Garmanda的個人專頁

嚟到機場過咗海關之後要醫肚，其實大部份人應該會選擇去美食廣場。嗰度都有好多餐廳揀，有漢堡包，日式魚生刺身飯，日本拉麵同埋泰國海南雞飯。我嘅選擇係韓式飯卷，揀咗呢一間餐廳，係因為佢有泡菜芝士牛肉韓式飯卷。貪佢夠快捷方便，因為如果食碗熱麵，會食到成身熱辣辣，食韓式飯卷又飽肚又快脆。比完錢之後，收銀員已經即刻俾咗個飯卷我，外表用一個紙盒包裝，裏便用一張好似包漢堡包嘅紙包住飯卷。由於可能喺個盒入邊太耐，外型唔係咁吸引，但係食落味道非常好，裏便有腌菜蘿蔔、泡菜、牛肉同埋芝士，芝士味道唔會太濃。呢一個卷飯卷都幾夠飽，有好多舊，食完隔一陣再食飛機餐，時間啱啱好😋…查看更多

喺太和廣場呢一個美食沙漠，開咗一間新嘅台灣嘢叫做「別忘了」，今日去試吓食佢嘅午市套餐，有打邊爐定量食或者係飯面套餐。我選擇咗午市套餐，自選台灣麻辣酸辣米線，揀咗麻辣湯底、台灣麵、酒嫩雞肉、萵筍同埋濃汁牛丸、再加埋魚皮餃。嘢飲又好多選擇，花多眼亂，最後都係決定揀荔枝綠茶。平日午飯時間比較多中學生，可能要等一陣位，但係都唔係等好耐。嘢食方面，台灣麵好特別，煙靭彈牙，比起又係食米線冇咁悶。同埋佢有䈑筍揀，出邊唔係普通地方有得揀，萵筍亦都好入味，證明唔係求其煮。價錢公道，會再嚟試食其他菜式。…查看更多

夏天熱辣辣，想食米線，但係如果食湯米線，未食到一半已經會成身汗，所以今次去試吓呢間新開嘅撈米線。餐牌選擇有湯米線，有撈飯，同埋撈米線。我揀咗手撕雞秘製肉碎撈米線，同埋好似車仔麵形式咁樣自己圈啲餸嘅過橋撈米線，同埋辣度都可以自己揀。我揀咗牛肉、韭菜、秘製肉碎、餃子同埋墨魚卷撈米線小辣，辣度好夠，我食得辣，所以覺得OK。朋友揀咗微辣，佢唔係好食得辣，就覺得好辣，但係佢都覺得好味。另外，米線用幼身嘅，所以食落去有啲似米線同米粉之間嘅感覺。醬汁方面，其實佢做得非常之好，夠多撈晒成碗米線。總括嚟講，除咗越南撈檬，夏天嘅清新之選👍🏻…查看更多

皇甘栗鮮炒乾果專門店成日行開大埔墟街市都會見到呢間舖頭，因為本身我唔係好ok栗子，所以冇俾佢吸引過入去舖頭入邊，但係舖頭入邊成日都有好多人，於是我就心諗，乜香港真係咁多人鍾意食栗子嘅咩？之後喺網上其他food blogger嘅page見到，原來呢間舖頭有脆脆開心果雪糕食。於是食完晚飯，就決定咗去試吓。點知……真係超級好味呀🥹🥹🥹🥹🥹首先要排隊買飛，之後再排隊去攞雪糕，我叫咗脆脆開心果雪糕，佢真係攞個石盅出嚟中碎啲開心果！之後再放落雪糕度先至裝起。雪糕味唔係好甜，但係好香開心果味！每一啖都起碼有兩至三粒開心果碎，食到最尾都仲有！個重點係佢個窩夫筒有四款口味揀，仲要唔使另外加錢😳$45一杯我諗我會上咗癮…查看更多

好好甜品開咗好耐，門口亦有「芒果大王」嘅大字，所以以前成日幫襯芒果嘅甜品。喺大埔廣場食完飯，特登散步過去，打算食楊枝甘露，點知芒果大王無楊枝甘露😥，好奇怪。朋友想食碗豆腐花，又話無，店員話無普通嘅豆腐花。一間中式嘅甜品舖，竟然無普通嘅豆腐花，仲奇怪。最後叫咗紫糯米冰花同埋香芒冰花。講真，味道無特別，無野好形容。而啲冰花就融得好快，快到好快變水，溝埋啲紫糯米嘅椰汁味，好怪。下次都應該唔會再去試啦。…查看更多

老實講，揀呢間嘢嚟食，係因為睇完MM嘅介紹，知道佢哋日本餐廳嘅理念。之前對呢間嘢完全冇好感，只係從報道之中知道佢好似好污糟。今次去大元邨呢間分店，唔係新開嘅，但係新裝修，因為佢搬咗位。舊舖嘅時候我冇幫襯過，所以今次去新鋪嘅時候，座位同埋地下都算乾淨，冇黐立立嘅感覺。我哋叫咗水牛芝士薄餅、沙樂美腸薄餅、菠菜煙肉香蒜辣汁意粉、穀飼牛扒同埋原味雞翼。薄餅原個上，要自己切開，小朋友玩得開心，味道一般。菠菜煙肉香蒜辣汁意粉，完全冇味。穀飼牛扒並唔係牛扒，而係薄嘅牛肉。雞翼冇特別，但係亦都唔係好味。我明白佢要節省成本先至可以做到咁平，但係食物質素真係有啲失望。…查看更多

黎到又一城，如果唔想食貴價餐廳，又唔想食food court，其實仲可以揀間餐廳食個沙律同三文治。又一城有好多呢類餐廳嘅選擇，有Starbucks，Coffee Academics。今次我就 Pret A Manger，因為唔使等位！就試吓佢嘅食物品質同其他分店有冇唔一樣。揀咗雞胸沙律同埋車打芝士火腿三文治。雞胸質地幾好，唔會好鞋。三文治可以選擇整返熱，熱咗啲芝士溶埋火腿一齊，感覺好好。同埋個包唔係普通包，而係硬身啲嘅麥包，幾好味！👍🏻…查看更多

喺新達廣場食完午餐，想飲杯珍奶，發覺原來新達無咩選擇，要落去大埔墟火車站先有。揀咗天仁茗茶，因為品質有保證，落幾多料幾多糖幾多冰幾多奶幾多水，我相信佢有佢把尺。叫咗一杯凍嘅珍珠鮮奶茶，揀咗五分甜，盛惠$29。味道：珍珠唔太甜，鮮奶味香，夠冰凍。唯一係茶唔夠濃味。另外，我仲見到有613黑糖珍珠鮮奶茶，唔知同913茶王有咩關係，或者有咩分別，下一次可以試吓。題外話，佢嘅飲筒仲用緊膠，唔知之後佢會變成點⋯⋯…查看更多

星期五晚餐時間5:00就開始，我哋5:30就到咗餐廳，成為第一台客人，仲可以揀位坐。我哋兩個人食，要揀選同一個餐，我哋揀咗最平嘅嚴選美國牛肩肉放題，90分鐘。除咗任食嚴選美國牛肩肉，美國豚肉，仲有精選雞腿肉。牛肉好新鮮唔太肥，即使我哋再加單，再叫嘅牛肉都可以保持新鮮，正！另外出邊可以有好多種蔬菜同埋麵類任攞，其中一個特別嘅蔬菜，係叫台灣快菜，出邊未食過，同埋有萵筍！仲有佢做緊士多啤梨promotion，有好多關於士多啤梨嘅甜品雪糕，都係任食。如果想食Movenpick，就要讚好佢哋嘅Social Media，同埋post張相。另外朋友呢個月生日，所以我哋做咗會員，送一個和牛蛋糕，即係有幾片和牛組成嘅一個蛋糕造型，下邊有個播緊Happy birthday嘅音樂盒喺度轉。埋單$458一定會再嚟，打邊爐嘅好地方👍🏻…查看更多

今天是我老公40歲生日的大日子，他特別指明要到爭鮮吃迴轉壽司晚餐🤭星期五的晚上，也不是太多人，我們二人還可以有卡位坐，太幸福了，一定是生日之神幸運的眷顧🤩我們點了一共21碟壽司，有三文魚壽司、蟹肉蟹膏壽司、希靈魚壽司、赤貝壽司、吞拿魚腩壽司、蝦肉蟹膏壽司、赤蝦刺身、油甘魚壽司、芥辣八爪魚軍艦壽司，還有炸蝦天婦羅壽司。大部份壽司味道正常，沒有驚喜，也沒有驚嚇。壽星仔表示，食得好飽，開心地離去，滿足的一餐。…查看更多

今日放假，去大美督食午餐，選擇咗湖越這間餐廳。之前都成日會喺大埔區食越南嘢，例如越南屋、越南妹同埋錦麗。暫時嚟講我覺得湖越最好味。去到嘅時候，可能平日冇乜人，出邊仲可以泊車。我哋點咗火車頭河粉，同埋安格斯牛魔王河粉，另外加配咗越式炸春卷三件，熱嘅滴漏咖啡，同埋凍嘅椰子咖啡。越南河粉湯底味道尚可，但係偏甜，加埋辣椒會好味啲，冇乜味精味，食完之後冇口渴嘅感覺。但係我覺得河粉偏腍，牛嘅味道幾好，夠薄切，牛丸亦都十分彈牙。個人覺得越式炸春卷比較出色，可能啱啱炸起，好脆口，味道好味夠鹹。椰子咖啡味道特別，但係飲完之後成口都係椰子味，唔喜歡椰子嘅朋友，可能要考慮吓普通滴漏咖啡，味道正常。值得一提，廁所非常乾淨！…查看更多

小朋友要去看溜冰，所以經常到呢間餐廳度食午餐。聖誕節之後，佢哋裝修好，第一次再去。餐廳裝修完之後，餐枱多咗，同埋餐枱嘅方向改變咗，對於向住溜冰場進食嘅顧客，冇咁尷尬。人流多咗，所以有啲時候都需要排隊先至可以入到去。餐牌上面嘅選擇同裝修前有95%係一模一樣嘅，只係得一兩個菜式係唔同咗，選擇同之前差不多。我就選擇咗之前餐牌冇嘅，北海道咖喱湯雞髀烏冬。唔係每個餐廳有咖喱湯烏冬，所以想叫嚟試吓。講真，賣相一般，餸菜擺得有啲混亂，不過味道幾好，係略嫌咖喱偏辣。埋單嘅時候有同職員分享食後感，話個咖喱好似偏辣，反而佢同返我講，話個咖喱係北海道咖喱，所以係偏辣。只怪自己點餐嘅時候冇睇清楚，完全冇理過北海道三隻字，一心以為咖喱湯烏冬味道。…查看更多

去科學園踩單車，又唔想食咁貴。其他餐廳又好似好多人排隊，最後嚟到類似food court嘅位，有譚仔，所以選擇咗食呢一間譚仔。可能佢新裝修，啲枱枱凳凳好乾淨，餐具擺放亦都非常乾淨，企理整齊。佢係用QR code自助點餐，職員姐姐提示自助點餐可以有大份嘅小食送，所以我哋用咗自助點餐。點完餐，嘢食都好快就到。味道保持水準，同平常嘅譚仔味道一樣。另外值得稱讚嘅係，我點咗芫荽山，佢係另外用個碗仔裝俾我，而唔係放喺碗麵上面。去到科學園，想食個快嘅，呢個都係一個非常好嘅選擇。…查看更多

聖誕節正日，打算食午餐嘅聖誕大餐，抵食啲。去到新城市廣場，好多餐廳都要排隊，Outback竟然唔使排隊，因為我哋唔介意坐吧枱。其實吧枱仲闊落，唔使同人迫，又有得睇電視。我哋叫咗慢煮豬鞍扒，係要等耐啲，但係味道非常好，唔會太韌，又唔會太腍，仲有個小小嘅飯底，夠晒飽肚。另外餐湯都唔錯，當然仲有佢嘅signature黑糖麵包，仲可以無限添食！我見到門口寫住可以就咁買黑糖麵包，可能係啲人返屋企開party，可以買嚟食，值得推介推介。…查看更多

聖誕節期間，同小朋友去尖沙咀睇燈飾，佢哋話要食雪糕，最尾我哋去咗K11度睇甜品，最後竟然睇中咗呢度嘅軟雪糕。我哋揀咗鴛鴦味扭紋，cream味好濃同埋嗰個雪糕好滑好軟腍腍，甜度適中，唔會話太甜。可能因為我哋食鴛鴦味扭紋，所以朱古力味都唔太濃。特別一提係嗰個雪糕筒，唔係平時啲窩夫皮，係好似有少少糖味嘅脆皮，我都唔知點形容，但係佢有好處就係，唔會好容易好快就淋晒，啱小朋友食，因為佢哋食得好慢。下次經過，想再試純朱古力味。…查看更多