yamyams的個人專頁

醬油蟹聽就聽得多，但我同朋友真係未試過，上次到韓國旅行時又未知有樣咁既食物，但個個都推介，講到好好好食咁，又無計劃短期內再遊韓國（完全唔係哈韓族），所以都係決定搵間俾人大推既餐廳試下算啦！點知上網搵下搵下，好多食醬油蟹既地方都要預早3日訂，而且好多e d餐廳都係食韓燒既～自問又唔係食到好多野，食完隻蟹都飽左一半，真係再食唔到韓燒，都諗住放棄嫁啦。但忽然，我係一個blog到，見到有人推介醬缸小食，仲話同香港首間醬油蟹「醬缸」好似，仲話試過walk in都有，而且又唔係食韓燒既餐廳，咁就決定試一試！晚上7點左右到左餐廳，真心係一間小食店，得大約20個位，已經滿左一半。待坐底之後，我地即刻問佢有無蟹，佢話有就即刻叫左2隻（無得叫一隻試下），再叫左個炒年糕，咁就夠曬飽啦！等左一陣，個蟹到啦，兩隻裝成一大碟，仲有d伴碟（一堆我唔食既紅綠辣椒），連仲跟一碗紫菜飯。打開隻蟹，搵下號稱「白飯神偷」的蟹膏先。蟹膏唔算好多,但好算有膏，唔理咁多試下先講，一入口就食到淡淡的醬油味，夾雜住dd腥味，但好快之後就有一陣濃濃甘香的蟹膏味！果然名不虛傳！食左兩啖之後，就轉攻蟹肉，半透明的蟹肉帶著淡淡的醬油色在燈光下閃閃發光～但一啖咬落去～滑溜溜既感覺真心核凸，而且味道一般,係食到淡淡的醬香味，但一d都唔突出，又食唔到蟹應有的鮮甜，味道好一般姐。於是我就好求奇咁食左d蟹肉就算！ E個時候炒年糕就到左啦，size唔算大，偏辣，我同個fd大愛。又可能因為食完醬蟹，食返d熱同熟既野中和返，所以覺得特別好食！總捨而言，我覺得醬蟹大熱順遂係食正韓流姐，以一隻蟹黎講，講膏；佢既膏無大閘蟹既咁甘香軟滑，講肉質；真係任何一種其他煮法既蟹肉都鮮甜過佢！而且又不便宜，為返都要$120幾蚊一隻，好想食既可以同朋友夾黎試下既，但就唔係咁推介俾唔係咁鍾意食生野既人啦～其實，咁樣漬左d蟹之後生食，好多菜系都有（上海醉蟹夠名菜啦！），但一直都唔係咁受歡迎，係有原因家嘛。蟹，都係熟食既好，起碼無咁多細菌丫！…查看更多

Sogo thankful week，血併護膚產品之餘，當然要去supermarket 買野食la~ 去得supermarket，當然要食埋杜如風/科都讚既芝士撻la~ 由拎籌、排隊、俾錢到拎到個撻，大概30分鐘到，可以接受la~ 一大盤一大盤新鮮出爐芝士撻喺面前，睇見到開心！買左3個，但中間果粒歪左，唔夠靚仔...味道:日本人推介係室溫食呢個撻，所以我拎到返屋企無話特登叮返熱黎食。味道基本上同喺日本食到既一樣，個皮對香港人黎講，都係甜左少少，但可以接受。芝士餡無加熱返，唔會係流心效果，半固體狀，鬆軟非常，其實日本人就係鍾意呢個texture。芝士味香濃，令人愛不惜口。總結，味道好過半熟工房，但性價比不及美心。…查看更多

拍拖行街街，行到攰，諗住搵間cafe抖一下。唔想去連鎖coffee shop，於是上openrice search，揾到呢間，見comment唔差，就上去試下。搭lift上到去，見到只有一隻閂左既門同好大浸酒吧味，同2個女仔周圍裝裝下，好似去錯地方咁。唔理，試下推門，一開門，好彩無搵錯地方，真係cafe黎。原本坐outdoor，可惜天公不作美，落起毛毛雨，唯有坐返一入。但可能樓底唔夠高，回音好大，有d嘈。兩個人，叫左杯忌廉咖啡、紫薯鮮奶同芝士肉醬薯條。紫薯鮮奶(少甜)外表:淺紫色，配上拉花，非常少女。味道：雖然叫左少甜，仍然好甜，越入越甜，有紫薯味既，不過太甜la~忌廉咖啡外表:一大舊忌廉，見到都開心。味道:忌廉軟滑，但味道唔夠香濃，咖啡普通，唔太差亦唔可以叫好。芝士肉醬薯條外表:一大pat肉醬上面仲有半溶芝士，好邪惡ar!味道: 新鮮薯條配半溶芝士，基本上無得輸，只係肉醬有點過咸整體而言，喺cwb行到攰坐下飲野ok，但唔好expect係飲靚咖啡既地方lor~…查看更多

星期六，偽文青當然要去書店行下，吸收下文藝氣息。銅鑼灣誠品就行得多，尖沙咀分店還是第一次黎。與其説書店，尖沙咀店其實更似生活百貨店，有很多精品及食物(例如：有機菜、麵包、小食...)以供購買。閒逛到天仁茗茶角落，大大個display話新推出茶味軟雪糕，仲要唔止有綠茶味，仲有鐵觀音味，於是便一試。$20大大一杯鐵觀音軟雪糕，份量十足，相片所見，已經係俾人咬左一大啖既情況，而且雪糕係fill滿個筒！所以食到最尾一啖，依然食到雪糕，唔會乾淨淨。雪糕質地雖未如日本軟雪糕般幼滑，但都ok，不似台灣飲品般甜，而且茶味香濃，食後甚至有些少回甘感覺，至於雪糕筒亦夠脆，就算食到最尾都無淋曬，但又不會過乾。我bf 話鐵觀音軟雪糕已經榮升佢至愛雪糕第一位(前第一位為喺日本街頭買既一杯豆腐軟雪糕)。…查看更多

午餐時間，又要喺擠逼既太古坊附近搵位食飯。今日同事帶左我黎呢間日本餐廳。入到去，裝修幾特別，幾有東洋味。不過幾逼，你知la，土地問題ma...我叫左咖哩牛肋肉飯，日本咖哩，甜甜地，唔辣，standard 味道，夠多汁夠你撈飯; 牛肋肉夠淋; 配大量蔬菜，感覺比平時外出用膳健康;個飯唔係白飯，橙橙黃黃，應該係南瓜飯，不過食唔出南瓜味。飯配一小杯麥茶，叫做有野飲，好過無。講真，七八十蚊食個碟頭飯，我覺得好貴lor~…查看更多

是咁的，話說我一直唔鐘意飲台式飮品，一來覺得勁甜，二來覺得太多化學物，所以一直好少會買黎飲。之但係咁啱早一日食完過鐵觀音軟雪糕，覺得唔錯，又咁啱等野食又有d口渴，於是就買黎試下la~ 點知...我地買左2杯飲品：熱珍珠奶茶(30%甜)同熱鮮奶綠(30%甜)。首先，兩杯熱飲係室溫，唔熱ge! 珍珠奶茶有非常少既茶味，唔好飲！不過更差既係鮮奶綠，完全唔知係咩黎！其實睇過樣已知中伏，只有非常非常淺既青色，飲落去，無奶味、無茶味、無甜味！完全唔知飲緊乜！Black list for their drinks! That's all !…查看更多

這間食店真係由細食到大，在我有記憶以來e間麵店已經存在。我小學的時候是讀上午班的，放學之後同媽媽買一碗麵再加2隻雞翼返屋企食，開開心心又一日，簡直係我童年回憶！剛剛好星期日無野做，未食午餐，就諗住食返碗，懷念一下。麵店門面十年如一日，唔知味道又有無改變。要了一碗雞翼肉絲面及2隻煎餃，一共$3x元，雖然比很多食店要平，但比起以往他已經加價不少了。我很喜歡這店的雞翼，像鼓油皇又不是，但又有濃濃的醬油味！之前有朋友說話好油，但這味道的雞翼我從未於第二處食過！雞翼是全翼，非常入味，而且肉質幼滑。肉絲面其實係無咩餸既，因為肉絲唔多，但重點是個汁，這個肉絲汁非常好味，記得如果唔係叫肉絲面都可以要佢個肉絲汁，值得一試！煎餃可以買$7兩隻或姐$10三隻，我又有其實餸，所以就叫了兩隻！煎餃是韮菜餃，最鍾意佢多菜少肉，面且皮又趣又薄！$7兩隻大推！…查看更多

一個又買唔到樓，又唔肯睇少場戲同去少次日本既廢青，下個月又去多次日本自由行，出發前，約埋朋友仔一齊商討一下行程，特登搵返間日本菜，襯返個theme! 餐廳喺享和街，離地鐵站較遠，其實係喺荃灣廣場、荃灣大會堂果邊。餐廳一帶係一堆舊樓、車房、寵物店，最近開左一d cafe 同靚靚甜品舖...格局是否似曾相識？bingo! 假以時日，或者會變成大坑！餐廳細細，只有10個座位圍住料理桌，可以睇到魚生處理(包括煎皮拆骨！)、製作壽司等過程。一坐底，店員就送上開胃小食同熱茶，餐具富日本簡樸美，開胃小食係一小塊漬魚同一d漬青瓜，唔會太酸同咸，好食。店員喺我同朋友打完招呼後，為我地送上餐牌同介紹是日精選，由於大家放工都攰，唔想諗，所以叫左set dinner (2人份量).漬物盛牛蒡係最快KO晒，因為好似好健康ma~ 青瓜有d太酸，黃蘿蔔無試(本身唔鐘意食)，橙橙紅紅果粒唔知係乜，薯片味，我個fd食曬~前菜清煮小芋肉圓 野菜梅果醬沙律賣相極吸引，味道亦然！小芋肉圓其實味道沒有太大驚喜，就是as expected 的味道，沒期望亦沒失望。野菜梅果醬沙律則極好食！當中有菇、蕃薯和南瓜，全部切成差不多形狀大小，應該是先炒(係ar~ 呢個沙律係熱ga !) ，再掛上梅果醬，酸酸甜甜，味道極佳！推薦！月見之刺身壽司盛 - 刺身刺身新鮮肥美，厚切口感很好！月見之刺身壽司盛 - 壽司沒有想到跟餐壽司居然有5件(每人)，雖然飯量比一般少，但壽司師傅可是在你面前即做，保證新鮮！至於味道，刺身新鮮美味，但飯醋的份量稍多，酸味過重。清口小食 林檎紅酒漬蘋果爽甜，有點點紅酒香但沒有一點酒精味，正！椎茸燒賣因為燒賣同鴨都想試，所以店員幫我地安排每樣一人份。燒賣很濃菇香，中間是彈牙蝦肉，很鮮味。柚子味噌焗鴨肉熱辣辣，份量也多。味道香香甜甜，唔"漏"，亦無鴨"蘇"味，很好吃！天婦蘿蝦餅飯唔油，新鮮熱辣，香脆可口，天婦蘿汁拌飯好正，不過已經太飽，食唔曬d飯做大唗鬼。旬之蔬果正常。總結: 用心小店，一定要支持！…查看更多

香港人至愛食海鮮，加上韓風一直未停，海鮮九層塔一黎到香港，即刻大受歡迎。不過，價錢偏貴，所以一直未往一試。好彩，身邊有精打細算朋友，居然發現平時去飲先去既酒樓竟然有海鮮塔，仲要8位用只係$1988，當然即刻call齊人一試龍與鳯la~一上台，絕對先聲奪人，份量十足，見到都開心！第一層:龍蝦+海蝦每人半隻龍蝦，蝦都每人十幾廿隻！而且好新鮮，無霉蝦出現！第二層:象拔貝+大蜆每樣一人一隻，新鮮，唔"un"，超甜！第三層：蟹+扇貝蟹多羔，唔水，好食;扇貝大大隻唔"un"，正！第四層：多寶魚肉滑少骨，不過呢種魚比較淡魚味，ok la~第五層:蜆＋翡翠螺＋東風螺＋青口＋鮑魚仔全部都好鮮甜，而且蒸左咁耐都唔會過熟，不過由於已經食得太多野，亦都怕胃痛，我只係食左少少。第六層:海鮮湯入面有蝦有蜆有菜有豆腐，食左咁多海鮮，飲番個湯暖下胃，正！總結：鍾意食海鮮一定、一定、一定(好重要，所以要講3次) 要試！…查看更多

媽咪同成班靚太去韓國玩，我地都唔執輸，外賣正宗oppa 烹調既韓國炸雞同年糕返屋企食！其實呢間韓國外賣店都開左好耐，雖然喺屋企附近，但一直都未試過。其實佢都有擺幾張摺台喺路邊當堂食，但我地住咁近，當然買返屋企舒舒服服咁食好過。膠袋有可愛韓國公鷄圖案。辣醬炸雞(半隻)份量：大概6-7件味道: 即使外賣回家仍然香脆可口，粉亦唔太厚。面頭既辣醬甜甜辣辣，非常惹味！勁正！辣既程度屬小辣，一般人應該都食到。雞唔會炸到乾曬，仍然有肉汁，就算係雞胸都唔鞋。配椰菜絲沙律同漬蘿白，可以refresh下。辣醬年糕個醬比較浠，所以我地自己加左片芝士落去(好肥仔xD)。個辣醬比炸雞辣，唔嗜辣既要小心。年糕入面有魚片同蛋，材料豐富。總括：辣醬炸雞非常正，勁力推介！另外，原來呢間外賣店有醬油蟹，不過要訂，有興趣既朋友可以一試。…查看更多

人氣長龍店，唔駛多介紹，日日幾多人不畏日曬雨淋、風吹雨打、街邊汽車廢氣排長龍，為既只係一親呢個半熟芝士tart既香澤。但作為一級懶鬼，我最憎排隊，好彩可愛既細妹放工買左兩個返黎請我食。論包裝，不比日本原祖差，一個紙盒兩個tart，經歷Mtr 沙甸魚碰碰車洗禮，返到屋企個tart仍然健在，完好無缺，證明包裝保護夠。論tart外貌，色澤均勻，唔太濃或淡，一郁，震滕滕、開開心！論味道，芝味足，亦夠流心，芝味不比日本原祖同本土美心出品差，但tart皮比較甜及硬，另外兩間略勝一籌。不過，如果你想食芝士tart又唔想過海，其實呢間都食得過！…查看更多

同朋友係銅鑼灣行街行到肚餓，就走左去丹麥食左隻懷舊雞肶！食完炸野之後又口乾，而且又想坐下，搵間cafe坐下已經係不二之選啦！其實果邊cafe都有好幾間，但朋友話佢想試e間既Green tea latte 好耐（原因就係有三眼仔係上面），其實e間cafe我唔係第一次食，但既然出到聲，再食都無所謂既～行過一個街口，都未轉入橫街，已見門口有人龍，，開始排隊既時候係1530，入到去已經1610。其實唔可以話好耐，但入到去又坐得唔係咁舒服，所以其實我真係唔推介想閒下嘆下咖啡既人去。入到去，朋友諗都唔諗緊係要Green tea latte la,仲要confirm下要三眼仔，我就睇下睇下，想飲咖啡，就要左個Rose latte。可能因為要整latte art,所以我地都等左一陣先有野飲，但係有驚喜嫁啵！皆因我杯Rose latte係有kitty係上面嫁！朋友當然大影特影佢杯三眼仔啦！但我估唔到我杯latte都靚靚嫁嘛！令到我對e間cafe加返唔少分！話雖如此，但其實如果對咖啡講究d既話，e到認真麻麻，我杯rose latte完全係勁甜既玫瑰糖漿味，聞落去無玫瑰味都算（飲落去會有陣勁假玫瑰味），仲要勁甜！朋友既green tea latte 就普普通通囉。如果要影相放fb既話，e到不失為一個好地方，但如果想食杯靚咖啡hea下抖下既話，過返幾條馬路，去返d樓上cafe吧！…查看更多

鬍鬚安係由我班同事介紹黎食，坊間的打邊爐好多，有好多都好有自己特色。但如果要講有返傳統港式火鍋加可以慢慢食加食到靚食材既，鬍鬚安真係一個好好既選擇！踏入火鍋季（香港其實成年都係），專程帶屋企黎試下e到既龍蝦火鍋！因為係book到既時間已經預訂埋龍蝦鍋，所以去到既時候佢好快就已經上到個煲黎。今次同屋企人所以人唔多，叫左個龍蝦鍋之後都唔敢叫好多野食，但跟據我的專業推介，我地就叫左臘味餃加炸醬餃、蟶子、擔擔面同牛頸脊！龍蝦湯底味道超鮮甜！但記得記得一定要快d食曬d龍蝦先！龍蝦好新鮮，非常鮮甜，肉質彈牙鮮甜！同埋推介可以係未落其他野既時候就飲左d湯先，可以試到佢既完汁完味！食完龍蝦，我地就落左d餃先，因為要要慢慢煮嘛～煮緊餃既途中，緊係要食下d牛頸脊啦，e到既牛肉厚度十足，件件牛肉都有雪花紋理，而且牛味一流，比係坊間其他打邊爐既薄片肥牛更多左一份口感！大推！食到咁上下，我地追加左老闆娘推介既雪蓮果！雪蓮果生既時候係燈燈地蝦肉色既，但熟左之後後而變左青青地色，爽甜無比！另外芋頭臘味餃配搭特別，冬天食超正，但佢個餃子皮真係有待改善，又厚又粉，令到佢e到既餃子扣曬分！蟶子就無咩驚喜，新鮮既海鮮都無咩好彈。最後我地用膽膽面做結束，雖然麵質彈牙好食，但因為佢個醬本身就好濃味，浪費左個湯底了！…查看更多

重陽節，決定同媽媽大人到大澳走走，當係應一應節啦。其實，我記得幾年前有一次和朋友到大澳影相，路過一間餅店，見到有沙翁新鮮炸起，即直就買左一個黎食，一直都念念不忘那種味道。所以就暗暗決定，下一次到大澳都要再品嚐那種滋味！不過，下一次既大澳尋味之旅竟然相隔了數年，所以我決定今次到大澳，一早已經將佢加入左必食list之中。當到達大澳的時候，大澳已經人頭湧湧，我一邊行一邊張望，因為離上次到訪大澳已有一段時間，餅店的位置已經唔係好記得。好彩行到一半的時候，忽然見到前面有一條人龍。記得上次黎的時間，根本唔洗排隊，估唔到宜家竟然變得咁出名！雖然要排隊，但可能佢不停的出爐，所以其實我都係等左5分鐘到，當見到一個個金黃色的沙翁浮起油面時，店員就將佢地夾起，放係一個裝滿沙糖的盤之中碌黎碌去，之後沙翁就中出爐啦！一咬落去，沙糖的甜味同雞蛋的香味令人欲罷不能，幾下就成個食曬啦～沙翁這種傳統小食係市區買少見少，如果有機會去大澳一定要買個試下呀！…查看更多

終於星期五，lunch當然要食好d~ 逃離又貴又逼既太古坊，同同事跳上小巴直去筲箕灣東大街。因為早2個星期先食完安利，今次就試下新野，見到南駅裝修唔錯，又唔駛等位，所以決定試下。其實睇外表，會以為係cafe一類輕西餐，原來最出名既係海南雞飯！基本上個個都係食雞！佢有龍崗雞同清遠雞，清遠雞貴$10，脾又係加$10，因為我想慳少少又唔想食嚡肉，揀左龍崗雞脾飯！喺位都可以睇到師父切雞情況，衛生與否，一目了然。龍崗雞脾飯餐。有肉有菜，健康。醬料：豉油太甜，蒜溶醬同醋就ok，同雞味好夾。油飯:正！有少少薑米同濃濃椰+斑蘭香，又唔太"漏"，正！湯:特別用小壺裝，賣相別緻。味濃但湯清，仲有雪耳養顔，讚！主角龍崗雞脾：骨已去，啖啖肉，皮香肉滑，份量十足！整體食物水準不俗，可以lunch encore 再去！…查看更多