kkrine's Profile

上年開始留意呢間餅舖，喺深水埗住左咁耐都唔知佢咁把炮，爆江接左手之後生意非常好。我好鍾意佢嘅糯米糍，開心果味同榛子朱古力，呢隻味好似食緊繽紛樂咁。舖頭嘅糯米糍一樣都咁受歡迎，人龍冇以前咁長，我相信佢依家多左去唔同地方擺Booth所以疏導左。上次去太古一樣排好長龍，要一個鐘後先有得拎。近日做緊中秋月餅，趁早啲去碰下運氣買開心月餅同佢嘅冰皮月餅。朝早去冇咁多人，好快就買左，返到屋企第一時間試左先，一食就覺得好伏🙄個月餅乾到爆！餅皮唔鬆化又散一拎就碎，入面個饀其實係將糯米糍個饀放入個月餅度，但咁樣就$45真係好貴，仲貴過啲連鎖店，真係唔值呢個價。另外都買左冰皮試下都係伏伏地😔舖拎時已經覺得唔對路，好似雪得唔夠，到我拎返屋企時已經有水蒸氣喺入面，即刻放返入雪櫃雪硬佢先。食時放一陣回軟，覺得食朱古力多過食月餅，就係脆皮朱古力包住花生醬，唔係啲咩特別野，$40一個。另外買左個迷你五仁俾媽咪，媽咪話只係得個甜字。上年我買唔到，亦好多網友話好食，係咪今年做差左定咁啱呢批做得唔好還是俾人吹大左🤨太大落差喇，我相信我之後唔會再買佢啲月餅，食返糯米糍算，希望佢keep住水準。…Read More

依家仲係有好多人介紹開心果嘅野。上星期睇完乜假期介紹就去買黎試試。呢間麵包舖唔係連鎖，似開左十年以上嘅小店，賣傳統麵包多，價錢係街坊價。不過唔係想像中咁好食，開心果醬好結身，唔甜，有啲咸味，唔知點解我食到有一陣怪味，成個燒餅係淡而無味。$10細細件，唔算好貴，我自己就唔推薦。開心果奶凍，$16正常size。唔知係咪呢間舖嘅出品，甜品都唔甜，佢唔係少甜，而係微甜，成杯食落口都係淡而無味，因為做奶凍嘅關係，開心果都林哂，份量亦多架。奶凍口感正常，不過都係嗰句，冇咩甜，好淡味。總結：唔係難食，一試係ok，唔會再買。…Read More

呢間舖我喺台灣同日本見過經過無數間但從來都冇買過，呢間只係喺觀塘開啲人就一窩風排隊買，人龍都好誇張。今日閒日有野做經過，見條隊只係小貓三四隻，諗都唔諗就去買。我買左朱古力同士多啤梨波提。正常普通野，軟林林少少煙韌咁樣啦，唔係好食有驚喜嘅野。出奇地嘅係士多啤梨好味過朱古力。試完喇，唔會再買黎食，好普通嘅冬甩，廿幾蚊一件細件野都唔平，我買某超市冷藏版翻熱好過，完全唔值排咁耐去買，相信好多人都試過後都唔會專登排隊。…Read More

一鳴已經食過最少三次，每次過黎大埔都會諗到食呢間。有一次專登早啲黎唔使排隊，錯過左就要排隊，有次排左半個鐘都等，原因咪好食都等啦。一鳴好嘅地方係自己可以揀麵條、粗硬同配料。我自己本身鍾意食硬身啲，而師父真係跟足你指示去煮。呢碗係一鳴，即係豬骨湯底。如果第一次食可以先試左呢個先，飲一飲佢個湯。雖然唔係好濃，我就覺得好好飲。肉可以揀叉燒或者豬軟骨。我個人就比較鍾意叉燒，幾次都係揀左叉燒。每碗拉麵都有一隻溏心蛋，我比較鍾意少少少少流心偏熟，熟度啱啱好。呢碗係赤辛，辣度可以自己喺餐牌上揀，不過我自己覺得唔夠辣可以再辣啲，如果你鍾意食櫻花蝦，又食得辣，呢碗啱哂你。呢碗限定，每次黎到都唔同，撞啱今次係黑松露湯底，二話不說就嗌左呢碗。我係鍾意黑松露，不過呢碗確係麻麻地。小食方面全部中規中矩冇咩大特別，不過個人推薦佢嘅豆腐，外脆內軟。總括黎講做得唔錯，同埋價錢平，一百蚊有找，依家好難搵到呢個價錢嘅拉麵而係好食，希望佢可以keep住個水準。…Read More

最近開心果真係hit到乜咁，所有甜品都離不開開心果，目前為止我都中過伏唔少，又貴又難食。今次我黎黃埔都係因為佢，成碗綠色野仲要有開心果碎真係超吸引！都唔平，要$52。我買嗰陣只知佢係開心果冇留意其他，直到食嗰陣先知原來佢有芋圓，真係滿足哂我。好驚佢好凍，因為生完B都盡量戒凍野但出奇地佢唔係冰凍嘅偏向室溫非常好！甜度唔係死甜，適中，係少甜版，開心果味都出嘅，不過再濃啲就perfect 喇。食開心果粒要小心啲，我啲牙肉俾啲尖尖位整到損左。唯一美中不足係佢啲開心果粒連埋衣一齊搞碎。$52貴左少少因為開心果嘅成本。整體好滿意同埋一定會再食，期待佢出多啲開心果嘅甜品。…Read More

都係睇到人介紹我先過黎試下。全日餐價錢中規中矩，合理嘅，都係大路野。我自己叫左個豬扒撈檬。份量對我黎講足嘅，可以自己倒汁，不過好容易倒多左，加上汁偏甜，自己就住去倒啦。豬扒份量夠，唔會炸得好老，有肉汁，唔錯。檬粉份量就少左啲，不過我自己夠食嘅，如果係男士的話就會唔夠食啊。不過最失望係杯野，似乎伙記唔太識沖野飲。杯野黎到見到色水咁淺色就心知不妙，第一啖飲落去淡而無味之餘我都唔知自己飲左啲乜，我淨係知自己叫左杯餐飲美綠。總括黎講唔係啲網紅吹到識飛咁，好普通嘅野食，唔係好好食，亦唔係話佢難食，不過飲品真係唔掂。…Read More

真係好可惜，做得咁好嘅舖頭最後都唔做落去選擇結業。平時都經呢條街，每次黎到都見人龍，出現得人龍嘅我都會想試一試係咪真係咁好食。我叫左個櫻花蝦沾麵都足料啊，仲有一羮蔥花，仲有碗湯嘅櫻花蝦多到鋪滿面。湯一黎到已經聞到好濃烈嘅蝦味，忍唔住要試下個湯先，真係超濃。味道方面都唔差，我叫左啲麵係凍食，因為貪佢可以保持麵嘅煙韌度，維持口感，果然係冇令我失望。男友就叫左最貴嘅黑松露安格斯牛。碗湯真係不得了，嗰陣黑松露味呢，鍾意呢陣味嘅人真心覺得好正，我都舀左一羮黎飲。就咁睇碗麵，啲肉份量合理，一啲都唔孤寒，同埋燒完後生熟不過不失。呢碗麵男友食完都話勁飽，份量都好大。總結：如果唔係知道佢唔做，我地真係會錯過左呢間小店。男友對佢安格斯牛沾麵真係讚不絕口，到依家都話想食返，希望佢地成隊人可以喺第二度再開舖啦。…Read More

今日出黎新蒲崗純粹食個晏，行過都唔知佢門面係咁，側邊睇以為係髮型屋。入到去已經俾收銀個櫃吸引住，放滿哂酥皮撻同酥皮布甸包。口味好多，選擇困難症嘅你一定搞唔掂😂我冇喺店入面影相，因為都多人喺度唔方便。店入面仲有個位置供蝴蝶酥同曲奇客人自行試食，試左啱自己再買正裝。蝴蝶酥好鬆脆，牛油味好出，睇返呢間餅店用嘅係金筒牛油。蝴蝶酥仲好食過某酒店嘅，價錢上差不多。我同老公全部一人一半，食完都飽飽地，飯都唔使食。伯爵麻糬撻個茶味唔算好突出不過都唔差，酥皮放左一晚再翻焗都仲好脆口，亦唔係好甜，呢個可以一試嘅。雞蛋布甸包好正，因為未試過佢嘅產品，所以一定會買原味試下。佢個包外圍都係用酥皮做。一樣，翻焗都好鬆脆。最欣賞佢個燉蛋，好滑仲要有雲呢拿籽！呢個必吃。最後深色有珍珠嘅係珍珠奶茶味嘅都好好食，茶味濃，佢比麻糬撻嗰個茶味更濃更突出。翻焗左珍珠變得怪怪地，但都冇影響成個包嘅口感，呢個好值得試，鍾意茶味嘅一定食佢。總括黎講呢家餅店好值得黎睇下，佢嘅產品好多元化，價錢亦都合理。佢都有好多開心果味嘅野食。最近食得太多開心果甜品喇，試下其他野都俾左唔少驚喜我，呢間絕對值得回頭回購👍…Read More

今日黎荃灣，咁啱經過，就去試試。黎到已經見到有人龍，其實我本來想買開心果燒餅，入去舖頭問條龍係咪排燒餅，老闆只講左句叫我出去等，我咪出去排隊，點知條龍係排熱香餅漢堡。既然排左半個鐘，唔買就對唔住自己，反正都係，不如買一個黎食，好彩只買一個，否則超級後悔！呢個包真係伏到爆，圖片同現實不符我預左，但個味道真係伏到爆炸！個熱香餅係全熟，又乾又硬，M記好食過佢不知幾多倍！媒體同網民吹到咁好食，會唔會係咁呀？啲廣告吹得太厲害。我仲買左開心果撻同開心果燒餅，每樣都係$10。開心果撻，都係言過其實，唔係我想像中咁好食，只係一件好普通嘅牛奶布甸蛋撻上面有啲開心果碎同下底好少量嘅開心果醬，完全冇咩特別冇驚喜，係件燒餅我係覺得OK，但都係好普通。呢間餅店不可再，其實只係俾人吹到捧上天咁，實際真係冇咩特別，多人買嘅都唔係佢啲傳統麵包，只係黎買佢嘅新式野，但真心唔係好好食好特別，尤其係個熱香餅漢堡，雖然只係$15，但一啲都唔值得去排隊買。…Read More

第一次黎，環境唔錯，野食中規中矩，不過呢度唔適合一大班人黎，份量一至兩人ok，如果多人share要叫多啲野食先夠喇。安格斯牛肉他他配脆鍋巴呢個有驚喜，牛肉他他好味，配鍋巴有層次感，呢個值得Encore。龍蝦汁大蝦意大利麵估唔到隻蝦會咁大隻同埋俾咁多汁喎😂如果個汁再濃啲就更正！我自己覺得呢個麵ok，正在常常。我地叫左春雞同豬手，出黎係生嘅，啲肉好紅，無奈係入去廚房再焗都係唔熟唔知發生咩事。如果有老人家喺度，要提一提廚房啲野食要熟啲。燒春雞正常size，兩至三個人食剛剛好，個心唔熟，不過其他食到嘅部分都好滑有肉汁。重點係雞皮係脆嘅，配埋雞肉食真係好好食！主餐牌可以點一款配菜，叫左黑松露炒雜菌。黑松露味好濃，炒得啱啱好。德國蜜糖豬手每次見到有脆皮豬手都好想食。見到好多人推介都叫左份試試。廚師失準？啲皮係煮燶咗，好大陣燒焦味，肉方面，都係唔熟，懷疑爐溫過高所致。呢個失望失望☹️配菜選凱撒沙律。正常野，冇特別，我自己就唔鍾意撈嗰隻溫泉蛋。蘑菇火腿自家手打薄餅餅邊位好脆，蘑菇好多汁，一啲都唔乾，加埋啲火腿片啲咸香味幾好食。裝修上非常有格調。座位都好坐嘅，不過上菜速度比較慢，如果你冇乜耐性嘅， 你就唔適合呢度😏食物質素都ok嘅；價位上，唔算好貴，性價比唔高，回頭率唔高。…Read More

以前舊舖喺深水埗，未夠12點都要排餐懵，今日第一次去油麻地新舖，分別好大呀，座位多好多好多，同埋坐得舒服好多。講到野食，呢個真係好失望。唔係話唔好食，係水準差左好多。湯底冇之前咁好飲咁濃郁，有啲水水地咁，亦冇以前咁足料，蟹糕比以前大舊啲，依然咁好味。整體黎講ok嘅。蝦米卷冇咩大特別，但個自家醬有啲少。呢個始終配呢個花生沙爹醬好食啲。另外叫左杯芒果沙冰，好明顯加左好多糖，變到好人工味咁。以前都有飲開，但唔會咁死甜。斑蘭綠豆糕一樣都係咁好食，我都係極推佢。總結：食物質素比舊舖差得遠喇……唔係話佢難食，係味道上真係退步左好多啊。新舖頭除左得個大字，其他冇咩特別，以前係人手用手機落單，依家係自己QR Code落單。大家埋俾錢前一定要check單。我點4件斑蘭糕外賣，加$2外賣盒上， 佢個系統收左我4個外賣盒，即係一件一個盒。老闆話外賣盒只收$1但佢系統兩蚊😑呢個點餐系統真係廢到爆。員工都係年紀大，對電子支付唔熟悉，唔識out返外賣盒條數，又計錯我錢，最後用現金俾返差價， 呢個我真係有啲擔心。食完都已經十二點幾，冇乜人黎食，人流同以前差好遠。之後我都未必會再幫襯，我都係掛住舊舖嘅味道。…Read More

如果唔係返工都唔會專登過黎食。午市生意非常好，餐廳都大多枱，唔是啲落去真係好難搵到位。越南野來來去去都係湯河同檬。我自己就鍾意吃撈檬，叫左豬扒撈檬。豬扒份量好足，見到相好多件，不過檬粉嘅份量好唔足夠，我自己唔夠飽。餐茶睇你選啲乜，冷熱同價。香茅橙茶起有驚喜，我自己本身唔好香茅，但呢杯野飲出奇地夾同好飲。餐廳價錢中規中矩，以我呢啲打工仔黎講，偶然食下ok。唔知係咪套餐嘅關係，份量偏細份，男士或要考慮加米加飯或者叫正價野食先夠飽。…Read More

我之前真係好鍾意食佢嘅焗雞，一來好食，二來比炸雞健康啲同冇咁熱氣。最愛佢甜辣味，每次黎到必叫。佢嘅沙律都好好食，尤其佢嗰個醬酸酸甜甜，同個沙律真係超夾。另外佢個水果酒都抵飲，好多味揀，飲過芒果或者菠蘿味。之前都食過佢嘅海鮮部隊鍋，食完真係好飽不過，今年七月份同屋企人去時發現之前食開嘅野食完全唔見哂，Menu完全轉哂，原來都係轉左三個月。揀左好耐揀到野食。炒年糕：正常冇乜特別。魷魚沙律：其實都係炸魷魚加落啲菜度，今次嘅沙律冇之前嗰個好好味嘅醬而係用黑醋。炸雞：我叫左半半炸雞嘅原味同大邱辣醬。我真係好掛住佢以前嘅焗雞，真心好好食。白切五花肉：其實係好普通嘅菜式，爐火烤五花肉，然後夾生菜、醬料、蒜同辣椒一齊食。我自己覺得冇乜特別。每次食呢類嘅菜都係貴，咁樣要$288。我真係好想佢賣返舊餐牌嘅野食。新餐牌真係一啲都唔吸引！因為呢樣野，我都已經唔想再幫襯。…Read More

喺呢頭返工都唔知原來有一間咁嘅拉麵店，開喺呢度唔起眼。我都係上網見到佢嘅黑色麵就好有興趣，每次見到啲黑色湯底同麵都會好想試😂跟住食到一嘴都黑好似中毒咁。講返正題，呢度嘅拉麵可以按自己喜好去吃麵。麵嘅軟硬、醬汁多少同有冇蔥。我自己就揀硬麵正常醬汁同多蔥嘅墨汁黑松露拉麵。$88有叉燒同半隻蛋，算係咁，不過我就嫌蛋熟左啲。麵方面，餐廳話係用日本嘅拉麵，係自己拉。的確係同平時食開嘅唔同，麵質比平時嘅軟身少少，其他嘅我真係食唔出。湯底方面我嫌淡左啲唔夠濃，整體黎講係好食唔錯。舖頭裝潢好簡單，仲有啲日本 figure圍住個廚房，相信老闆真係好愛動漫嘅人，另外亦睇到老闆份堅持，成間舖整到好似去左日本咁。…Read More

如果去旺角食甜品，一定會諗起佢，因為眾多黎講食一個甜品可以滿足幾個願意，價錢又合理。一路以來都幫襯左好多次。食黎食去都係嗰幾味，當然都有中過伏啦但整體黎講係唔錯。心太軟：正常冇大特別。呢度嘅份量都算大，有一球雪糕，有得揀味道，不過朱古力心太軟都係配雲呢拿雪糕。朱古力窩夫派對：我係超級朱古力控，十次九次黎都會叫呢個。話就話係二人份量但一人真係食得哂，我男友真係一個食搞掂左😂我都食到三份一。水晶紅豆芋圓杯：呢個真係伏伏地，$52好細碗，飲幾啖就食完。芋圓好少，椰汁底西米底好快見底，呢個食過一次之後都冇再點過，真係好伏，如要食芋圓可以去第二間食。呢間嘅鬆餅係比較實正係偏向蛋糕口感，如果鍾意空氣感就唔啱你朱古力鬆餅：朱古力cream撈埋pancake食好味，我自己本身唔鍾意食cream都食哂。配菜綿花糖獨立食好喇，同pancake真係奇奇怪怪，都係同雪糕一齊食最好。芒果鬆餅：芒果粒又酸又有甜睇你好唔好彩配球芒果雪糕，不過不失，想食芒果野時就會點呢個。提拉米蘇鬆餅：點得最多係佢，通常都係點埋朱古力窩夫派對一齊吃😂等如吃正餐。又可以食Tiramisu，又可以食鬆餅，又可以食雪糕，一次過滿足哂三個願意望，正呀！以上嘅甜品除左朱古力窩夫派對，全部一百蚊有找，揀佢做甜品食堂唔係冇原因。依家物價升得咁勁，見佢都冇狂加價，希望佢呢個價錢可以keep住做落去。…Read More