咀嚼要慢's Profile

一直有光顧開青衣華記車仔麵,得知它在葵芳開咗分店,專誠搭幾個站地鐵過去試一試.地點比起青衣老店好找,就在葵涌運動場對面.假若時光倒留十年,回到我日日到街場打籃球的日子,一個禮拜應該會幫襯華記三次.小店裝修就是典型的茶餐廳格局,木卡位跟涼浸浸冷氣.勿小看這兩樣設備,對於坐慣露天座位的青衣華記的fans來說,冷氣卡位絕對是一個夢.食物種類比老店多,除了車仔麵之外,也兼賣碟頭飯.不過幫襯華記,當然是為了它的咖喱車仔麵而來.見到有兩餸下午茶餐,就點了來試試.茶餐包蘿蔔同牛腩兩個餸,由於想一次過試多啲嘢,就額外多加豬扒同魚蛋兩個餸.價錢一點也不便宜,兩餸茶餐本身是27蚊,貴是貴在加餸上面.一塊豬扒索價10蚊,魚蛋一份6蚊,連凍飲加2蚊這餐我一共吃了45蚊.比較奇怪的是,伊麵不用加錢,印象中華記的伊麵是比粗幼麵米粉貴1蚊還2蚊的,反正就是一定要加錢.但麵端上來就馬上明白不用加錢的原因--伊麵完全唔彈牙,質素大幅下降!這種情況在青衣也曾出現過,當時他們轉了另一牌子的伊麵,吃慣吃熟的我一入口就知唔同咗.後來直接向店方反映,才轉回舊牌子,現在新店用的,就是味道不好的那種伊麵.湯底和咖喱汁也有點出事,青衣華記的湯底是入口有少許甘甜,據老闆娘的說法是因為加了魚乾.新店的湯底則木口木面,是隨便在街找一間車仔麵檔都能喝到的貨色.新店用的碗非常之大,湯的份量比舊店多,也該是導致湯被稀釋的原因.建議花多啲本錢喺湯底上,若想控制成本,就每碗俾少啲湯.咖喱汁的問題是唔夠香,只有厚厚的椰汁味,偏偏小弟係唔好椰汁的,所以勁扣分.華記車仔麵的孖寶就是湯底和咖喱汁,搞不好這兩樣就會無哂神髓,希望店方多加留意.車仔餸方面,蘿蔔本身的質素不錯,無渣亦夠清甜,不過炆得稍嫌不夠淋.魚蛋華記不嬲用的來貨都很好,夠彈牙亦有魚味,不過新店啲咖喱汁唔掂,吃起來自然比老店遜色.最能保持水準的係牛腩,牛肉味牛脂味非常濃郁,而且相同價錢下,份量比起老店多.豬扒就不行了,新店用的豬扒非常厚身,但醃得又不夠入味,不夠鹹亦沒有香茅味.而且炸得很油,成塊墊底生菜都係油,吸油功夫沒做好,完全無法跟老店相比.平心而論,華記新店的整體質素是不錯的,只是珠玉在前,老店做得實在太出色.有比較之下才顯得稍為遜色.不過湯底跟咖喱汁的質素一定要改善.明知你有條方喺度,跟住做就得,點解唔做到最好?勿讓華記新店淪為一般車仔麵檔.…Read More

看到雄記麵食在開飯網的評分連3分也不過,感到非常驚訝.因為以開飯網的評分準則,不過3分是非常低的分數.咁我會覺得,雄記係嚴重underrated.實情佢哋啲嘢食唔差的,不過啲態度有時幾趕客,同埋份量偏細.久不久都會幫襯吓,近日發覺老闆同伙記的面口寬容咗,可能係俾人網上話得多.座位是合理的窄,唔至於逼到你想快啲食完快啲走.枱面同地板都很乾淨,醬料樽無話黐𣲷𣲷,感覺不錯.食物方面,小弟當日點了一個酸辣大腸米線,加雄記出名的魚春卷.雄記沒有特別為米線烹調另一種湯底,只係用回粵式麵食的大地魚湯,加酸菜辣椒而成.所以湯頭欠缺層次,只屬一般貨色.不過雄記的酸菜很醒胃,大腸亦鹵得甘香惹味,為米線挽回不少分數.魚春卷很大條,像一件小型牛脷酥,口感較軟,但魚肉味幾濃.先炸後放湯,基本上皮已經不會脆,但這種做法魚春卷索了湯汁,味道不錯.湯頭若能夠再好一點會更佳.來雄記不得不試它的辣椒油,打開蓋看呈綠黃色,有別於坊間紅色的辣椒油.入口非常香也非常辣,有很重的蒜頭香味,風味絕佳,不可不試.有時不想吃米線,也會吃傳統的粵式柱候牛腩麵.麵食沒有鹼水味,牛腩也炆得夠淋,不過,點雙併魚春卷拼牛腩麵時,牛腩份量會減至可憐的兩舊.大隻男同我這類肥仔肯定不會夠飽.…Read More

成日聽到人講,話華星啲嘢好得,炒蛋拍得住澳牛.揾日專登去試咗,試完之後感想係"完全是兩回事"!裝修有格調,座位寬闊,服務有禮,這些全部都比澳牛好.但衝著那句"炒蛋拍得住澳牛"的評價,不得不說,水準仍有差距.華星的炒蛋炒得太熟,不夠牛奶/牛油香,不單止比不上澳牛只怕連大家樂的炒蛋也比華星好吃(大家樂的炒蛋本來就很不錯).多士方面,我對厚多士沒太大好感,因為多士一厚,比例上就會少了牛油.除非下大量牛油,但又會影響身體健康.所以小弟還是喜歡薄多士配牛油,純屬個人喜惡.輪到試湯粉,澳牛的湯粉是出了名難食的,求神拜佛都望華星不要似澳牛.好在華星的湯底下得夠多忌廉湯,味道頗香.意粉跟澳牛一樣很淋,叉燒也跟澳牛一樣很薄.但湯底一好,整碟粉就不會難吃,比澳牛又淡又淋的湯粉優勝.餐飲我點了好立克,沖得都幾香濃.上次在澳牛有超淡杏仁霜的經歷.所以杯嘢飲我認為也是華星較好.不過,澳牛就是澳牛,他們是甚麼也不好,只有炒蛋好,已經足夠做到成行成市.華星是樣樣都不錯,但炒蛋不特別吸引.感覺上它只是一間較有誠意的茶餐廳,較難吸引我回頭再吃.…Read More

大全街的譚仔三哥結業不到三個月,原址位置又換上了另一間米線餐廳,叫做"景霖".本人樂見區內開多啲非連鎖(景霖其實都有四間分店)餐廳免得我去深水埗旺角又係食譚仔,返大角咀又係食譚仔.但前題是,那裡的食物要好食先得,若果新店嘅味道仲衰過連鎖餐廳,則我實在揾唔到理由支持佢.好似旺角中旅社,近日有間幾十年老店結業,馬上興起甚麼集體回憶又剩.大佬,嗰間嘢出嚟名伙計串同埋啲嘢難食,好話唔好聽連大家樂都不如,呢啲集體回憶真係要唔要都罷.講返正題,景霖麻辣米線又如何呢?當日我係喺下午茶時段幫襯,見到佢哋做緊25蚊下午茶套餐,包一餸米線,雞翼同一杯豆漿.成個餐就係照dup隔離街巴蜀,擺到明睇住嚟食.剩係跟風呢樣嘢,已經俾咗我一個不良印象.但對於比較兩家店,反而變得非常方便,因為真係樣樣嘢成個餅印咁,正好逐樣逐樣比併一下.1. 燒雞翼--巴蜀勝景霖的雞翼有一般食店常犯毛病,將雞翼烚到七分熟再燒,結果雞翼入面完全上唔到味.而且雞翼肉質又削,一"lun"就散.至於巴蜀燒雞翼的質素,請睇本人另一篇食評.2. 豬膶米線--巴蜀稍勝基本上米線又應該分幾個小項去評.份量景霖比較大,比較抵食.但湯頭就毫無疑問係巴蜀較好,景霖個湯唔夠甜亦唔夠香.面頭無辣椒無紅油但又食到有辣味,估計應該是用胡椒粉調味.配料方面,景霖比較好,豬膶味比巴蜀濃,選擇亦較多.我認為一碗米線的好壞,湯頭絕對係最重要,所以這回合都係巴蜀勝.3. 豆漿--景霖勝巴蜀杯豆漿真係無乜態度的,貌似豆漿,味淡如水.景霖則起碼叫做有豆味.服務方面就兩間店都好好.座位舒適度亦是差不多.裝修就景霖比較好.雖然味道是巴蜀較好,但我亦會幫襯景霖的.因為巴蜀有另一個缺點,就係無酸辣湯底選擇,景霖就有.…Read More

每逢下午四點,大角咀道近市政大樓一帶就會傳來陣陣出爐麵包香氣.沿著香味尋找,就會見到一間其貌不揚的麵包店--香麥屋.小店在後方自設工場,出爐麵包的味道,絕非一盤一盤交貨到分店的大集團可比.最喜愛它的丹麥條,可以說是我在香港吃過最好的.能夠做到包面鬆脆,包身軟熟.千萬不要看輕這兩點,我實在見得太多走鬆脆路線的丹麥條,其包身是硬如柴皮.相反走軟熟路線的,包面又木口木面.能夠二者兼得的真的不多.這裡的丹麥條麵粉本身夠香,提子乾又下得夠多,甜度適中,絕對值得推薦.同樣值得推薦的還有豬柳漢堡,豬柳是交來的貨色.不過5.5蚊一個豬柳漢堡,能夠給你一整塊豬柳和一片爽脆生菜,算是超值.重點還是麵包本身,又香又甜,面頭的芝麻又下得夠多,配上少許酸甜沙律醬,十分可口.麵包類基本上是全部都好吃,難得的是雪櫃內的芒果班戟也做得很出色.芒果都是揀手貨,又香又甜.微焦的班戟皮充滿蛋香,據師傳的說法是"你去酒店都係俾呢啲你食",十分有自信很多地方的鮮果班戟都會出現忌廉太多大膩的情況.香麥屋則聰明地在班戟皮內包了一小片蛋糕,令到班戟的整體味道更平均.有時家裡開派對,要弄一些三文治之類的小食,也會到香麥屋購買方包.小店很有人情味,願意替你免費飛掉方包邊,比到超市購買8蚊只得6片的所謂三文治包來得化算.咖喱雞批和蛋撻也很好味,不過小店有時會裝假狗,明明放在保温爐內.賣餅阿姐也煞有介事的穿著布手套去拿,但即場吃入口竟然是涼的.不過能夠捕捉到其出爐時刻,2.5蚊一個蛋撻,5.5蚊一個雞批,實在是超值.…Read More

第一次去巴蜀風的經歷是不愉快的,記得當日係午市時段,巴蜀風座無虛席.好不容易獲安排入座,竟然無人幫我落單,我一共截停了三個伙計,全部都係同我講等一等.雖然態度很有禮貌,但當我等了5分鐘,伙記還是要我等一陣時,我就決定起身走人.心中嘀咕巴蜀風實在太過待慢客人.回家後覺得心有不甘,又怕因一時意氣錯過了好餐廳,於是上OR查一查巴蜀風的資料,見它竟然取得零劣評的佳績,心中又馬上盤算何時再訪巴蜀風.為了避開午市時段的人潮,再次到訪我選擇在下午茶時段.下午茶時段到巴蜀風好似入錯鋪咁,一個客都無,駛唔駛咁大落差先?睇吓餐牌,25蚊一個下午茶餐,包一碗兩餸米線,一杯豆漿.也可以選一碗一餸米線,兩隻烤雞翼,一杯豆漿.再研究其餐牌,平常一客三隻雞翼賣19蚊,而米線加一個餸只係4蚊.咁好明顯就係叫烤雞翼抵過叫兩餸米線好多啦.日後我亦發覺,去巴蜀風食下午茶.10個客人入面,起碼有7個會點烤雞翼.食物質素又如何?烤雞翼十分美味,醃得入味之餘,烤的火候又好.可以肯定唔係汆水到半熟再烤的揾笨貨色,亦唔係午市賣剩攤喺度攤到凍冰冰的貨色.每隻雞翼都熱辣辣香噴噴,絕對對得住它19蚊3隻的正價,下午茶能吃到就更覺超值.由於下午茶不加錢的話只能挑一款餸.為了試真其味道,改天我又試了他們賣41蚊碗的招牌米線,即係乜嘢餸都有嗰隻.得出結論係,豬膶同菜肉雲吞最好味.其中豬膶灼得爽滑,膶味又足,說明他們沒有將食材過份浸發.菜肉雲吞餡料調味很好,而且淥的火候亦佳,雲吞皮一點也不會糊掉.炸醬則偏甜,單以炸醬而論是比不上譚仔三哥.鹹酸菜則跟譚仔沒有分別,或許是用了同一間來貨.另外,若以雜綿米線的抵食程度而論,巴蜀風也是比不上譚仔三哥的.因為後者會將米線份量加大,足夠二人分食,而巴蜀風則只會在原來份量的米線上加餸.但若以其他出品來說,巴蜀風是毫不比譚仔三哥遜色的,湯底甚至可以說是更佳!服務方面,雖然初次幫襯時曾被待慢過,但之後每次幫襯都感覺到他們的服務很好.埋單會同你講多謝,又會主動同你講拜拜,非常親切.講到咁樣,都唔會懷疑我俾乜嘢評分,緊係happy face啦.…Read More

二月份天氣變化不定,整個月都在傷風感冒中渡過,吃的東西也因此比較清淡.有時間的話,會在家中煲一煲老火湯,煮一煲白果粥.沒時間的話,就會幫襯位於花園街市政大樓的妹記.要說妹記的招牌出品,一定非及第粥莫屬.豬雜都是新鮮貨,滾的時間又掌握得好.豬膶灼得爽口,粉腸又香又淋,肉丸自家製彈牙有肉香,豬心則十分脆口.遺憾的是竟然沒有豬腰,可能是功夫太多,所以及第粥不下豬腰,要吃就只好單點豬腰粥了.粥底非常鮮甜,即使病緊味覺不甚靈敏,也吃得出有鯪魚的鮮甜和果皮的清香.偏稀的粥米香十足,每顆米粒都煲得爆開成米花,因此入口很綿滑.不過有一點我很疑惑,為什麼及第粥由落單到上枱只花了不到1分鐘?有些工序應是預先準備好了,不過既沒影響味道,也不用在乎它是否即叫即做.取價偏貴,一碗及第粥+1條油炸鬼(不是一孖)盛惠31蚊,市政大樓鋪租應該不貴吧!賣這個價錢,店主可真是豬籠入水了.不過味道是好得無法挑剔的,值得推薦…Read More

幫襯華記多年,明知佢哋好鍾意拉閘休息,所以已經好保守咁過咁過哂元宵,新十六先去幫襯.點知華記今年又刷新放年假紀錄,新十七先啟市,結果又摸門釘.隔了兩天再去幫襯,見到大公子忍唔住投訴,佢竟然笑騎騎咁話"係呀,今年係放長咗少少"真係無佢符,下次過年後想去都係先打個電話穩陣.露天座位最適合而家呢啲天氣光顧,遲多一兩個月就開始落雨同熱,會幾辛苦.自從兩個仔接手鋪頭之後,食物種類增加了很多,不過每次幫襯還是會點回以前食開那些.魔鬼雞翼,心太軟,鹵震盪豬手全部無食過.雖然無試過,但我對華記的出品非常有信心.原因係佢哋真係會好俾心機整每一樣餸,真係老土啲講句,牛腩有牛味,老闆娘有女人味.照舊點一碗伊麵走蔥,收到order大公子即刻專注淥麵,務求將麵煮到啱啱好.坊間現在好流行日式拉麵,部份麵館會容許客人揀麵的軟硬程度.實情呢種做法在華記已經行咗好耐,若果你點的是撈麵,華記係會將麵煮得較軟身.咁樣客人就唔會食到口罕罕,真係非常細心.牛腩賣10元一份有4-5舊,都幾貴.不過華記用的並唔係碎腩,件件都肥美帶牛香,算是物有所值.牛腩炆得唔係太淋身,同坊間的牛腩專門店群記九記尚有一段距離,但作為車仔麵餸,華記的牛腩係超班水準.豬腸6元一份,一段仔剪成6-7舊,相比之下較抵食.每舊豬腸肥膏都好澎湃,入口超香滑.鹵水味道調教得非常好,偏淡的口味為豬腸起了一個絕妙的襯托作用.蘿蔔唔記得幾蚊一份,但係份量係足足有4大舊,食到我想打包.咁大舊蘿蔔,能夠炆得咁淋咁透,就係功夫所在.而且件件蘿蔔都係揀手,又甜又無渣,好食!配料尚有無影相的咖喱魚蛋,魚蛋係收回來的貨色,不過來貨也有優劣之分,華記就肯定係唔靚唔用.魚蛋本身大大粒,但沒有一般大魚蛋煮得過火導致質感霉軟的弊病,入口非常有彈性.重點是那個咖喱汁,非常香,辣度只是一般,我每次都會額外加一蚊要求加咖喱汁.咁樣碗麵會惹味好多.湯底又係好嘢,飲落去舌頭兩邊會有少少甜味.有次吹開水問老闆娘點解,佢話俾我知因為落咗魚乾.睇吓我食車仔麵食到湯都飲埋就知好嘢,大公子咁鍾意搞綽頭,唔知有無打算好似日本拉麵咁,印句無限感激喺碗底呢?成日都問大公子幾時開分店,佢次次都話無錢開,而家終於決定喺葵芳開返間,即係而家開始有錢嘞.緊係啦,四餸一麵要成31蚊,青衣車仔麵嚟講算貴嘞.不過咁好味,都抵嘅…Read More

老婆要到裕華買景泰藍擺設,買完要揾地方醫肚.問佢想食乜,佢話想食茶餐同炒蛋,真係易養!佐敦區要食炒蛋同茶餐就梗係澳牛啦.老婆仲要話未去過添,咁就更加要見識一吓.雖然老婆話未去過澳牛,但奇怪在佢又會知道嗰度啲伙記好串同埋要排好耐隊.伙記好串就真嘅,排好耐隊就未必嘞.一來佢哋啲伙記會趕客所以返枱速度極快.二來排排吓隊,只要前面無人等緊二人位,伙記就會安排後面插隊入先.我哋當日原本諗住要排15分鐘,結果5分鐘就等到位嘞.一坐低,澳牛伙記就會俾壓力你落單,所以最好喺等位期間諗定要茶餐定快餐,叉燒意定牛肉通.咁就可以減低被伙記串嘅機會.若果好似稍後入嚟嗰幾位國內遊客咁兩頭望,伙記就會用不純正嘅國語催促"快點,快點"格嘞.當日點了兩份茶餐,去澳牛必食其炒蛋,又香又滑.另一樣好味嘅係多士,夠厚夠脆,搽啲牛油食又係一流.老婆平日唔鍾意食多士都食哂成塊.碗湯粉就只係普通水平.首先,伙記落錯單.牛通變咗叉燒通.然後無論通粉定係意粉佢哋都烚到好淋,叉燒份量亦非常少.若果唔係份炒蛋搭救,我會認為係一份不合格嘅茶餐.飲品方面,熱好立克唔錯,熱杏霜就好稀好淡,好像杏仁水一樣.邊吃邊見到對面那兩位剛剛被伙記串完嘅國內遊客搲哂頭唔知點乜好諗住點火腿三文治.出於好意下提醒他們應試一試炒蛋,費事佢哋以為澳牛服務差仲要東西難吃.不過他們似乎很能適應澳牛的服務水平.也對,國內很多餐廳嘅服務水平都係好似澳牛咁樣,澳牛只不過先一步跟內地接軌而已!…Read More

好旺角的麵真的很細碗,細到甚麼程度呢?據我某日在門外等外賣時觀察所得.每碗麵是以淥麵筷子能夾起的一"箸"為標準,每碟就是兩"箸"至於一"箸"麵有否足一個麵餅,就真係講唔埋,因為阿叔每次同時間起碼淥十個八個麵,然後再憑經驗分配.所以咁多人投訴好旺角唔抵食/食唔飽,我係一啲都唔感到意外.據壹周刊報導,好旺角個鋪位月租30萬,有理由相信其經營方針係細細碗好等返枱快啲.加多幾蚊整大碗啲唔乎合其經營策略,客人們也只好接受.雖然貴夾唔飽,但叫嘢食時還是可以叫得聰明啲,好令荷包無咁傷.好旺角最出名係炸醬麵,而佢哋嘅炸醬麵係有一碗(25蚊)和一碟(3x蚊)之分.不過炸醬份量就係一模一樣,即係話那差不多10蚊的差價只係買到多一"箸"麵,十分唔抵所以我從來唔會叫一碟炸醬麵,反而牛腩麵就可以點一碟,因為同樣的差價除咗多啲麵之外,仲會多兩舊牛腩.另外就係唔好點油菜,份量少之餘灼得又唔好味.味道方面,炸醬麵可以講係區內甚至全九龍最佳.麵質彈牙無鹼水味,這點還有其他店鋪可以做到.其炸醬之香甜惹味,才是精髓所在.好旺角用的醬料是本土老牌醬園的出品.除咗炸醬麵的麵豉醬之外,炆牛腩的柱候醬和炆豬手的南乳醬也是一絕.相對來說,要吃雲吞水餃就可以慳返駛幫襯佢,水準只係普普通通而已.粥品又怎樣呢?是日沒有點粥品,不過以往有吃過,水準平平無乜驚喜,及第粥水準亦不及附近的妹記.所謂招牌粥,即係及第加皮蛋加魚片,太過複雜,不值得試.座位擠逼,地板污糟,服務無乜,係好旺角的其他特點.不過偶爾想食好味的炸醬,還是會想起它.…Read More

香港人一向都不大重視中式包點,視之為老餅老點,反而西式麵包蛋糕店就開到成行成市.唐記包點引入電腦打飛,於港鐵站開店,一洗老餅形象,應該可以成功打入年青人市場.路過買了兩個中式包,分別係叉燒包和菜肉包.叉燒包面頭有少少芝麻,由於分量太少,根本食不到芝麻香,我猜那是用來識別叉燒包的標記.包夠大隻,是傳統一籠兩隻那種尺碼.肉餡香甜,蠔油汁較得剛好,味道不輸酒樓茶樓.菜肉包的肉沒有蠔油汁,肉味反而更出,配料椰菜清爽,值得一吃.天氣漸涼,吃一個熱騰騰的中式包點,比起凍冰冰的西式吞拿魚包,更加暖胃.預期唐記包點,會在港鐵站越開越多.…Read More

身處深水埗又想平平地鋸個扒,心目中即刻諗起兩間餐廳.一間係飛鷹,另一間就係愛群,再過啲嘅金鳳已經因為太遠而不列入考慮之列.兩間餐廳位置,一間近太子,一間近長沙灣,我無辦法兩間都去巡吓.呢啲情況,就緊係揾OP幫手啦.一睇之吓,飛鷹食評差到無倫,一於試吓愛群.愛群的格局係老式豉油西餐廳,級數我認為稍稍比金鳳高,因為佢哋有裝電視啲位亦多到唔會有被趕之虞,你幫襯佢,佢會預咗你慢慢食吹吓水咁.服務就真係唔掂,啲老伙計精過鬼.話說當日我見到是日晚餐係澳洲牛扒,然後餐牌入面又有澳洲牛扒.我問佢點解餐牌嗰個貴5蚊,有乜分別.佢答我是日晚餐塊扒大塊啲.咁又大塊啲又平5蚊,就緊係是日晚餐啦.出到嚟先知是日晚餐係碟上而唔係鐵板上,仲要無得揀汁.當堂明白哂點解會平5蚊,更明白剛剛係個伙記反推銷我唔好叫鐵板餐.食物方面以豉油西餐來說都係差,澳洲牛柳面層又乾又鞋,好似炸過咁.伴碟蔬菜白烚,仲要水流流.汁料無得揀黑椒汁,得蒜蓉汁唔夠惹味.餐湯都係唔掂,啲芹菜洋蔥都未烚淋,咁唔駛問緊係開完啲味精湯再加返雜菜作配料啦.同行朋友點了一個鐵板黑椒雜扒餐,奇怪在點白飯要另加5蚊.後來先知係薯菜以外再加一碟白飯,即係一句講哂無得免費轉吃白飯或意粉.埋單連加一兩個人要170蚊,早知唔好咁懶,去返金鳳算.…Read More

因乜解究新興棧啲粥貴咗咁多,上年年尾都仲係廿零蚊碗粥,今年升到去35蚊搭多條油炸鬼成五草嘢咁濟,夠我去太興食燒味飯.魚卜粥沒有了,不過都無所謂,魚卜放粥不嬲都唔係太好食,啲卜唔點胡椒粉豉油更加有啲難入口添.新興棧最正幾時都係佢哋啲魚骹.點了一碗魚骹牛肉粥.碗粥嚟到啲骹照舊大舊到撐哂出碗外,選魚骹係貪佢郁動多,啲魚肉又滑又結實.無魚腩咁腥同埋有泥味,亦無乜細骨.嫌齋食魚粥單調,所以併了牛肉,新興棧的牛肉醃得剛剛好,又嫩又有肉味,一流!最重要嗰粥底永遠稀杰適中(其實算偏稀),米花爆開,綿滑又有米香.調味較得亦好,味精一定有,呢點唔駛詏,成大支味精水楝係灶頭.唔想食味精可以試吓叫佢唔落,我就無試過嘞.其實唔怕骨的話新興棧個魚雲粥又係好正,魚味係超級特濃.唔信的話大可以點一碗魚雲粥,一碗魚腩粥,每碗試一啖就即刻知個分別係邊.順便推介埋粉腸,我唔併牛肉的時候多數都係併粉腸,又淋又粉,點少少豉油食又係超正.新興棧,永遠係我九龍食粥嘅首選…Read More

細細個就幫襯榮記小食,很懷念讀中學時一班同學,放學後嚟呢度每人外賣一碗麵.然後上其中一個同學屋企鋤dee,嗰時好羡慕同學住得咁近榮記,可以日日食麵.畢業後就好少再嚟,直到近日搬去奧運住,先有機會再幫襯.而家嘅老闆阿MING,原來係阿叔阿嬸個仔嗎?我也是看食友的文章才知道.不過想當年係睇住明哥學煮麵,嗰時好唔鍾意佢加菜喺公仔麵入面,搞到啲湯一浸菜青味所以直到現在我都會走菜的,阿MING睇到又可能估到我係邊個了.榮記的東西其實一點也不貴,係衰在無餐,確實它又不應該做餐.人手已經不足了,做埋餐多咗人叫嘢飲,一定踢哂腳.最經濟實惠係叫餐蛋麵,腸蛋麵嗰啲,11蚊一碗真係自己煮都差唔多呢個價.單拼餐肉麵更加係10蚊唔駛,問你死未?我就鐵膽牛肉拼蛋或餐肉,都係15蚊碗.榮記的牛肉味道唔錯的,永無話醃到無哂牛味.係衰在之前未加價阿MING唔捨得落牛肉,幾乎食到我貧血,而加加咗價先有返啲份量.原本有隻好好味嘅豬肉腸,又係俾佢CUT鬼咗.大家一齊幫吓手,多啲問佢豬肉腸返咗貨未,用群眾壓力逼佢賣返.很多食友欣賞的牛腩我是很少叫的,始終覺得柱候醬跟公仔麵唔係好夾,真要點就配米粉或米線吧.餐飲方面,由於無餐的關係我好少飲嘢.不過要點的話任何飲品都好飲的.茶類就唔駛多講,榮記茶膽靚,檸茶奶茶都好掂.就算係沖杯好立克阿華田,榮記捨得落粉落奶所以亦一定香濃.是日光顧紅腸牛肉麵一碗,埋單15蚊.…Read More

幫襯了十多年的佳佳麵食早前被膶腸食神吹捧上天,隨後而來就係一大堆"趁機加價""水準下降"的劣評.說句公道話,這兩年邊家食肆唔加價?接受電視台訪問故然不應成為加價原因,可也不應成為不能加價的原因啊!又有關水準下降,佳佳的食物從來都係唔穩定的.同樣係豬腸,佢啱啱鹵同鹵咗成日味道都會唔同有時又會少少黐底燶燶地都照俾你.與其話佢水準下降,不如話大家而家對佢要求高咗.膶腸食神浮誇嘅表達手法更加令食客對佳佳有不合理期望,一間又話豬腸肥膏滿瀉,一間又話辣汁味道直衝"雲精"佳佳啲豬腸本來就唔係特別肥美,有時仲偏瘦偏罕.想食肥豬腸應該去花園街明記.服務方面佳佳以車仔麵店嚟計直頭係好,人多做唔切就無計.人少時阿姐係會叫你揾位坐先,佢轉頭拎碗麵俾你.是日光顧佳佳,烏冬配牛膀,餐肉,牛筋加辣汁.牛膀粉糯無雪味,牛筋炆得淋滑,餐肉炸香用來索湯別有一番風味.加埋辣汁就係惹味飽肚嘅一餐,埋單HKD24.專程去佳佳就不必嘞,經過形品星寓嗰頭又想食車仔麵嘅就不妨一試.…Read More