三個餸，今次就簡咗凍豆腐。呢個就最特別的，就係鴨血啦！仲有就係大大碟嘅黑木耳。羊腩燜到冧冧地，但係仲係好有咬口。餐廳仲有推出姜母鴨套餐，睇落都好吸引呀！兩人餐仲有多項配菜可以加。凍豆腐口感似豆卜，非常吸汁。大大舊木耳亦非常爽口。必吃之二！！鴨血勁正！台式羊腩煲配台式鴨血最配！！鴨血口感滑嫩，與湯底十分配合。…Read More

平日中環附近餐廳幾乎都食過，知道開左新麵店，當然要去試下啦！今次去既係非常有中式餐廳色彩既四川麵線餐廳！門面、bar枱同窗，所有設計都好中國風，認真有特色！餐牌精美而且每種麵都有簡介，睇過餐牌後揀左酸辣粉同瘋狂大排面！川菜中，最期待的莫過於這碗酸辣粉。點菜的時候，因為第一次吃並不清楚它的辣度，安全至上的我選擇了BB辣。上菜時，一陣濃烈的酸辣氣味已在吸引我的味蕾。第一口湯，酸辣麻使舌頭感受多重味覺享受；紅薯粉的軟硬適中且有嚼口，與酸辣湯一同進食更是完美配合。配菜選擇了牛舌，發現他們的牛舌都切得很薄，整塊沾滿了辣油所以也十分入味。整體而言都吃得非常滿足，但中途覺得BB辣未夠喉，所以在夫妻肺片裏偷了點辣油，下次再光顧希望嚐嚐正常辣再加麻。瘋狂大排面就揀左白湯，非常清甜，有大量我至愛既蔥做配料，麵質彈牙又唔會太硬，排骨肉肉味濃厚，而且肉質口感厚重，中意食肉既我比非常高分，另外加左豬肝，煮得恰到好處，夠嫩滑，正！蒸蛋作為小食真係誠意推薦，水嫩蒸蛋上面佈滿蔥香肉碎，少少鹹香又帶甜味，兩者配合感覺新鮮！至於夫妻肺片認真夠麻辣！愈食愈辣又停唔到口既感覺真係百試不厭！從來無食過老冰粉這類非常中式既凍甜品，透明冰粉口感有點像蘆薈，但更柔軟，配上花生、提子乾、山楂餅、芝麻，起初以為唔夾，點知提子乾甜味同山楂餅微微酸味係配得好好，加上花生同芝麻令中感層次更豐富！同淡淡甜味冰粉一齊食認真出色！…Read More

平日經常行過都唔知太古呢個位有拉麵店，今日終於有時間坐落來慢慢品嘗一下啦！睇過餐牌後揀左白豚骨拉麵同黑豚骨拉麵套餐，有汽水有餃子，夠哂份量！煎餃子非常柔軟，而且肉味夠濃，底部微微煎過，一份3隻，連埋拉麵大食如我都夠飽！白豚骨拉麵有大量蔥，好適合我口味！加上木耳絲好爽口，配合火炙叉燒香味十足！不過個人始終更加中意糖心味玉同脆卜卜紫菜！黑豚骨拉麵比起白豚骨，最大分別係多了炸蒜，令整個香味更加提升，而且味道更為濃郁！兩種拉麵一清一濃，各有特色。…Read More

又到中午美食時間！今日搵到美味卷物餐廳，又喺公司附近，實在高興！點餐處旁邊就有電子餐板顯示，種類唔算太多，但大部份都係卷物，可見係餐廳主力，當然要即刻試試佢！而且除左預設卷物組合外，還可以自選食材自行搭配，拼出屬於自己的口味！Veggie Lover認真好味！首先卷上有蒜片，芋片，口感層次同香味已經增加好多。原先我怕紅菜頭既味，好彩芒果超甜，同配上紫蘇葉，夾埋又幾過癮！有陣獨特新爽香味，另外蘆筍爽脆而且甜味十足，加上青瓜絲，成個卷以野菜為主題，配上微辣的蛋黃醬，感覺非常清新又有特色，個人好中意！最後連落下既蒜片芋片都比我地清晒，好好味！Philadelphia Roll係以牛油果、三文魚同cream cheese配撘為主既卷，三文魚同cheese真係永遠最夾，因為大家都係好creamy，融埋一齊，簡直係舌尖上既享受！。同個卷本身各種食材都味道濃郁，加上少少蛋黃醬鰻魚醬已經非常美味，連預先準備好既豉油Wasabi都唔需要用！自選卷物可以自由選擇所有中意既食物，但究竟能唔能夠配合真係要食過先知！我就揀左帶子、蘆荀、乾海草、玉子、腐皮、炸蒜片，配上黑芝麻醬同芥末蛋黃醬，出來效果非常之好，都要歸功於食材質素上，帶子鮮甜同蘆筍甜味互相配合！而腐皮味道亦好突出唔會被蓋過，而乾海草、玉子、炸蒜片，除左令味道更豐富之外，口感上層次種類同樣增加，個人比較偏愛呢個卷，因為係自己愛吃既食物組合體！咁大個飲品櫃，但最後揀左天然水來口和一下濃郁味道，令每一種唔同味卷物都可細心品嘗！通常食日式食物，如果餐廳有味增湯的話，我都會點的，因為實在太配合！尤其係配上有飯類菜式，更為合適！…Read More