kenmerry's Profile

平時好少去apm, 原來apm都有好有特色的日本餐廳... 我真係太Out了...餐廳門口掛上了綠藻球, 即係入面有酒飲啦~接待處的Counter用不同的木箱拼貼而成, 甚具特色...有人知道入口這個金像是什麼東東嗎? Book咗6:30pm, 8:15pm就要還枱, 得1小時45分鐘, 想傾多陣都唔得, 應該話食慢d都唔得... 未去食已經唔係好Satisfied... 閒日都限時比較少見... 由於好趕頭趕命, 所以已經一早吩咐好最早到達的2個人LaLa聲落單, 唔好等人齊... 當諗好叫咩o野食時, 大家都到齊了... 可以盡情落單~落完單問男服務員有無熱茶, 服務員閉口指住Drink List, 寓意No Free Hot Tea吧, I guess... 結果... 平時實係飲凍飲果2位, 居然飲熱的陳年柑桔蜜!!! 平時飲熱飲的我同另一位朋友, 居然飲凍的海鹽荔枝梳打&巨蜂乳酸梳打!!!正當心裡滴滴咕咕抱怨之際... (害我要飲高糖分飲品, 減肥大計又要被狠狠的插一刀)... 見到隔離枱竟然有熱水供應?!! Free Hot Water!!! 又無搞錯呀?!! 算點呀?!! 錢都事少, 害我飲咗好多糖落肚呀!!! 唔知又要踩幾多粒鐘Stepper先可以消耗返!!! ROAR!!!!!! (咆哮) 呢位服務員的惡行又豈止咁少... 落單時佢係鼻向天+黑面+金口難開, 感覺自己猶如係暴發戶家門前乞食... 我地落單時都唔該前唔該後, 成個落單過程佢1句說話都無講過就走咗去, 我都唔知自己有無落過單, 亦唔知佢聽唔聽到我講o野...平復心情後, 先開始影吓間餐廳... 無可否認, 餐廳內部裝修係幾有日本特色的... ~ Round 1 ~鍋蛋石頭燒飯 $60-- 都幾難食的石頭飯!!!賣相欠奉... 份量不多, 濕淋淋的飯, 食糊仔咁, 不要說蛋香, 連飯香都無, 無水的白粥比佢更美味... 鮮魷魚炒麵 $68-- 勁多魷魚, 仲幾彈牙, 口感十足, 炒麵偏腍, 鹹中帶甜, 水準不俗... 豚平關西燒 $55-- 好味!!! 可能係個醬甜甜地啩, 整體味道好夾, BB醬+燒汁都好難難食... 口感係淋身咗少少, 不過我上次係大板食到的都係咁 (咁我第一次自己燒, 燒得差是常識吧)... 呢度餐廳的專業廚師唔係日日煮的嗎?!! 補充 : 除了粉漿及醬汁, 吃不到有材料在內, 可能太肚餓一口吞掉所以察覺唔到啩, 又或是材料太Tiny?!! 燒羊扒 $60-- 上枱時見到得2件, 朋友話叫多1客, 我即刻話 : "試咗味先"... 一咬... 嘩... 鹹到呢!!! 要狂灌水, 救命... 剩係得孜然粉的味, 亳無羊味!!! 「叫多1客」議案一致... 否決!!! 其實肉質是OK的, 燒得都幾香, 可惜就是太鹹, 同埋我入來唔係要食新疆菜囉... 雞肉明太子 $25-- 朋友問 : "明太子係邊?"... 我答 : "Lay埋係醬入面"... 其實... 我都係亂蹹, 我都唔知係邊... 味道是... 千島醬囉... 雞肉不太乾身, 頗柔軟... 鹽燒活鰻 $55-- 嗯... 呢個得喎, 朋友同我都大讚好食!!! 大家一致通過, 好耐無食過肉質彈牙的鰻魚, 燒得好香, 皮脆肉嫩, 鹽燒帶出鮮味, 完全唔腥, 掂呀, 好味!!! 燒豆腐 $28-- 好一般, 唔識欣賞... 豆腐外面又唔脆, 豆腐入面又唔滑, 豆香欠奉, 個醬汁同豆腐又唔夾... 香蔥吞拿魚腩 $180-- 我對吞拿魚一向無感情... 我只知自己吞了一堆凍的無鮮味的魚肉落肚,油脂?!! 唔覺喎... 另... 說好的香蔥呢?!! Sushi豉油不是1人1碟的, 要2人Share 1碟, 不太衛生, 正值流感高峰期, 有點擔心... 海鹽荔枝梳打/陳年柑桔蜜/巨蜂乳酸梳打 $35-- 搞了飲管幾下, 可能我無用盡九牛二虎之力去搞勻, 初時飲到一陣鹹的, 之後就是一杯普通的荔枝梳打, 有荔枝香味+甜味... 朋友原本都想試, 等我試完之後, 佢最後決定飲巨蜂乳酸梳打...食到尾聲, 另一位男服務員來收碟時, 我地話 : "唔該, 想加o野"... 嘩!!! 佢塊面黑到呢, 眼神同嘴面都顯得極度厭惡, 嘴藐藐, 好唔滿意咁...喂!!! 我而家乞緊食呀?!! 無名火起三千丈!!! 但都唔理得佢咁多, 唔想望佢, 唔想比佢影響到我地聚餐的心情, 極速Order完唔想再見到佢...有位好勤力的阿姐, 全餐粗暴地收碟, 快到有幾次都未食完就問你攞碟, 見而家好少咁勤力的員工, 都唔知讚你好吖定係... Anyway, 有上面2位哥仔提供咁有獨特氣質的服務, 已經將勤力阿姐比下去, 你只係排第三啫...~ Round 2 ~決定叫Round 2前, 朋友問大家有幾成飽, 另一位朋友話都夠, 我就喪人喪語話 : "重新再食一次都得, 不過我減緊肥, 唔好啦, 哈哈", 九龍人聽到就話 : "你都要減肥, 咁我點呀"... 其實呢, 我都係為健康而減肥, 唔想老咗週身病痛呢樣唔食得果樣唔食得, 而家減定將來先可以繼續喪食, 身形方面我唔係太介意, 反正我唔會著暴露或貼身的衫褲... 加州卷 $120-- 樣子討人喜歡, 蟹肉卻是腥的, 本應是清新脫俗的菜色, 蒙上了污點... 有點後悔, 又害我增加了卡路里, 好食都話吖... 東洋卷 $55-- 同餐牌有點出入, 唔知點解我會幻想到有士多啤梨係入面... 不難吃的, 只是現實與理想有很大偏差, 腦海仍然苦惱中, 難以投入心情去欣賞... 餃子 $45-- 好想食, 又唔敢提出, 驚比人話用$45去食餃子?!! 估唔到2位朋友都想食, 更估唔到幾鬼好味, 餡料填得超飽滿的, 皮薄餡靚, 餃子皮煎得香脆, 沒有半點多餘油份, 我好似以極速係其他人未食完第1粒之前, 搶多咗1粒來食... 雞肉京蔥燒 $25-- OK呀味道唔錯, 燒汁香甜, 雞肉嫩滑, 京蔥吸咗雞油都好香... 燒日本蕃薯 $25-- 點解呢... 日本蕃薯無甜味嘅呢?!! 亦不夠粉嫩... 吞罷還想我說什麼呢...價錢唔平, 份量細細, 食食下又幾飽喎...味道方面都幾參差不齊, 落單前需謹慎選擇...服務方面, 沒有最差的服務, 只有... 環境氣氛大好, 但都給服務員破壞了... 埋單時, 問有咩卡有Discount, 答案係景樂集團(King Parrot)VIP Card... 吓?!! 又係景樂集團(King Parrot)?!! 唔怪得硬件上搞到咁好啦, 軟件上就...好有佢地集團的Style呀...服務質數咁誇啦啦, 難度這是觀塘區的Service Standard?!! 很不悅的一夜!!!…Read More

Citysuper旗下的Log-on去年回歸太古城, Log-on Cafe首次進駐, 側聞味道只屬一般, 加上去年6月開始減肥至今, 所以一直未有前往嘗試...今日突然興致來了, 雖未至敗興而回, 但有少少後悔, 咁辛苦先減咗15磅, 好味就話啫, 唔好味仲要肥咗就唔抵啦...食Cake的話, 直接係Cake櫃(圖左)買, 食早餐或意粉類的話, 係右面入少少的收銀櫃買... 呢張相睇唔到, 比Cha-no-wa櫃遮住咗...買咗餐入到去自己搵位, 放號碼牌係枱面等食... 嘩... 而家講緊食88蚊1人前Afternoon Tea Set喎, 好唔High啫... 店內走快餐店式的簡約路線... Afternoon Tea Set for One $88☆藍莓杏仁撻☆奇幻抺茶蛋糕☆香腸丹麥條☆法式焦糖燉蛋☆黑椒牛肉卷☆意大利帕瑪火腿配哈密瓜☆咖啡/茶品 Tea Set以黑漆雙層小盒子奉上... 上層鹹點賣相毫不吸引, 3件食物各散東西, 亳無感情... 下層甜點擺得稍為正常一點... 飲品方面我不想飲咖啡, 選了熱朱古力, 加了奶口感頗幼滑, 稀溜溜的, 味道不夠濃郁, 談不上Thick & Rich, 只可說不過不失...鹹點不單賣相不濟, 味道亦然... 意大利帕瑪火腿配哈密瓜-- 火腿沒有半點鹹香, 哈密瓜倒是很爽脆, 少甜... 黑椒牛肉卷-- 牛肉冰凍得有點僵硬, 連味道都雪走埋... 咬至中央位置反而有點驚喜, 醃蘿蔔居然有醃蘿蔔味... 嘿... 香腸丹麥條-- 鹹點中味道比較正常的, 酥皮就唔係好酥嘅啦, 但有腸仔包味... 如果係咁... 點解我唔直接拎幾蚊去麵包舖買個手掌咁大嘅熱辣辣腸仔包果腹呢... 奇幻抺茶蛋糕-- 抺茶蛋糕是Tea Set中唯一食得較稱心的... 茶味甘香, 苦中帶甜, 做得不錯... 路過試下無妨, 千祈咪山長水遠來朝聖... 藍莓杏仁撻-- 撻一個... 其實呢... 我麻麻地鍾意食呢種有吉士嘅果撻... 所以呢... 我比唔到好中肯的評價, 只可以說不過不失...法式焦糖燉蛋-- 焦糖面層做得唔錯, 又薄又脆, 焦香十足... 燉蛋香甜滑溜, 睇下, 有好多雲呢嗱籽喎... 食前餓到手震震, 食完都好似無食過o野咁, 不過理性話比我知, 我唔可以當無食過再去其他餐廳又再食多一餐Tea, 因為呢個Set都好多糖吓, 已經對我的減肥大計構成好大衝擊... …Read More

同朋友為振興香港經濟出一份綿力後(刷卡... 刷卡... 刷卡...), 消耗大量體力, 好肚餓呀!!! 朋友想食日本菜或Burger... 係恆隆門口見到個廣告Stand Show咗附近的餐廳ssss, 見Burgeroom係Fashion Walk, 近近地試下都好喎...Fashion Walk 9點幾仲咁多人...店內店外皆人頭湧湧, 只剩下店裡面街的High Chair, 睇完餐牌想搵服務員落單, 原來要自己行出去吧枱買同順手比埋錢, 之後可以返埋位等職員奉上已付款的食物... 排隊時, 一對國際男女排係龍頭, 係度討論食乜乜乜, 討論咗好好好耐... 店員又好耐性喎, 無叫佢地行埋一邊討論完先再買... 排後面的客人(包括我)又好耐性喎, 無丙佢地阻住地球轉... Homemade Iced Peach Fruit Tea $35-- 有好多果肉, 紅茶味OK濃, 走咗冰, 室溫下的味道都幾麻麻地, 估計加咗冰可能會好飲D... Melted Cheese Twister Fries $48-- 嘩!!! 好味!!! 熱氣到無朋友的扭扭薯條, 以熱情溶化芝士, 兩者如膠似漆地黏著對方, 引用星爺金句 -- 濃情化不開!!! 我要用第3者(茄汁)拆散佢地, 嘩咔咔咔~~~Double Decker $120-- 巨型到嚇詩人的雙層牛肉芝士漢堡!!! 好彩我地只係叫了1客Burger來Share... 初時想1人1客Burger的... 牛肉漢堡扒咬落仲好有好多肉汁, 好重牛味, 肉質好柔軟, 只食到1條筋, 好味~~~ Bundaberg (Bottled Ginger Beer) $28-- 朋友的薑啤久久都未見影, 向職員追問, 原來係Self Service o架!!! 職員好好人, 幫我地呢枱大鄉里去拎... 價錢唔算貴啦... 呢條街o黎講... 真係估唔到Fashion Walk都有咁抵食的餐廳, 係外面望入去好似黑色世界咁 (間間餐廳外表睇落都勁貴夾唔飽咁款)... 哈哈...…Read More

係灣仔食咗餐貴夾唔飽的慶生午餐飯局, 3位大胃王又點會空著肚打道回府...朋友話同事推介Hysan有2間好正的甜品, 但又講唔到餐廳名... 咁... 我地就行過去睇下點囉...Hysan真係Crazy多人, 舉步維艱, 搭Lift更是難上加難...半推半就, 迷迷茫茫, 去到14樓 WIRED CAFE... 朋友見到窗邊有梳化卡位, 諗都唔使諗, 就話要入去... 注意 : 限時1.5小時... 窗外的景色... Sogo大Logo!!! 遠一點, 可以望到大坑少少山... 炸甜薯配焦糖雪糕 $58-- 第一道奉桌, 被批評得接近體無完膚... 吃罷其餘2個甜品, 大家竟然讚同此炸甜薯已是當中最好的... 抺汗... 取名為炸甜薯片, 會較為切合... 炸得比麥當當的薯條更乾硬, 如果沒有了焦糖漿, 敢問有誰會哽得落... 綠茶紅豆班戟 $80-- 大家都食到面容扭曲... 朋友們都不習慣苦到出汁的綠茶味, 我就高興到不得了, 食得苦中苦, 方為人上人, 哈哈... 紅豆甜到出汁... 一致認同, 班戟的口感, 濕淋淋, 勁怪... 雜莓西多士配雪糕 $80-- 與餐牌的相片極度不附... 西多士少得可憐, 又薄, 頭重腳輕... 肉眼只見到果醬, 一粒新鮮雜莓都無... 唯一可取的是, 雪糕有雲呢拿籽... 自選底茶 + 2種花果口味... 柚子+茉莉+茉莉花茶 $50蜜桃+蘋果+烏龍茶 $50-- 全餐最好味的... 我的柚子茉莉花茶略淡, 難得與柚子夾得開, 配中式茶點也可以... 朋友的蜜桃蘋果烏龍茶, 味道濃郁, 甜度極高, 很好喝唷... 記得留返少少, 加點熱水可以飲耐D, 水繼續吹... Kyoho Calpis Squash $58 職員表情冷漠, 問有無得加熱水又唔答, 走咗去做其他事, 最後又有滿足我地加熱水的要求, 都唔可以話服務差吧...落單的職員更神奇, 表情冷漠+無抄低Order, 但又無錯喎所有食物同飲品都... …Read More

來自台灣的人氣喫茶店咖啡弄在銅鑼灣開業接近2年, 仍然保持長長的人龍, 我唔係第1次來, 但係係第1次排隊成功, 終於食到, Yeah!!!今日人龍唔算長, So Lucky... 我試過日頭排到落街出咗大廈轉埋彎, 排咗1個鐘見勢色唔對走人... 又試過夜晚來人龍長今日少少, 但已停止派籌...排15分鐘鬆少少就入得啦... 睇下今日報紙有咩頭條先, Yo~ 店內查實唔多枱... 坐中間的8人大枱係要搭枱的... 好彩我地有梳化位坐... 優格野莓冰沙 $52... 多美的賣相... 冰鮮果茶 $58-- WoW... 好大壺呀!!! 果肉煮至半溶, 味道以柑味最重, 其次係橙味, 甜甜酸酸的, 好開胃... 乾杯!!! 一飲而盡!!! 數下壺入面有咩材料先... 草莓冰淇淋鬆餅 $58-- MUST MUST MUST TRY!!! 鬆餅厚到呢, 火喉好均勻喎, 鬆鬆軟軟, 好好味呀, 蘸埋吉士醬同草莓醬就更更更加好味... 熱呼呼的, 仲出緊煙, 加點草莓雪糕一齊食, 人間極品... 限時1.5小時... 好味, 價錢又唔貴, 一定要再來...…Read More

朋友生日飯局話想食好D, 另一位朋友話順便當慶祝埋聖誕, 所以就去咗擺明貴夾唔飽的蟹膳 Kanizen...係灣仔返過幾年工的我, 去到食過的魚蛋粉店舖, 都開始懷疑有無行錯路... 原來蟹膳 Kanizen個舖位堅易搵卻堅唔起眼... 比D信心自己, 行到去巷尾角位, That's it~餐廳入口有個大蟹缸... 咁多隻長腳蟹擺係我面前, 真係引死人... 先經過壽司吧, 繼而係卡位... 3個人, 被安排到樓上的6人房, 不用搭枱, 鬆動到呢... 不過Toilet係樓下, 想去方便一下的話就要上上落落...我地Order咗1個鱈場蟹天婦羅餐 $338, 加2個行政套餐 $388, 將其中1個行政套餐的毛蟹半隻 (Half of 400-500g) Upgrade做燒鱈場蟹腳...2個餐都有前菜、蟹肉蒸蛋、雜菜盤、米飯/稻庭烏冬、甜品... 寫Blog時睇返餐牌先發現, my鱈場蟹天婦羅餐的蟹膏不見了, OH NO))))))前菜、蟹肉蒸蛋-- 支豆數條, 味覺上沒有太大沖擊... 超級滑溜的蒸蛋, 蛋味欠奉... 雜菜盤-- 蔬菜非常新鮮, 豆腐異常滑溜... [鱈場蟹天婦羅餐] 鱈場蟹天婦羅拼盤-- 鱈場蟹天婦羅啖啖肉, 炸醬好薄, 無多餘油份, 蘸點綠茶粉同吃, 人生真美好... 我大鄉里, 蛋天婦羅真係第一次食, 要盡快食, 要一啖食晒, 等蛋漿係口內爆發, 千祈唔好擺太耐, 蛋漿會流出來的... 食完張吸油紙一滴油都無... [行政套餐] 松葉蟹天婦羅拼盤-- 個人認為, 相對地無鱈場蟹天婦羅咁吸引, 無他嘅, 鱈場蟹天婦羅大隻D多肉D嘛... [行政套餐] 毛蟹半隻 (Half of 400-500g) -- 都算幾多肉, 烚2分鐘, 肉質嫩滑... 奇怪的是,蟹肉食入口是沒有腥味的, 但蟹殼激腥臭...[行政套餐 Upgrade] 燒長腳蟹-- 肉質嫩滑, 蟹味及鮮味欠奉... Upgrade咗呢個的話, 無咗毛蟹半隻, 個湯底齋烚菜應該無咩味... 不過咁大煲湯先落得果半隻蟹, 都唔會有味得去邊... 稻庭烏冬-- 相中已是2個餐的稻庭烏冬... 我的稻庭烏冬不知不覺間被朋友落埋落佢個鍋度?!! OMG!!! 佢Upgrade咗做燒長腳蟹, 個鍋只烚過菜咋... 食之無味, 棄之可惜... 甜品-- 有薑味雪糕同咖啡味雪糕揀, 咁緊係揀薑味雪糕啦, 特別D嘛... 味道好好, 有點似薑茶, 但無咁辣... 奉甜品前換上熱毛巾, 勁標煙, 熱到燙手, 原本好Appreciate... 但好奇怪, 抺完手竟然有強烈的霉噏味, 有點惡頂...份量少得驚人, 食完好似無食過, 如此價錢有點不值... 自己買成隻鱈場蟹返屋企烚好過... 總算見識過吧...…Read More

炑八韓烤本月在灣仔開新分店, 粉絲們可免卻排隊之苦啦~~~ 話就話係灣仔, 其實近銅鑼灣地鐵站, 係Times Sqaure過條斑馬線(鵝頸橋底)就到...收到店方的電郵邀請後, 令我興奮莫名的, 莫過於「爐邊蛋」!!!我知, 香港舊年就有得食啦, 咁我當時閉關減肥嘛, 至今未有機會一試, 所以對我來講仍然非常新奇...雖然我係超級韓烤迷, 但我只到過韓國1次(遊走瑞士/法國/德國的次數比韓國仲要多), 請別跟我說大家係韓國食「爐邊蛋」已經食到厭了, 拜託...店內的陳設就如韓劇中的燒肉場景, 一模一樣... 店內少不了香港人最喜愛的舒適卡位... 套餐價錢都幾優惠... 烤肉餐7款肉+1款海鮮賣$280 per person, 海鮮烤肉餐3款肉+5款海鮮賣$340 per person... (2位起)除了右上角的沙律菜, 其他前菜可Refill... 讚... 套餐包飲品(每人1份), 呢個韓版青檸七喜味道也不錯... 不要少看烤肉餐的份量, 我地2個烤完呢碟肉真係飽到上心口, 連前菜有得免費Refill都Refill唔落... 開始烤肉前, 先來搗蛋一下...烤盤旁邊有3個小區, 分別用來烤泡菜蛋同芝士粟米, 仲有1區放青椒及蒜頭, 有咩用?!! 等陣開估... 店長大方地傳授烤肉的獨門秘訣... 秘訣1) 烤爐要夠熱, 界乎攝氏230-240度左右, 每次換鐵板後都要等到溫度合適先好開始烤... 秘訣2) 大蝦左右2邊每邊烤4分鐘, 雖然蝦已開邊, 但千祈唔好打開隻蝦將蝦肉貼住鐵板來烤, 咁會破壞蝦的肉質... 烤好後, 起肉直接食又得, 再放在鐵板上烤多幾秒又得, 得咗!!! 店長的手勢果然與眾不同, 烤出來的蝦肉保水鎖濕, 緊緻有彈性, 口感一流... 特級牛肋骨... 賣飛佛... 秘訣3) 烤肉反的時候要原位反, 千萬唔好週圍糊, 可以減少肉汁流失... 特級牛肋骨肉質柔軟, 食用前隨個人喜好蘸幾粒鹽花, 味道剛好...炑八豬腩肉肥廋各半, 未燒前睇到我都怕怕, 燒起後卻色澤金黃惹人垂涎, 望落仲好似消瘦咗, 無咁多肥肉, 哈哈... 不顧一切放入口, 嘩, 油脂甘香無比, 在口中縈繞不散, 已忘卻剛才的擔憂... 減肥?!! Later啦~~~ 一開始就出場的爐邊青椒及蒜頭, 現在大派用場... 烤好的肉不好意思盡夾到自己碗內, 驚別人誤會自己餓鬼投胎, 繼續放在鐵板上又會燒焦浪費大好美食, 放在爐邊青椒及蒜頭上, 剛好可以增香之餘又保溫, 一舉多得... 很捧的發明...烤生菜咁新奇?!! 非也... 寶物尋歸底... Da Da... 濟州豬皮!!! 烤豬皮時會成塊豬皮爆起, 好驚驚呀, 所以要搵生菜蓋住, 再用鐵夾按住來烤... 其實我對豬皮都幾抗拒, 但店長示範烤出來的豬皮真係好正, 軟軟QQ口感, 像啫喱軟糖, 甘香而不油膩, 又幾好味喎... 就係呢個Moment...芝士粟米同泡菜爐邊蛋食得啦~~~溶掉的芝士與粟米融為一體, 舀起時拉出一絲絲的芝士絲, 怕會凝固, 要趁熱吃, 軟綿鹹香, 好想Encore... 泡菜爐邊蛋出奇地好食, 泡菜的辣勁被蛋漿中和了, 泡菜香混入蛋中, 好味哦... 惠顧2人套餐, 芝士粟米同泡菜爐邊蛋都係可以免費Refill的, 好邪惡呀!!! 慢慢燒真係唔符合我的急性子... 咁先似樣嘛, 嘩哈哈哈... ♪ 燒呀燒寒流都遠飄 ♪ 牛笑臉小小的一條肉, 肉味非常濃郁, 肉質柔軟得沒話說, 好好味, 搶著吃!!! 特制雞肉烤成金黃色, 調味剛好, 帶點鹹鮮... 烤秘制排骨要比多一點耐性... 蔥花牛仔骨水準也不錯, 只是牛笑臉太出色, 被搶了不少分數...別忘了, 套餐還有甜品的... 雪花冰口味4選1... Mochi軟嫰綿糯, 正... 嘩... 抺茶紅豆好甜呀!!! 若閣下比我更嗜甜, 不用擔心, 已為你準備好練奶... 今晚的晚餐實在太豐富, 一級食肉獸滿足地捧腹回府... 多謝店方邀請...回家後第一時間向Honey推介要去試試泡菜爐邊蛋同牛笑面... …Read More

高官口中的流動美食車原來已殺入香港重中之重的遊客區... 淺水灣!!!不過... 唔係好流動咋喎...來自加州, 吸盡當地陽光海灘日月精華的流動美食車, 已經從良, 不再狂野, 同風吹雨打日曬雨淋的艱苦日子講拜拜, 走咗入商場嘆冷氣...善哉... 善哉... 睇o黎流動美食車係香港真係無生存空間...朋友話, 淺水灣觀音像旁邊起咗間新酒店好靚好多新餐廳喎... 約埋大家來食Lunch, 結果... 流料一宗!!!我而家同大家講, The Pulse唔係酒店, 只係1座3層高的商場!!! 大部分區域仍然是建築地盤, 或是封閉中的店舖, 沙塵滾滾, 成個商場根本未Ready... 攝氏30度的高溫之下, 又餓又熱, 我差點暈倒街頭... 其實都幾辛苦先搵到呢間餐廳, 唔係太合心水, 重複行咗2個大圈, 兜兜兜兜兜, 終於大家都唔好再行, 就呢度啦~ 我地一行5人, 職員第一時帶我地去搭大枱!!! 同佢理論, 堅稱任何枱都要搭枱, 我望到離遠呢張6人枱無人坐, 要求坐呢張, 先逃過搭枱厄運... 座椅非常殘舊, 有好多款式, 我同Honey坐呢張雙連木椅應該係來自電影院的... 流動美食車車廂內設備齊全, 在另一邊是售賣處, 我總覺得係要賣熱狗或墨西哥粟米片之類先貼題... 以黑膠唱片及滑浪板砌成的SEA字... 店內掛了很多壁畫, 天花很Metallic... 餐廳Logo是有故事的... 大家要花點時間欣賞下Menu上的4格漫畫... Iced Tea $ 40 / Coke $30-- 冷涼透心, 淡淡的茶味, 較適合曬到出晒汗又想飲茶的人士, 因為中暑的話好似不適宜喝濃茶... Californian Burger $150-- 加州人食的漢堡, 有牛油果、蕃茄、沙律菜、西班牙Manchego芝士、蛋黃醬... 舊牛油果仲大過塊漢堡扒, I Like~ 麵包柔軟有回彈力, 蕃茄新鮮又大片, 沙律菜同芝士略遜, 少到接近唔發現, 蛋黃醬都唔覺眼... 漢堡扒表面焦脆香口, 內裡濕潤不乾身, 還不錯... Free Style All Day Breakfast $70-- 包2隻Organic蛋(Style可選Poached, Hard Boiled, Scrambled, Sunny Side Up, Over Medium, Over Easy, Over Hard), Buttermilk Biscuit, 自選配料2款(煙肉、芝士、洋蔥、蕃茄、蘑菇)...無諗過... 蕃茄用車厘茄... 煙肉頗香, 不會太鹹... Hard Boiled Organic蛋蛋黃超大, 蛋白比例很小, 有蛋香... Buttermilk Biscuit讓大家嘖嘖稱奇, 居然大家都未見過, 口感似焗蛋白再實一點, 味道淡淡的, 香味欠奉...Fries $30-- Sides要另叫, 薯條幾大碟, 剛上枱時勁熱, 係幾惹味又夠粉, 但好熱氣呀, 放涼咗都好味...好可愛的紙巾架...充滿加州風味... 離開餐廳時上返上一層, Honey發現餐廳天花原來有2把大吊扇... 食飽飽走人... The Pulse背面的景觀(正面是沙灘)... 藍天+白雲, 使唔使咁曬呀?!! 我今朝滾水淥腳咁出門口, 唔記得塗防曬呀!!! 價錢偏貴的一餐, 味道不至於很好, 質數還可以, 餐廳內環境很有氣氛, 餐廳外景觀是無敵海景, 服務待服務員適應環境後應該會有所改善...我無叫你地專程入來試呀!!!如果你地入開o黎, 搵唔到較似樣的餐廳, 又唔想去更貴但質數一等一的淺水灣酒店, 都可以考慮下呢間餐廳... …Read More

山林道會令你想起咩? 咪食食食食食囉... 街道上食店雲集, 的確是尋吃尋喝的好地方...日前收到餐廳的電郵邀請, 有點猶豫, 我對火鍋可說又愛又恨... 愛的是材料豐富選擇多, 看著食材在一片迷霧之中由生變熟那份期待, 是會上癮的... 但好多時食完火鍋都會胃炎, 因為同一D無衛生常識的人一齊食係好危險的... 慶幸今夜得到老友食家的體諒及配合, 食完呢餐隔咗幾日都無事發生, 安全檢測通過...餐廳接待處設在地下, 用餐區在樓上, 裝修簡潔鮮明... 用餐區設有Wardrobe, 可讓客人掛起大衣, 不用擔心飽餐一頓後名貴衣服被染上一陣火鍋味... 很貼心哦... 店員先了解我地對辣味的喜好... 然後詳盡地講解如何因應湯底選那一種雞來吃... 新推出的泰式辣雞煲我地無本事挑戰... 冬瓜盎煲旺季已過, 需要預訂... 唔辣的, 還有椰子新鮮雞煲... 完成畫點心紙般的落單程序, 等待雞煲期間, Must Do Item就是混醬吧... 椰子新鮮雞煲 (配香港BB雞半隻) $248-- 可以選嘉美雞, 廣為港人所熟悉, 肉質偏廋... 店員推介香港BB雞, 雞味較前者濃, 黃油亦較多... 至於泰雅雞及粵皇雞, 雞味會更重, 黃油會更多, 較適合伴以辣湯底食用... 4款雞均是港產新鮮雞, 養足90日... 以花雕酒醃雞, 加上杞子, 嘩, 好補身喎...椰子湯底呈奶白色, 加入新鮮香港BB雞後, 蓋上煲蓋翻滾, 熄火焗10分鐘... 焗10分鐘不是隨口說, 有用計時器的, 很認真... 10分鐘後... WoW... 黃油出晒來... 將黃油舀走, 呷一口椰子鮮雞湯, 清香的椰子味加上BB雞的鮮甜味, 好飲!!! 椰子清潤, 食足1晚講足1晚返到屋企都無喉嚨痛... 咁煮法雞肉全熟得來仍然滑溜... 餐廳正推出1週年「新鮮雞煲半價」優惠, 人均消費滿$350(不包括加一), 每2人最多半隻雞煲, 4人1隻雞煲, 優惠期至5月31日... 合2人之力將椰子新鮮雞煲KO後, 火鍋配料來啦~~~ WoW... 好強大的陣容, 這是日本刺身船嗎?!! 店員強調週末會很忙碌, 廚房未必有時間將火鍋材料制成藝術品, 想試就要閒日來... 特級手切肥牛 $238-- 用上本地新鮮牛肉, 肉質偏廋, 油花較少, 但牛味較重, 店員提示只可以焯5-8秒, 否則會太韌... 不喜歡太廋的話, 可選擇安格斯肥牛... 對我來說仍可接受, 我要支持一下本地畜牧業嘛... 黑豚豬面頰 $128-- 黑豚豬面頰色澤紅潤, 有點像牛肉... 肉味重, 肉質結實, 咬落仲彈牙的, 正... 手打四寶丸 $118-- 標榜自家手打, 有牛丸、墨魚丸、蝦丸、鯪魚丸... 最愛是蝦丸, 真係成隻蝦係入面咁鮮甜彈牙... 牛丸以純牛肉制作, 咬落口感像漢堡扒, 除牛味外還帶丁點陳皮味... 墨魚丸味道略淡... 嘩, 鯪魚丸好鯪魚呀, 有點招架不住... 鬼馬油炸鬼 $88-- 將自家新鮮打的墨魚滑釀入油炸鬼內再炸, 味道鮮美, 爽滑彈牙, 外皮酥脆... 呢個推介呀, 好味, 一定要試!!! 花膠 $72-- 剛才的椰子湯底加上花雕雞及杞子, 滾耐咗味道越來越似中藥材湯, 再放入花膠長時間滾熟, 好腍好入味, 膠質好重, 正, 好滋補呀今晚真係... 唧唧鮮魚麵 $88-- 正所謂好戲在後頭, 自家制唧唧鮮魚麵味道又香又濃, 鮮味爆燈, 柔中帶韌, 口感彈牙, 正~ 必食~ 即炸響鈴 $68-- 脆炸腐皮焯一焯就食得, 食時還脆的, 好味... 蓮藕片 $38油麥菜 $38秋葵 $38-- 蔬菜全都非常新鮮, 店員推介火鍋配料中較為少見的秋葵... 竹蔗茅根(凍) $48 -- 吃了一整夜熱氣火鍋再加說了一整夜也未完的話, 回家後並沒有喉嚨痛, 不得不提的幕後功臣... 自家煮的竹蔗茅根, 低糖, 味濃, 很足料哦... 熱飲反而要加5蚊?!! 都係第1次聽見... 是咁的... 竹蔗茅根煮好後全部會雪入雪櫃, 如客人點熱的, 就要將凍飲翻熱...很飽足的一夜... 店員強調店主的經營理念是材料要優質, 不將貨就價... 說實在, 材料的確是相當優質, 價錢也不便宜, 埋單一計, 兩口子吃了$1250... …Read More

我食到喇!!! 我食到喇!!! 我食到喇!!! (食完2個星期仍然超級興奮) 曾一度掀起城中熱潮的台灣過江龍Dazzling Cafe, 試業時開店10分鐘派罄全日的籌, 都咪話唔嚇人... 聽講話而家星期六日都仲要排4小時, 攪到我一直都唔敢去試... 直至神秘食力組織骨幹成員強勢回歸, 我地又再次上演猛食出籠~~~分析了眾多食評中的排隊數據, 選守為攻, 係Dazzling Cafe開門前30分鐘去到佢門口等佢開門!!!11:30AM 到達, 大家睇下, 都無人嘅...策略成功!!! 第2張枱呀, Yeah!!! 影下門口相, 傾下計, 唔覺唔覺就入得喇, 感覺上都唔使點排隊咁... 不過呢個策略亦有風險, 排唔到頭圍用膳的朋友, 就最少要等1.5小時先有得食喇~ 排我後面的人龍都唔知入唔入得晒...12:00PM 開...... 閘...... 好靚的Private Room 呀!!! 好可愛的兔耳朵椅子呀!!! 好夢幻呀!!! 會否上演一幕Kenmerry夢遊Dazzling?!! 窗外的景色非常優美, 俯瞰整個九龍公園, 市區中罕有的大片綠茵, 可惜背光嚴重, 傻瓜機難以拍得好照片...所有店員都是刨冬瓜only, 不打緊, 你有你講刨冬瓜, 我有我講廣東話, 一樣落到單... 我地明明係第2枱進入店內, 店內座位未爆滿前已落單, 眼見好多客人都有得食, 我地等了又等... 等完再等...齋坐了足足1小時... 煮1個意粉要1小時?!! 入座時強調限食1.5小時喎!!! 仲有2個甜品都未到, 點夠時間食呀?!!佛羅倫斯花枝干貝麵 $95-- 帶子好巨型, 柔軟富彈性... 意粉辣辣地帶點菌香, 幾惹味... Not Bad... 就愛草莓蜜糖吐司 $98-- 必吃招牌菜, 好味卻沒有太大驚喜... 可能係好多其他餐廳食過蜜嘜厚多士... Dazzling的最大優點是將麵包切條烘脆... 經典巧克力鬆餅 $85 (加QQ麻糬 +$15)-- 噹... 噹... 噹... 噹... 幸福的鐘聲終於響起了!!! 來個壓軸大驚喜... 第1次食加入QQ麻糬的鬆餅, 真係超超超好味... 酥脆的外層, 包住Q彈的內心, 熱辣辣, 口感好到無朋友, 朱古力雪糕味甘少甜, 撈埋鬆餅一齊食, 又冰又熱, 好味到停唔到口... OMG... 我的減肥大計會唔會就咁栽係麻糬鬆餅手上?!! 我腦入面已經盤算緊幾時再來食喇~ 四水果茶 $42-- 中伏... 點解1粒生果都無嘅?!! 只係1杯落咗果味香料的紅茶... 加粒整色整水的大棉花糖... 無助於提升味道或口感... 印度大吉嶺 $42-- 朋友話睇食評見多人讚所以試下... 未見佢飲完有咩Comment...入座時話限食1.5小時, Finally坐足2小時15分鐘, 未知是否同落單接近1小時先上意粉有關...我堅會Encore!!! QQ麻糬鬆餅, 你要等我呀!!! …Read More

精美又可愛的杯子蛋糕絕對是我的至愛...在PMQ大展拳腳的Phoenix Sweets, 去年12月落戶交通便利的銅鑼灣名店坊, 絕對係粉絲們的天大喜訊...新店面積不大, 但貨品種類很齊全, 已夠大家選擇障礙症發作半天...裝修簡約, 帶點歐陸風格, 蘋果綠的色調讓人感覺很親切... 多款造型精緻色彩繽紛的杯子蛋糕擺在眼前, 實在花多眼亂, 樣樣都想試...嘩嘩嘩!!! Kawaii... Berries Macaroon $45-- 雙重朱古力紅莓蛋糕 x 100%紅莓牛油忌廉+紅莓馬卡龍... 只要見到馬卡龍, 我就會失去理智, 但今次無揀錯, 唔只得個樣, 味道仲好正... 單吃雙重朱古力蛋糕會有點苦, 非常足料... 但只要連埋酸中帶微甜的紅莓牛油忌廉一齊食就非常美味, Perfect Match!!! 吃掉1整個也不會膩... Rose Earl Grey $40-- 公平貿易伯爵茶蛋糕 x 有機玫瑰牛油忌廉... 店內的皇牌, 店員推薦... 對玫瑰牛油忌廉從來沒有好感, 但今天徹底改觀... 伯爵茶蛋糕味道及口感有點像罌粟籽蛋糕, 偏淡的, 用以襯托出玫瑰牛油忌廉的香味, 第1啖有點像在吃Hand Cream, 都是酸中帶微甜, 可是越吃就越有味道, 三兩下手勢就KO了, 好味... 買2件都有精緻小盒子, Very Nice... 其實呢... 其實... 我仲想試埋開心果、藍莓、蜂蜜柚子x熱情果、Valrhona黑朱古力... 下次路過名店坊可能會被佢吸咗入來...室溫放到第2朝先食都好好味... 不過我記得店員好似有提過即日食就唔好雪, 咁就最新鮮... 隔日食好似要雪... …Read More

以此篇為記念, 並唔係因為餐廳或食物特別, 特別的係可以4個人第1次一齊係香港食返餐...同朋友兩公婆去大班樓洗完塵, Honey就要去開工啦~~~我地3人行繼續搵食... 可惜問咗幾間酒店High Tea都Full Booking, 唉... 乜得香港人咁得閒呢, 平日都咁多人去High Tea...未諗到下一個落腳店, 慢慢散步去LC拎花花盅, 點知職員話要預先打電話留貨, 仲要出示信用卡, 2樣都無, 走...講開順路先拎, 朋友先醒起佢訂做了2對鞋, 我地又慢慢散步去拎... 原來中環都仲有舊式鞋舖幫人做鞋, 價錢都唔貴, 圓頭無踭款式啱晒我心水, 去沖繩前週圍搵都搵唔到...行下行下, 行到Landmark, 我同朋友講起以前細個睇八卦雜誌, D明星好鍾意去Landmark入面間Cafe飲下午茶, 拉姑成日都比人影到... 哈哈, 講緊係霆峰媽咪, 唔係Kenmerry...嘻嘻... 大家都好好奇, 一於走去睇下有無位... 咦?!! 點解我地嘅好奇心要事隔咁多年先發作嘅?!!排隊Walk-in, 等咗一陣就有位, 正!!! 正值聖誕檔期, Landmark的聖誕擺設年年都好大型, 今年主題係係法國過聖誕節... 我地坐呢個卡位真係好正, 對到正... 話實呢度無遮無掩, D明星來得真係擺明想比人影到囉... 謎底終於解開...我地呢... 係大班樓已經食到好飽... 來飲茶純為吹水, 飽肚的就食唔落, 見到隔離枱High Tea Set $300的食物賣相勁唔吸引, 決定叫件Cake來擺下陣...蛋糕伴侶$88 (連咖啡/茶)... 件件都咁精緻, 好難揀呀!!!結果... 揀咗好耐好耐... 終於... Raspberry Cake同黑白朱古力Mousse Cake賣相超精美, 猶如藝術品, 3款都好好味, 唔係得個樣... Raspberry酸中帶甜, Mousse幼滑, 底層的朱古力脆脆蛋糕又脆又軟... 黑白Mousse粒夜明珠好High咁呀, Mousse幼滑少甜, 太美味... 貌似Oreo的咖啡夾心餅, 賣相唔掂, 卻非常美味... 公司三文治?!! 明明好飽, 點解... 不要問, 只要吃... 估唔到... 食落又幾好味喎, 材料豐富又夠新鮮, 最正係有牛油果, 同埋隻蛋切開咗蛋黃同蛋白仲咁鮮明, 伴碟的薯仔沙律都好好食... 食埋佢今晚真係唔使食飯...環境同情調都好適合吹水, 我地吹到天都黑埋都無被人趕走, 以黃金地段的時間來計, 呢餐其實都算抵嘅...食物有質數, 是高級酒店以外的不俗選擇...…Read More

Running Man有星期一情侶, 我地都有星期二姊妹, 是日Tuesday又要上演餓鬼出籠啦~~~食力組合對上一次一齊去大坑搵食, 好似已經係好多年前嘅事喇... 浣紗廚房都執鬼埋喇...今日的目標係... 日本拉麵!!!6點前去到, 未開門, 唯有係門外等候... 餐廳外觀有95%日本本土Feel... 哈哈, 自家制麵4隻中文字出賣咗佢... 影門口相期間有外籍人士加入等候, 店員開門時竟然招呼佢地入座先?!! 可能外籍人士自己都覺得唔多妥, 同我地講咗聲Thank you...我地被安排坐在面壁位... 外籍人士有得坐吧枱... 成間舖都掛滿兒時玩意, 懷舊味濃...無緣品嚐星期六日限量供應30碗的鎮店之寶「魂之一杯」, 希望再來時有機會食到啦... 同係沖繩一樣, 落單跟自己喜好填紙仔... 忽然覺得好似食車仔麵咁...同日本的拉麵店一樣, 有生蒜供應, 右邊是榨蒜器... 第一次見佢係響北海道, 果時都未有Blog, 唔記得一風堂定一國堂喇, 果時都唔知係咩, 大 鄉里出城咁... 平時我一次要攪下佢先安落, 不過... 今日我唔需要佢!!! 順帶一提其他調味... 我喳喳聲KO咗碗麵先醒起無添加全何額外調味... 熊本黑蒜油豚骨湯麵 $92-- 嘩!!! 好黑呀!!! 食完條脷同腸會唔會發黑o架?!! 蝦佬喂可以Promote佢喎, 哈哈... 蒜味太強勁勁勁, 將豚骨濃湯底的味道完全淹蓋, 所以食完麵無飲到D湯... 普通硬度的麵身對我來講仲係太硬, 下次要試下軟的... 叉燒肥肥地又厚又腍, 好味... 追加味付玉子 +$15-- 糖芯蛋好味, 火喉剛好, 好軟滑, 有蛋香... 濃厚魚介豚骨湯麵 $98 (追加味付玉子 +$15)-- 力仔就好欣賞佢碗拉麵, 符合佢的最低要求 -- 食到一半都仲出緊煙!!! 佢就好啦, 可以飲晒D湯... 汽水 $15, 啤酒 $25... 減緊肥唔想飲汽水, 好彩比我見到吧枱度有綠茶, 都係$15... 力仔好滿意, 我就OK啦, 一來我唔太好拉麵, 平時都係食山頭火, 二來剛去完沖繩, 食咗沖繩Top 2拉麵--暖暮&通堂, 有比較自然唔會太有驚喜... 幸好拉麵來不致被比下去, 咁, 係咪算高質數呢in HK?!!埋單送張吸印仔咭, 1碗麵有1個印, 10個印送1碗麵, 有機會都可以帶Honey來試試... 夜晚刷牙個牙刷果然可以清潔牙縫... 原本個口已經無咩蒜味, 隻牙刷索咗牙縫的黑蒜油, 再刷落其他牙度, 成口都係超強蒜味, OMG!!!…Read More

近呢年開始轉咗去美心皇宮飲茶, 但係都未試過星期六日去, 因為實在太太太多人排隊, 千山萬水落到去拎完飛肯定有排等, 咪搞我…年卅晚如常中午落到去… 咦? 搞咩? 多咗部Kiosk係門口? 係自助拎籌? 仲可以用手機App係網上拎籌, 嘩嘩嘩!!! 不得之了呀~部Kiosk唔知裝咗幾多日(上星期未有), 好似派咗好多張籌咁, 唔通好多人都已經識用App拎籌? 唉, 等唔到, 轉場…年初四, 星期日, 最繁忙的日子, 比著以前唔敢幻想可以拎到位… 今日我勁啦, 10點幾一起身就用手機App係網上拎籌, 睇埋料理狂人先施施然坐小巴去太古城, 等咗半小時就有得食…最好笑係, 等位期間, 有伯伯搭訕話當年…伯伯係太古城住咗35年, 近幾年頂唔順食店的油煙味(咁我大約知你住邊), 搬咗去杏花村住… 有朋友回港約伯伯飲茶, 伯伯話美心酒樓最東只係去到太古城, 打後都無喇… 噢? 係嘅咩?伯伯又話, 識得的職員今日放咗假, 無得靠人事關係走後門, 焗住要排隊…跟住我即刻懶勁咁Show個手機App比伯伯睇, 大大聲話 : 「我2個鐘頭前係屋企一起身就拎定籌啦」… (下刪三百字)同伯伯吹完水, Honey葉晴上身(之前一晚剛看了大結局), 悄悄話: 「上一代靠關係的做法已經唔合時, 年青一代靠公平同科技, 早過伯伯有茶飲」… 嘩, 應景到呢, 笑到肚攣…玩App玩上癮, 到咗上星期六, 上堂前又用手機App拎籌, 上完1小時堂, 差不多到啦, 好驚呀, 急步衝去太古城美心, 好彩趕得切, 去到剛抖順條氣就可以入座啦…飲緊茶時發現, 呢個手機App用了1小時左右, 居然用了我60MB Data?!! Oh My God!!! 用咗我1個月15%的Quota!!! 有無搞錯呀?!! 咩App來o架?!! 好恐怖呀!!! 還返d Data比我呀!!!!!!各位, 如果你的Data Plan唔係無限, 或者少於1 GB, 我奉勸閣下開App前「停一停, 諗一諗」…講返點心, 呢度又有點心紙又有推車仔, 推車仔的姐姐都好友善... 來呢度飲茶, 唔多唔少係想回到童年, 雙眼忙碌地不停追蹤推車仔的位置及車身前面的膠牌, 仲要隨時候命衝出去搶點心的情景…今日Honey好叻仔, 攞到馬拉糕雙邊位, 佢話推車仔姐姐同佢講好多人鍾意食呢個位… 個樣又真係幾好喎, 糕面仲勁多欖仁, 我第一次見到馬拉糕果面有欖仁… 食落蔗糖甘香甜味好出, 口感好鬆軟, 唔會太甜, 又唔會太濕, 又真係特別好味喎…我地每次去都必吃鮑汁鳳爪, 佢呢度炆得特別腍同入味的, 而且點心車停係身旁舀鳳爪放到枱面只是一瞬間的事, 鳳爪入口熱辣辣, 零捨美味…叉燒腸好多叉燒, 腸粉皮好薄, 幾好味, 幾搶手… 芝麻煎堆仔無乜油, 圓碌碌, 芝麻餡都幾香, 唔錯… 麻蓉包唔係週圍有, 童年回憶作怪, 就算佢得好少麻蓉, 我都係要食…XO腸粉一放入口即刻被辣油嗆到, 咳到我吖…腸粉有彈性, 不會太油, 味道都OK, 略欠豉油鹹中帶甜的味道, 只有辣, 同辣, 同埋辣…蒸飯同蒸蘿蔔糕質數一般, 若急於填飽個肚, 食下無妨… 蒸飯都乾身, 無乜油, 小小的飲碗, 應該唔使點同人Share, 材料方面味道淡淡的, 似為老人家及小童而設… 蒸蘿蔔糕較濕, 夾開時有點鬆散, 臘味太少, 味道好淡, 相對蘿蔔的清新味都幾出沒有被淹蓋…最差係潮州粉果, 零芹香, 唔會再食…服務員方面, 佢地全部都好忙, 幾難搵的… 同友善的點心姐姐好大對比…環境方面, 都幾企理, 我地2個人都係坐4人枱, 相對寬敞…價錢方面, 2個人6個點心$250, 算合理, 街坊水平… (呢度D街坊)…Read More

舊同事約埋去銅鑼灣食日式放題為9月之星慶祝生日... 8點幾先有得食, 咁夜, 咁之前的時間點打發好呀?登~~~ 靈機一觸, 我提議去聰嫂度食一轉甜品先... 舊同事ss未食過, 顯得好雀躍...原本只係打算食一Round就走人, 點知, 呢班人竟然話想食Round 2, 甚至將食日式放題的錢拎晒來食聰嫂甜品自制放題, 嘩, 3個人要食HK$700-$800蚊冰冰, 好Crazy啫, 我驚我個胃會冰封喎... 沒有最Crazy, 只有更Crazy, 呢鋪我認輸了!!! 物以類聚呢個定律果然係無錯的...~ Round 1 ~紅豆茸西米冰 $23-- 我的至愛, 豆味濃郁香甜, 冰冰質感像厚實的沙冰, 十分足料, 含在口中, 慢慢溶化成高純度紅豆糖水, 真係超好味呀!!!龍眼椰果冰 $29-- 另一我的至愛, 龍眼的清甜以及獨特的果香, 完完全全突顯出來了, 又一高水準之作, 合上眼放入口中, 慢慢細味, 會以為真係食緊龍眼的…Q果 $21--  又係我的至愛, 當然啦, 大家叫我推介Share食, 我緊係會推自己鍾意食嘅啦… 水晶皮包住綠茶蓉同紅豆蓉, 樣子逗人喜愛, 口感QQ彈彈的, 綠茶蓉茶味甘香, 紅豆蓉香甜誘人, 一客真的不夠喉, 小二, 再來多一客…~ Round 2 ~不明解, 叫Round 2時, 店員好似好唔願意咁, Round 1果時都唔係咁…蜜瓜西米冰 $23-- 呢次大鑊了… 蜜瓜冰苦的? 典會咁o架? 天呀!薑汁意大利涼粉 $24-- 又一大鑊之作, 好難食! 涼粉切成長絲, 口感太淋, 加上薑汁同涼粉夾唔埋, 仲好似無落糖咁, 好怪呀!Q果 $21--  好彩, 有1/3唔係新嘗試…剛才仲有人提議話自制甜品放題, 嘿, 走都走唔切…放題又過咗鐘數喇, 唯有近近地去南記食個酸辣米線+春卷 (3個人Share 1個), 再去Starbucks飲咖啡嘆件Cake… 係Starbucks傾到人地12點收工先肯返屋企, 呢班人(包括我)係咪癲o架?…Read More