5OC110's Profile

話說之前見到巴打出post 講米線，今日咁橋啱時間出嚟食個tea，所以去左厚福街呢間雲桂香食late lunch點知未食就已經嬲左4點入去餐廳都無乜人，每檯都係單丁客有2餐4人檯，一張就一個男人坐，一張就一個女仔坐。咁我就想同個女仔坐啦，點知個阿姐話唔得！要我同個男人坐我明，因為個女仔就快食完，所以個阿姐想free 返張4人檯出嚟嘛，但我都直接問佢「點解我唔坐得呢度？」個阿姐繼續唔理我自己行去印QR code如果唔係有巴打加持話好食，平時嘅我已經擰轉頭走左，做乜食餐飯都要受氣我叫左紅薯粉酸辣粉加冬菇同滷大腸佢啲餸要$9個，但個份量無$9咁多囉！冬菇細粒得嚟又唔去椗，滷大腸唔係厚身嗰款切得好薄薯粉就粗嗰款，但量都係唔多，湯底又水葱花唔多粒又無芫荽雖然巴打話好食嘅係米線，但我唔expect d餸咁差喎叫埋杯凍檸茶埋單$56，貴到啊早知去返大家樂食tea好啦講返阿姐唔俾我坐嗰張4人檯，最後都係入左2個單丁客，咁點解阿姐唔俾得我坐先！！！4點呢個鐘數可以有幾多客啊最後埋單淨係收BOC pay alipay cash 同微信支付，八達通都無就知唔係做本地人生意啦Ok 無下次…Read More

有日行過銀座酒店見到自助餐做promotion 買二送一/ 一位正價七折既然本身住附近都方便，所以就拉大隊叫曬啲親朋戚友一齊去食啦首先要降一降低大家對自助餐嘅標準先，天水圍酒店加上呢個價錢都唔期望有乜特別野食只係志在同屋企人食餐便飯準時十二點去到，望下有乜野食先飲品唔多，有咖啡、熱茶、可樂同雪碧，有冰可以自己自製凍飲魚生有吞拿魚、希靈魚、三文魚、八爪魚仲有一款白身魚冷盤有薯仔沙律、意粉沙律、燒牛肉沙律 quinoa 沙律、蕎麥麵、來貨味付海螺中華沙律，其中有個三文魚慕絲我個人覺得好好食，食左兩次肉車係火腿、熱食選擇都唔算好多，但蒸魚、羊肉、中式點心、咖喱 noodle bar 都有反而甜品嘅選擇多啲，有芝士蛋糕、啫喱米、西米露、芝士tart、tiramisu、朱古力蛋糕、歌劇院蛋糕、藍莓芝士蛋糕⋯⋯仲有其他唔詳列不過佢嘅潽洱燉蛋同埋榴連mousse 有驚艷到我！呢兩個甜品我認為絕對可以拎出黎賣先講潽洱燉蛋先呢個因為賣相普通所以我無影相，但之後就後悔了，唯有文字描述顏色似朱古力布甸，因為係好細個碗仔，我諗佢蒸嘅時間要控制得難少少，所以表面睇落唔算好滑不過因為上面仲有少少裝飾所以問題不大茶味同蛋味融合得好好，茶唔澀又有蛋香，係巿面都唔多見有呢個配搭估唔到喺大西北酒店嘅廉價自助餐都有SURPRISE另一個我就有影相，因為佢賣相真係好可愛好靚，咁精緻已經值五十分係榴連MOUSSE！聞落唔算大陣味，應該話無乜味tim不過食落先係精粹所在佢係慕絲類甜品，咬開一半就有濃烈榴連味，因為佢有少少榴連肉係入面，甜道同榴連味好balance大家都知榴連食多兩淡係好漏，佢呢個做法恰到好處又唔會太臭影響到人，鐘意食榴連嘅又會覺得好開心可以食多兩件講埋服務先，雖然係星期六中午，但係食客都唔算多不過refill 無偷雞絕對可以食到兩點三換碟又密職員都好有禮貌除返開每人先係$240 一位計埋加一，十個人坐得舒舒服服圍埋傾下計又可以睇下電視，無投訴啦…Read More

呢個係無相食評，但睇過其他食評都有同我相同嘅問題1. Menu選擇少其實本身menu選擇少唔係問題，貴精不貴多嘛不過呢間餐廳嘅食物質素又係咪精呢？越南餐廳連滴漏咖啡都無，$37一杯啡走🙄2. 碌冧調味唔對越南魚露酸酸甜甜又帶點辣味令人食慾大增，但呢度嘅調味連1:2:3比例都做唔到酸味重，又無蒜蓉辣椒味好彩我今餐唔係食凍檬，如果唔係都唔知點食3. 生牛河質素叫嘅係Premium 生牛河，但上菜啲牛都熟曬香葉少無鵝芥無辣椒，芽菜唔係用肥肥短身嗰種湯底偏咸無牛嘅清甜河粉唔滑又粉同偏硬，份量少4. 4舊春卷盛惠$61？明買明賣，佢寫明係$61我都叫係我問題但我唔期望得2條剪一半，即係4舊仔春卷都係個啲味無野好評論，但係得一撮仔薄荷葉？？？5. 價錢貴但餐具用Ikea🤡本身用Ikea餐具係無問題，但你收得人呢個價錢俾Ikea餐具我就覺得係問題一碗粉計埋加一過百，無餐飲全部散叫加埋一一個人埋單都差唔多二百原來依家喺餐廳食飯真係填飽個肚，唔會有任何用餐體驗今餐叫左2個Main 2杯野飲1個小食就$402快餐店質素、零服務（上菜收碟呢啲唔好同我講係服務，呢間餐廳連牙籤都唔俾人）、食物質素普通聽日要再食返間好嘅越南餐廳止下牛河癮先得🙄🙄…Read More

食得太興都係貪方便，連鎖店餐牌差唔多味道差唔多，加上太興相比其他茶記真係坐得舒服啲地方光猛啲所以今日係黃埔想叫餸食飯都唔諗啦，去太興算2個人叫左2個餸，一個椒鹽鮮魷一個北菇豆腐青衣魚柳煲結果兩個餸都唔合格個椒鹽鮮魷真係最嬲，焯完先拎黎去炒返乾身撈啲椒鹽上去，仲要都炒唔乾身啲椒鹽都痴唔到上去我第一次見呢個餸係會白焯，唔識整唔好學人整啦老公見到碟餸一放低已經想叫姐姐拎走叫廚房再整，不過我制止左佢，先唔好講咩加唔加料，而係廚房根本唔識整，俾幾多次機會都係一樣個北菇豆腐青衣魚柳煲一放低又係唔對路，無乜色水無乜汁，結果食落真係淡茂茂連豆腐都唔入味花菇就更加唔洗講啦唯一可以讚嘅咪係個煲燒得夠熱囉老公對味道都唔算十分有要求，但係食完呢餐佢話以後都唔黎呢間太興食小菜，呢間分店淨係可以食早餐，淥下公仔麵、煎下腸仔就難唔到佢…Read More

自從因為奉行168 減肥法瘦下不少，所以對於食飯嘅時間都好緊張今日星期六又係同老公拍拖嘅日子，出街食飯就少不免，唔想咁夜至食飯就食LUNCH啦次次行過海港城都見到有人龍排隊，所以今日就食第一輪，十一點半一開門就入去食啦事前上網睇過呢度有奶茶飲，我都記得以前係其他分店有飲過，但係今次去無⋯⋯:(既然本身都要俾成十二蚊一位嘅茶錢，咁算啦唔叫野飲，飲茶算另外仲要俾前菜同加一服務費叫左一份紅油抄手、口水雞、上海粗炒同埋上海排骨拉麵啱啱落完單就上菜啦，紅油抄手有六粒紅油味唔重，陳醋味就比較濃烈，另外仲有炸蒜舖係面，所以都幾惹味餡料就係菜肉口水雞份量都唔少，俾左雞髀位我好開心紅油嘅份量唔多，濃味餸偏咸，有好輕微嘅麻，雞都算滑其實係幾好食嘅，但唔係我鐘意個類口水雞，同埋真係有啲咸得滯最後上嘅就係澱粉質，上海粗炒上菜時唔記得影，呢個係差唔多食完時影的上海粗炒都係偏油，味道同色水都足夠，連埋豆瓣醬食好惹味另外嗰個上海排骨醃得好入味，啱啱炸起有酥香同乾身，又鬆軟，四舊大大舊今餐食得好飽，最後食唔曬要打包tim因為有海港城coupon有得減一百連埋其他服務費二百九十幾蚊埋單呢個價錢係海港城都算抵食，唔怪得次次都咁多人排隊啦…Read More

假期先黎落雨，仲要打風打足兩日，邊度都去唔到，預約左嘅活動都取消成日留係屋企真係好悶啊！星期六四點後先落八號，平日返工日子又唔見天文台咁手鬆⋯⋯:(係屋企坐左兩日，乜都無做過，老公就提議出街食個飯啦又好啫，落街行下鬆下筋骨，順便做少少grocery shopping老公話想叫小菜食，咁就近近地黎祥榮啦祥榮由我讀大學個陣已經食開，貪佢地方又大又多位、地方都算乾淨、價錢又OK，而且味道都唔錯雖然風球都落左2個幾鐘，但係餐廳入面都無乜人，㨂左個卡位就坐低左望左陣餐牌就扑鎚！叫左菠蘿咕嚕肉、豆腐斑腩煲、一杯凍奶茶同例湯晚巿佢小菜跟一個白飯同例湯，因為我唔鐘意飲湯同埋好想飲凍奶茶！！！所以走左湯轉凍飲第一個上嘅就係例湯，呢個湯就不嬲都好飲，因為我鐘意酸味，佢夠酸、大碗又有料（雖然都係啲菜頭菜尾），例湯黎講收貨啦凍奶茶就無熱奶茶咁香滑同茶味濃，不過今日想飲凍，無計啦。佢嘅凍飲都夠大杯嘅，都算滿意然後上檯嘅就係菠蘿咕嚕肉啦，影呢張相嘅時候都已經食左一兩舊今日人少少都好快上菜，我諗都係十五分鐘唔夠你話佢係咪好好食嘅咕嚕肉呢其實就唔算嘅，但係份量夠、個汁好食、肉唔靱，唔錯啦收貨不過略嫌佢啲配料有少少生，洋蔥個啲可以都耐啲最後上就係豆腐斑腩煲啦我有啲啲懷疑佢個煲無加熱，不過唔緊要啦有幾舊冬菇、紅燒豆腐同埋一啲斑腩不過我最鐘意食其實係煲仔菜入面嘅蒜子同埋蔥頭可惜蔥頭都係有啲啲生，唔夠淋，同埋斑腩有少少過咸，但係撈埋白飯食都仲可以接受到呢類煲仔菜嘅冬菇最好食！好入味平時唔多食飯嘅我今日都食得曬，初初仲諗住要分俾老公，點知不知不覺就成碗飯食曬，肥死了～～…Read More

成日去尖沙咀，但係講到揾食真係好少黎到新港中心呢邊上到黎三樓，估唔到星期六嘅下午會係呢個寂靜嘅商場有另一番景象雖然餐廳好多人，但係因為只係我同老公兩位，所以唔洗等位可以直入係門口已經拎左MENU睇，望下有乜好食見到佢點心類別同普通酒樓唔同，另外仲有新派點心，賣相精緻，可惜好多都係有和牛成份，老公唔啱食睇左一輪就落單，我柯打嘅係：沙薑豬手、水煮魚春卷、沙田乳鴿X2、炒蝦腸粉（XO醬）同埋凍奶茶一杯每檯都有一壺茶，指定左嘅茶葉第一道上嘅係小食：沙薑豬手首先要讚嘅係佢剪細左一舊舊，食起上黎方便啲，可以成舊放入口，食相可以優雅一點另外件數又多啲，大家可以少食多滋味不過佢嘅沙薑係加埋豉油同蒜蓉，初初食就覺得好惹味，但係食耐左就覺得好濃味，要飲茶先得第二道上嘅係水煮魚春卷呢個點心好特別，係其他地方食唔到，水煮魚加春卷咁都俾佢諗到咬開已經食到水煮魚嘅麻同帶點點酸，但係一啲都唔辣，所以我成日都記錯佢係酸菜魚春卷春卷包做得幾好，包得算密實，就算水煮魚有湯都HOLD得住，入面仲夾住一塊薄薄嘅魚片果然點題，符合商品說明條例春卷長度比一般食開嘅都長，加上春卷皮要比平時食開嘅又包得厚身一點，味道又係濃味食物，所以食左一條春卷已經飽左最期待嘅食物：沙田乳鴿雖然鐘意食乳鴿，但係我好少食，細細隻無乜肉，又貴食完又唔飽呢度$39一隻就一人一隻同老公試下啱啱拎出黎熱辣辣，已經攤左一陣先帶手套食乳鴿，但係依然辣手呀乳鴿肉嫩夠味，雖然就唔算有汁，但因為乳鴿細細啲肉唔會柴皮呢個我同老公都滿意最後黎嘅一道炒蝦腸粉（XO醬）呢個餸又係有神奇之處，XO醬應該有乾瑤柱，但係佢炒完出黎真係唔多覺，但係有XO醬嘅味，仲十分濃烈TIM蝦嘅份量都幾多，但係呢啲雪藏蝦都無乜特別其實叫個澱粉質都係因為驚唔夠飽，不過因為呢度嘅食物樣樣都好濃味，我地都食到漏漏地，基本上叫三個都夠食呢度食物嘅賣相，尤其係SELL外表個啲真係值得一讚，完全做到實物如圖，雖然我自己無叫黎食，但係望到隔離檯嘅點心賣相都認真唔錯耐何我同老公都唔算十分重口味，所以唔係好啱我地胃口講完食物就講服務，呢類有裝修嘅餐廳收加一服務費就預左，但係呢度嘅服務仲衰過屋邨酒樓咩帶位GREETING呢啲無都唔緊要啦，我唔係食FINE DINING，但係上菜個PART簡直離譜每次上菜都係擺低就走，ALERT食客嘅說話例如：小心、唔該，一句都無，都唔好要求佢地講一次食物名咁高要求嘅句子講真係屋邨酒樓飲茶，姐姐放低籠點心都會講句：牛肉球！啲野食熱辣辣，就咁隊碟野食埋黎仲有唔知點解得我個檯開位無俾QR CODE我地落單，我係拎住門口拎個張點心紙落單嘅明明寫左要凍奶茶，結果就無上到如果我唔想飲就唔會落單啦，唔係為左有得邊食點心邊飲奶茶，我點會黎呢啲新派中菜呀隔離檯每一檯都有個細紅色桶仔裝垃圾，因為食乳鴿有骨嘛，整整齊齊掉落桶唔會影響自己食慾姐姐執檯又方便但係唔知點解又係我地個檯無嘅埋單三百五十幾，話貴又唔係真係好貴，都叫左四樣野連加一但係呢個價錢兩位用都可以有好多選擇呀！呢間唐宮小聚當checkpoint 算，無下次…Read More

今年老公生日話唔想食一整個生日蛋糕，因為夏天就快到唔想變肥仔咁就啱啦，一直都想試下當文歷餅店嘅餅，今次仲唔係好機會🤭雖然當文歷啲餅好靚，但一直都無試嘅原因係因為我好怕係糖皮蛋糕所以事前我都做曬research 先買黎試，結果好多好評咁更加無可能唔買啦估唔到包裝又幾靚喎！個盒嘅紙質都好好入面有兩件蛋糕，一件係紙包檸檬茶，一件係紐約PIZZA。檸檬茶仲做好曬PROTECTION🤡真係做得好似一包檸檬茶啊，好得意！出面個層係白朱古力，之後係佛手柑奶酪同earl grey mousse，入面係檸檬海棉蛋糕，個底係杏仁餅同脆餅乾餅底係甜啲，但係真係好食，有茶味唔會淨係得檸檬味估唔到食過咁多蛋糕都仲會食到新口味跟住就係紐約PIZZA （士多啤梨白芝士慕絲蛋糕）同紙包檸檬茶比呢個蛋糕係無咁甜，雖然面個塊「芝士」係白朱古力，但因為只係薄薄一片，加埋士多啤梨有嘅微酸，加埋係好夾 白芝士MOUSSE味道清清地，就算加埋STRAWBERRY BASIL 醬都唔會有重甜嘅感覺另外如果擔心basil 做甜品嘅朋友都唔洗怕個味怪，因為唔係好食到有basil 味雖然睇MENU呢個CAKE餅底同紙包檸檬茶唔同，係櫻桃酒杏仁餅同雲呢拿牛油曲奇，但係食落又唔覺有乜分別今次食呢2個蛋糕都好滿意，2個人SHARE食都幾好，有新意又好味最後是老公生日快樂啊🎂…Read More

某日係紅磡行過清玉，竟然俾我見到有新川美食嘅傳單其實佢放嘅位置都好隠蔽，係地產舖同清玉嘅門邊，真係好眼利先發現！Menu 同以前基本上都係一樣，只係加左啲啲價，食物種類同以前都係一樣同埋一樣無太子總店嗰邊有嘅小食:)今日WFH唔洗考慮啦，一於就食佢啦！因為避開多人嘅時段，所以提早落去買LUNCH佢開嘅位置同以前差唔多，只係後左一條街，係小巴站個邊不過因為依家仲係試業中，所以門口招牌都仲用紙遮住，同埋只限外賣，午市都唔做堂食的呢度有貓店長！不過佢太怕醜啦，唔肯出黎見人付款方式有好多種，你講得出嘅都有！尤其係紅磡要做國內學生嘅生意，有ALIPAY／WECHAT PAY都係MUST買完外賣就返屋企啦，係久違嘅新川美食呀湯紅薯幼粉小辣走芽菜就係必叫嘅膽，今日嘅腳就係魚腐同豬大腸飲品就唔包嘅係我私伙呢類魚腐都係我至愛黎，有兩粒，好鐘意佢有啲啲爽爽地嘅咬口，有豆腐成份好好食！係我心儀嘅車仔麵餸之一另一個餸叫左豬大腸，已經剪開左，食落煙煙UNUN，因為唔係肥腸，所以唔會有好濃油香我比較鐘意食呢款，因為罪惡感無咁重薯粉一向都唔係我首選，因為佢唔索湯但係呢款彎彎曲曲嘅薯粉就會索湯，而且佢彎彎曲曲又會掛住其他肉碎、蔥之類相比粗身個款更易咬開，筷子都夾得斷如果唔追求襯熱食，而係放一陣先食，等啲薯粉索埋湯仲正！新川美食已經成為我WFH伙伴了！…Read More

疫情期間都唔會出街食飯，今日突然好想食海南雞飯，就去揾海南雞飯食啦一向都知差館里呢邊有間淨係做外賣嘅泰式餐廳，因為以前都實會堂食，所以從來都無考慮佢依家都係買返屋企食，所以無所謂啦～當日下奏一點幾去，因為得我一個客所以等一陣就拎得！急不及待返屋企打開個外賣望下點先～附送餐具，都係有個湯同埋雞飯連醬先飲啖湯！個湯有驚起，雞味湯固然有雞味，但佢仲有陣味係我係其他舖頭飲唔到，就係有啲酸味絕對唔係變壞個種，大家可以放心。呢種微酸反而更加令人開胃！我一向都麻麻地鐘意飲湯，我都成碗飲曬海南雞飯，最重要當然係雞啦～泰色海南雞個醬我都好喜歡，酸酸辣辣好送飯，佢俾嘅份量都夠我點雞又撈飯雞就唔好期望佢十分之滑，質感界乎滑同「諧」啦不過夠雞味，收貨雞飯好食，佢唔似大部分泰式雞飯落重黃薑粉，佢係染了雞黃油嘅黃色食完成個飯同飲完成碗湯，好飽，十分滿足！…Read More

寶其利街好少行過去近黃埔街個頭，今日因為搭巴士係個邊落車先知原來有間賣蜀菜一浸香辣嘅味道聞到都好醒神買前即刻上網望下，見到啲人話好辣，所以我都抱住心理準備叫個小辣就算點知落單姐姐話：小辣？你食唔食得辣架？好辣架喎！連小辣都好辣！？到底我仲可以叫乜野辣姐姐話仲有BB辣，咁就BB辣啦呢度等外賣簡直可以用神速形容，分幾鐘就拎得！見到都覺得辣呀，面頭有一浸紅油，得少少芫茜同埋好多芽菜就咁睇真係睇唔到自己叫嘅係乜野食，我叫嘅係肥腸酸辣粉剪開大一舊舊容易食，無臭味，有啲咬口，好多舊，一路食薯粉一路都有肥腸食至於薯粉就係呢種質地，少少肥嘟嘟好好咬個種雖然呢個係BB辣，但係個辣度一啲都唔BB，我覺得有譚仔小辣！甚至更辣！因為好辣，所以我要慢慢食食左成個幾鐘先食曬個麵其實個湯底同麵都好食，肥腸都好食，但真係太辣搞到無得好好品嚐到底咩人先可以食到大辣？？？…Read More

因為疫情嘅關係，好耐都無同老公出街四圍行下匿係屋企咁耐終於都忍唔住出去抖下氣，所以今個星期日就近近地出去荃灣西行下行過馬祖見到依家有午市套餐，到三點之後仲送飲品雖然我去嘅時間就未到三點，但都係加六蚊啫，咁OK啦入去試下餐廳環境都乾淨同埋都算坐得舒服啦，光線充足。明明係星期日嘅午巿，但係都好多吉位，今時今日做做餐飲真係唔容易我㨂嘅係原菜豬肉餃米線加五蚊轉左香辣蕃茄湯有4粒白菜豬肉餃，好足料大大粒香辣蕃茄湯我叫嘅係少辣，但係都真係幾辣，我食到嘅辣度係譚仔嘅中辣，我覺得呢度嘅小辣係等於譚仔嘅小辣！老公見我話辣都「不」左羹湯飲，佢個嘴唇即刻變得好性感米線唔會煮到太淋，係我鐘意嘅un度食物份量足夠，食完絕對夠飽的老公叫嘅係生姜豚肉生蔥海苔燒汁飯，賣相都幾靚仔至於味道方面，老公話好食，同埋佢都話食完夠飽我同老公都一樣叫左熱奶茶，呢個奶茶飲得過好好飲又唔算，但以唔係茶餐廳嘅標準黎講已經算係好唔錯，我同老公都覺得意外因為老公唔鐘意打邊爐，下次去荃灣西都可以on list 考慮食呢個！…Read More

今日重陽節，我就無去登高啦，反而一早就PLAN定放假同老公去邊行街街未行街之前梗係要先填飽肚子啦，如果唔係會無energy消費！因為搭船過黎北角，所以就想近近地揾間餐廳食飯，今次就黎左IBIS嘅餐廳幫襯啦！事前做好RESEARCH，知道佢開12點，所以就較啱時間先過黎黎到先係12點05分島，但係只係得返少量位置，因為大部份人都有BOOK檯因為我同老公先係兩個人，所以仲有得WALK IN（真好彩！）所以我都會建議大家黎之前先係BOOK檯今日係假期，2人就$188加一，4人就$348加一餐牌上既野食就任選兩款，我地要左I同J，自助吧有飲品、甜品、沙律同湯因為餐廳好多人，所以唔影自助吧了，改為用文字形式交待有乜野可以自助拎麵包：方包、蝴蝶酥同埋牛角包湯：好似只有羅宋湯沙律：沙律菜、紅菜頭、洋蔥、粟米⋯⋯甜品：芝士蛋糕、朱古力（定唔知TIRAMISU）同埋桂花糕飲品：奶茶、咖啡、橙汁、可樂、梳打水、水、仲有檸檬食左一陣沙律就上主菜啦，先係我嘅慢煮牛頜肉好淋！一切就散開，但係唔會散到好似煲湯豬肉咁，配以燒汁同埋薯蓉，好食！！薯蓉有牛油，所以一定好食又CREAMY老公叫嘅J 比我大份，係肉眼扒配薯菜兩位先係$188，當然唔好對塊扒有任何期望啦，但作為港式西餐黎講就絕對收貨啦份量夠 ，一定食得飽，黑椒汁唔會調得太辣或者太濃味，食到牛味又食到醬汁嘅味道 ，拎到平衡本來仲想拎碗湯飲，但係因為食完個主菜都飽到不得了，仲要留肚食甜品，所以就無拎到前前後後拎左四杯野飲，淨係飲都飲飽🤣甜品都唔記得左影相，只能口述因為無曬朱古力個款，所以只係拎左芝士蛋糕同埋桂花糕桂花糕就清清地食到桂花香，所以食左呢個先好食其他蛋糕芝士蛋糕芝士味唔重，反而重甜味不過我覺得都好味既呢餐真係好抵！我同老公都飽左成個下奏，如果下次黎北角無乜IDEA都可以ENCORE…Read More

以前紅磡的新川美食一星期至少食三次自從紅磡分店摺左之後就無再食過薯粉了因為太想念新川美食，所以就特意去太子店！店舖面積雖然不大，但係都算闊落，檯同檯之間唔會放得好逼，同以前紅磡分店完全不一樣！呢度仲有水吧，可以叫奶茶咖啡飲！唔知大家認唔認同，就係呢類薯粉米線舖頭普遍都唔會太乾淨。但係新川美食打破我一向既體驗，店入面嘅清潔都尚算可以，加上冷氣夠凍，我認為呢間薯粉店係可遇不可堂食的！坐低第一件事當然係睇餐牌酸菜係我嘅最愛，因為係其他地方食唔返呢個style!! 仲有冬菇同芝心丸，呢2個都係我最愛。但係食3餸又略嫌少貴，加上會太飽，食唔曬會浪費食物，唔捨得浪費薯粉但因為太少黎太子呢邊，無乜機會食到，所以照叫2餸！！期待已久！！！！！！！！！！味道都係咁好！酸辣適中，同以前係紅磡食嘅一樣咁好味！老公話昔日情懷返曬黎！鐘意薯粉係有紋路的那款，好似「S」形咁，特別索到汁，夾又易夾啲，唔會走來走去再配以肉碎同湯一齊食，每一啖都係享受！以前係紅磡食時無食過小食，今日見到有就梗係要叫個食啦叫了一碟尖椒皮蛋呢度嘅尖椒皮蛋同某連鎖店既唔同，係黃色的，而唔係黑色個種。老實說我對皮蛋就無研究，唔知道兩者嘅分別呢款面頭落左好幼細既花生碎，除左惹味外都多了一份香氣。由於呢款皮蛋無紅油浸住，所以食時都少了滿口油既膩感係另一個style 既尖椒皮蛋今餐食到好飽，除左食到昔日情懷，仲飲到杯啱我口味嘅奶茶（茶底夠濃）新川美食，永遠唔會令我失望…Read More

因為今晚做facial，所以無煮晚餐。大快活新出左白咖喱，一直想食但都無食過，今晚終於有機會網上外賣自取有折，呢個係自疫情以來既德政！老老實實因為外賣自取有折，所以我都食多左大快活。白咖喱當然最配香茅豬扒啦，主食就揀左要鴛鴦粉。摻摻呢類型2個粉加埋一齊食既麵類一直都有，但我就從來都不喜歡，所以我揀呢個粉既時候都係唔抱任何期望。返到屋企就開壇進食啦份量方面我個人就滿意，豬扒夠大塊，都可以平鋪到一個外賣膠盒。食落厚度都係正常，唔係揼到薄chichi個種，上面仲有淋到白咖喱。因為啲豬扒都有醃到，所以唔需要靠白咖喱先有味。肉質鬆軟夠曬熱，而且有芫茜！加分！另外仲有少少芽菜做配菜，雖然我就唔食既，但係好似愛吃芽菜既人好似好多。之後就係鴛鴦粉啦，係粉絲加米粉。呢個粉我覺得有驚喜，首先2種粉粗幼差唔多，所以食落口感就好似平時食麵咁，唔會又粗又幼。而且質感又差唔多，唔會有兀突既感覺。白咖喱湯底唔會好似醬汁咁厚，配埋炸蒜少少辣椒碎，味道好好。如果太厚身食落感覺好heavy好油膩，所以某著名食白咖喱既餐廳個款就唔係我杯茶。總括然而，大快活既白咖喱係啱我口味多d，味道夠又唔會太濃同厚身，豬扒醃夠味就咁食都好好味。可惜呢就係唔包飲品，呢杯奶茶係我自己再加錢的…Read More