hea熊*'s Profile

星期六大約1點半入黎，冇乜客。自己隨便揀個位坐低。一坐低，侍應丟低個QR Code叫我地用手機自助落單都冇乜問題，呢家好多餐廳甚至茶樓都係咁，減少人手掛。好啦落單，覺得喺呢區黎講，啲食物算偏貴所以見到有個特價飯，即要個魚柳飯不過不失，都冇乜驚喜，又冇乜特別，係香港人接受嘅辣度。餐牌上幾乎其他食物都要6字頭了要左個湯金邊粉。幾好食，仍然係香港人接受嘅辣度，對於我呢啲只係食得少少辣嘅人黎講係好食嘅值得評論嘅係侍應態度，求求其放低碟嘢喺枱邊就要食客自己去擺返去自己面前，我唔覺得呢個係收左加一服務費應該有嘅服務態度。再講，落單已經係自助，連搬返啲食物埋黎都係自助，咁你收我個加一服務費究竟提供左咩服務呢不如你好似某啲連鎖快餐店咁，叫我自己拎食物但唔收服務費，我反而gur啲雖然食物係唔錯，但未去到我想再光顧…Read More

適逢免費搭大部分公共交通工具，咁就由新界出市區行下。夜晚，度度都咁多人，又唔想食太貴，就入左新港諗住食Foodcourt。點知真係太多人，見到呢間入面有啲位又冇人等位，就同老公兩個入去啦。一諗住行入去，就俾門口點餐位小姐好大聲話"要買左嘢食先入座喎"。咁我同老公就出返黎，但老公已經有啲嬲，叫我入去坐住先，佢去買嘢食。咁我膽戰心驚咁好似偷嘢咁入去坐，又俾人喝住"小姐! 你買左嘢食未架?!" 我話我老公買緊呀。佢啤左我一下，好似奈我唔何咁由我坐低。然後一路坐，我都好驚又再有人黎鬧我… 好彩老公好返買完返黎 (想同返staff講，我地真係有買兩份嘢食，唔係黎呃你個位坐!!)講返食物，咁平心而論，食物係唔錯。可能係態度太差，到食返嘢時覺得有驚喜。米芝蓮海南雞飯，見到出餐不斷出，應該好出名，雞都唔錯，幾滑。但個湯定汁，超級鹹，但唔掂佢又冇乜所謂嘅。炒金邊粉，賣相好靚有個"蛋網"，心機嘢 份量夠，味道唔錯，係我鍾意嘅酸酸甜甜。咁Fair啲講，喺海港城同新港呢個area，呢個價錢呢個質素算好唔錯了 (唔駛加1，因為冇服務)。如果下次Foodcourt 都係冇位，我都會再考慮入黎嘅。…Read More

星期五Lunch路過，一個人入去食。大概下午1點，人都多，還好一個人易搵位，即時入座。坐低嗌左個港式米線 $26，加左一個鮮蝦卷，見到有"推介"嘅標誌就試下，都唔平，$9。因為窮，就咁。嗌完之後俾阿姐白眼，好似意思係"下 嗌一個餸咁cheap?" 咁我都過左你最低消費，有問題咩？好啦，等食物期間有幾轉黎錯食物，包括我張枱同附近枱。唔緊要，最後我果碗係啱嘅。嘩，個 $9嘅蝦卷，真係好細，有3粒咁大把。然後我終於都明白點解我suppose係要嗌多個餸。味道係正常嘅，湯底有胡椒味，都唔錯。米線份量都足夠。只係個蝦卷我覺得幾搵笨。咁一食完，放低筷子，阿姐就過黎問我要唔要。咁我話唔要喇，佢就收起，然後嗌出去"兩位有位!" 然後兩個顧客就入左黎企喺我面前睇住我呻鼻水 (我食完熱嘢要呻一堆鼻水，俾人睇住好尷)、飲水、戴返口罩。一放低筷子都唔夠30秒，就俾個壓力趕左我去埋單。雖然我都知唔係cafe咁可以坐好耐，又繁忙時間，但咁樣嘅趕客態度，講真真係冇下次。…Read More

同朋友約左lunch，等左大約半小時入得，估唔到星期五12點都咁多人一入座，由於一段時間冇黎，先發現餐牌轉左，之前平平地嘅親民價位set已不復見，呢家都係啲市區cafe價 由於太熱，想飲凍野，但搵哂成個餐牌都冇set可以包野飲，咁就要加野飲最平果個啦。嗌左個青醬三文魚意粉，加9蚊先有凍嘅是日特飲柑桔檸檬。個意粉唔錯，份量夠大杯柑桔檸檬冇乜味，極清淡，雖然唔甜健康啲，但感覺似係加左太多水份。音樂太大聲，全餐lunch都冇得靜靜地，希望可以改善呢方面。黎cafe好多人都係貪坐得舒服，可以同朋友傾下計，但個音樂係大聲到坐隔離都要嗌過去先聽到同區少有呢類靚靚地嘅cafe，所以多人排唔係冇原因。但希望keep返個水準，唔係見多客就開始加價兼質素下跌。…Read More

用Openrice 訂左位，一行3人來食lunch，1點多，入面冇乜客。一坐低問佢果個主菜半價優惠，原來lunch set冇份，6十幾至8十幾蚊不等。咁主菜半價適用於邊啲"主菜"呢? 其實都大概係果啲野，不過就冇野飲，百幾蚊咁。諗住唔飲野都ok丫，點知唔好意思，唔可以。嗌主菜一定要另外嗌杯野飲先用得個優惠，野飲最平果杯係38蚊。抵唔抵就真係見仁見智喇啦。果然呢個世界冇咁著數既…。野食方面尚算唔錯，嗌左個焗吞拿魚天使麵 ($66)，份量大，味道正常。lunch set野飲要左杯熱荔枝紅茶，就係糖漿加Lixxon紅茶茶包，但都要$40 (lunch set包38蚊野飲，呢個補兩蚊差價)，少甜之後都算ok。服務方面都唔錯，我地呢啲都算繁忙時間都吹左陣水冇俾人趕。係既俾左加1服務費。不過收費方面，做得優惠俾人就希望大方少少。…Read More

同同事黎搵食，財政緊絀之下睇左個午餐餐牌好似大部份都過70蚊。終於喺特價餐搵到個咖哩吉列蝦薯餅配飯，要左個南瓜湯，熱檸水。56蚊還可以吧有同事食意粉，評語係食到底見到成碟油。有同事食燒春雞，評語係就係一隻好普通既雞。不過我地點個陣已經淨返最後一份，我諗都幾受歡迎。食完傾左陣計好快就趕客，環境有啲迫，不過間野都幾大，生意唔錯，我地12點半左右搵到位。呢個價位拍得住牧xxx，食物賣相呢間唔差，但衡量埋個環境黎講我會揀果間。…Read More

同同事一行6人去食lunch，12點半左右都有位。環境幾靚，感覺上裝潢花過心思。留意返，收6蚊一位茶錢，都拍得住正式茶樓，所以大家飲多幾杯喇。點心紙同茶樓果啲都差唔多。嗌左呢張紙最右邊果個荷葉飯、生菜、燉湯，原來仲有椰汁糕，都幾抵食。是日燉湯係舞茸竹絲雞湯，幾入味。同事最多comment係呢碟蝦腸，蝦唔新鮮。其他有蝦既點心如蝦餃尚算不錯。埋單每位$47，呢個價錢食到點心飲到茶，傾左計又冇趕人走，抵。…Read More

同同事黎食lunch，12點半過少少，3人，唔駛等位。午餐餐牌選擇唔算多，唔食雞唔食排骨既我，只可以揀牛腩麵。留意唔係牛腩湯麵，而係牛腩麵 (冷)，即係加麻醬既拌麵吧。有湯或者汽水，要左湯，今日係番茄蛋湯。好快就有湯黎，飲落有好重既醋味(?)，我同同事都覺得係醋味。酸酸地都開胃，但愈飲愈覺得飲緊醋，唔知點解… 本身番茄湯其實已經好好味，唔需要加醋吧?~ 所以覺得個湯怪怪地。個麵賣相好特別，疊到好高。份量夠食，味道唔錯。呢個價錢既話，喺呢區略嫌有啲貴。…Read More

見新開就支持一下新店。大概下午1點，兩個人，唔駛等即入座。店內裝潢同前身果間好似差唔多冇變過，都係好狹窄。喺門口見到有全日常餐仲要呢個時間唔駛加一，46蚊都ok，試下。由於本身唔諗住打食評，所以冇影食物相。兩個都叫左沙嗲牛肉麵，火腿蛋，厚多士，熱飲。野食方面唔錯，要讚個牛油厚多士同蛋都幾好味服務方面，唔知啲侍應係新黎定係管理亂，不斷咁撈亂附近幾張枱order既食物，差唔多每張枱既食客都好似要同佢再澄清返order左咩食物同飲品，總之就錯哂。張單又黎錯哂，記得check清楚係咪自己order既野…不過見佢反正下午6時前唔駛加一，冇乜服務都算拎起張單去俾錢，先發現原來要收加一。指住佢個牌同佢理論，點知個收銀職員不慌不忙咁指一指收銀機隔離個牌，原來寫住下午6時前免加一係星期一至五，星期六日除外。佢話出面個牌未改，遲啲改… 咁其實真係有啲俾人呃左入黎既感覺希望快啲改返門口個牌，唔好再惹其他食客誤會。…Read More

今晚未夠8時，路過見冇乜人就入去幫襯下。餐牌本身已經唔算多選擇，仲要有好多野都沽清 - 窩蛋牛肉飯沽清、鵪鶉蛋燒賣沽清，唯有轉章魚肉餅飯同普通燒賣 (冇幾耐已經聽到連章魚肉餅飯同普通燒賣都沽清埋)。章魚肉餅飯正常，小鹹，但啲飯硬。燒賣啲皮淋哂散哂。另外要左鮮茄火腿通，配滑蛋餐肉，多士。鮮茄火腿通唔錯，好夠熱，份量同味道都正常。滑蛋係凍既，唔知係咪冷盤。多士真係要特別講，咬左勁耐先咬得爛，香口膠咁，應該係牛油搽左太耐成塊包淋哂咬唔爛… 最正常係杯熱華田 ;)服務態度都冇乜，沽清左既食物一啲歉意都冇，仲要等好耐先有人收錢，明明間店都唔多人。附近咁多食肆競爭好大，希望可以做好啲。…Read More

今晚約左好友撐枱腳，決定黎呢間離荃灣站唔遠既地方。夜晚7點稍過，已經滿座，岩岩好要等位，幾分鐘就有位入座喇。個名叫手卷令我差啲搵佢唔到 好鍾意食韓式飯卷，本身嗌雜錦但冇，呢個牛肉雜菜都好味，配料同飯粒既密度剛剛好:)，有少少麻油味好香呢個辣年糕粉絲比同類型香港韓式餐廳就辣左少少，不過可以接受但入面啲魚糕就un左啲同上面果個啲材料其實好似 呢個啲豆腐好味:)不過環境好嘈，可能每一枱食客都食得太興高采烈 要靜靜地傾計既朋友就要考慮下喇!!(外加: 食食下見到小昆蟲喺枱上走過… )…Read More

同事好耐之前黎食過話有心理陰影，所以今日大家膽粗粗再黎挑戰一下睇下可唔可以移除個陰影…嗌左個特餐，不錯，番茄味濃，一丁又唔駛加錢。奄列入面竟然有腸仔 豬仔包落重牛油同埋煉奶，感覺濃左啲，不過我老細話好味隔離同事嗌左咖喱薯仔飯，睇落賣相唔錯，不過佢話啲肉煮太耐，變左肉乾 老細個特餐香茅豬扒都話唔錯，有驚喜 但佢個豬仔包竟然係冇煉奶…飲品方面我個熱奶茶幾正常，茶味濃 但同事就話唔好飲有檸檬既飲品例如檸茶，話好似中藥既味道… 總括黎講似乎嗌特餐比較穩陣:) 其他野就唔好亂挑戰…Read More

夜晚8點稍過，去盈豐睇睇有咩食，見呢間好似有朋友介紹過，出面仲好多人等緊外賣，應該冇伏。兩位入去，唔駛等，有位，係一貫香港茶記既擠迫。一坐低，餐牌睇左大概3分鐘，就已經被問左三次落左單未/落得單未/食啲咩:(。好啦匆匆落完單，又俾其他員工繼續問落左單未… 嗌左個福州魚丸米線，湯底揀左魚湯。得3粒魚丸，其實咪又係平時打邊爐果種入面有一堆油同啡色肉碎既丸，冇特別。要劣評既係主角米線，果種硬度唔係叫彈牙，係直頭未煮熟既感覺，有幾條仲係硬既，胃唔好既真係咬耐少少先好吞。碗野唯一唔錯就係個湯底。個餐最好味就係罐可樂… 無論食物還是服務，毫無懸念地要給劣評了。…Read More

有次食飽野經過呢間，睇一睇個餐牌好似啲意粉都唔錯，個價位四十幾至六十幾，就決定搵日黎試下。今晚終於都黎左，7點半左右，多人但未滿，唔駛等，即入座。仔細睇住個餐牌先發現原來唔係好揀得落手，都係啲普普通通既意粉，配料都係腸呀番茄呀西蘭花咁，仲要加一，即係都成五十蚊一個冇特別既意粉。加18蚊有埋沙律菜同飲品，不過我地冇加。總括黎講得3個字: 真係唔抵食。份量少，結果我地要去附近某傢俬店再食熱狗，仲見返頭先另一個女食客都黎左傢俬店食… 環境方面就係好似某連鎖漢堡包店咁，但仲要加一，又冇服務。連印花卡都冇拎走，即係唔會再黎，下次直接去傢俬店食算。…Read More

第一次黎呢間，見到佢好似幾多選擇所以黎試下。同男友7點幾黎到，有位，仲有卡位，環境同裝修都唔錯。果然，有選擇困擾症既朋友真係需要啲時間去揀野食，有西餐有set dinner仲竟然有韓國菜。我地要左一個set dinner - 龍蝦汁香煎龍脷柳伴日本帆立貝，要左意粉，再加5蚊要左杯巨峰梳打啫喱冰冰特飲，仲有埋餐湯同沙律菜。餐湯要左紅湯，不過份量比較少，亦冇乜特別。杯特飲都冇乜特別，正常味，就係巨峰提子汽水再加啫喱粒粒既味，5蚊都抵飲。龍脷柳煎得幾滑，唔錯另外要左一個韓式部隊麵，個湯底幾好，少少辣，唔算好辣，入味得黎又唔咸。價錢適中，可以再黎~ …Read More