君子's Profile

本身睇MENU見佢TEA SET價錢唔貴而且款式又幾吸引就入去，落單要自己掃QR CODE點餐，當時都未見有寫製作時間幾長，以為都係等十零分鐘，點知打完機已經等咗29分鐘都未到就問下職員，女職員首先望到我枱未有食物，唔係行來問我咩事，係衝返去電腦望下我點左咩餐先，再埋來同我講鬆餅係要等30分鐘以上，我心諗你都幾醒喎……我等左近半個鐘，你就講要半個鐘以上……好啦都照等，諗住應該幾分鐘內點都有，點知係等到42分鐘時另一位職員都覺得唔妥，主動叫其他人睇睇呢張單出未，然後廚房方向有一位女職員跑出來同其他職員講『Sorry呀xx(職員名)原來12號枱張單……』(後面細聲左我聽唔到)咁我唔知究竟係漏單定點，但講完呢句冇耐就真係捧到個餐出來俾我，我懷疑根本係整好左唔記得上碟……但食物本身我覺得又真係抵食而且好食，鬆餅真係做到外脆內軟，有奶蓋泡、黑糖珍珠、一球雪糕、cream、仲有少少士多啤梨，而且個黑糖漿幾濃郁，配雪糕食已經好好食，奶蓋泡有少少鹽味，令成碟野都有層次唔會一味死甜，係k11來講連埋加一都係64蚊算平，如果同朋友來可以一直吹水等落去我都未必介意，但都係希望餐廳可以係落單時大隻字寫明呢個餐係要等咁耐…Read More

首先講員工態度，因為真係忍無可忍!我幾次收工行過去都見好多款賣晒，第三次行過就直接問可唔可以俾全數訂金，然後第二日過來拎，員工話唔俾，一定要即買即拎走，問題係我根本都未試過有貨可以拎走，我又點買？搵日早D特登過來買，三個員工係度都話『要搬貨，等我地上晒貨先買』我明你D野要雪、要快手，但兩個人已經做到既野點解唔分一個人來處理？至少可以收銀果位收晒錢出晒單俾人先，之後先PACK野已經快好多啦；再來，員工問我幾耐返到屋企，耐就可以俾乾冰袋，我話需要乾冰袋，佢就係咁話『兩個鐘內都會揮發架喎，俾你都冇用架喎』咁你唔俾就唔好講啦!!何況我買兩個蛋糕，當我清空晒屋企冰格都唔會放得入，你又唔可以俾我先付訂後取貨、又唔俾我乾冰袋延長一下時間，係咁強調一定要即食、即買即拎、但又要放冰格，咁有屁用？三個人俾我感覺就係完全唔想方便你，你食唔到你既事唔好要阿姐我麻煩!!等我之前仲睇食評話『如果驚夜得制去到無晒，早經過既話可以買定reserve 定，到晏少少先拎走都可以』，點知問兩次都唔得，果下其實有D想叫佢俾返錢我唔買!!至於味道同口感，其實我係朋友請我食過覺得OK所以先想買來慶祝家人生日，食落有D流心既感覺，我食兩次分別試過熱同凍食，覺得凍食感覺好味D(又可能因為兩次都夏天食)，蜂蜜味都濃，但伯爵茶味又唔算好出，食落有D黏黏地咁，以75蚊價錢來講雖然係唔錯，但咁既態度(我唔知係咪得呢間分店先係咁)，我絕對唔會再試。…Read More

前後幫襯過三次，三次都係下午茶時段。食物冇問題仲幾好，係日本居住過回港甚少肯食日本菜既朋友都讚好，先講食物，飲品冇咩選擇，都係得汽水所以唔值得講；小食點過南瓜餅同蕃薯餅，非常大份........食落都唔會死實、而且有蕃薯甜味，但同時又食麵的話都幾頂胃；麵方面，湯底有得選擇淡、普通、濃，麵都有得選擇硬、普通、軟，呢點實在做得唔錯，對於我呢類傾向食濃味既人選濃味覺得剛好，第一次食黑白焰，但其實唔係太食得出有黑松露味道……可能係湯頭本身都比較咸遮左？比較過叉燒同豬軟骨我會選豬軟骨，感覺抵d，同埋個人覺得佢既叉燒冇咩肉味，整體來講碗麵係好食，但員工服務態度真係唔太好，尤其第一次幫襯時一位後生仔店員令我爭D唔想再回頭。事源當日下午茶見冇人唔洗等位入去幫襯，直接點COMBO打算食豐富D，過左幾分鐘後該位後生仔店員拎返張單擺落我位，一句『我地冇晒蛋做唔到COMBO』就行開，當下覺得有種焗我接受既感覺……成個COMBO咩都有係冇蛋而已，其實係咪應該都通知聲，你唔俾我冇COMBO的話唔食？店舖方面都應該制定如果有呢類情況出現的話，可考慮改為FREE其他食物代替，而非一野隊張單埋來就行開；冇蛋唔緊要，問題係後來該位員工用膳，由於我當時坐出菜位，見住員工向廚房阿姐講『喂俾多隻蛋啦~要多塊紫菜~』我八卦一望，total兩隻係碗內，喂﹗又話冇蛋？﹗個員工似乎都知我望乜，望一望我之後即時走去角落位食麵，係食佢果碗極度豐富既麵，成程令我好不明所以，點解同我講冇蛋時轉頭你又有蛋仲要打孖？(但第二次成功點到combo後食過隻蛋其實冇味，唔需要太期待)另一樣不滿既係，當時連埋我得三台客，唔多人都可以錯單......明明我得一個人，佢同我落兩碗麵，搞到等左好耐先有得食(佢要兩碗一齊出)整體而言，食物係幾好的，小食份量都唔欺場，連伴碟沙律都整得幾好食，但D店員態度有D都幾懶散。…Read More

睇過某位著名blogger推介所以特地去搵來試~香港而家真係愈來愈少呢類地方小店，店舖位置其實都幾『隔涉』，唔係住果頭真係未必可以成日去，好在都叫近西鐵柯士甸站要走唔難(F出口，渡船街東出口一出直行直到見到7-11便利店就轉右)而店面其實亦唔係好好坐，因為得一張橫長型向牆小枱，另一張四方枱，枱下面都塞左好多備用貨物，擺唔到腳入去，希望佢日後有能力擴張啦﹗先比食物相大家望下~(影漏左張羊肉餃)上圖呢個係驢肉，附帶個醬其實都幾咸，可能外省人習慣，我開頭唔知一點就沾左半塊肉係醬，食完狂飲水，但香料味道真係好正，而肉既質感同鎮江肴肉差不多，呢類肉都係我喜歡既類型，$45一客。:)上圖係肉饃，內容物有薯仔絲同醃制炒過既豬肉，本身想點一個土豆饃同一個肉饃，但好人老闆娘同我地講，其實土豆饃只係迎合素食者而設，肉饃本身都有薯仔絲，而薯仔絲亦係同一制法所以可以點一個就得~上碟時仲好體貼問需唔需要一開二，份量來講我認為女仔食一個已經夠飽，但男友就一人食左1.5個，相信係因為薯仔同肉夠惹味，而饃本身都好脆，口感有少少d新鮮既scone(英式鬆餅)，要知道脆口野真係好難唔好食﹗而且一個都係$15，真係好吸引﹗前後兩個肉饃、一碟驢肉、計埋乾羊肉餃6隻同一支豆漿，埋單都係$115，相當抵食呢﹗食完仲同老闆娘傾左成個鐘頭先走~…Read More

之前有食評話呢度係冇價錢，係真既，因為佢係私房菜所以你一係老土d，叫親都問佢價，但如果你唔叫蟹的話其實佢又唔會貴，甚至都算抵食，我地兩丁友食五樣野連飲品都係$223，除返開一樣野食就40蚊左右。交通：我本身住元朗所以係匯豐/新元朗中心對出小巴站搭32號小巴三個幾字左右到，記得小巴兜左入可道中學同崇德英文書院後面就留意，過左朗峰園就叫『垃圾站有落』，落車過對面馬路行幾米就到，門口有d閃燈好易認。食物方面，三年前幫襯過果陣覺得幾有驚喜，連我本身唔飲冬蔭功既人都愛上，但今次入來再試覺得可能已經做起左，冇上次咁好食了，生蝦刺身一早賣晒試唔到有d可惜。第一個上菜既係泰式炒雜菜，好老實全晚最失望係佢，幾乎冇味﹗食到尾先有d蒜味，pizza hut果個仲好味過佢，但講大碟佢都算大碟，其實四個人食都冇問題。黃咖哩炒飯，味道幾香，都夠辣，不過略嫌佢真係太依賴香料，食到好多香葉，入面除左幾塊肉同椰菜真係咩都冇，勝在又係大碟，兩條友的話真係食唔晒。冬陰功海鮮湯細size，佢有某幾款都係有得揀大中細，方便家庭客同附近粗活人士，如果兩個人的話叫細就夠，除非你真係好喜歡飲同埋唔打算再叫其他野，個湯有蜆兩隻、蝦兩隻，少少肉片、菇類、椰菜、香料，蝦同蜆冇咩味可言，唔知係雪藏貨定係佢真係有心到煲咁耐將d味入晒個湯，不過以咬感來睇，相信係前者居多，但質素都比外頭同類餐廳好好多。 沙嗲串燒，雞及豬各三串，呢個天氣冇羊肉串所以唔好諗住有得食，個醬係有落花生，所以請同我一樣對花生有食物敏感既人唔好點，我食左少少有醬既豬肉，覺得冇醬咁食好似仲好食好多，但兩種肉佢都整得肉厚，比起之前九龍城小曼谷食一串感覺係實在好多，但遺憾在佢係冇牛肉串甜點係香芒竹桶糯米飯，冇竹桶，但叫香芒蕉葉糯米飯的話我記得真係有蕉葉，而個飯亦唔覺有咩竹味可言，所以唔知叫竹桶糯米飯做乜。建議唔食得甜既人唔好叫，外子係一個食朱古力都只食85%以上黑朱古力既人，佢認為太甜所以食得有d吃力，但對我呢個"糖人"來講就好好食，而且整得幾煙韌，用叉想cut開都要費d時間，有d紅豆定黑豆加埋仲幾有咬感，加埋碟邊雪過既芒果食一凍一熱，配埋糯米飯上既椰漿入口做一餐飯既美麗總結。飲品叫左青檸梳打，我覺得好酸，男友又覺得唔太酸仲幾好飲，但如果怕d野食濃味太滯的話飲呢杯野的確係幾有用，罐裝梛青都幾清甜。環境方面，佢店入面都係大枱，我同外子兩個人去佢都係比大枱，聽到一位阿姐問帶我地入座果個阿姐做咩兩個人都比大枱佢，我心諗：你有細枱咩？三年前我得三個人來你咪又係比大枱我……怕熱或者食辣野慘過去蒸汽浴既朋友請要求坐門口一入果幾張枱，因為果幾張比較闊落、空氣流通，我同外子坐正廚房門口，除左要就佢出出入入之外亦頗熱，唔敢想像遲多個幾月後盛夏時間點算好，而枱凳都係大摺枱同摺凳，大排檔格局，所以唔比得好高分。服務方面：茶記阿姐質素，唔會主動推介你食d咩，但你叫野揀size佢會比下意見，你唔係成日幫襯既家庭客好難同佢有水吹，當晚聽家庭客點好多野都係餐牌上冇，阿姐同我地當然提都冇提過啦。總評：冇幾年前來食咁正斗，而且餐牌覺得佢太偏重小食類、飯類，想點咖哩肉類真係有難度，我掀左menu不下五次都係見得青咖哩茄子雞同另一樣，係呢方面佢選擇性真係太低。由於交通唔算方便，附近亦冇咩配套，唔係住本區或經開就唔建議專程來食，因為而家既佢並未驚喜到值得花時間同車程入來食，除非你自己有車，因為佢對面有得免費泊車係值得加分。…Read More

暗瘡皮膚既我限左自己一個月只可食一次咋~慘﹗因為我鍾意既炸雞扒燥熱，雞皮都含激素會有刺激所以要忍口~上次同外子來光顧係夜市，坐爆人，今次我單拖下午兩點半來，都係坐爆人，好彩我一支公易搵位唔洗等。下午茶原來叫飯係唔包野飲要加十個大洋，但麵就包既，凍飲加兩蚊，好彩我忽然身痕想食麵否則都冇咁抵，至於下午茶會唔會細份量左呢？我答案係冇變﹗呢下先驚喜，搭枱有三位女士一個叫茄子肉燥飯，照舊都係咁大碟，另外兩位叫干拌麵，我望落同上次晚市食個量就一樣，只係晚市唔會包野飲冇咁jetso。味道同個半月前晚市幫襯一樣，雞扒都係脆卜卜，係略嫌整麵果度慢d，見好多人都係雞扒雞翼果d來左好耐先有麵，不過佢如果係即整既都由佢啦。湯我唔肯定係咪有分清湯/牛肉湯？因為見menu張紙有講牛肉湯同清湯製法，不過我見佢冇話有得揀就冇問費事seven左。環境方面唔比得好高分因為佢樓面細，而家都偷雞放左幾張摺枱出門口，奉勸大家坐低就唔好亂郁又起身去廁所出去買報紙食煙果d，佢4個樓面行都好似跳緊辣身舞咁你再行來行去怕危險，所以亦勸d有BB車既人士一係將車仔放門口，唔好拎埋入去，否則其他人要行又冇位。題外話(非食評)：作為一個客唔好恃住自己比錢既身份就大x晒咁款，見有個阿叔點珍珠奶茶，阿姐循例問句凍定熱，佢就『梗係凍啦﹗咁既天氣唔通熱咩﹗』有得揀而你冇講人地問你一句係尊重你亦費事轉頭比錯你，答一個字就算啦，當人老奉知你諗乜？我做過飲食知道呢行幾辛苦，你比得幾十蚊唔好當人係你工人咁呼喝…Read More

男友生日想食得特別少少，之前見有雜誌介紹過呢度可以DIY大阪燒，上過來睇好多人都係話lunch時段可能忙turn枱冇得自己整所以負評，我就揀晚餐時段來，好彩我早到，六點九入座時仲怪人點解要我同人搭坐四人位，唔比我放野係隔離凳，點知唔夠一個鐘成間鋪已經坐爆左﹗係我怪錯你地soory外子煎緊個蔬菜為主既餅時有個似係店長既人叫佢按扁d，我其實半信半疑，以我煮食同煎過第一個餅既經驗來講，呢個餅係菜為主冇肉咁多黏性扁d會好難反，果然﹗想反果陣就feel到佢好易散而無從入手，女店來來幫手又叫佢煎返厚d同加多d油，外子後來細細聲話究竟佢地有冇協調，一個話扁一個話厚，可能店主開頭冇望真個餅冇肉多菜啦……(呢個亦係我建議大家如果未煎過的話唔好一下挑戰太多菜既餅既原因)但服務真係唔錯，店員都好主動埋來睇你有冇野要幫拖，亦唔會拎左個剷係手就由頭帶到落尾，會問返你要唔要自己試下解決返，梗係啦你間野賣野都係DIY整餅，冇的話真係考慮下先幫襯啦﹗環境方面其實係幾乾淨，佢地執野都好快手唔會要門口既人久等，同果D韓燒一入去成陣油煙味，張枱又油立立的確係唔同，但建議佢地D抽油煙機可以再勁D就更好(可能佢地怕太嘈會影響食客吹水)外觀來講佢存在感其實幾低，尤其老銅d鋪面大多好有性格，我搵果陣都差d睇漏眼。飲品我唔記得影低，但強烈建議大家飲茶類，事關我叫左杯草莓梳打，食第二個餅頭一啖覺得好頂胃，可能係梳打有氣，同埋外子杯薄荷檸檬梳打真係好藥水味……似十足細個睇西醫發燒果陣飲半透明藥水果種味﹗唯有喪篤檸檬來溝淡陣味，同埋野飲價錢其實都唔平，一杯檸茶都廿蚊，係餐就包埋兩支可樂，散叫就冇，但佢又唔迫你叫野飲我建議自己去七仔買好過。我地係散叫兩個餅、羊扒(又唔記得影，不過幾好食建議食羊者試下)、酒煮蜆、芝士雞軟骨球、兩杯野飲，我用左openrice張折扣劵平五十蚊，總數$342，下次打算叫埋朋友一齊來抵食d~…Read More

最衰唔記得帶手提影唔到相，幫公司做完野係地鐵站買左佢杯香蕉脆脆乳酪食，底層有蜜糖，上面係香蕉、乳酪同燕麥脆粒，廿蚊杯，比起超市，佢個價的確係貴左d，但有埋鮮果係度而且份量都唔欺場，當係下午茶一流，而一行埋門口都望到有唔少十二蚊一個法包仔~女仔的話當係早餐/下午茶，或者晚餐唔想食太多都夠啦~食緊乳酪時剛好有兩位尼姑入來問店員素食推介，有位年輕男店員自言雖然唔太清楚素食者有咩係一定唔食得(例如蛋黃醬)但佢都好盡力去推介、解答兩位佛門中人既問題，係兩位揀緊既時候佢又同時留意四周環境、執走客人留低既野食、垃圾，換垃圾袋，而一位穿灰色恤衫唔知係咪經理級既店員一見多人都會即時出來幫手，之後先入返後面，全店做事都非常勤快，果然係商業地帶店舖~…Read More

頂佢個肺，雖則話半價下午茶，但同等價錢我寧可去食元氣元綠，人地d侍應起碼反應快、話頭醒尾，呢間我半年前同朋友來食都係半價時段，但質素幾好，今次同男友來，首先點三文魚，見到舊飯比以前瘦左三分一……食落塊魚生好重雪味，仲要有筋……結果成舊都係靠點wasabi豉油來食，打算點d有芝士、火灸會好d啦……點知等左半個鐘都未見火灸醬燒三文魚、火灸蝦、芝士蝦卷、炸蝦卷同埋天使蝦，仲有碗烏冬都未到，本身諗住等多幾轉先催，但見遲過我地來既都食完埋單，而當時店內唔算多人，卡位都未坐爆，刺身櫃個壽司師傅仲做做下野失埋蹤﹗迴轉壽司吧入面個肥仔做野又慢手慢腳，又唔戴口罩拎住碟壽司吹水，點睇都唔知有d咩單趕緊啦？忍唔住叫人來跟跟單…點知原來天使蝦冇落單、炸蝦卷變炸蠔卷，叫個女侍應跟，佢行開左之後又係冇件事繼續遊魂﹗再叫個男侍應跟，講完後個火灸醬燒三文魚同火灸蝦就即到……咬落係凍既，即係一早整好左啦？之後仲要食埋個烏冬先黎埋芝士蝦卷、炸蝦卷，又係咬落凍既，除左面頭d芝士有些少味之外就乜味都冇﹗洗左百七蚊但覺得非常唔抵，好食既、服務態度好既七百蚊我都照比，但我入來坐左兩個鐘先齊野，一碗蕃茄牛肉烏冬我唔信要用一個鐘整呱？我諗除非你要我係佢同明將二揀一，否則呢間野我絕對唔會再去，真係去百佳買都好過食佢﹗…Read More