annapheng的個人專頁

好耐冇食越南嘢，竟然發現一間抵食又好味嘅在深水埗。一間外牆粉藍色，好清新的小店《越湯》，望上去有點文青，而且裝修坐落都幾舒服。打開餐牌，好多唔同種類。我哋兩個人，叫咗《生牛肉湯粉》湯底唔錯，夠晒大碗，而且幾香牛肉味！另外嗌多碗《米紙春卷撈檬》，魚露甜酸度溝得幾好味，春卷香脆熱辣，米粉好大碗，不過我個人就比較鍾意傳統米粉的質感多啲，而餐廳用的米粉質感就比較爽口。小食方面，最鍾意就係《酸辣無骨鳳爪》，加埋酸辣配菜好惹味！另外仲有《順化豬肉卷》配沙嗲醬好香口。跟餐飲品加$10，青檸梳打和夢幻海洋，有蝶豆花的香味都唔錯。食咗咁多樣，兩個人都係$208。出面咁熱，我哋仲要坐咗好耐，真係抵食又好味😋…查看更多

朋友介紹呢一間新開嘅靚靚Cafe，位於尖沙咀，金巴利道的《Lab Zero》，透過落地玻璃，你會見到餐廳裏面一朵朵白雲從天而降，感覺好夢幻。新開期間排隊比較多人，但都不會令大家失去雅致。門口有個好靚嘅打卡位，唔會俾人入坐的，主要供大家打卡用。排隊時候或者食完嘢都係最好時候。排咗起碼半個鐘，終於都輪到我哋。叫咗一個抹茶刨冰，裏面有紅豆同埋小丸子，超級好味！加多一杯凍咖啡，今日已經第二杯了，所以只係黐咗個friend飲啖。冷氣有啲凍，好彩有帶褸。環境同食物都好吸引！…查看更多

好耐冇食串燒了，旺角通菜街有間隱世美食《串燒陣》，入口位置唔太顯眼，喺商業大廈凹位處，不過六點幾鐘就已經開始多客。串燒種類都幾多，價錢唔算貴，我哋兩個人第一輪就已經先叫十幾串。有幾款都好鍾意，雞泡魚乾配沙律醬好好味，燒饅頭甜甜地夠鬆軟都唔錯。另外例牌叫咗雞軟骨，牛舌，牛肉粒，鴨舌，菠蘿仲⋯⋯仲有一款必食嘅鵝肝多士，加咗少少果醬喺麵包到，食落去甜甜地再加肥美鵝肝，簡直邪惡！流心芝士年糕食咗兩轉！芝士香軟熱辣辣，年糕焗到少少脆皮，好好味。再有一個蒜蓉焗蜆夠惹味，本來想叫多一個酸辣粉，不過已經食好飽！留待下次再食過👍…查看更多

呢幾日雖然好熱，但難得阿女放假，book咗尖沙咀呢間《黑樺牛牧場》，朋友食過話唔錯，兩個鐘放題任食日本和牛！今次入座先送上兩盅《冬瓜豆腐海鮮燉湯》，清熱解暑夠清甜！湯底揀咗壽喜燒，二人同行提早訂位會送上《北海道大元貝牡蠣海鮮拼盤》職員幫計時和將蠔打開，夠晒鮮甜！幾款小食最鍾意麻辣魚皮和牛𦟌，仲有醃青瓜，蝦肉油炸鬼，非常惹味！主食叫了幾款日本A5熊本和牛，有牛脊肩、後腰肉、牛肩胛梅花、霜降牛腓等⋯⋯另外亦有黑豚肉，墨魚肉和蝦肉！可惜我食量一向唔係大，好快就見飽😅自家製花茶任飲，仲有雪糕選擇。有我最喜愛的榴槤雪糕！今次食到抱住個肚，食得開心大滿足😋…查看更多

個個都係大忙人，但幾忙都要食飯嘅。今次開心慶祝升職飯，我又大飽口福了。朋友選了銅鑼灣呢間《睿私房菜》，訂了六人晚市尊貴套餐，每道菜式都好有驚喜！另外加了《酒香鮑魚》，一匙一隻，酒香夠晒入味都唔錯。兩款前菜好吸引，豬耳偏辣夠惹味，冷盤豬手好爽脆！好鍾意胡椒豬肚湯，越飲越辣，越辣又越想飲，靚女朋友熱到即時除外套，絕對係充滿魔性的一道湯！仲有創意無限的《冰鎮咕嚕遼參》，裏面竟然係遼參。可惜每人只得一嚿，若然多多一嚿就更完美😌再來一個《中華國宴鴿》，利用簡單複雜法，將一隻小乳鴿變成一隻大乳鴿。將蝦膠和鴿肉混合之後，再將乳鴿皮風乾五至六個鐘，然後砌返隻乳鴿形狀。味道唔錯，創意十足！最後不得不提《海鮮大良炒鮮奶》，介乎炒鮮奶和蘿蔔糕之間，加上又放了臘味粒，鹹甜曖昧，口感漿糊，大家真係唔太識欣賞，唯有將啲蝦食晒就算了，係唯一一道需要繼續改良嘅菜式。其餘菜式都各有水準。牛尾烹製夠入味，但冇乜大驚喜。最後食埋個甜品都已經好飽了。不經不覺已經三個幾鐘，偈係永遠傾唔完嘅！期待下次又再繼續😊…查看更多

約朋友去九龍城食晏，原本打算食第二間啲，但經過呢間《Shibui洋食屋》覺得好靚，加上朋友話之前經過幾次但未有機會食，於是擇日不如撞日啦！裝修風格以日式古典為主，簡單舒服，深色木系設計，加上淺啡色大格瓷磚地板，彷彿時間不再存在，一種悠然隔世的時空感！午餐Menu有三種選擇，我和朋友不約而同都想試吓《味噌奶醬燒雞塊烏龍麵》即係烏冬！好彩我冇食早餐，因為份量好足夠，而且奶醬濃郁超creamy ，非常香滑重奶味，雞扒香口入味，切成一小塊容易入口！非常滿意！前菜的日式薯蓉沙律和薯仔濃湯好美味，和日本當地食的冇乜分別！整個氛圍都好舒服，我和朋友坐了很久才捨得走，證明今次呢個即興選擇係冇揀錯的😆…查看更多

好姊妹食生日飯，選了Bluhouse慶祝吓，上次已經話想試，最終COVID取消咗。今次生日提議可以去試吓。有些朋友試過話喜歡，亦有一些認為驚喜不大。我就認為以一個親民價錢，在rosewood hotel 享用意大利菜，環境服務也達到一定水準，整體上是享受的。Octopus salad我就覺得好好味！八爪魚鮮味，一啲都唔韌，配上一粒粒青橄欖超正！朋友唔食橄欖，正好成碟益晒我！哈哈！主菜叫了Lasagna ，一層芝士層肉，剛剛好的火候把碎肉和芝士融為一體，口感唔錯，味道個人認為偏淡，但感覺較健康！另外揀了quottro formaggie四式芝士薄餅！有mozzarella gorgonzola provolone and parmesan，鍾意芝士的朋友可以試吓！雖然份量唔算大，但朋友連續第三餐了，所以都係食唔晒😅最後來個雪糕甜品，選了芒果和朱古力，Venchi唔使形容大家都知有幾香滑😌寫上Happy birthday祝福語，許個好願，加上雨后清新的夜景，輕鬆愉快的晚上！…查看更多

呢個組合約咗幾次，今次終於約齊人了。先搵個好地方坐低傾吓計先！今次試了銅鑼灣呢間《Memoir》，位於永光中心17樓，聽話招牌菜有慢煮豬扒，即管book位又試吓。餐廳環境舒適，裝修以簡約歐陸風格為主，氣氛浪漫又精緻！Lunch menu 有幾個選擇，每款都好似幾吸引，於是我哋決定share食，咁就可以品嚐不同口味！-慢煮美國豬扒加薯蓉-香煎鱸魚帆立貝-澳洲10安士肉眼扒配燒汁套餐可選南瓜湯或沙律，兩款都好美味。沙律清甜夠新鮮，南瓜湯夠晒香滑濃郁都唔錯！配上藍色餐碟賣相精緻！主菜我哋都好滿意，其中一個朋友好鍾意香煎鱸魚，香煎火候剛剛好，皮脆肉嫩配薯蓉都唔錯。好想試佢嘅慢煮豬扒，果然冇失望，厚肉瘦身豬扒鎖緊肉汁，有興趣朋友可以試吓！最後上了澳洲肉眼扒，我哋叫咗medium Rare，幾重牛味，熟度剛剛好，可惜筋多咗少少，切的時候要避開。甜品有兩款選擇，芝士蛋糕和朱古力慕絲。兩款都好香滑！朱古力mousse 好香濃，我特別推介呢款！另外特飲peach minty fizz 好Refreshing，最吸引就係個花花杯墊，令杯特飲變得更加可愛😍…查看更多

睇完《鈴芽之旅》，真係好鍾意！新海誠繼《你的名字》和《天氣之子》之後的第三部曲！勇敢的女主角，為了責任和愛情，最終和自己的童年妥協了，有可愛的貓咪，魅力男神和搞笑的凳，偉大的阿姨和幽默的老友！加上中間兩個大貴人幫助，構成一個動人的故事！睇完戲都已經兩點了，同朋友去食返餐飽飽的！未試過呢間《Hoko Farm》，經過門口感覺唔錯，見到set lunch都有幾多選擇，即管又試吓。是日南瓜例湯都唔錯，熱辣辣飲落好舒服。主菜我叫了《日本帶子三文魚子忌廉闊條麵》，個配汁好creamy 好好味，可能肚餓掛，唔覺得油膩仲要食得晒😝朋友就叫了個《夏威夷pizza配沙律》，佢覺得都唔錯！再加多一個炸蘑菇小食大家share，我覺得如果點沙律汁會更加好味。兩杯咖啡係另外叫的，兩隻熊貓好似孿生兄弟咁可愛！我叫了一個薄荷咖啡，不過嚟到都分唔出邊杯打邊杯😝…查看更多

長沙灣有間《香辣鮮》，從對面馬路已經望到色彩繽紛的門面，十分搶眼！我同朋友都係無辣不歡，於是決定入去試吓！環境舒適，座位唔會太迫，見到有雞煲，但又想食胡椒豬肚喎，最終都係揀咗《鹹酸菜胡椒豬肚》加半隻雞，套餐仲可以揀多一樣小食，想試《秘製泡椒魚皮》，唔係度度食得到，都應該唔錯！先上了小食，泡椒生魚皮爽口入味，加入好耐冇食嘅蠔油豆，開胃又好味😋鹹菜豬肚湯底一流，唔怪之得招牌菜之一！加入香蔥蒜頭、洋蔥、馬蹄、秘製香料，酸菜湯底夠晒入味，胡椒辣味唔會太嗆，加多半隻雞，兩個人食分量剛剛好。飲品叫了《大大杯系列》凍檸樂和凍檸蜜，一上枱就嚇一跳，果然夠晒大大杯！對住火爐飲凍嘢，大大杯先夠爽呀！店內仲有其他推介美食，下次可以試吓香辣雞煲同埋烤魚！👍…查看更多

熱辣辣新鮮出爐呀！朋友推介呢間《嚐囍煲仔飯》，佢都係聽西環住的朋友介紹話唔錯，我哋即管又試吓！去到已經好多人排隊，除咗煲仔飯，仲可以飲茶食點心，總算排咗十多分鐘就有位，不過都要搭枱先得。門口對聯已經響噹噹寫明「馳名四季火山石煲仔飯」，當然要試！另外叫咗幾樣點心，燒賣好大粒，陳皮鳳爪好大隻，流沙千層糕真係有鹹蛋黃流出嚟，真材實料靚點心！臘味雞煲飯超正宗！淋啲黑豉油上面再焗多兩分鐘，香噴噴熱辣辣！大大塊飯焦好滿足🤤一煲兩個人食夠晒數了！…查看更多

成日都想食呢間，今日經過決定試一試。第一樣被吸引的當然係佢嘅Monotone阿凡達藍！我哋冇book位，所以坐唔到卡位位置。餐廳光線比較暗，正正加強左色調主題，時間彷彿好似停頓了，有種入戲院睇戲與世隔絕嘅感覺。食物質素好好，好鍾意佢嘅lunch set頭盤沙律，加了麻辣好特別，估唔到同沙律雞胸肉咁夾！主菜叫咗<椰香喇沙海鮮炒意粉>，非常香口美味，有蝦、魷魚、炒蜆和青口，每樣都鮮味可口，我好喜歡！朋友叫咗個<蟹肉牛油果意大利飯> ，一樣好美味！加$48有是日甜品和咖啡。我哋坐咗好耐，舒服自在，感覺好似睇咗一場阿凡達😅另外一間黃色Monmono在中環，下次過去試吓先👍…查看更多

最近成日去東涌，outlet、大佛、行山、機場、維修區⋯⋯好似同東涌特別有緣。本來想食酸菜魚，後來發現呢間《羲和小館》除咗酸菜魚仲有烤鴨食，又可以食小籠包，滿足各人的願望！午市套餐包咗幾個唔同組合，四個人食到最尾都食唔晒，要將個「鮑汁雞粒燜飯」打包返屋企😝烤鴨好肥美，片皮鴨燒得好香脆，肉質鮮嫩，質素真係唔錯，不過係有啲油膩，所以其實四個人分差唔多。濃湯酸菜魚，熱辣辣酸酸地夠晒開胃，食完片皮鴨感覺冇咁肥膩。不得不提特色前菜［蜜汁脆芋絲］，好似食薯條咁脆卜卜，加上拔絲蜜糖，好食到停唔到口！靚湯有松茸素羹，金湯海皇羹，清甜滋潤好好味。總之呢餐就大滿足，食到捧住個肚走！…查看更多

好鍾意食泡菜豆腐鍋啊！上次食已經係世界盃期間了，記得嗰日天氣唔好，仲落雨凍冰冰，咁啱又追緊韓劇，好想食碗泡菜鍋！最近呢幾日天氣都麻麻地，又令我諗起熱辣辣的豆腐鍋🤤樂富呢間《小火焰韓式咖啡廳》其實佢都有其他分店。今次第一次試，餐廳空間夠大，相對等位無咁耐。午市套餐好抵食，六十八蚊食到靚靚的泡菜豆腐鍋，仲有杯熱蜂蜜柚子茶！朋友叫咗《泡菜醬燒黑豚拌飯》，我夾咗一舊豚肉試吓，又腍又夠香，呢個拌飯都唔錯！…查看更多

朋友上網睇吓附近有咩推介美食，見到天后呢間《坐忘》好評如潮，招牌菜式係日式豬軟骨飯，好想去試吓！原來Camper’s都有好幾間分店，今次就試吓銅鑼灣呢間啦！中午營業時間去到三點，我哋兩點多啲去到，叫做啱啱好！室內擺放了不同露營裝飾，餐牌見到好多日式咖喱推介，但朋友和我都睇中呢個［豬軟骨7小時煮定食］，叫了兩份，果然有驚喜，份量好足夠，豬軟骨慢煮肉質好腍又鮮味，套餐沙律跟主菜上，加多一碗蘿蔔清湯！我哋仲加咗杯熱柚子蜜。所有食物著名無MSG 和添加劑，而且仲免加一服務費！嗯，下次試吓佢地嘅咖喱飯先，應該都幾好味！…查看更多