star_BARBO_fish's Profile

諗唔到食乜嘢餐廳開OpenRice睇，偶然見到依間野好多好評所以就試吓，點知就馬上中伏！Order:$468 Dinner Set of Two + $78 美國黑安格斯肉眼扒由於成個流程太多地方值得批評所以要用Point Form總括一下：1. 餐廳服務質素令人失望入餐廳坐咗10分鐘，諗住叫個侍應落單都冇人望到，難得有個望到俾咗反應但係又唔記得咗。問是日餐湯同是日甜品係乜嘢又全部都記錯晒，明明話係椰菜花忌廉湯到上菜先話唔好意思原來係甘筍南瓜湯；又話是日甜品係石板街雪糕，到最後變咗朱古力慕絲……到臨走嘅時候想俾錢又係搵唔到人，又係有反應但係又唔理人走咗去做其他嘢，足足等咗15分鐘先埋到單，未見過服務可以咁差。2.上餐速度極慢及漏單食物準備嘅時間亦都好耐，食完第一個烤豬腩肉已經冇嘢上，等咗差唔多20分鐘先再上肉眼扒同虎蝦意大利飯，過咗一陣再提侍應佢哋先醒覺仲有個前菜嘅椰子雞湯燴海蜆未到，最後尾先食個前菜😑（用餐時間總長大概兩小時）3. 食物質素極差成個餐冇一樣野係好食，正常水準都達唔到。前菜烤豬腩肉配紫蘇葉及生菜一拎出黎已經係凍嘅，莫講話冇烤過嘅香味，連調味都唔知有冇。美國黑安格斯肉眼扒(+78)肉眼扒明明要求Medium，一切已經知道肯定冇Medium，Medium Rare都唔知有冇，成塊扒有40%都係根，配菜亦都非常冇誠意，估唔到加$78食啲不倫不類嘅嘢。香草虎蝦意大利飯兩隻虎蝦都唔新鮮，唔離殼而且肉質欠佳😓意大利飯淡而無味，同虎蝦味道不夾，食咗一半已經唔想再食。椰子雞湯燴鮮海蜆 (前菜但最後先上）賣相非常唔吸引，好似人哋食淨分俾我哋咁。溫度亦都係凍嘅，味道亦都食唔出有任何椰子或者雞湯嘅味，口感滑潺潺的，感覺十分古怪是日甜品：朱古力慕絲朋友期待的石板街雪糕沒了，以為至少還有朱古力慕絲，怎料甜品水準亦低下，與放題任食的甜品質素無異。朱古力慕絲內有朱古力碎，口感不夾而且配搭奇怪，味道係甜嘅忌廉狀物體。餐飲：凍檸茶x2強差人意，第一樽提供的糖漿只有幾滴，需要經一番努力找侍應才得到另一樽糖漿總結：性價比極低，用餐體驗極差食完咁嘅一餐盛惠$614，完全係唔值呢個價錢，就算半價都唔值，含淚俾錢一肚氣離開，同一個商場入面絕對有更好嘅選擇。希望任何人睇完依個食評，停一停諗一諗。…Read More

非常失望的一餐😢—————————————————————今日朋友book咗八點鐘嚟餐廳食晚餐餐廳氣氛嘅好，入去的時候已經聽到職員為其他食客慶祝唱生日歌，感覺幾良好我哋被安排嘅位置在一樓，基本上一坐下的時候已經感覺到非常大風和好凍，坐左幾分鐘已經要求希望調校細啲冷氣或者其他座位，可惜只是被員工敷衍了事，還是被強風吹住。我哋點左三個食物，第一個Beef Cheek 82 10分鐘就已經上咗菜，不得不提佢嘅牛面肉做得非常出色，夠腍有口感而且牛味十足，配菜嘅蘿蔔蓉到非常creamy但係可惜其餘兩個食物等咗一個鐘都係冇出現，問侍應係咪漏單嘅時候只係得到回覆”on the way”或者係”coming”。最後係大約九點二十分嘅時候先至上Juicy Lobster Rice，但係已經等到冇晒胃口，被風吹到又凍又眼瞓，職員見到咁嘅情況都調咗我哋去近廁所方向嘅位置，但係其實近走廊位置風速都係一樣只係靠牆嘅位會冇咁大風。Juicy lobster rice上菜嘅時候溫度只係微暖，朋友形容個飯好似食緊粥咁略嫌太”watery”，冇預期嘅咁好食。最後仲有一個Ham Broken Egg，大概係lobster rice上咗10至15分鐘之後到，相信應該係漏單後補，但係已經冇心機影相。其實如果製作需時可以預先同顧客溝通，坐低咁凍應該會點其他快啲完成嘅食物。…Read More

平時基本上除咗買燒味外賣都唔會入去食，第一次入去食就即刻中伏了。今次夜晚去食，明明入面有幾張空枱都要等咗三字先俾人入座咁唔緊要啦等位好正常，坐低叫茶拎餐具都好快手點知叫完嘢食望吓周圍就知不妙，大陪份枱都係得花生同茶，少數幾張枱有一兩碟餸結果我哋叫咗四碟餸足足九個字都冇一碟上，臨走再催經理先話入去叫廚房快啲炒，都搵笨隔離枱兩個人早我哋到十五分鐘一齊等都係乜都冇，每十分鐘催一次阿姐，次次都話整緊但係我哋走佢張枱都係吉…Read More

難得復活節假最後一日喺銅鑼灣行到攰，想坐低慢慢嘆杯咖啡，同朋友叫咗一杯Iced Mocha同一杯Iced Hazelnut Latte。相信無論任何人飲依兩杯「咖啡」，腦部都會被嚴重衝擊；除咗「糖水」，基本上諗唔到其他形容詞去表達依兩杯嘢嘅味道；飲到一半已經極度口渴，幸好店鋪有清水提供。…Read More

晚上1800到Pici買外賣，可能因為冇堂食餐廳外面都唔係好多人等緊慢煮牛面頰寬帶麵(外賣)pici嘅手工意粉同出邊食嘅唔同，食落比較有質感同彈性，滿足感大增！慢煮牛面頰肉都同預期一樣入口即溶；醬汁份量都恰到好處肉味十足，唔會食到落底乾晒冇味。唯一扣分嘅地方就係有啲油膩，食完見到成個底都係油…Read More

之前試過同一橦嘅另一間cafe覺得唔錯😋所以今次決定試吓係隔離嘅依間 Bread & Bistro門口睇佢哋嘅餐牌都見有好多唔同嘅選擇而且睇落幾吸引，佢哋嘅午餐包是日餐湯或者沙律不過就唔包括餐飲極上蟹肉海鮮鰹魚湯泡飯（$138）湯飯上枱嘅時候溫度夠熱，飲落暖笠笠而且有好清甜嘅鰹魚湯味；蟹肉份量非常充足，撈勻食可以啖啖都有蟹肉送飯，不過蟹肉到略嫌唔夠鮮味仲有點兒被飯素蓋過味道😗比較好嘅係佢配料款式多，除咗相見到嘅雜菇之外都有唔少魷魚青口同蝦嘅海鮮，令成個飯冇咁單調…Read More

廣華街好多鋪頭都唔洗排隊，唯獨依間排滿咗十幾個人喺門口！依家諗返都覺得值！（可以提早用某APP攞飛～）自己嗌咗一個蕃茄牛肉麵，等咗大概五分鐘就有得食了，賣相吸引之餘亦都聞到少少蕃茄湯嘅香味🤩佢哋嘅蕃茄湯雖然冇蕃茄做伴菜，但係就有少量嘅酸菜同蔥，輕輕提高食慾食落更開胃！最驚喜嘅係阿木嘅紅燒牛肉，未食之前諗住片切會同普通牛展差唔多，一夾起就知道不得了，四塊牛肉個厚度都好似牛排咁厚！而且口感一啲都唔韌，半根半肉非常之腍食到停唔到口🤤🤤🤤…Read More

今日去咗樂富搵朋友拜年食飯，晏晝樓下間間餐廳都排晒長龍，見到依間新開日式西餐外面睇落幾靚幾吸引就決定等位試吓～入到去第一個感覺就係好似有啲不妥，因為佢入面嘅裝修同出面睇都有唔少出入，有啲被人fake咗咁新春期間set lunch一律188起，包沙律/餐湯+包 + 主菜 + 水果茶，同朋友一齊叫咗一個自家製肉丸(和牛)手工意粉再加一個辣肉腸芝士薄餅首先上咗餐湯、包同水果茶，睇顏色應該係南瓜忌廉湯，冇咩南瓜味但係飲落去非常creamy幾好味，不過之後就感覺有啲膩口肉丸手工意粉醬汁幾惹味，意粉口感亦都幾獨特有啲咬口，感覺有啲食上海炒麵嘅質感；佢哋嘅肉丸如圖所見大大粒，但係食落冇嘜和牛味同埋有少少羶，形容佢為獅子頭會更加適合辣肉醬薄餅size頗大，除咗芝士味好淡之外味道冇咩特別，但係強烈地感覺到好膩！食咗四分一塊已經冇胃口食落去，特別係佢批邊非常之厚要咬好耐，見到其他枱好多人都食唔曬擺咗喺度另外值得一提嘅係佢哋嘅上菜速度好慢，飲完個湯起碼等咗15分鐘先上個意粉，再過咗大嘅6分鐘先有pizza，食緊嘅時候都見唔少人催；再入面都見到有隻烏蠅飛來飛去整體感覺不太良好，就算有$30 coupon都應該唔會再去…Read More

星期日去將軍澳周圍都係人，見到依間價錢相宜氣氛唔錯就決定試吓我哋等咗大概十分鐘到就有位，幾個待應都好好間唔中就同我哋講就快有位，甚至驚我哋出面等熱叫埋我哋入去等，好快幫手執檯佢哋星期日都有提供set lunch，前菜可以揀沙律/餐湯，主菜大概有九款選擇。嗰日佢哋嘅餐湯係蘑菇湯，可以飲到一粒粒嘅菇碎仲有啲菇片味道夠曬濃郁！不過唔知點解嗰日份量只有好少主菜：法式青口配薯條青口份量恰到好處，佢哋嘅白酒忌廉汁亦都同青口好夾，一齊食非常美味。薯條都炸到啱啱好唔油膩夠鬆脆…Read More

經過大圍突然間想食上海野所以就入咗去了韭菜水餃麵($28)上海幼麵幾滑算有普通水準，湯底味道都唔會太濃太咸仲有啲大白菜做配料。韭菜餃個皮厚度適中，餡料都好飽滿，不過略嫌唔係好夠韭菜嘅香味。五隻鍋貼($16)鍋貼皮反而比較厚，特別係個底有啲燶食落會明顯硬啲。上枱嘅時候都夠熱，咬開都有好多肉汁會香氣撲鼻，如果皮薄少少會好啲。…Read More

大圍本身都有好多唔同嘅菜式選擇，依家就連船麵都有得食！店舖係積信街附近轉角位，與附近商鋪截然不同嘅裝修令佢非常起眼剛剛開始午飯時間就已經坐滿人，用餐環境不大不過也不算太迫夾，桌面都有小貼士教食客點樣調味。雞肉船麵(蛋麵)，蛋麵係一個幾特別嘅選擇，其他餐廳比較少見，不過食落冇乜特別，感覺同其他食材唔係好夾，如果要其他麵款可能會比較好；成碗麵嘅份量都比較細，配料都唔係好多，好快就食晒成碗。佢哋嘅熱青檸蜜雖然大大杯但係味道好淡…Read More

放假嚟咗西貢行，搭船出去之前就嚟咗依間具特色裝修嘅小店午餐。坐低咗先發現原來佢哋係西貢少見嘅印尼餐廳，令人有啲驚喜好奇😮✨佢哋枱面會提供一個QR code俾人落單，落單個網有晒大部份菜式嘅照片可以俾大家參考。印尼雞湯飯，本身有啲期待佢哋嘅雞湯係咩味道，但係飲落發現味道麻麻，略嫌有點淡只帶少少喇沙同咖哩味加比較明顯嘅椰漿味。配料方面就好充足，除咗主菜雞絲仲有啲椰菜、蝦片、雞蛋、豆卜同芽葉，口感幾豐富…Read More

今晚突然心血來潮想試吓最近大熱嘅日式牛肉飯，同朋友1845去到旺角嗰間排隊，一排就排咗45分鐘先有得食🥲由於一早已經諗定食乜，所以一坐低就即刻嗌左個香蔥溫泉蛋牛丼加$10套餐，落完單過幾分鐘就即刻有得食😆味道其實普普通通好過另一間連鎖牛肉飯少少，不過套餐價錢其實都真係幾吸引，間唔中簡便一餐係唔錯嘅選擇…Read More

難得和朋友在新城市敘舊，想搵個地方坐低慢慢傾吓計食少少野所以就入咗春水堂～一人要咗一杯珍珠奶茶，再叫咗香酥雞同珍珠熔岩蛋糕share食～可能因為有唔少冰嘅關係，珍珠奶茶味道偏淡，不過佢嘅珍珠食落煙煙韌韌幾好味。至於鹽酥雞上枱時溫度夠熱，咬落非常酥脆，不過佢哋嘅雞肉口感就同出邊唔同，肉質冇咁實冇乜肉汁但係都算嫩，比較特別反而熔岩蛋糕就有啲失望，比想像中普通同埋細，就咁一個蛋糕再加啲cream同珍珠，切開亦都冇熔岩流出嘅效果…Read More

網上見到赤柱地摽結業的消息後就決定要和朋友來作最後的朝聖～餐廳座落於赤柱大街轉角位的藍屋(已被塗成黃色)，可能因為就快結業嘅關係，去到嘅時候已經坐滿晒人都要等一段時間先有戶外位。不過戶外嘅環境有啲凌亂，餐枱餐具地下都有少少污糟，而且坐低叫店員攞兩杯水叫咗幾次到最後主菜食到一半先至有......我哋叫咗兩個Lunch Special, 一個和牛漢堡同一個公司三文治雞肉卷，不包括前菜及飲品。兩個餐嘅份量以下午茶來講都算足夠，可能係一早準備定嘅關係所以兩個都唔係好夠熱，味道都叫普通；不過可以享受到赤柱大街嘅風景同氣氛已經好好～…Read More