iamjoan's Profile

今日我朋友去尖咀呢間半熟工房買左五個呢隻"布雪", 請左一個芝士味我試下~ 初頭我以為成舊都係芝士味黎既, 食落先知原來面同底係兩塊甜甜地既蛋糕黎 (上面白白地色果D我估係糖粉?)~兩塊蛋糕雖然係冇芝士味, 但就食到濃濃既雞蛋香, 同埋質地比一般蛋糕軟熟好多! 咬入口既口感好鬆軟而且唔會乾爭爭~ 而中間夾住既忌廉餡先係芝士味~D芝士味幾濃郁, 食到芝士既鹹香, D忌廉質地好幼滑, 口感同味道兩方面都唔錯呀!…Read More

早幾日有日早餐食左呢隻綠茶蛋糕, 個名好靚叫做"芙蓉蛋糕", 見佢獨立包裝好方便就買黎試下. $8一個, $15.5 有兩個, 價錢正常~ 開頭打開左包裝, 未食之前好似剩係聞到陣蛋味, 仲以為買錯野, 點知一咬開就食到綠茶味了, 食多兩三啖仲有D綠茶既回甘,  有蛋香又有綠茶甘香, 味道唔錯呀! 另外, 蛋糕口感亦都軟綿幼滑~ 同埋因為我每朝都會特別口乾, 所以晨早流流就最怕要食D乾爭爭既野, 不過呢隻蛋糕既質地食落口帶D濕潤,  就算冇水"送"都好容易食! 我見到仲有幾隻口味~之後都可以keep住買呢隻蛋糕做早餐~…Read More

上個禮拜去cwb果頭, 之前一晚搵定cwb果頭有咩好食, 上網見到呢間好似評語唔錯, 雖然位置唔就腳, 但都專誠行過黎試下. 當日開住google map一路行一路搵, 由地鐵站行去大約15分鐘終於都到了. 門面都幾靚, 一行到入去就即刻要你睇下食乜...點單付款才安排入座, 感覺有點急趕, 好彩佢都唔太多款式,  我叫左個套餐 $79紅燒牛肉粉 (小辣)+蒜泥白肉小食+汽水, 價錢唔係平, 諗住都會幾好食, 點知就真係幾失望.安排入座之後, 三分鐘內成個套餐已經到齊, 碗紅燒牛肉粉都煮得好快下,其實都感覺到碗粉幾求其...湯底味道原來冇乜特別, 佢叫自己做"十二味" 我開頭以為個湯底會有好多種味道同層次..但最特別之處其實就係入面有啲酸椰菜而已. 啲粉其實即係類似米線既麵, 比正常米線粗身dd, 但質地太稔唔夠彈牙, 所以似係煮到發漲左既米線...好彩d牛肉都軟稔, 有成6,7粒, 牛肉係入味又幾好味既! 而小食蒜泥白肉亦都冇特別但唔難食, 上面舖住6,7塊白肉, 下面用好多青瓜絲蘿蔔絲墊底, 睇落好似好多, 其實係錯覺.  整體味道唔係好差, 但價錢貴, 性價比偏低, 應該不會再來了.…Read More

今日第一次黎幫襯呢間餐廳, 兩點半去到所以揀tea set, 上到去發覺比想像中細間, 同埋入到去感覺幾焗促, 而且可能係店內設計既問題, 裡面很困聲, 餐廳播住幾大聲既歌再加埋食客既聲音, 加埋一齊變得好嘈 (直情嘈到叫人落單..叫左好耐都冇人聽到)...老實講環境唔算舒適.食物黎講, 價錢係幾相宜~我叫左碟煙肉卡邦尼意粉$35但係唔包飲品~如果即時在facebook打卡和讚好show比店員睇就有飲品送~ 而飲品係可以在飲品menu上揀任何一款都得~我就要了杯原價要$42既香草杏仁咖啡!感覺好抵呀~煙肉卡邦尼意粉, 隻碟就好大但意粉得少少, 入面加左d黑椒, 菇, 煙肉去煮~ 味道都算ok但就有少少乾, 同埋意粉質地有少少硬, 份量亦都真係太少, 食完都好似冇乜食過咁...飲品反而唔錯, 不太甜幾好飲, 仲要幾大杯, 又比埋一杯糖漿比你自由添加甜度, 就算飲飲下d冰溶左溝淡都可以加返d甜味. 最後埋單唔洗加一$35, 算係幾抵食既.…Read More

呢期大家樂下午茶又推出了我鍾意吃的火腿芝士碎蛋厚吐司喇, 所以上星期日又去吃~ 呢份厚吐司真係幾好味道, 吐司烤焗得脆脆地好香口 (可惜有D位置明顯焗過火所以焦黑了), 芝士味幾香, 仲有啲雙色椒令到件吐司食落口更加香, 碎蛋份量也不算少, 材料好豐富. 佢除左有火腿呢樣配料, 我見佢有時又會轉做西班牙腸或者腸仔, 之前食過西班牙腸既版本好似仲好食! 個餐跟埋咖喱角和火腿米, 咖哩角都熱熱地, 香脆但太油膩. 而碗米粉不是淡貿貿, 比想像中好, 有大量火腿絲, 成個餐$31夠飽肚!…Read More

之前有朋友送我一張$50 coupon, 所以上月尾來這間habitu caffe試下. 第一次到這間連鎖cafe, 環境唔錯, 店員服務都幾好. 我叫左個tea set "煙三文魚忌廉芝士三文治", 落完單之後望一望英文名才知道原來三文治就是Bagel. 咖啡有好多款...我對咖啡冇乜研究, 所以就求其叫左杯熱latte. 這裡都是自助形式, 落完單比錢後, 就先等取咖啡, 之後再拿餐具搵個位坐下等取食物. 約兩分鐘左右, 咖啡就有得取了, 賣相都幾靚, 有拉花, 入口香濃又幾滑, 不過始終我平時唔係成日飲咖啡, 所以我都唔知其實佢呢度咖啡係咪特別好飲.. 哈哈. 約十多分鐘後, 手上那個黑色圓形機就又叫又震, 示意可以去取食物了, 這份Bagel幾吸引, 裡面夾住都算幾多塊既煙三文魚, 仲有蕃茄片, 生洋蔥圈同埋生菜, 感覺材料幾豐富! Bagel是烘熱的, 還搽上了些忌廉芝士一起烘, 食落口幾好味, 也不覺得乾. 口感都豐富, 除了有生菜同洋蔥既爽口, 又有Bagel既煙煙韌韌. 不過食既時候同食漢堡包一樣, 就算雙手拎住食都會食得好輪盡. 在這個咁悠閒既環境底下, 食到咁輪盡好似好唔elegant呀! 下次都係食意粉算~…Read More

呢個舖位以前係美味餃子店既, 所以呢間餃子店一開既時候, 我就覺得呢間9成9係山寨店...想抄美味餃子店. 到佢開左一段時間之後....我上星期先第一次試下幫襯, 因為美味餃子店實在次次去到都要排隊...  呢個舖位真係好細, 入面得4,5張枱左右, 我同朋友坐近走廊位置, 阿姐在後面每次行過都撞到我地咁滯, 因為走廊位真係好狹窄...環境真係唔太好. 但味道真係有驚喜! 我地兩個都叫左個雜錦湯餃A餐, 有齊5種餃: 韭菜餃, 粟米香菇餃, 雲耳椰菜餃, 香芹餃, 白菜餃. 叫左10隻 ($41)..每種有2隻. 老實講真係5種餃都好食...韭菜餃, 香芹餃, 粟米香菇餃就濃味D, 而雲耳椰菜餃同埋白菜餃就淡口D, 各有特色, 口感各有豐富. 而最估唔到既係呢間既餃子皮係比美味餃子店薄身既, 餡料好足, 所以我覺得呢間比美味餃子店可能更優勝都未定...不過我下次都會試埋其他口味既餃子和煎餃子再定奪啦.而呢間既湯底同美味餃子店係唔同既, 呢間既花膠淮山豬骨湯我覺得仲岩我口味. 入面仲見到D湯料例如淮山,紅蘿蔔,薏米. 飲落個湯真係老火湯, 幾足料, 差不多飲曬成碗都冇乜口渴. 另外每碗餃仲配一碟菜甫, 有少少辣, 用來送餃都唔錯.…Read More