KAMANLi1731的個人專頁

醉香雞米線加通菜加餃子（共$77）Bookmark左呢間餐廳好耐，已經過左熱潮但平日2點到都座無虛席，等左幾分鐘先入座，同埋一定要搭枱，坐落都有啲迫。雖然唔係特別鍾意食醉雞，但一場黎到都係試下佢個招牌先，點菜時好貼心可以揀少酒定正常定多酒，我就揀左個正常。本身米線係$66，每樣餸加$7-8左右，都唔算貴。一上菜，份量好足，雞件都有5件，有雞髀同雞翼，啖啖肉，最欣賞佢係啲雞係我鍾意既全熟，雖然唔係特別滑溜，肉質實淨得黎都唔會太乾，就咁食都有湯底既味，但嫌唔夠味都仲有辣椒豉油可以點，除左豉油，上菜時都會俾埋碟仔放骨，非常貼心。成碗米線除左雞之外，湯底都係主角，湯底真係幾好飲，即使我唔太鍾意醉雞，但佢個酒味唔會好重仲甜甜地，有啲藥材味但唔會太苦，好易入口，唔經唔覺就飲左一大碗湯，但嗰日都冇口渴。個米線煮得剛好，口感適中，索埋啲湯一齊食非常滿足。講到加餸，最推介係加通菜，因為好索湯好入味，餃子就一般，似係工場供應，肉餡極少食完都食唔出係咩味，好彩只有兩粒，另外枱面既辣椒油都麻麻，唔夠香又唔夠辣。整體黎講味道唔錯，價錢都唔貴，一次有下次。見到現場都多人叫喇沙湯底，下次試下先。…查看更多

1️⃣十勝帶廣名物豚丼 （普通size $88)豬肉片燒得剛好、表層焦香、唔會燶哂，肉質唔錯，而且有肉味，係日本肉既品質，肉片唔算大塊，加上只有4片，本來飯冇跟其他配菜，只有幾粒青豆，食到一半略嫌味道太單調，加上醬汁都好少，唔夠送飯。另外呢度既服務都唔夠貼心，枱面喺冇調味料（例如七味粉），我叫個服務員黎直至到佢搵支七味粉比我都等左好一陣。2️⃣玉子燒從賣相可見、玉子燒做得唔夠綿密鬆軟，已經係形成左一層層，咬落口感一般、而且味道偏淡，唔推介呢度既玉子燒整體味道一般，豚肉味道算係好啲，但考慮到食物份量、價錢同服務，性價比偏低，冇再訪既打算…查看更多

慕名一試呢度既梳乎厘pancake，叫左焙茶榛子pancake, 味道同質感都係唔錯，中上水準，略嫌錢偏貴（加一後$162.8），呢個價錢可以有好多其他選擇，不過如果經過不妨一試！即叫即做，等左20分鐘左右，佢個質感係做得好好，真係會騰騰震，同時唔會因為中間唔夠熟塌落去，切開檢查佢個火候係掌握得唔錯，已熟透唔係流質但做到梳乎厘pancake 主打既空氣感。味道都係唔錯、唔太甜，焙茶布甸、榛子碎都增添左口感，但面頭既忌廉太少，食到中間只剩番pancake空口食，呢點扣分！另外值得一讚係環境，呢度有榻榻米座，細心既挖空設計，可以坐得舒舒服服唔洗跪坐。…查看更多

上次食左煎餃，自此對豐信餃子都好高評價，今次特登黎太子試埋湯餃，叫左湯餃十隻（南瓜粟米鮮肉餃同荽茜雙拼），共$57。餃子味道黎講，南瓜餃真係有驚喜，南瓜內餡香甜，食落好開胃。但荽茜餃個人就唔係好鍾意呢度既調味，荽茜味係有，但唔知點解食到有啲似鯪魚既魚味。另外，個椰子湯都好清甜，飲哂都唔會口渴，雖然湯餃冇煎餃咁香口吸引，但餃子調味適中唔單調，絕對會再訪👍🏻唯一希望佢地改善既係服務，我只係去左個廁所，返到黎啲碗同單都比人收走左。…查看更多

雖然位置有啲隔涉，喺商場搵左一陣先搵到，但星期六中午黎到都係座無虛席，等左十分鐘左右，叫左海鮮意大利飯，連加一$178。即叫即整，海鮮用料都新鮮，蝦肉彈牙，飯都煮得剛好，唔係正宗偏硬既口感，符合香港人口味，醬汁味道酸甜好開胃，仲有芝士味道豐富，份量都比一般西餐廳大。餐廳環境開揚，有啲迫，但坐窗口位，望住街景食飯都唔錯，$178午餐唔包飲品，雖然味道好食、分量足夠，整體性價比還好。…查看更多

叫左黑芝麻雪糕（$28）實在物超所值太有驚喜！軟雪糕質感軟滑，黑芝麻味超濃，加埋面頭濃郁既黑芝麻醬，黑芝麻味滿分！食到個筒都有黑芝麻味，成件事真係好滿足！以前我最愛係CWB嗰間好出名既黑芝麻雪糕，呢間味道同價錢都完勝！當日係平日5點半到，冇人龍但都一直有人幫襯，希望以後唔好排哂長龍！必定會再黎試埋佢既黑芝麻豆漿同黑芝麻布丁…查看更多

Bookmark已久，以前每間分店都等最少30分鐘，依家熱潮過去先黎試，叫左招牌既國王珍珠奶茶，少冰少甜（$38），平日午餐時間黎都等左10幾分鐘。國王珍珠奶茶，奶茶既味道唔錯，厚奶好濃厚，口感都好順滑，少甜個甜度剛好，略嫌鳳眉紅茶個茶底較淡。當中最驚艷係個珍珠，係我食過最好食既珍珠，佢係做到咬落有啲脆口入面好Q彈，口感一流，甜度配埋少甜既奶茶一齊飲剛好～整體味道明顯好過坊間既連鎖珍珠奶茶舖，值得再試！…查看更多

叫左4餸車仔麵：牛肉餅、韮菜餃、牛腩同蘿白，當中最鍾意既係牛肉餅同蘿白，牛肉餅係扁版既牛丸，好juicy同口感爽彈，蘿白清甜冇渣，韮菜餃就不過不失，用左雲吞皮包，同埋餡係包得較少，唔係我個人鍾意既水餃。牛腩都炆得入味，味道都唔錯。湯底揀左沙嗲汁，沙嗲汁夠惹味，河粉都煮得剛好唔會太碎。呢度既奶茶都唔錯幾好飲！整體黎講車仔麵味道唔錯，區內實在太少餐廳，唔怪之得店內人頭湧湧，不過略嫌環境真係太迫，枱與枱之間距離好窄，枱亦都非常細…查看更多

叫左沙嗲牛肉公仔麵，標明用左雞白湯，但味道同一般湯底冇咩分別，沙嗲牛肉既味道都係正常冇咩特別，另外炒蛋滑嫰唔錯，配既餐包少有係配墨西哥包，個包都軟熟唔錯既。奶茶味道比坊間普通茶記優勝，茶奶比例剛剛好，飲到茶澀味同奶既順滑口感。整體味道合格，份量偏細，但價錢$40而言都算物有所值，環境光猛乾淨，環境比起同區舊式茶餐廳坐得較舒服，不失為同區食早餐既好地方。…查看更多

bookmark左坐忘好幾年，平日13:45到，依然座無虛席，剛好有人埋單，等左幾分鐘就可以入座。叫左招牌既豬軟骨咖喱飯（$75），咁就又食到聞名既豬軟骨同招牌既咖喱，睇相都睇得出份量十足，豬軟骨有4大塊，物有所值！豬軟骨煮得軟腍，非常滿足，最欣賞係啲醬汁既調味，無論係豬軟骨既醬汁定咖喱汁都帶甜好開胃，兩隻汁撈勻食味道更有層次。加配左烤雞（$15）烤雞都好有驚喜，用左雞髀肉，雞皮帶焦脆，雞髀肉滑嫰，$15食到兩大塊高質雞扒，好抵食！非常推介！整體而言，豬軟骨、咖喱同烤雞味道係令人滿意，經過唔洗排隊值得一試，但未到值得排好耐隊既程度…查看更多

一向對意樂印象唔錯，今日下午茶時候黎到，叫左個龍蝦湯煙鴨胸溫泉蛋扁意粉（$39），下午茶餐包熱飲同蒜蓉多士，性價比極高，另外加配左葡汁雜菜（$18）龍蝦湯都係想像得到既罐頭味，意粉口感唔錯，軟硬適中，份量係午市既一半左右，蒜蓉多士就大大塊，所以一定食得飽。焗雜菜有芝士又有葡汁，味道豐富，表頭有豆角、椰菜花同紅蘿白，底下用左好多薯蓉墊底，營造出好多菜既錯覺。整體味道係正常唔差，以呢個價錢黎講都幾抵食。…查看更多

兩餸米線加凍飲（$61）湯底夠味足料，酸菜、韮菜、芽菜、肉碎份量都多，但唔算特別好味，枱面既辣椒油都唔夠辣。米線煮得幾好，唔會過淋夠爽口，叫左兩個餸，爆汁牛肉餅係值得推介既，所謂牛肉餅其實係牛丸整扁左，更易咬，同埋好juicy。另一個韮菜餃係佢地自己包，雖然夠韮菜味，但內餡太少，個餃子皮又偏厚，味道麻麻。凍奶茶就一般，茶多奶太少。…查看更多

黎到山景既工廠區，估唔到有間咁chill既日系cafe! 環境雖細，但樓底較高同裝修設計上既巧思提升左店面空間感，加上日式木系裝潢感覺溫暖，平日午餐去幾乎滿座但唔算迫，都過左一個好悠閒既工作日午餐。畢竟係cafe，菜單選項唔多，以包同甜點為主，品項少先可以做得更完美，menu最吸引我既係蟹肉bagel（$108），唔算平但質素對得住價錢，bagel煙韌唔會過硬，外層烘過微脆，口感很好👍🏻內餡都充滿驚喜，滿滿既蟹肉增添鮮味，牛油果都好新鮮creamy ，仲排成花咁，賣相加分！bagel仲連住一杯沙律，沙律菜好新鮮，個醬都幾好食幾特別，食落帶啲椰子味！飲品叫左凍黑芝麻latte, 相對蟹肉bagel黎講冇咁有驚喜，味道ok都有芝麻香味，唔太甜。第一啖飲略淡，可能因為啲芝麻醬都沉左喺底，飲之前攪勻較好。整體黎講，雖然以當區消費黎講略貴，但見到食物出品同埋悉心布置既環境，充分感受到店主既用心，值得一訪。…查看更多

泰式炒闊河（雞）（$158）週末lunch time 黎到，1點就已經好多人排隊。叫左個炒河，炒得好好食，乾身唔油有鑊氣，市面難求。個辣汁帶酸，開胃又惹味同個河粉都好夾，就咁食個河粉都夠味，最欣賞係個河粉質地帶煙韌。配料都豐富有雞肉、炒芥蘭同炒粟米芯，炒碎蛋沾滿醬油好夠味，粟米芯好脆，成碟粉口感好豐富，味道都好好食！單講個炒河真係100分💯唯一要扣分既係個雞肉，雞肉帶雪味一碟河分量唔算大碟，價錢偏貴但坊間好食既炒河難求，所以整體都係滿意👍🏻另外場內好似冇冷氣咁，食得係有啲辛苦😅…查看更多

早就聽聞雲川質素下降，之前試過第二間分店，第一次黎呢間分店食，係有啲失望。叫左金湯酸辣米線配3餸：豬頸肉、牛展同韮菜雲吞。先講湯底薑味太重，唔太符合個人口味。跟住係點評3個餸，豬頸肉調味ok, 但食豬頸肉係食佢既爽口質感，我食到既肉質帶梅、唔爽口，作為舖頭招牌係令人失望，成碗粉最好食既係牛展，夠入味，口感軟腍，韮菜雲吞啖啖肉都係食得過。米線口感軟硬適中但唔算特別好食。份量黎講係合理，豬頸肉有好多條，不過唔好食，整體黎講味道普通，難怪依家lunch time 都冇人排隊，可以直入。…查看更多