餐廳位置偏擠迫。雖然提供咗掛鉤，但係掛鉤好細好單薄，應該只可以掛起小手袋，大背囊同大少少嘅袋都只可以放係大髀或者地下，形同虛設。然後餐點部分更係令人嚇親，令到我忍唔住想寫少少評論話俾大家知道真實嘅情況同感受。極尚厚切牛舌定食上菜嘅時候係令人嚇親。只有薄薄嘅六片牛舌(利申翻嗰張相係已經食咗一嚿)，並唔係好似佢宣傳或者係點餐嘅圖片咁樣有一堆好厚嘅牛舌。咁諗住試吓個味道係如何，講到係好稀有嘅部位又收到差唔多$160可能係好驚為天人。結果味道一般，要靠醬汁去調味。然後套餐上面嘅飯係有配上一塊細漢堡扒，嗰塊漢堡扒好鹹同埋好乾，唔怪之得要配飯食。另外個兜咖喱係凍嘅，裏面有幾舊細細嘅牛舌，但係除咗咖喱味之外，一啲牛味都冇。牛舌漢堡扒定食呢份就感覺好啲，雖然有個好乾嘅漢堡扒配飯。牛舌漢堡扒係好食嘅，表面係偏乾同埋小小燶，但係裏面係多汁同埋食到牛舌。價錢亦都相對上合理少少。餐廳而家只係試業階段，唔知未來會唔會有進步，但暫時係我食過比較失望嘅餐廳。…Read More
