Vancy的个人专页

睇食評講到咁好食，所以去試下。呢度唯一嘅優點就係租到個好位，有啲view睇下。首先要講嘅唔係食物，而係服務態度。侍應盡量唔會理你，或者直接會話唔得閒住。佢要求俾個上菜位，咁冇問題嘅，同我哋講聲就得，唔使咁惡嘅。本來點咗某個小菜，佢正常落單，點知好耐未到追下啦，點知佢只係話：「冇呀」，再追問先話今日冇，就算落單果下唔記得，入單果下都會發現，咁都唔可以講聲我哋知？所有接觸過嘅員工，包括侍應、看似高級嘅員工，大概6-7個，得一個嘅態度係比較正常食物方面，見炭爐雞煲幾特別，叫咗一個，但邊爐食物太唔抵，所以只點啲小菜。雞煲：味道可以，小辣都幾辣酸辣烤魚：侍應話唔可以走辣，唯有少辣，周邊嘢有啲辣，但條魚本身就冇乜味荔枝柴燒鵝：好耐未到先發現漏單，員工話即刻整，但嚟到係微溫同「鞋」，唔好味海參帶子豆腐：普通嘅滑豆腐，唔關材料事，但竟然最好味其餘有上湯浸菜、咕嚕肉埋單$2000幾…查看更多

未改為冰室+火鍋前有幫襯過幾次，覺得食物特別同好味。某日嚟試下火鍋，叫咗豆腐牛奶同沙嗲湯底，簡單叫咗幾樣嘢，丸、千頁冰豆腐、菜籃、魚，同埋牛魔王拼盤。湯底冇咩味，其他食物唔算太新鮮，份量算少。牛拼盤$538，份量都ok。服務就比以前差咗，當晚得幾檯，但成日唔見有侍應，埋單$1300。果排做緊推廣活動，消費$400可玩一次大挑戰，有獎品送，但埋單冇同我哋講，出到門口見到個遊戲，點知等咗一陣都冇人再出返去門口reception，放棄咗冇玩。整體食物質素可以，但價錢略貴，未必會再去。…查看更多

近排有寫返食評，因為我明白，有時喺啲重要日子，真係好想搵啲好嘅餐廳，可惜好多時去到好多正評嘅餐廳，結果都係希望愈大，失望愈大。諗返其實見到其他食評啲相，經常都好多吉檯，又好多時冇寫食咗幾錢，應該都知道伏，唉!入返正題，今次係去食weekend brunch，本來想搵間餐廳食餐好，結果…環境 - 可以嘅，畢竟咁高層。餐廳有室外位，如果好天，應該真係好chill嘅。不過裝修就一般，真實環境唔係睇相咁靚，同埋檯同檯之間嘅通道都幾窄。價錢 - 貴唔係問題，性價比高嘅話絕對值得再來。可惜，brunch $668+10%係基本，唔包main course嘅，即係冇熱食嘅，視乎你叫邊樣，幾十蚊至二百幾蚊不等，如果加左main course，仲貴過去一啲幾好嘅酒店嘅晚餐！食物 - 海鮮選擇算多，有長腳蟹、麵包蟹、青口、三文魚、蝦、龍蝦，仲有生蠔。生蠔開左就咁放喺度，我見有啲都放左一啲時間，腸胃唔夠好嘅就要小心。其他海鮮嘅質素都算ok嘅，係蝦就梅梅地。另外，送左每人一隻蟶子，難得有熱嘢，都算大隻，ok嘅。其他就係冷盤、沙律、甜品。看似有好多款前菜冷盤，意式果啲蕃茄、菇等。如果好喜歡食嘅會覺得好多選擇，如果一般喜愛會覺得樣樣差唔多。呢個價錢嚟講，甜品選擇唔多，有生果、三款蛋糕、雪糕、朱古力噴泉。以呢個價錢嘅同類型buffet比較，10分滿分，呢間餐廳嘅食物種類值5分。質素一般，冇一樣嘢深刻，性價比較低。由於種類唔太多，我地叫左main course，叫咗烤乳豬同pizza，乳豬都幾肥膩，好細份$128，pizza反而好大份，味道ok嘅，但賣相就麻麻。服務 - 餐廳侍應絕大部分都係外籍人士，可能因為本地人會較喜歡食weekend buffet，餐廳都有一千零一位識講廣東話嘅侍應。收碟速度都快，不過大部分都好似「要返工唔開心」咁嘅樣，服務唔係差嘅，但唔會好positive嘅感覺。總括嚟講，唔試唔知有幾普通，試咗就真係會好後悔花咗呢個價錢只係食咗性價比低嘅一餐，可能因為蘭桂芳價。坦白說，未至於好難食同埋差，又未去到要俾劣評，但就唔會再去，都唔會建議朋友去試。…查看更多

好耐冇的起心肝寫食評，但早兩星期去呢間餐廳食咗鐵板燒晚餐，當晚嘅體驗加埋喺度見到嘅99%正評，促使我認真打一篇真．食評。餐廳有半價優惠，聽講好難book，又有影片介紹過（用餐之時未睇片），加埋絕大部分OpenRice食評都讚不絕口，所以就去試吓。其實嗰日5點幾我喺OpenRice都仲見到7pm, 7:30pm, 8pm, 8:30pm嘅slots都仲有得book，即係唔太full姐。當晚約咗7pm，準時到達，喺吧檯位置有幾pair人。餐廳有兩位師傅喺open kitchen，一個喺鐵板前煮嘢，同平時我去開嘅餐廳唔同，塊鐵板係低過吧檯好多，可能我生得矮，我坐喺度睇唔到佢煮咩嘅。另外有位師傅喺一塊好奇怪嘅透明膠板後燒嘢食，感覺有啲似街邊港式串燒小食嘅設計，成個格局令餐廳立即降咗級。我哋叫咗$1280餐，諗住半價冇理由唔食最貴嘅餐，稱為「龍蝦和牛海鮮餐」，每人13道菜，睇落係豐富嘅，仲有兩道菜係「廚師發辦」。兩位即係$640+$640+($1280 x 2 x 10%) [加一梗係計個原價嘅10%］=$1536。佢上菜嘅次序唔跟menu所列嘅次序，不過都唔緊要嘅，以下係實際嘅上菜次序。我食完之後先睇條影片，當然食材未必會一模一樣，但我都想對比下同一般人嘅我去食，食材、配料、煮法、擺盤等有咩唔同，括號內就係我睇完片後嘅補充。首先係海膽紅蝦蟹肉杯 - 賣相ok嘅，但海膽同蝦唔太新鮮，蝦有少少「梅」。（同影片中嗰杯嘅賣相差好遠，我嗰杯少啲海膽，顏色好深，隻蝦冇咁有光澤，同埋好少黑色一粒粒嗰啲籽）跟住師傅放咗隻龍蝦喺檯面，當然係死了的。（不是「活龍蝦」，感覺顏色同影片唔同）日本直送時令生蠔配乾蔥紅酒醋啫喱 - 冇乜味，冇「啫喱」（冇影片入面有令和之怪物個牌，咁應該唔係同一種生蠔）板燒澳洲活龍蝦 - 冇乜味，啲汁咁多唔知咩事，唔似燒，因為個殼冇平時燶燶地嗰啲，但睇唔到佢點整。（冇好似影片入面咁「玩火」，冇無花果，擺盤完全唔係影片咁吸引）雪塩牛油燒北海道帶子 - 可以嘅，入面唔會過熟，似食刺身嘅質感黑松露醬燒四季貝料理 - 係蟶子，都大隻嘅（冇講來源地，唔知係咪影片所講蘇格蘭了）磯煮南非鮑魚配清酒鮑肝醬 - 好淋，墊底嘅蘿蔔幾好味香煎鵝肝配砵酒車厘子 - 粒車厘子係好食嘅，鵝肝正常，多士都脆（冇無花果，所以感受唔到拍片人所講令你冇咁油膩嘅感覺）廚師發辦時令貝料理 - 呢個係有清酒煮嘅，食食吓發現附送咗隻蟹仔板燒鹿兒島A5黑毛和牛 + 貝料理溫室時蔬 - 兩樣擺埋咗一碟，唔知係咪時間關係。舊牛都煮得十分熟，時蔬上面有舊貝（舊牛未煮時冇影片中咁厚，又冇影片煮嘅熟度咁恰到好處，亦冇wasabi; 蒜片冇影片咁大塊；時蔬就睇影片差好遠，不過多咗舊貝）以往去過嘅餐廳，若果食牛，師傅會問幾成熟，而且要切嘅話，會吉住塊牛用刀直接喺鐵板上切，但我見到下面圖片嘅景象😨 而我見到佢之前切生嘢，唔知有冇洗季節貝湯 - 係南瓜素翅同埋好似加咗啲蟹肉嘅湯，驚喜嘅，因為以為會係日式湯貝料理炒飯 - 我睇唔到佢點炒，但總之就係好濕嘅，食完就睇得出係油嚟。我食哂嘅，因為食到呢度，雖然好多道菜，但係冇飽嘅感覺廚師精選甜品 - 係蜜瓜加兩粒Mochi，蜜瓜冇乜味。冇影相因為嗰刻已叫定埋單，想食完即刻走離開時大概9:40pm，上菜唔算係極慢，但當中有2-3道菜係等得耐啲，而甜品係全餐廳嘅人一齊等咗20分鐘先有得食。客人大部分係叫$1280餐，但我見有2位叫另一個餐，冇龍蝦嘅，佢哋真慘，我見有一段好長時間係冇嘢食，似係要等埋$1280嘅客人食哂某幾道佢哋個餐冇嘅菜式，先可以繼續煮大家都有嘅菜式。雖然鐵板燒師傅比起廚師發辦師傅，相對未必一定會同客人好多交流，但以往去嘅餐廳，師傅都會講吓整緊咩、點解會咁配啲汁，或者煮法有咩特別，但呢度師傅係同客人零交流😅 （影片中就不時話「師傅話呢個菜就點點點」，可能因為合作影片，所以師傅先有介紹佢知啦）我見影片有介紹午餐有得食立鱗燒，我印象通常比較高級餐廳先有，香港好少餐廳有，而我食過米芝蓮餐廳煮嘅獨創方式最出色，唔知呢間又煮得好唔好食。By the way, 發現好多食評都係食午餐，好少係晚餐，所以想分享下晚餐嘅實際情況係點。另外，都講吓員工服務方面，師傅或侍應都冇乜介紹，坐吧檯但又冇個籃俾你放袋，我拎住個唔係細嘅袋，只好一直放佢喺大髀上頂住自己咁食嘢，但佢都有keep住斟茶嘅。總括嚟講，13道菜加一收$768，畢竟都係海鮮，而且真係比較少有係用貝類做主打。但正價$1280加一即係$1408，就真係唔會食喇，呢個地點+裝修環境+似港式鐵板燒+員工服務，如果正價係$640，又未食過鐵板燒冇比較嘅話，係可以接受嘅。但點解令人咁失望，係因為同睇到嘅食評、介紹，同真實落差太大；同埋本身餐牌話呢個餐係$640，咁客人唔會有咁大期望，反而覺得呢個價錢有13道菜，只會覺得一分錢一分貨。其實食物未至於劣到想嘔，但整體都係失望，體驗好差。…查看更多

好難忘嘅美味晚餐！結婚周年慶祝活動就揀選左呢間，一入到去就相當緊張啦，因為係第一次食omakase。餐廳備有set dinner，但毫不猶豫就選左廚師發辦。師傅都幾風趣又對日本各地嘅食物都熟識，基本上你同佢想去邊度旅行，佢都可以比意見你果度要食咩特別野，直情係活生生嘅Openrice！客人同師傅嘅交流就係omakase迷人嘅地方，佢會問你唔食咩再決定比咩你食。總共食左好多碟，食下傾下所以初頭唔覺飽，到最後發現原來超飽！我盡量寫低左食過嘅野：- 前菜（白果，無花果，秋刀魚，豆腐，木之子）- 香箱蟹- 三刀魚- 寒鰤魚- 島池魚- 厚岸 帆立貝- 秋刀魚- 仙鳳趾生蠔- 鮟鱇魚肝- 柳葉魚- 北寄貝- 中拖羅- 吞拿漬- 北海道海膽- 稻庭烏冬- 黑糖燒餅+菠蘿味糕- 綠茶雪糕…查看更多

呢日係去慶祝生日，好想食鐵板燒，但發現銅鑼灣原來唔係好多選擇。見到呢間有個幾好嘅景，睇佢臉書見到Paco都去過，所以就去呢間。餐廳有兩層，有一層主要係房。星期日7點左右，我去左「大廳」果層，我地係第一位客人師傅都會同你傾下咁嘅，服務其實都好好，價錢唔係真係好貴，6百幾蚊一個餐，食到好飽！餐入面有牛有蝦有鵝肝。我地仲加左錢成左隻日本鮑魚，好好好大隻，最特別係連鮑魚隻牙都食埋！整體服務非常好，鐵板燒師傅又會介紹下食物同配搭嘅汁料。到我差唔多食飽先有另一檯食客，有包場嘅感覺，好正！…查看更多

今日去完香港大學，打算響附近是但食D野，但假日嘅薄扶林十分寧靜，好多食店都冇開。行下行下見到呢間新開嘅小食店。表面上賣下魚蛋燒賣之類，但我見到間野個名話係星馬美食，理應主打食物應該係星馬野！相信魚蛋燒賣都係順便賣下姐。雖然店舖細細，得幾個位，但起碼坐得黎都OK寬闊，唔會好迫。我叫左碗馬來沙嗲雞肉米粉，聞起黎有D香味，但唔知係咩黎，仲有D椰絲。開頭食落去好似酸酸地，但原來先發現係花生醬，我溝勻椰絲同花生醬，陣味唔同左，好特別喎！呢種味真係同平時D連鎖餐廳食嘅有唔同。肉同蛋同豆卜都幾入味，但最估唔到原來青瓜係可以中和下，食一塊又幾清新喎！仲有，原來所有沙嗲、喇沙汁都係老闆自家調製架！…查看更多

發現這裡開了間新餐廳，反正聖誕節想不到去哪裡食大餐，路過看見價錢相宜，環境也不錯，所以來試試。可能仍是新開張，未有太多熟客，我們walk in也有位。聖誕節餐牌只有一個，對於有選擇困難的我們來說很好。初看餐牌菜式及價錢，原以為湯前面的是前菜吧，份量應該很少，大概只會有「食陣風」的感覺吧，還深信之前於工展會吃小食是很聰明。但是，還未到湯，我們已很飽。誰想到鵝肝不是一小粒，而是一大件？誰想到龍蝦不是一小塊，而是半隻？這一餐相當抵食！平常我不愛吃鵝肝，但這個吃起來雖然沒有很豐滿很膩的感覺，我就是喜歡這味道，這個價錢，不錯了。龍蝦的味道不是很濃，okay啦！湯一來已很有松露的香味，很足料！火雞卷普通啦，可能我沒有點上其配上的西梅汁，好像味道很淡，但另外那片肉就很好吃！甜品是有設計的，先是一件有威化底的朱古力蛋糕，不算是很甜，但再吃中間的雜莓，頓時中和了甜膩的感覺，再吃一口稍為溶、不太冰的雪糕，感覺是：明明吃了甜品，卻沒有平常經常會有很膩很口喝要喝水的感覺。另外，我們請服務員給我們配上house wine，雖然不算是配得非常好，畢竟glass的house wine沒有太多選擇。最深刻印象是服務態度很好，先生把餐巾掉在地上三次，服務員每次都主動給他換新的，所以先生之後都非常不好意思，哈哈！不過，餐廳內的冷氣不足，基本上一邊吃一邊冒汗，但又不好意思說出來.....整體來說，食物味道不是很濃，反正合胃口，平安夜也只是這個價錢，很抵！下次有機會要試試平時的菜式。…查看更多

是日甜品選了I-Square的Best Berry。敢說這裡的yogurt不是最好的，或者店名想說的是他們的berry?! 是strawberry? blueberry? 還是blackberry呀?!$28是入場費，可以有original yogurt+2 toppings。既然寫到明說berry is the best，我就選了blueberry jam+blueberry。側邊看好像不錯，很「藍莓」，但當你仔細看，berry是有的，有數粒細小的blueberries，要不是點了blueberry jam，恐怕這只會是yogurt及blueberries放在一起而已。雖然yogurt本身是ok的，但選擇toppings時，要不加多些錢選幾款，要不我寧願blueberry jam+blueberry jam or blueberry+blueberry了~…查看更多

是日想吃些貴少少的晚飯，去了北京道的功德林，不平宜的一餐，2個人人仔細細，花了400大元!朋友乃昔日公司同事，當時的老闆是信仰佛教的，他尤喜該店，所以時時因工作需要到訪此店，大家再來這裡，都有「想當年」的感覺!老實說，是次第一次自己掏銀包於這裡吃飯，點了幾個菜︰1. 火腿津白 - 味道雖然淡了一點，但尚算ok啦!2. 咕嚕肉 - 要不是這間是打正堂號叫「上海素食」，我以為這真是肉’3. 酸辣湯 - 我最喜愛的湯，酸是有的，但辣度不足。4. 上海冷麵 - 這個很有趣，有得玩又有得食。但如果配料多點選擇，而麵的份量少一點點，那就更好!雖說這是素菜，但我認為存心向佛的人不應行茹素但心不茹素，因為這裡很多菜色都會以「肉」來命名，是扮薰菜的素菜，並不是「齋」。食物質素其實ok，地點又是北京道，服務態度尚可啦，唯他們竟然因為準備打烊而把我們頭上的燈關了，即是迫我們結賬，但當時好像10時也不夠! $400/2位，不算平宜囉!…查看更多

今日相約朋友午餐, 隨便選了這間。平日經過總會把餐廳與Jimmy's Kitchen聯繫起來, 覺得餐得應該不平宜及氣氛不錯。一進餐廳, 陳舊的裝修沒有被四周墻上的黑布掩飾到, 已經有點嚇親。我點了一個香辣煙肉蕃茄長通粉。西湯ok的, 麵包都可以食得下, 但長通粉的樣子真有點令人消不下, 除了橙紅色的茄汁以、幾顆小小的煙肉及通粉, 沒有看到其他了~ 幸而吃下去都味道其實ok, 份量亦剛剛好。但那兩位阿姐的服務態度真的不可要, 每次上菜都很大力, 湯放下檯後還會有一點左搖右擺, 倒瀉了不少。身型大份一點的阿姐感覺上態度好一點, 但都不會是$68一個午餐應有的態度。坦白說, $30一個餐的茶餐廳的服務態度都比她們好!…查看更多

是日突然好想食d上海菜之類既野，所以去左呢度。可能閒日關係, 唔係等左好耐, 20-25mins左右。2個人仔，竟然叫左咁多野食:1) 2隻燻蛋 - 我好少食燻蛋, 但係原來我都幾中意食, 雖然佢有陣好煙既"火羅火羅"地既味, 但係出奇地好中意食。2) 醉雞 - 雞好"鞋", 個汁搞到d雞好苦, 唔好食。3) 酸辣湯 - 我好中意飲酸辣湯, $26細細碗, 多料, 唔會好辣, 正!4) 小籠包 - 好得! 皮薄多湯, 好味!5) 炸饅頭 - 呢個真係可以用難食黎形容, 好硬又唔熱, 似係已經煮左好耐咁...所以食唔哂! 千萬不要叫!6) 賽旁蟹 - 好美味呀, 好多好多蟹肉, 如果拎黎送飯都會好好味。叫左咁多野, 勁飽, 但埋單都係$308。下次會再黎, 只要唔叫醉雞同炸饅頭就得架喇! 下次都係叫番雲白肉呢d穩陣d既菜色囉!…查看更多

據聞以前呢間店響鑽石山好受歡迎, 所以我見佢響紅墈區既位置都ok, 所以試左呢間。2個人星期六晚上, 等左半個鐘左右喇~入到去, 搭檯, 坐大檯。叫左唔係好多野食:1) 改良擔擔麵2碗(辣) - 朋友話改良版好食d因為有d肉碎。我覺得辣度ok, 有肉同冇肉與本身既味道冇關係, 唔係好多花生醬, 我喜歡。2) 金牌雲白肉 - 又話金牌菜, 都唔覺得好好食, d汁好求其咁撻左落d肉上面就算, 賣相好差~3) 銀芽炒鱔糊 - 唔算好"結", 勁多銀菜, 味道麻麻。4) 一口小湯包 (4件) - 話雖"小湯包", 實情冇乜湯, 皮唔算厚, 可以接受。前菜炸花生同埋酸津白, 因為要錢, 所以我地清哂~味道ok, 但未至於好食, 不過嫌價錢略貴, 每人$115.…查看更多

今日突然約左出黎, 然後其中一個放左我地飛機, 所以臨時又要諗下去邊度食。結果, 我提議去萬豚屋食, 因為未食過....見到有條龍, 唔係好長, 好似十張檯左右之嘛, 以為唔會好耐喇~所以就等...結果等左45分鐘, 熱到暈, 但條龍只係愈來愈長, 終於入左去。不過好奇怪, 因為其實可以訂檯既, 但佢地真係會留張檯留好耐咁, 我見到有張檯, 一直都係放左個留座牌, 直至我走果刻, 咁點解會讓出黎比d walk-in客先呢?!我叫左黑担担豚肉烏冬, 但點知冇哂果個湯底, 唯有叫左豬骨湯底, 好好味!! 個鍋好熱, 食物黎既時候, 仲係"之之"聲, 不過夏天真係唔應該食呢個, 冷氣又唔夠, 出哂汗!! d豚肉, 本身我唔係幾中意食肥肉, 平時一定會唔食, 但點知...我食哂! 好"林"好熔化, 正!仲叫左雞翼, 不過就好似漏左單, 我地食完烏冬好耐好耐, 再追左2,3次, 先黎到。冇驚喜, 好普通, 下次唔會叫。朋友食左冷豚肉烏冬, 看似幾好味, 不過佢就話只係just ok.…查看更多

星期天的中午，喜歡睡至下午的我竟然晨早爬起身，再千里迢迢由新界去出尖沙咀，為的是citibank信用卡的午餐優惠。不過，有懷疑星期日既食物比平時差d。$117就可以一嘗用石頭煮野食既滋味，都算抵呀!1) 麵包4片 - 每人2塊，冇特別2) 西瓜汁 - 好多核，係咁吐核，好多人都話好味，但我又覺得唔夠甜，定係因為西瓜汁好新鮮所以唔會好甜?!3) 餐湯2/3碗 - 非常普通既西湯，忌廉湯之類，得半碗多dd, 覺得好少囉4) 牛肩肉2塊+青瓜1片+蕃茄半個+薯仔1舊 - 其實得覺得牛肉都幾韌，生既時候難切，熟左又有d韌。同埋我唔知點解，明明燒左好耐，佢都仲係紅紅地咁，所以都唔知熟左未。5) Häagen-Dazs 雪糕 - 雲呢拿味，好好味，但冇左果塊葉既~6) 凍奶茶 - 我個人覺得幾有奶茶味，冰既份量適中，唔會話好快溶哂搞到d奶茶稀哂。我同朋友食完都有一個感覺︰我地好趕、好忙，星期日既午餐，唔使趕住番工，應該好優悠先係既，但成件事變得好唔悠閒。可能因為佢講到明12點入座，1點半先交檯既關係? 又或者因為佢話舊石會熱45分鐘，我怕佢唔凍左煮唔到? 我覺得可能係因為佢一早放左2舊牛響塊石上面，所以佢一黎已經 "炸炸聲"，我地好驚舊牛會熟得滯。所以我地已經將一舊放左響隻碟度等一陣先燒，總之好似有d呢hea咁...點解唔可以生既牛分開放? 佢一早放哂上去，可能係等我地快d燒快d走....結果，唔使半個鐘就食完，唔明係咪因為唔慣晨早食咁多肉，唔係幾飽。最好既其實係好玩，如果好想去呢間度食既，就可以首先平平地試下好唔好食至去食d正常餐，咁會好d囉!d服務都算ok，唔會因為我地用呢個offer而對我地差左，因為果日差唔多full house，但我眼見只有1-2檯唔係用呢個offer。佢地亦會教下你點燒，都算係咁。我都幾中意佢地既細心，有為客人準備一條圍裙。…查看更多