gm4ever's Profile

今朝起身突然想食蝦餃，於是就落去新興買。雖知我哋返工人，晚晚返嚟新興都收咗檔，係要weekend先有得食咋...唔想製造垃圾，自己攞咗兩個盒落去買，叫咗燒賣、蝦餃、流沙包、黑椒爽肚。燒賣：我覺得呢個最好食，蝦、冬菇、豬肉都係鮮味、彈牙，唔會好似平時d燒賣一大舊唔知食緊乜，我諗呢個就係手造嘅過人之處。蝦餃：蝦就的確係粒粒分明兼彈牙，可惜個皮未做到薄而煙靭嘅口感，爭咗d。流沙包：用鹹蛋黃造嘅流沙包，包身較薄，所以餡料特多，老婆食咗一個已經滯，啱晒我食埋。鹹鹹甜甜，有層次。可惜佢個心唔係真係好「流」，否則會更為完美。黑椒爽肚：老婆request。我就覺得冇乜特別，都係豬肚咁啦，不過唔係十分入味亦唔係十分彈牙。反而我覺得個鹹菜仲入味。總括：燒賣、流沙包好食，其他可以繼續發掘下。…Read More

可可店呢個名，我細細個就聽過啦。屹立咗係西環n年，不嬲都知佢開得夜，係港大宵夜蒲點，同埋食物選擇多，不過其實都唔係嚟過好多次。今日做嘢夜咗返嚟，心血來潮想食可可店，所以一個人走咗入去。十點幾，成間嘢爆滿，不過一個人搵位都係冇問題，唔駛等。叫咗必點嘅煎腸粉加蛋，而家要成$17。另外揀咗個蠔豉豬骨粥 $19。講真，價錢真係唔平，叫咗嘢嘅時候我已經諗住俾個ok佢。點知，真係好好食！煎腸粉加蛋呢個名物，唔係齋腸，係蔥花蝦米腸，煎得非常香口，加埋豉油、麻醬、甜醬、芝麻，熱辣辣，香、脆、滑。宵夜食到如此水準腸粉，夫復何求。蠔豉豬骨粥，份量細過我諗（唔係平時食粥嗰種大碗），但係好足料。幾件豬骨、蠔豉之外，竟然仲有唔知係咪意外落咗嘅皮蛋。粥身當然唔係生記嗰種綿綿粥，不過啖啖都有料，啖啖都入味。都係水準之作。偏貴，不過值。抵佢生意咁好。p.s. 以佢嘅人流同食嘅嘢，我諗住正常地下會濕濕地唔太乾淨，但係佢keep到枱面地面都非常乾淨，呢點好抵讚。…Read More

今晚同老婆拍拖睇戲，時間唔多決定試下呢間沾麵。嚟到6：45，唔使等，廿幾個位坐咗一半，我哋坐喺對住幅牆嘅位。老婆為海膽沾麵而嚟，冇乜點諗，叫咗軟麵同走蔥 $188。我就叫咗特濃豬骨沾麵$88，因為驚沾麵唔濃唔好食。我嘅豬骨到先，有蔥、半隻蛋、筍、兩塊叉燒。先食叉燒，肥瘦適中之餘，佢有微微燒焦香，係我喺日式叉燒中未試過嘅…其實叉燒係咪應該咁？湯底有濃濃鰹魚味，比豬骨更突出，我覺得搶咗風頭唔balanced；蛋係做到糖心亦入味相當唔錯；麵比平時湯麵嘅粗身，更有咬口，沾湯後仍然食到麥味，唔錯。海膽沾麵嚟到，有三格嘅海膽份量，上面仲有少量魚子。食啖海膽，先甜後苦，似乎唔係最新鮮，失望。魚子飽滿鮮甜 ok。湯汁加入咗海膽，多咗甜味，幾特別，不過我同老婆都prefer 豬骨嗰個。最後係麵，雖然點咗要軟身，但食落同我嗰D冇乜分別…最後我都有後加鰹魚湯再飲咗兩啖，都係嗰句，俾鰹魚搶晒。總括，豬骨濃湯係 ok 嘅，海膽就唔值貴一倍有多囉。…Read More

星期日，屋企人過嚟堅尼地城同我食brunch，我地決定入去呢間門口又花又單車嘅半新餐廳。坐低，地方非常闊落，唯一係d 音樂比較大聲，加上d 人被逼大聲講嘢，所以比較嘈。先叫杯Latte $40，非常有水準，咖啡同奶香味兩者兼具，而且好平衡，絕對唔係hea你，同附近嘅coffee shops 有得鬥。我自己喺門口已經決定叫 breakfast burrito $110，呢個喺Oolaa 食過覺得好正，想試下呢間點。薄薄嘅餅皮，包住炒蛋、煙肉、salsa、牛油果、同埋豆。炒蛋生熟啱啱好，加埋牛油果嘅creamy，又有煙肉嘅脆，salsa 嘅refreshing，最驚喜係平時我覺得係負累嘅豆，竟然係粒粒分明有咬口，好新鮮。呢個集多種唔同口感嘅材料一身，非常有層次，而每種都高水準，絕對驚喜之作。屋企樓下有佢，唔使再去Oolaa lu.跟住開始偷食，先係家姐嘅Avocado Smash $95. 基本上就係牛油果醬撻落多士度，另加兩塊煙肉。但係佢每樣材料都fresg - 多士同煙肉都係脆嘅，而牛油果醬加入咗檸檬酸味，啱啱中和煙肉嘅油同鹹，真係正。跟住媽咪嘅Big Breakfast $145。一上，咁多嘢嘅？除咗menu 有提嘅牛扒煙肉腸蛋多士番茄同茄汁豆，仲有蘑菇薯餅同菠菜，係咪傻架？不過，佢塊牛扒真係麻麻地，未至於韌但一d 都唔嫩滑。我覺得不如冇咗仲好，反正冇咗佢，碟嘢都依然係超多嘢食。煎蛋都算好嘅，不過叫咗over easy，嚟咗 over medium，好彩蛋黃都仲係流心。其他冇試唔評。老豆食素，所以叫咗 Corn Fritters $110，而將原本撈入去嘅三文魚另上俾我哋。三文魚正常冇乜驚喜，個corn fritters 係粟米粒造成嘅餅，夾住牛油果醬，番茄，芝士，上面仲多咗隻menu 冇寫嘅poached egg，睇落好靚，我就淺嚐咗d 粟米幾甜幾多汁咁，唔係太多嘢可以講。總括嚟講，水準非常高，以百零蚊嘅價錢，絕對超值，可以經常encore。(可惜架車俾人抄咗牌)…Read More

夜晚冇煮飯，叫埋街坊一行五人入咗嚟食嘢。其實呢間嘢應該都開咗幾耐，不過surprisingly Openrice 竟然冇listing 要我申請。原諒我由於已經過咗兩三個星期，已經唔記得清楚d 價錢。先來椰青，唔係最嫩因為d 肉好厚，不過都甜嘅，ok小食拼盤(冇影sorry)，有蝦餅、豬頸肉、春卷、雞翼。其中豬頸肉好好食，甜中帶辣，外面燒得脆脆地而裡面軟滑多汁；春卷就麻麻地，唔脆而且d 餡好似放咗一陣唔新鮮；雞翼已經冇乜印象；蝦餅大大件有蝦味，好食。軟殼蟹青芒果沙律，軟殼蟹微熱唔脆，個汁偏甜，我覺得一般。冬蔭功湯，又蝦又菇非常足料，酸就夠晒酸，不過我個人prefer佢再辣D。份量亦唔太夠，五個人五小碗已經冇乜淨。炒通菜同炒飯兩樣都稍為偏鹹，不過我個人比較重口味所以冇問題。兩碟都好香，尤其個飯係食到唔停口，亦唔會炒得太油。明爐烏頭，酸酸辣辣非常清新，個湯底喺酸辣以外又帶少少清甜，同條魚非常夾。呢條份量亦唔少，五個人係咁夾都夠。好食，係呢餐豬頸肉之外最好食嘅。總括嚟講，家庭式小店，泰國人主理，平平地每人$110，係堅尼地城一堆西餐中嘅一個唔同d 嘅選擇，唔錯。…Read More

今日淨係食咗個自製奄列，到咗下午茶時間都幾肚餓，於是去咗呢間喺屋企附近嘅半新茶餐廳。喺而家下午茶餐成日都要三字頭嘅時勢，佢仲有二字甚至一字頭嘅餐，都幾抵。我哋叫咗芝士黑椒蘑菇批($22)跟熱好立克同四寶米($28)跟熱奶茶。先嚟奶茶，茶味夠，但係有d苦澀味。合格嘅，不過唔係最top。跟住個批，睇佢價錢都知唔慌大件，事實亦如所料，比我掌心仲細少少。咬一啖，暖而唔熱，不過個批身脆而有餅味，餡都算幾足料，芝士蘑菇同黑椒都各有各突出，而互相亦好夾。如果熱嘅應該會好好食。四寶米，四寶(墨丸、牛丸、魚蛋、片頭)只有每樣一粒，稍為失望。有炸蒜、冬菜、蔥喺面，都做得幾足，俾返少少分。一飲湯底，佢話係魚湯但係我又唔覺得係，應該都係半味精湯。好在四寶粒粒都唔錯，尤其魚蛋同片頭，彈牙有魚味，以乜都做嘅茶餐廳嚟講係好過我預期。總括嚟講，質素算唔錯，價錢抵，可encore。…Read More

今日公司有嘢搞到我兩點先食飯，於是去最近嘅選擇之一：雞煲皇其實之前已經嚟過幾次，知道佢每日午餐中一定有個長駐嘅紅蔥頭文昌雞，所以係有目的咁嚟。嚟到兩點，大把位，梗係獨佔卡位。叫咗餐，跟熱奶茶。兩三分鐘，所有嘢到齊。紅蔥頭有一隻雞髀，再加雞翼，份量唔少。碗飯我叫咗少飯，不過都唔算少，阿姐仲特別話「唔夠飯出聲喎」，似乎高估咗我食量。先飲一啖奶茶，失望。呢種茶味，係大家樂大快活嗰種奶茶嘅水準，一d 都唔好飲。雞髀非常滑，皮唔算薄，亦冇乜雞味，應該都唔係咩靚雞，但係跟咗佢哋嘅紅蔥頭豉油，味道好夾，送飯一流。d 飯係正常白飯，合格。墊住雞底仲有一d 黃芽白，令呢餐未至於冇菜食，而且佢又可以吸收更多紅蔥頭汁送飯，好食。以$34有雞髀飯有嘢飲嚟講，都算唔錯嘅選擇。…Read More

今日攞咗leave，早有預謀要喺屋企附近食個悠閒嘅早餐，所以嚟咗華星。weekday 朝早，大把位，俾我獨佔咗四人卡位。諗都唔使諗，叫早餐，轉炒蛋，火腿通粉(而家冇得轉叉燒？)，跟熱奶茶。叫咗唔夠兩分鐘，三樣一齊上。先食火腿通，佢嘅湯底有一種甜味，令佢同普通茶餐廳有d唔同，好味少少。火腿冇乜特別，但係通粉做得彈牙，呢個真係少有。炒蛋，冇得輸！超滑得嚟，又唔會生到蛋汁周圍流，又有蛋味。水準極高而穩定，絕對超越澳牛。牛油多士，都係正。厚多士表面金黃脆口，內軟而有包嘅甜味，牛油已經溶晒滲晒入去，真係好難好食過佢。熱奶茶，香滑茶味濃，但唔會有苦澀味，都係非常高水準。加埋呢班有禮貌嘅侍應，同有軟墊嘅座位，都係嗰句：唔使再去澳牛。…Read More

今日有事嚟觀塘，唔係太肚餓唔想食飯，見呢間車仔麵排隊，於是就食呢度。去counter 揀嘢食，都幾多平時車仔麵冇嘅料喎，不過$6-10一款有少少貴，所以揀咗兩款，就係$8嘅煎魚餅同菜甫煎蛋，跟$12米粉同埋辣汁，配埋一罐$7 zero，一共$35。叫咗唔夠一分鐘就整好。攞咗麵去搵位，有八張圓枱，每張又幾張膠凳，但係都坐得幾滿。唯一冇人嘅一枱，枱面有兩碗食完嘢麵，仲有d 雞翼尖骨喺枱面，都幾核突，不過都唯有係咁坐。之後食咗一陣，阿姐就嚟清枱，仲好好禮貌。湯底：係味精湯加咗沙茶醬再加辣，簡單講就係cheap 嘢。煎魚餅：有手掌心咁大，剪成四件，彈牙香口，唔錯。菜甫煎蛋：仲大件過煎魚餅，內含大量菜甫碎粒，但係又有足夠嘅蛋去承托，仲要煎得啱啱好唔會太老，齋食偏鹹，但作為一個餸就啱啱好。米粉：正常無乜特別。總括嚟講，$28車仔麵唔算好平，但係有大大件特色餸，都值，可以encore。…Read More

尋日食完令人失望嘅越南嘢，行經呢間日本嘢門口，真係返咗大半年都唔知深水埗有日本嘢食(拉麵除外)！於是今日拉大隊去試食。一行七人入到嚟，可能時間比較早，全店廿幾三十個位，只係坐咗一枱兩個人。我點咗尋日已經見到嘅三色飯，即係海膽、三文魚子、蔥碎吞拿魚腩飯，因為$108呢個價錢實在太吸引 - 三色飯唔係二百幾蚊架咩？？原諒我係Openrice新手，竟然唔記得影前菜、沙律、湯...前菜：係木魚茄子，有三件，茄子口感啱啱好，亦吸收到汁嘅鮮甜，以跟餐前菜嚟講相當唔錯。沙律：係柚子汁嘅蟹子沙律，細細兜，用柚子汁+沙律菜，好過嗰d蟹柳青瓜粟米+mayonnaise，健康好多。麵豉湯：普通，冇咩特別。跟住主菜上枱（今次有影相）。份量少咗d，但未算可憐，考慮埋價錢，ok啦。首先試吞拿魚，有油香，蔥嘅比例恰到好處，好。跟住係魚子，大粒而且好飽滿，咬落卜卜聲，鮮味而唔會過鹹，好。然後係海膽，有兩大件，似加拿大嗰隻，鮮甜唔腥，好。最後係飯，有淡淡壽司醋嘅酸甜味，唔會過黏或者過散，好。最後送埋正正常常嘅一粒雪米糍，芝麻味，ok啦。以呢餐咁高嘅質素，$108 + 10% 真係超值。喺深水埗返工果然有着數！以後會經常encore！唔記得提服務：有位男士（斷估唔係經理就係老闆）服務態度非常好。我哋有個同事食素，佢都好貼心咁推介（actually custom made）咗一份素天婦羅烏冬俾佢。另外斟茶各樣都好自動好快。（btw同事話d烏冬好好食）…Read More

今日冇乜胃口，想食清D，諗起呢度有間越南嘢，就入咗嚟。可能未到一點，所以都好多位。點咗menu 上最清嘅扎肉湯河，仲要轉埋檬，再加跟餐熱檸蜜。一上，個presentation已經麻麻，五片亂擺嘅扎肉，零碎嘅蔥，芽菜十條，洋蔥一小片，冇青檸辣椒香葉。筷子自己攞冇問題，但係冇湯羹。問人攞完湯羹，飲一啖湯，都叫有少少牛味，不過比較淡。檬粉比較腍，僅僅唔碎，不過唔好諗住有任何咬口，唯一係份量都算足夠。扎肉都係D急凍貨色，乏善足陳。檸蜜都可以，冇乜特別。算係求求其其解決咗餐。佢就唔係貴，不過以咁嘅價錢，其實區內有唔少更好嘅選擇。…Read More

返工返深水埗嘅我，每朝都經過呢間米芝蓮腸粉店，但係自從前排米芝蓮推介之後，佢朝朝都有人排隊(下晝更加多人)。今日見排隊人數比較少，所以買咗一份。腸粉價錢以我理解係$7四條，然後每$1多一條，我就齊頭要咗$10，多芝麻。返到公司一開，腸粉份量足就一定架啦。口感方面，佢有少少挺身，唔係最滑嗰種，不過用咗好多層捲埋，加上佢有豬油底，所以都算係好滑。而汁方面，佢有好香嘅豉油麻醬甜醬(因為加咗豬油)，而由於佢唔係普通腸粉底，所以無好似平時外賣腸粉咁索乾晒d豉油，食到最尾都仲有汁淨返，非常好。唯一覺得阿姐剪得比較求其，長短不一，有d會比平時腸粉長成倍，又有D剪開一半又未剪斷，呢樣爭咗d。…Read More

今日突然興起去到太安樓食宵夜。老婆話有間紫薯手抓餅，於是就慕名過嚟。我一路以為係紫薯做餡嘅手抓餅，點知嚟到先知，原來係紫薯餅底。咁ok啦可以包D紅豆呀雪糕呀應該幾好食，點知睇嚟睇去都係鹹嘅餡，我心諗，咁咪又鹹又甜好奇怪…？算啦一場嚟到，試咗先算。$26嘅紫薯手抓餅，有好多餡料配搭可以選擇。老婆淨係話一定要有肉鬆，我就揀咗芝士吞拿魚肉鬆。即叫即整，喺等緊嘅時候，先知係可以自選配料，每款$4-7，而紫薯餅底就$16。不過跟返佢d配搭會平幾蚊。紫薯餅一到手，熱辣辣不在話下，一咬，好食呀！首先紫薯餅底原本冇乜期望，但係估唔到個紫薯味都幾明顯，而又做到外脆內暖。仲有就係手抓餅通常最怕佢太油，但係呢個餅底keep到乾身(睇下張相個紙袋都冇滲油)。餡料份量非常足，芝士溶晒落去，同沙律醬、吞拿魚、肉鬆非常之夾。每樣都好足，而每樣都食到。半鹹甜方面，我覺得都可以接受，始終紫薯唔係話十分甜。不過我覺得如果佢推出埋甜嘅口味俾人選擇會更好。總括嚟講，不負所望，值得encore！…Read More

今日興之所至去咗太安樓搵宵夜。食完紫薯手抓餅仲有quota，就試下呢間阿蘇讚嘅蛋記雞蛋仔。前面得一個人等緊，$13一份，等兩分鐘有得食。雞蛋仔要好食，我覺得都係三個要求：外脆、內軟、有蛋味。以呢三個要求嚟講 -外脆：咬落會卡卡聲，都算做到脆，不過有少少硬。內軟：做到。而且佢嘅份量唔多唔少啱啱好，唔會質得太實，又唔會得個殼。有蛋味：對唔住，真係冇乜，呢個係主要扣分位。總括，都係合格有餘嘅，不過仲有進步空間囉。…Read More

年近歲晚嘅星期六下晝，上環係一個死城，呢個時侯嚟平日排隊嘅熱店，大把位。叫咗最出名嘅兩樣名物：魚腩粥同筋腩麵筋腩麵先上，一飲湯底，又唔係話冇牛味，但係硬係有D雲吞麵湯底嗰種味，唔係好夾。麵係爽身嘅，不過鹼水味重，要落少少醋。牛腩有四件，瘦底但係一d都唔韌。牛筋仲多，不過稍硬，我prefer 佢再煲腍D。總括嚟講，都算好嘅，不過我鍾意華姐多D。魚腩粥後上，大大碗之餘仲有好多舊魚腩。粥底好綿亦好有魚嘅甜味，不過相信都係有味精，因為食完好口渴。魚腩依然如記憶中嘅滑同甜，配埋另上嘅豉油，真係勁滿足，冇得輸。生記兩名物嚟講，都係魚腩粥稍勝一籌。…Read More