tat999's Profile

住屯門既朋友話市中心有間食牛火鍋既舖頭好多台灣特色打咭位, 而且味道唔錯, 就趁住星期日一家人去黃金海岸行完, 一於book 位試下。五個大人可以有兩個鍋, 而且每個鍋仲可以鴛鴦, 咁當然揀4款味啦, 老婆就揀左臭臭鍋同麻辣, 我呢D唔食辣既就花雕醉雞同椰子雪耳。由於疫情, 都冇乜機會出街食飯, 一於就試最貴既饌和牛餐豪一豪佢。我媽媽就蝕底啦, 一入黎見到出面咁多小食, 牛未到就出去攞勁多入黎, 有牛筋, 牛肚, 雲耳, 海蜇等等.... 令我意外的是, 小食好好食wo, 我個人最鐘意就係牛筋同海蜇, 真係好好食, 浪費左我食牛既quota, 過左幾分鐘, 主食來了, 一黎就係兩款牛: 饌‧和牛同埋月見封門柳, 饌‧和牛雪花都幾平均, 而且食落有牛味而且唔靭, 唔錯, 而月見封門柳既牛味會再更出, 食落更有口感, 另有多款不同部位的牛, 有嫩肩里肌肉, 牛爽腩, 牛扑肉, 除了饌‧和牛, 個人覺得其次最好就係牛扑肉, 都係入口唔靭而且牛味豐富。除了牛, 美國黑毛豬都係好食, 另有其他海鮮料例如大蝦, 沙白, 白鱔片, 脆肉鯇等等, 樣樣都好新鮮呀。特別一提, 就係個臭臭湯底, 入面D 豆腐真係好臭豆腐, 鐘意食臭豆腐既朋友千其唔好錯過, 出面唔係咁多地方食到。仲有多款台灣小食例如蚵仔煎都相當唔錯, 好有台灣風味。出面飲品櫃有多款茶類好好飲, 白桃烏龍同茉莉烏龍都同火鍋好夾。最後食埋個九份仙草芋圓同十分愛玉芋圓就滿足晒啦。…Read More

大雄海南雞，大大話話都幫襯左幾年，平均一星期都都食一兩次，但每次都係食海南雞飯，因為自己都係獨孤一味既人，今次就試下跳出自己個comfort zone，試芭堤雅燒雞飯。雞飯黎到，d雞熱辣辣，香噴噴，雖然唔係配海南雞既油飯，只配白飯，但賣相都相當吸引。燒雞入口皮脆肉滑，再加上特製醬汁，只配白飯就岩岩好，如配油飯反而會太heavy，食落真係有一種在泰國街頭飯店既風味。問一下老闆點解海南雞飯同芭堤雅燒雞飯都甘掂，原來老闆真係泰國華僑，難怪佢d雞做得如此出色，連埋飲品都係五十幾蚊，在觀塘區食個午餐有如此質素，都真係物超所值，以後黎大雄我又多個選擇唔洗獨孤一味。…Read More

同老婆心思思想食日式放題，在觀塘真係幾傷腦筋。因為住觀塘甘多年，都好似冇間似樣既放題，無意中留意到亞太中心有間嘢幾吸引，膽粗粗試下。一入到去，寬敞既大堂裝修不錯，汽水櫃，甜品枱，熟食枱，五花八門，看到都食指大動。方便既落單方法，用手機掃一掃張單既QR code,就能快捷準確地落單，當然立即試下我最愛既刺身先，食品點單後好快到，唔似有d放題又漏單，又等得耐。刺身款式多，而且新鮮，應該是人流充足關係，貨如輪轉，個人推介是甜蝦，帶子同三文魚，真係百吃不厭。之後再吃迷你海膽手卷，份量不太大，岩晒怕快飽既人，點完可以再點，而且海膽新鮮又甜美。炸物方面，炸生蠔同炸香芋球係必試推介，香口味道適中。另外一個重點推介，就係燒羊架，真係出色，忍唔到口食左三件。炆花膠都係另一個出色既中式食品，可以食得出不是敷衍之作，花膠大塊，有骨膠感，而且湯味濃。食到呢度，我個肚都快要爆，但見到甘多款甜品，點捨得收口，各種糕點甜品，不算太甜，岩晒我口味，再食埋雪糕，真係多吃壞肚皮。埋單每人都係二百鬆d,絕對出色超值。…Read More

現在食日本拉麵，價錢貴而且品質參差，又難搵位，剛巧同老婆經開觀塘牛頭角果邊，見到有間拉麵店幾乎坐滿而且環境幾企理，就入去試下。我點左個日本海鮮拉麵豬骨湯底，老婆點了吉野牛肉拉麵地獄湯底，再點左個小食中華沙律。我個海鮮拉麵料足，份量夠，麵質煙韌口感一流，最值得一提就係湯底濃郁鮮甜好味。老婆個牛肉麵，份量同樣十足，勁多牛肉，湯底微辣但有地獄feel，岩晒唔食得辣而又想試地獄既人。而且每碗拉麵有兩大塊脆脆紫菜同流心蛋，真係大件又好食。食完正餐，一見個甜品牌有勁多抹茶甜品，有芭菲有雪糕，由於太飽食唔落芭菲，就食個抹茶雪糕，香濃美味又有生果同脆米通，下次一定要留返個肚試芭菲。埋單都唔洗兩舊水，抵食又好食。…Read More

親戚賀我新居入伙，一行十六人去新都城百匯軒晚飯，原先訂枱十六大一細，有個放飛機，變左十五大一個手抱細路。去到同個部長講，而家少一個，連細路十六人，部長話我book位十八人，係咭度寫十八人，痴線架。同佢確認人數，又唔即時更改，話埋單時會減返，ok,我信你。因為圍餐唔可以做半席，於是點了個十二人全包宴再加小菜，另一經理勁推介我加480蚊轉星斑，我覺得不化算，所以我只加了幾個小菜。小菜份量個人黎講覺得不夠大，不過純粹個人意見，不作詳述。其中點了個蝦仁炒蛋，可惜冇來，來左個貴妃雞，由於人太多，跟本冇留意黎有否來錯，食到一半先發覺落錯單，都冇同佢計較，餐牌冇貴妃雞價錢，於是問部長，佢話$168，ok。圍餐送十二罐啤酒汽水，揀剩既汽水叫侍應換啤酒，嘩，態度差到呢，咀妙妙口嗡嗡，極不友善。好戲在後頭，埋單時，阿姐攞張單黎，一本簿拋落轉盤，嘭一聲，我都火火地，咩態度呀？對一對張單，人數計我十七人，有冇搞錯，我地連埋BB都係十六人，同佢更正，佢竟然夠膽話我訂位十七個，甘開頭個經理講嘢廢架？貴妃雞計我$188，於是又同佢更正，話經理講$168，落錯單我地已經算，個阿姐好串甘話:甘我咪改返俾你囉!戲肉來了，改完單之後，個阿姐成本單簿掉落個轉盤度，十足十老細掉file俾下屬一樣，好大聲嘭一聲嚇到個BB都跳一跳，呢次忍佢唔住啦，第一次拋，我地已經忍，第二次掉，忍無可忍。好彩佢見我地發火佢就驚，道歉，如果唔係，我諗大家準備上網睇片啦。總結，冇下次，如果大家唔介意食到一肚火或者測試自己EQ，推介值得一試。…Read More

同老婆去開觀塘金舖街，見到有間新裝修既小小食店內裡爆滿食客，於是決定試一試。其實一間茶餐廳，差極好極都有個限度，所以我認為取勝之道就係抵食。我點了爵士西冷牛龍蝦汁扒配香草腸餐，老婆點了黑松露磨菇意粉餐。另外散點了油菜，瑞士雞翼。每個餐有羅宋湯，有飲品，似模似樣而且份量十足，一來到已胃口大開。羅宋湯味道不過不失，唯獨係冇乜湯渣，主菜西冷扒配有意粉什菜，還有條份量十足香草腸，淨望落去已絕對超值，味道都好好，尤其是龍蝦汁撈意粉，好味程度真係比一般茶餐廳高，而且條香草腸真係好似德國餐廳既腸，牛扒大塊之餘唔靭又有咬口，總之成個牛扒餐係好滿足，好抵食。至於老婆個黑松露蘑菇意粉，黑松味濃又大碟又多菇，同樣物超所值。而且意粉餐仲有沙律菜送，甘既價錢去邊度搵。小食點左瑞士雞翼，雞翼唔硬，煮得剛剛好，而且瑞士汁適中。我嫌太多肉太膩，所以點了個生菜，十二蚊同樣大碟，使整個晚餐不油不膩。這間餐廳，一句講晒，大件抵食又好味。…Read More

本身諗住同老婆去駿業街熟食市場食雞煲，點知雞煲冇開，變為一間幾有情調既西餐廳。見到幾個含羞答答而又好nice既年輕人誠意邀請，好，一於試下。裝修新淨，舒服，而且見價錢合理，就點了黑松露汁意大利飯配蜆肉帶子、墨汁意大利麵配牛柳粒溫泉蛋，再加個鴨胸生菜沙律，兩支手工啤酒。黑松露飯香口，好有黑松露味，配合帶子蜆肉，味道絕不迅色於貴價西餐廳，而且帶子跟蜆肉一d都唔靭，絕配!墨汁意大利麵加溫泉蛋，蛋漿可以令本身太杰既墨汁變得柔軟，又係好match,牛柳粒有濃濃牛味而唔太老，令我大感意外。估唔到幾個二十出頭既後生仔可以有如此水準。鴨胸再配生菜一同放入口，不油不膩，再加啤酒來食，一流。而且見到幾個年輕人如此虛心問食客意見，直是難得，望佢地再設計多d菜式，越做越好。…Read More

平安夜，老婆話想食西餐，於是就去左瀝源邨的全港最後一間的扒王之王，因之前食過都覺得幾好。一去到，見到客人比平時多，而現場亦好有聖誕氣氛，侍應都好好招呼。一坐下，就派左兩份聖誕節禮物，有聖誕帽，吹bb，真係好窩心。平安夜，冇左平日既餐，只有特定聖誕大餐，於是就點左兩份肉眼五成熟再加多份小食焗田螺。龍蝦湯味濃又唔咸，好好飲。頭盤雜菜沙律配火雞絲，味道較得好match。小食田螺好香，肉質唔硬，配埋薯蓉食真係一流。主菜上場，五成熟牛肉好有牛味，唔難切，煎得恰到好處，最後還有甜品芝士蛋糕。總結就係好食，好坐，過左一個warm既平安夜。希望全港最後呢間扒王之王可以繼續經營下去。…Read More

本人最愛平靚正美食，就算踎大牌檔都冇所謂，去開九龍灣，就同老婆老友三五知幾試下啟業勝利飯店。凍冰冰，就叫個中羊腩試下，份量十足，但記住羊腩要時間炆，因為我太心急，一黎就食，結果唔夠林。到食左個幾鐘，羊腩入味兼夠林，先係食既最佳時候。甘頭一個鐘應該食乜呢？我地就叫肥牛，鯇魚腩，唐篙，鮮冬茹，鮮海蝦，當一般火鍋甘食。原來樣樣配料新鮮，尤其係肥牛，以為38蚊一碟應該係渣嘢，但食落絕對超值，雖比不上手切牛頸脊，但呢個價錢，絕對喜出望外。飲埋啤酒，每人百零蚊，地踎之首選。…Read More

過開德朗邨探朋友，人少少都唔知食乜好，見到這間名叫十勝既和風料理，地方幾舒服衞生，就入去試下。點了五樣東西，有蒜香石鍋牛肉飯，名符其實，蒜蓉夠香，熱辣辣，岩晒而家天氣，而且牛肉味濃。韓風豬頸肉炒拉麵，呢個有d辣，夠惹味，而且份量十足，抵食。再有焗窩蛋肉醬手打烏冬，味道同焗肉醬意粉其實差不多，但配合烏冬既質感真係好新鮮，烏冬吸收肉醬同蛋漿原來係甘好食。小食方面，點了芝麻雞翼同豆腐煮，兩樣都超水準，尤其係豆腐，汁較得同豆腐好match，而且豆腐極滑，埋單每人幾廿蚊，真係超值。…Read More

老婆突然想食海膽，又想食日式火鍋，住係馬鞍山，真係幾頭痛。漫無目的甘係新港城附近行，突然見到有日本料理，就入去試下，點左一個二人火鍋，再加左海膽壽司同三文魚腩壽司。先黎壽司，已經見到d海膽爆晒出黎，食落好新鮮，好飽滿。之後試三文魚腩，好肥好鮮，味道口感一流。之後就食火鍋，牛同豬，新鮮有味道，唔會成陣雪藏味，其他配料有雜菜，菇，豆腐，品質可以，最後食鳥冬，口感煙靭。可能第一次散叫日本料理，平時只吃放題，似乎唔夠飽，但已over budget, 所以唯有下次再試。個人覺得，用料新鮮，比任食的好食。…Read More

在馬鞍山，要食上海嘢冇乜選擇，於是試下上海姥姥。點了小籠包，紅油抄手，酸辣湯拉麵，奶油津白，上海粗炒。第一味就食小籠包，水準極高，皮薄，多湯汁，食時要好小心，我咀都被熱湯6到了。第二味來紅油抄手，同樣皮薄可口，而且醬汁較得好好，好夾。之後到酸辣湯拉麵，酸辣湯跟散叫的一樣甘足料，而且拉麵靭度適中，所以我個人覺得抵過單叫酸辣湯。奶油津白令我喜出望外，津白夠嫩夠甜，奶油汁好好味，可以話係配合得天衣無縫。最後上海粗炒亦無令我失望，炒得香口熱辣辣而麵的口感唔會好似一大舊麵粉，我覺得比外面既上海舖有過之而無不及（可惜掛住食忘記影相）。總結來說，值得推介。…Read More

放假去長洲華威酒店渡假，酒店包二人早餐券，可惜有一日訓晏左miss左早餐時段，酒店就提議以早餐券飲茶可當$60，於是就到中菜部飲中餐食點心。本諗住求其醫飽肚就算，但我意想不到是每樣點心都好有水準，絕不馬虎。粥夠味，食完唔口渴，牛柏業同金錢肚煮得入味，唔靭。蝦餃燒賣可比美香港區大酒樓，特別一提就係腸粉，皮薄嫩滑，雞札料足，本來miss左一日對住無敵大海景嘆早餐係好失落，食完個中茶，真係明白咩叫做賽翁失馬，焉知非福。…Read More

本人最愛就係打邊爐，但要搵平靚正就比較難，近排試過新蒲崗爺爺，覺得值得推介。呢個雞煲海鮮餐，先黎食個雞煲先，大中小辣或者唔辣都得，我本人唔食得太辣，於是點小辣，雞煲香口，好食，份量足。食完雞煲，加湯打邊爐，跟餐仲送一碟手切肥牛，炸蝦丸，拍青瓜，響鈴，䈑筍，生菜，烏冬。海鮮方面，全部新鮮，有蝦，有廣島蠔，有蟹，鮑魚，仲有魔鬼魚，全部好有水準，隻蟹新鮮到放落湯仲識郁，而且多膏肉厚，最後結果都食唔晒，生菜同烏冬都要打包，叫埋啤酒，兩人都唔洗600蚊，甘抵，去邊度搵？…Read More

為慶祝結婚週年，老婆之前已講明想試ICC的Cafe103,因為之前都聽聞幾好食，環境又好好，於是就打算訂窗口位，可惜話窗口位已滿左，我話結婚週年，希望安排到，但接線生都冇應承我。到左當日，帶位侍應竟然直接帶我地到窗口位，真係喜出望外，出去行個轉，見到好多美食，全部都非常吸引，立即試了蟹，龍蝦，生蠔。全部好新鮮，蟹好鮮甜，龍蝦爽口，生蠔肥美。而刺身亦有很多款式，有三文魚，吞拿魚，北寄貝，帶子，甜蝦，都係好新鮮，而且切刺身的師父好好禮貌。熟食方面，我個人特別推介鵝肝意大利飯，好香好味。牛扒亦好出色。最後一提，就係個例湯，蟲草花燉雞，鮮甜足料，我共飲了三碗。而每位客人都可以免費任飲紅酒白酒及汽酒，可配合不同美食。最令我難忘的，是餐廳突然準備了Happy Anniversary 既甜品蛋糕給我們，真係細心，所以我都決定每年結婚週年都要幫襯一次。…Read More