小八婆's Profile

朋友話好耐無食過火鍋放題，然後佢就帶左我黎呢度。餐廳係全層，幾大。湯底有三個可以選擇。第一可選雞煲，然後再加清湯打邊爐。第二可揀鴛鴦湯底，第三就係單一中式湯底，而最後我吔就揀左單一湯底打邊爐。火鍋配料擺放企理，有蓋蓋住，飲品任飲，同樣在外面自取。椰子雞湯底：湯好足料，清甜。有椰子、雪耳、紅棗同杞子等配料。新鮮雞分開上，雞好滑好嫩。就算打邊爐打到最後，雞都係咁滑。牛肉：有五款牛，分別係安格斯牛小排、手切封門柳、和牛肉眼嚴選、牛肩胛同埋極上牛板腱。牛味濃，其中手切封門柳比較厚，有質感。食完之後我哋再encore，牛肉送上同樣都係咁靚。海鮮船：海鮮非常生猛，鮑魚同海蝦識郁架，另外仲有珊瑚蚌、生蠔、北寄貝、大蜆、龍躉同帶子。生蠔同鮑魚勁大隻，熟左都唔會縮。所有海鮮洗得好乾淨，鮮甜，正！是日精選海鮮：有大蜆同海蝦，就算唔係海鮮船嘅海鮮，都唔會馬虎。全部都大大隻，食落都係鮮甜架！刺身：款式真係有好多，切得夠大塊，用冰鎮，好新鮮，慢慢食都得。其他火鍋配料：有d火鍋配料要用qr code落單，我哋叫左手打魚同滑蝦滑。兩款都係新鮮手打，味道重，好彈牙。生菜同皇帝菜洗得乾淨，淥完翠綠爽口。甜品：雪糕有海鹽味同益力多味，香港品牌，香港製造。雪條有榴槤味、椰子味同紫糥米味道，呢個係我鐘意嘅品牌。另外仲有糥米磁同細細件脆皮朱古力批，全部在外面自取，食完滿足晒。…Read More

今日係結婚紀念日，老公知道我好鐘意食pancake，所以就特登帶我黎呢度食飯。餐廳門面同環境好有歐陸風情色彩，地方都幾大，越夜越多人。餐牌真係樣樣食物都好靚，好吸引。最後老公就叫左個沙律、燒法國春雞Risotto，墨汁意粉同埋我最愛嘅pancake。Sesame Salmon & Kale Salad：三文魚好香芝麻味，蔬菜用左羽衣甘藍做沙律菜比較特別，口感較煙韌，藜麥同小蘿蔔爽口，醬汁係青芥油醋汁，夠開胃，加埋巴馬芝士就夠香夠味。Roasted French Chicken Risotto：燒法國春雞半隻夠大隻，外皮燒得夠香夠脆，雞肉嫩滑juicy，配自家製酸辣醬仲好食。意大飯煮得濕潤，有咬口，旁邊仲有大啡蘑菇、牛油果同車厘蕃做伴碟，整體好豐富。Calamari Squid Ink Pasta：魷魚口感煙韌，裡面有蕃茄同洋蔥粒，味道帶微酸，墨汁意粉硬度剛好，芥末忌廉汁creamy，多醬汁好好味。Matcha Cream Pancake：賣相勁吸引，同餐牌相一樣。伴碟有紅豆、抹茶蕨餅同士多啤梨，厚Pancake有兩層，夾住抹茶吉士醬，一路食一路流出黎，抹茶味濃，唔太甜，好有層次感，好好食，勁滿足。Iced Lemon Tea：大杯夠凍，糖水自己落，味道正常。…Read More

朋友生日，佢又鐘意貓頭鷹，所以就特意搵左間貓頭鷹主題餐廳同佢慶祝一番。餐廳地方唔算太大，有好多貓頭鷹擺設同掛畫，可見店主花左心思去佈置。見到有set dinner都幾啱心水，我哋就叫左個意大利飯同埋肉眼扒餐。餐湯：甘筍湯甜甜地，幾好飲。黑松露野菌沙律：淡淡黑松露味道，都幾多菇，菇味濃。沙律菜乾淨，幾新鮮。白酒忌廉汁西班牙辣肉腸車厘茄意大利飯：每啖都食到有辣肉腸，充滿醬汁，好creamy，整體味道唔錯。燒紐西蘭特級肉眼扒去煙肉炒椰菜：肉眼扒七成熟，切開仲紅紅地，肉質厚實唔韌，點少少海鹽已經好好食。旁邊配菜煙肉炒椰菜都好好，爽口鹹鹹地，夠晒味。凍奶茶：茶膽味道都ok，唔會好淡，我哋都幾滿意。Chocolate Brownie：自家製甜品都幾有水準，朱古力味濃，有口感帶少少流心，旁邊配左百香果做伴碟，酸酸地，中和返朱古力甜嘅味道，幾好食。…Read More

今日同老公去大埔一田買嘢，之後佢就帶左我去旁邊嘅藝術中心食晚飯。佢唔帶我黎，我真係唔知，原來呢度有間隱世嘅意大利餐廳。餐廳燈光淡黃，用紅磚裝修，空間感好大，好有歐洲古舊特色。另外仲有一個open kitchen同bar枱，真係幾有氣勢。餐牌選擇都唔少，老公發辦，叫左個特選二人餐，有餐湯、前菜三小碟、主菜同甜品；跟住再叫左個青口、意大利飯、加多份甜品。職員再推介我哋有個無限暢飲，下單起計兩小時，任飲白酒、紅酒、蘋果汁同檸檬茶，呢個真心覺得抵。無限暢飲 ($98)：老公揀左白酒，佢話白酒凍，口感較辣。我就揀左紅酒，容易入口，唔澀，兩款酒都OK。餐前麵包：一份份已用紙袋裝好，乾淨衛生，幾有心思，旁邊有油醋汁可點麵包，好味。廚師精選餐湯：南瓜湯幾creamy，仲食到南瓜蓉，好飲。意大利風乾火腿拼盤：有巴馬火腿同沙樂美腸等，鹹鹹香香，配埋旁邊提子食，感覺甜同清新。地中海風味烤多春魚：老公最愛多春魚，佢話烤得好香，連頭都食埋，好鐘意。白鯷魚茄子蓉多士：白鯷魚口感清爽，配茄子蓉味道都幾夾，仲有橄欖油果種香氣，多士焗得夠香夠脆。新鮮青口配辣蕃茄汁：青口鮮甜，口感軟軟好似食蠔感覺，醬汁有辣椒、蕃茄同羅勒，酸種多士點埋汁好好食，職員話如果唔夠麵包，仲可以問佢攞，真係超正。西班牙烤乳豬 (1/4隻)另配田園沙律(+$28)：烤乳豬賣相靚，外皮燒得唔錯，勁脆，肉質嫩，肥瘦均勻，點少少芥辣幾好味，配埋田園沙律食就無咁油膩。慢煮牛面頰番紅花意大利飯：牛面頰好淋，食到一層層骨膠原，意大利飯煮得幾正宗，有口感，好夠味，食到好香巴馬臣芝士味道。提拉米蘇：口感較濕潤，有層次感，有咖啡味同可可味道，微甜微苦，好好食。奶凍配百香果醬：奶凍口感勁軟棉棉，入口即溶，重奶味，配埋百香果醬甜甜地，食完好滿足。…Read More

今日老公放假，夜晚就去左呢度行街兼食飯，佢話好想去新加坡米芝蓮餐廳開餐。餐廳都幾大，裝修都幾靚，仲可以坐房，朋友飯聚都幾適合。餐牌好多選擇，之前在其他分店食過佢D海南雞幾出息，今次就揀其他。老公叫左個燉湯、炒菜、魚同埋炒飯。火焰椰子八寶燉雞：原隻椰王上，黎到時候職員先幫佢點火，熱一熱佢先，好有睇頭。裡面有淮山、杞子、圓肉同埋瘦肉，用料十足，加埋用椰子水一齊燉，湯水原料原味，味道好甜有雞味，無咩油，老公好鐘意。參巴辣椒炒通菜：用鐵鍋上，一邊食一邊keep住熱，通菜幾有鑊氣，加埋魚乾一齊炒，炒得爽口夠綠又夠香，幾好食。酸菜石斑魚：估唔到連酸菜魚都整得幾好喎，石斑魚幾嫩滑，結實，帶鮮甜，仲有芋絲同秀珍菇等配菜，湯味道微辣，酸酸地，幾開胃。食神魚籽菠蘿海鮮炒雞油飯：賣相骨子，炒飯鋪滿魚籽，份量都幾多，裡面有帶子同蝦等海鮮配料，仲有菠蘿，炒雞油飯唔算太多油，入口係食得出雞油飯味，唔錯。…Read More

朋友生日，一定要搵一間靚小小嘅餐廳同佢慶祝，大家都北區居住，自然會搜羅區內美食，呢間一直喺心願清單裏面，自然第一時間選擇咗Together啦！佢嘅室內裝修行奢華風，可以穿得美美🤭套餐都會非常豐富，二人餐都有兩個set，價錢比想像中低，抵食！洋蔥湯非常濃郁，本人較喜歡質地薄嘅湯，呢個絕對滿足到我🤭凱撒沙律配雞嫩胸~雞胸下嘅羅馬生菜堆砌成花型，可見其費盡心思🥰雞胸夠晒嫩，而且係脂肪最小嘅部位，女仔食絕對冇負擔😌特色小食拼盤：1.越式雞肉米紙卷～呢個係冷盤，搭配旁邊酸酸嘅醬汁，非常開胃😊2.墨西哥肉丸～呢個肉丸係牛肉手打嘅，咬口十足，而且醬汁亦非常惹味😁3.韓式脆炸酸辣雞翼～炸物沾上醬汁，絕對可以增添風味亦都可刺激味蕾，而且用咗單骨雞翼，食嘅時候非常方便，感覺十分貼心😍英式烤焗鹹豬手配烤香蒜～鹹豬手啖啖肉，配埋旁邊嘅酸菜，皮嘅部份非常香脆，可以神還原德國風味😋香烤肉眼配阿根廷醬～一把中式菜刀盡顯呢道菜式嘅幽默🤭肉眼扒夠晒淋，係女仔嘅至愛，而且烹調時間剛好，依然呈現粉嫩嘅粉紅色😍焗牛角窩夫配雲呢拿雪糕～一向都好鍾意食窩夫，用牛角包造成嘅窩夫真係別具風味，加上香甜嘅雪糕，冷熱交融，而且賣相非常得我歡心，今次真係要比滿分💯…Read More

今日同朋友去石門搵食，見到呢間冰室中式、西式俱備，街坊價錢，就立即衝左入去😂仲有即炸嘅乳鴿添，真係非常吸引！餐牌嘅款式種類都好多，朋友鍾意食西式，我鍾意食中式，都完全可以滿足到👍🏻嚟得冰室，梗係鍾意飲杯紅豆冰，紅豆已經非常淋，而且椰汁味香濃，Good!大蝦沙律～可以選擇，麻醬或千島醬，而我選擇咗前者，沙律份量非常大，而且配有紅椒、黃椒，非常特別！大蝦亦都非常彈牙，新鮮之選💯咕嚕斑塊～斑塊非常厚身，而且肉質係食得出係靚魚，有咬口，一啲都唔削，味道方面，酸甜度好啱我胃口，非常下飯😋德國咸豬手～份量好足，大胃王啱哂！香脆微咸，本身已經夠味，沾埋佢嘅汁，更加畫龍點睛，薯菜嘅份量亦都非常多，相信呢個份量，如果係兩個女仔食，都要捧住個肚走😂…Read More

今日同老公去左大埔行街，差唔多晚飯時間，經過睇到呢間食日式放題，門口擺晒萬聖節吹氣公仔，咁有萬聖節氣氛，被佢吸引，咁就不如食吓放題啦。行左一陣就可以上去開餐喇，門口就有打卡ironman，樓梯就繼續萬聖節吹氣公仔，好得意。呢度唔止日式放題，連中式點心都有，鐘意燒又得，打邊爐又得。所有食物在外面自取，生肉擺放好企理，全部用蓋蓋住，真係食得放心。刺身：有三文魚、吞拿魚、榮螺、鮮帶子、八爪魚同赤蝦，連劍魚腩咁少見都有。食落帶鮮味，都幾肥美。炸物及燒賣：麥樂雞同格格薯條都係我至愛，食落暖暖地。燒賣一籠一粒，比較精緻，都好食喎。燒肉：薄切黑椒牛扒有口感，韓式魚柳醃得好入味，帆立貝燒香佢，幾好食，三文魚骨腩味道正常，麻辣牛肉真係幾辣，好惹味。另外，職員一見我哋燒嘢牛油紙燶左，就即刻幫我哋換，真係好有效率。熟食：金銀蛋莧菜清清地，鹹鹹地，蒜蓉雞唔算太重蒜味，但都好食，人參雞湯唔會話死鹹，淡淡地都幾好。碗仔翅同茶蒸碗都係一人份量，樣樣都食少少，可以食好多嘢。沙律：沙律菜洗得乾淨，配上日式沙律汁，酸酸地都幾開胃。我就覺得佢個蘋果沙律最好食，調味不錯。另外仲有麻辣雲耳等涼伴，夠晒辣。甜品：真係勁多種類，奶凍、雪糕、雪條、榚點同豆腐花都有。我就樣樣攞d，食幾樣都已經值回票價。…Read More

上次搭車經過呢間cafe，睇落幾好。今日出太子買嘢，咁就正好去食吓晚飯。呢間café空間地方唔算大，裝修簡約，好文青feel。門口有個櫃show左呢間café嘅自家製甜品，見到都覺得吸引。裡面環境乾淨整齊，光猛，坐得都幾舒服。餐牌有set for 1 or 2，亦可散叫。我哋就揀左Set for 2，價錢比較抵，有1款頭盤、2款主菜、2款甜品同2杯飲品。沙律菜︰跟餐亦可選餐湯，沙律菜乾淨爽口，簡簡單單配麻醬已經ok。蒜蓉焗生蠔4隻︰生蠔焗到肥嘟嘟，入口爆汁，好香蒜蓉同牛油味，好想食多幾隻。北海道帶子黑松露意大利飯︰帶子size正常，睇到個樣就知道有心機煎，煎到顏色剛好，食落好香。意大利飯亦軟硬適中，D汁有淡淡忌廉味，唔會太漏太鹹，幾好。炭燒美國安格斯肉眼牛扒︰賣相好好，我哋叫左五成熟，肉仲係紅紅地，咬落去帶肉汁，唔乾，肉質比較嫩，點埋黃芥末少鹹味仲好食。連旁邊配菜都燒到好香，係燒過果種味道，好食。牛角窩夫雪糕︰雖然簡單，但賣相都覺得好靚。雲呢拿雪糕配上暖暖窩夫，老公話都已經好鐘意。抹茶紅豆麻糬卷蛋︰被門口個display吸引，所以就加左$28升級左做自家製甜品。呢個甜品食得出係自家製感覺，抹茶紅豆配上麻糬，味道好夾，整體唔太甜，唔錯。凍檸檬柚子蜂蜜︰餐飲通常係咖啡、奶茶、檸茶或檸水，好少呢類特色飲品。檸檬柚子峰蜜味道同size都正常，夠凍。…Read More

朋友推介，佢話有意無意間發現左間食材新鮮嘅日式餐廳，所以今晚佢帶左我黎呢度。門面已經好日式裝修，內外都係木系設計，有型格。地方好大，環境感覺舒服。餐牌好多嘢食，見到都想食。朋友發辦叫左一個丼飯、刺身、壽司同埋餐牌嘅推介。沙律菜及麵豉湯︰叫丼套餐就會有，沙律菜乾淨爽口配麻醬，麵豉湯都幾好，唔會太鹹。夢之丼︰賣相非常好，好豐富。裡面有三文魚蓉、三文魚子、鮮帶子、牡丹蝦、海膽、松葉蟹同埋左口魚裙邊等，魚生新鮮帶鮮味，鮮帶子size都唔細，淋上橙醋一齊食，酸酸地，又幾清新，整體真係正。花錦魚生丼︰呢個樣都好靚，有三文魚、白身魚、赤蝦、左口魚邊、金蟹子、三文魚子、櫻花蝦、蟹膏豆腐、青瓜、甜蛋、玉子漬、松葉蟹同埋蜆肉，因為佢切碎左，食落滿口魚生，撈埋生雞蛋食比較香同滑，食材同樣新鮮，口感滿足。蟹皇醬燒蟹膏豆腐︰豆腐入口勁鮮味，配上蟹皇醬同蟹膏真係絕配，有驚喜。左口魚邊壽司︰燒左帶少少油脂滲出，加埋木魚絲一齊食，夠味又好食。刺身中拖羅︰睇個樣就知好食，咬落係有薄薄油脂滲出，肥美，真係想食多幾塊。牡丹蝦︰夠大隻，夠甜夠鮮味，我就最鐘意。磯燒北海道珍寶帆立貝︰帶子燒過好香，包住幾塊紫菜食，做到內軟外脆嘅口感，真係唔錯。…Read More

今日同老公去觀塘探吓朋友，朋友就唔得閒同我哋食飯，佢就推介佢樓下有間食上海嘢幾好，所以我哋就去左呢度食晚飯。餐廳裝修比較傳統，舊式老店，環境乾淨整齊。我哋叫左個$258二人餐，一款湯，兩款小菜，配白飯同八寶茶。花雕醉雞：雞整到剛剛熟，無骨，勁重酒味，好滑。時菜獅子頭：獅子頭大大粒，味道唔太濃，夠味，菜都入晒味，食得出用心煮。酸辣湯：真係又酸又辣，唔太鹹，好足料，裡面有好多木耳同豆腐等配料，啱晒鐘意又酸又辣嘅我。八寶茶：食完飲吓茶消滯都幾好，八寶茶甜甜地，原來仲可以無限添加，幾好。…Read More

今日去左觀塘攞團購，順便食埋晚飯。入呢幢大廈時，見到有日本嘢食，所以就去睇睇。餐廳門面都幾大，好企理，好工業風，而門口旁邊擺放左一部懷舊日本老虎機，同佢都幾夾。餐廳環境都幾大，乾淨整齊，一入門口見到一個好有日本feel嘅彩繪壁畫，又真係幾靚。餐牌都幾多嘢食，菜式名都幾有創意。呢度係自己劃柯打紙，老公發辦隨便點左幾款。龍卷風沙律：好大碗，勁多菜，裡面仲有海藻，蟹柳，脆片等。菜洗得乾淨爽口，脆片辣辣地，整體口感豐富，加埋上面蟹籽咬落卜卜脆，幾好。芝麻雞翼：咬落去仲出緊煙，熱辣辣，脆脆地，好香口，入味。日式章魚小丸子：同樣剛炸起，好熱，上面仲鋪滿木魚絲同沙律醬，真係好有日本章魚燒果度味道呀。忘不了您：呢個係特色卷物，連名都好特別。裡面有炸牛肉同芝士，上面就鋪上芒果。炸牛肉都幾好食，芝士味濃，配上芒果又幾夾喎，唔錯。…Read More

今日同老公去上環買海味過中秋，順便食埋晚飯。行過見度呢間café都幾骨子，感覺舒服，所以就揀左佢食晚飯。呢間café名叫Suit，坐低已見到有一套西裝擺設，然後牆身poster有一位女性攞住杯Suit coffee，令我諗起日本一間同名服裝公司。餐牌款式唔算話好多，見到佢係食日本西式菜。老公發辦叫左兩個small同main。餐廳播住日本歌，同佢本身style幾夾。每次上菜，店員都細心講解菜式係d咩，睇得出佢哋用心經營，另外店員亦都推介左兩款sake比我哋。Foie Gras & Fruit Tomato：鵝肝醬配上日本蕃茄，上面係紫蘇葉。醬汁係橄欖油加少少wasabi味道，鵝肝醬連蕃茄一齊食，真係超好食。Curry Shrimp Gnocchi：蝦新鮮大隻，爽口，配埋日式咖哩汁食，好味。旁邊係Gnocchi，其實係用麵粉同薯仔搓成嘅馬鈴薯粉糰，口感煙煙韌韌，幾特別。醬汁係用左蘋果汁同芫荽做底，芫荽味唔算太濃，唔食芫荽嘅我都可接受到。Beef & Melon：呢個係用熟成方式處理嘅牛肩肉，個樣睇落已經唔錯，食落肉質幼嫩，脂肪分布均勻，絕對係高質。旁邊有炭燒過嘅哈密瓜，幾甜。加埋仲有粒粒著仔做配菜，整體真係好好。1/2 Yellow Chicken (Limited)：呢隻係三黃雞，同樣用熟成熟成方式處理。三黃雞Size都大隻，樣都OK嘅，係焗得過火左少少啦，旁邊配左沙律菜。雞肉嫩滑，咬落juicy，老公就最鐘意。Gozenshu 9(左)：來自岡山縣嘅清酒，有果香味，易入口，比較啱女生飲。大倉源流水酛純米酒(右)：呢款就來自奈良縣，老公話米味重，酒味濃，初入口帶酸味，飲到尾段就變為甘，有層次感。…Read More

朋友尖沙咀返工，佢話呢度有間西班牙餐廳最啱傾計食飯。佢鐘情西班牙菜，所以佢就帶左黎呢度，今晚由佢話事。餐廳地方都幾大，裝修好有西班牙特色，地版、牆上掛布同餐碟都好colourful。Sangria white：呢個係西班牙傳統酒，白酒配上一D切片雜果，苦中帶甜，唔錯。加表隆尼亞蕃茄麵包：呢個上時暖暖地，配埋旁邊蒜頭、蕃茄、甜椒一食齊，都幾香喎。水牛芝士沙律：水牛芝士入口係水感感覺，唔同一般芝士味道咁濃。沙律菜新鮮，醬汁係酸醋，仲有蕃茄添，好開胃。香辣蒜香橄欖油大蝦：蝦肉大隻，結實彈牙，入口有D辣辣地，蒜香味道加上橄欖油，幾好。燉自家煙燻安格斯牛肋條：牛肋條燉得好淋，好入味，有煙燻味道。旁邊有薯蓉做伴菜，連汁食就夠晒味道。蟹肉蟹膏闊條麵： 味道好濃，上面仲有隻溫泉蛋，將蛋汁蟹肉蟹膏mix埋一齊食，好香蟹膏果種鹹香味，口感豐富，估唔到咁好食。…Read More

今日同老公睇完醫生，然後就黎左呢個商場食飯。行過呢間餐廳，見到好多人等位，應該唔差，原來係食泰國嘢，咁我就話不如食呢間。裡面地方大，入到去已經有好多客人。打開餐牌都有好多選擇，個樣又靚，我哋叫左炒菜同焗飯。馬拉盞通菜：都算大碟，味道鹹鹹香香，佢仲連埋細細粒蝦米仔一齊炒，夠晒味道，唔錯。日本南瓜焗海鮮炒飯：好有份量，芝士鋪面好香，南瓜好大隻，一路食一路出緊煙，南瓜甜甜地，唔太硬唔太淋，口感剛好。裡面海鮮有蝦、青口同埋魷魚等配料，飯炒得比較濕潤唔會乾，口感好好，唔會太鹹，炒得好好食。…Read More