waiwai828's Profile

第二次到訪，如果講返第一次，真係朋友介紹先知有呢條街同呢家餐廳。外觀、裝潢既有情調但又好平易近人，聽聞店主花了不少功夫呢～講返野食，同場朋友都話味道猶如身在外國用餐一樣，絕非港式西餐。自己就唔多識正唔正宗，但絕對可以話好食同埋可以講係用心製作。（以下為食評同相，不過手機影得麻麻）今次試了個帶子，新鮮得黎烹調火侯十分到家，加上醬料惹味，同帶子鮮味好配。至於個牛扒真係正，叫左四成熟，睇相可能覺得過左火，但其實OK。塊扒本身已靚，肥瘦適中，而且控制得好好，彈牙而富肉汁，配埋ｄ伴碟同薯角，唔係要減肥就係想食多幾件。（好大份，兩個人食都可能多，至少食完食唔到好多野）至於海鮮今次就叫左個蜆，咩名唔記得，只記得個湯好鮮，我地食食下將ｄ麵包浸湯食！５個人仲食左一兩樣，但掛住食無乜影相，最後再食埋個甜品，好圓滿！…Read More

之前個星期六放假無野做，阿媽突然話去食lunch buffet，仲話去大角咀食，話買左COUPON就到期，咁無辦法就陪下佢老人家由新界走出去啦。講真地點真係唔多就腳，對我黎講好日都唔到，更唔知有呢間酒店．．．點都好，講返野食啦。我地個LUNCH係SEMI-BUFFET，沙律、甜品、魚生、湯同麵包任食。另每人有一份主菜。．先試個沙律，菜款都唔少，而且亦算新鮮，係配料就少一d，如果有埋提子乾、菠蘿粒之類就好啦．湯方面，一般一般，唔係好好飲，亦唔係難飲．．．無特別．魚生，無咩選擇，得兩三款，滿足下食刺生的慾望，ok．主菜方面，原來想食魚，但阿媽話試下個羊架啦。ok，五成熟，比想像中好，抵讚。阿媽就叫左個咩意粉，佢話唔錯，我就無食了。．至於甜品都算係咁，6款左右，味道就合格啦，總比一般CAFE好值得一提杯即磨咖啡都唔錯，算一個圓滿結束。 …Read More

涼返D開始想打邊爐，諗住去幫襯陸陸，點知早兩三日前訂都話full，但店員話佐敦店有位。真係唔講唔知原來有分店...不過有位就唔理佢分店定總店啦。一行四人落到去，當然黎返個招牌雞煲先啦，之後再叫d海鮮同特色野。味道方面就同旺角無咩大分別，鋪面感覺就無咁迫，而且都叫近地鐵，ok啦。至於食物方面呢，當晚就食左：小辣雞煲：叫了一隻雞份量，同樣惹味足料，不過好似比上次食咸左少少:) 封門柳：牛味十足，出面一般邊爐食肆唔係間間有，食厭肥牛既另類選擇蠔：鮮貼，熟左唔會變蠔c黑白墨魚丸：黑色版加左墨魚汁，那種墨味十分出，正 響鈴：呢個就麻麻了，唔夠乾身同脆:(炸魚皮：呢個同響鈴比，好食得多蔬菜籃：都係咩都有d啦，有姑有幾種菜，又有粟米同蕃茄，而且味道都鮮甜，幾十蚊抵食牛腩：呢個又係搞鬼，入口非常"腍"，而且肉味十足，意料之外地吸引 蜆：中規中矩，無咩特別由於新張關係，全單有折，不過折幾多唔記得了。整體感覺係KEEP到水準，可以再黎。…Read More

灣仔本來都多野食，不過出名或好食的食肆通常都要早早booking，又或者book左都要等一排。由於有朋友去過李公館試其午市，且大讚質素優良，所以早早就訂位試下晚市。題外話唔多講，結合openrice同職員的推介，最終叫左冰鎮咕嚕肉、脆皮牛腩、藕餅、香辣蟹同個蒸蛋。冰鎮咕嚕肉：內軟外脆，外面涼涼地，但咬入去卻又ｋｅｅｐ到肉既溫度，真係好食。可惜份量不多，我地４個人都係每人兩件左右。脆皮牛腩：出面其他食肆都有食過。味道中規中矩，但賣相做得比出面好，至少唔會皮肉分離。藕餅：以為係傳統一塊塊既老土造型，點知係一條條，十分有趣，包埋生菜，食落唔覺滯。香辣蟹：小辣，酸酸甜甜，跟蒜蓉包十分開胃。隻蟹斤兩亦不錯。蒸蛋：睇落普通家常菜，但火喉做得非常好，送飯一流。由於人數唔多，只係試左幾款，但以價錢環境來說，可以話物有所值。可惜開瓶費有點貴（間店自己亦有紅白酒order）。…Read More

幾個麻甩放工搵野食，大排檔自然首選。身處銅鑼灣，鵝頸街市鵝頸熟食中心自然係不二之選。榮記都幫襯過幾次，伙計勤快，服務算唔錯啦，最緊要Ｄ野食得，價錢合理。今晚叫左個豬仔脾，黑椒夠香，好惹味。凍凍地就叫個雞煲，雞足料呀，湯底正。當然幾個大男人，點都要有飯落肚，蟹蒸飯夠香，Ｄ飯都有蟹香，不過隻蟹就無咩肉啦另外叫左聖子王，大大條，夠彈口至於飲酒吹水又點可以無小炒王同椒鹽鮮魷？鮮魷彈牙，小炒王夠乾身，且料多，好正，呢碟真係次次去必叫不過因為街市較小，人又多，嘈就嘈Ｄ，不過好食夠開心，無所謂啦…Read More

一班人食飯，做好莫過於打邊爐，今次有人推介去名門，咁就一於試下啦。因有訂位，所以唔使等位，入到去得我地一張台。睇下有咩食，鍋底都算多選擇，我地就叫左個清酒蟹鍋試試正唔正。材料都係大路野，不過上台時的確喜出望外。叫左牛肉船:)、星斑片、響鈴、手打四寶丸、蝦滑、鵝腸、珊瑚蚌、粟米、桶蠔、烏冬，仲有Ｄ餃同菜之類。先講湯底，比想像中清，但都鮮甜，香味夠（7/10分）再講材料，總體理想(8/10分)，最正係海鮮，其次D蔬菜都好新鮮，無想過菜都咁好。至於牛肉方面，就不過不失，唔太特別。不過烏冬好得。價錢以邊爐計係中上，所以Ｄ野好食係合理。由於當晚無咩客，所以服務都相當周到，要再擇日試下先再評價到。…Read More

早兩日放工陪朋友去完旺電買野，7點幾正心大心細唔知去邊食飯時，行到泉章居附近見有間新火鍋開張。見佢布置得幾靚又有位，就抱住一試的心態睇睇。睇下Menu原來主打食麻辣雞煲，但D夥計話胡椒豬肚都正，可惜小弟唔食豬肚，所以就試試個雞煲啦。4個人叫左個大雞煲，一上枱時又真係好香喎。配合埋D香料，聞落的確十分惹味。而且份量都十分足，大雞煲足感覺真係足一隻雞，賣相值得一讚。不過如果多D蒜呀、配料就更正，o岩晒我呢D愛好重口味o既人。至於實際味道方面，因為同行朋友有人唔食得好辣，所以我地叫店員盡量減辣，不過食落又唔太差喎，當然我自己就覺得辣D滋味D，但而家既有麻辣香，又有少少甜味，個醬汁做得唔錯。而且食完後唔會好口喝，連唔食得辣的朋友都話得。食到咁上下，店員就幫手加湯打邊爐。由於本身人唔多，我地只叫左D六寶丸、芝心丸、牛同響鈴。不過佢D六寶丸打得幾好，個店員話係自家手打的，食落又的確幾彈牙！至於牛方面都幾新鮮，而其中有味封門柳幾特別，牛味重D，又唔算「蘇」，好似話係牛的橫隔膜位置。唔識，但食落唔錯。食食下，怕辣的朋友話好似愈食愈辣，特別係D菜，可能係D料浸湯後D味更突出吧，但我地就覺得更正，更似麻辣邊爐。食完晒個店員仲送上雪米糍做甜品，解解辣，唔錯！值得一提，我地一入去時就有生果送上，有西瓜同橙，等你開胃D，有趣有趣。整體來說，食物質素同環境都唔錯，冷氣都十分足，食辣都唔會身水身汗，當然這可能與其未坐滿有關吧。價錢同份量都算合比例，我地幾個男人都食飽晒都係二百有找，同區來說差唔多，最緊要坐得舒服嘛。值得再次幫襯。…Read More

去灣仔行街或做野，真係不愁無野好食，不過每次碰o岩tea time，都自自然然會去返金鳳。講真舖細座位迫呢樣真係改唔到，不過感覺有幾分親切。當然講到野食，必食的自然係菠蘿油 + 凍奶茶啦！新鮮的菠蘿油加塊又厚又滑又凍的牛油，入口即溶且又熱又凍的感覺真係唔識形容！如果平時無食lunch，通常會叫個常餐就算。如果想輕量D，菠蘿油 + 出爐雞批，真係走唔甩。至於蛋撻，我都未好多人買，不過之前試過就唔算好突出，但都可以一試o既。其實近年附近都不斷開左唔少新食肆，不過講到「味道」，始終都係呢類茶餐廳o岩合味D。…Read More