牛油果的個人專頁

約左好耐冇見o既小師妹食飯，由於之前想去fringe club附近買d野，所以決定見面後至信步行向soho搵野食。行至堅道，忽然傳來一陣好懷舊o既外語歌曲，循聲尋至這裡，見裝潢簡單得黎都幾好feel，門外餐牌價錢亦合理，就決定係佢啦！周四晚上七時半左右，人不算多，侍應生有禮地帶我地埋位，然後介紹牆上黑板所列o既晚餐菜色。呢度o既晚餐一位只係八十多元，實在幾平，另外餐牌上o既任何菜式都可加三十五元轉成套餐﹝包餐湯或沙律，及餐飲﹞。睇左一輪，我地決定要一份晚餐o既芥末醬(dijon)羊胺同一個a la carte轉餐o既蕃茄鴨胸薄餅，兩個人都要左餐湯。是日餐湯係煙肉椰菜絲湯，味道都唔錯，幾有家庭味。呢度供應o既麵包有白薄餅同意大利軟包，前者味道相當唔錯，質地有點煙煙韌韌的，帶少許鹹味，似自家焗製o既出品。主菜o既羊胺有兩條骨，座在一大堆美味炒薯之上，醬汁略鹹但幾惹味，羊胺都算嫩，但都有成七成熟，個人認為生d更好﹝侍應生冇問要幾成熟﹞。炒薯係出色之作，佐以少許洋蔥、蘑菇片、意大利黃瓜片同西蘭花，好味兼飽肚！個薄餅就普通d，個餅皮未夠薄同香口，不過就好夠料。由於我地食左好多薯仔，個薄餅都剩左大半，由小師妹pack番去俾父母宵夜喎。食飽飽，唔食番個甜品又好似差d野，睇黎睇去，我地終於要左一份紅莓拿破崙share食。拿破崙o既酥皮都做得幾好，脹卜卜脆卜卜，中間o既custard唔會太甜，配新鮮紅莓，係不錯的配搭。由於我地兩個都唔慣夜晚飲咖啡，餐飲只係要左熱檸茶，乏善可陳啦！整體而言，呢度o既食物都有水準，地方好坐，侍應生o既服務亦幾好，個人認為都適合大班老友食聚呢！臨走o係shelf度見佢有團體包場o既set price，由$160至$250，都幾平！…查看更多

星期六同母親大人黎銅鑼灣食晏，想搵個好坐o既地方，就黎左呢度。印象中，呢間pokka都已經好耐日子，由以前新大丸年代至今，怕都有十幾年了。裝修方面與前大不相同，一片鮮明o既橙色，感覺都幾精神企理。十二點半左右黎到，都仲未太多人，同大人搵左個靠玻璃位坐。打開餐牌，菜色同以前略有不同，但我o既心頭好月見茄子飯就仲o係度。不過天時暑熱，唔係太想食咁重味o既野，我最後都係要左牛油果海鮮焗飯，另加配餐o既caesar salad同餐茶。大人呢期鍾意食麵，所以要左個九州湯麵。個沙律質素普通，D羅馬生菜都算新鮮，不過除caesar汁外，佢仲加左一pat日式沙律醬,呢兩樣溝埋，味道就有少少怪。個焗飯用料都叫足，加上蟹子o係面，十足和風西餐樣。個白汁加左唔少芝士，飯o既質地又比較腍，整體味道略嫌濃膩，但亦唔難食咁啦！大人個麵就好唔掂，麵質勁腍，湯底略嫌削左D，加上落左好多筍，微微有股唔係幾好聞o既味道。配麵o既日式叉燒反而做得唔錯，煮得夠香腍入味，可惜俾個湯底廢左五成武功。不過咁，o係呢D地方叫拉麵，又真係好難會好食o既。俾得70蚊叫碗麵，不如去札幌之類食啦！總括而言，呢度o既食物水準真係好麻麻，不過勝在地方好坐，大人都冇太大怨言。如果再黎，都係叫下三文治或waffle之類安全D啦！…查看更多

經同事介紹方知呢度開左檔車仔麵，話環境幾企理兼夾係用冇落味精o既湯底，就決定跟佢地黎試下。一點幾黎到，都有唔少辦公室人客坐左o係度，望下人地個碗，size並唔係坊間勁大個碗果隻，係正常湯碗份量。同一般車仔麵相同，呢度都有唔少麵款選擇，基本麵底已有菜，要兩餸15大元，三餸就18元，男同事要雙份麵亦只係加多2元，價錢都幾合理。我要左幼麵跟三餸：豆卜、黑椒雞中翼同炸菜肉絲，湯底加左一羹呢度自製o既酸辣醬﹝另外仲有素沙爹醬可供選擇，食素人士亦可以要素o既清湯底﹞。跟麵o既菜係蕃薯葉，味道幾清新，雖然唔係最嫩o既蕃薯苗，但食落脆口得黎完全冇渣，都唔錯！豆卜同雞翼味道OK，算不過不失；炸菜肉絲係店家自製而非罐頭貨色，味道唔會太鹹，而且帶少少甜味，幾好食！個酸辣醬係同事推介的，食落都幾醒胃，不過就唔係幾辣。另一個食素o既男同事要左芽菜，店家出手太重，裝到成座山仔咁，益左我同另一個同事 D芽菜灼得剛好，仍然幾脆口，o岩晒我口味。整體黎講，呢度地方確係幾企理，食物味道亦唔錯，睇得出店家都講究健康，碗碗麵都一定有菜，而且唔用味精﹝事後確係冇口渴﹞。不過個人認為佢o既基本份量較適合女士─餸多過麵，男士就多數都要加雙份麵至夠飽啦！…查看更多

同事約食晏，提議黎呢度食番個all-day英式早餐，貪佢味道唔錯又好坐喎。兩丁人一點鬆D黎到，只得三幾檯客，o係灣仔區黎講都算係異數。呢度地方果然幾闊落，靠窗部份有好多大大張o既藍色梳化，另一邊則有卡位同普通餐檯。見人少少，我地兩個霸左最入面o既大梳化位坐低。雖然係獨沽一味供應英式早餐，但餐牌選擇上o既選擇都唔少。我就要左一份egg florentine，即係英式鬆餅上舖煙肉、菠菜同水煮蛋﹝一set有兩份﹞，並淋上hollandise sauce，自選side order 就要肉桂蘋果(spiced apple)同茄汁焗豆，餐飲就要左檸檬汁。由於碟頭都唔細，我都分左半份鬆餅俾同事。佢自己就要左其中一款flying pan combo，碟頭比我大好多，有成三隻蛋﹝可自選煮法，同事就要sunny side up﹞、兩片鬆餅、煙肉同豬柳扒，外加自選side order o既水果同茄汁焗豆，配橙汁。呢度o既鬆餅同麥記相若，可能都係嘉頓出品 菠菜份量好夠，配煮得剛好o既水煮蛋同濃濃o既醬汁，實在幾好味，不過肯定超級肥仔！個肉桂蘋果其實即係蘋果批餡，不過應該冇落牛油，清清地都幾對味。其餘食品都係現成野，味道OK得黎冇咩好講。基本上，呢度都係一個唔錯o既傾偈地方，食物味道OK﹝當然談不上話好正啦，不過係煮蛋加各式現成野o者﹞，侍應生o既態度亦幾好，仲要24小時營業添！我見佢地有waffle、pancake等供應，下次有機會都可以黎一試。…查看更多

星期六下午，上完巴西功夫堂後，忽然好想搵個好坐o既地步飲番杯伯爵紅茶，兼嘆下新買o既相集。之前聽聞呢度係碩果僅存o既老式英國餐廳，有正宗英式下午茶供應，就決定上黎一試。近六點黎到，由於時間已晚，人客只有三幾檯。裝修方面真係幾靚，地上o既花磚配上舊式木檯椅、加上椅背鑲有橢圓形鏡o既卡位，好有五、六十年代風情。若非牆上掛o既係水準相當唔掂、仲要賣七千餘元一幅o既肉酸油畫，呢度o既外觀幾乎可以俾滿分。由於時已黃昏，又打算嘆書，我選擇左坐卡位而非對窗位置。侍應生取來餐牌，但提我tea set 供應時間到六點為止。由於我都冇打算叫high tea，所以不以為意，散叫左一份英式鬆餅(scone) 配伯爵紅茶。不久茶到，用o既竟然唔係茶葉而係茶包，仲要係cheap cheap twinning 黃色label 添！唔係化？收成三、四十蚊杯o既茶，仲要係以英式下午茶「聞名」o既地方，好唔掂喎！要用茶包都起碼用black label 啦！跟住鬆餅到，有兩件，配clotted cream同草莓果占，外觀都叫唔錯。個鬆餅質地都幾鬆化，味道及格，可惜杯茶實在令我太失望... 近一百元o既下午茶，實在物非所值。須知英式下午茶o既精粹就係果杯茶，這裡是徒具其形而已。還好有個靚靚環境搭夠，本書又好睇，否則就真係spoil晒我o既靚靚心情啦！埋單時問個侍應，呢度有冇邊隻茶唔係用茶包，佢就答我話下午茶時間內就用茶葉，午餐及晚餐時份就只有茶包。我不禁問佢，沖壺茶o者，唔係特別要一位只係響下午茶時間服務o既大廚負責下話？價錢又完全冇分別，真係令人費解。個侍應淨係笑笑口唔回應，咁我都冇野講。味道同服務方面只俾一分，主要係因為杯茶同佢o既騎呢下午茶安排。單計個鬆餅都值三分的。後記：聽另一位食友講，佢地下午茶時間都係用茶包架咋...…查看更多

帶一位朋友試上巴西功夫(capoeira)堂。由於阿sir搵左幾位較資深o既同學o係月尾一個籌款晚會度表演，所以當晚特別嚴厲，兼要我地呢D唔駛表演o既都跟受訓果幾位用相同節奏上堂，慘啊！落堂後真係發軟蹄，連跳開舞o既老友都大喊腳痛﹝不過佢話阿sir咁靚仔，嚴D都唔怕喎﹞。落堂忽然想飲番杯，但大脾真係好痛，唔行得遠。於是就近黎左呢間老友常黎飲酒o既地方。近九點黎到，只有三幾檯人客，以周五晚上黎講都幾淡。呢度o既裝修係簡單舒適為主，採半開放式設計，內部一致白色疏化椅配燭光矮檯，外圍則有高腳白色有背皮椅，安安靜靜，都幾o岩談心。同老友選左外圍o既高腳位，坐低果下都幾痛架@_@！兩個女仔，各點左一杯紅酒同白酒，另外叫左個希臘沙律同雜菌長通粉(penne)。呢度o既house white係chardonnay，味道幾有水果味，甜甜地，o岩女仔飲，不過我自己就比較喜歡dry D o既白酒。講番食物，侍應生好快就拎黎一大籃麵包，有黑有白，質地非常鬆軟，配橄欖油同黑醋食，好味！個希臘沙律相當有份量，而且賣相都幾靚。各式蔬菜好新鮮爽脆，加上大粒粉紅色果種橄欖，同沾左少少粉炸過o既ricotta cheese﹝一D都唔油，味道幾特別又唔「漏」﹞，味道出奇地好。個長通粉質地煮得剛好，個磨菇汁都算濃而不膩，雖然講唔上非常美味，但都交倒功課啦！同老友傾傾講講，轉眼已經近十點，o拿o拿聲埋單趕船去也。後記：原來呢度收好早，九點幾已經last order，唔怪得之周五晚都咁少人啦！…查看更多

星期一由中午起連煲三場HKIFF電影，走勻中環、葵芳同尖沙咀。由於果朝忽然挑起條筋想食壽司，就約定老友同佢位法國人老公等我八點幾睇完戲後食番餐。老友話上次同另一位成日要食得健康o既女友黎一門，只係食左燒玉子同喬麥麵，見其他人檯面o既刺身同壽司好好樣又冇得食，好遺憾喎，於是提議要黎。我一向都幾鍾意食日式o既燒蛋，亦有聽聞係呢度o既主打，就欣然同意。八點半黎到，都幾多人，好彩老友一早訂定檯。三個人，叫左原味燒玉子、炸蟹肉忌廉球、海鮮沙律、刺身拼盤﹝十款果隻﹞、蔥吞拿魚腩卷、軟殼蟹卷、牛舌同埋京蔥雞肉串燒。飲品就叫左一壺綠茶同一支熱清酒。先講個燒玉子，份量比我想像中大，上檯時係熱辣辣的，質地都算軟滑香口，但就略嫌唔夠彈性同濕左D，在碟上留下一灘湯汁。個人認為呢一味只值70分，作為招牌菜就真係有點不夠份量。老友話佢上次食o既係有雜菇果款，比原味呢款鮮甜些。炸蟹肉忌廉一碟有兩大球，味道就真係好忌廉(creamy)下，不過完全食唔出有蟹肉囉，而且都幾「漏」架。海鮮沙律係雜錦刺身薄片同生菜撈酸酸甜甜的醬汁，刺身唔係太新鮮，菜就幾夠脆，麻麻地啦！刺身拼盤﹝十件果隻﹞包括一小板海膽、三文魚、帶子、蝦等，又係唔多新鮮，唔掂！蔥吞拿魚腩卷份量不少，壽司飯o既味道尚可，但魚腩肉竟然冇咩味？！軟殼蟹卷反而賣相同味道都唔錯，一碟足有八件，另加炸蟹腳伴邊，好夠份量。牛舌同京蔥雞肉串燒亦係不錯的選擇，牛舌燒得恰到好處，咬落微脆又夠味，雞串亦醃得好入味，OK啦！這裡的綠茶雖然要付費，但質素比起其他免費供應的港式日本食肆如千秋樂、麻布茶房仲要差，淡而無味。熱清酒沒有指示係咩牌子，味道亦係麻麻﹝本來唔想叫，不過法國老公想一試，無所謂啦﹞。整體而言，呢度係另一得個樣o既港式日本餐廳，熱食比刺身好，前者水準只係合格，後者就完全唔及格！真係唔明點解咁多人呢！以每人三百大元來說，可以有不少更好的選擇。…查看更多

之前曾經o係雜誌睇過呢間野o既介紹，見都幾近office，就同兩位朋友黎食個晏試下。一點左右黎到，都幾多人，不過地方闊落，都唔覺嘈。呢度本來係食火鍋o既，但午市亦有小菜套餐供應，48元包無味精老火湯、一款小菜加白飯及糖水，都幾平。三個女仔，叫左紅棗蒸雞、煙肉碎炒四季豆同咕嚕蝦球，另加20元一份o既兩個甜品─德國芝士蛋糕同法式焦糖燉蛋(creme brulee)。是日老火湯係牛膀蜜棗紅蘿蔔豬展湯，上檯仍然熱辣辣，味道清甜，幾好。三個小菜就普普通通，個蝦尤其細碟﹝咁o既價錢都唔可以有太多要求啦﹞，四季豆略縑炒得太濕，個雞反而碟頭幾足同質地都算滑。個餐送o既係椰汁紫米露，又係普普通通咁啦！輪到另加o既甜品：個芝士蛋糕係中式細餅舖o既水準，唔難食但亦絕對談不上好食；至於個法式焦糖燉蛋就........個賣相就好正常，只係面頭冇用忌廉、薄荷葉、糖霜之類裝飾........誰不知當我想用匙羹敲開個脆焦糖面時，竟然發現個面係韌o既，完全敲唔碎，再「不」一啖燉蛋食，居然係熱o既，仲要熱到出煙添！！！我就估侍應曾經將個creme brulee用微波爐叮左至俾我地食，味道其實又唔係太差，不過好怪囉，而且食唔倒脆焦糖@_@！整體黎講，呢度都係一個幾抵o既食晏地方，又有好味老火湯，地方亦好坐。不過真係唔好試佢D西式甜品啦！埋單有九折，等於冇加一。…查看更多

同幾位朋友黎happy hour，順便試下呢度o既食物水準如何。六點九黎到，見店面只得三幾檯客，似乎有點冷清。坐低先叫啤酒，呢度選擇好少，亦冇土耳其啤飲，唯一係有一款叫sultan o既生啤，不過味道都幾淡，帶少少甜味，適合唔係好飲酒o既人飲囉。第二杯我都轉左飲Holsten啦！打開餐牌，見佢冇咩小食供應，唯有叫左一個豆茸(hummus)配中東薄餅同一個烤羊肉串($110)先。個豆茸味道麻麻，薄餅亦好削，還好係熱o既。個烤羊肉串反而賣相幾好，係用一支好靚o既鐵籤穿住黎燒的，肉質鮮嫩，只係調味略鹹左D，配菜沙律食都OK。味道果3分同OK的評語都係俾個羊肉串o既。由於都冇咩其他野好食，我地幾個飲左兩杯就轉場lu。後話：其實之前都想黎試佢o既set lunch，點知竟然冇開，睇黎佢仲未好穩定地營業，各位如果想去食晏，最好之前打個電話確認下先。…查看更多

同三位舊同事食遲來的開年飯。由於前幾次出黎都係食西餐，呢次就決定轉下口味，食東南亞野。之前參加OR在曼谷泰菜香港仔店o既聚會，覺得佢D野食都唔錯，就即管去天后分店一試，睇下老細唔o係度時o既質素又如何普通周日o既晚上，細細o既店面係坐滿晒，生意似乎幾好。我地三女一男，叫左細泰式拼盤、金柚子蝦球沙律、海苔蝦薄餅、香茅燒魚、南瓜飯同大泰式甜品拼盤。個泰式拼盤包小食如香葉包燒雞、炸蝦餅、春卷等，味道都OK，不過又談不上特別精彩。金柚子蝦球沙律味道幾特別，撈左椰絲同炸鹹魚仔，配普通水準o既蝦球，都算交倒功課，不過我覺得自己整o既柚子沙律好食過佢好多 海苔蝦薄餅係相當好味o既小食，質地爽脆又唔覺太油膩，同佢o既魷魚薄餅有得揮，兩者都係送啤酒佳品。香茅燒魚係另一個唔錯o既選擇，大大條開邊燒好o既魚上面灑滿香茅同醬料，食落好惹味，個人認為比明爐燒魚更好─其實o係香港，暫時都未食過真係好正o既泰式明爐燒魚。南瓜飯係當晚笑點之一，事緣其中一位女士坐低就叫住要食南瓜飯，咁我咪因應佢o既要求叫囉。點知個飯黎到，佢竟然問係咪俾錯左，點解冇芋頭─原來佢個心一直諗住要食芋頭飯，但個口就講左南瓜飯，真係俾佢笑死！個南瓜飯加入左芒果粒，但味道就好普通，亦冇咩南瓜味，可以不試。全晚高潮結果係個甜品拼盤，內容包括淋左椰汁o既千層糕、糯米同蒸木薯，以及椰漿西米盞。千層糕同糯米上檯時仲係熱辣辣o既，非常新鮮，前者煙韌軟糯，後者就好有口感兼夾個綠豆又香又唔會太甜，正！椰汁木薯係泰國傳統食品，簡樸得黎又幾有咬口，配香甜o既椰汁絕對係最佳拍檔。個西米盞入面用o既係芋頭粒而唔係粟米，總算略償想食芋頭飯果位o既心願啦！整體黎講，呢度都叫食得過，價錢合理，餐牌選擇亦多。當然啦，各類小菜水準只係OK，但亦有一些比較出色o既選擇，加上佢o既甜品真係好出色，都黎得過o既。我臨走都外賣左一客糯米番去睦鄰個笑面同味道分都係俾佢個甜品的！…查看更多

同隔離棟o既同事食晏，由於佢呢排學緊阿拉伯語，特別鍾情食中東野，所以揀左黎呢度一試。之前行經間舖，見佢店面細細，仲以為入面會好逼，估唔到都幾闊落企理，而且都有可以坐八位o既檯呢！一點鬆D黎到，只得兩檯客，灣仔區而言都幾慘淡，可能店面未能吸引到呢一區o既寫字樓人士吧？睇睇餐牌，見佢都有唔少選擇，包括羊、牛、雞、魚o既燒烤薄切(doner)同串燒(kebab)，及中東式o既羊肉碎烤薄餅，全都可以配湯或沙律及包一杯飲品。食中東野，羊肉當然係首選，我地一個叫doner，一個叫kebab，兩個都係跟飯﹝米飯係土耳其o既主糧，以前去當地旅行，至愛就係果度o既羊鞍飯﹞。由於燒烤類o既主菜都有沙律伴碟，所以我地兩個都要左餐湯。呢度o既餐湯係豆湯，比Dhal濃少少，加左幾滴辣油，都幾好味！主菜份量好足，doner羊肉下面仲墊左一塊薄餅添，個飯係加入左一種瓜籽煮o既，食落質感幾特別，同羊肉好搭調，如果再乾身少少就更佳。伴碟o既沙律份量亦唔少，蔬菜新鮮爽脆，用辣椒粉同少少醋調味，配肉類絕對係相得益彰。串燒羊肉非常嫩滑多汁，熱辣辣，正！燒烤薄切o既羊肉又係另一番滋味，微微焦脆o既口感同不失juicy的內在，撈飯一流。食飽飽，再黎番杯土耳其最普遍o既蘋果茶，微帶酸澀o既味道不但完全洗去口中殘留o既肉味，而且可以消滯，個人認為係食肉類燒烤o既最佳配搭。想當年o係當地坐長途巴士，一停站就會為旅客送上一條香水濕紙巾同一杯蘋果茶！…查看更多

同老友食開年飯，本來想去灣仔粵華會食鹽水蜆，但七點幾去到已經係全場爆滿，唯有繼續往銅鑼灣方向住行住搵﹝食﹞啦！途經呢度，老友話食順德菜都好喎，鍾意試新地方o既我當然唔反對啦，就齊齊上樓去也。七點半左右黎到，見第一層都有七、八成滿，望下人地檯面D菜色亦幾對辦，就放心入座。老友話呢期胃口上佳，不過生緊飛滋，唔食得熱氣咁話。兩個女仔，叫左雲勝炒田雞、半隻污糟雞同煎藕餅﹝係呀，煎炸野黎架，不過老友話攤涼D食就唔熱氣喎‧‧‧﹞。污糟雞先上，係用大頭菜絲同紅棗蒸o既，碟頭非常大，我地都嚇左一跳。雞係新鮮雞，蒸得好嫩滑，紅棗仍然鮮甜，大頭菜絲亦爽脆惹味。雖然D雞都斬得幾碎同埋D汁非常好油水，但食落真係唔錯，我地幾乎清晒碟！雲勝炒田雞又係好大碟頭同油水充足，勝瓜都算爽甜，田雞則似係冰鮮貨色，冇咩鮮味，整體味道只係普通而已。煎藕餅一碟有成八件，件件都有手心咁大，本以為食唔晒，點知咬落係出奇地好味─魚肉鮮甜爽脆，配上切碎o既蓮藕粒，既有嚼頭，又夠嫩滑，沾汁食係非常對味，而且一D都唔油膩，送啤酒一流。我一個人都食左三件，老友就一路叫飽，一路夾起佢o既第四件‧‧‧哈哈，結果我地兩個幾乎掃清三大碟菜色，另加一碗飯，自己都覺得好大食！好彩之後行街買牛仔褲時都未至於要買大一碼‧‧‧埋單只係235大元，幾抵食呀！…查看更多

補記2005年o既生日飯。一直想試下呢間以米奇蓮三粒星為號召o既法國餐廳，終於o係去年年尾o既生日一償所願，同三位舊同事黎試佢o既sunset menu。星期五晚上六點半左右黎到，正值黃昏將盡，坐o係靠住落地長窗o既位置，一邊飲香檳，一邊欣賞星光大道、維港以及港島入夜o既美麗景色，再加上燈光SHOW，感覺真係好。同事話訂檯時，餐廳方面表示8:30左右要交檯，所以計劃食完晚餐再轉場飲野。不過結果我地食到九點半都冇人催我地交檯四個人各自叫左自己想食o既野，我就要左鵝肝燉蛋、海鮮沙律、蘑菇湯同埋嫩烤羊鞍配中東飯。個鵝肝燉蛋非常嫩滑，味道濃而不膩，配上香檳o既微酸，係唔錯o既開胃菜色。至於餐前麵包，正如其他食家所評，質素只係普通而已。由於食材新鮮，沙律同湯o既味道都不俗，不過又不至於令人留有太深印象。主菜o既羊鞍非常鮮嫩多汁，沒有太多的調味已令人回味無窮，由呢一度菜可見大廚可以充份發揮食材美味o既功力。伴碟o既係中東長米煮o既香草飯，微帶小茴香o既味道，同羊肉相當合襯。食到呢度，忽然回想起當年在土耳其食過o既羊鞍飯─新鮮烤好o既羊鞍配灑左少少鹽o既白飯，已經非常美味，亦令我回味至今呢！輪到甜品上場。一向嗜食朱古力o既三位舊同事不約而同地叫左士多啤梨拿破崙，只有我叫左個朱古力mousse cake。正在奇怪之際，侍應生已手持一個點左蠟燭o既朱古力蛋糕走過黎─原來同事們事先訂左呢度o既signature cake﹝唔知叫咩名，係一個有幾層唔同質感o既朱古力蛋糕﹞！個生日蛋糕真係好好味，朱古力味濃厚之餘，個底仲有D脆脆地，好似金莎o既野，相比之下，個餐o既朱古力蛋糕當然係輸晒啦！一啖蛋糕、一啖香濃咖啡，如此良辰美景，真係夫復何求！同好友傾傾講講，不時可見遊維港o既渡輪同大型郵輪駛過，可見呢個港口真係幾繁忙架！每次旅行回港，由機艙遙望香港夜景時，都好慶幸自己係香港人呢！由於生日蛋糕都唔細，我地每人仲可以打包一件走添─個盒係橙色o既，設計幾精緻架！在此都要多謝幾位老友同事，俾我享受左一頓美味舒適o既生日飯。由於唔係我埋單，個平均消費只係斷估架咋！…查看更多

唔記得街號，我想講o既係修頓球場對面果間，地址都應該係軒尼斯道，不過係灣仔，唔係銅鑼灣。Anyway，講住先啦！如果寫錯舖，唯有麻煩編輯代執啦本來我係o係皇后大道東果頭食早餐，不過在灣仔重建計劃下，幾間食開o既舖都冇左，唯有行出D搵食啦！呢一朝忽然好想食紫菜，咁o岩見有間潮興，就決定入去食個墨丸米。朝早八點三左近，成間舖得一檯客，阿姐o既招呼都幾殷勤。睇下餐牌，見有我最鍾意o既魚麵，即時轉唔叫墨丸，要左碗魚麵加紫菜。本來對呢度冇咩特別期望，點知個魚麵入口竟然幾彈牙，而且好有魚肉味，配上潮式辣椒油，真係相當唔錯，不過份量就少左D同埋湯底比較重味精。埋單好似係十八大元唔包餐飲。以茶記早餐黎講，其實都唔平，不過個魚麵都叫值回票價啦！…查看更多

波友醒左Towngas Avenue o既三百蚊現金俾我，由於果度冇咩精品好買，波友又成日問住用左未，唯有去食餐飯銷左佢啦！終於約左小暴龍同汀汀o係新年前o既一個星期六，齊齊去食番個晏。下午一點半左右去到，餐廳只有六成滿，故半小時前訂位都可以坐倒靠落地玻璃o既位置。冬末下午，有少少陽光照住，都不失係一個舒適o既傾偈地方。打開餐牌，見set lunch餐牌上半頁列有「前菜、湯加飲品」的菜單，只需$50，下半頁則列有幾款主菜，價錢各異。由於小暴龍未到，我同汀汀決定先叫我地果份。睇左一陣，我地決定叫兩份上半頁o既前菜加湯，配set lunch o既「扁麵伴蝦肉、煙肉、水欖、洋蔥配蕃茄香草汁」同菜單裡o既另一味主菜，「燒大蘑菇釀椰菜花“利梳多”及黑松露菌」。侍應生落左order後，不久又行番轉頭，問我地係咪叫兩份扁麵﹝？﹞。一輪講說後，我地至知原來set lunch菜單上半頁o既「前菜、湯加飲品」係一定要配下半頁o既主菜，不過下半頁o既主菜就唔一定要配上半頁D野。當我地表示個午餐菜單o既寫法會誤導人客時，個侍應生淨係木口木面咁話，餐廳規矩如此，佢都冇辦法喎！咁o既態度，實在令人氣結。其實咁o既做法既冇彈性，又discourage人客叫較貴價o既主菜，有咩謂呢？此外，我地個位後面有一張長檯，係可以用活動間板整成一個隔間的。當我地食到一半時，有一名侍應係咁拉個間板，吱吱聲咁攪左成15分鐘，非常騷擾。其實個隔間o係我地離開時﹝成個鐘後﹞都未有人黎，估計係有人book左搞下午茶派對卦？作為一間懶有格調o既餐廳，我認為佢唔應該o係人客用緊餐時搞個隔間囉，就算時間緊迫，至少都同人客講一聲唔好意思至做啦！講番食物。我地三個女仔，最終叫左一個跟set的湯、兩個沙律、兩個主菜同兩個甜品。由於呢度o既菜名又長又o尋，加上事隔幾個星期，仲記得全名的只有：石榴鴨胸沙律配橘子汁、扁麵伴蝦肉/煙肉/水欖/洋蔥配蕃茄香草汁、燒大蘑菇釀椰菜花“利梳多”及黑松露菌同黑椒菠蘿伴香橙雪芭。有小暴龍o係度都叫咁少野，大家可能都估倒呢度D野食水準唔方好得去邊 個石榴鴨胸沙律係將幾片鴨胸放o係原隻泰國石榴上面，賣相都唔錯，不過食起黎就比較麻煩，而且個橘子汁o既味俾石榴搶晒，似乎唔係一個好o既配搭。另一個沙律係有牛油果、西式雜生菜同芒果片的，D生菜有部份略苦同唔夠新鮮，芒果就酸到連一向嗜酸o既汀汀小姐都頂唔住。個扁麵係不斷o係餐廳電視度直播現煮過程o既一味，麵質煮得唔錯，配蕃茄汁係幾開胃的一個配搭，蝦肉亦尚算新鮮，算係平平凡凡、不過不失o既一味！燒大蘑菇釀椰菜花“利梳多”及黑松露菌係呢度o既廚師推介之一，食落口感卻係麻麻，有D似即食粥果D樁碎o既米。至於話有黑松露菌，真係恕我口拙，唔係好食得出。甜品方面，個黑椒菠蘿伴香橙雪芭又係麻麻地─用原片菠蘿灑黑椒同糖焗，o係中間個窿度放一球假味香橙雪芭，再於四周灑上士多啤梨同芒果粒。基本上黑椒同菠蘿都算係幾得意o既配搭，不過同個香橙雪芭陣味卻係風馬牛不相及，各自各唔精彩。最命係D芒果粒，貫徹始終地酸，真係好離譜。以呢度o既價位同佢自己pitch o既懶有格調形象，個廚師竟然連煮食最基本o既一環─用當造食材都唔識，真係無話可說！另一款甜品應該係芭菲，不過已經唔記得係咩味啦，印象中味道好似普通雪糕，冇咩特別。整體黎講，我覺得呢度個廚真係好冇heart囉，所有食物都係得個樣，味道比起坊間o既連鎖店如UCC、pokka等都唔好得去邊﹝頂多都係材料同裝盤方面略勝一籌而已﹞！加上果幾位服務態度完全唔掂o既侍應生，真係連「徒具軀殼」都談不上。老實講，連鎖快餐店D服務員都比佢地好呀！個人而言，係免費都絕對唔會再黎啦！…查看更多