CrystalLee226's Profile

嚟緊同朋友喺屋企嚟個韓燒派對，佢哋就介紹咗我去銅鑼灣買啲韓牛，舖頭就喺橋底行幾步就到，非常方便，原來佢哋除咗有韓式燒肉賣之外，仲有好多種韓國熟食。最令我驚喜嘅係佢哋嘅炸醬麵，好多出邊嘅炸醬麵淨係汁，但係佢哋嘅炸醬麵好多料，有薯仔、蘿蔔、牛肉，而且同我喺韓國食嘅味道差唔多。另外仲叫咗拌飯、海鮮煎餅同埋炸雞，份量都唔少，而且好好食，比起喺韓國餐廳嘅價錢仲要平，佢哋仲有啲set，有主食同小菜，作為一個人嘅晚餐都唔錯。無論係燒肉定係韓國熟食或者係小菜，佢哋嘅款式都好多，而且只係Times Square行過對面少少，好方便…Read More

熟食中心係最多街坊嘅地方，一個住柴灣嘅朋友就特登帶咗我嚟漁灣街市熟食中心打邊爐，佢哋係任食模式，我哋揀咗金湯雞煲，首先會送一大碟雞，好似食緊花膠雞咁。之後就可以出去攞嘢食，嘢食嘅種類都唔少，仲有佢哋自家製嘅餃子同丸等等，除咗打邊爐嘅嘢食，佢哋仲會定時出一啲熟食，最令我驚喜嘅竟然有炒蝦同炒蟹，而且用料好新鮮好彈牙。另外最值得一讚嘅就係佢哋環境好乾淨，而且服務質素好好，好有親切感，會同你傾吓偈，又唔會趕你走。…Read More

今日同屋企人去荃灣街市買餸嘅時候就見到對面有間新開嘅生煎包，勁多人排隊，一定要試下。叫左佢哋嘅招牌生煎包，同埋排骨蔥油麵，生煎包皮薄多汁，至少有成兩匙羹嘅湯汁，加埋辣椒醬非常好食。蔥油麵一上枱就勁香，食落去調味啱啱好，睇落去好深色但係唔咸，食完個口都勁香蔥油味。本來想試埋豆沙鍋餅，但係佢哋嘅份量都唔細，唯有等下次先試。雖然舖頭細細，但係嘢食嘅種類都唔少，而且佢哋侍應做嘢好快手好有禮貌，所以都唔駛等好耐，食完先發現原來周潤發都嚟過。…Read More

平時食印度菜，多數都係得咖哩。今日去大角嘴做野，比我發現竟然新開左一間超多品種嘅印度菜。佢哋嘅菜式都係平民價，叫左個雙拼嘅pizza，都只係一百左右，可以一次過試到羊肉同辣肉腸，好欣賞佢哋嘅外賣pizza盒入面有得保溫，番到屋企個啲芝士仲可以拉絲，再配埋手工餅底，真係好香脆。另外仲叫左炸雞米花同牛肉咖哩，牛肉咖哩比較辣，如果鐘意食辣嘅人就岩晒佢哋仲有啲特色嘅印度甜品，可惜今次叫左太多野食，唯有下次再食。…Read More

之前黎佐敦都食過幾次，佢哋有好多種牛唔同嘅部位可以單點，好特別。今次就特登同個friend等到9點後試下佢哋個198放題，多種唔同嘅湯底，我哋揀咗鹹菜胡椒豬肚同秘製沙嗲，湯底好多豬肚好足料，而沙嗲好香好濃，用嚟淥牛肉勁好食。每人都會送一份海鮮拼盤，隻鮑魚勁新鮮，上到枱都仲郁緊。平時出邊嘅放題都係得普通肥牛，但係佢哋就有封門柳，食落去勁重牛油味，油花好均勻。另外佢哋嘅水魷都好好食，一定要落沙嗲湯底，我哋足足食咗兩轉。…Read More

去完旅行一落機，就直奔青衣城食酸菜魚，因為佢哋嘅酸菜魚令我念念不忘。仲要適逢佢哋片皮鴨晚上做緊半價，一定要叫返半隻黎，雖然價錢優惠左，但係份量同埋味道都冇變過，仲要送埋椒鹽鴨架，真係好抵食。我好鍾意佢哋嘅酸菜魚可以叫雙拼，就算人少少都可以食到唔同嘅嘢，今次我就叫咗酸菜魚拼避風塘大蝦，魚肉依然係咁嫩滑，而且配埋酸爽嘅酸菜，每次我都要食返幾碗飯，而佢哋嘅避風塘大蝦炸到好脆，基本上連殼都可以食埋。佢哋仲有好多唔同嘅套餐同優惠，就算兩個人去食都可以食到好多菜式。…Read More

一位住喺大角咀嘅親戚，特登帶我嚟呢間，可以用平民價食到嘅越南美食。我哋叫咗必叫嘅馬來奶油蝦，非常有驚喜，蝦肉新鮮彈牙，而且配上奶油汁，加埋越式香料，每隻蝦都炸到好脆而且掛滿醬汁，價錢優惠份量又多，好食到我忍唔住連下面嘅粉絲都食曬，而且一定要加佢哋嘅蒜蓉包或者薄餅，咁就一定汁都唔會浪費，呢個菜式真係進店必食。另外仲叫咗佢哋嘅豉椒蟶子，新鮮程度滿分，而且唔會好似出邊咁，殼多過肉，而係好似食極都食唔完咁，可以喺邊度搵到咁平價嘅美食。…Read More

每次夜晚經過寶勒巷都超多人等位，今日決定同朋友下午過嚟食，終於明白點解尖沙咀咁多韓國餐廳，佢地都依然咁多人排隊佢哋嘅正宗韓國人主理嘅餐廳，口味非常正宗，我見佢哋有牛腸鍋，香港都唔係好多地方有，不過朋友就唔係特別鍾意食，所以就無叫到。我哋叫左烤八爪魚五花肉，一個鍋上，一邊煮一邊食，冬天食真係好正，熱辣辣。個份量係超級足，兩個人完全食唔晒。另外仲叫左牛肋骨鍋同海鮮煎餅，牛肉好淋好入味，啖啖肉，而個海鮮煎餅好香脆又多料，真心唔錯。…Read More

收藏左好耐嘅一間餐廳，今日終於有時間同朋友去試下，一間細細間嘅日式餐廳，坐位唔多，但好有日式感覺。一定要叫佢哋嘅日式烤蛋糕，超大一個，2-3個人食都夠，今次揀左焙茶醬，個醬唔會好甜，唔鐘意食甜野嘅都會接受到，仲配左焦糖香蕉同日式丸子🍡。另外佢哋嘅大板燒都好吸引，入面係滿滿嘅料，落嘅海鮮絕對唔手軟。如果一個人黎嘅話，仲可以叫個虎蝦咖哩烏冬，大大隻蝦配上香濃嘅咖哩。佢哋依家仲有好多優惠，一定要搵日再嚟食。…Read More

2派克終於開到黎旺角啦，我可以隨時都食到台灣雞排💕一定要食佢哋嘅脆皮無骨雞排🍗，我真係未見過咁厚肉嘅雞排，啖啖肉，就算佢哋咁大塊，食落去都超級juicy，每啖都爆汁，仲有8款調味粉可以揀，個人應為芝士同海苔真係世一。另外仲叫左小扇茄子🍆同雞皮，食落去唔會成口油，仲超級香脆，每款炸物都可以揀一款調味，咁就可以試晒唔同味。我好欣賞佢哋每樣野都係即叫即整，而且要等，但係保持到個品質，難怪平日都要排隊。…Read More

佢哋係將軍澳廣場，主打各款台式湯底，各款都好滋補養生，今次我同朋友揀左麻油雞同藥膳雞湯，佢哋麻油湯底同我係台灣食嘅差唔多，會甜少少。我哋303嘅套餐就包左兩款牛同豬任食，仲有各款嘅台灣丸類，新鮮蔬菜，飲品同雪糕。牛頸脊嘅肉味就濃啲，而牛肩胛就會嫩啲，牛油味香啲。我最鍾意嘅反而係佢哋嘅丸類，因為大部分都係台灣嘅，所以可以食到好多平時出面打邊爐嘅丸類，例如: 魷魚羹、墨魚羹、甜不辣等等，好特別好好食。飲品都有好多台灣嘅牌子。…Read More

想食泰國菜，第一時間一定係去九龍城，依間係我一直係九龍城食開嘅泰國餐廳。我最鍾意食佢哋嘅烤魚，烤出嚟嘅魚肉真係好嫩滑同juicy，魚肚入面有香茅同其他香料，令到魚肉有一陣陣嘅香果，而且好大條，好抵食。另外佢哋嘅小食拼盤相對款式比較多，除咗有必食嘅炸蝦餅同炸魚餅，仲有蝦春卷、芋頭春卷同香葉炸雞，份量好足，兩個人都食唔晒。仲叫左個炒椰菜仔同串燒，都係泰菜必食嘅菜式。其他野食都係好正宗嘅泰國菜，性價比高，款式又多，佢哋嘅員工都會同你介紹有咩好食。…Read More

酸菜魚近幾年喺香港開到周圍都係，但係全部都係大大份，冇兩三個人都食唔晒。今日終於比我識到一間可以一個人食嘅高品質酸菜魚，佢哋有好多唔同種類嘅菜式，都係一人份量，一個套餐會跟飯，亦都可以轉薯粉，另外仲會送嘢飲，我今日就叫咗酸菜魚拼肥牛，佢哋嘅魚片好滑，而且餸嘅份量亦都唔少，除咗魚片同埋肥牛之外，仲會有芽菜、木耳、豆卜、娃娃菜等等嘅配菜，所以都幾大份。而且佢哋亦都有好多小食，佢哋嘅鳳爪酸酸辣辣非常開胃。…Read More

夜麻麻就最容易肚餓，就即興約咗朋友去到大角咀食宵夜，佢哋只係開夜晚，仲開到凌晨五點。有個種特色嘅小炒，仲有特別嘅海鮮粥，可以自己配搭，我哋今日就揀咗食雞煲，佢哋嘅雞煲好入味，一啲都唔輸比出邊，而且食落去啲雞肉好滑。令我最有驚喜嘅係佢哋嘅燉湯，一份嘅燉湯兩個人都夠飲，飲落去好清甜，仲有大大嚿嘅螺肉係入面。另外仲叫咗乾鍋肥腸同埋大盤花菜，佢哋嘢食嘅份量非常足，兩個人叫兩三個小菜，加個炒飯或者粥，都已經好夠食。…Read More

朋友知道我鍾意食羊，特別帶咗我黎一間食羊肉嘅火鍋店。一入到去已經見到佢哋好旺，接近坐滿晒人，佢哋可以選擇羊腩煲，又或者羊骨湯打邊爐，我哋就揀咗後者，仲叫咗佢哋招牌嘅羊肉，羊肚同埋羊腩，佢哋嘅羊肉係用新鮮羊肉，唔係急凍羊肉片，只係簡簡單單用咗油同小小嘅生粉去醃製，食落去非常之嫩滑，而且臊味亦都唔算好勁，所以就算唔鍾意食羊嘅都可以接受到，羊肚好爽脆而羊腩係事先煮熟過嘅，所以非常之淋，一邊打邊爐仲可以一邊飲羊肉湯，入邊有小小嘅中藥材，非常滋補養顏。…Read More