wongsfvictor's Profile

用餐果日係堂食放寬嘅第一晚，晚上7點黎到，已經滿座，要等一陣。今次係小弟第一次黎德美，雖然好早之前聽過呢間餐廳，但一直冇機會試...好彩等咗15分鐘就有位，仲咁啱係坐房仔，可以比較日式咁坐😂睇下個餐牌，係包羅萬有，連一啲比較冷門嘅刺身同燒物都有，亦有好多款酒。最後決定叫咗一份壽司盛、三文魚腩、鍋燒烏冬、牛油果軟殼蟹卷、蟹籽同埋海膽壽司。侍應就算忙到踢晒腳都好有禮貌，喺香港都幾難得。食物整體都好食，刺身夠新鮮，烏冬都夠熱。特別推介牛油果軟殼蟹卷，等枱見有侍應哥哥拎住好似好食，所以叫，原來真係好得！牛油果夠新鮮，軟殼蟹都幾大隻，又炸得夠脆，暫時食幾家日本餐廳嘅軟殼蟹卷，德美係最好味🤤不過埋單價錢幾貴，2人都要$650左右。…Read More

政府宣布放寬晚市堂食，即刻約咗朋友星期六晚去試試呢間餐廳，我哋晚上六點去到，已經坐咗好多枱客人，好在walk-in仲有位😋我同朋友兩個人都大食，叫咗1個starter+2個main course: 芝士焗生蠔，巨大版炸魚薯條，脆炸鹹豬手，加兩杯嘢飲。份量相當足夠！最先嚟嘅係餐包同西湯，個西湯都ok好飲，然後巨大版炸魚薯仔好快就到，估唔到香港都有咁大舊炸魚，真係難得！而且薯條份量好多，又幾脆，兩個人好夠食。之後嘅芝士焗生蠔都幾新鮮，芝士咸度都適中，可以一試。最後上埋脆炸豬手，已經切件，唔使自己切一大餐，抵讚👍 豬手最怕整得太咸，同埋外皮唔夠脆，今次呢隻啱啱焗脆，好脆，配菜有薯蓉同菜，好夠食！見到人地叫黑松露意粉都好吸引，下次去再試！…Read More

今日下午4點去尖沙咀咖啡弄，上到去前面有兩班人等緊，大約6位，估計最快都要等20分鐘先輪到我入去吧，點知前面兩班人等等下都走咗冇入去，所以等咗大約10分鐘就入得！今次係第二次去，上次叫得太多嘢冇試到佢嘅甜品，今次點咗三樣: 芥末煙肉三文治，海鹽焦糖窩夫，同埋水果茶最先黎嘅係水果茶，酸酸地幾開胃之後就上咗呢碟好香嘅海鹽焦糖窩夫，估唔到佢會比三文治更快來，窩夫要趁熱食！食食下發現雪糕溶得好快，變咗一堆cream，唯有當係汁咁點黎食啦之後就黎埋芥末煙肉三文治，食物都好夠熱，同埋夠大份，隔離個薯仔沙律都幾好味！食完窩夫再食三文治真係夠曬飽，呢個份量三個人黎食下午茶都夠晒！…Read More

約咗朋友去荃灣食飯，上openrice搵下靈感，見到明記評分都幾高，就去試下！上到去睇餐牌花多眼亂，睇緊嘅時候職員走過黎問我地：要唔要黃金鮮魷呀？廚房出錯咗，要就即刻有得食！我地三個都幾肚餓，就話要啦！之後睇睇下餐牌，朋友點咗脆皮牛腩同埋炸蠔餅，職員話滿$300會送鹵水拼盤，咁我地冇咁嗌了。食物好快黎齊，我本身唔食牛，所以冇試，但兩位朋友係咁讚呢碟牛炸得好好食。呢度黃金鮮魷用嘅鮮魷都算新鮮，同埋份量都足，有十幾件。另一道菜炸蠔餅個炸份多得濟，蠔仔唔夠多，比較失色。送嘅鹵水拼盤有紅腸，魷魚，鵝腸，豬大腸，豬耳，芽菜...每樣少少啦，當作頭盤小食都ok！因為叫咗好多炸嘢，我地三個都食到好飽，見隔離枱叫鹵水鵝好似都幾吸引，下次黎食試下先！…Read More

由2018年尾發現萬波呢間台式飲品小店，差唔多每次經過都會幫襯一杯，呢間嘅飲品好味得黎唔會太甜，啱啱星期六經過，點了一杯香草籽與鹹奶油布蕾，次次去都跟職員推薦嘅少冰少甜，都係保持一貫水準咁好飲！每次拎起個杯都要打個卡先，因為佢個飲品睇落已經好靚！呢間小店仲有個位好抵讚，就係可以電話落單，咁就可以落完單街行多陣街先過去攞，唔洗排隊啦！可惜嘅係萬波之前有赤柚與山地伯爵，我好鍾意飲架！但近幾次去佢個menu都刪除咗呢款飲品 希望遲啲可以製作返啦！…Read More