紅白藍007's Profile

今日同老婆閒逛MK,到下午5點見有啲攰同肚餓就去咗家樂地庫搵嘢醫肚.地庫嘅食店唔多只有拉麵,牛肉涮涮鍋和餃子店揀.見間間唔使等位只係呢間拉麵店要等位,就試吓呢間喇.等咗廿分鐘終於有位嘞,店內好有東京feel,我點咗牛,老婆點咗豬.啲服務員好貼心問我哋啲茶要凍定要熱.落好單到啲麵上枱唔使10分鐘超快手(當時係爆晒場).快不特只,仲要好好味:麵夠彈牙唔會黐埋一舊,溏心蛋,牛肉嫩滑,湯頭濃郁再加埋爽脆紫菜......"和味"十足.…Read More

今日係老媽子牛一我請飲茶,就咁一班人去咗銅鑼灣百樂門.地方十分寬敞唔會坐到迫迫夾夾又有維景睇,正!坐落後個個'拿拿淋'落單叫嘢食.唔知係唔係我好少請客佢哋叫到成枱都係......鼓汁蒸魚雲,迷你珍珠雞,豉蒜蒸排骨,香滑流沙包,豉味蒸鳳爪,紅油抄手,蒜茸蝦長春,安蝦咸水角,煎釀虎皮尖椒,紹菜海鮮扎,原蝦燒賣皇,豆沙煎軟餅,雪山叉燒包,薑蔥牛柏葉,瑤柱菜苗餃,水晶蝦餃皇,帶子鳳眼餃,皮蛋瘦肉粥,鮮芒椰汁糕,雷沙湯丸......8個人叫咗廿幾樣點心埋單六佰幾,好抵食!但啲伙計沖水,落單較慢要有心理準備.…Read More

我同老婆趕咗成個月工終於今日搞掂晒,今晚佢好豪咁請我呢個助手食晚飯.我就揀咗呢間攞獎食店食呢餐慶功宴.結果食到一肚氣......1)首先個帶位侍應掛住傾計要响門口呆等超過三分鐘,2)點咗既食物出到亂籠,3)個經理攞啲牛柳串燒嚟玩浪費食物,4)個SET既龍蝦上枱時已經白烚過無晒味,5)個侍應執隔離位時啲醬汁整到我手肘同件衫對唔住都無聲,要到我開聲先至攞'一張'濕紙巾比我,6)兩個人加埋一合共$427,但碌咗我$472.而遞單個經理都傻吓傻吓唔知碌錯咗要我指住話比佢聽,最後都無講對唔住.真係"上樑不正下樑歪".呢間嘢食品唔錯但啲服務差過九流地踎檔.下次請我都唔會去!!…Read More

今日返晏去到公司附近先搵食.其實平時日日返工食嚟食去都係嗰啲嘢好鬼悶啫天氣又咁熱行嚟行去都唔知食乜好,咁啱行到見唔使排隊咪諗住食兩三碟壽司就返工.坐底見好多人食SET?!我去過幾間同集團嘅壽司店食過但唔見有呢啲定食餐結果叫咗個海鮮飯SET.碗飯面鋪滿:三文魚~兩大塊厚切三文魚十分鮮甜美味油甘魚~兩塊油甘魚又係厚切食得滿口油香飛魚子墨魚~飛魚子脆卜卜,墨魚夠彈牙三文魚子~粒粒飽滿,唔咸無腥味,正蔥粒吞拿魚腩蓉~份量十足,無根唔黐牙.個餐除咗海鮮飯仲有前菜沙律同味噌湯十分飽肚.…Read More

今日晏起身結果早餐連午餐一齊搞掂.老婆同事介紹過太興下午餐都幾多嘢食,啱嘞依家去試吓.2點半去到唔使等有位.一口氣叫咗三個下午茶餐.鮑汁雞翼撈麵餐,三大隻雞中翼雖然係雪雞但用鮑汁煮能帶出雞味無雪味.麵太淋失去口感.雪菜肉絲湯米粉配炒蛋多士餐,米粉超大碗雪菜肉絲落足料,炒蛋軟滑蛋汁多蛋味濃加上鬆脆多士,一流.輕盈叉燒飯,叉燒肥瘦適中,但飯身略硬同唔夠叉燒汁.兩個人食3個餐有啲飽過頭但好味所以食得晒.…Read More

四點幾接老婆收工去咗尖沙咀行吓海港城.行行吓老婆肚餓就快步搵嘢食,結果去咗新港中心食台風上海菜.記得兩年多前食過比起台北總店遜色之後一路都無再幫襯香港店.今次去到可能時間尚早唔使等位,原來已裝修過地方闊落坐得舒服溫度適中唔使著褸.見老婆肚餓叫多幾味,有原味晶肉,夠爽口彈牙但太凍食兩舊已覺膩.特色小籠包,皮唔厚內裡湯汁豐盈,豬肉餡鮮味十足.菜肉蒸餃,菜肉餡太乾.菜肉包,包皮鬆軟餡料十足.原盅牛展湯,之前飲過雞湯,今次試牛展湯.湯頭十分清澈牛味十足但無羶味,十分出色.迷你芝麻包,賣相討好一啖一個唔太甜但芝麻餡比較少.埋單後留意到有好多食客都有點排骨蛋炒飯同醉雞,下次要試吓.整體比上次有進步,但到黃昏五點半就有好多人排隊等位要食宜襯早.…Read More

今日兩公婆去咗又一城既八月花嘆茶,呢間新派酒家很得我老婆歡心的.地方寬敞,裝潢富中國風但不俗套.她讚食物味道好之外菜式好有創意.茶市11點開始營業,我和老婆約11點半到都已經有十幾張枱既客人.由於老婆係常客所以由佢發板.首先係燒汁茄子鮮菌,油太多而汁少唔夠冶味.魚湯鮮竹卷,魚湯鮮甜無腥味而腐皮吸收晒啲魚湯味再配合卷內豬肉,甘筍,西芹等材料味道豐富.叉燒包,一搣開個包一陣混有麵包味和叉燒味既香味已叫人口水直流.珍珠雞,清香荷葉味滲進糯米配料內但糯米略硬了點不夠軟熟. 花膠瑤柱灌湯餃,厚身花膠,大大粒乾瑤柱,餃是以豬肉和鮮蝦做的再加上雞湯湯底.十分滋味! 蛋撻,皮脆蛋香,一口一個連食兩個都不會過膩.…Read More

話說三個月前在同一間食店就食到火滾,服務差,冷氣太凍不特只餸菜無嚟味道連杯水都殘留洗碗水味......但今晚呢一餐令我對呢間餐廳有點改觀.今晚外母請食飯由佢發辦去邊度食,見唔使煮有時間整埋吓屋企.到咗晚上七點半去到都唔使等好耐就有枱,坐低唔使避風口位,落單既侍應有耐性就算改咗兩次單都好有笑容同有禮貌地覆單.今次外母點咗四個餐:有我鍾意食既西蘭花炒班球,西蘭花清爽,班球炒得很冶味.原本想幫老婆點豉汁蒸倉魚但無貨唯有叫咗清蒸紅油,魚肉十分新鮮可惜蒸過火候肉有點"鞋".同大四喜燒味拼盤,自選四種燒味:叉燒味道一般夾起有啲散散哋,乳豬皮脆肉嫩無乜肥膏十分出色,油雞沒有雞味和分蹄"乾爭爭"很失望.仲有外母至愛既咸蛋蒸墨魚餅,咸蛋既咸香加上墨魚滑既彈牙令人十分回味.最後要咗杯冰鎮奶茶.雖然各方面都有進步,但上飯既速度仲需要大力改善,唔係既話等到啲餸凍晒真係食乜都無味!…Read More

今日係外父牛一外母訂咗七點食石頭飯一行六人浩浩蕩蕩去.當到達時真係比門口幢魚缸嚇襯真係包羅萬有,但我既目光好快比電爐燒緊既乳豬吸引過去.店內裝修平實枱與枱有足夠空間坐位唔算迫夾,一坐底一人點一個餸:化皮乳豬~皮脆肉嫩連骨都食埋.蒜蓉炒白菜仔~不過不失,味道一般.椒鹽九肚魚~外脆內軟,十分冶味.薯仔牛柳粒~牛柳粒味濃鬆軟唔韌,薯仔煎過不會太糊口.兩者在中西餐都是絕配.雜菇粉絲蟹煲~肉蟹斤兩十足,粉絲吸收晒蟹既鮮味.但太咸,難以入口失敗之作.萬發石頭飯~份量爆棚,配料豐富飯粒夠乾身但唔夠飯味.豉汁炒蜆~豉汁太濃蓋過晒蜆味亦略為咸了點.海皇豆腐羹~原全無味,好似將啲料白烚完回鑊打茨咁.埋單時數一數六個人食七餸一湯都真係幾誇......順帶一提全場兩層廿幾三十張枱得六七個伙計,叫餸出菜同招呼唔使講都係差啲要有心理準備.仲有個洗手間唔只細仲唔多乾淨,如果忍到就返屋企喇!…Read More

因為上個月日本地震而引發核幅射危機所以一個月嚟對日本菜抱持禁食主張,但諗深一層日本農林省對出口食品一向都好嚴格所以噚晚約七點半帶咗老婆去尖沙咀一間做日本菜很出名的店食餐好.出咗地鐵站一路行發現條街無乜人連其他食市都'門可羅雀'好似"沙士"嗰陣時咁心有啲忐忑不安.行到門口一睇好有日本居酒屋風格而內裡早就有七成客人食緊,當中只有我倆係香港人其他就係日本人.我和太太要求座在bar枱位因為可以睇到食材新唔新鮮之外仲可以欣賞板長既刀功.當我見到各種魚生都好新鮮樣樣都想試板長介紹了:壽司盛~燒海鰻壽司,熟海老壽司,赤身壽司,拖羅壽司,BB拖羅壽司油甘魚壽司,鮭魚子軍艦,海膽軍艦,兩種卷物.三色飯~海膽,鮭魚子,魷魚. "啊依絲"~~自己另加了大拖羅壽司和蔥花吞拿魚手卷.海膽採用北海道貨夠豐腴味道濃郁,鮭魚子口感一流滿口魚香,大拖羅油花分佈平均入口即熔.本來想埋單時服務員介紹了來自靜岡縣的溫室蜜瓜,就叫了一客試試.雖然沒有夕張蜜瓜咁濃蜜瓜味,但味道帶一份清新不會一味太甜.真係估唔到身在香港可以食到咁出色既日本菜.不論店內裝修,食材,服務,氣氛都令我想起北海道和東京......呢餐大滿足!…Read More

今日難得放假一於同屋企人出去"飯堂"飲茶.姐夫BOOK好枱11:45AM準時到達.坐低開好茶"拿拿林"剔點心紙.因為每個月都差不多會嚟呢度飲茶聚會,今次我老婆提議點一些很少會點的點心所以無蝦餃,燒賣,腸粉......今次點了的馬拉糕,柴花生粥,窩貼,燒茄子,不是不夠味就是凍了點,還好有些新發現下次可以再試,其實呢度嘅珍珠雞,蝦餃,布拉腸粉,鮑汁鳳爪,蘿蔔酥,生滾魚蓉粥都很有水準的.…Read More

出咗獎金心情靚靚諗住今日收早同老婆搵間好嘢食番餐好,就諗到有位舊同事介紹過嘅西餐廳(响舊公司附近).襯食晏時打電話訂位.約好老婆一齊由銅鑼灣坐地鐵出發,到咗北角出口行唔使兩分鐘就到十分方便就腳.因為訂咗位所以唔使點等就有位.簡約裝潢,暗暗燈光加上枱上燭光情調一流.而鄰坐都係情侶居多.打開餐牌點了這裡較出名嘅菜(都係舊同事介紹).先上小食-香煎法國鵝肝同白酒煮新鮮澳洲青口仔: 鵝肝夠厚身入口即溶滿口油香歷久不散,澳洲青口除了有蒜香和酒香外仲有青口本身海水鮮味.再嚟湯-特濃黑松露野菌忌廉湯同法國海龍皇湯: 黑松露野菌忌廉湯味道不袛香濃還飲到細細粒的黑松露粒,海龍皇湯除蝦味濃鮮味十足,湯裹還有一只大蝦和藍青口.主菜出場-拿破崙式芝士焗釀波士頓龍蝦同炭燒美國Prime級(Dry-aged)牛肉眼伴巴黎牛油: 波士頓龍蝦嘅龍蝦肉鮮味彈牙,意大利飯飯身夠挺黑松露份量十足,點咗四成肉眼扒肉質嫩滑雖然用炭燒但一樣肉汁豐盈入口即溶,伴薯角亦十分出色.錦上添花甜品- 熱疏乎里(雲呢拿)同麵包布丁: 疏乎里熱騰騰很鬆軟,布丁口感新鮮,布丁上菠蘿雪巴有助消滯.直得一提嘅係呢度服務生對食材和餐飲都有詳細講解.雖然我沒有點餐酒但佢都十分有禮貌同耐性.…Read More

今日放假想同老婆二人世界撐枱腳但又唔想食日本嘢(對食材信心問題).左諗右諗結果去左銅鑼灣利利舞台廣場16樓据扒食法國田螺.約7點鐘唔使等位落咗兩客"法國田螺西冷牛扒餐".可能熟客幫襯多環境比較嘈雜.同老婆傾咗約十分鐘就有得食嘞,雖然凍咗啲但餐包夠包味多士夠鬆脆而羅宋湯就好夠味材料十足.前菜嘅焗法國田螺就夠大隻夠肉汁,香草味同螺肉十分配合.主菜嘅西冷扒要咗七成熟,肉質雖然鮮嫩但肉味不足,屬一般水準.最後要杯熱檸茶,檸檬同茶分開上,服務貼心.…Read More